ភ្ញៀវទេសចរ ស្គាល់ខ្លោងទ្វារតាកាវកាន់តែច្រើន បន្ទាប់ពីជួសជុលរួចរាល់

ពីមួយថ្ងៃទៅមួយថ្ងៃ មានអ្នកទេសចរជាតិ -អន្តរជាតិកាន់តែច្រើនឡើងៗទៅទស្សនា និងថតរូបនៅខ្លោងទ្វារតាកាវ បន្ទាប់ពីក្រុមការងារនៃអាជ្ញាធរជាតិអប្សរាបានជួសជុលតួខ្លោងទ្វាររួចរាល់ រួមទាំងចម្លាក់ទេវតា និងអសុរៈទាញព្រ័ត្របានមួយចំនួន ហើយកែលម្អផ្លូវផង ងាយស្រួលភ្ញៀវទេសចរអាចឆ្លងកាត់ និងមានសុវត្ថិភាព។

លោក កុយ ភិរុណ ដែលខំស្កាត់មកតាំងពីខេត្តកំពត មានប្រសាសន៍ថា ខ្លោងទ្វារតាកាវ ស្ថិតនៅទិសខាងលិចនៃក្រុងអង្គរធំ មានចំណុចពិសេសជាងខ្លោងទ្វារផ្សេងៗទៀត ដោយសារតែខ្លោងទ្វារនេះ មានពន្លឺព្រះអាទិត្យរៀបលិចចាំងលើ ធ្វើឱ្យសម្រស់ខ្លោងទ្វារកាន់តែស្រស់ស្អាត។ ខ្លោងទ្វារតាកាវមិនត្រឹមតែជាកេរដំណែលរបស់បុព្វបុរសខ្មែរប៉ុណ្ណោះទេ ថែមទាំងអាចទស្សនាថ្ងៃរៀបលិច កសិន្ធុព័ទ្ធជុំវិញ ថតរូបជាមួយនិងប្លង់ស្អាតៗផង។ ក្រៅតែពីការថតរូប ទេសចរចំណាយពេល ចំណាយអារម្មណ៍ជាមួយទិដ្ឋភាពថ្ងៃរៀបលិច នឹងទទួលបានអារម្មណ៍ស្រស់ស្រាយទៅតាមធម្មជាតិ ផ្ទៃមេឃ ពន្លឺព្រះ អាទិត្យរៀបអស្តង្គត បូកជាមួយស្ថាបត្យកម្មដ៏អស្ចារ្យរបស់ដូនតា ដែលនេះជាការចងចាំដ៏ល្អ និងមានក្តីសុខផ្លូវចិត្ត។

ចំណែក លោក វណ្ណី ពិសិដ្ឋ មកពីភ្នំពេញ ក៏បានបង្ហាញចំណាប់អារម្មណ៍ភ្ញាក់ផ្អើលថា ពេលរូបលោក ឃើញខ្លោងទ្វារតាកាវ បន្ទាប់ពីអាជ្ញាធរជាតិអប្សរាបានជួសជុលតួខ្លោងទ្វាររួចរាល់នេះ មានភាពរឹងមាំ និងស្រស់ស្អាតខ្លាំងណាស់ ហើយលោកក៏មិនធ្លាប់បានឃើញ ឬស្គាល់ពីមុនសោះឡើយ។ លោក វណ្ណី សរសើរថា នេះជាមោទនភាពរបស់ខ្មែរសម្រាប់ឱ្យក្មេងជំនាន់ក្រោយបានសិក្សាស្វែងយល់។  លោក វណ្ណី ពិសិដ្ឋ ចង់ឱ្យភ្ញៀវទេសចរគ្រប់រូបបានទៅទស្សនាទីនេះ  ព្រមទាំងថតរូបភាពស្អាតៗ យកទៅចូលរួមផ្សព្វផ្សាយពីសក្កានុពលនៃកន្លែងទេសចរណ៍ថ្មីនេះ៕

 

អត្ថបទ និងរូបភាព: លោក យី សុថា

 

អាកាសយានដ្ឋានអន្តរជាតិសៀមរាបអង្គរ ដ៏ថ្មីស្រឡាង ទំនើប និងស្រស់ស្អាត បានត្រៀមខ្លួនរួចរាល់ហើយ សម្រាប់ទទួលស្វាគមន៍ជើងហោះហើរ មកពីគ្រប់គោលដៅទាំងអស់ ចាប់ពីថ្ងៃទី១៦ ខែតុលា ឆ្នាំ២០២៣

