លោក កែវ រ៉េមី លើកឡើងថា ដោយសារកត្តាសន្តិភាព និងស្ថិរភាពនយោបាយធ្វើឱ្យបរទេសជឿជាក់និងមកវិនិយោគកម្ពុជា

លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានថ្លែងថាសិទ្ធិមនុស្សនៅកម្ពុជា កំពុងមានភាពល្អប្រសើរឡើង។ លោក បានថ្លែងដូចនេះ​ នៅក្នុងសន្និសីទសារព័ត៌មានបន្ទាប់ពី ជួបពិភាក្សាការងារជាមួយលោកស្រីសា​ស្រ្តាចារ្យ Rhona Smith អ្នករាយការណ៍ពិសេសនៃអង្គការសហប្រជាជាតិដើម្បីស្វែងយល់ពីស្ថានភាពសិទ្ធិមនុស្សនៅកម្ពុជាជាពិសេសសិទ្ធិកុមារនៅថ្ងៃទី០៨ ខែសីហា ឆ្នាំ២០១៧ នៅទីស្នាក់ការគណៈកម្មាធិការសិទ្ធិមនុស្សកម្ពុជា។

ប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ថា មានធនាគារធំៗរបស់បរទេស បានមកវិនិយោគនៅកម្ពជា ដែលនេះក៏ដោយសារកត្តាសន្តិភាព និងស្ថិរភាពនយោបាយ ដែលធ្វើឱ្យបរទេសជឿជាក់លើកម្ពុជា ហើយវាជាចំណុចជីពចរមួយយ៉ាងសំខាន់ដែលរាជរដ្ឋាភិបាលកម្ពុជា ត្រូវតែគ្រប់គ្រងឱ្យបាននូវសុខសន្តិភាព និងស្ថិរភាពនយោបាយនេះ។

 ប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ថា សិទ្ធិមនុស្សនៅកម្ពុជា កំពុងតែមានការល្អប្រសើរ ដែលយើងបានគិតគូរដល់កុមារ រហូតគិតដល់សាលារៀនរបស់កុមារ គិតដល់រឿងចំណាកស្រុកដែលកុមារត្រូវធ្វើដំណើរតាមឪពុកម្តាយចេញទៅក្រៅប្រទេស យើងមានវិធីលើកស្ទួយកុមារដែលជាជនជាតិភាគតិច យើងគិតគូរពីសុខភាពកុមារនិងម្តាយ ដូចជាការចាក់វ៉ាក់សាំងការពារជាដើម។

លោក កែវ រ៉េមី ក៏បានបញ្ជាក់ថា ពាក់ព័ន្ធនឹងបញ្ហាពន្ធនាគារវិញ ក៏មានលក្ខណៈល្អប្រសើរផងដែរដូចជាមានហេដ្ឋារចនាសម្ព័ន្ធល្អ អាហារមានអនាម័យ ការអនុញ្ញាតិឱ្យអ្នកជាប់ឃុំឱ្យបានចេញ​ត្រូវពន្លឺថ្ងៃ មានកម្មវិធីកីឡា និងពលកម្មជាដើម។ លោក ក៏បានបន្ថែមថាចំណុចដែលត្រូវកែលំអរគឺទីធ្លារមានការតូចចង្អៀត អ្នកជាប់ពន្ធនាគារមានចំនួនច្រើន និងចាំបាច់ត្រូវមានពេទ្យសង្រ្គោះបឋម ហើយលោក ក៏បានសំណូមពរស្វែងរកថវិកាបន្ថែមទៀតដើម្បីពង្រីកពន្ធនាគារ និងបំពេញចំណុចខ្វះខាតទាំងឡាយ៕

(សូមទស្សនាវីដេអូ) លោកនា​យករដ្ឋមន្រ្តី ហ៊ុន សែន អរគុ​ណដល់​ មូលនិធិ​ជប៉ុន ដែល​បានជួយអ​ភិវឌ្ឍកម្ពុជា

ប្រធានមន្ទីរអប់រំយុវជន និងកីឡា ខេត្តព្រះវិហារថ្មី ត្រូវបានប្រកាសឱ្យចូលកាន់តំណែង ជំនួសមន្រ្ដីចូលនិវត្តន៍

ព្រះវិហារ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅព្រឹកថ្ងៃទី៨ ខែសីហា ឆ្នាំ២០១៧នេះ បានអញ្ជើញប្រកាសឱ្យចូលកាន់តំណែង ប្រធានមន្ទីរអប់រំ យុវជន និងកីឡាថ្មី ខេត្តព្រះវិហារ ដោយមានការអញ្ជើញចូលរួមផងដែរ ពីថ្នាក់ដឹកនាំខេត្តព្រះវិហារ មន្ត្រីរាជការ នៅតាមមន្ទីរអង្គភាពជុំវិញខេត្ត ជាច្រើនរូបទៀត។

ប្រធានមន្ទីរអប់រំ យុវជន និងកីឡា ដែលត្រូវប្រកាសឱ្យចូលកាន់តំណែងនៅពេលនេះគឺលោក ចេង លឹមហ៊ាន់ ជំនួសលោក ហន ឆន ប្រធានចាស់ត្រូវចូលនិវត្តន៍។ លោក ចេង លឹមហ៊ាន់ ប្រធានមន្ទីរថ្មី បានឡើងប្តេជ្ញាថា លោកនឹងខិតខំធ្វើឱ្យមានសុខដុមភាពទាំងក្នុងជួរថ្នាក់ដឹកនាំ ទាំងក្នុងជួរមន្រ្តី អប់រំគ្រប់លំដាប់ថ្នាក់ និងក្នុងក្របខ័ណ្ឌ គ្រូបង្រៀនទាំងអស់ ដើម្បីធានាបាននូវនិរន្តរភាព នៃការងារប្រកបដោយគុណភាព ខិតខំអនុវត្តន៍កិច្ចការទាំងឡាយ ក្នុងវិស័យអប់រំឱ្យបានល្អ ស្របទៅតាមលិខិតបទដ្ឋានគតិយុត្តិ ដែលជាបន្ទាត់ជាត្រីវិស័យ ដើម្បីធានាបាននូវភាពជោគជ័យលើវិស័យអប់រំ បង្កើននូវការទំនាក់ទំនងល្អជាមួយបណ្តាមន្ទីរអង្គភាពពាក់ព័ន្ធនានា ដើម្បីធានាដល់ការអភិវឌ្ឍន៍ លើវិស័យអប់រំ ខិតខំជម្រុញដល់គ្រប់រចនាសម្ព័ន្ធអប់រំឱ្យមានទំនាក់ទំនងល្អ ជាមួយសហគមន៍មូលដ្ឋាន ព្រមទាំងអាជ្ញាធរដែនដីគ្រប់លំដាប់ថ្នាក់ ដើម្បីបង្កើនការចូលរួមអភិវឌ្ឍន៍ លើវិស័យអប់រំប្រកបដោយចីរភាព។

