.jpg)
.jpg)
Friday, December 05, 2014
មន្ត្រីអាជ្ញាធរអប្សរាអះអាងថា មជ្ឈមណ្ឌលបណ្តុះបណ្តាលអង្គរ ត្រូវបានបង្កើតជាលើកដំបូងនៅកម្ពុជា
អជ្ញាធរអប្សរា
បានសម្ពោធបើកជាផ្លូវការហើយនូវមជ្ឈមណ្ឌលបណ្តុះបណ្តាលអង្គរដើម្បីលើកកំពស់
ការកសាង សមត្ថភាព ធនធានមនុស្ស លើមុខជំនាញឯកទេសបេតិកភណ្ឌ នៅកម្ពុជាក្នុងគោលដៅឆ្លើយតបទៅនិងតម្រូវការជាក់ស្តែងរបស់អង្គរ។
លោកស្រី
ម៉ម វណ្ណរតន៍ ឧបការីអាជ្ញាធរអប្សរា បានឲ្យដឹងថា ការសម្រេចបង្កើតឡើងនូវមជ្ឈមណ្ឌលបណ្តុះបណ្តាលអង្គរនេះគឺឆ្លើយតបទៅ
នឹងអនុសាសន៍លើកឡើងរបស់កិច្ចប្រជុំគណកម្មាធិការបច្ចេក ទេសលើកទី២៣ នៃICC អង្គរ និងគំនិតផ្តួចផ្តើមរបស់ឯកឧត្តមបណ្ឌិតសភាចារ្យឧបនាយក
រដ្ឋមន្ត្រី សុខ អាន ដែលតែងបានបង្ហាញអំពីកង្វល់នានាទាក់ទងនឹងបញ្ហាកង្វះខាតធនធានមនុស្ស
សម្រាប់ថែ រក្សាការពារ និងអភិរក្សនូវសម្បត្តិបេតិកភណ្ឌវប្បធម៌ ទើបបានជំរុញឲ្យមានការបង្កើត
នូវមជ្ឈមណ្ឌល នេះឡើង។
វត្ថុបំណងសំខាន់នៃការបង្កើតឡើងនូវមជ្ឈមណ្ឌលបណ្តុះបណ្តាលអង្គរនេះ
គឺដើម្បីធ្វើកិច្ចសហការជា មួយក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បះ ក្នុងគោលដៅពង្រឹងការងារ
បណ្តុះបណ្តាលអំពីជំនាញបច្ចេកទេសបេតិកភណ្ឌដល់បុគ្គលិកជំនាញ របស់អជ្ញាធរអប្សរា
រួមទាំងអ្នក ពាក់ព័ន្ធទាំងឡាយ ឲ្យគេទទួលបាននូវចំណេះដឹង វិធីសាស្ត្រ
និងបច្ចេកទេស ក្នុងការការពារ ថែទាំ និងអភិរក្សសម្បត្តិបេតិកភណ្ឌឲ្យបានត្រឹមត្រូវល្អក្នុងភាពច្បាស់លាស់
និងមានការទទួលខុសត្រូវខ្ពស់ ដើម្បីអាចទប់ស្កាត់បានការបំផ្លិចបំផ្លាញទាំងឡាយទាំងកត្តាមនុស្ស
ក៏ដូចជាកត្តាធម្មជាតិមកលើ សម្បត្តិវប្បធម៌របស់ជាតិយើង ។
លោកស្រីបានគូសបញ្ចាក់ថា
បើទោះបីមជ្ឈមណ្ឌលនេះទើបបានបង្កើតឡើងជាលើកដំបូងក៏ពិតមែន ប៉ុន្តែមិនមានន័យថាអជ្ញាធរអប្សរាក្នុងពេលកន្លងមកនោះមិនបានគិតគូរ
បណ្តុះបណ្តាលចំណេះជំនាញដល់បុគ្គលិកនោះទេ កិច្ចការនេះមានភាពចាំបាច់ណាស់ដែលទាមទារឲ្យអជ្ញាធរអប្សរាខិតខំ
ជាប្រចាំ លើការងារពង្រឹងសមត្ថភាពឲ្យដល់មន្ត្រី និងបុគ្គលិករបស់ខ្លួន ដើម្បីគេអាចបំពេញភារកិច្ចក្នុងការ
ការពារ ថែរក្សា និងអភិរក្សទ្រពសម្ប្បត្តិបេតិកភណ្ឌវប្បម៌របស់ជាតិ បានគង់វង្សល្អប្រកបដោ
ប្រសិទ្ធភាព។
លោកស្រីរំពឹងថា
