ខ្មែរតែមួយ - Khmer Unity: 09/12/14

Friday, September 12, 2014

រដ្ឋមន្ត្រីក្រសួងបរិស្ថាន ត្រួតពិនិត្យ និងពង្រឹងការគ្រប់គ្រងវត្តមានមន្ត្រីរាជការចំណុះក្រសួង

រដ្ឋមន្ត្រីក្រសួងបរិស្ថាន ឯកឧត្តម សាយ សំអាល់ បានចេញសេចក្តីណែនាំ ស្តីពី ការបង្កើនការយកចិត្តទុកដាក់ពង្រឹងការគ្រប់គ្រង និងប្រសិទ្ធភាពការងាររបស់មន្ត្រីរាជការក្រសួងបរិស្ថាន នេះបើយោងតាមសេចក្តីណែនាំរបស់ក្រសួងបរិស្ថានចុះថ្ងៃទី១២ ខែកញ្ញា ឆ្នាំ២០១៤នេះ ដែលបណ្តាញព័ត៌មានយើងទើបនឹងទទួលបាន។

នេះជាលើកទី២ហើយ ដែលរដ្ឋមន្ត្រីក្រសួងបរិស្ថានចេញសេចក្តីណែនាំឲ្យមានការពិនិត្យ និង ពង្រឹងការគ្រប់គ្រងវត្តមានមន្រ្តីរាជការ ឱ្យកាន់តែមានប្រសិទ្ធិ បន្ទាប់ពីសេចក្តីណែនាំបែបនេះ ក៏ធ្លាប់បានចេញមួយលើករួចហើយ កាលពីថ្ងៃទី២៥ ខែតុលា ឆ្នាំ២០១៣ កន្លងមក។

សេចក្តីណែនាំ គឺរដ្ឋមន្ត្រីក្រសួងបរិស្ថាន ប្រាប់ទៅកាន់ថ្នាក់ដឹកនាំគ្រប់អង្គភាពចំណុះក្រសួង ស្តីអំពីការត្រួតពិនិត្យ និងការពង្រឹងការគ្រប់គ្រងវត្តមានមន្រ្តីរាជការ ដែលជាផ្នែកមួយនៃគោលនយោបាយរបស់រាជរដ្ឋាភិបាលកម្ពុជា នីតិកាលទី៥ នៃរដ្ឋសភា ដែលបានកំណត់យកអភិបាលកិច្ចល្អជាស្នូល នៃយុទ្ធសាស្រ្តចតុកោណ ដំណាក់កាលទី៣។

គួររំលឹកផងដែរថា កាលពីថ្ងៃទី៣ ខែកញ្ញា ឆ្នាំ២០១៤ ក្រសួងមុខងារសាធារណៈ ក៏បានជូនដំណឹងដល់ថ្នាក់ដឹកនាំ គ្រប់អង្គភាពរដ្ឋ ឲ្យមានកាេរត្រួតពិនិត្យ និងពង្រឹងវត្តមានមន្ត្រីក្នុងអង្គភាពឲ្យបានហ្មត់ចត់ ក្នុងនោះក៏បានស្នើឲ្យប្រធានការិយាល័យ និងប្រធានមន្ទីរ ត្រូវទទួលខុសត្រូវផ្ទាល់ចំពោះមន្ត្រីក្រោមឱវាទរបស់ខ្លួនដែលមិនបានមកធ្វើការទៀងទាត់ ឬអវត្តមានគ្មានមូលហេតុ ត្រូវរាយការណ៍មកប្រធានអង្គភាពសាមី ដើម្បីស្នើសុំមកក្រសួងចាត់វិធានការទៅតាមផ្លូវច្បាប់។

ក្រសួងមុខងារសាធារណៈ ក៏បានសង្កត់ធ្ងន់ផងដែរថា ប្រធានអង្គភាព ឬមន្ត្រីណាម្នាក់ដែលបើកប្រាក់បៀវត្សមន្ត្រីដែលមិនមកធ្វើការ ត្រូវទទួលខុសត្រូវចំពោះមុខច្បាប់។ ក្នុងករណីអង្គភាពប្រឆាំងអំពើពុករលួយរកឃើញ មន្ត្រីដែលពាក់ព័ន្ធ ត្រូវទទួលខុសត្រូវចំពោះមុខច្បាប់ដោយខ្លួនបុគ្គលនោះផ្ទាល់៕