លោក ហង់ ជួនណារ៉ុន បានថ្លែងអបអរសាទរដល់លោក ចេង លឹមហ៊ាន់ ដែលត្រូវបានរាជរដ្ឋភិបាល ផ្តល់ការទុកចិត្តឱ្យចូលកាន់មុខតំណែងប្រធានមន្ទីរអប់រំ យុវជន និងកីឡា ខេត្តព្រះវិហារនាពេលនេះ។
លោកបានជំរុញ ឱ្យអាជ្ញាធរខេត្ត ប្រធានមន្ទីរថ្មី ត្រូវជួយជម្រុញធ្វើយ៉ាងណា ឱ្យមានការចុះឈ្មោះសិស្ស ដែលគ្រប់អាយុចូលរៀន ឱ្យបានច្រើនបន្ថែមទៀត គ្រប់មធ្យមសិក្សាក្នុងគោលដៅ ពង្រឹងធនធានមនុស្ស ក្រសួងអប់រំបានដាក់ចេញនូវគោលនយោបាយ ដោយផ្តល់ជាអត្ថិភាពលើវិស័យអប់រំ និងគោលនយោបាយលើកទឹកចិត្តគ្រូបង្រៀន។

លោកថាលោកនាយករដ្ឋមន្រ្ដី ហ៊ុន សែន បានផ្តល់ប្រាក់បៀរវត្សកើនឡើង រហូតទៅដល់៩៥ម៉ឺន ហើយឆ្នាំ ក្រោយអាចលើសដល់១លានរៀន ដើម្បីឱ្យជីវភាពគ្រូបង្រៀនធូរធារមួយកម្រិតទៀត ដើម្បីគុណភាព អប់រំ ហើយអាជ្ញាធរដែនដី និងមន្ទីរអប់រំ ត្រូវបន្តត្រួតពិនិត្យគុណភាពអប់រំឱ្យមានប្រសិទ្ធភាព ដើម្បីធានាបានគុណភាពចំណេះដឹង ពិតប្រាកដរបស់សិស្ស ៕

ប្រធានមន្ទីររៀបចំដែនដី ខេត្តត្បូងឃ្មុំថ្មី ខណៈប្រធានមន្ទីរចាស់ ផ្លាស់ប្តូរទៅកាន់ប្រធានមន្ទីររៀបចំដែនដី ខេត្តកំពង់ចាម

ត្បូងឃ្មុំ៖ លោក ធួន ជេដ្ឋា ប្រធានមន្ទីររៀបចំដែនដី នគរូបនីយកម្ម សំណង់ និងសូរិយាដីខេត្តត្បូងឃ្មុំ ដែលបានកាន់តំណែងជាង៣ឆ្នាំកន្លងទៅ ចាប់តាំងពីខេត្តត្បូងឃ្មុំ ត្រូវបានបង្កើតឡើងនៅពេលនេះ ត្រូវបានផ្លាស់ប្ដូរទៅកាន់ប្រធានមន្ទីររៀបចំដែនដី នគរូបនីយកម្ម សំណង់ និងសូរិយាដីខេត្តកំពង់ចាម ក្រោយប្រធានមន្ទីររៀបចំដែនដីកំពង់ចាម ចាស់ត្រូវចូលនិវត្តន៍។ ជាមួយគ្នានេះ លោក ប៉ូច សុធារិទ្ធ ជាអនុប្រធានមន្ទីររៀបចំដែនដី ខេត្តត្បូងឃ្មុំ ត្រូវឡើងកាន់តំណែងជាប្រធានមន្ទីររៀបចំដែនដីថ្មី របស់ខេត្តត្បូងឃ្មុំ។

ពិធីប្រកាសផ្លាស់ប្តូរតំណែងនេះ បានប្រព្រឹត្តទៅ នៅព្រឹកថ្ងៃទី៨ ខែសីហា ឆ្នាំ២០១៧នេះ ក្រោមអធិបតីភាព លោក ឆាន់ សាផាន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ តំណាងឱ្យលោករដ្ឋមន្រ្តី ជា សុផារ៉ា ព្រមទាំងមានការចូលរួមប្រធានក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំខេត្ត មន្ទីរអង្គភាពជុំវិញខេត្ត និងមន្រ្តីពាក់ព័ន្ធមួយចំនួនទៀត។

លោក ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងលោក ហាក់ សុខមករា អភិបាលរងខេត្តត្បូងឃ្មុំ បានលើកឡើងថា ការផ្លាស់ប្តូរ ការចូលនិវត្តន៍ គឺជាភារកិច្ចចាំបាច់ និងតម្រូវការរបស់រាជរដ្ឋាភិបាល ស្របតាមគោលនយោបាយជាតិ ជាមួយគ្នានោះ អ្នកចាស់ផ្លាស់ទៅ ដោយភាពរីករាយ ដោយឡែកអ្នកថ្មីឡើងកាន់តំណែងថ្មី ត្រូវបន្តដឹកនាំឱ្យបានប្រសើរ ជំរុញសាមគ្គីភាពផ្ទៃក្នុង យកចិត្តទុកដាក់ បំរើសេវាសាធារណៈជូនប្រជាពលរដ្ឋ ឱ្យបានលឿន និងទាន់ពេលវេលា ជាពិសេសយកតម្លៃសេវានានា ពីប្រជាពលរដ្ឋ ទៅតាមច្បាប់កំណត់។

