គណៈកម្មការស្រាវជ្រាវ បានរកឃើញថាស្នាមមេដៃក្នុងញត្តិ CNRP មានភាពមិនប្រក្រតីច្រើន

ទីបំផុតលទ្ធផលលើការធ្វើកោសល្យវិច័យ លើស្នាមមេដៃក្នុងញត្តិរបស់គណបក្ស​សង្រ្គោះ​ជាតិ (CNRP) បានរកឃើញមានភាពមិនប្រក្រតីជាច្រើន នេះបើយោងតាមនាយឧត្តមសេនីយ៍ កង សុខន អគ្គស្នងការរងនគរបាលជាតិ និង ជាអនុប្រធានគណៈកម្មការស្រាវជ្រាវ និងធ្វើ កោ​សល្យ​​វិច័យ​ស្នាមេដៃ បានបញ្ជាក់ឲ្យដឹងថា បន្ទាប់ពីការពិនិត្យ និងធ្វើកោសល្យ​វិច្ច័យ​អស់​ជា​ច្រើន​ថ្ងៃ។

នៅក្នុង​ញត្តិនោះបានរកឃើញថា មានស្នាមមេដៃតែមួយបានផ្តិត​នៅលើ​ឈ្មោះ​ច្រើន​នាក់ ហើយ​​​ស្នាមមេដៃខ្លះទៀត មិនមានអត្តសញ្ញាណច្បាស់លាស់ និងស្នាមមេដៃ​ខ្លះ​ទៀត​មិន​បាន​បញ្ជាក់​​អាសយដ្ឋានច្បាស់លាស់នោះឡើយ។

នាយឧត្តមសេនីយ៍ កង សុខន បានថ្លែងប្រាប់ក្រុមអ្នកព័ត៌មានក្រោយពីការធ្វើ​កោសល្យវិច័យ​នាព្រឹកថ្ងៃទី១៤ ខែមិថុនា ឆ្នាំ២០១៦នេះថា  ដំណើរការធ្វើកោសល្យវិច្ច័យនេះធ្វើបាន​ប្រ​មាណ ៣០ភាគរយហើយ ដែលអាចឲ្យគណៈកម្មការវាយតម្លៃ សន្និដ្ឋានបានថា ស្នាមមេដៃ​នៅ​លើ​ញត្តិ​នោះ​មាន​​​ភាពមិនប្រក្រតីច្រើន។

នាយឧត្តមសេនីយ៍ កង សុខន បានឲ្យដឹងផងដែរថា ការពិនិត្យ និង ធ្វើកោសល្យវិច័យលើ​ស្នាម​​​​មេដៃនេះ ក៏មានការចូលរួមពីអគ្គនាយក នៃ អគ្គនាយកដ្ឋានអត្តសញ្ញាណកម្ម នាយ​ឧត្តម​សេនីយ៍ ម៉ៅ ច័ន្ទតារា ផងដែរ។ សូមបញ្ជាក់ថា គណៈ​កម្មការ​ស្រាវជ្រាវ និងធ្វើកោស​ល្យ​វិច័យស្នាមមេដៃ ដែលមាននាយ​ឧត្តមសេនីយ៍ នេត សាវឿន អគ្គស្នងការនគរបាលជាតិ​ជា​ប្រធានបានបើកការពិនិត្យ និងធ្វើកោសល្យវិច្ច័យលើស្នាមមេដៃនេះ កាលពីថ្ងៃទី០៦ ខែ​មិថុនា ឆ្នាំ២០១៦។