ឯកអគ្គរដ្ឋទូតវៀតណាមថ្មីសន្យាប្រឹងប្រែងជំរុញទំនាក់ទំនងរវាងប្រទេសទាំងពីរកម្ពុជា-វៀតណាម

ឯកឧត្តម ថាន ដុ (Thach Du) ដែលទើបត្រូវបានតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា ក្នុងឱកាសជួបសវនាការ ជាមួយសម្តេចអគ្គមហាសេនាបតីតេជោ ហ៊ុន សែន នាពីព្រឹកថ្ងៃទី១១ ខែកញ្ញា ឆ្នាំ២០១៤ បានបង្ហាញនូវការប្តេជ្ញាចិត្តខិតខំប្រឹងប្រែងឱ្យអស់ពីសមត្ថភាព ក្នុងការជំរុញទំនាក់ទំនងរវាងប្រទេសទាំងពីរ (កម្ពុជា-វៀតណាម)។

ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា ឯកឧត្តម ថាន ដុ ឯកអគ្គរដ្ឋទូតវៀតណាមថ្មី បានគោរពស្នើសុំការគាំទ្រពីសម្តេចតេជោនាយករដ្ឋមន្រ្តី ក៏ដូចជា មន្រ្តីរាជការទាំងអស់ ចំពោះអាណត្តិបេសកកម្មការទូតរបស់ឯកឧត្តមនៅកម្ពុជា ដើម្បីឲ្យឯកឧត្តមបំពេញបេសកកម្មការទូត ឲ្យកាន់តែទទួលបានជោគជ័យ ពិសេសការពង្រឹងពង្រីកកិច្ចសហប្រតិបត្តិការលើគ្រប់វិស័យ ដែលមានស្រាប់ និងវិស័យដទៃទៀត។

សម្តេចតេជោនាយករដ្ឋមន្រ្តី បានមានប្រសាសន៍សម្តែងក្តីរីករាយចំពោះការលើកឡើងរបស់ឯកឧត្តម ថាន ដុ លើទិសដៅនៃការពង្រឹង និងពង្រីកទំនាក់ទំនងការទូតរវាងប្រទេសទាំងពីរ ដោយសម្តេចបានមានប្រសាសន៍សង្កត់ធ្ងន់ថា ការអភិវឌ្ឍទំនាក់ទំនងនៃប្រទេសទាំងពីរ គឺចាំបាច់ត្រូវពង្រឹងវិស័យវិនិយោគ សេដ្ឋកិច្ច ទេសចរណ៍ ជាកត្តាសំខាន់ ដែលកន្លងមកភាគីទាំងពីរ(កម្ពុជា-វៀតណាម) បានធ្វើកិច្ចការទាំងអស់នោះច្រើនរួចមកហើយ និងត្រូវបន្តសហការគ្នាឲ្យកាន់តែប្រសើរឡើងថែមទៀត។

សម្តេចតេជោនាយករដ្ឋមន្ត្រី ក៏បានលើកឡើងអំពីសក្តានុពលដែលប្រទេសទាំងពីរមាន និងបានស្នើឯកអគ្គរដ្ឋទូតវៀតណាមថ្មី ជំរុញការពង្រឹង និងពង្រីកកិច្ចសហប្រតិបត្តិការទៅលើសក្តានុពលដែលមាន រួមជាមួយនឹងកិច្ចសហប្រតិបត្តិការដែលប្រទេសទាំងពីរមានស្រាប់ នាពេលកន្លងមកផងដែរ។ សម្តេចតេជោបានស្នើឯកឧត្តម ថាន ដុ បន្តធ្វើការសហការឱ្យបានល្អជាមួយកម្ពុជា លើកិច្ចការថ្មីៗទៀត ដែលខុសពីកម្មវិធីដែលមានស្រាប់៕

ឯកអគ្គរាជទូតថៃចប់អាណត្តិថ្លែងអំណរគុណកម្ពុជា

ឯកឧត្តម ទូឆៃយុទ ផាកឌី (Touchayoot Pakdi) ឯកអគ្គរាជទូតថៃដែលចប់អាណត្តិបេសកកម្មការទូតនៅព្រះរាជាណាចក្រកម្ពុជា បានមានប្រសាសន៍ថ្លែងអំណរគុណដល់រាជរដ្ឋាភិបាល មន្ត្រីរាជការគ្រប់ជាន់ថ្នាក់ និងប្រជាពលរដ្ឋកម្ពុជា ដែលបានចូលរួមសហការធ្វើឲ្យបេសកកម្មការទូតរបស់ឯកឧត្តមនៅកម្ពុជារយៈពេល ២ឆ្នាំកន្លងមកនេះទទួលបានជោគជ័យ។ នេះបើតាមឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹង។