លោក ប៉ូច សុធារិទ្ធ ដែលទើបឡើងកាន់តំណែងជាប្រធានមន្ទីររៀបចំដែនដី នគរូបនីយកម្ម សំណង់ បានឡើងប្តេជ្ញាចិត្តថា លោកស្មោះត្រង់ចំពោះរាជរដ្ឋាភិបាល គោរព និងខិតខំអនុវត្តកម្មវិធីនយោបាយ របស់រាជរដ្ឋាភិបាល ច្បាប់លិខិតបទដ្ឋានគតិយុត្តិ និងទិសដៅមតិណែនាំ របស់ក្រសួងក៏ដូចជាទិសដៅ របស់ក្រសួងនានាដែលពាក់ព័ន្ធ បន្តនិរន្តភាពការងារក្នុងមន្ទីរ លើសេវាសាធារណៈ ដោយពង្រឹងគុណភាព បច្ចេកទេស ពេលវេលា ជូនដល់ប្រជាពលរដ្ឋ ជាមួយគ្នានោះលោកនឹងរក្សា និងថែទាំសាមគ្គីភាពផ្ទៃក្នុង និងអង្គភាពពាក់ព័ន្ធទាំងអស់ ដើម្បីជាកំលាំងសម្រាប់ពង្រឹងគុណភាព និងប្រសិទ្ធភាពការងារ ។
សូមបញ្ជាក់ថា នៅរសៀលថ្ងៃដដែលនេះ នឹងមានពិធីប្រកាសប្រធានមន្ទីររៀបចំដែនដី នគរូបនីយកម្ម សំណង់ និងសូរិយាដី ខេត្តកំពង់ចាមថ្មី ក្រោយប្រធានមន្ទីរចាស់ ចូលនិវត្តន៍ផងដែរ ៕

វគ្គបណ្ដុះបណ្ដាល ស្ដីពីរបៀបកត់ត្រាការងារអត្រានុកូលដ្ឋាន និងរបៀបប្រើប្រាស់សៀវភៅស្រង់ស្ថិតិកំណើត អាពាហ៍ពិពាហ៍ និងមរណភាព

សាលាខេត្តកំពង់ឆ្នាំង បានរៀបចំវគ្គបណ្ដុះបណ្ដាលរំលឹកឡើងវិញ ស្ដីពីរបៀបកត់ត្រាការងារអត្រានុកូលដ្ឋាន និងរបៀបប្រើប្រាស់សៀវភៅស្រង់ស្ថិតិកំណើត អាពាហ៍ពិពាហ៍ និងមរណភាព ដែលប្រើប្រាស់ដោយមេភូមិ ។

វគ្គបណ្ដុះបណ្ដាលនេះ ធ្វើឡើងនៅថ្ងៃទី០៧ ខែសីហា ឆ្នាំ២០១៧ ក្រោមអធិបតីភាព លោក ហ៊ី ណាត អភិបាលរងខេត្តកំពង់ឆ្នាំង និងលោក ហេង សុផាត អនុប្រធាននាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ និងមានការចូលរួមពីលោក លោកស្រី មន្ត្រីទទួលបន្ទុកការងារ អត្រានុកូលដ្ឋាន ទូទាំងខេត្តសរុបប្រមាណ២៦០នាក់។

ការរៀបចំឲ្យមានវគ្គបណ្ដុះបណ្ដាលឡើងវិញនេះ ធ្វើឡើងក្នុងគោលបំណង ដើម្បីពង្រឹងសមត្ថភាពមន្ត្រីឲ្យយល់ដឹងកាន់តែច្បាប់ពីបែបបទ នីតិវិធីនៃការអនុវត្តការងារអត្រានុកូលដ្ឋានឲ្យកាន់តែល្អប្រសើរថែមទៀត។ ជាមួយគ្នានេះ ដើម្បីត្រួតពិនិត្យការអនុវត្តការងាររបស់មន្ត្រីអត្រានុកូលដ្ឋានឃុំ សង្កាត់ ស្មៀនឃុំ សង្កាត់ និងមន្ត្រីទទួលបន្ទុកការងារអត្រានុកូលដ្ឋានថ្នាក់ខេត្ត ក្រុង ស្រុក។ វគ្គបណ្តុះបណ្តាលនេះ ក៏ដើម្បីជម្រុញឲ្យមន្ត្រីអនុវត្តតាមតួនាទី ភារកិច្ច និងអនុវត្តយ៉ាងម៉ឺងម៉ាត់ តាមគោលការណ៍ណែនាំរបស់ក្រសួងមហាផ្ទៃ។

ជាងនេះទៅទៀត វគ្គបណ្ដុះបណ្ដលនេះ ជាការសិក្សា ផ្ដល់បទពិសោធន៍ លើកឡើងពីបញ្ហាប្រឈមនានា និងសកម្មភាពការងារដែលសម្រេចបានដែលអនុវត្តកាលពីពេលកន្លងមក។

សូមបញ្ជាក់ថា វគ្គបណ្ដុះបណ្ដាលនេះ នឹងប្រព្រឹត្តទៅរយៈពេល៥ថ្ងៃ ដោយគិតចាប់ពីថ្ងៃទី០៧ ដល់ថ្ងៃទី១១ ខែសីហា ឆ្នាំ២០១៧៕

(សូមទស្សនាវីដេអូ) អ្នកនាំពាក្យគណបក្សប្រជាជន បកអាក្រាតផែនការខ្មៅ របស់បន្ទប់ស្ថានការណ៍!

