សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលកម្ពុជាបានដាក់ចេញ និងជំរុញការអនុវត្តយុទ្ធសាស្ត្រអភិវឌ្ឍសដ្ឋកិច្ចក្រៅប្រព័ន្ធឱ្យមានលទ្ធភាពចូលរួមនៅក្នុងសេដ្ឋកិច្ចក្នុងប្រព័ន្ធ ហើយទទួលបានផលប្រយោជន៍ពីប្រព័ន្ធគាំទ្រសង្គមជាផ្លូវការតែម្តង។
សម្តេចធិបតី បានថ្លែងបន្តថា ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានសម្បទានសំដៅលើកកម្ពស់ការផលិត និងការរកទីផ្សារឱ្យមានលំនឹងផ្នែកកសិផលសំខាន់ៗ និងការដាក់ពង្រាយមន្ត្រីបច្ចេកទេសកសិកម្ម ទៅគ្រប់ឃុំសង្កាត់ដែលមានសកម្មភាពកសិកម្មទូទាំងប្រទេស។
នាឱកាសនោះដែរ សម្ដេចធិបតី បានសង្កត់ធ្ងន់ថា មនុស្សនៅតែជាកត្តាស្នូលនៃគោលនយោបាយរបស់យើង ដូច្នេះហើយការអប់រំនិងបណ្តុះបណ្តាលមូលធនមនុស្ស គឺជាយុទ្ធសាស្ត្រវិនិយោគដ៏វែងឆ្ងាយរបស់រាជរដ្ឋាភិបាល ដើម្បីបង្កើនមូលដ្ឋានសង្គមសេដ្ឋកិច្ច និងឧស្សាហកម្មដែលផ្តោតលើជំនាញនិងចំណេះដឹង ដើម្បីធានាបានថា កម្ពុជានឹងមិនធ្លាក់ចូលប្រទេសដែលមានចំណូលមធ្យមនៅក្នុងដំណើរការដ៏វែងឆ្ងាយដែលឈានឆ្ពោះទៅជាប្រទេសចំណូលខ្ពស់នៅឆ្នាំ២០៥០ នាពេលខាងមុខ។
សម្តេចធិបតី ហ៊ុន ម៉ាណែត បានថ្លែងដូចនេះ នៅព្រឹកថ្ងៃទី០៦ ខែសីហា ឆ្នាំ២០២៤ ក្នុងឱកាសអញ្ជើញប្រគល់សញ្ញាបត្រ ជូននិស្សិតសាកលវិទ្យាល័យពុទ្ធិសាស្ត្រ ដែលបញ្ចប់ការសិក្សាដោយជោគជ័យចំនួន ៥៦១នាក់៕
