សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅថ្ងៃទី១៦មិថុនានេះ បានចាប់ផ្តើមដំណើរទស្សនកិច្ចផ្លូវការរយៈពេល៣ថ្ងៃ នៅទីក្រុងដាកា (Dhaka) នៃសាធារណរដ្ឋប្រជាមានិតបង់ក្លាដែស។ យន្តហោះពិសេសរបស់ព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជាចេញពីរាជធានីភ្នំពេញ ហើយបានធ្វើការចុះចតនៅចំណតអាកាសយានដ្ឋានអន្តរជាតិ Hazrat Shahhalal ប្រកបដោយសុវត្តិភាព នៅវេលាម៉ោង៩ និង៥០នាទី ម៉ោងនៅទីក្រុងដាកា ប្រទេសបង់ក្លាដែស ត្រូវនឹងម៉ោង ១០និង៥០នាទី ម៉ោងនៅព្រះរាជាណាចក្រកម្ពុជា។
វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តីត្រូវបានការធ្វើគារវកិច្ចស្វាគមន៍យ៉ាងកកក្តៅ និងស្និទ្ធស្នាលរាក់ទាក់បំផុត ពីសំណាក់លោកជំទាវ ហ្សេក ហាស៊ីណា (Sheikh Hasina) នាយករដ្ឋមន្រ្តី នៃសាធារណរដ្ឋប្រជាមានិតបង់ក្លាដែស និងឥស្សរជនជាន់ខ្ពស់បង់ក្លាដែសជាច្រើនរូប។
នេះគឺជាលើកទី១ នៃដំណើរបំពេញទស្សនកិច្ចផ្លូវការរបស់ សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា អញ្ជើញទៅបំពេញទស្សនកិច្ចផ្លូវការ នៅសាធារណរដ្ឋប្រជាមានិតបង់ក្លាដែស បន្ទាប់ពីប្រទេសទាំងពីរ ព្រះរាជាណាចក្រកម្ពុជា និងសាធារណរដ្ឋប្រជាមានិតបង់ក្លាដែសបានភ្ជាប់ទំនាក់ទំនងការទូតជាមួយគ្នា កាលពីថ្ងៃទី១៧ ខែកុម្ភៈ ឆ្នាំ១៩៩៣។ កាលពីខែមករាឆ្នាំ២០០១ លោកជំទាវ ហ្សេក ហាស៊ីណានាយករដ្ឋមន្រ្តីបង់ក្លាដេស បានដឹកនាំគណៈប្រតិភូជាន់ខ្ពស់រដ្ឋាភិបាលបង់ក្លាដែស អញ្ជើញមកបំពេញទស្សនកិច្ចផ្លូវការរយៈពេល៣ថ្ងៃ នៅព្រះរាជាណាចក្រកម្ពុជា។
ដំណើរបំពេញទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តី ទៅកាន់ទីក្រុងដាកាសាធារណរដ្ឋប្រជាមានិតបង់ក្លាដែសនៅពេលនេះ គឺដើម្បីពង្រឹងនិងពង្រីកទំនាក់ទំនងកិច្ចសហប្រតិបត្តិការ នៃប្រទេសទាំងពីរកម្ពុជា-បង់ក្លាដែស ឲ្យកាន់តែរឹងមាំថែមទៀត ពិសេសការជំរុញទំនាក់ទំនងពាណិជ្ជកម្ម ទេសចរណ៍ នៃប្រទេសទាំងពីរឲ្យឈានដល់ចំណុចកំពូលថ្មីមួយទៀត។
សូមបញ្ជាក់ថា ក្នុងរយៈពេលជាង២១ឆ្នាំកន្លងមកនេះ ប្រទេសទាំងពីរកម្ពុជា-បង់ក្លាដែស បានពង្រឹងនិងពង្រីកទំនាក់ទំនងកិច្ចសហប្រតិបត្តិការជាមួយគ្នា មានការរីកចំរើនលើគ្រប់វិស័យ ពិសេសលើទំនាក់ទំនងអន្តរជាតិប្រទេសទាំងពីរកម្ពុជា-បង់ក្លាដែស បានធ្វើការគាំទ្រគ្នាទៅវិញទៅមក ក្នុងនោះកម្ពុជាបានគាំទ្រដល់បេក្ខភាពរបស់បង់ក្លាដែស ជាសមាជិកក្រុមប្រឹក្សាប្រតិបត្តិ នៃអង្គការយូណេស្កូ។ បេក្ខភាពនៅក្នុងអង្គការនៃសមុទ្រអន្តរជាតិក្នុងក្រុមB។ ជាសមាជិកក្រុមប្រឹក្សាប្រតិបត្តិសហភាពទូរគមនាគមន៍អន្តរជាតិ។ បេក្ខភាពនៅក្នុងក្រុមប្រឹក្សាសិទ្ធមនុស្សរបស់អង្គការសហប្រជាជាតិ អាណត្តិ២០១៥-២០១៧ ។ សមាជិកគណៈកម្មាធិការ ស្តីពីការលុបបំបាត់ការរើសអើងប្រឆាំងស្រ្តីភេទ របស់អង្គការសហប្រជាជាតិអាណត្តិ២០១៥-២០១៨ ជាមួយគ្នានេះបង់ក្លាដែសបានគាំទ្រកម្ពុជា ជាសមាជិកគណៈកម្មាធិការបេតិកភណ្ឌពិភពលោក និងសមាជិកមិនអចិន្រៃ្តយ៍ នៃក្រុមប្រឹក្សាសន្តិសុខ អង្គការសហប្រជាជាតិអាណត្តិ២០១៣-២០១៤។
គណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញអមដំណើរសម្តេចតេជោនាយករដ្ឋមន្រ្តី អញ្ជើញបំពេញទស្សនកិច្ចផ្លូវការនៅទីក្រុងដាកាសាធារណរដ្ឋប្រជាមានិតបង់ក្លាដែសនៅពេលនេះរួមមានឯកឧត្តម ហោ ណាំ ហុង ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិឯកឧត្តម អ៊ុក រ៉ាប៊ុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាឯកឧត្តម ស្រ៊ី ថាមរុង្គ រដ្ឋមន្រ្តីប្រតិភូអមនាយករដ្ឋមន្រ្តីឯកឧត្តម កៅ គឹមហួន រដ្ឋមន្រ្តីប្រតិភូអមនាយករដ្ឋមន្រ្តី ឯកឧត្តម ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ៕
No comments:
Post a Comment