ក្នុងកិច្ចប្រជុំចរចារវាងក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃទី១២ ខែមិថុនា កន្លងទៅ ភាគីទាំងពីរបានឯកភាពគ្នាដាក់ស្ថាប័ន គជប ជាស្ថាប័នឯករាជ្យ និងធ្វើវិសោធនកម្មរដ្ឋធម្មនុញ្ញ បង្កើតជំពូកថ្មីមួយទៀត គឺជំពូកទី១៥ ស្តីពីអង្គការរៀបចំការបោះឆ្នោត។
ការចរចាកន្លងទៅនេះ គណបក្សប្រជាជនកម្ពុជា ពុំដែលបានដាក់លក្ខខណ្ឌណាមួយនោះទេក្នុងការដោះស្រាយភាពមិនចុះសម្រុងគ្នានៅពេលនេះ។ គណបក្សប្រជាជនកម្ពុជា តែងតែធ្វើការចរចាដោយឈរលើស្មារតី បង្រួបបង្រួម ផ្សះផ្សារជាតិ និងគោរពតាមរដ្ឋធម្មនុញ្ញ ជានិច្ច ។ ផ្ទុយទៅវិញ គណបក្សសង្គ្រោះជាតិឯណោះទេ ដែលដាក់លក្ខខណ្ឌក្នុងការចរចានោះ ហើយលក្ខខណ្ឌនេះទៀតសោត មិនមែនដាក់មកដើម្បីដោះស្រាយឡើយ គឺជាការដាក់លក្ខខណ្ឌមួយបន្ថែមបន្ទុកពីរទៅវិញ។ដូច្នេះ វាជាហេតុផលដែលនាំឲ្យការស្វែងរកដំណោះស្រាយ បន្តមិនចុះសម្រុងគ្នាមិនចេះចប់ មិនចេះហើយរហូតមកដល់ពេលនេះ។
ការលើកឡើងដដែលៗរបស់មេដឹកនាំបក្សប្រឆាំង ស្តីពីការទាមទារឲ្យមានការបោះឆ្នោតជ្រើសតាំងសមាជិកគណៈកម្មាធិការជាតិរៀបចំការបោះឆ្នោត សំឡេង២ភាគ៣ នៃសមាជិករដ្ឋសភាទាំងមូល គឺជាលេសបន្តកំដៅនយោបាយនៅកម្ពុជា ក្នុងគោលបំណងកេងយកប្រជាប្រិយភាពពីប្រជាពលរដ្ឋ តែប៉ុណ្ណោះ។
បើក្រឡេកមើលទៅអតីតកាល រដ្ឋធម្មនុញ្ញឆ្នាំ១៩៩៣ គឺតម្រូវឲ្យមានការអនុម័តច្បាប់ និងរាល់ឯកសារគតិយុត្តិផ្សេងៗ ដោយសម្លេង២/៣ នៃសមាជិករដ្ឋសភា។ នៅក្នុងដំណាក់កាលនោះ រាល់ដំណើរការអនុមត្តិច្បាប់តែងតែជួបប្រទះនូវវិបត្តិនយោបាយជាញឹកញាប់ ជាពិសេស គឺវិបត្តិនៃការខ្វះកូរ៉ុមក្នុងកិច្ចប្រជុំម្តងៗ។ គណបក្សដែលមានសម្លេងភាគតិចនៅក្នុងរដ្ឋសភា តែងតែយកគណបក្សឈ្នះឆ្នោតដែលមានសម្លេងភាគច្រើនជាចំណាប់ខ្មាំង ដើម្បីផលប្រយោជន៍នយោបាយរបស់បក្សខ្លួន គឺវិបត្តិនៃការខ្វះកូរ៉ុម មិនអាចប្រជុំបាន ដែលនឹងនាំមកនូវការជាប់គាំងក្នុងការអនុមត្តិច្បាប់ផ្សេងៗ។
ជាក់ស្តែង កាលណោះ គណបក្សសម រង្ស៊ី ដែលជាគណបក្សតូចតាចមួយ មានការបែកបាក់ជាមួយគណបក្ស ហ៊្វុនស៊ីនប៉ិច ដែលដឹកនាំដោយទ្រង់ រណឬទ្ធិ ។ ដោយសារគណបក្សខ្លួន មិនបានទទួលផលប្រយោជន៍ពីការអនុមត្តិច្បាប់ដោយសម្លេង២/៣នេះ និងដោយសារលោក សម រង្ស៊ី ចង់រំសាយកំហឹងជាមួយទ្រង់ រណឬទ្ធិ ផង ទើបកាលពីថ្ងៃទី១៣ ខែកុម្ភៈ ឆ្នាំ២០០៦ គឺលោក សម រង្ស៊ី ខ្លួនឯងផ្ទាល់ បានធ្វើសំណើទៅប្រធានរដ្ឋសភា ក្នុងអាណត្តិរបស់ទ្រង់ រណឬទ្ធិ ជាប្រធានរដ្ឋសភា ដើម្បីធ្វើវិសោធនកម្មរដ្ឋធម្មនុញ្ញពីមតិ២/៣ ទៅជាការសម្រេចដោយសមាជិកសភា ត្រឹម៥០ បូក១ វិញ។
ចាប់ពីពេលនោះមក វិបត្តិជាប់គាំងនយោបាយដោយសារការខ្វះកូរ៉ុម ត្រូវបានផុតរលត់រហូតមកដល់ពេលបច្ចុប្បន្ននេះ។