បន្ទាប់ពីមជ្ឈមណ្ឌលបណ្តុះបណ្តាលអង្គរនេះ បានសម្ពោធដាក់ឲ្យដំណើរការជាផ្លូវ
ការហើយ វាគឺជាផ្នែកមួយដ៏មានសារៈសំខាន់សម្រាប់អាជ្ញាធរអប្សរាដែលអាចពង្រឹក
បានកាន់តែ ប្រសើរឡើងថែមទៀតក្នុងការផលិតធនធានមនុស្ស សម្រាប់ឆ្លើយតប ទៅនឹងសេចក្តីត្រូវការចាំបាច់
នានាក្នុងការការពារថែទាំ និងអភិរក្សបេតិកភណ្ឌ គឺមិនត្រឹមតែនៅក្នុងរង្វង់
តំបន់អង្គរប៉ុណ្ណោះទេ ប៉ុន្តែអាចជួយបំពេញឲ្យនូវតម្រូវកាការពារសម្បត្តិបេតិកភណ្ឌនៅគ្រប់តំបន់ទូទាំងប្រទេស
ទាំងក្នុងតម្រូវការបច្ចុប្បន្ន ក៏ដូចក្នុងពេលអនាគត។
សម្តេចតេជោ ហ៊ុន សែន ប្រគល់សញ្ញាបត្រដល់និស្សិតវិទ្យាស្ថាន ខ្មែរជំនាន់ថ្មី ១៩៩៧នាក់
សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅព្រឹកថ្ងៃទី០៤ ខែធ្នូ ឆ្នាំ២០១៤នេះ បានអញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រ ដល់និស្សិត ១៩៩៧នាក់
មកពី វិទ្យាស្ថានខ្មែរជំនាន់ថ្មីនៅវិទ្យាស្ថានជាតិអប់រំក្នុងរាជធានីភ្នំពេញ។
បន្ទាប់ពី លោក ណុប នរិន្ទ នាយកវិទ្យាស្ថានខ្មែរជំនាន់ថ្មី រាយការណ៍ឱ្យដឹងពីចំនួនជ័យលាភីដែលត្រូវទទួលសញ្ញាបត្រក៏ដូចជាការខិតខំរបស់វិទ្យាស្ថានរួចមកវិទ្យាស្ថាន សម្តេចតេជោនាយករដ្ឋមន្ត្រី នៅតែបន្តលើកទឹកចិត្ត ជំរុញឱ្យមានការយកចិត្តទុកដាក់អភិវឌ្ឍ កសាងធនធានមនុស្សឱ្យកាន់តែរីកចំរើនទាំងបរិមាណ និងគុណភាព ព្រោះថាធនធានផ្នែកខួរក្បាលនេះ គឺសូម្បីតែនៅក្នុងរបប ប៉ុល ពត ដែលគេអាចដកហូតនូវកម្មសិទ្ធិទ្រព្យសម្បត្តិ អាយុជីវិតរបស់មនុស្ស តែគេមិនអាចដកហូតនូវចំណេះដឹងខាងបញ្ញាខួរក្បាលរបស់មនុស្សបានទេ។ ក្នុងន័យនេះ សម្តេចបានជំរុញឱ្យបន្តការខិតខំក្នុងការបណ្តុះបណ្តាលតទៅទៀត។
ទាក់ទងនឹងគម្លាតនៃការអភិវឌ្ឍធនធានមនុស្ស និងការអភិវឌ្ឍប្រទេសជាតិ ដែលពាក់ព័ន្ធ នឹងអតុល្យភាព ដូចដែលសម្តេចធ្លាប់បានលើកឡើងរួចមកហើយនោះ ក្នុងបញ្ហានេះ សម្តេចតេជោ ក៏បានបញ្ជាក់ថា ប្រទេសរបស់យើងសព្វថ្ងៃ គឺកំពុងតែបង្កើតនូវវប្បធម៌នៃការសន្ទនា ដែលត្រូវជាប្រធានបទ នៃការពិភាក្សា រវាងគណបក្សប្រជាជនកម្ពុជា និងគណបក្សសង្គ្រោះជាតិជាពិសេស រវាងសម្តេចផ្ទាល់ ជាមួយនឹងឯកឧត្តម សម រង្ស៊ី គឺការខិតខំបង្កើតនូវវប្បធម៌នៃការសន្ទនានៅក្នុងសភាជាច្រើនដង ដែលបាននិយាយអំពីបញ្ហានេះជាមួយគ្នា ហើយថ្ងៃមុនសម្តេចក៏បានលើកឡើង អតុល្យភាព១២យ៉ាងនៅវិទ្យាស្ថានបច្ចេកវិទ្យាកម្ពុជា