លោកនាយករដ្ឋមន្រ្ដី ហ៊ុន សែន ស្នើភាគីជប៉ុនសិក្សាជាមួយអ្នកជំនាញកម្ពុជា អំពីការកែច្នៃសំរាម នៅទីក្រុងភ្នំពេញ

ជប៉ុន៖ លោកនាយករដ្ឋមន្រ្ដី ហ៊ុន សែន បានស្នើឱ្យភាគីជប៉ុនសិក្សាជាមួយអ្នកជំនាញកម្ពុជា អំពីការកែច្នៃសំរាម នៅទីក្រុងភ្នំពេញ។ លោកនាយករដ្ឋមន្រ្ដី បានលើកឡើងថា «ច្បាស់ណាស់ សំរាមគឺជាបញ្ហាចម្បងធំទីពីរ បន្ទាប់ពីបញ្ហាចរាចរណ៍ នៅក្នុងរាជធានីភ្នំពេញ»។

សូមបញ្ជាក់ថា ប្រសាសន៍របស់លោកនាយករដ្ឋមន្រ្ដី ហ៊ុន សែន ដែលបានលើកឡើងខាងលើនេះ គឺធ្វើឡើង ខណៈរូបលោក និងគណៈប្រតិភូកម្ពុជា បានអញ្ជើញទៅទស្សនកិច្ច នៅរោងចក្រកែច្នៃសំរាម SHIN-KOTO INCINERATION PLANT ដែលគ្រប់គ្រងដោយ អាជ្ញាធរសម្អាតទីក្រុងតូក្យូ និងជិះរថភ្លើងស្វ័យប្រវត្តិ។

តាមការបង្ហោះផ្សាយនៅលើទំព័រ ហ្វេសប៊ុក របស់លោកនាយករដ្ឋមន្ត្រី ហ៊ុន សែន នៅថ្ងៃទី៨ ខែសីហា ឆ្នាំ២០១៧នេះ បានឱ្យដឹងថា អគាររោចក្រកែច្នៃសំរាមរបស់ជប៉ុនមួយនេះ មានកំពស់៦ជាន់ បំពាក់ដោយម៉ាស៊ីន កិនកម្ទេចសំរាម ហើយបែងចែកទៅតាម ប្រភេទសំរាមនីមួយៗ ដែលផលិតចេញជាវត្ថុសម្រាប់ប្រើប្រាស់បានឡើងវិញ។ កាកសំណល់មួយចំនួនគឺយកទៅធ្វើជី និងបំលែងទៅជាថាមពលអគ្គីសនី សម្រាប់ប្រើប្រាស់ផងដែរ។ កម្ពុជាត្រូវការរោងចក្របែបនេះ ដើម្បីកែច្នៃសំរាម ដែលដឹកចេញទៅគរ នៅជាយក្រុងសព្វថ្ងៃ។

បន្ទាប់ពីបានទស្សនកិច្ច នៅរោងចក្រកែច្នៃសំរាមខាងលើនេះហើយ លោកនាយករដ្ឋមន្រ្ដី ហ៊ុន សែន បានអញ្ជើញបន្តដំណើរទៅជិះរថភ្លើងស្វ័យប្រវត្តិ Yarikamome (គ្មានមនុស្សបើកបរ) ចាប់ពីស្ថានីយ៍តូយ៉ូសឺ ទៅដល់ស្ថានីយ៍អារីកិ នៅទីក្រុងតូក្យូ។

សូមរំលឹកថា ក្នុងដំណើរទស្សនកិច្ចផ្លូវការរយៈពេល៤ថ្ងៃ នៅប្រទេសជប៉ុន លោកនាយករដ្ឋមន្រ្តី ក៏បានស្នើឱ្យរដ្ឋាភិបាលជប៉ុន ជួយគិតគូរ ក្នុងការផ្ដល់ជំនួយជាហិរញ្ញវត្ថុ និងបច្ចេកទេសដើម្បីអភិវឌ្ឍលើវិស័យដឹកជញ្ជូន ជាពិសេសរៀបចំឱ្យមានរថភ្លើងស្វ័យប្រវត្តិ លើអាកាសបែបនេះ (Sky Train) ដើម្បីកាត់បន្ថយ នូវការចំណាយ របស់ពលរដ្ឋ ព្រមទាំងកាត់បន្ថយ នូវការកកស្ទះចរាចរណ៍ និងគ្រោះថ្នាក់ផ្សេងៗ៕

លោកនាយករដ្ឋមន្ដ្រីជប៉ុន ផ្ញើសារអបអរសាទរខួប៥០ឆ្នាំ នៃការបង្កើតសមាគមប្រជាជាតិអាស៊ីអាគ្នេយ៍

លោក ស៊ីនហ្សូ អាបេ នាយករដ្ឋមន្រ្តីជប៉ុន តាមរយៈស្ថានទូតជប៉ុនប្រចាំនៅកម្ពុជា បានផ្ញើសារអបអរសាទរ ខួប៥០ឆ្នាំ នៃការបង្កើតសមាគមប្រជាជាតិអាស៊ីអាគ្នេយ៍ (អាស៊ាន) ថ្ងៃទី០៨ ខែសីហា ឆ្នាំ១៩៦៧-ថ្ងៃទី០៨ ខែសីហា ឆ្នាំ២០១៧។
ក្នុងលិខិតអបអរសាទរ លោកនាយករដ្ឋមន្ដ្រី ស៊ីនហ្សូ អាបេ បានលើកឡើងថា លោកសូមសម្តែងនូវអំណរសាទរដ៏ស្មោះចំពោះ ប្រជាជនកម្ពុជា និងអាស៊ានក្នុងឱកាសគម្រប់ខួប៥០ឆ្នាំ នៃការបង្កើតអាស៊ាន នៅថ្ងៃទី៨ ខែសីហា ឆ្នាំ១៩៦៧។ ក្នុងរយៈពេល៥០ឆ្នាំកន្លងមកនេះ ប្រជាជនអាស៊ានក៏ដូចជាប្រជាជនកម្ពុជា បានកសាងឋានៈមួយ ក្នុងវេទិកាអន្តរជាតិ ដោយជម្នះលើភាពផ្សេងៗគ្នា និងបង្កើតសហគមអាស៊ានតែមួយរួមគ្នា។ លោកនាយករដ្ឋមន្ត្រីជប៉ុន បញ្ជាក់ទៀតថា លោកសូមកោតសរសើរពីកិច្ចការទាំងនេះ ដែលមានតម្លៃជាប្រវត្តិសាស្ត្រ។