ដូច្នេះ ការលើកឡើងនូវរូបមន្តឲ្យមានការបោះឆ្នោតជ្រើសតាំងសមាជិកគណៈកម្មាធិការជាតិរៀបចំការបោះឆ្នោត សំឡេង២ភាគ៣ នៃសមាជិករដ្ឋសភា ដោយគណបក្សសង្គ្រោះជាតិ គឺជាចេតនា ដែលនឹងនាំឲ្យមានការជាប់គាំងខាងនយោបាយ យ៉ាងពិតប្រាកដ ហើយទីបំផុត វានឹងនាំដល់ការបរាជ័យក្នុងការធ្វើកំណែទម្រង់នៃការបោះឆ្នោត ដែលបានឯកភាពគ្នានៅក្នុងជំនួបកំពូល ជាមិនខាន។ មានន័យថា « គណបក្សសង្គ្រោះជាតិ មានឆន្ទៈក្នុងការចរចា តែគ្មានឆន្ទៈក្នុងការដោះស្រាយបញ្ហា » និងបានប្រើនូវល្បិច « ស្វាស៊ីបាយរួច ទៅលាបមាត់ពពែ » ដោយគណបក្សសង្គ្រោះជាតិជាអ្នកលើកបញ្ហាឲ្យជាប់គាំង ហើយទម្លាក់កំហុសមកលើគណបក្សប្រជាជនកម្ពុជា ជាអ្នកដោះស្រាយទៅវិញ។
ម៉្យាងវិញទៀត ការប្រកាន់ជំហរ មានះ រឹងរូស របស់លោក កឹម សុខា និងលោក សម រង្ស៊ី ក្នុងការមិនចូលប្រជុំសភានាពេលនេះ ក៏ជាល្បិចកលមួយផងដែរ ក្នុងការគៀងគររកថវិកា ពីបងប្អូនខ្មែររស់នៅបរទេស ដើម្បីទទួលបាននូវលាភសាក្ការៈ ក្នុងការធ្វើមាន ធ្វើបានដល់ក្រុមគ្រួសារខ្លួន តាមរយៈការយកលេសទៅធ្វើទស្សនៈកិច្ច ឬថាទៅបង្ហាញពីគោលជំហររបស់គណបក្សសង្គ្រោះជាតិជាដើម ។
មេបក្សប្រឆាំងទាំងពីរ តែងតែប្តូរវេនគ្នាទៅសុំរៃអង្គៀសប្រាក់ ពីប្រជាពលរដ្ឋខ្មែរនៅបរទេសពីរដ្ឋមួយ ទៅរដ្ឋមួយ ពីប្រទេសមួយ ទៅប្រទេសមួយ ដែលពួកគេខិតខំធ្វើការងារដើម្បីផ្គត់ផ្គង់ជីវភាពគ្រួសារយ៉ាងលំបាក។ ថ្មីៗនេះ ពេលដែលលោក កឹម សុខា ចេញទៅរកលុយ លោក សម រង្ស៊ី នៅក្នុង ហើយឥឡូវនេះ ដល់វេនលោក កឹម សុខា នៅក្នុង លោក សម រង្ស៊ី ចេញរកលុយវិញម្តង។ ពិតជាវិធីងាយៗក្នុងការរកប្រាក់មែន។
នៅទីបំផុត ពេលដែលមេបក្សប្រឆាំងទាំងពីរ អស់សមត្ថភាព ក្នុងការប្រមូលប្រាក់នៅបរទេស ហើយនៅពេលដែលប្រជាពលរដ្ឋនៅបរទេសកាន់តែអស់ជំនឿ មានវិធីមួយទៀតគឺការនិយាយលួងលោមប្រជាពលរដ្ឋក្នុងប្រទេសថា យើងគួរតែដល់ពេលចូលប្រជុំសភាហើយ ដើម្បីធ្វើកំណែទម្រង់នេះ ឬកំណែទម្រង់នោះ ឬនិយាយថា យើងទទួលបានជោគជ័យហើយ ដើម្បីបង្ហាញថាគោរពឆន្ទៈប្រជាពលរដ្ឋ ប៉ុន្តែ ចំណុចសំខាន់ក្នុងការព្រមចូលប្រជុំក្នុងសភា គឺដើម្បីទៅទាមទារប្រាក់ខែរបស់ពួកគេគ្រប់គ្នាតែប៉ុណ្ណោះ។
ដូច្នេះ បក្សប្រឆាំង មិនខុសពីមនុស្សដែលលោភលន់នោះទេ ដោយហេតុថា ក្នុងការចរចាគណបក្សសង្គ្រោះជាតិ តែងដាក់លក្ខខណ្ឌជាបន្តបន្ទាប់ ហើយលក្ខខណ្ឌដែលគណបក្សប្រឆាំងដាក់ដើម្បីចរចានេះ វាមានចេតនាធ្វើឲ្យរាំងស្ទះ ច្រើនជាងដំណោះស្រាយ។
ជារួម ដើម្បីឲ្យមានកំណែទម្រង់ពិតប្រាកដលើប្រព័ន្ធបោះឆ្នោត គឺស្ថាប័នគជប ត្រូវតែការពារដោយច្បាប់រដ្ឋធម្មនុញ្ញ ហើយការបោះឆ្នោតជ្រើសតាំងសមាសភាពគជប ត្រូវតែធ្វើឡើងដោយសមាជិករដ្ឋសភាសំឡេង ៥០បូក១ ទើបស្ថានប័នបោះឆ្នោតនោះឯករាជ្យ ព្រោះរាល់សមាជិកដែលបានជ្រើសតាំងទាំងអស់ សុទ្ធតែមានការឯកភាពគ្នាពីគណបក្ស ដែលមានសម្លេងក្នុងសភា ហើយសមាសភាពគណៈកម្មាធិការរៀបចំការបោះឆ្នោត ដែលបានជ្រើសតាំង នឹងមិនមានការកែប្រែញឹកញាប់នោះឡើយ។
ដោយ ពង្ស សុក្រឹត្យ
No comments:
Post a Comment