ជំនួបរវាងឯកឧត្តមកិត្តិនីតិកោសលបណ្ឌិត ប៊ិន ឈិន ជាមួយឯកឧត្តមឯកអគ្គរដ្ឋទូតចិនប្រចាំកម្ពុជា

ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានអនុញ្ញាតឱ្យ ឯកឧត្តមឯកអគ្គរដ្ឋទូត វ៉ាង វិនធាន (Wang Wentian) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា ចូលសម្តែងការគួរសម នៅថ្ងៃពុធ ១០រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែមករា ឆ្នាំ២០១៩។

ឯកឧត្តម ឯក ថា អ្នកនាំពាក្យទីស្តីការគណៈរដ្ឋមន្រ្តី បានមានប្រសាសន៍ប្រាប់អ្នកយកព័ត៌មានក្រោយពីជំនួបនោះថា ឯកអគ្គរដ្ឋទូតចិន បានមានប្រសាសន៍ថា ប្រទេសកម្ពុជា និងចិន មានទំនាក់ទំនងគ្នាល្អណាស់តាមបែបប្រពៃណី ក៏ដូចជាការទូត។ ប្រជាជនប្រទេសទាំងពីរមានទំនុកចិត្តគ្នាល្អណាស់ ព្រមទាំងមានកិច្ចសហប្រតិបត្តិការជាក់ស្ដែងលើគ្រប់វិស័យ ថែមទាំងមានការរីកចម្រើនដ៏ខ្លាំងទៀតផង។

ឯកឧត្តមកិត្តិនីតិកោសលបណ្ឌិត ប៊ិន ឈិន បានមានប្រសាសន៍ថា ប្រទេសទាំងពីរមានប្រពៃណីទំនាក់ទំនងជាមួយគ្នាយូរលង់ណាស់មកហើយតាំងពីសម័យអង្គរ ក្រោយមកទៀតព្រះករុណា ព្រះបាទសម្តេច ព្រះនរោត្តម សីហនុ “ព្រះបរមរតនកោដ្ឋ” បានកសាងទំនាក់ទំនងការទូតដ៏រឹងមាំជាមួយនឹងថ្នាក់ដឹកនាំចិន ហើយរហូតមកដល់ពេលបច្ចុប្បន្ននេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានបន្តទំនាក់ទំនងការទូតដ៏ល្អប្រពៃនេះ ដែលប្រទេសទាំងពីរទើបតែបានប្រារព្ធខួបទំនាក់ទំនងការទូតលើកទី៦០របស់ខ្លួន។ ឯកឧត្តម ប៊ិន ឈិន ក៏បានជម្រាបជូនឯកឧត្តមឯកអគ្គរដ្ឋទូតចិនថា សាធារណរដ្ឋប្រជាមានិតចិន បាននិងកំពុងជួយជាក់ស្ដែងសម្រាប់ការអភិវឌ្ឍន៍នៅកម្ពុជា ផ្នែកហេដ្ឋានរចនាសម្ព័ន្ធរឹង ក៏ដូចជាវិស័យផ្សេងៗទៀត ដោយសារតែមានកិច្ចសហប្រតិបត្តិការល្អ របស់ថ្នាក់ដឹកនាំនៃប្រទេសទាំងពីរនេះ។

ជាការឆ្លើយតបឯកអគ្គរដ្ឋទូតចិន បានវាយតម្លៃខ្ពស់ទៅលើទំនាក់ទំនងជាប្រពៃណី និងការទូតដ៏ល្អ របស់ប្រទេសទាំងពីរ បន្សល់ទុកដោយព្រះបរមរតនកោដ្ឋ និងថ្នាក់ដឹកនាំចិនមុនៗ ដែលជានិម្មិតរូបដ៏រឹងមាំនៃប្រទេសទាំងពីរហើយសម្តេចតេជោនាយករដ្ឋមន្រ្តី ជាមិត្តដែកថែបរបស់ចិន បានបន្តទំនាក់ទំនងនិងកិច្ចសហប្រតិបត្តិការ ដ៏ល្អនេះដើម្បីការអភិវឌ្ឍន៍ និងផលប្រយោជន៍របស់ប្រជាជន និងប្រទេសទាំងពីរ។


បើទោះបីទើបតែចាប់ផ្តើមការងារក្នុងរយៈពេល ២ខែតែប៉ុណ្ណោះ ក៏ប៉ុន្តែឯកអគ្គរដ្ឋទូតចិន មានការពេញចិត្ត និងបានចូលរួមនៅក្នុងកម្មវិធីសំខាន់ៗដូចជាខួបលើកទី៦០ នៃទំនាក់ទំនងការទូតកម្ពុជា-ចិន ការចូលរួមសម្ពោធវិមានឈ្នះ ឈ្នះ ក៏ដូចជាចូលរួមខួបលើកទី២០ នៃការបង្កើតកងទ័ពជើងគោក នៃកងយោពលខេមរភូមិន្ទ និងកិច្ចប្រជុំផ្សេងៗទៀត។

ឯកអគ្គរដ្ឋទូតចិន ក៏បានមានប្រសាសន៍ផងដែរថា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ប្រទេសកម្ពុជា នឹងមានការរីកចម្រើនកាន់តែខ្លាំងនាពេលអនាគត ព្រមទាំងមានការគាំទ្រពីប្រជាជនកម្ពុជាកាន់តែមានសន្ទុះខ្លាំងបន្ថែមទៀត។ កំណើនសេដ្ឋកិច្ចកម្ពុជាមាន៧% ដែលជាកំណើនដ៏លេចធ្លោមួយ នៅក្នុងពិភពលោក។ ឯកអគ្គរដ្ឋទូតចិន ក៏បានលើកសសើរកម្ពុជា ដែលបានរៀបចំកិច្ចប្រជុំធំៗទទួលបានជោគជ័យ ដូចជា វេទិកាសភាអាស៊ី-ប៉ាស៊ីហ្វិក លើកទី២៧ និងកិច្ចប្រជុំ នៃការបើកប្រកាសក្រុមប្រឹក្សាវប្បធម៌អាស៊ីជាផ្លូវការ នៅខេត្តសៀមរាបនាពេលថ្មីៗកន្លងទៅនេះ៕

លោកនាយករដ្ឋមន្ត្រី ហ៊ុន សែន អនុញ្ញាតិឱ្យលោករដ្ឋមន្ត្រីក្រសួងវប្បធម៌ និងទេសចរណ៍ចិន ចូលជួបពិភាក្សាការងារ

នៅព្រឹកថ្ងៃទី៣០ ខែមករា ឆ្នាំ២០១៩ នេះ លោកនាយករដ្ឋមន្រ្តី ហ៊ុន សែន បានអញ្ជើញជួបពិភាក្សាការងារជាមួយលោក ឡ ស៊ូកាង រដ្ឋមន្ត្រីក្រសួងវប្បធម៌ និងទេសចរណ៍ចិន។ ក្នុងជំនួបនោះ លោក ឡ ស៊ូកាង បានសំដែងនូវការ អបអរសាទរចំពោះប្រមុខរាជរដ្ឋាភិបាលកម្ពុជា ដែលបានទទួលជោគជ័យយ៉ាងត្រចះ ត្រចង់នៅក្នុងដំណើរទស្សនកិច្ចទៅកាន់ប្រទេសចិនកន្លងមក។ លោក បានមាន ប្រសាសន៍ថា ក្នុងជំនួបរវាងលោក ហ៊ុន សែន ជាមួយនឹងលោកប្រធានាធិបតី ស៊ី ជិនពីង គឺបានចង្អុលនូវផ្លូវដ៏ត្រឹមត្រូវសម្រាប់កិច្ច សហប្រតិបត្តិការរវាងប្រទេសយើង ទាំងពីរ ដោយឡែកក្នុងជំនួបជាមួយនឹងលោក លី ខឺឈាំង និងការចុះហត្ថលេខាលើ កិច្ចព្រមព្រៀងមួយចំនួននោះគឺអនុវត្តទៅតាមការចង្អុលបង្ហាញដ៏ត្រឹមត្រូវរបស់ប្រធានាធិបតី ស៊ី ជិនពីង។