នៅក្នុងជំនួបសម្តែងការគួរសម និងជម្រាបលាសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព កាលពីថ្ងៃទី១១ ខែកញ្ញា ឆ្នាំ២០១៤ ឯកឧត្តម Touchayoot Pakdi បានជម្រាបជូនសម្តេចតេជោថា ឯកឧត្តមមានកិត្តិយសខ្លាំងណាស់ ដោយបានមកធ្វើជាឯកអគ្គរាជទូតថៃនៅកម្ពុជា។ ក្នុងរយៈពេលបំពេញបេសកកម្មការទូតជាង ២ឆ្នាំនៅកម្ពុជាកន្លងមក នេះ ឯកឧត្តមទទួលបានកិច្ចសហប្រតិបត្តិការយ៉ាងល្អពីគ្រប់ថ្នាក់ដឹកនាំ មន្រ្តីរាជការកម្ពុជា ដែលធ្វើឲ្យរូបឯកឧត្តមអាចបំពេញភារកិច្ចក្នុងអាណត្តិបេសកកម្ម ក្នុងការជំរុញកិច្ចសហប្រតិបត្តិការសម្រាប់ប្រទេស និងប្រជាជនទាំងពីរ (កម្ពុជា-ថៃ) មានភាពល្អប្រសើរឡើង។

សម្តេចតេជោនាយករដ្ឋមន្រ្តីមានប្រសាសន៍វាយតម្លៃថា រយៈពេលជាង ២ឆ្នាំកន្លងមកនេះ ឯកឧត្តម ឯកអគ្គរាជទូត បានធ្វើកិច្ចការជាច្រើនក្នុងការជំរុញកិច្ចសហប្រតិបត្តិការរវាងប្រទេសទាំងពីរ ជាពិសេសឯកឧត្តម បានធ្វើការប្រកបដោយការយោគយល់ និងសម្របសម្រួលទៅវិញទៅមកបានយ៉ាងល្អប្រសើរ។

សម្តេចតេជោបានមានប្រសាសន៍បន្តថា បើទោះបីឯកឧត្តមឯកអគ្គរាជទូតត្រឡប់ទៅមាតុប្រទេសវិញចូលនិវត្តន៍ពីការងារក៏ពិតមែន ប៉ុន្តែសម្តេចតេជោបានជូនពរដល់ឯកឧត្តមឯកអគ្គរាជទូតទទួលបាននូវពុទ្ធពរទាំងបួនប្រការ និងមានជោគជ័យក្នុងឆាកជីវិត៕

រដ្ឋលេខាធិការទីស្តីការគណៈរដ្ឋមន្ត្រី ទាមទារឲ្យអ្នកវិភាគរបស់វិទ្យុអាស៊ីសេរី លោក ជុន ចន្ទបុត្រពន្យល់ពីភាពមិនត្រឹមត្រូវនៃការបញ្ចេញយោបល់

រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី ឯកឧត្តម ផៃ ស៊ីផាន នៅថ្ងៃទី១១ ខែកញ្ញា ឆ្នាំ២០១៤នេះ បានចេញលិខិតចំហរ សូមឲ្យលោក ជុន ចន្ទបុត្រ អ្នកឆ្លើយឆ្លងព័ត៌មានរបស់វិទ្យុអាស៊ីសេរី ពន្យល់ពាក្យពេចន៍មួយចំនួន ក្នុងស្មារតី និងបំណងនៃយុទ្ធនាការ នៃការប្រើពាក្យដែលលោក ជុន ចន្ទបុត្រ បានផ្សព្វផ្សាយជាសាធារណៈ ហើយត្រូវបាន ឯកឧត្តម ផៃ ស៊ីផាន ចាត់ទុកថា មិនត្រឹមត្រូវ និងយល់ថា វាហាក់បីដូចជាវិទ្យុបរទេសនេះលូកដៃជ្រៀតជ្រែក នយោបាយផ្ទៃក្នុង និងដែនអធិបតេយ្យរបស់ខ្មែរ។