លោក ស៊ីនហ្សូ អាបេ បានបញ្ជាក់ក្នុងលិខិតថា កាលពីម្សិលមិញ លោកបានជួបជាមួយលោក នាយករដ្ឋមន្រ្ដី ហ៊ុន សែន នៅទីក្រុងតូក្យូ ដោយបានឯកភាពគ្នាថា នឹងបន្តពង្រីកចំណងមិត្តភាពដែលមាននៅ ពេលបច្ចុប្បន្ននេះ ឱ្យកាន់តែទូលំទូលាយ៕

រដ្ឋមន្រ្តីក្រសួងការងារលើកឡើងថា រាជរដ្ឋាភិបាល នឹងបន្តជំរុញការអភិវឌ្ឍវិស័យឧហ្សាហកម្មកាត់ដេរឱ្យកាន់តែមានសន្ទុះឡើង

លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី០៧ ខែសីហា ឆ្នាំ២០១៧ បានទទួល ជួបលោក Ingo Karsten ឯកអគ្គរដ្ឋទូតអាឡឺម៉ង់ប្រចាំនៅកម្ពុជា ដើម្បីសំដែងការគួរសម និងពិភាក្សាការងារនៅទីស្តីការក្រសួង។ ក្នុងជំនួបទ្វេភាគីនោះ លោករដ្ឋមន្រ្តី អ៊ិត សំហេង បានវាយតម្លៃខ្ពស់ចំពោះកិច្ចសហប្រតិប ត្តិការរវាងកម្ពុជា និងអាឡឺម៉ង់ នាពេលកន្លងមក ពិសេសកិច្ចសហប្រតិបត្តិការ ពាណិជ្ជកម្មរវាងប្រទេសទាំងពីរ ដែលបានផ្តល់នូវអត្ថប្រយោជន៍ជាច្រើន ក្នុងការរួមចំណែកអភិវឌ្ឍន៍សេដ្ឋកិច្ចរបស់កម្ពុជា។ ជាក់ស្តែងទំហំពាណិ ជ្ជកម្មដែលកម្ពុជានាំចូលក្នុងទីផ្សារអាឡឺម៉ង់មានប្រមាណជា ១០០០លានដុល្លារ ហើយការបញ្ជាទិញទំនិញកម្ពុជា ពីសំណាក់អាឡឺម៉ង់ គឺបានផ្តល់ការងារជាច្រើនដល់ពលរដ្ឋកម្ពុជាផងដែរ។

លោក អ៊ិត សំហេង ក៏បានជម្រាបជូនអំពីវឌ្ឍនភាពនៃវិស័យការងារ និងបណ្តុះបណ្តាលវិជ្ជាជីវៈ ដែលក្នុងរយៈពេលកន្លងមកនេះ បានខិតខំប្រឹងប្រែងអនុវត្តតាមគោលនយោបាយ របស់រាជរដ្ឋាភិបាល សំដៅពង្រឹងនូវសុខ ដុម នីយកម្មទំនាក់ទំនងវិជ្ជាជីវៈ លើកកម្ពស់លក្ខខណ្ឌការងារ សុខភាព សុវត្ថិភាព ការតំឡើងប្រាក់ឈ្នួលអប្បបរមាជាបន្តបន្ទាប់ ហើយចាប់ពីខែសីហានេះ គណៈកម្មការប្រឹក្សាការងារ នឹងធ្វើការចរចាប្រាក់ឈ្នួលសម្រាប់ឆ្នាំ ២០១៨។ លើសពីនេះទៀតក្រសួង បាននិងកំពុងអនុវត្តគោលនយោបាយជាតិ ស្តីពីមុខរបរ និងការងារ ២០១៥ -២០២៥, គោលនយោបាយជាតិអភិវឌ្ឍ វិស័យឧស្សាហកម្ម ២០១៥-២០២៥, គោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជា្ជជីវៈ ២០១៧-២០២៥។ លោកបន្តថា ថ្មីៗនេះរាជរដ្ឋាភិបាល ទើបតែអនុម័តអនុក្រឹត្យស្តីពីលក្ខខណ្ឌ បែបបទ និងនីតិវិធីនៃការផ្តល់តាវកាលិកផ្នែកហានិភ័យការងារ សម្រាប់មន្រ្តីសាធារណៈ និងផ្នែកថែទាំសុខភាពសម្រាប់មន្រ្តីសាធារណៈ អតីតមន្រ្តីសាធារណៈ និងអតីតយុទ្ធជន ដែលគោលនយោបាយទាំងនេះសុទ្ធសឹងតែជាការលើកកម្ពស់ និងអភិវឌ្ឍលើវិស័យការងារ និងបណ្តុះបណ្តាលវិជ្ជាជីវៈឱ្យកាន់តែប្រសើរឡើង។

លោក អ៊ិត សំហេង បានបញ្ជាក់បន្តថា ក្នុងរយៈពេល១០ឆ្នាំទៅមុខទៀត រាជរដ្ឋាភិបាលនៅតែបន្តនិរន្តរភាពលើវិស័យឧហ្សាហកម្មកាត់ដេរ ឱ្យកាន់តែមានសន្ទុះឡើងតាមរយៈការបង្កើនផលិតភាព និងគុណភាពរបស់ផលិតផល ស្របតាមស្តង់ដារអន្តរជាតិ រក្សាទីផ្សារនាំចេញផលិតផលទៅកាន់ទីផ្សារអន្តរជាតិ ស្របតាមគោលនយោបាយពាណិជ្ជកម្ម ផ្សារភ្ជាប់ទៅនឹងលក្ខខណ្ឌការងារ សំដៅរក្សាគន្លឹះជោគជ័យក្នុងវិស័យនេះឱ្យកាន់តែរីកចម្រើនថែមទៀត។