ថ្ងៃទី៧ ខែតុលា ឆ្នាំ២០២៣ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងមានការចូលរួមពីឯកឧត្តមជារដ្ឋលេខាធិការតាមបណ្តាក្រសួងនានា​ អភិបាលនៃគណៈអភិបាលខេត្តសៀមរាប អញ្ជើញទស្សនកិច្ចនៅអាកាសយានដ្ឋានអន្តរជាតិសៀមរាបអង្គរថ្មី។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ មានសេចក្តីសោមន្សរីករាយ​ ដែលបាន​មកដល់​ការដ្ឋាន​អាកាសយានដ្ឋាន​អន្តរជាតិ​សៀមរាបអង្គរថ្មី ដែលគ្រោងនឹងបើកដំណើរការជាផ្លូវការនៅថ្ងៃទី១៦ ខែតុលា ឆ្នាំ២០២៣។ ឯកឧត្តមបានកោតសរសើរ និងវាយតម្លៃខ្ពស់​ដល់ក្រុមហ៊ុនវិនិយោគអាកាសយានដ្ឋានអន្តរជាតិអង្គរ (Angkor International Airport Investment (AIAI)) ដែលបាន​សាងសង់ និងអភិវឌ្ឍអាកាសយានដ្ឋានសៀមរាបអង្គរថ្មីដ៏ធំ ទំនើប និងប្រកបដោយភាពទាក់ទាញ។ ទោះបីជាការសាងសង់ប្រលានយន្តហោះនេះ បានធ្វើឡើងនៅក្នុងដំណាក់កាលវិបត្តិកូវីដ-១៩ ក៏ដោយ ក៏ក្រុមហ៊ុននៅតែខិតខំប្រឹងប្រែងសាងសង់ និងអភិវឌ្ឍអាកាសយានដ្ឋាននេះ ប្រកបដោយជោគជ័យ ដែលសរបញ្ជាក់យ៉ាងច្បាស់ពីភាពខ្លាំងរបស់ក្រុមហ៊ុន ក៏ដូចជា ការខិតខំប្រឹងប្រែងរបស់វិស្វករ កម្មករ និងបុគ្គលិកទាំងអស់។

អាកាសយានដ្ឋានអន្តរជាតិសៀមរាបអង្គរដ៏ស្កឹមស្កៃនេះ ជាសក្ខីកម្មគួរជាទីមោទកៈ និងប្រកបដោយក្តីសង្ឃឹមខ្ពស់សម្រាប់អនាគតដ៏រុងរឿងរបស់កម្ពុជា។ សមិទ្ធផលថ្មីមួយនេះ​ពិតជាមានសក្តានុពលក្រៃលែងដែលអាចជួយបង្កើនភាពទាក់ទាញទេសចរណ៍បន្ថែមទៀតមកកាន់ទឹកដីខេត្តសៀមរាប ដែលជាគោលដៅទេសចរណ៍ដ៏សំខាន់មួយនៅក្នុងប្រទេសយើង​​ និងអាចទាក់ទាញសក្តានុពល   ​​វិនិយោគមកកាន់ទឹកដីខេត្តសៀមរាប និងប្រទេសកម្ពុជាទាំងមូលផងដែរ។ អាកាសយាន​ដ្ឋាន​ថ្មីនេះ ពិតជាបានបង្កើតការងារដោយផ្ទាល់ និងប្រយោលជាច្រើនកន្លែង ទាំងនៅក្នុងដំណាក់កាលសាងសង់ និងប្រតិបត្តិការ ដែលរួមចំណែកបង្កើនប្រាក់ចំណូលជាតិ និងលើកកម្ពស់ជីវភាពប្រជាពលរដ្ឋ ជាពិសេសអ្នករស់នៅក្នុងខេត្តសៀមរាប​។ ឯកឧត្តមរដ្ឋមន្ត្រី ជឿជាក់ថា អាកាសយានដ្ឋាននេះ នឹងជួយទាក់ទាញភ្ញៀវទេសចរណ៍ ដែលនឹងរួមចំណែកក្នុងការឈានទៅសម្រេចឱ្យបាននូវចំនួនភ្ញៀវទេសចរណ៍​អន្តរជាតិ ប្រមាណ ៨លាននាក់ នៅឆ្នាំ២០២៨  តាមរយៈការបង្កើនការតភ្ជាប់ជើងហោះហើរត្រង់ទាំងនៅក្នុងតំបន់ និងពិភពលោក។ កត្តានេះ នឹងរួមចំណែកលើកកម្ពស់មុខមាត់ សក្តានុពល និងកិត្យានុភាព​របស់កម្ពជា។ ឯកឧត្តមរដ្ឋមន្ត្រី ក្រសួងទេសចរណ៍ យល់ឃើញថា ការដាក់បញ្ចូល និងការរចនាឱ្យមានលក្ខណៈ ជាខ្មែរ/ភាព​ជាខ្មែរ  និងការដាក់តាំងបង្ហាញ និងលក់ផលិតផលខ្មែរក្នុងតម្លៃសមរម្យនៅក្នុង អាកាសយានដ្ឋាន ពិតជានឹងរួមចំណែកក្នុងការលើកកម្ពស់ការច្នៃប្រឌិត និងការផលិតផលិតផលនៅក្នុងស្រុក ការថែរក្សានិងលើកស្ទួយអត្តសញ្ញាណជាតិ។

