សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពូជា
បានព្រមានលុបចោលនូវវប្បធម៌សន្ទនា របស់គណបក្សទាំងពីរ បើសិនណាជាឯកឧត្តម សម
រង្ស៊ី ប្រធានគណបក្សសង្រ្គោះជាតិ មិនអាចអប់រំកូនចៅរបស់ខ្លួនឱ្យបានល្អនោះ។
ការព្រមានជាលើកដំបូង របស់សម្តេចតេជោ ក្នុងការរំលាយចោលវប្បធម៌សន្ទនា
រវាងថ្នាក់ដឹកនាំជាន់ខ្ពស់នៃគណបក្សទាំងពីរ បានធ្វើឡើង ក្នុងពិធីប្រកាសសម្ពោធដាក់ឲ្យប្រើប្រាស់
រោងចក្រចម្រាញ់ដូង ប្រេងទី ២អន្លង់ក្រពើ របស់ក្រុមហ៊ុន ម៉ុង ឫទ្ធី ស្ថិតនៅភូមិអន្លង់ក្រពើ
ឃុំជើងគោ ស្រុកព្រៃនប់ ខេត្តព្រះសីហនុ នាព្រឹកថ្ងៃទី២៩ ខែមេសា ឆ្នាំ២០១៥នេះ។
សម្តេចតេជោ នាយករដ្ឋមន្ត្រីបានមានប្រសាសន៍ផ្តាំផ្ញើរទៅកាន់
ឯកឧត្តម សម រង្ស៊ី ថា «ត្រូវអប់រំផ្ទៃក្នុងបក្សរបស់ខ្លួនឲ្យបាន ហើយបើឯកឧត្តម សម រង្ស៊ី
ធ្វើមិនបានទេ អាវប្បធម៌សន្ទនាហ្នឹង ត្រូវលុបចោល ក៏លុបទៅ កើតហើយបើវាងាប់ទៅវិញក៏ងាប់ទៅ
ព្រោះវាកើតហើយវាត្រូវរបួសនៅកំពង់ឆ្នាំង កើតជាមួយគ្នានៅសៀមរាប ដល់មកត្រូវរបួសៗ
នៅកំពង់ឆ្នាំង។
សម្តេចបន្តសង្កត់ធ្ងន់ថា « ថ្ងៃនេះនិយាយឲ្យច្បាស់
លោកឯងចុះមូលដ្ឋានអី ហ៊ានផ្ញើរសារមកឲ្យខ្ញុំថាមិនសងសឹក ចាំដល់លោកឈ្នះសិនទៅ
លោកកុំឈ្លានពេក កុំឈ្លានជ្រុល រហូតដល់ដេកយលសប្តិ។ ដេកយល់សបត្តិក៏ប្រធានសភា
ចាំបានធ្វើសិនមើល ណែអាត្មាធ្វើជាង៣០ឆ្នាំហើយ អាត្មាមិនទាំងអួតផង។»
គួរបញ្ជាក់ថា ប្រតិកម្មរបស់សម្តេចនាយករដ្ឋមន្ត្រី ធ្វើឡើងបន្ទាប់ពី
ឯកឧត្តម កឹម សុខា អនុប្រធានរដ្ឋសភា និងជាអនុប្រធានគណបក្សសង្គ្រោះជាតិ លើកឡើងថា
គណបក្សសង្គ្រោះជាតិ នឹងមិនមានការសងសឹកគ្នាទេ ប្រសិនគណបក្សសង្គ្រោះជាតិឈ្នះឆ្នោតដឹកនាំរដ្ឋាភិបាល។
ការលើកឡើងរបស់ឯកឧត្តម កឹម សុខា ធ្វើឡើងក្នុងឱកាសដែលឯកឧត្តម ចូលរួមក្នុងវេទកាសំណេះសំណាលជាមួយប្រជាពលរដ្ឋ
នៅឃុំរនាម ស្រុកទ្រាំងខេត្តតាកែវ កាលពីថ្ងៃទី ២៦ ខែមេសា ឆ្នាំ២០១៥ និងការវាយប្រហារមកលើគណបក្សកាន់អំណាចពីសំណាក់ឯកឧត្តម
កឹម សុខា ពីខេត្តកំពង់ឆ្នាំងដោយចោទថា បក្សកាន់អំណាចកំពុងដឹកនាំប្រជាជនតាមរបៀបកុម្មយនីស្តផ្តាច់ការ៕
អត្ថបទ៖ ច័ន្ទ ទេវី