ហើយបញ្ហានេះ ឯកឧត្តម សម រង្ស៊ី ក៏បានសរសេរសំបុត្រមួយ មកសម្តេចដោយគាំទ្រចំពោះការលើកឡើងនូវអតុល្យភាព១២យ៉ាងនោះ។
ប៉ុន្តែឯកឧត្តម សម រង្ស៊ី ក៏បានលើកនូវអតុល្យភាពចំនួនពីរទៀត នោះគឺទី១.គម្លាតរវាងអ្នកមាន និងអ្នកក្រ ទៅលើបញ្ហាទ្រព្យសម្បត្តិ
និងទី២.គឺគម្លាតរវាងធនធានធម្មជាតិ និងការធ្វើអាជីវកម្ម ។ ការលើកឡើងបន្ថែមនូវបញ្ហាពីរចំណុចទៀតនេះ សម្តេចក៏បានយល់ស្រប និងបានសរសេរសំបុត្រជូនឯកឧត្តមសមរង្ស៊ីវិញផងដែរ។
សម្តេចតេជោ នាយករដ្ឋមន្ត្រី ក៏បានយកឱកាសនេះ លើកឡើងថា ការបង្កើតនូវវប្បធម៌សន្ទនាគឺជំនួសឱ្យការដើរជេរគ្នានៅតាមចិញ្ចើមផ្លូវ ដែលប៉ុន្មានថ្ងៃនេះ គេបានទៅស្រែកជេរនៅកន្លែងមួយចំនួន។ សម្តេចតេជោប្រមុខរាជរដ្ឋាភិបាលបានបន្តថា ការចេះតែដើរស្រែកជេរបែបនេះ ប្រយ័ត្នសម្លេងភាគច្រើន គេបុកទំលាក់នោះ។ សម្តេចតេជោបន្តថា គេឱ្យធ្វើជាអនុប្រធានសភា ឬប្រធានសភាគឺកុំភ្លេច តួនាទី របស់ខ្លួនព្រោះប្រធានសភា ឬអនុប្រធានសភានោះជាអ្នកសម្របសម្រួល រវាងបណ្តាអ្នកតំណាងរាស្ត្រ គឺមិនមែនឱ្យអ្នកឯងដើរតែជេរគេនោះឡើយ ហើយបើចង់ផ្តល់យោបល់ទៅលើបញ្ហាអ្វី គឺតាមរយៈប្រធានក្រុមអ្នកតំណាងរាស្ត្រនោះ ហើយប្រធានក្រុមអ្នកតំណាងរាស្ត្រយកមកជជែកជាមួយនាយករដ្ឋមន្ត្រី ឬជាមួយប្រធានក្រុមអ្នកតំណាងរាស្ត្ររបស់គណបក្សប្រជាជនកម្ពុជា។
សម្តេចតេជោ ប្រមុខរាជរដ្ឋាភិបាលបានបន្តលើកឡើងអំពីការដោះស្រាយគម្លាតរវាងអ្នកមាន និងអ្នកក្រ គឺយើងមិនអាចធ្វើតាមប៉ុលពត បំផ្លាញចោលអ្នកមានឱ្យទៅជាក្រ ដូចគ្នាទាំងអស់គឺមិនអាចទេ ដូច្នេះវិធីដោះស្រាយបញ្ហានេះ មានវិធានការ ច្រើនរាប់ទាំងបញ្ហាប្រយុទ្ធប្រឆាំងអំពើពុករលួយ ការរំលោភអំណាច ការបំពានទៅលើទ្រព្យសម្បត្តិរដ្ឋ ឬទ្រព្យសម្បត្តិអ្នកដទៃដើម្បីធ្វើមានធ្វើបាន គឺយើងត្រូវខិតខំ ធ្វើម៉េចឱ្យប្រជាពលរដ្ឋរបស់យើង បានទទួល ពីការអភិវឌ្ឍនោះ ក្នុងនោះ សម្តេចនៅតែចាត់ទុកថា ការកាត់បន្ថយគម្លាតខាងបញ្ញាគឺជាតម្រូវការសំខាន់ ព្រោះការកាត់បន្ថយគម្លាតខាងទ្រព្យសម្បត្តិគឺវាមិនងាយទេ ប៉ុន្តែការកាត់បន្ថយគម្លាតខាង ខួរក្បាលអាចងាយនឹងធ្វើបាន។ ដូច្នេះ សម្តេចនៅតែបន្តការលើកទឹកចិត្តជំរុញអភិវឌ្ឍផ្នែកធនធានខួរក្បាលនេះ៕