ឯកឧត្តម ផៃ ស៊ីផាន បានបញ្ជាក់ក្នុងលិខិតចំហររបស់លោកថា « ខ្ញុំបានអាន និងស្តាប់បទវិភាគនយោបាយរបស់លោក (និយាយសំដៅលោក ជុន ចន្ទបុត្រ) ដែលមានចំណងជើងថា តើការកំណត់អាណត្តិនាយករដ្ឋមន្ត្រី មានសារៈសំខាន់យ៉ាងណ? » ។

រដ្ឋលេខាធិការរូបនេះ បានបន្ថែមថា « ខ្ញុំយល់ពីស្មារតី នៃយុទ្ធនាការ និងខ្លឹមសារនៃបទអត្ថាធិប្បាយរបស់លោក ដែលលោកមានបំណង គាំទ្រនៃការកំណត់អាណត្តិនាយករដ្ឋមន្ត្រីនេះ។

ឯកឧត្តម ផៃ ស៊ីផាន បានបន្តថា ការបកស្រាយ ការពន្យល់ ជាមួយហេតុផលមួយចំនួនធំ ដែលលើកលើកឡើង គឺមិនត្រឹមតែសិទ្ធិនៃការបញ្ចេញមតិប៉ុណ្ណោះទេ អ្វីដែលខ្ញុំយល់ដឹង គឺវាហាក់បីដូចជាវិទ្យុបរទេសមួយនេះលូកដៃជ្រៀតជ្រែក នៅក្នុងកិច្ចការនយោបាយផ្ទៃក្នុង និងដែនអធិបតេយ្យរបស់ខ្មែរយើង។ ជាមួយគ្នានេះ ឯកឧត្តម ក៏បានសូម ឲ្យលោក ជុន ចន្ទបុត្រ ពន្យល់ពាក្យពេចន៍មួយចំនួន ក្នុងស្មារតី និងបំណងនៃយុទ្ធនាការ នៃការប្រើពាក្យអស់ទាំងនោះ ដែលលោក ជុន ចន្ទបុត្រ បានប្រើប្រាស់ ផ្សព្វផ្សាយជាសាធារណៈ ។ ឧទាហរណ៍ ដូចជា៖

សូម្បីតែព្រះមហាក្សត្រ ក៏ត្រូវបានលោកនាយករដ្ឋមន្ត្រី ជាអ្នកជួយជ្រោមជ្រែងឲ្យឡើងសោយរាជ្យដែរ ។ ក្រៅពីនេះ ដូចជា ពាក្យ ក្រុមសន្តិសុខស៊ីឈ្នួល ទីប្រឹក្សាអាមីអាថោងឆ្វេងស្តាំ ចាំតែលើកជើង និងពាក្យ ក្រាញ នឹងអំណាច ជាដើម។

ឯកឧត្តម ផៃ ស៊ីផាន សង្ឃឹម និងជឿជាក់ថា នាពេលដ៏ខ្លីខាងមុខ សាធារណៈជន ច្បាស់ជាបានទទួលនូវការពន្យល់របស់លោក ជុន ចន្ទបុត្រ ក្នុងអ្វីដែលអ្នកនាំពាក្យទីស្តីការគណៈរដ្ឋមន្ត្រី ជម្រុញឲ្យលោក ជុន ចន្ទបុត្រ ដឹងពីវត្ថុបំណងនៃការប្រើប្រាស់ពាក្យពេចន៍ ព្រមទាំងកិច្ចទទួលខុសត្រូវរបស់វិទ្យុអាស៊ីសេរី ក្នុងការប្រើប្រាស់រលកអាកាសរបស់វិទ្យុមួយនេះ នៅក្នុងព្រះរាជាណាចក្រកម្ពុជា។

សូមអានលិខិតចំហររបស់ ឯកឧត្តម ផៃ ស៊ីផាន

កម្ពុជា ‑ ថៃ ពង្រឹងទំនាក់ទំនងល្អ សម្រាប់ផលប្រយោជន៍ប្រទេស និងប្រជាជនទាំងពីរ

ភ្នំពេញ៖ ថ្ងៃទី១១ ខែកញ្ញា ឆ្នាំ២០១៤ ឯកឧត្តមឧបនាយករដ្ឋមន្រ្តីសុខ អាន រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅក្នុងជំនួបជាមួយឯកអគ្គរាជទូតថៃ Touchayoot PAKDI បានមានប្រសាសន៍ថា កិច្ចសហប្រតិបត្តិការរវាងប្រទេសទាំងពីរ កម្ពុជា‑ ថៃ នឹងបន្តពង្រឹង និងបានផ្តល់ផលប្រយោជន៍យ៉ាងសំខាន់ដល់ប្រទេសជាតិ និងប្រជាជនទាំងផ្នែកសេដ្ឋកិច្ច ពាណិជ្ជកម្ម និងទេសចរណ៍។

