នៅក្នុងពិធីបិទវេទិកាស្រាវជ្រាវវិទ្យាសាស្ត្រ
សន្និបាតបូកសរុបការងារឆ្នាំ២០១៥ និងទិសដៅឆ្នាំ២០១៦
ព្រមទាំងពិធីប្រគល់សញ្ញាបត្របណ្ឌិតរាជបណ្ឌិត្យសភាកម្ពុជា នារសៀលថ្ងៃទី១៦ ខែធ្នូ
ឆ្នាំ២០១៥ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដី
ទទួលបន្ទុកទីស្ដីការគណរដ្ឋមន្រ្ដី បានមានប្រសាសន៍លើកឡើងថា៖ការអភិវឌ្ឍធនធានមនុស្ស គឺជាកត្ដាមូលដ្ឋានដ៏សំខាន់មិនអាចខ្វះបានសម្រាប់ការអភិវឌ្ឍ
និងការធានាបាននូវសមត្ថភាពប្រកួតប្រជែងប្រកបដោយជោគជ័យរបស់ប្រទេសជាតិនីមួយៗ ជាពិសេស
នៅក្នុងយុគសម័យនៃការកើនឡើងជាបន្តបន្ទាប់ នៃតំបន់ភាវូបនីយកម្ម និងសាកលភាវូបនីយកម្ម
ដែលជាតួអង្គដ៏សំខាន់ ក្នុងការធ្វើសមាហរណកម្មសេដ្ឋកិច្ច និងជំរុញពាណិជ្ជកម្មអន្តរជាតិរបស់ប្រទេសនានានៅលើពិភពលោក។
ឯកឧត្តមបានបន្តថានាពេលបច្ចុប្បន្ននិងទៅអនាគត
កម្ពុជាពិតជាត្រូវការជាចាំបាច់នូវធនធានមនុស្សប្រកប ដោយភាពស្ទាត់ជំនាញ គំនិតច្នៃប្រឌិត
កម្រិតបច្ចេកទេសខ្ពស់ និងរបកគំហើញថ្មីៗ ដើម្បីធានាបាននូវសក្ដានុពលភាពសម្រាប់ការប្រកួតប្រជែងជាអន្តរជាតិ
និងនិរន្ដរភាពនៃការអភិវឌ្ឍសេដ្ឋកិច្ចនិងសង្គមរបស់យើង។ ដើម្បីឆ្លើយតបទៅនឹងតម្រូវការចាំបាច់និងបន្ទាន់ចំពោះមុខនេះ
គោលនយោបាយយុទ្ធសាស្ដ្រ និងផែនការសកម្មភាពរយៈពេលខ្លី មធ្យម និងវែងរបស់រាជរដ្ឋាភិបាល
មិនត្រឹមតែសំដៅទៅលើការអភិវឌ្ឍធនធានមនុស្សទាំងបរិមាណ និងគុណភាពប៉ុណ្ណោះទេ ប៉ុន្ដែរាជរដ្ឋាភិបាលបាននិងកំពុងផ្ដោតការយកចិត្ដទុកដាក់ខ្ពស់ផងដែរ
ដល់ការដាក់ចេញនូវវិធានការនិងយុទ្ធសាស្ត្រនានា សំដៅបង្កើតការងារធ្វើបន្ថែមទៀតជូនប្រជាពលរដ្ឋផងដែរ
ជាអាទិ៍ យុទ្ធសាស្ដ្រពង្រឹងសកម្មភាពបណ្ដុះបណ្ដាលវិជ្ជាជីវៈនិងបច្ចេកទេស (TVET) រួមជាមួយនឹងការបង្កើតឱ្យមានទីភ្នាក់ងារជាតិមុខរបរនិងការងារ (NEA) ដែលជាយុទ្ធសាស្ដ្រសំដៅធ្វើឱ្យការបណ្ដុះបណ្ដាល មានភាពស៊ីសង្វាក់គ្នាជាមួយនឹងតម្រូវការទីផ្សារពលកម្មនាពេលបច្ចុប្បន្ន
