នៅថ្ងៃទី ០៩ ខែកុម្ភៈ ឆ្នាំ២០១៦នេះ ម៉ោង២:៣០នាទីរសៀល លោកបណ្ឌិត សុខ ទូច ប្រធានក្រុមការងារស្រាវជ្រាវកិច្ចការព្រំដែន នឹងអញ្ជើញធ្វើដំណើរទៅកាន់ខេត្តតាកែវ ដើម្បីសិក្សាស្រាវជ្រាវ លើបញ្ហាព្រំដែនតំបន់ថ្ម៣ដុំ ថាតើស្ថិតនៅក្នុងការគ្រប់គ្រងរបស់ប្រទេសកម្ពុជា រឺវៀតណាម? ហើយតើបើផ្អែកលើផែនទី និងផែនដីជាក់ស្តែងតើតំបន់នោះ យើងត្រូវចរចានិងធ្វើយ៉ាងណាទៀតជាមួយភាគីវៀតណាម។
លោកបណ្ឌិត សុខ ទូច បានមានប្រសាសន៍ប្រាប់បណ្តាញព័ត៌មានរាជរដ្ឋាភិបាល GNN នៅព្រឹកនេះថា នៅថ្ងៃនេះលោក នឹងចុះទៅសិក្សាផ្ទាល់ជាមួយអាជ្ញាធរ និងរៀបចំកិច្ចការមួយចំនួនដើម្បីត្រៀមស្រាវជ្រាវក្នុងបញ្ហាតំបន់ថ្ម៣ដុំ ពិសេសផ្តោតសំខាន់ទៅលើឯកសារ ហើយថ្ងៃស្អែកគឺនៅថ្ងៃទី១០ ខែកុម្ភៈ ឆ្នាំ២០១៦ លោកនឹងអញ្ជើញចុះទៅដល់តំបន់ថ្ម៣ដុំនោះផ្ទាល់តែម្តង ដើម្បីទម្លាក់ពីផែនទី ទៅផែនដី ថាតើថ្ម៣ដុំហ្នឹងវាស្ថិតនៅដូចម្តេចជាមួយដីខ្មែរ និងវៀតណាម? តើវាជារបស់អ្នកណា? ហើយបើភាគីណាមួយកាន់កាប់យូរមកហើយ យើងត្រូវសិក្សាពីប្រវត្តិអ្នកកាន់កាប់ ប្រសិនជាខ្មែរយើងរស់នៅទីនោះយូរហើយ យើងត្រូវតែគោរពទៅតាមកិច្ចព្រមព្រៀងនៃប្រទេសទាំងពីរ ដែលបានកំណត់ថា អ្នកណាកាន់កាប់យូរអ្នកនោះត្រូវតែទទួលយកកេរ្តិ៍ដំណែលទាំងអស់នោះ ដោយគ្រាន់តែយើងធ្វើការដោះដូរគ្នា ក្នុងតំលៃស្មើទៅស្មើមក ដើម្បីកុំឲ្យមានការប្រេះឆាក្នុងបញ្ហាព្រំដែន ដោយសារយើងមានកិច្ចព្រមព្រៀង នៃប្រទេសទាំងពីររួចហើយ។
មួយវិញទៀត យើងនឹងទៅមើលថាថ្ម៣ដុំនោះបង្ហាញអ្វីពី វប្បធម៌ អរិយធម៌ ប្រវត្តិសាស្ត្រ ដែលយើងនឹងសិក្សាលំអិតនៅក្នុងកិច្ចការហ្នឹង។ ក្រុមការងារស្រាវជ្រាវកិច្ចការព្រំដែន នឹងមើលទាំងបច្ចេកទេស មើលទាំងអត្តសញ្ញាណរបស់ជាតិនីមួយៗ តើវៀតណាមហៅថាអី និងខ្មែរហៅថាអីថ្ម៣ដុំហ្នឹង។ បើសិនជាវៀតណាមអត់មានឈ្មោះទេ មានតែកម្ពុជា អាហ្នឹងវាត្រូវតែជារបស់កម្ពុជាហើយ ចឹងយើងត្រូវសិក្សាលំអិតទៅលើហ្នឹងទៀត។
សូមបញ្ជាក់ថា បន្ទាប់ពីសិក្សាស្រាវជ្រាវលើឯកសារគោលសំខាន់ៗ ទាក់ទងនិងតំបន់ថ្ម៣ដុំ នៅព្រឹកថ្ងៃទី១០ ខែកុម្ភៈ ខាងមុខនេះ លោកបណ្ឌិតនឹងចុះទៅពិនិត្យទីតាំងជាក់ស្តែង រួមទាំងធ្វើសំភាសន៍ជាមួយប្រជាពលរដ្ឋមូលដ្ឋានក្នុងតំបន់នោះ ហើយលោកបណ្ឌិតនឹងធ្វើសន្និសីទកាសែតនៅទីនោះតែម្តង៕