ជាការឆ្លើយតប ឯកឧត្តម ឯកអគ្គរាជទូតថៃ ក៏បានឯកភាពទៅនឹងទស្សនៈយោបល់របស់ឯកឧត្តមឧបនាយករដ្ឋមន្រ្តី សុខ អាន និងបានថ្លែងថា ភាគីថៃនឹងបង្កភាពងាយស្រួល និងជំរុញការលើកទឹកចិត្តពាណិជ្ជទ្វេភាគីផ្នែកផលិតផលកសិកម្មផងដែរ។

នៅក្នុងរយៈពេលបីខែដើមឆ្នាំ ២០១៤ ផលិតផល របស់កម្ពុជានាំចេញទៅថៃ គិតជាទឹកប្រាក់មានចំនួនជាង ១០លានដុល្លារ ហើយការនាំទំនិញចូលពីប្រទេសថៃមកវិញ គិតជាទឹកប្រាក់មានចំនួនជាង ៦៣៥លានដុល្លារ។

ឯកអគ្គរាជទូតថៃដែលបានចូលជួបពិភាក្សា និងជម្រាបលា ក៏បានថ្លែងអំណរគុណដល់ថ្នាក់ដឹកនាំរាជរដ្ឋាភិបាលកម្ពុជា ដែលបានផ្តល់ភាពកក់ក្តៅដល់ដំណើរការបេសកម្មការទូតរបស់លោករយៈពីរឆ្នាំនៅកម្ពុជា។

ឯកឧត្តមឯកអគ្គរាជទូតថៃ Touchayoot PAKDIក៏បានសម្តែងការពេញចិត្ត និងកោតសរសើរនូវសមិទ្ធផលសម្រេចបានដោយរាជរដ្ឋាភិបាលកម្ពុជា ដូចជា វិស័យវប្បធម៌ និងទេសចរណ៍ ជាដើម។

ឯកឧត្តមឧបនាយករដ្ឋមន្រ្តី សុខ អាន ក៏បានមានប្រសាសន៍ផងដែរថា កម្ពុជា ដែលមានសម្បត្តិបេតិកភណ្ឌវប្បធម៌ដ៏សម្បូរបែបបានចូលរួមចំណែកយ៉ាងសំខាន់ក្នុងវិស័យ ទេសចរណ៍វប្បធម៌។

ទន្ទឹមនឹងនេះផងដែរ រាជរដ្ឋាភិបាលកម្ពុជាបានបង្កើតអាជ្ញាធរជាតិអប្សរា សហការជាមួយគណៈកម្មការសម្របសម្រួលអន្តរជាតិ-អង្គរ (ICC-Angkor) ដើម្បីការពារ អភិរក្ស ជួសជុល និង អភិវឌ្ឍន៍ប្រកបដោយចីរភាពនៅតំបន់រមណីយដ្ឋានអង្គរ ក្រោយពីត្រូវបានចុះនៅក្នុងបញ្ជីបេតិកភណ្ឌពិភពលោក (WHC-UNESCO) នៅឆ្នាំ ១៩៩២។

អង្គការវប្បធម៌វិទ្យាសាស្រ្ត និងអប់រំអង្គការសហប្រជាជាតិ (UNESCO) បានវាយតម្លៃខ្ពស់នូវសមិទ្ធផលសម្រេចបានដោយ ICC-Angkor និងអាជ្ញាធរជាតិអប្សារាចាប់តាំងពីឆ្នាំ ១៩៩៥។

ឯកឧត្តមឧបនាយករដ្ឋមន្រ្តី សុខ អាន បានមានប្រសាសន៍ថា ចាប់តាំងពីឆ្នាំ ១៩៩៥ មក ដៃគូអភិវឌ្ឍន៍ជាង ១០ និងអង្គការអន្តរជាតិជាង ២០ ផ្នែកបេតិកភណ្ឌវប្បធម៌បានរួមចំណែកទាំងកិច្ចការបច្ចេកទេស និងហិរញ្ញប្បទានប្រមាណ៥០០លានដុល្លារសហរដ្ឋអាមេរិក។

