មេដឹកនាំគណបក្សមហាសាមគ្គីជាតិខ្មែរ បានគាំទ្រការសម្រេចចិត្តដ៏ត្រឹមត្រូវរបស់សម្តេចតេជោ ហ៊ុន សែន ប្រធានព្រឹទ្ធសភា ក្នុងការជំរុញឱ្យកើតមានគម្រោងព្រែកជីកហ្វូណនតេជោឱ្យបានឆាប់កាន់តែល្អ គឺបង្ហាញឱ្យឃើញពីស្មារតីជាតិកាន់តែច្បាស់ ក្រោមមាគ៌ាដឹកនាំរបស់សម្តេចតេជោ ដែលបានខិតខំប្រឹងប្រែងយកសាច់ស្រស់ឈាមស្រស់ដូរយកសន្តិភាព ការបង្រួបបង្រួមជាតិ និងការអភិវឌ្ឍន៍ប្រទេសកម្ពុជា ជាង៤០ឆ្នាំមកនេះ គឺវាលំបាកណាស់សម្រាប់កម្ពុជាដ៏កំសាត់មួយនេះ។
លោកបណ្ឌិត ហ៊ាង គឹមស្រឿន ប្រធានគណបក្សមហាសាមគ្គីជាតិខ្មែរ បានមានប្រសាសន៍ថា ជុំវិញការយកចិត្តទុកចិត្តគម្រោងព្រែកជីកហ្វូណន គឺជាស្នូលឆ្អឹងខ្នងសេដ្ឋកិច្ចជាតិ ដ៏មានសក្តានុពលដើរតួនាទីដ៏មានសារៈសំខាន់ក្នុងការតភ្ជាប់ការដឹកជញ្ជូនផ្លូវទឹកដែលកម្ពុជាអាចធ្វើបាន សម្តេចតេជោធ្វើបាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីធ្វើបាន ហើយប្រជាជនកម្ពុជាមានការជឿជាក់គាំទ្រការសម្រេចចិត្តដ៏ត្រឹមត្រូវរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដើម្បីទុកជាគុណតម្លៃនៃសេដ្ឋកិច្ចជាតិ និងប្រជាជនកម្ពុជា។
គួរបញ្ជាក់ដែរថា គម្រោងព្រែកជីកហ្វូណនតេជោ មានអត្ថប្រយោជន៍ដ៏មហាសាលសម្រាប់កម្ពុជា ពោលគឺ វាអាចកាត់បន្ថយរយៈពេលចម្ងាយ និងតម្លៃនៃការដឹកជញ្ជូនដែលអំណោយផលដល់ភាពប្រកួតប្រជែងនៃទំនិញកម្ពុជា។ អាចបង្កើតតំបន់ពាណិជ្ជកម្ម មជ្ឈមណ្ឌលភស្តុភារកម្ម និងការអភិវឌ្ឍផែរណបថ្មីៗជាច្រើន។ ក្រៅពីនោះ ព្រែកជីកនេះក៏អំណោយផលដល់ការអភិវឌ្ឍកសិកម្ម ប្រព័ន្ធធារាសាស្ត្រ វារីវប្បកម្ម និងការចិញ្ចឹមសត្វផងដែរ។
ព្រែកជីកនេះ ក៏នឹងជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា ដោយបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផ្សេងៗទៀត ថែមទាំងជួយជំរុញការអភិវឌ្ឍផ្នែកនគរូបនីយកម្ម ក៏ដូចជាផ្នែកអចលនទ្រព្យ និងប្រយោជន៍ជាច្រើនទៀតដែលពលរដ្ឋរស់នៅតាមដងព្រែកទទួលបាន៕