ជាមួយគ្នានេះដែរ លោករដ្ឋមន្ត្រី ក៏បានវាយតម្លៃខ្ពស់ចំពោះគម្រោង GIZ របស់ប្រទេសអាឡឺម៉ង់ ដែលបានរួមចំណែកយ៉ាងសំខាន់ ក្នុងការចូលរួម និងអភិវឌ្ឍលក្ខណ្ឌការងារ ឱ្យកាន់តែប្រសើរឡើង នៅតាមរោងចក្រកាត់ដេរ និងបានផ្តល់សិទ្ធិព្រមទាំងផលប្រយោជន៍ជាច្រើនទៀត ចំពោះវិស័យឧហ្សាហកម្មកាត់ដេរនៅកម្ពុជា។

លោកអគ្គរដ្ឋទូតអាឡឺម៉ង់ប្រចាំនៅកម្ពុជា ក៏បានសម្តែងនូវការកោតសសើរ និងមានសុទិដ្ឋិនិយមចំពោះរាជរដ្ឋាភិបាលកម្ពុជា ដែលបានយកចិត្តទុកដាក់ ចំពោះកម្មករនិយោជិតទាំងក្នុងជីវភាពរស់នៅ និងសិទ្ធសេរីភាព។ លោក បានមើលឃើញពីការវិវឌ្ឍនៅកម្ពុជា គួរឱ្យកត់សម្គាល់ ពិសេសវិស័យឧហ្សាហកម្មកាត់ដេរ។ ក្នុងមួយឆ្នាំៗសហគមន៍អ៊ឺរ៉ុប គឺជាដៃគូដ៏រឹងមាំ ជាមួយកម្ពុជា ក្នុងការទទួលទិញផលិតផលពីកម្ពុជា នេះដោយសារតែមានកិច្ចសហប្រតិបត្តិការល្អ រវាងកម្ពុជា និងទីផ្សារអ៊ឺរ៉ុប ក្នុងនោះមានប្រទេសអាឡឺម៉ងផងដែរ។ តាមរយៈគម្រោងរបស់អង្គការ GIZ នឹងត្រូវបញ្ចប់នៅដើមឆ្នាំ២០១៨ខាងមុខនេះ ប៉ុន្តែអាចនឹងមានកិច្ចសហប្រតិបត្តិការបន្តទៀត ដើម្បីមើលនូវចន្លោះប្រហោងដែលមិនទាន់បានអភិវឌ្ឍឱ្យគ្រប់ជ្រុងជ្រោយ។

ក្នុងជំនួបនោះដែរ លោកអគ្គរដ្ឋទូតអាឡឺម៉ង់ ក៏បានគាំទ្រចំពោះប្រមុខរាជរដ្ឋាភិបាលកម្ពុជា ដែលបានប្រកាសចុះជួបកម្មករ កម្មការិនីនៅតាមបណ្តារោងចក្រ នេះជាជំហានអភិវឌ្ឍមួយថ្មី របស់រាជរដ្ឋាភិបាលកម្ពុជា ចំពោះការយកចិត្តទុកដាក់ដល់កម្មករនិយោជិត។

លោករដ្ឋមន្រ្តី បានថ្លែងអំណរគុណចំពោះ លោកឯកអគ្គរដ្ឋទូត ដែលបានយកចិត្តទុកដាក់ពីស្ថានភាពនៅកម្ពុជា ជាពិសេសវិស័យការងារ និងបណ្តុះបណ្តាលវិជ្ជាជីវៈ ហើយបានស្នើសុំឱ្យភាគីអាឡឺម៉ង់ បន្តកិច្ចសហប្រតិបត្តិការ លើគ្រប់វិស័យ ជាមួយកម្ពុជាឱ្យបានកាន់តែច្រើនថែមទៀត៕

ចក្រភពអង់គ្លេសត្រៀមខ្លួនជាស្រេចដើម្បីចំណាយ ៤៧ ប៊ីលានដុល្លារ ដើម្បីចាកចេញពីសហភាពអឺរ៉ុប

ចក្រភពអង់គ្លេសបានត្រៀមខ្លួនជាស្រេចដើម្បីចំណាយលុយរហូតដល់ ៤០ ប៊ីលានផោន ស្មើនឹង ៤៧ ប៊ីលានដុល្លារអាមេរិក ជាផ្នែកមួយនៃកិច្ចព្រមព្រៀងដើម្បីចាកចេញពីសហភាពអឺរ៉ុប នេះបើយោងទៅតាមកាសែត Sunday Telegraph ចុះផ្សាយកាលពីចុងថ្ងៃសៅរ៍ ដោយលើកសម្តីមន្ត្រីរដ្ឋាភិបាល ៣ រូប ដោយមិនបញ្ចេញឈ្មោះ។

កាសែតនោះបានចុះផ្សាយថា អង់គ្លេសបានត្រៀមខ្លួនជាស្រេចចំពោះការចំណាយនេះ ដែលជាផ្នែកមួយនៃកិច្ចព្រមព្រៀងដ៏ធំ រាប់បញ្ចូលទាំងកិច្ចព្រមព្រៀងពាណិជ្ជកម្មជាមួយសហភាពអឺរ៉ុប។

កាសែតនោះបានលើកសម្តីប្រភពព័ត៌មានមន្ត្រីជាន់ខ្ពស់មួយរូបដោយនិយាយថា «បើទោះ បីជាអ្នកនយោបាយ និងមហាជនមិនទាន់បានដឹងរឿងរ៉ាវទាំងអស់នោះនៅឡើយក្តី យើងដឹងថា គោលជំហររបស់សហភាពអឺរ៉ុប គឺ ៦០ ប៊ីលានផោន ប៉ុន្តែរឿងពិតជាក់ស្តែងនោះ គឺ ៥០ ប៊ីលានផោន។ សម្រាប់គោលជំហររបស់យើងវិញវាជិតទៅនឹង ៣០ ប៊ីលានផោន ប៉ុន្តែទំហំជាក់ស្តែង គឺ ៤០ ប៊ីលានផោន៕