សម្រាប់គម្រោងជួសជុលជាង ៦០ នៅតំបន់រមណីយដ្ឋានអង្គរ។ ការងារជួសជុល និងអភិរក្សនៅតំបន់រមណីដ្ឋានអង្គរបានធ្វើឲ្យអ្នកជំនាញរបស់អង្គរការ UNESCO ដកតំបន់រមណីយដ្ឋានអង្គរវត្តចេញពីបញ្ជីគ្រោះថ្នាក់នៅឆ្នាំ ២០០៤។

ឯកឧត្តមឧបនាយករដ្ឋមន្រ្តីបានសង្កត់ធ្ងន់ថា អង្គការ UNESCO បានចាត់ទុក ICC-Angkor ជាគំរូ (Model) សម្រាប់កិច្ចការជួសជុល និងអភិរក្សផ្នែកបេតិកភណ្ឌវប្បធម៌ ដែលញ៉ាំងប្រទេសមួយចំនួននៅមជ្ឈិមបូព៌ាយកគំរូតាមកម្ពុជា។

ឯកឧត្តមឧបនាយករដ្ឋមន្រ្តី ក៏បានរំលឹកអំពីដំណើរការរីកលូតលាស់នៅព្រះរាជាណាចក្រកម្ពុជា ទាំងផ្នែកនយោបាយ សេដ្ឋកិច្ច និងសង្គម ជាពិសេស ក្រោយពីរាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែនបានរំលាយចោលអង្គការនយោបាយ និងយោធារបស់ខ្មែរក្រហមទាំងស្រុកនៅឆ្នាំ ១៩៩៨ ដែលកត្តានេះបានរួមចំណែកដ៏សំខាន់ក្នុងការកសាង និងអភិវឌ្ឍជាតិ។

កំណើនភ្ញៀវទេសចរបានកើនឡើងយ៉ាងខ្លាំងពីប្រមាណ ៣ សែននាក់នៅឆ្នាំ២០០៣ ប្រៀបធៀបមកឆ្នាំ ២០១៤ មាន ៤លាន ២សែននាក់។ កំណើនទេសចរណ៍នៅប្រទេសកម្ពុជាត្រូវបានគេរំពឹងទុកថា មាន ១៨ភាគរយក្នុងមួយឆ្នាំ។ តាមតួរលេខរបស់អង្គការទេសចរណ៍ពិភពលោក (UNWTO) និយាយថា កម្ពុជាបានទទួលប្រាក់ចំណូលប្រមាណពីរពាន់ប្រាំរយលានដុល្លារពីវិស័យទេសចរណ៍ ដែលស្មើនឹង ១៦ភាគរយនៃផលិតផលក្នុងស្រុកសរុបកម្ពុជា (GDP)៕

សេចក្តីប្រកាសព័ត៌មាន របស់រដ្ឋសភា ស្តីពីការជ្រើសតាំងសមាេជិកឧត្តមក្រុមប្រឹក្សានៃអង្គចៅក្រមចំនួន១រូប លើកទី១

ថៃជំរុញលើការពង្រឹង ទំនាក់ទំនង សហប្រតិបត្តិការក្នុងការជួយបណ្តុះបណ្តាលដល់មន្ត្រីការទូតកម្ពុជា

គណៈប្រតិភូថៃបង្ហាញអំពី គម្រោង ជួយបណ្តុះបណ្តាលដល់មន្ត្រីការទូតរបស់កម្ពុជា ដោយភាគីថៃបានជំរុញឲ្យមានការលើកកំពស់ក្នុងការផ្សារភ្ជាប់ទំនាក់ទំនងសហប្រតិបត្តិការជាមួយគ្នាឲ្យបានកាន់តែល្អប្រសើរ និងជិតស្និទបន្ថែមទៀត។