លោក ឡ ស៊ូកាង បានបន្តថា ដំណើរទស្សនកិច្ចរបស់លោកមកកាន់ ព្រះជាណាចក្រកម្ពុជាពេលនេះគឺតាមការអនុញ្ញាតិពីលោក ស៊ី ជិនពីង ក៏ដូចជាលោក លី ខឺឈាំង ដើម្បីប្រកាសនូវឆ្នាំវប្បធម៌ និងទេសចរណ៍រវាង ចិន និងកម្ពុជា ក្នុងន័យនេះដែរលោកក៏បានគោរពជំរាបរាយការណ៍ថា លោកនឹងធ្វើការជាមួយ នឹងលោករដ្ឋមន្រ្តីក្រសួងទេសចរណ៍ក៏ដូចជាលោកស្រីរដ្ឋមន្ត្រីក្រសួងវប្បធម៌ ដើម្បីរៀបចំនូវសកម្មភាពផ្សេងៗសម្រាប់ឆ្នាំវប្បធម៌ និងទេសចរណ៍យើងឆ្នាំ២០១៩ នេះ ដែលរួមមានទាំងការរៀបចំឱ្យមានរបាំ និងសកម្មភាពផ្សេងៗទៀត។

ជាការឆ្លើយតប លោកនាយករដ្ឋមន្ត្រី ហ៊ុន សែន បានថ្លែងអំណរគុណ និងសម្ដែងនូវ ការគាំទ្រចំពោះការរៀបចំរបស់រដ្ឋមន្ត្រីក្រសួងទេសចរណ៍និងលោកស្រីរដ្ឋមន្រ្តីក្រសួងវប្បធម៌កម្ពុជា។ លោក ក៏បានចង្អុលបង្ហាញថាគប្បីធ្វើយ៉ាងណាឱ្យទេសចរណ៍ និងវប្បធម៌យើងឆ្នាំ២០១៩នេះ ឱ្យមានភាពរស់រវើក ហើយលើសពីនោះទៅទៀត សូមពិនិត្យមើលទំនាក់ទំនងរវាងប្រទេសយើងទាំងពីរ និងកិច្ចសហប្រតិបត្តិការរវាង ប្រទេសយើងទាំងពីរដែលមានតាំងពីអតីតកាលក៏ដូចជាទំនាក់ទំនងដែលមានចរិកជាប្រវត្តិសាស្ត្រនេះ៕

(សូមទស្សនាវីដេអូ)៖ ក្រុម កឹម សុខា និយមថា ទង្វើលោក សម រង្ស៊ី ជាអំពើក្បត់លោក កឹម សុខា និងក្រុមលោក កឹម សុខា

លោក ឡៅ ម៉ុងហៃ យល់ស្របដូចគ្នាទៅនឹងការលើកឡើងរបស់លោកនាយករដ្ឋមន្រ្តី ហ៊ុន សែន ថា ប្រទេសកម្ពុជាកំពុងតែមានការអភិវឌ្ឍទៅមុខជាលំដាប់

ក្នុងពេលថ្មីៗនេះ អ្នកវិភាគនយោបាយលោក ឡៅ ម៉ុងហៃ បានថ្លែងថា លោកមានទស្សនៈយល់ស្របជាមួយនឹងលោកនាយករដ្ឋមន្ត្រី ហ៊ុន សែន ចំពោះការអភិវឌ្ឍប្រទេសកម្ពុជា ជាពិសេសគឺការរីកចម្រើនរបស់រាជធានីភ្នំពេញ ដែលពីមុនត្រូវបានពួកខ្មែរក្រហមបោះបង់ចោល និងបានជម្លៀសប្រជាជនចេញពីទីក្រុងភ្នំពេញ។

លោក ឡៅ ម៉ុងហៃ ក៏បានបញ្ជាក់បន្ថែមថា ការជម្លៀសមនុស្សទាំងបង្ខំចេញពីទីក្រុងភ្នំពេញ និងទីក្រុងដទៃទៀត នៅពេលនោះគឺដោយសារតែអសមត្ថភាពរបស់ខ្មែរក្រហម ក្នុងការគ្រប់គ្រងមនុស្សទាំងនោះដែលត្រូវបានមើលឃើញថា ជាសត្រូវរបស់ពួកគេ ដូច្នេះបំណងរបស់ពួកគេគឺបំផ្លាញសត្រូវរបស់ពួកគេ ដោយសមាសភាពកុម្មុយនីស្តនិយមរបស់ពួកគេ។

គួរបញ្ជាក់ផងដែរថា នៅថ្ងៃទី២៩ ខែមករា ឆ្នាំ២០១៩ លោកនាយករដ្ឋមន្រ្តី ហ៊ុន សែន បានបញ្ជាក់នៅក្នុងទំព័រហ្វេសប៊ុកផ្លូវការរបស់លោក រួមជាមួយនឹងរូបថតមួយចំនួនដែលក្នុងនោះ លោកបានបង្ហាញនូវរូប១សន្លឹកសខ្មៅ ដែលបានបង្ហាញពីទិដ្ឋភាពមួយផ្នែកនៃទីក្រុងភ្នំពេញ ដែលត្រូវបានបំផ្លាញ និងបោះបង់ចោលដោយសារសង្រ្គាម និងរបបប្រល័យពូជសាសន៍ប៉ុលពត កាលពីឆ្នាំ ១៩៧៥-១៩៧៩។

លោកនាយករដ្ឋមន្រ្តី ហ៊ុន សែន ក៏បានគូសបញ្ជាក់ថា ក្រោយពីកម្ពុជាមានសន្តិភាពពេញលេញជាង២០ឆ្នាំមកនេះ ទីក្រុងភ្នំពេញត្រូវបានអភិវឌ្ឍឱ្យរីកលូតលាស់ទៅមុខឥតឈប់ឈរ។ បន្ថែមពីនេះ លោកក៏បានរំលឹកជាថ្មីម្តងទៀតថា យើងត្រូវរួមគ្នាថែរក្សា ការពារសន្តិភាពឱ្យខានតែបាន ដើម្បីកុំឱ្យប្រទេសជាតិវិលធ្លាក់ទៅក្នុងភ្នក់ភ្លើងនៃសង្រ្គាម និងការបំភ្លិចបំផ្លាញសារជាថ្មីម្តងទៀតដូចពីអតីតកាលផងដែរ៕

អាជ្ញាធររាជធានីភ្នំពេញ ហាមការដុតផាវ កាំជ្រួច និងបង្កសំឡេងផ្ទុះគ្រប់ប្រភេទ ក្នុងឱកាសបុណ្យចូលឆ្នាំចិន

ដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុងឱកា​ស​បុណ្យចូលឆ្នាំថ្មីប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី០៤ ដល់ថ្ងៃទី០៦ ខែកុម្ភៈ ឆ្នាំ២០១៩ ខាងមុខនេះ រដ្ឋបាលរាជធានីភ្នំពេញ បានហាមការដុតផាវ កាំ​ជ្រួច និងបង្កសម្លេងផ្ទុះគ្រប់ប្រភេទ។

សេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២៩ ខែមករានេះ បានណែនាំដល់មន្ទីរ អង្គភាព ខណ្ឌ សង្កាត់ សមាគមក្រុមហ៊ុនឯកជន អង្គការក្រៅរដ្ឋាភិបាល និងសាធារណជនក្នុងរាជធានីភ្នំពេញ ៧ចំណុចខាងក្រោម៖

វគ្គបណ្តុះបណ្តាលសី្តពី «តួនាទី និងភារកិច្ចរបស់គណៈកម្មការរដ្ឋបាលក្នុងការចុះបញ្ជីដីធី្លមានលក្ខណៈជាប្រព័ន្ធ»