ឆ្លៀតក្នុងឱកាសនេះ ឯកឧត្តមរដ្ឋមន្ត្រី សូមសម្តែងការនឹករលឹកដល់វីរភាពរបស់លោកឪពុក គឺ
សម្តេចវិបុលបញ្ញា សុខ អាន ដែលជាឥស្សរជនដ៏ឆ្នើមមួយរូប ក្នុងចំណោមថ្នាក់ដឹកនាំ ដែលជាស្ថាបនិកជាតិ ដែលបានចូលរួមចំណែកកែ​លម្អឡើងវិ​ញ និងអភិវឌ្ឍន៍អាកា​សយានដ្ឋាន អន្ដរ​ជាតិទាំង៣ ទីតាំងដំបូងរបស់​កម្ពុជា បន្ទាប់ពីសង្គ្រាម។ ការបើកឱ្យដំណើរការ​អាកាសយានដ្ឋាន អន្តរជាតិឡើងវិញ គឺជាការឆ្លើយតប​ទៅនឹងត​ម្រូវកា​រចាំបា​ច់នៃ​ការ​កើនឡើងនូវចំនួន​អ្នកដំណើរ​ជាតិ និងអន្ដ​រជាតិពីគ្រប់ទិសទី។

ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី យុទ្ធសាស្រ្តបញ្ចកោណ ដំណាក់កាលទី១ បានចង្អុលបង្ហាញការងារជាអាទិភាពក្នុងការបង្កើត កំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ដោយកំណត់យកអាទិភាពគន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។

ស្របពេលដែលយើងមានអាកាសយានដ្ឋានថ្មី ដែលរចនា​ឡើង​​ស្របតាម​ស្តង់ដារកម្រិត អន្តរជាតិ ​ និងមានការគិតគូរពីសុវត្ថិភាព ប្រសិទ្ធភាព និង​និរន្តរភាព​ ក៏ដូចជាបានបំពាក់ដោយគ្រឿងបរិក្ខារ និងបច្ចេកវិទ្យាទំនើប យើងក៏ត្រូវយកចិត្តទុកដាក់ត្រៀមខ្លួនឱ្យកាន់តែប្រសើរជាងពេលណាៗទាំងអស់ ដើម្បីបង្ហាញពីវប្បធម៌ដ៏សម្បូរបែបរបស់ប្រទេសកម្ពុជាទៅកាន់ពិភពលោក។

ក្នុងន័យនេះ យើងគួរពិចារណាដល់​ការលើកកម្ពស់សេវាកម្មនានា​ ជាពិសេស​សេវាកម្ម​ទេសចរណ៍​ឱ្យ​មាន​កម្រិត​អន្តរជាតិ​ មានន័យថាទាំងហេដ្ឋារចនាសម្ព័ន្ធរឹង​ និងទន់ ត្រូវតែដើរទៅទន្ទឹមគ្នាដោយមិនអាចខ្វះបាន។

តាមរយៈកិច្ចសហការ និងការចូលរួមរបស់ស្ថាប័នពាក់ព័ន្ធ យើងនឹងអាចពង្រឹងយន្តការ នៃការសម្របសម្រួលដល់ការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេសឱ្យមានប្រសិទ្ធិភាពខ្ពស់ និងភាពកក់ក្ដៅបំផុត ដែលអាចធ្វើឱ្យកម្ពុជាទទួលបានកំណើននៃភ្ញៀវទេសចរណ៍ជាតិ និងអន្តរជាតិយ៉ាងឆាប់រហ័សនាពេលខាងមុខនេះ។

 

 

អង្គភាពព័ត៌មាន និងប្រតិកម្មរហ័សបញ្ចេញផ្សាយវីដេអូ៖ ការដំឡើងប្រាក់ឈ្នួលអប្បបរមា និងការគិតគូរអំពីសុខទុក្ខរបស់កម្មករនិយោជិត គឺជាឆន្ទៈ និងការប្តេជ្ញាចិត្តរបស់រាជរដ្ឋាភិបាល ដឹកនាំដោយ សម្តេចធិបតី ហ៊ុន ម៉ាណែត!