នៅក្នុងជំនួបពិភាក្សាការងារជាមួយឯ.ឧ កែវ រ៉េមី រដ្ឋលេខាធិការនៃទីស្តីការគណរដ្ឋមន្ត្រី នៅរសៀលថ្ងៃទី១១ ខែកញ្ញានេះ លោក Dhiravat Bhumichitr នាយកវិទ្យាស្ថានទំនាក់ទំនងអន្តរជាតិ Devawong Vavopakorn បានជំរាបជូនថា ៖ដំណើរ ទស្សនកិច្ចរបស់គណៈប្រតិភូ នៃវិទ្យាស្ថានទំនាក់ទំនងអន្តរជាតិ Devawong Vavopakorn របស់ប្រទេសថៃមកកាន់កម្ពុជាពេលនេះ ក្នុងគោលបំណង ដើម្បីផ្សាភ្ជាប់ ទំនាក់ទំនង រវាងថៃនិងកម្ពុជា ឲ្យបានកាន់តែល្អប្រសើរឡើងថែមទៀតតាមរយៈគម្រោងរបស់វិទ្យាស្ថាន នឹងជួយផ្តល់ការបណ្តុះបណ្តាលដល់មន្ត្រីការទូតរបស់កម្ពុជា។

លោក Dhiravat បានជំរាបជូនដែរថា ៖វិទ្យាស្ថានទំនាក់ទំនងអន្តរជាតិ Devawong Vavopakorn នេះគឺជាស្ថាប័នមួយដែលស្ថិតនៅក្រោមការដឹកនាំរបស់ក្រសួងការបរទេសថៃ ស្ថាប័ននេះមានកម្មវិធីហ្វឹកហ្វឺនដល់មន្ត្រីការទូតរបស់ថៃ ហើយវិទ្យាស្ថានក៏មានគម្រោងជួយបណ្តុះបណ្តាលសម្រាប់មន្ត្រីការទូតកម្ពុជាផងដែរ គម្រោងនោះមានរយៈពេល១១សប្តាហ៏។ លោក Dhiravat បានបង្ហាញនូវជំនឿថាចាប់ពីពេលនេះទៅ ស្ថាប័ន Devawong Vavopakorn និងធ្វើទំនាក់ទំនងជាបន្តបន្ទាប់ជាមួយកម្ពុជា ដើម្បី ជំរុញការលើកកំពស់កិច្ចសហប្រតិបត្តិការជាមួយគ្នាលើការកសាងសមត្ថភាពធនធាន មន្ត្រីការទូតរបស់កម្ពុជាឲ្យបានកាន់តែប្រសើឡើង។

ជាការឆ្លើយតបឯ.ឧ កែវ រ៉េមី បានបង្ហាញពីទឹកចិត្តត្រេកអររីករាយ ចំពោះគម្រោងកម្មវិធីដែលភាគីថៃគ្រោងនឹងផ្តល់ការហ្វឹកហ្វឺនដល់ភាគីកម្ពុជា៖។ឯ.ឧបានគូសបញ្ចាក់ថា គម្រោងនេះពិតជាបានរួមចំណែកដល់ការលើកកំពស់ នៃការផ្សារភ្ជាប់ទំនាក់ទំនងកាន់តែជិតស្និទបន្ថែមទៀតរវាងព្រះរាជាណាចក្រថៃនិងរាជាណាចក្រកម្ពុជាដែលមានភូមិផងរបងជាប់គ្នា។

ឯ.ឧកែវ រ៉េមី បានលើកឡើងថា ការបណ្តុះបណ្តាលអ្នកការទុតគួរឲ្យមានការប្រើប្រាស់ភាសារអង់គ្លេសឲ្យបានច្រើន ពីព្រោះបើការបណ្តុះបណ្តាល ប្រើប្រាស់ភាសារថៃរហូតដល់៨០% រីឯភាសារអង់គ្លេសប្រើប្រាស់ត្រឹមតែ២០%វាក៏ជាបញ្ហាមួយសម្រាប់អ្នកការទូតដែរ ពីព្រោះអ្នកការទូតត្រូវការភាសារអង់គ្លេសជាចាំបាច់។ ក្រៅពីគម្រោងបណ្តុះបណ្តាលអ្នកការទូត ឯ.ឧ កែវ រ៉េមី ក៏បានជំរាបជូនភាគីថៃដែរថាខាងកម្ពុជា ក៏មានបំណងចង់ពង្រីកបុគ្គលិកផ្នែកបកប្រែភាសារផងដែរ ហើយបើភាគីថៃមានគម្រោងក្នុងការជួយហ្វឹកហ្វឺនខាងផ្នែកបកប្រែភាសានេះកម្ពុជាសូមស្វាគមន៏។