កំពង់ឆ្នាំង៖ នៅព្រឹកថ្ងៃទី២៩ ខែមករា ឆ្នាំ២០១៩ នៅសាលប្រជុំមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ឆ្នាំង បានរៀបចំពិធីបើកវគ្គបណ្តុះបណ្តាលស្តីពី «តួនាទី និងភារកិច្ចរបស់គណៈកម្មការរដ្ឋបាលក្នុងការចុះបញ្ជីដីធី្លមានលក្ខណៈជាប្រព័ន្ធ» សម្រាប់ ឃុំតាំងក្រសាំង ស្រុកទឹកផុស ក្រោមអធិបតីភាពលោក អៀង វុធ អភិបាលរងខេត្ត និងជាប្រធានគណៈកម្មការរដ្ឋបាល។

វគ្គបណ្តុះបណ្តាលនេះ មានការអញ្ជើញចូលរួមពីលោក លី សុភា ប្រធានមន្ទីរ និងជានាយកចាត់ការកម្មវិធីអនុវិស័យរដ្ឋបាលដីធ្លីខេត្តកំពង់ឆ្នាំង លោក រ៉ែម ដេត អភិបាលស្រុកទឹកផុស លោកអនុប្រធានមន្ទីរ លោកប្រធានការិយាល័យសុរិយោដី និងភូមិសាស្ត្រ លោកប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកទឹកផុស ប្រធាន អនុប្រធាន និងមន្ត្រីចុះបញ្ជីដីធ្លី (ក្រុម១) លោកមេឃុំ លោកមេភូមិ ចាស់ព្រឹទ្ធាចារ្យ ដែលជាសមាជិកគណៈកម្មការរដ្ឋបាល សរុបចំនួន ៥១ នាក់ ស្រី ១០ នាក់៕

អភិបាលខេត្តត្បូងឃ្មុំ ក្រើនរំលឹកដល់អាជ្ញាធរគ្រប់លំដាប់ថ្នាក់ ត្រូវសិក្សាដោះស្រាយរាល់គ្រប់បញ្ហាជូនប្រជាពលរដ្ឋ

ត្បូងឃ្មុំ៖ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានណែនាំអោយ លោកអភិបាលស្រុកមេមត់ សហការជាមួយមន្ទីរជំនាញ ត្រូវក្តាប់អោយបាននូវរាល់បញ្ហានានា ក្នុងមូលដ្ឋានរបស់ខ្លួនមានដូចជាបញ្ហាទំនាស់ដីធ្លី បញ្ហាផ្លូវ បញ្ហាតម្លៃកសិផល បញ្ហាទំនិញចេញចូលទៅប្រទេសជិតខាង បញ្ហាសន្តិសុខតាមបន្ទាត់ព្រំដែន និងបញ្ហាអនាម័យបរិស្ថានជាដើម ដើម្បីត្រួតពិនិត្យ ពិភាក្សា និងជួយសម្រួល ក្នុងការដោះស្រាយភ្លាមៗ ពិសេសបញ្ហាសន្តិសុខសុវត្ថិភាព ជូនប្រជាពលរដ្ឋស្របតាមគោលនយោបាយភូមិឃុំ មានសុវត្ថិភាព របស់រាជរដ្ឋាភិបាលកម្ពុជា ដែលបានដាក់ចេញ។

ការក្រើនរំលឹកខាងលើនេះ បានធ្វើឡើង នៅថ្ងៃទី២៨ ខែមករា ឆ្នាំ២០១៩ នៅសាលាស្រុកមេមត់ ក្នុងឱកាសកម្មវិធី លោក ជាម ច័ន្ទសោភ័ណ អភិបាលខេត្តត្បូងឃ្មុំ ជួបសំណេះ សំណាលជាមួយថ្នាក់ដឹកនាំមន្ត្រីរាជការ ក្រុមប្រឹក្សាឃុំមេភូមិ និងកងកម្លាំងប្រដាប់អាវុធគ្រប់ប្រភេទ ចំណុះអោយរដ្ឋបាលស្រុកមេមត់ សរុបចំនួនជាង ៣០០នាក់ ដើម្បីស្តាប់បញ្ហាប្រឈម សំណូមពរ និងដោះស្រាយកង្វល់របស់ប្រជាពលរដ្ឋតាមមូលដ្ឋាន។

ក្នុងឱកាសនោះ អាជ្ញាធរឃុំមួយចំនួនក្នុងស្រុកមេមត់ បានលើកឡើងនូវបញ្ហាប្រឈម សំណូមពរមួយចំនួនដល់អាជ្ញាធរខេត្ត ពិនិត្យលទ្ធភាពជួយ ពិសេសការជួសជុលផ្លូវ ក្នុងមូលដ្ឋានរបស់ពួកគាត់ ដែលកំពុងរងការខូចខាតពិបាកធ្វើដំណើរ ប្រកបរបររកស៊ីចិញ្ចឹមជីវិត និងពេលមានប្រជាពលរដ្ឋណា ម្នាក់ឈឺស្កាត់ត្រូវយកមកព្យាបាលនៅស្រុក ឬខេត្តម្តងៗ។ ចំពោះបញ្ហាផ្លូវនេះ ត្រូវបានមន្ទីរជំនាញឡើងឆ្លើយតបវិញភ្លាមៗផងដែរ។

ជាការឆ្លើយតបលោក ជាម ច័ន្ទសោភ័ណ បានលើកឡើងថា គ្រប់មន្ទីរជំនាញត្រូវចុះសិក្សា ពិនិត្យរាល់បញ្ហា និងតម្រូវ ការរបស់ប្រជាពលរដ្ឋ ពិសេសមន្ទីរអភិវឌ្ឍន៍ជនបទ មន្ទីរសាធារណៈការ និងដឹកជញ្ជូន មន្ទីរអប់រំយុវជន និងកីឡា មន្ទីរកសិកម្ម រុក្ខាប្រមាញ់ និងនេសាទជាដើម ដោយសហការជាមួយអាជ្ញាធរស្រុក ខណៈបញ្ហា ណាដោះស្រាយបាន គឺត្រូវដោះស្រាយជូនភ្លាម ហើយបញ្ហាណា ដែលលើសសមត្ថកិច្ចត្រូវធ្វើរបាយការណ៍មកខេត្ត ដើម្បីពិនិត្យលទ្ធភាពដោះស្រាយជាបន្ត។

លោក គូសបញ្ជាក់ថា រាល់សំនូមពររបស់លោកមេឃុំ ទាំង១៤ និងការលើកឡើងមេភូមិមួយចំនួនក្នុងចំណោមមេភូមិទាំង១៨០ ត្រូវបានដោះស្រាយតាមអទិភាព។

ជាមួយគ្នានោះ លោកក៏បានសំណូមពរឲ្យ ប្រជាពលរដ្ឋត្រូវ ផ្តល់ព័ត៌មានដល់អាជ្ញាធររាល់បញ្ហាទាំងអស់ ក្នុងនោះចំពោះការដាំដុះដំណាំកសិកម្ម ត្រូវរៀបចំចងក្រងជាសហគមន៍ ដើម្បីបង្កភាពងាយស្រួលទាំងការថែទាំ និងទីផ្សារសម្រាប់លក់កសិផល។

ដោយឡែក លោកមេភូមិ និងមេឃុំ ត្រូវក្តាប់អោយជាប់នូវរាល់បញ្ហា និងសំណូមពរ ពិសេសពលរដ្ឋណាដែលមានជីវភាពខ្វះខាត ទីទាល់ក្រពិតប្រាកដ ហើយរាយការណ៍មកថ្នាក់ស្រុក និងបន្តមកថ្នាក់ខេត្ត ដើម្បីដោះស្រាយជូនភ្លាមៗ ។
ជាចុងក្រោយ ចំនុចដែលសំខាន់បំផុតនោះ គឺត្រូវរួមគ្នាថែរក្សាសុខសន្តិភាព ដើម្បីបន្តការអភិវឌ្ឍន៍ប្រទេសជាតិយើងឲ្យកាន់តែមានភាពរីកចម្រើនលើគ្រប់វិស័យថែមទៀត ។