និងអនាគត។
ឯកឧត្តមបណ្ឌិតសភាចារ្យបានមានប្រសាសន៍បន្ដថា៖
ការសិក្សាស្រាវជ្រាវ នាំមកនូវកាលានុវត្តភានិងការបង្កើតថ្មី
ព្រមទាំងចូលរួមចំណែកជាធាតុចូលដល់ក្រសួង-ស្ថាប័ននានា
របស់រដ្ឋាភិបាលក្នុងការរៀបចំផែនការ និងគោលនយោបាយប្រកបដោយភាពត្រឹមត្រូវស័ក្កិសិទ្ធិ
និងអាចបញ្ជៀសបាននូវហានីយភ័យនានាជាអតិបរមា។ ដូចនេះគ្រឹះស្ថានឧត្តមសិក្សា
ជាពិសេសរាជបណ្ឌិត្យសភាកម្ពុជា មានតួនាទីសំខាន់ចំនួនពីរធំៗគឺ ការបណ្តុះបណ្តាល និងការសិក្សាស្រាវជ្រាវ ហើយសកម្មភាពទាំងពីរនេះជួយពង្រឹងគ្នាទៅវិញទៅមក
ដើម្បីឧត្តមភាពនៃរាជបណ្ឌិត្យសភាកម្ពុជា
ក្នុងនាមជាស្ថាប័នសិក្សាស្រាវជ្រាវជាន់ខ្ពស់របស់ជាតិ
និងជាគ្រឹះស្ថានអប់រំថ្នាក់ក្រោយឧត្តមសិក្សា។ ក្នុងន័យនេះ រាជបណ្ឌិត្យសភាកម្ពុជា
ត្រូវលើកកម្ពស់ការសិក្សាស្រាវជ្រាវប្រកបដោយគុណភាពខ្ពស់ ដើម្បីបង្កើនប្រសិទ្ធភាព និងប្រសិទ្ធផលក្នុងការបង្រៀន
និងសម្រាប់ផ្សារភ្ជាប់ទ្រឹស្តីនៅនឹងការអនុវត្តជាក់ស្តែង ហើយលទ្ធផលនៃការស្រាវជ្រាវ ត្រូវទទួលបានការលើកទឹកចិត្តឱ្យបោះពុម្ពក្នុងទិនានុប្បវត្តិវិទ្យាសាស្រ្ត
ជាពិសេសទិនានុប្បវត្តិវិទ្យាសាស្រ្តដែលទទួលស្គាល់ក្នុងតំបន់ និងអន្តរជាតិ។
ឯកឧត្តមបណ្ឌិតសភាចារ្យ
បានសង្កត់ធ្ងន់ថា ដើម្បីសម្រេចបានគោលដៅនេះ ថ្នាក់ដឹកនាំ
និងមន្ត្រីរាជការទាំងអស់របស់រាជបណ្ឌិត្យសភាកម្ពុជា
ចាំបាច់ត្រូវអភិវឌ្ឍសមត្ថភាពរបស់ខ្លួនជាប្រចាំទាំងផ្នែកជំនាញបច្ចេកទេស
ការសិក្សាស្រាវជ្រាវ និងភាសាបរទេស ពិសេសអ្នកសិក្សាស្រាវជ្រាវគួរប្រកាន់ខ្ជាប់ជានិច្ច នូវក្រមសីលធម៌អាជីពរៀងៗខ្លួន
ដើម្បីជៀសវាងឱ្យបាននូវការប្រើប្រាស់ស្នាដៃរបស់អ្នកស្រាវជ្រាវដទៃទៀត
ដោយពុំមានផ្តល់នូវប្រភពត្រឹមត្រូវ
និងដើម្បីលើកកម្ពស់សុចរិតភាពក្នុងការសិក្សាស្រាវជ្រាវ
៕
អត្ថបទ៖ សាវឿន
No comments:
Post a Comment