Friday, November 21, 2014
ព្រះមហាក្សត្រសព្វព្រះរាជហឫទ័យចំពោះរាជរដ្ឋាភិបាលក្នុងការលើកស្ទួយវិស័យអប់រំ
ព្រះករុណា ព្រះបាទសម្តេចព្រះបរមនាថ
នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាថ្ងៃទី២០
ខែវិច្ឆិកា ឆ្នាំ២០១៤ បានបង្ហាញនូវព្រះរាជហឫទ័យ រីករាយចំពោះ រាជរដ្ឋាភិបាលសម្តេចតេជោ ដែលបានលើកស្ទួយវិស័យអប់រំជាតិ។
នៅក្នុងព្រះរាជពិធីសម្ពោធដាក់ឱ្យដំណើរការ«វិទ្យាល័យ ព្រះនរោត្តម សីហមុនី» នៅខេត្តកំពត ព្រះករុណា ជាអម្ចាស់ជីវិតលើត្បូងមានព្រះរាជបន្ទូលថា
ខ្ញុំព្រះករុណា ខ្ញុំមានសេចក្តីរីករាយចំពោះគោលនយោបាយរបស់រាជរដ្ឋាភិបាលកម្ពុជា ដែលបានលើកឡើងអំពីយុទ្ធសាស្ត្រចតុកោណ ក្នុង នោះមានការលើកស្ទួយវិស័យអប់រំជាតិ។ “សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា លោកបាន ដឹកនាំជំរុញការអភិវឌ្ឍន៍ប្រទេសជាតិលើគ្រប់វិស័យ ពិសេសវិស័យអប់រំជាតិមានសន្ទុះរីកចម្រើនយ៉ាងខ្លាំងក្លា”។
ក្នុងការរួមចំណែកកសាងអភិវឌ្ឍន៍លើវិស័យអប់រំ
ព្រះករុណាជាអម្ចាស់ជីវិតលើត្បូង ព្រះមហា ក្សត្រនៃព្រះរាជាណាចក្រកម្ពុជា
ព្រះអង្គបានមានព្រះរាជបន្ទូលឲ្យប្រជាពលរដ្ឋជាកូនចៅ
ចៅទូតរបស់ព្រះអង្គដឹងថា ព្រះករុណាព្រះមហាវីរក្សត្រ
ព្រះវររាជបិតាជាតិខ្មែរ«ព្រះករុណា ព្រះបរមរតនកោដ្ឋ» កាលពី ព្រះអង្គនៅគង់ព្រះជន្ម
និងសម្តេចព្រះមហាក្សត្រី ព្រះវររាជមាតាជាតិខ្មែរ
ជាទីសក្ការៈដ៏ខ្ពង់ខ្ពស់បំផុត ព្រះអង្គតែងតែចូលរួមជាមួយរាជរដ្ឋាភិបាលកម្ពុជា បានប្រោសព្រះរាជទានកសាងអគារសិក្សានៅតាមសាលារៀននានាជាច្រើនកន្លែង រហូតដល់ជនបទទូទាំងប្រទេស សម្រាប់យុវជន យុវនារី
និងកុមារា កុមារី ជាកូនចៅ
ចៅទួតរបស់ព្រះអង្គ សិក្សារៀនសូត្របង្កើនចំណេះដឹង។
“ ខ្ញុំព្រះករុណា ខ្ញុំសូមអបអរសាទរព្រះរាជពិធីសម្ពោធដាក់ឱ្យប្រើប្រាស់ «វិទ្យាល័យព្រះនរោត្តម សីហមុនី» សម្រាប់ទុកប្រើប្រាស់ជាប្រយោជន៍សាធារណៈក្នុងវិស័យអប់រំជាតិតទៅ។ ចាប់ពីពេលនេះតទៅ ខ្ញុំសូមប្រគល់វិទ្យាល័យនេះ ជូនឯកឧត្តមរដ្ឋមន្ត្រីក្រសួងអប់រំ