បើតាមលោក ចេង ប៊ុនណារ៉ា អភិបាលស្រុកមេមត់ បានឲ្យដឹងថា អាជ្ញាធរបានយកចិត្តទុកដាក់យ៉ាងខ្លាំងក្នុងការលើកស្ទួយជីវភាព របស់នៅរបស់ប្រជាពលរដ្ឋ ក្នុងនោះបានកសាងហេដ្ឋារចនាសម្ព័ន្ធមានដូចជា ផ្លូវថ្នល់ តបណ្តាញអគ្គិសនី សាលារៀន មណ្ឌលសុខភាព ស្រះទឹក ប្រព័ន្ធប្រឡាយជាដើម តែយ៉ាងណានៅមិនទាន់បំពេញគ្រប់តម្រូវការរបស់ប្រជាពលរដ្ឋ បានមួយរយភាគរយនោះទេ ដោយយើងត្រូវបន្តធ្វើជាជំហានៗ៕

(សូមទស្សនាវីដេអូ)៖ ទាល់តែយូរហ៎ស បាន សម រង្ស៊ី ហ៊ានចូលស្រុកខ្មែរវិញ

គ.ជ.ប ទទួលអនុសាសន៍ពីស្ថាប័នចំនួន៨ ពាក់ព័ន្ធសេចក្តីព្រាងបទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៣

បន្ទាប់ពីគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជូនសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើស ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុងក្រុមប្រឹក្សាស្រុក ក្រុមប្រឹក្សាខណ្ឌ (ប.ន.ក) អាណត្តិទី៣ ទៅកាន់ភាគីពាក់ព័ន្ធ ចំនួន៣៣ស្ថាប័នដើម្បីពិនិត្យ និងផ្តល់យោបល់រួចមក គ.ជ.ប បានទទួលអនុសាសន៍ ត្រលប់មកវិញពីស្ថាប័នចំនួន៨។

បើតាមសេចក្ដីប្រកាសព័ត៌មានដែលទទួលបាននៅថ្ងៃទី២៩ ខែមករា ឆ្នាំ២០១៩នេះ គ.ជ.ប បញ្ជាក់ថា ស្ថាប័នទាំង៨នោះ រួមមាន៖ អគ្គលេខាធិការដ្ឋានព្រឹទ្ធសភា, ក្រសួងមហាផ្ទៃ, ក្រសួងព័ត៌មាន, គណបក្សប្រជាជនកម្ពុជា, គណបក្សយុវជនកម្ពុជា, គណបក្សមាតុភូមិយើង, សហគមន៍គ្រួសារអភិវឌ្ឍន៍កសិកម្ម និងសមាគមជ័យលាភីបញ្ញាជនកម្ពុជា។

គ.ជ.ប បន្ថែមថា រាល់អនុសាសន៍ទាំងអស់របស់ស្ថាប័នទាំងនេះ នឹងបង្ហោះនៅលើគេហទំព័រ គ.ជ.ប www.necelect.org.kh បន្ទាប់ពីអគ្គលេខាធិការដ្ឋាន បានរៀបចំដាក់តាមជំពូកនីមួយៗ រួចរាល់ ដើម្បីយកទៅពិភាក្សាក្នុងកិច្ចប្រជុំ គ.ជ.ប នៅពេលខាងមុខ មុននឹងដាក់ឲ្យប្រើប្រាស់ជាផ្លូវការ ហើយការបោះឆ្នោតជ្រើសរើសក្រុមប្រឹក្សា នឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ ៕

ខាងក្រោមនេះ ជាសេចក្តីប្រកាសព័ត៌មានរបស់គណៈកម្មាជាតិរៀបចំ ការបោះឆ្នោត៖

អភិបាលរងខេត្តកំពង់ឆ្នាំង ជំរុញអោយម្ចាស់ភោជនីយដ្ឋានក្នុងខេត្តបង្កើន ការយកចិត្តទុកដាក់អនាម័យសុវត្ថិភាពចំណីអាហារ

កំពង់ឆ្នាំង៖ លោក អម សុភា អភិបាលរងខេត្តកំពង់ឆ្នាំង បានជំរុញ ម្ចាស់អាហារដ្ឋានភោជនីយ៍ដ្ឋាន​ដែលអ្នកប្រកបរបលក់ម្ហូបអាហារត្រូវបង្កើនការយកចិត្តទុកដាក់ចំពោះការងារអនាម័យសុវត្ថិភាពចំណីអាហាររបស់ខ្លួន ដើម្បីត្រៀមបម្រើសេវាជូនភ្ញៀវទេសចរណ៍ជាតិ និងអន្តរជាតិ ដែលនឹងមក លេងនៅខេត្តកំពង់ឆ្នាំង នាឱកាសបុណ្យទន្លេនាពេលដ៍ខ្លីខាងមុខនេះ ។

លោកបានជំរុញបែបនេះក្នុងឱកាសដែល លោកបានអញ្ជើញជួបជាមួយ គ្រូពេទ្យ និងម្ចាស់អាហារដ្ឋាន ភោជនីយដ្ឋានចំនួន១០០នាក់ នៅសាលប្រជុំមន្ទីរសុខាភិបាលខេត្តកំពង់ឆ្នាំង នាព្រឹកថ្ងៃទី២៩ ខែមករា ឆ្នាំ២០១៩ ។

លោក អម សុភា អភិបាលរងខេត្តកំពង់ឆ្នាំងបានមានប្រសាសន៍បន្តថា ក្នុងអំឡុងខែមិនា ឆ្នាំ២០១៩ខាងមុខ ខេត្តកំពង់ឆ្នាំង នឹងធ្វើជាម្ចាស់ផ្ទះបុណ្យទន្លេ លើកទី៥ ហើយនិងមានភ្ញៀវទេសចរណ៍ជាតិ និងអន្តរជាតិជាច្រើនមកលេងកំសាន្ត តម្រូវការច្រើន ពិសេសការបរិភោគ ម្ហូបអាហារ នៅតាមអាហារដ្ឋាន ភោជនីយដ្ឋាន នានាក្នុងខេត្ត ដូចនេះដើម្បី ធានាបាននូវការទាក់ទាញម្ចាស់ ហាងទាំងអស់ត្រូវតែ បង្កើនគុណភាព អនាម័យ បរិស្ថានរបស់ហាង ធ្វើយ៉ាងណាអោយមានទំនុកចិត្ត ១០០ភាគរយពីអតិថិជន ។

លោក អម សុភា បានមានប្រសាសន៍បន្តទៀតថា ម្ចាស់អាហារដ្ឋាន និងភោជនីយដ្ឋានទាំងអស់ ត្រូវធ្វើអោយបាននូវ អនាម័យចំណីអាហារ និងគោលការណ៍អនុវត្ដន៍ល្អ ឲ្យបានគ្រប់ៗគ្នា ដើម្បីបន្ដពង្រឹងសមត្ថភាព លើគុណភាព អនាម័យ និងបំពេញកាតព្វកិច្ចជាអាជីវករមួយដ៏ត្រឹមត្រូវ ដើម្បីក្លាយជាភោជនីយដ្ឋានស្ដង់ដារមួយ ដែលផ្ដល់ទំនុកចិត្ដ និងទទួលបានកិត្ដិយស ពីអតិថិជនជាភ្ញៀវជាតិ និងអន្ដរជាតិ ។

លោក ម៉ម ម៉ាល័យ អនុប្រធានមន្ទីរសុខាភិបាលខេត្តកំពង់ឆ្នាំង ដើម្បីបញ្ចៀសគ្រោះថ្នាក់​ព្រោះតែការ​បរិភោគចំណីអាហារខ្វះអនាម័យ មន្រ្តីនៃមន្ទីរសុខភិបាលបានចុះធ្វើការណែនាំ ផ្សព្វផ្សាយនូវ ចំណុចមួយចំនួន ដើម្បីបង្ការបញ្ហានេះ ។