កិច្ចប្រជុំពេញអង្គលើកទី២១ របស់គណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ និងអភិវឌ្ឍរម្មនីយដ្ឋានប្រវត្តិសាស្រ្ដអង្គរ ( ICCអង្គរ )
គណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ ការអភិវឌ្ឍ និងអភិរក្សនៅតំបន់រម្មណីយដ្ឋាន អង្គរដែលហៅកាត់ថា ICC អង្គរ នៅព្រឹកថ្ងៃទី៤ ខែ ធ្នូ
ឆ្នាំ២០១៤ នេះ បានប្រារព្ធពិធីបើកសម័យប្រជុំ ពេញអង្គលើកទី២១ របស់ខ្លួន នៅសាលសន្និសីទអង្គរនៃមជ្ឈមណ្ឌលអាជ្ញាធរជាតិអប្សរា ក្រោមវត្តមានរបស់សហប្រធាន ICC ភាគីបារាំង ឯកឧត្តម Jean Claude Poimboeuf
ឯកអគ្គរដ្ឋទូតប្រចាំកម្ពុជា ភាគីជប៉ុន ឯកឧត្តម Yuji
KUMAMARU ឯកអគ្គរាជទូតប្រចាំព្រះរាជាណាចក្រកម្ពុជា និងមានការចូលរួមពីប្រតិភូរាជរដ្ឋាភិបាលដឹកនាំដោយ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដី និងជាប្រធានអាជ្ញាធរជាតិអប្សរា ព្រមទាំងមានការចូលរួមពីសមាជិកមកពីបណ្ដាប្រទេសផ្សេងៗជាច្រើនទៀតផងដែរ។ នៅក្នុងកិច្ចប្រជុំពេញអង្គរលើកទី២១នេះ អង្គរប្រជុំពិភាក្សា និងត្រួតពិនិត្យលើរបាយការណ៍សកម្មភាពនានា ដែលអនុវត្តដោយអាជ្ញាធរជាតិអប្សរា និងរបាយការណ៍របស់លេខាធិការដ្ឋាន ICC ក្រៅពីនោះ អង្កប្រជុំក៍បានលើកឡើង អំពីរបកគំហើញ និងការអភិវឌ្ឍថ្មីៗ ដូចជាការអភិរក្ស ការជួសជុលប្រាង្គប្រាសាទ ការស្រាវជ្រាវ និងការអភិវឌ្ឍប្រកបដោយចីរភាព នៅក្នុងតំបន់រម្មណីយដ្ឋានអង្គរ
ដោយផ្តោតទៅនឹងប្រធានបទ ពិភាក្សារួមមាន ការអនុវត្តផែនការគ្រប់គ្រងទេសចរអង្គរ និងការបំពុលបរិស្ថាននៅក្នុងឧទ្យានអង្គរ និងដាក់ចេញនូវអនុសាសន៍ជាផ្លូវការសម្រាប់គម្រោង អភិរក្ស
និងអភិវឌ្ឍ។
នៅក្នុងឱកាសនោះដែរ
ឯកឧត្តមបណ្ឌិតសភាចារ្យ សុខ អាន បានសម្ដែងការកោតសរសើរនឹងវាយតម្លៃខ្ពស់ចំពោះកិច្ចប្រជុំដ៏មានសារៈសំខាន់នាពេលនេះ ព្រមទាំងបានលើកឡើងអំពីកិច្ច ខំប្រឹងប្រែងរបស់ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ
នៃព្រះរាជាណាចក្រកម្ពុជា និងសម្ដេចអគ្គមហាសេនាបតីតេជោ ហ៊ុន សែនដែលតែងតែបានចូលរួមលើកទឹកចិត្តរាល់សកម្មភាពរបស់គណៈកម្មាធិការសម្របសម្រួលអន្ដរជាតិដើម្បីអភិរក្ស និងការពារប្រាសាទអង្គរដែលជាបេតិកភណ្ឌពិភពលោក ដោយទទួលបានជោគជ័យជាង៣ទស្សវត្សកន្លមកនេះ បានបង្ហាញឲ្យឃើញពីការចូលរួមប្រកប ដោយមិត្តភាព ពីបណ្ដាប្រទេសជាដៃគូ ក្នុងការផ្ដល់ក្រុមអ្នកជំនាញបច្ចេកទេស និងថវិកា ដោយបាន សហការ យ៉ាងល្អជាមួយអាជ្ញាធរជាតិអប្សរាលើការងារថែទាំ និងអភិរក្សអន្ដរជាតិ