យុវជន និងកីឡា តំណាងរាជរដ្ឋាភិបាលកម្ពុជាគ្រប់គ្រងយ៉ាងណាឱ្យដំណើរការល្អជាប្រចាំ សម្រាប់សិស្សានុសិស្សខេត្តកំពត
ខេត្តតាកែវបានរៀនសូត្រតទៅ។ ខ្ញុំសង្ឃឹមថា
គណៈកម្មការទ្រទ្រង់សាលា និងបងប្អូនប្រជាពលរដ្ឋនៅ តំបន់នេះនឹងចូលរួមថែរក្សាវិទ្យាល័យនេះឱ្យបានល្អប្រសើរ”។
វិទ្យាល័យព្រះនរោត្តម សីហមុនី ស្ថិតនៅភូមិឈើទាល ឃុំម្រោម ស្រុកអង្គរជ័យ សាងសង់លើផ្ទៃដីប្រមាណជា
១១ហិកតា មានអគារសិក្សាជាច្រើន បំពាក់ដោយសម្ភារឧទ្ទេបសសិក្សាសម្រាប់សិស្ស និងសាស្ត្រាចារ្យ មានតបណ្តាញអគ្គិសនី និងបណ្តាញទឹកស្អាតចូលគ្រប់
បន្ទប់ មានអគារការិយាល័យ បន្ទប់បណ្ណាល័យ
បន្ទប់កុំព្យូទ័រ បន្ទប់ពិសោធន៍។ ចំណែកសំណង់អគារសាលាបឋមសិក្សាឈើទាលបាន
សាងសង់រួចហើយមាន អគារសិក្សាមានបំពាក់សម្ភារឧបទ្ទេស មាន តបណ្តាញអគ្គិសនី ទឹកគ្រប់បន្ទប់សិក្សា មានអគារទីចាត់ការ បណ្ណាល័យ
មានបន្ទប់អនាម័យ។ របាយការណ៍ របស់គណៈកម្មការសាងសង់ឱ្យដឹងថា ជាទូទៅ ព្រះសមិទ្ធផលនៅវិទ្យាល័យ ព្រះនរោត្តម សីហមុនី មានគ្រប់ហេដ្ឋារចនាសម្ព័ន្ធអប់រំកាយ និងកីឡា ដោយបានចំណាយថវិកាអស់ចំនួន ២.៣៨៩.៨៦៦.២៣៤រៀល
ដែលក្នុងនោះមានព្រះរាជទ្រព្យរបស់ព្រះករុណាជាអម្ចាស់ជីវិតលើត្បូងចំនួនជាង២.០០០លានរៀល៕
សម្តេចតេជោ៖យុវជនកម្ពុជា និងយុវជនអាស៊ាន ត្រូវតែបន្តសហការគ្នាជាមួយ និងយុវជនជប៉ុន
ប្រតិភូយុវជនមកពីប្រទេសអាស៊ាន និងយុវជនមកពីប្រទេសជប៉ុន
តាមរយៈតំណាងរបស់ខ្លួនបាន ថ្លែងអំណរគុណ និងបង្ហាញនូវសេចក្តីសោមនស្សរីករាយ ដោយទទួលបានការចូលជួបសម្តែងកា រគួរសមដើម្បីស្វែងយល់ និងបានស្តាប់នូវអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
នារសៀលថ្ងៃទី២០ ខែវិច្ឆិកា ឆ្នាំ២០១៤ ដែលជាចំណេះដឹងដ៏ខ្ពង់ខ្ពស់សម្រាប់ការដឹកនាំប្រទេសនៅពេលអនាគត។
ក្នុងពិធីជួបសំណេះសំណាល
ជាមួយប្រតិភូនាវាយុវជនអាស៊ីអាគ្នេយ៍-ជប៉ុន
នៅវិមានសន្តិភាព ទីស្តីការនាយករដ្ឋមន្ត្រី