ចំណុចទាំងអស់នោះរួមមាន ប្រើប្រាស់ទឹកស្អាត និងម្ហូបអាហារដែល ស្អាតជានិច្ច បន្ថែមពីនេះ ចុងភៅត្រូវ​លាង​បន្លែ ផ្លែឈើឲ្យបានស្អាតមុន ពេលដាក់ឲ្យបរិភោគ ។ ត្រូវសម្អាតសម្ភារប្រើប្រាស់សម្រាប់ចម្អិនម្ហូប អាហារឲ្យបានត្រឹមត្រូវ ចម្អិនអាហារឲ្យបានឆ្អិនល្អ ជាពិសេសសាច់ សត្វស្លាប ស៊ុត និងអាហារសមុទ្រ លើសពីនេះ ត្រូវទុកអាហារឆ្អិន និងអហារឆៅដាច់ដោយឡែកពីគ្នា។

អាជ្ញាធរជាតិអប្សរាកំពុងមមាញឹកក្នុងការជួសជុលផ្លូវសំខាន់ៗក្នុងតំបន់រមណីយដ្ឋានអង្គរ

តាមប្រសាសន៍របស់លោកស្រី​ ភឿង សកុណា រដ្ឋមន្រ្តី​ក្រសួងវប្បធម៌ និង​វិចិត្រ​សិល្បៈ និង​ជា​ប្រធាន​អាជ្ញាធរ​ជាតិ​អប្សរា ក្នុង​ឆ្នាំ​២០១៩​នេះ អាជ្ញា​ធរ​ជាតិ​អប្សរា​កំពុង​តែ​មមា​ញឹក​ក្នុង​ការ​ជួស​ជុល និង​កែលម្អ​ផ្លូវ​សំខាន់​ៗ​មួយ​ចំនួន​ក្នុង​តំបន់​អង្គរ​ ឱ្យ​​មាន​ភាព​ល្អ​ប្រសើរ ដើម្បី​ផ្តល់​ភាព​ងាយ​ស្រួល​ក្នុង​ការ​ធ្វើ​ដំណើរ​របស់​ភ្ញៀវ​ទេសចរ និង​បម្រើ​ផល​ប្រយោជន៍​ទូ​ទៅ​ផ្សេង​ទៀត ដល់​បង​ប្អូន​ប្រជា​ពល​រដ្ឋ​ក្នុង​ខេត្ត​សៀមរាប។

ជាក់ស្តែង កំណាត់ផ្លូវ​កូម៉ៃ ចាប់​ពីចំណុច​ផ្លូវកែង​សួន​គ្រឿងទេស​របស់អាជ្ញាធរ​ជាតិអប្សរា ឆ្ពោះ​ទៅប្រាសាទអង្គរ ត្រូវបានជួសជុល និងកែលម្អឡើងវិញ ហើយ​ដោយ​អ៊ុតកៅស៊ូ​បេទីម ដែល​មានគុណ​ភាពខ្ពស់ និងប្រើប្រាស់​ជាប់បានយូរ។ រហូតមកដល់ថ្ងៃ​២៩ ខែ​មករា ឆ្នាំ​២០១៩​នេះ​ ការដ្ឋាន​ជួសជុលបាន​សម្រេច​ ១០០%​ ហើយ លើ​ប្រវែង ១២០០​ម៉ែត្រ។

រីឯកំណាត់​ផ្លូវមិត្តភាពកម្ពុជា-កូរ៉េ ពី​ចំណុចស្វាយ​ធំឆ្ពោះទៅភូមិ​ព្រះ​ដាក់ ដែល​រង​ការ​ខូច​ខាត​ខ្លាំង និង​បាន​ជួស​ជុល​ផ្នែក​ខ្លះ ក៏​កំពុង​ទទួល​បាន​ការ​ជួស​ជុល និង​កែ​លម្អ​បន្ថែម​ទៀត​រហូត​ដល់​ត្រង់​ចំណុច​រង្វង់​មូល​ដំរី​ ស្ថិត​ក្នុង​ភូមិ​តាកុះ ឃុំព្រះដាក់ ស្រុក​បន្ទាយស្រី ហើយ​ការ​ជួស​ជុល​នេះ​នឹង​បញ្ចប់​ក្នុង​រយៈ​ពេល​ប៉ុន្មាន​ខែ​ខាង​មុខ​នេះ។

ដោយឡែក កាលពីចុងឆ្នាំ២០១៨ អាជ្ញា​ធរ​ជាតិ​អប្សរា ​បាន​ជួស​ជុល​រួច​រាល់​ផ្លូវ​សម្តេច​វិបុល​បញ្ញា​ សុខ អាន ដោយ​​បាន​​ពង្រីក​ទទឹង​ផ្លូវ​រហូត​ដល់ ១០ម៉ែត្រ ចាប់ពីចំណុចស្ពាន​នាគ​រហូត​ដល់​រង្វង់​មូល​អប្សរា​។

នេះជាសមិទ្ធិផល​ថ្មី​បន្ថែមទៀត ដែលអាជ្ញាធរជាតិអប្សរា បាន​និង​កំពុង​រំលេច​ឡើង​ដើម្បី​បម្រើ​ផល​ប្រយោជន៍​សាធារណ​ជន ក៏​ដូច​ជា​សម្រួល​ដល់​ការ​ធ្វើ​ដំណើរ​របស់​ភ្ញៀវ​ទេសចរ​ដែល​មក​កម្សាន្ត​ក្នុង​រមណីយ​ដ្ឋាន​អង្គរ​ផង​ដែរ៕

មន្ទីររៀបចំដែនដីខេត្តក្រចេះ​ រៀបចំសន្និបាត​បូកសរុបលទ្ធផល​ ការងារឆ្នាំ២០១៨​ និងទិសដៅ​អនុវត្តបន្ត​

ក្រចេះ ៖ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ នៅថ្ងៃទី២៩ ខែមករា ឆ្នាំ២០១៩នេះ បានរៀបចំសន្និបាតបូកសរុបលទ្ធផល ការងារឆ្នាំ២០១៨ និងលើកទិសដៅការងារឆ្នាំ២០១៩ ក្រោមអធិបតីភាព លោក ប៉ែន លីណាត អភិបាលរងខេត្ត តំណាងលោក វ៉ា ថន អភិបាលខេត្ត និងលោក អឹម ចំរ៉ុង អនុរដ្ឋលេខាធិការ តំណាងលោក ជា សុផារ៉ា ឧបនាយករដ្ឋមន្ត្រីរដ្ឋមន្ត្រីរៀបចំដែនដី នគរូបនីយកម្ម និងសំណង់ ព្រមទាំងមានការចូលរួមពីមន្ទីរ អង្គភាព ក្រុង ស្រុក ឃុំសង្កាត់ គរុសិស្ស និងមន្ត្រីនៃមន្ទីររៀបចំដែនដី នគរូបនីយកម្ម សំណង់ និងសុរិយោដី ប្រហែលជា២៥០នាក់។

ក្នុងឱកាសនោះ លោក កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម និងសំណង់ បានឡើងរាយការណ៍ពីការងារមន្ទីរសម្រេច បាននូវសមិទ្ធផលធំៗជាអាទិ៍រួមមាន៖ ១.ការងាររៀបចំដែនដី និងនគរូបនីយកម្ម ២.ការងារគ្រប់គ្រងសំណង់ ៣.ការងារសុរិយោដី
ក្នុងគោលបំណងគ្រប់គ្រង និងប្រើប្រាស់ដីធ្លីឲ្យបានត្រឹមត្រូវ និងផ្តល់ប្រយោជន៍ជាអតិបរិមាដល់សង្គមជាតិ ហើយស្របតាមគោល ការណ៍ច្បាប់ កន្លងមកបានរៀបចំយុទ្ធសាស្រ្តគ្រប់គ្រងដីធ្លីដោយផ្តោត សំខាន់លើវិធានការពង្រឹងប្រព័ន្ធគ្រប់គ្រងការលុបបំបាត់ភាព អនាធិបតេយ្យក្នុងការកាន់កាប់ដីរបស់រដ្ឋ។