លោក Dhiravat បានជំរាបជូនវិញថា៖ភាគីថៃកំពុងពិចារណាអំពីការបណ្តុះបណ្តាលលើការប្រើប្រាស់ភាសានេះដោយថៃ ក៏ចង់ឲ្យវិទ្យាស្ថាននេះក្លាយជាវិទ្យាស្ថានហ្វឹកហ្វឺនអ្នកការទូតជាលក្ខណៈអន្តរជាតិផងដែរ។ ពាក់ពន្ធ័ការបណ្តុះបណ្តាលផ្នែកបកប្រែភាសាភាគីថៃបានលើកឡើងថា ៖ ថៃមានស្ថាប័នមួយបំរ៉ុងពង្រីកផ្នែកបកប្រែភាសារសម្រាប់ប្រទេសជិតខាង ប៉ុន្តែ មិនពាក់ពន្ធ័នឹងការបណ្តុះបណ្តាលអ្នកការទូតនោះទេ។ការបណ្តុះបណ្តាលអ្នកបកប្រែគឺពាក់ពន្ធ័និងចំណេះដឹង ផ្នែកភាសា វប្បធម៌ និងទំនៀមទំលាប់ផ្សេងៗ តែប៉ុណ្ណោះ៕

អត្ថបទ៖ សុវណ្ណតារា

រដ្ឋាភិបាលឈីលីផ្តល់ជំនួយថវិកាចំនួន ១០០០០ ដុល្លារដល់សាលាក្តីកាត់ទោសមេដឹកនាំខ្មែរក្រហម អ.វ.ត.ក

នៅថ្ងៃទី១២ ខែកញ្ញា ឆ្នាំ២០១៤នេះ រដ្ឋាភិបាលឈីលីផ្តល់ជំនួយថវិកាចំនួន ១០០០០ ដុល្លារដល់សាលាក្តីកាត់ទោសមេដឹកនាំខ្មែរក្រហម អ.វ.ត.ក នេះបើយោងតាមសេចក្តីប្រកាសព័ត៌មានដែលបណ្តាញព័ត៌មានយើងទទួលបាន ផ្សព្វផ្សាយដោយអង្គជំនុំជម្រះវិសាមញ្ញក្នុងតុលាការកម្ពុជា អ.វ.ត.ក។

នៅក្នុងសេចក្តីប្រកាសព័ត៌មាន ជាពីរភាសា (ខ្មែរ និងអង់គ្លេស) បានឲ្យដឹងថា រដ្ឋាភិបាលនៃប្រទេសឈីលី បានប្រកាសផ្តល់ជំនួយថវិកាចំនួន ១០ ០០០ ដុល្លារសហរដ្ឋអាម៉េរិកដល់ភាគីជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។

ឈីលី គឺជាប្រទេសផ្តល់ជំនួយថ្មីមួយទៀតដល់អ.វ.ត.ក ហើយការផ្តល់ជំនួយថវិកានេះបានធ្វើឡើងដើម្បីឆ្លើយតបទៅនឹងការអំពាវនាវរបស់ឯកឧត្តម បាន គីមូន អគ្គលេខាធិការអង្គការសហប្រជាជាតិ និងរាជរដ្ឋាភិបាលកម្ពុជាដល់រដ្ឋជាសមាជិកទាំងអស់ជួយផ្តល់នូវការគាំទ្រផ្នែកហិរញ្ញវត្ថុជាបន្ទាន់ដល់ អ.វ.ត.ក។

ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងលោកឃ្នុត រ៉ូហ្សិនហក អនុប្រធានការិយាល័យរដ្ឋបាលនៃ អ.វ.ត.ក. បានមានប្រសាសន៍ថា៖“ជាមួយការប្រឈមមុខនឹងស្ថានភាពថវិកាដ៏លំបាកសម្រាប់ភាគីជាតិ យើងខ្ញុំមានក្តីសោមនស្សរីករាយ ស្វាគមន៍រដ្ឋាភិបាលឈីលីក្នុងនាមជាប្រទេសផ្តល់ជំនួយថ្មីរបស់ អ.វ.ត.ក។ នៅក្នុងនាម អ.វ.ត.ក យើងខ្ញុំសូមសម្តែងនូវអំណរគុណចំពោះប្រទេសឈីលីដែលបានផ្តល់វិភាគទាននេះ”។

Pages

Friday, September 12, 2014