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ឲ្យដឹងថា កម្ពុជាមិនខុសពីប្រទេសអាស៊ានដទៃទៀតនោះទេ មានទំនាក់ទំនងដ៏ល្អប្រសើរខ្លាំងណាស់ជាមួយនិងប្រទេសជប៉ុន ក្នុងនោះសម្តេច(តេជោ) ធ្លាប់បានធ្វើការងារដោយផ្ទាល់ជាមួយនាយករដ្ឋមន្រ្តីជប៉ុនជាច្រើននាក់
នាពេលកន្លងមក រាប់ទាំងនាយក រដ្ឋមន្រ្តីជប៉ុនឯកឧត្តម ស៊ីនហ្សូ អាបេ នាពេលបច្ចុប្បន្ននេះផងដែរ។ សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា ប្រទេសកម្ពុជា និងប្រទេសជប៉ុនមានប្រវត្តិជាមួយគ្នាជាយូរលង់ណាស់មកហើយ
និងតែងតែមានទំនាក់ ទំនងល្អជាមួយគ្នាមិនដែលអាក់ខានម្តងណាឡើយ។ ដោយសារតែកម្ពុជាមានទំនាក់ទំនងល្អជាមួយ
និងប្រទេសជប៉ុននោះហើយ ជប៉ុន
បានរួមចំណែកជួយដល់ការអភិវឌ្ឍសេដ្ឋកិច្ចរបស់ប្រទេសកម្ពុជា មានការរីកចម្រើនលើគ្រប់វិស័យ
ពិសេសទៅទៀតនោះ អ្វីដែលរូបសម្តេច មិនអាចបំភ្លេចបាន នៅក្នុងឆាកជីវិតរបស់សម្តេចតេជោនោះគឺសម្តេចបាន
ទៅសម្រាកព្យាបាលភ្នែកនៅប្រទេសជប៉ុន និងបានទទួលឈ្មោះជាភាសាជប៉ុនជាមួយសម្តេចកិត្តិព្រឹទ្ធបណ្ឌិត
ប៊ុន រ៉ានី ហ៊ុនសែន ដែលជា ភរិយារបស់សម្តេចផងដែរ។
សម្តេចតេជោនាយករដ្ឋមន្រ្តី ក៏បានមានប្រសាសន៍ឲ្យដឹងអំពីមូលហេតុ និងផលប្រយោជន៍ដែលកម្ពុជាទទួលបានពីពេលចូលជាសមាជិកសមាគម
នៃប្រទេសអាស៊ានថា គឺទី១ គោលការណ៍មិនជ្រៀតជ្រែកក្នុងកិច្ចការផ្ទៃក្នុងផងខ្លួន
ទី២-ស្មារតីសហគមន៍ និងរបៀបរបបការងារស្មើភាព និងស្មើសិទ្ធិ ទី៣-ដើម្បីសមាហរណកម្មដែលគ្របដណ្តប់គ្រប់ទិដ្ឋភាព
និងទី៤-ច្រកចេញលើផ្នែកការទូត។
ដោយលើកឡើងថា
បញ្ហាជាតិសាសន៍ បញ្ហាសាសនាមិនមែនជាឧបសគ្គ
នៃសហប្រតិបត្តិការ ឬការធ្វើជាញាតិវត្តន៍នោះទេ សម្តេចតេជោមានប្រសាសន៍ផ្តល់ជាអនុសាសន៍ថា យុវជនកម្ពុជា
និងយុវជនអាស៊ាន ត្រូវតែបន្តសហការគ្នាជាមួយ និងយុវជនជប៉ុន ដែលជាអាវុធដ៏រឹងមាំ និងមុតស្រួច ក្នុងទំនាក់ទំនងរវាងអាស៊ានគ្នាឯងជាមួយប្រទេសជប៉ុន។
សម្តេចតេជោមានប្រសាសន៍ថា នៅទីនោះយើង មានជាតិសាសន៍ខុសគ្នា
យើងមានភាសាខុសគ្នា យើងមានសាសនា ខុសគ្នា ប៉ុន្តែទាំងអស់នោះមិនមែនជាឧបសគ្គនៃកិច្ចសហប្រតិបត្តិការរបស់យើងនោះទេ។