នៅក្នុងពិធីសន្និបាតនេះដែរ លោក ប៉ែន លីណាត អភិបាលរងខេត្ត ក៏បានថ្លែងអំណរគុណចំពោះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដែលបានរាយការណ៍អំពីសមិទ្ធផលសម្រេចបាន និងបញ្ហាប្រឈមរបស់មន្ទីរ ហើយក៏សូមថ្លែងអំណរគុណចំពោះលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងថា្នក់ដឹកនាំគ្រប់ជាន់ថ្នាក់របស់ក្រសួង ដែលតែងតែយកចិត្តទុកដាក់ និងជួយជម្រុញការដោះស្រាយទំនាស់ និងការបញ្ជូនគ្រូឧទ្ទេសដើម្បីបណ្តុះបណ្តាលដល់មន្ត្រីរបស់យើងដើម្បីបង្កើនសមត្ថភាព និងពង្រឹងប្រសិទ្ធភាពការងារបន្ថែមទៀត។

ឆ្លៀតក្នុងឱកាសនោះ លោក អឹម ចំរ៉ុង អនុរដ្ឋលេខាធិការ តំណាងលោក ជា សុផារ៉ា បានផ្ដល់អនុសាសន៍ និងមតិផ្ដាំផ្ញើមួយចំនួន និងជាទិសដៅសម្រាប់ការងារឆ្នាំ២០១៩ ដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះរួមមាន៖
១.ការងារសុរិយោដី៖ សុំពន្លឿនការងារចុះបញ្ជីដីធ្លី ចុះបញ្ជីដីរដ្ឋ ដីសមូហភាពរបស់បងប្អូនជនជាតិដើមភាគតិច ដោយធ្វើការសម្របសម្រួលជាមួយអាជ្ញាធរភូមិឃុំស្រុកនៃតំបន់វិនិច្ឆ័យ ដើម្បីជៀសវាងការថ្នាំងថ្នាក់ពីប្រជាពលរដ្ឋ ព្រមទាំងខិតខំដោះស្រាយវិវាទជូនប្រជាពលរដ្ឋឲ្យបានទាន់ពេលវេលា និងប្រកបដោយប្រសិទ្ធភាព។
២.ការងារលំនៅដ្ឋាន៖ អភិបាលរងខេត្ត សុំបន្តតាមដាន ត្រួតពិនិត្យ និងធ្វើស្ថិតិប្រជាពលរដ្ឋដែលបានមករស់នៅ ធ្វើការកាន់កាប់ដីសម្បទានសង្គមកិច្ចស្ថិតនៅក្នុងស្រុកកូនមុំ ព្រមទាំងបន្តការសិក្សាស្រាវជ្រាវប្រជាពលរដ្ឋដែលខ្វះដី គ្មានដី និងមានតម្រូវការដីពិតប្រាកដដើម្បីសាងសង់លំនៅឋាន និងធ្វើកសិកម្មជាលក្ខណៈគ្រួសារ។
៣.ការងាររៀបចំដែនដី នគរូបនីយកម្ម និងសំណង់៖ ស្នើសុំឲ្យមន្ទីរបន្តខិតខំយកចិត្តទុកដាក់លើការងារត្រួតពិនិត្យសំណង់ និងលក្ខណៈបច្ចេកទេសសំណង់ ព្រមទាំងសោភណ្ឌភាព សណ្តាប់ធ្នាប់នៃសំណង់ និងបន្តត្រួតពិនិត្យសំណង់ខុសច្បាប់ ដោយផ្សារភ្ជាប់ជាមួយការងារផ្សព្វផ្សាយលិខិតបទដ្ឋានគតិយុត្តជាធរមាន៕

កម្ពុជា នឹងយកឱកាសបង្ហាញពីវប្បធម៌ដ៏ប្រពៃវិសេសរបស់ខ្មែរ ទៅកាន់ ពិភពលោក តាមរយៈការសម្តែងសិល្បមាន៥ទម្រង់ នៅក្នុងក្បួន ដង្ហែឈីងហ្គេ

លំនៅដ្ឋាន និងសំណង់ស្រាលតូចតាចរបស់​ប្រជាពលរដ្ឋរស់នៅ​ ក្នុងតំបន់​រមណីយដ្ឋានអង្គរ​ ត្រូវកែលម្អ​ និងជួសជុលទ្បើងវិញ​

យោងតាមរបាយការណ៍នៅក្នុងឆ្នាំ២០១៨ ក្រុមការងារលេខាធិការដ្ឋាន សហគមន៍ទាំង៥ក្រុម នៃអាជ្ញាធរជាតិអប្សរា បានបន្តការងារចុះពិនិត្យ អនុញ្ញាតឱ្យមានការជួសជុលកែលម្អលំនៅដ្ឋាន និងសាងសង់សំណង់ ស្រាលតូចតាចបានចំនួន២១៥៩គ្រួសារ ក្នុងតំបន់រមណីយដ្ឋាន បេតិកភណ្ឌពិភពលោកអង្គរ។

ប្រភេទនៃការជួសជុលកែលម្អលំនៅដ្ឋាន និងសាង់សង់សំណង់ស្រាល តូចតាចដែលទទួលបានការអនុញ្ញាតរួមមាន៖ ជួសជុលឬប្តូរដំបូល ជួសជុលជញ្ជាំង ប្តូរសសរ ប្តូរជណ្តើរ តសំយ៉ាប កឥដ្ឋក្រោមផ្ទះ សាងសង់បង្គន់អនាម័យ ទ្រុងមាន់ ចាក់ដី ក្រោលគោ ទ្រុងជ្រូក ។ល។ និងតម្រូវការផ្សេងៗទៀតដែលចាំបាច់ក្នុងការរស់នៅប្រចាំថ្ងៃ។

ក្នុងចំណោមអ្នកស្រុក២១៥៩គ្រួសារ ដែលទទួលបានការអនុញ្ញាតមាន ស្រុកប្រាសាទបាគង ទទួលបានការអនុញ្ញាតចំនួន៣៧៧គ្រួសារ ស្រុកអង្គរធំ ទទួលបានការអនុញ្ញាតចំនួន២៨៨គ្រួសារ ស្រុកពួក ទទួលបានការអនុញ្ញាតចំនួន៤២៧ករណី ក្រុងសៀមរាប ទទួលបានកាតអនុញ្ញាតចំនួន៩០៦គ្រួសារ និងស្រុកបន្ទាយស្រី ទទួលបានការអនុញ្ញាតបានចំនួន១៦១គ្រួសារ។

ការអនុញ្ញាតនេះ ធ្វើឡើងបន្ទាប់ពីក្រុមការងារសហគមន៍ បានចុះពិនិត្យទៅ ដល់ខ្នងផ្ទះជាក់ស្តែង និងឯកសារចាំបាច់ពាក់ព័ន្ធមួយចំនួនទៀត ដើម្បីជា មូលដ្ឋានបច្ចេកទេសក្នុងការវាយតម្លៃថា ពួកគាត់គឺជាប្រជាពលដ្ឋរស់នៅ ក្នុងតំបន់អង្គរពិតប្រាកដតាំងពីយូរយារ មានការបញ្ជាក់យ៉ាងច្បាស់លាស់ ពីអាជ្ញាធរមូលដ្ឋានភូមិ-ឃុំ-សង្កាត់ និងមានតម្រូវការជាក់ស្តែងក្នុងការ កែលម្អការរស់នៅឱ្យបានល្អប្រសើរ។