តំបន់រមណីយដ្ឋាន ប្រវត្តិសាស្ដ្រអង្គរបានយ៉ាងល្អប្រសើរ។ គួរបញ្ជាក់ថា៖ គណៈកម្មាធិការសម្របសម្រួលអន្ដរជាតិដើម្បីសម្របសម្រួលកិច្ចគាំពារ ការអភិវឌ្ឍ និងអភិរក្សនៅតំបន់រម្មណីយដ្ឋានអង្គរ ត្រូវបានបង្កើតឡើង នៅក្នុង ឆ្នាំ១៩៩៣ ក្រោយសន្និសីទអន្ដរជាតិស្ដីពីអង្គរនៅទីក្រុងតូក្យូប្រទេសជប៉ុនដោយមានការគាំទ្រដោយរដ្ឋាភិបាលបារាំង ជប៉ុន និងអង្គការយូណេស្កូ ដើម្បីសម្របសម្រួលតាមដានវាយតម្លៃ និងត្រួតពិនិត្យសកម្មភាពទាំងឡាយនៅក្នុងតំបន់រម្មណីយដ្ឋានប្រវត្តិសាស្រ្ដអង្គរ
ពិសេសតាមរយៈអ្នកជំនាញការជាន់ខ្ពស់សម្រាប់ការអភិរក្ស និងអភិវឌ្ឍ ប្រកបដោយចីរភាព។
ICC ព្រះវិហារកំណត់យកគោបុរៈទី៥ជាគម្រោងអាទិភាពមុនគេសម្រាប់ការងារជួសជុល
គណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ
(ICCព្រះវិហារ) យល់ស្រប កំណត់យកគោបុរៈទី៥ នៃប្រាង្គប្រាសាទព្រះវិហារ ដាក់ជាគម្រោងអាទិភាព ដើម្បីរៀបចំជួសជុលបន្ទាន់។
តាមការបញ្ជាក់ពីឯកឧត្តម ផៃ ស៊ីផាន រដ្ឋលេខាធិការទីស្តីការគណៈរដ្ឋមន្ត្រីបានឲ្យដឹងថា លទ្ធផលនៃកិច្ចប្រជុំលើកទី១ របស់គណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ (ICCព្រះវិហារ) បានសំដែងទស្សនៈជាឯកច្ឆ័នយល់ស្រប់ដាក់គោបុរៈទី៥ ទៅក្នុងគម្រោងអាទិភាពចាំបាច់ ក្នុងការរៀបចំ ជួសជុលស្តារឡើងវិញមុនគេ បន្ទាប់ពីពិនិត្យឃើញថា ស្ថានភាពនៃគោបុរៈទី៥នេះកំពុងទទួលរងនូវភាពទ្រុឌទ្រោមយ៉ាងធ្ងន់ធ្ងរស្ទើរតែរលំទៅហើយ នោះ។
យោងតាម ការសិក្សាលើលក្ខណៈបច្ចេកទេសនៃគម្រោងជួសជុល ពីអ្នកជំនាញការរបស់គណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ
(ICCព្រះវិហារ) បានវាយតម្លៃថា ទុនសម្រាប់ប្រើប្រាស់ក្នុងដំណើរការជួសជុលគោបុរៈទី៥នេះគ្រោងចំណាយទឹកប្រាក់ប្រហែលចន្លោះពី១លាន៨សែន ទៅ២លានដុល្លារសហរដ្ឋអាមេរិកសម្រាប់រយៈពេលអនុវត្ត៥ឆ្នាំ។ អង្គប្រជុំបានជំរុញឲ្យគណៈកម្មាធិការថ្នាក់ជាតិ រៀបចំផែនការបច្ចេកទេស ចងក្រងឯកសារនានា និងគម្រោងថវិកាសម្រាប់បំរើឲ្យកិច្ចការការពារ អភិរក្ស ការជួសជុលឡើងវិញ ពិសេសគោបូរៈទី៥ នេះធ្វើឲ្យបានចប់សព្វគ្រប់ឆាប់រហ័សដើម្បីស្វែងរកប្រភពធានធាន និងកំណត់ពេលវេលាឲ្យបានជាក់់លាក់ដើម្បីផ្តើមដំណើរការការងារ។