ប្រភព : Reuters ចុះថ្ងៃទី០៧ ខែសីហា ឆ្នាំ២០១៧

ប្រធានសមាគមអតីតយុទ្ធជនកម្ពុជា ប្រគល់ផ្ទះមួយខ្នង ដល់អតីតយុទ្ធជនខេត្តកំពង់ធំ

នៅព្រឹកថ្ងៃទី០៨ ខែសីហា ឆ្នាំ២០១៧ លោក សោម ស៊ុន មេបញ្ជាការតំបន់ប្រតិបត្តិការសឹករង ខេត្តកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត បានដឹកនាំសហការីទៅប្រគល់ផ្ទះមួយខ្នង ដែលទើបសាងសង់រួច ជូនអតីតយុទ្ធជន ឈ្មោះ អ៊ុង ហុន អាយុ៧៣ឆ្នាំ រស់នៅភូមិតាំងគោក ឃុំសូយោង ស្រុកបារាយណ៍ ខេត្តកំពង់ធំ ដែលជាមន្ត្រីនគរបាលចូលនិវត្តន៍។

លោក អ៊ុង ហុន និងភរិយាមានកូន៣នាក់ ក្នុងនោះកូន២នាក់ ទៅធ្វើកម្មករនៅទីក្រុងភ្នំពេញ នៅសល់កូនម្នាក់ និងចៅពីរនាក់ រស់នៅក្នុងបន្ទុក ក្នុងខ្ទមស្លឹកតូចចង្អៀតមួយ។ ដោយសារមានបញ្ហាសុខភាព លោក អ៊ុង ហុន មិនមានមុខរបរអ្វីពិតប្រាកដសម្រាប់ចិញ្ចឹមជីវិតទេ ដោយសង្ឃឹមទាំងស្រុង លើប្រាក់បៀវត្សចូលនិវត្តន៍ប្រចាំខែ ដែលរាជរដ្ឋាភិបាលផ្តល់ជូនតែប៉ុណ្ណោះ។

ក្រៅពីនេះ លោកបានទៅជួយកិច្ចការខ្លះៗនៅស្នាក់ការគណបក្សប្រជាជនកម្ពុជា ឃុំសូយោងផងដែរ។ ដោយមានការសណ្តោសប្រណីពីលោកនាយករដ្ឋមន្រ្ដី ហ៊ុន សែន ប្រធានសមាគមអតីតយុទ្ធជន នាយឧត្តមសេនីយ៍  គន់ គីម បានបញ្ជាជាបន្ទាន់ឱ្យក្រុមការងារ សមាគមអតីតយុទ្ធជនកម្ពុជាខេត្តកំពង់ធំ ដឹកនាំសហការីសាងសង់លំនៅឋានជូនលោក អ៊ុង ហុន ជាបន្ទាន់ ដែលផ្ទះន ជាផ្ទះលើកទី៤០ហើយរបស់សមាគមអតីតយុទ្ធជនកម្ពុជា។ ផ្ទះដែលប្រគល់ជូននេះ មានទំហំ ៤ម៉ែត្រx៦ម៉ែត្រ ចំណាយថវិកាក្នុងការសាងសង់អស់ទឹកប្រាក់ចំនួន ៦.៤០៩.០០០៛ ។ ក្នុងពិធីប្រគល់ផ្ទះនៅថ្ងៃនេះ ក្រុមការងារសមាគមអតីតយុទ្ធជនកម្ពុជា ខេត្តកំពង់ធំ និងស្រុកបារាយណ៍ បានឧបត្ថម្ភជូនបន្ថែមទៀតនូវ៖ អង្ករចំនួន៥០គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ មុងជ្រលក់ថ្នាំ១  និងថវិកាចំនួន ២៥០.០០០៛ ។ លោក អ៊ុង ហុន និងក្រុមគ្រួសារ គោរពថ្លែងអំណរគុណចំពោះលោកនាយករដ្ឋមន្រ្ដី ហ៊ុន សែន និងលោកស្រី ប៊ុន រ៉ានី ហ៊ុន សែន ដែលជានិច្ចជាកាល លោកទាំទ្វេតែងតែយកចិត្តទុកដាក់គិត គូពីសុខទុក្ខរបស់អតីត យុទ្ធជនយើង នៅគ្រប់ទីកន្លែង និងសូមគោរពជូនពរដល់លោក ទាំងពីរ និងបុត្រា បុត្រី ចៅប្រុសចៅស្រី សូមបានជួបប្រទះតែ និងពុទ្ធពរបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ហើយសូមគាំទ្រលោកជារៀងរហូត ៕

កាកបាទក្រហមខេត្តសៀមរាប ប្រគល់អំណោយដល់គ្រួសារក្រីក្រនៅ ឃុំអន្លង់សំណរ

លោក ឃឹម ប៊ុនសុង អភិបាលនៃគណៈអភិបាលខេត្តសៀមរាប និងជាប្រធានគណៈកម្មាធិការសាខាកាកបាទក្រហមខេត្តសៀមរាប នៅថ្ងៃទី០៧ ខែសីហា ឆ្នាំ២០១៧ បានចាត់តំណាង លោក ស៊ុ សំអន នាយកសាខាកាកបាទក្រហម ខេត្តសៀមរាប បានសហការជាមួយ មន្ត្រីអនុសាខាកាកបាទក្រហម ស្រុកជីក្រែង រួមដំណើរជាមួយ លោក កង ស៊ីជឿន ជំទប់ទី២ ឃុំអន្លង់សំណរ សមាជិកក្រុមប្រឹក្សា ស្មៀនឃុំ អន្លង់សំណរ បានចុះទៅសួរសុខទុក្ខ ដល់គ្រួសារក្រីក្រ ខ្វះខាតខ្លាំង ដែលមានប្តីឈ្មោះ យុង ជា ភេទប្រុស អាយុ ៣៥ឆ្នាំ មុខរបរស៊ីឈ្នួលគេ និងប្រពន្ធឈ្មោះ នង សុឃន់ អាយុ ៣៣ឆ្នាំ រស់នៅភូមិ ត្រពាំងត្រស់ ឃុំ អន្លង់សំណរ ស្រុក ជីក្រែង ខេត្ត សៀមរាប។