គួរបញ្ជាក់ដែរថា អាជ្ញាធរជាតិអប្សរា បានបង្កើតក្រុមការងារសហគមន៍ នេះឡើង គឺដើម្បីសម្រួលដល់ការរស់នៅរបស់ប្រជាពលរដ្ឋក្នុងតំបន់អង្គរ ដែលគ្របដណ្តប់លើផ្ទៃដី៤០១គីឡូម៉ែត្រការ៉េ ស្ថិតនៅក្នុងក្រុង/ស្រុកចំនួន៥ ឃុំចំនួន២១ និងភូមិចំនួន១១២ លើការជួសជុលផ្ទះចាស់ និងសាងសង់សំណង់ស្រាលតូចតាច ការដោះស្រាយបញ្ហាប្រឈមនានា ការជួយសង្គ្រោះពេលប្រជាជនមានទុក្ខលំបាក រួមទាំងផ្សព្វផ្សាយ ការយល់ដឹងអំពីបេតិកភណ្ឌ ដល់ប្រជាជនគ្រប់ៗគ្នា។

ពិសេសជាងនេះទៀតនោះ សកម្មភាពទាំងនេះគឺជាចូលរួមចំណែករបស់ អាជ្ញាធរជាតិអប្សរាក្នុងការបង្ខិតសេវាសាធារណៈរបស់រដ្ឋឲ្យចូលទៅជិតបងប្អូនប្រជាពលរដ្ឋ និងកាត់បន្ថយរាល់ការចំណាយទាំងពេលវេលា និងការធ្វើដំណើរទៅមកផងដែរ៕

ប្រជាពលរដ្ឋ​ក្រុងកំពង់ឆ្នាំង​ សាទរចំពោះសមិទ្ធផលថ្មី​ដែលសម្រេច​បានការ​ សាងសង់១០០%​

កំពង់ឆ្នាំង៖ លោក កែវ ពៅ ប្រធានមន្ទីសាធារណការ និងដឹកជញ្ជូន ខេត្តកំពង់ឆ្នាំង បានឲ្យដឹងនៅថ្ងៃទី២៩ ខែមករា ឆ្នាំ២០១៩ នេះថា ការសាងសង់ផ្លូវលេខ២៩ ក្រាលកៅស៊ូAC ១ ខ្សែ ក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង ប្រវែង៣៥០ម៉ែត្រ ក្រាលកៅស៊ូ AC០,០៥ម៉ែត្រ,ទទឹង៨ម៉ែត្រ និង ក្រាលកៅស៊ូAC៦ម៉ែត្រ ដើម្បីអោយ ប្រជាពលរដ្ឋធ្វើដំណើរដោយសុវត្ថិភាព កែលំអរសោភ័ណភាព និងបញ្ជៀសបញ្ហាគ្រោះថ្នាក់ចរាចរណ៍។

ប្រធានមន្ទីសាធារណការបានឲ្យដឹងទៀតថា គំរោងនេះជាលើកទី៣ហើយ ដែលក្រសួងផ្តល់ថវិកាអោយខេត្តកំពង់ឆ្នាំង អនុវត្តគំរោងដោយមន្ទីរ សាធារណការ និងដឹកជញ្ជូនខេត្តកំពង់ឆ្នាំង ត្រូវបានការសហការ និងអបអរសាទរពីប្រជាពលរដ្ឋដោយអនុវត្តការសាងសង់ទៅបានដោយរលូនបើគិតមកត្រឹមថ្ងៃទី២៩ ខែមករា ឆ្នាំ២០១៩ គឺសម្រេចបានប្រមាណ
១០០ភាគរយហើយ។

ក្នុងឱកាសនោះដែរ តំណាងប្រជាពលរដ្ឋ ក៏បានថ្លែងអំណរគុណដល់ លោកនាយករដ្ឋមន្ត្រី ហ៊ុន សែន លោកទេសរដ្ឋមន្រ្តីស៊ុន ចាន់ថុល លោក ឈួរ ច័នឌឿន និងលោក កែវ ពៅ ដែលបានគិតគូរនិងដោះស្រាយបញ្ហា ប្រឈម និងសំណូមពរចាំបាច់របស់ពួកគាត់បានទាន់ពេលវេលា ជាមួយសមិទ្ធផលថ្មីៗថែមទៀត៕

ស្រូវប្រាំងខ្វះទឹកប្រមាណ ៥៣១ ហិចតា ស្មើនឹង ៦៨៩គ្រួសារ ត្រូវបានអន្តរាគមន៍បូមទឹកសង្គ្រោះបន្ទាន់

ស្វាយរៀង៖ នៅថ្ងៃទី២៩ ខែមករា ឆ្នាំ ២០១៩ មន្ទីរធនធានទឹក និងឧតុនិយមខេត្តស្វាយរៀង បានសហការជាមួយអាជ្ញាធរដែនដី ភូមិ ឃុំ បានចុះជួយអន្តរាគមន៍បូមទឹកសង្គ្រោះស្រូវប្រាំងខ្វះទឹកប្រមាណ ៥៣១ ហិចតា ស្មើនឹង ៦៨៩គ្រួសារ ដែលស្ថិតនៅក្នុងភូមិស្វាយយា ឃុំស្វាយយា ស្រុកស្វាយជ្រំ ខេត្តស្វាយរៀង។

ក្រុមការងារអន្តរាគមន៍នេះ គឺបានចាប់ផ្តើមតាំងពីថ្ងៃទី២៩ ខែមករា ឆ្នាំ២០១៩ ដោយប្រើប្រាស់ម៉ាស៊ីនបូមទឹកធុនមធ្យម ចំនួន ០១ គ្រឿង និងយកប្រភពទឹកពីអាងទឹកដូនសរ៕

ក្រសួង ស្ថាប័ននានា ចេញសេចក្តីថ្លែងការណ៍ថ្កោលទោស និងប្រឆាំងដាច់ខាតចំពោះការអំពាវនាវរបស់ទណ្ឌិត សម រង្ស៊ី ឱ្យកងទ័ពងើបឈរប្រឆាំង រាជរដ្ឋាភិបាលស្របច្បាប់

បន្ទាប់ពីទណ្ឌិត សម រង្ស៊ី បានចេញមកញុះញង់ជាថ្មីដល់កងកម្លាំង ប្រដាប់អាវុធរបស់កម្ពុជា កុំឱ្យស្តាប់បង្គាប់រាជរដ្ឋាភិបាលដែលដឹកនាំដោយ លោកនាយករដ្ឋមន្រ្តី ហ៊ុន សែន និងថែមទាំងបានអំពាវនាវឱ្យកងទ័ព ប្រឆាំងរាជរដ្ឋាភិបាលនោះ មានក្រសួង ស្ថាប័ន ថ្នាក់ជាតិ បញ្ជាការដ្ឋានកង ទ័ពទាំងបី (កងទ័ពជើងគោក ជើងទឹក ជើងអាកាស) បញ្ជាការដ្ឋានយោធ ភូមិភាគនានា និងថ្នាក់ក្រោមជាតិជាច្រើនបានចេញសេចក្តីថ្លែងការណ៍ និងញត្តិប្រឆាំងដាច់ខាតចំពោះការអំពាវនាវរបស់ទណ្ឌិត សម រង្ស៊ី និងចាត់ទុកថា ជាអំពើល្មើសច្បាប់។

ក្រសួងការពារជាតិ បានប្រកាសថ្កោលទោស និងប្រឆាំងដាច់ខាតចំពោះ ការអំពាវនាវរបស់ទណ្ឌិត សម រង្ស៊ី មេចលនាសង្រ្គោះជាតិឱ្យកងទ័ព ងើបប្រឆាំងរាជរដ្ឋាភិបាលស្របច្បាប់ និងបានអំពាវនាវដល់ជនរួមជាតិ ទាំងអស់ កុំជឿតាមការញុះញង់របស់ទណ្ឌិត សម រង្ស៊ី ហើយប្រកាសថា រាល់សកម្មភាពណាដែលគាំទ្រទៅនឹងការអំពាវនាវរបស់ទណ្ឌិត សម រង្ស៊ី គឺជាអំពើខុសច្បាប់ ដែលកងទ័ពត្រូវបង្រ្កាបដាច់ខាត ដើម្បីថែរក្សាសន្តិសុខ សណ្តាប់ធ្នាប់សង្គម និងសន្តិភាពជូនជាតិមាតុភូមិ។