អង្គភាពព័ត៌មាននិងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ចេញផ្សាយនូវវីដេអូមួយនៅថ្ងៃទី៧ ខែតុលា ឆ្នាំ២០២៣ ដែលមានរយៈពេលប្រមាណ១៤នាទី ក្រោមចំណងជើងថា ការដំឡើងប្រាក់ឈ្នួលអប្បបរមា និងការគិតគូរអំពីសុខទុក្ខរបស់កម្មករនិយោជិត គឺជាឆន្ទៈ និងការប្តេជ្ញាចិត្តរបស់រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត!

វីដេអូនេះ បានលើកឡើងថា ស្ថិតក្នុងស្ថានភាពនៃវិបត្តិសកលកើតចេញពីកូវីដ១៩មិនទាន់បញ្ចប់ រួមទាំងវិបត្តិសេដ្ឋកិច្ចដែលចេញពីសង្គ្រាមនៅអ៊ុយក្រែន និងការប្រកួតប្រជែងរបស់ប្រទេសមហាអំណាច ដោយកត្តាភូមិសាស្ត្រនយោបាយ បាននិងកំពុងធ្វើឱ្យប្រទេសជាច្រើន ជួបនឹងស្ថានភាពមិនប្រាកដប្រជាផ្នែកសេដ្ឋកិច្ច។ ស្ថានភាពនេះ បានធ្វើឱ្យប្រទេសនៅតំបន់អាស៊ី ដែលផលិតសម្លៀកបំពាក់ ស្បែកជើង កាបូប និងសម្ភារៈធ្វើដំណើរ បានធ្លាក់ចុះនូវការបញ្ជាទិញ ហើយប្រទេសកម្ពុជាក៏ទទួលរងនូវផលប៉ះពាល់ ដែលកើតចេញពីវិបត្តិនេះផងដែរ។ ប៉ុន្តែប្រជាពលរដ្ឋកម្ពុជា ជាពិសេស កម្មករនិយោជិត ពិតជាមានសំណាងដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ដឹកនាំរាជរដ្ឋាភិបាលអាណត្តិថ្មីបន្តពីសម្តេចតេជោ ហ៊ុន សែន បានធានា និងផ្តល់នូវភាពកក់ក្តៅ ហើយជានិច្ចកាលតែងគិតគូរពីបញ្ហាប្រឈមដែលប៉ះពាល់ដល់ជីវភាពរស់នៅរបស់ប្រជាពលរដ្ឋគ្រប់ពេលវេលា និងបានចាត់ទុក្ខសុខទុក្ខរបស់ប្រជាពលរដ្ឋជាកិច្ចការអាទិភាពបំផុតដែលត្រូវដោះស្រាយជាបន្ទាន់។ 

រាជរដ្ឋាភិបាលអាណត្តិទី៧ ពិតជាមានឆន្ទៈយ៉ាងមុតមាំក្នុងការបម្រើប្រជាពលរដ្ឋ និងប្តេជ្ញាប្រឹងប្រែងរិះរកវិធីសាស្ត្រនានា តាមគ្រប់លទ្ធភាព ដើម្បីជួយសម្រួលដល់ជីវភាពរស់នៅរបស់បងប្អូនកម្មករនិយោជិត។ ជាក់ស្តែង ក្នុងការសម្រេចដំឡើងប្រាក់ឈ្នួលអប្បបរមា សម្រាប់ឆ្នាំ២០២៤ រហូតដល់២០៤ដុល្លារអាមេរិក ដែលក្នុងនោះប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត បានជួយបន្ថែមថវិកាចំនួន២ដុល្លារ ក្នុង១ខែ គឺក្របដណ្តប់លើកម្មករនិយោជិតដែលបម្រើការងារក្នុងវិស័យកាត់ដេរ ស្បែកជើង ផលិតផលធ្វើដំណើរ និងកាបូប ដែលមានកម្មករ ប្រមាណជា៨០ម៉ឺននាក់ ។ 

សូមទស្សនាវីដេអូ៖