ក្នុងការចុះសួរសុខទុក្ខនេះដែរ កាកបាទក្រហមកម្ពុជាខេត្តសៀមរាប ក៏បាននាំយកអង្ករ៥០គីឡូក្រាម ទឹកសុទ្ធ៥យួរ ត្រីខ១យួរ ប្រេងឆា១ដប មី១កេស កន្ទេល១ សារ៉ុង១ ក្រមា១ មុង១ ភួយ១ យកទៅជូនប្រជាពលរដ្ឋក្រីក្រខាងលើ ដើម្បីជួយសម្រាលទុក្ខលំបាកដល់ក្រុមគ្រួសារនេះមួយរយៈ។
សូមបញ្ជាក់ថា គ្រួសារនេះធ្លាប់ត្រូវបានអនុសាខាកាកបាទក្រហមស្រុកជីក្រែង ចុះផ្តល់នូវគ្រឿងឧបភោគបរិភោគ និងសំភារៈ មួយចំនួនម្តងរួចមកហើយ កាលពីថ្ងៃទី០៥ ខែសីហា ឆ្នាំ២០១៧៕

ប្រធានក្រុមប្រឹក្សាខេត្តបាត់ដំបង ដឹកនាំមន្រ្ដីដាំកូនឈើ៥០០០ដើម ក្នុងឱកាសប្រារព្វពិធីរុក្ខទិវា

បាត់ដំបង៖ រដ្ឋបាលខេត្តបាត់ដំបង បានចែកកូនឈើចំនួន៥០០០ដើម ឱ្យទៅស្រុក និងក្រុងនានា ក្នុងខេត្តយកទៅដាំ នៅតាមមូលដ្ឋានរបស់ខ្លួន នៅក្នុងឱកាសប្រារព្ធពិធីរុក្ខទិវា៩កក្កដា នៅព្រឹកថ្ងៃទី៨ ខែសីហា ឆ្នាំ២០១៧ នៅក្នុងបរិវេណ វត្តវាលទ្រា ស្ថិតក្នុងភូមិវាលទ្រា ឃុំអូរតាគី ស្រុកថ្មគោល។

ពិធីនេះមានការអញ្ជើញចូលរួមពីលោក អ៊ុយ រី ប្រធានក្រុមប្រឹក្សាខេត្តបាត់ដំបង លោក ច័ន្ទ សុផល អភិបាលខេត្តបាត់ដំបង សមាជិកព្រឹទ្ធសភា អភិបាលរងខេត្ត អភិបាល អភិបាលរងស្រុក ក្រុងទាំង១៤ ថ្នាក់ដឹកនាំមន្រ្តីរាជការគ្រប់ស្ថាប័នរដ្ឋនានា កងកម្លាំងទាំង៣ប្រភេទ មន្រ្តីជំនាញរដ្ឋបាលព្រៃឈើ សិស្សានុសិស្ស អាជ្ញាធរមូលដ្ឋាន និងប្រជាពលរដ្ឋជាច្រើនរូបទៀត។

លោក ច័ន្ទ សុផល បានបញ្ជាក់ថា រុក្ខទិវាជាតិ៩កក្កដា ខេត្តបាត់ដំបងតែងបានធ្វើពិធីនេះជារៀងរាល់ឆ្នាំ ដោយបានចែកកូនឈើចម្រុះយកទៅដាំ នៅតាមបណ្តាលស្រុក គោលដៅនានា តាមទីសារណៈ ដើម្បីជាគុណប្រយោជន៍ ទាក់ទាញទឹកភ្លៀងសម្រាប់ប្រជាពលរដ្ឋធ្វើស្រែចំការ និងបានកាត់បន្ថយការបម្រែបម្រួល អាកាសធាតុនៅលើពិភពលោក ពិសេសនៅកម្ពុជាយើងបច្ចប្បន្ន។

លោកអភិបាលខេត្តបានបន្តថា «បាត់ដំបងយើងមានសក្តានុពលខ្លាំង ក្នុងវិស័យកសិកម្មក៏ជា ជង្រុកស្រូវផង នោះ បច្ចុប្បន្នមានឡសម្ងួតស្រូវក្នុងខេត្ត ដែលមានកម្លាំងអាចផលិតសម្ងួតស្រូវបាន៣០តោនក្នុង១ថ្ងៃនិង អនាគតអាចបានច្រើនជាងនេះផងដែរ។ លោកបន្ថែមថា ចំពោះបញ្ហាទឹកលែងជាការព្រួយបារម្មណ៍ហើយ ដោយយើងបានកសាងទំនប់ទឹកពហុបំណង ដែលអាចទុកបានជាង២០០ម៉ែត្រ និងមានវារីអគ្គិសនី១កន្លែង មានទំហំ១៣មេកាវ៉ាត់ នៅស្រុករតន:មណ្ឌល និងបន្តធ្វើទំនប់ទឹកនៅសាលាតាអន សម្រាប់ទប់ទឹកឱ្យបានគ្រប់គ្រាន់ទុកជូនពលរដ្ឋធ្វើស្រែ»។

ជាកិច្ចបញ្ចប់គណអធិបតីក៏បានចែកចំណោយ សៀវភៅ ប៊ិច ថវិកា ដល់សិស្សានុសិស្ស និងចែកសារុងជូន ប្រជាពលរដ្ឋម្នាក់១ និងចែកកូនឈើតាមបណ្តាស្រុកនានា យកទៅដាំក្នុងមូលដ្ឋានរបស់ខ្លួន ដើម្បីជានិមិត្តរូបផងដែរ៕