កម្ពុជាមានបទពិសោធន៍សម្បូរបែបល្អណាស់ កម្ពុជាគ្មានទេការរើសអើងជាតិសាសន៍
ពណ៌សម្បុរ ហើយក៏មិនធ្លាប់ មានជម្លោះលើបញ្ហាសាសនានោះទេ ពោលគឺកម្ពុជារស់នៅប្រកបដោយភាពសុខដុមរនាជាមួយគ្នា
លើគ្រប់សាសនាទាំងអស់ ដោយគ្មានការរើសអើងពីគ្នានោះទេ។
ទាក់ទងនឹងដំណើរទស្សនកិច្ចនៃប្រតិភូ នាវាយុវជនអាស៊ីអាគ្នេយ៍-ជប៉ុន តំណាងយុវជន ម៉ាឡេស៊ី
និងជប៉ុនមានបានធ្វើសេចក្តីរាយការណ៍ឲ្យដឹងថា ដូចពេលមុនដែលកម្មវិធីនាវាយុវជនអាស៊ីអា គ្នេយ៍លើកទី៤១នេះ មានរយៈពេល៥១ថ្ងៃ
ដោយគិតចាប់ពីថ្ងៃទី២៩ ខែតុលា រហូតដល់ថ្ងៃទី១៨ ខែធ្នូ
ដែលធ្វើការចូលចតនៅកំពង់ផែ ក្នុងប្រទេសព្រុយណេ កម្ពុជា ឥណ្ឌូណេស៊ី និងប្រទេស ជប៉ុន។ កម្មវិធីនេះបានចាប់ផ្តើមឡើងចាប់តាំងពីឆ្នាំ១៩៧៤
មានទិសដៅដើម្បីពង្រឹងពង្រីកមិត្តភាព និងការយល់ដឹងរវាងជប៉ុន និងយុវជនក្នុងបណ្តាប្រទេសអាស៊ាន
ពិសេស ដើម្បីលើកកម្ពស់វិស័យអក្សរសាស្រ្ត សិល្បៈ វប្បធម៌ និងអរិយធម៌ ក្នុងទិសដៅពង្រឹងកិច្ចសហប្រតិបត្តិការអន្តរជាតិ
។ ជារៀងរាល់ឆ្នាំកម្មវិធី នេះតែងតែនាំមកនូវការជួបជុំរវាងយុវជនអាស៊ាន-ជប៉ុន
ជាង៣០០ នាក់ ហើយក្នុងរយៈពេលដែលនាវាចូលចតនៅតាមកំពង់ផែនៃប្រទេសនីមួយៗ
តំណាងគណៈប្រតិភូនាវាយុវជនទាំងអស់មានឱកាស បានជួបសម្តែងការគួរសមជាមួយបណ្តាមេដឹកនាំនៃប្រទេសនីមួយៗ
របស់ប្រទេសអាស៊ាន-ជប៉ុន។ ដោយឡែកសកម្មភាពនៅលើនាវា រួមមានការពិភាក្សាជាក្រុមការសំដែងសិល្បៈ
និងវប្បធម៌ នៃប្រទេសនីមួយៗដែលជាសមាជិកផងដែរ។
សម្តេចតេជោបានជូនពរដល់គណៈប្រតិភូទាំងអស់សូមមានសុខភាពល្អបរិបូណ៌
ក្នុងការស្នាក់អា ស្រ័យបំពេញសកម្មភាពការងារនៅក្នុងប្រទេសកម្ពុជា សូមបានជួបនូវភាពជោគជ័យ
ដើម្បីជានិមិត្តរូបនៃចំណងសាមគ្គីភាពក្នុងចំណោមស្រទាប់យុវជន និងយុវជននៃប្រទេសអាស៊ាន-ជប៉ុនឱ្យកាន់តែរឹងមាំថែមទៀត។
សម្តេចតេជោនាយករដ្ឋមន្ត្រី ក៏បានចែកជូនដល់គណៈប្រតិភូទាំងមូលនូវវត្ថុអនុស្សាវរីយ៍ប្រាក់
ស្លឹង ដែលជាប្រាក់ដំបូងគេបង្អស់របស់ប្រទេសកម្ពុជានោះ៕
Subscribe to:
Posts (Atom)