កងយោធពលខេមរភូមិន្ទ សូមអំពាវនាវដល់ជនរួមជាតិទាំងអស់ កុំជឿតាម ការអំពាវនាវរបស់ទណ្ឌិត សម រង្ស៊ី។ យើងចាត់ទុកថា រាល់សកម្មភាពណា ដែលគាំទ្រទៅនឹងការអំពាវនាវរបស់ទណ្ឌិត សម រង្ស៊ី គឺជាអំពើខុសច្បាប់។ យើងទាំងអស់គ្នាប្តេជ្ញាចិត្តបង្រ្កាបដាច់ខាត ដើម្បីថែរក្សាសន្តិសុខ សណ្តាប់ ធ្នាប់សង្គម និងសន្តិភាពជូនជាតិមាតុភូមិ។

នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជានាយទាហានជាន់ខ្ពស់មួយរូបរបស់កម្ពុជា និងបានចូលសមរភូមិ រាប់ភ្លេច នាពេលសម័យសង្គ្រាម បានបញ្ជាក់ច្បាស់ៗថា កងរាជអាវុធហត្ថ ដែលជាផ្នែកមួយនៃកងយោធពលខេមរភូមិន្ទមានតួនាទីភារកិច្ចដូចខាងក្រោម៖ ទី១- ការពារខឿនឯករាជ្យជាតិ និងបូរណភាពអធិបតេយ្យ ទី២- ការពារសន្តិសុខ និងសណ្តាប់ធ្នាប់សង្គម ទី៣-ពង្រឹងការអនុវត្តន៍ច្បាប់ សុំថ្កោលទោសដាច់អហង្ការ ការអំពាវនាវរបស់ទណ្ឌិត សម រង្សី និងប្តេជ្ញាអនុវត្តន៍យ៉ាងម៉ឺងម៉ាត់ដីកាតុលាការក្នុងការចាប់ខ្លួនទណ្ឌិត ដើម្បីពង្រឹងការអនុវត្តន៍ច្បាប់ និងកសាងព្រះរាជាណាចក្រកម្ពុជាជា ប្រទេសនីតិរដ្ឋ។ ជាមួយគ្នានេះ នាយឧត្តមសេនីយ៍ សៅ សុខា ក៏បានបញ្ជាក់ខ្លាំងៗទៀតថា កម្លាំងអាវុធហត្ថទូទាំងប្រទេស សូមប្រកាស ការពារដាច់ខាតរាជរដ្ឋាភិបាល ដែលបង្កើតឡើងតាមរយៈការបោះឆ្នោត ដឹកនាំដោយលោកនាយករដ្ឋមន្រ្តី ហ៊ុន សែន ដែលជានាយឧត្តមសេនីយ៍ ផុតលេខផ្កាយមាស៥។

គួររំលឹកផងដែរថា លោកនាយករដ្ឋមន្រ្តី ហ៊ុន សែន កាលពីថ្ងៃទី២៤ ខែមករា ឆ្នាំ២០១៩ ក្នុងឱកាសប្រារព្ធខួប ២០ឆ្នាំនៃការបង្កើតបញ្ជាការ ដ្ឋានកងទ័ពជើងគោកបានចេញបទបញ្ជាដើម្បីវាយកម្ទេចជនក្បត់ជាតិ ដែលប៉ុនប៉ងបង្កើតបដិវត្តន៍ពណ៌ បំផ្លិចបំផ្លាញសុខសន្តិភាព របស់ប្រជាជន កម្ពុជា។ លោកក៏បានបន្ថែមថា ចំពោះទណ្ឌិតដែលមានទោស មានសាល ដីកាស្ថាពរ មិនចាំបាច់រង់ចាំបទបញ្ជាឡើយត្រូវអនុវត្តភ្លាម៕

កិច្ចប្រជុំវគ្គផ្សព្វផ្សាយរបបសន្តិសុខសង្គមសម្រាប់ជាប្រយោជន៍ដល់មន្ត្រីសាធារណៈ អតីតមន្ត្រីរាជការ និងអតីតយុទ្ធជន

សៀមរាប៖ នៅព្រឹកថ្ងៃទី២៩ ខែមករា ឆ្នាំ២០១៩ នៅបន្ទប់ប្រជុំធំ សាលាខេត្ត មានរៀបចំកិច្ចប្រជុំផ្សព្វផ្សាយរបបសន្តិសុខសង្គមផ្នែកហានិភ័យការងារសម្រាប់មន្ត្រីសាធារណៈ និងផ្នែកថែទាំសុខភាពសម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជន ក្រោមអធិបតីភាពលោក ទៀ សីហា អភិបាលនៃគណៈ អភិបាលខេត្ត សមាជិកក្រុមប្រឹក្សាខេត្ត អភិបាលរងខេត្ត និង តំណាង ប.ស.ស ថ្នាក់ជាតិ។ កិច្ចប្រជុំនេះក៏មានការអញ្ជើញចូលរួមពីសំណាក់ថ្នាក់ដឹកនាំមន្ទីរអង្គភាព ក្រុមប្រឹក្សា អភិបាល នាយករដ្ឋបាលក្រុង ស្រុក មន្ត្រីរាជការ មន្ត្រីជាប់កិច្ចសន្យារបស់រដ្ឋបាលខេត្ត និង បសស ថ្នាក់ខេត្តផងដែរ។

បសស ត្រូវបានបង្កើតឡើងក្នុងគោលបំណងបង្កើតរបបសន្តិសុខសង្គមផ្នែកហានិភ័យការងារសម្រាប់មន្ត្រីសាធារណៈ និងផ្នែកថែទាំសុខភាពសម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជន ដើម្បីលើកកម្ពស់សុខមាលភាពសង្គម។ រាជរដ្ឋាភិបាល បានដាក់ចេញនូវគោលនយោបាយនេះ គឺជាការយកចិត្តទុកដាក់ចំពោះមន្ត្រីសាធារណៈ អតីតមន្ត្រីរាជការ និងអតីតយុទ្ធជនទទួលបានអត្ថប្រយោជន៍ក្នុងហានិភ័យការងារ និងការថែទាំសុខភាព។ ក្រៅពីនេះ បសស ក៏បានផ្តល់អត្ថប្រយោជន៍នេះនៅក្នុងវិស័យ ឯកជនផងដែរ។

របបសន្តិសុខសង្គមផ្នែកហានិភ័យការងារ សំដៅធានារ៉ាប់រងចំពោះគ្រោះថ្នាក់ការងារ (គ្រោះថ្នាក់ពេលធ្វើដំណើរ ឬធ្វើការ ឬកំពុងធ្វើការ) និងជម្ងឺវិជ្ជាជីវៈ (ជម្ងឺដែលកើត ដោយមូលហេតុពីការងារ ឬពាក់ព័ន្ធនឹងការងារ)។ ដោយឡែក របបសន្តិសុខ សង្គមផ្នែកថែទាំសុខភាព សំដៅដល់ការធានារ៉ាប់រង សុខភាពសង្គម ដែលត្រូវផ្តល់ ការគាំពារគ្រោះថ្នាក់ ឬជំងឺ ឬបញ្ហាសុខភាព ដែលមិនពាក់ព័ន្ធនឹងហានិភ័យការងារ។

លោកអភិបាលខេត្ត បានថ្លែងអំណរគុណយ៉ាងជ្រាលជ្រៅចំពោះ ប្រតិភូ រាជរដ្ឋាភិបាលទទួលបន្ទុក ប.ស.ស និងសហការី ដែលបានសហការរៀប ចំវគ្គផ្សព្វផ្សាយរបបសន្តិសុខសង្គមនេះឡើងសម្រាប់ជាប្រយោជន៍ដល់មន្ត្រីសាធារណៈ អតីតមន្ត្រីរាជការ និងអតីតយុទ្ធជនផងដែរ៕