ចំពោះគម្រោងជួសជុលគោបុរៈផ្សេងៗទៀតក៏បានវាយតម្លៃរួចរាល់ផងដែរក្នុងនោះគោបុរៈទី១តាមផែនការគ្រោអនុវត្ត រយៈពេល១៥ឆ្នាំ ក្នុងទំហំទឹកប្រាក់ ប្រមាណជាង៥លានដុល្លារ អាមេរិក។ គោបុរៈទី៣ ត្រូវប្រើប្រាស់រយៈពេលជួសជុលក្នុងចន្លោះពី៣ទៅ៥ឆ្នាំ គ្រោងចំណាយថវិការប្រមាណជាង២លាន ៥សែនដុល្លារ។ និងគម្រោងជួសជុលស្រះទឹកនៅគោបុរៈទី៤ គ្រោងនឹងចំណាយទឹកប្រាក់៣លាន ៥សែនដុល្លារអាមេរិក
ក្នុងរយៈពេល៣ឆ្នាំ។
ឯកឧត្តមបណ្ឌិតសភាចារ្យ
សុខ អាន ឧបនាយករដ្ឋមន្ត្រី និងជាប្រធានបេតិកភណ្ឌជាតិម្ពុជា និងឯកឧត្តម បណ្ឌិត Mohamed
Sameh សហប្រធាន គណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ (ICC ព្រះវិហារ) បានថ្លែងក្នុងវេទិការតុមូល នៅទីលានជល់ដំរីនារាត្រីថ្ងៃទី០៣ ខែធ្នូ ថា លទ្ធផលនៃជំនួបប្រជុំដំបូងនេះគណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ
បានផ្តោត ការយកចិត្តទុកដាក់មុនគេនោះ គឺជំរុញការផ្សព្វផ្សាយ នូវព័ត៌មាន អំពីគម្រោងនៃការអភិរក្ស និងការជួសជុលប្រាសាទព្រះវិហាររួមជាមួយទំហំទឹកប្រាក់ដែលត្រូវប្រើប្រាស់ ដើម្បីឲ្យបណ្តាប្រទេសស្ថាបនិកនិងប្រទេសជាមិត្តដែលគាំទ្រ ICCព្រះវិហារនេះ
បានជ្រាប់ដើម្បីគេ ជួយគៀងគរថវិកា។
ឯកឧត្តមបានឲ្យដឹងថា ICCព្រះវិហារ នេះមានតួនាទីសំខាន់ណាស់ មិនត្រឹមតែជួយដល់ការងារគ្រប់គ្រងប៉ុណ្ណោះទេ ប៉ុន្តែគណៈកម្មាធិការអន្តរជាតិមួយនេះគឺជាអ្នកជួយក្នុងការគៀងគរថវិកា និងការសិក្សាអំពីបច្ចេកទេស សម្រាប់ការងារអភិរក្ស
ជួសជុល និងការអភិវឌ្ឍប្រាសាទព្រះវិហារ បានយ៉ាងពេញលេញ។ ហើយអ្វីជាសារៈប្រយោជន៍ធំទទួលបានពីការអភិរក្ស និងអភិវឌ្ឍន៍ប្រាសាទព្រះវិហារនេះ គឺប្រជាពលរដ្ឋកម្ពុជាដែលរស់នៅក្នុងតំបន់នេះទទួលបានអត្ថប្រយោជន៍ជាច្រើន ពីគម្រោងអភិវឌ្ឍន៍ទាំងឡាយ អាចជួយលើកស្ទួយជីវភាពរស់នៅរបស់ពួកគាត់ឲ្យកាន់តែរីកចំរើនប្រសើរថែមទៀត។ ឯកឧត្តមក៏បានអំពាវនាវឲ្យប្រជាពលរដ្ឋចូលរួមជួយថែរក្សា កុំកាប់បំផ្លាញព្រៃឈើខិតខំចូលរួមដាំកូនឈើបន្ថែម ជួយថែរក្សាបរិស្ថាននៅជុំវិញតំបន់នេះឲ្យបានល្អ ពិសេសប្រភេទសត្វស្លាប់
មានត្រយ៉ងយក្ស ត្មាត ត្រូវខិតខំជួយថែរក្សាការពារឲ្យបានគង់វង់ព្រោះវាអាចជួយបង្កើនការទាក់ទាញទេសចរណ៏បន្ថែមទៀតនៅក្នុងតំបន់នេះ។
Subscribe to:
Posts (Atom)