សូមរំលឹកផងដែរថា កាលពីថ្ងៃទី៣០ ខែឧសភា កន្លងទៅ តំណាងរាស្រ្តមកពី​គណបក្ស​សង្រ្គោះ​​​ជាតិ តំណាងដោយឯកឧត្តម យ៉ែម បុញ្ញរិទ្ធ  បានធ្វើញត្តិមួយ​អមដោយស្នាមមេដៃ​របស់​ប្រជាពលរដ្ឋចំនួន ១៨ដុំ ស្មើនឹងជាង ១៧ម៉ឺនស្នាមមេដៃ ដង្ហែទៅថ្វាយព្រះមហាក្សត្រ​ ដោយទាមទារឲ្យដោះលែងមន្រ្តីសិទ្ធិមនុស្សអាដហុក ៤រូប អគ្គលេខាធិការរង​គណៈកម្មាធិការ​ជាតិ រៀបចំការបោះឆ្នោត១រូប។ ក្នុងញត្តិក៏ទាមទារ ឲ្យដោះលែងសកម្មជនមន្រ្តីជាន់ខ្ពស់ និង​តំណាងរាស្រ្ត គណបក្សគណបក្សសង្រ្គោះជាតិ ព្រមទាំងទាមទារឲ្យទម្លាក់​ចោលការចោទ​ប្រកាន់  ទៅលើលោក កឹម សុខា ប្រធានស្តីទីគណបក្សសង្រ្គោះជាតិផងដែរ។

បន្ទាប់ពី ប្រគល់ញត្តិនេះ មានព័ត៌មានទម្លាយថា ក្នុងញត្តិមានករណីមិនប្រក្រតីមួយចំនួន ក្នុង​ការប្រមូលស្នាមមេដៃរបស់ប្រជាពលរដ្ឋ។ ដើម្បីបញ្ជាក់ពីភាពត្រឹមត្រូវ និងចៀសវាងការ​បោក​ប្រាស់​ព្រះមហាក្សត្រ នាំឲ្យប៉ះពាល់ដល់ព្រះកិត្តិស័ព្ទរបស់ព្រះអង្គនោះ នៅថ្ងៃទី៣១ ខែ ឧសភា ឆ្នាំ២០១៦ រាជរដ្ឋាភិបាលកម្ពុជា បានសម្រេចប្រគល់ភារកិច្ច ជូនសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រៀបចំស្រាវជ្រាវស្នាមមេដៃ តាមវិធីសាស្រ្ត​ធ្វើកោសល្យវិច័យ ស្រាវជ្រាវពីប្រជាជនដោយផ្ទាល់ ឬតាមវិធីសាស្រ្តផ្សេងៗទៀត ឲ្យបាន​ហ្មត់​​ចត់បំផុត ដើម្បីចៀសវាងការប្រើប្រាស់ស្នាមមេដៃ បោកប្រាស់ទាំង ប្រជាជន ជាពិសេស​បោកប្រាស់ព្រះមហាក្សត្រ៕

សម្តេច​​តេជោ ហ៊ុន សែ​ន ទទួលបាន​បណ្ឌិ​តកិត្តិ​យសពី ​ក្រុម​ប្រឹក្សាបណ្ឌិត​ស​ភាទេ​សចរណ៍អឺរ៉ុប ជា​មេដឹក​នាំពិ​ភ​ពលោក «សម្រាប់វិស័​​យទេ​សចរណ៍​ និង​ការ​អ​ភិវឌ្ឍ»

បើយោងតាមសារព័ត៌មាន Euro News ចេញផ្សាយនៅថ្ងៃទី១៣ ខែមិថុនា ឆ្នាំ២០១៦ បានឲ្យដឹងថា ក្រុមប្រឹក្សាបណ្ឌិតសភាទេសចរណ៍ នៃតំបន់អឺរ៉ុប បានជ្រើសតាំងសម្តេចតេជោ ហ៊ុន សែន គឺជាសមាជិកបណ្ឌិតកិត្តិយស នៃក្រុមប្រឹក្សាបណ្ឌិតសភាទេសចរណ៍តំបន់អឺរ៉ុប ដើម្បីតបស្នងចំពោះការលះបង់របស់សម្តេច ដែលបានជួយដល់ការអភិវឌ្ឍ វិស័យទេសចរណ៍        ទូទាំងសកលលោក និងការលើកស្ទូយតម្លៃនៃទេសចរណ៍វប្បធម៌ ក្នុងកម្រិតសកល អំឡុងសន្និសីទពិភពលោកឆ្នាំ២០១៥ ស្តីអំពីទេសចរណ៍ និងវប្បធម៌ ។

ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានទទួលស្គាល់ជាយូរណាស់មកហើយ នូវសារសំខាន់នៃទេសចរណ៍ និងវប្បធម៌ថា ជាគន្លឹះនៃការសម្របសម្រួលនានា សម្រាប់ការអភិវឌ្ឍ និងរីកចំរើនរបស់អន្តរជាតិ។

លោកសាស្ត្រាចារ្យ Anton Caragea នៃក្រុមប្រឹក្សាបណ្ឌិតសភាទេសចរណ៍ វប្បធម៌ និងពាណិជ្ជកម្ម អឺរ៉ុប និង បណ្ឌិតសភាចារ្យ Mircea Constantinescu បានប្រកាសពីសេចក្តីសម្រេចនៃការជ្រើសរើស សម្តេចនាយករដ្ឋមន្ត្រី ហ៊ុន សែន នៃព្រះរាជាណាចក្រកម្ពុជា គឺជាមេដឹកនាំពិភពលោកសម្រាប់វិស័យទេសចរណ៍ និងការអភិវឌ្ឍ «WORLD LEADER OF TOURISM AND DEVELOPMENT»៕

លោក កឹម សុខា នៅតែបន្តអវត្តមានក្នុងការសាកសួរ, មន្រ្តីតុលាការបញ្ជាក់ថា មេធាវីមិនអាចឆ្លើយសំណួរជំនួសទេ

នៅព្រឹកថ្ងៃទី១៤ ខែមិថុនា ឆ្នាំ២០១៦នេះ លោក កឹម សុខា ប្រធានស្តីទីគណបក្សសង្រ្គោះជាតិ បានបន្តអវត្តមាន ក្នុងការបំភ្លឺជូនចៅក្រមស៊ើបសួរ នៅសាលាដំបូងរាជធានីភ្នំពេញ ជុំវិញ​ការ​មិន​ចូល​ខ្លួន​តាមការកោះហៅកន្លងមក ដោយគ្រាន់តែប្រកាសថា មេធាវីរបស់លោក នឹងចូលតុលាការជំនួស។

សាលាដំបូងរាជធានីភ្នំពេញ បានឱ្យដឹងថា នៅព្រឹកថ្ងៃទី១៤ ខែមិថុនា ឆ្នាំ២០១៦នេះ មាន​មេធាវី៣​របស់​លោក កឹម សុខា បានទៅដល់សាលាដំបូងរាជធានីភ្នំពេញហើយ។ លោក លី សុផាណា អ្នកនាំពាក្យសាលាដំបូងរាជធានីភ្នំពេញបានឱ្យដឹងថា មេធាវី​អាច​ការពារ​ក្តី​ឱ្យ​ជនត្រូវចោទបាន ប៉ុន្តែ​មិន​អាច​ឆ្លើយសំណួរជំនួសជនត្រូវចោទបាននោះទេ។

សូមបញ្ជាក់ថា ចៅក្រមស៊ើបសួរសាលាដំបូងរាជធានីភ្នំពេញ លោក ថាន់ ឡេង កាលពីថ្ងៃទី២៦ ខែឧសភា បានចេញដីកាបង្គាប់ឲ្យលោក កឹម សុខា ចូលខ្លួនទៅបំភ្លឺនៅថ្ងៃទី១៤ ខែមិថុនា ពីបទ «បដិសេធក្នុងការចូលខ្លួន» តាមការកោះហៅរបស់តំណាងអយ្យកាកន្លមក។ ការចេញ​ដីកា​កោះ​នេះ​បានធ្វើឡើង បន្ទាប់លោក កឹម សុខា បានអវត្តមានមិនចូលបំភ្លឺតាមការកោះហៅ របស់​តំណាង​អយ្យការអមសាលាដំបូងរាជធានីភ្នំពេញចំនួន ២លើក ក្នុងនាមជាសាក្សីក្នុងសំណុំរឿងសញ្ចារកម្ម ពាក់ព័ន្ធនឹងបណ្តឹងរបស់ កញ្ញា ខុម ចាន់តារាទី ហៅស្រីមុំ។ ក្រោយពីការសម្រេចមិនចូលខ្លួននេះ តុលាការបានធ្វើសេចក្តីរាយការណ៍មួយ ទៅកាន់រដ្ឋសភា ហើយរដ្ឋសភាក្រោមសំឡេងភាគច្រើន ដាច់ខាត​បានបោះឆ្នោតគាំទ្រឱ្យតុលាការ បន្តនីតិវិធីលើ លោក កឹម សុខា តែម្តង។

តំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ លោក កឹម សុខា ពីបទ​មិនចូលឆ្លើយបំភ្លឺក្នុងនាមជាសាក្សី តាមមាត្រាទី៥៣៨ នៃក្រមព្រហ្មទណ្ឌ។ មាត្រានេះ បានចែងថា «រាល់បុគ្គលណាដែលត្រូវបានកោះហៅ ឱ្យចូលមកឆ្លើយជាសាក្សីនៅមុខ អយ្យការឬចៅ​ក្រម​ស៊ើបសួរ ឬមុខតុលាការព្រហ្មទណ្ឌ ហើយមិនព្រមចូលខ្លួន តាមដីកាកោះហៅនោះ ដោយគ្មាន​មូលហេតុ​សម​ស្រប ត្រូវផ្តន្ទាទោសដាក់ពន្ធនាគារពី១ខែ ទៅ៦ខែ និងពិន័យជាប្រាក់ពី ១សែនរៀល ទៅ​១​លានរៀល»៕

រដ្ឋសភាបើកសិក្ខាសាលា ស្វែងយល់ពីការកសាងសេចក្តីព្រាងច្បាប់ «ហិរញ្ញវត្ថុសម្រាប់ការគ្រប់គ្រងឆ្នាំ២០១៧»

រដ្ឋសភាបានរៀបចំសិក្ខាសាលាស្វែងយល់ពី «ការកសាងក្របខណ្ឌគោលនយោបាយ ម៉ាក្រូ​សេដ្ឋកិច្ច និងគោលនយោបាយហិរញ្ញវត្ថុ​សាធា​រ​​ណៈ​សម្រាប់​ការកសាង​សេចក្កី​ព្រាង​ច្បាប់​ ស្តី​ពីហិរញ្ញវត្ថុ​សម្រាប់​ការគ្រប់គ្រង ​ឆ្នាំ​២០​​​​១៧» នៅវិមានរដ្ឋសភា។​នេះបើ​យោង​តាម​ទំព័រ​ហ្វេសប៊ុក របស់សម្តេចពញាចក្រី ហេង សំរិន ដែលបានបង្ហោះផ្សាយនៅព្រឹកថ្ងៃទី១៤ ខែមិថុនា ឆ្នាំ២០១៦នេះ។

សិក្ខាសាលានេះ ធ្វើឡើងក្រោមអធិបតីភាព សម្តេចពញាចក្រី ហេង សំរិន ប្រធានរដ្ឋសភា កម្ពុជា ក្រោមការរៀបចំដោយ គណៈកម្មការសេដ្ឋកិច្ច ហិរញ្ញាវត្ថុ ធនាគារ និងសវនកម្ម នៃរដ្ឋសភា។ បន្ថែមពីលើនេះក៏មានបទបង្ហាញពីឯកឧត្តម ជាម យៀប ប្រធានគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា និងឯកឧត្តមទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ព្រមទាំងវាគ្មិនសំខាន់ៗជាច្រើនរូបទៀត។

សេចក្តីជូនដំណឹងរបស់រដ្ឋសភា បានបញ្ជាក់ទៀតថា សិក្ខាសាលានេះ គឺដើម្បី​សិក្សា​ស្វែង​យល់​ពីការកសាងក្របខណ្ឌ គោលនយោបាយ ម៉ាក្រូសេដ្ឋកិច្ច និងគោល​នយោ​បាយ​ហិរ​ញ្ញ​​វត្ថុ សម្រាប់ការគ្រប់គ្រងឆ្នាំ២០១៧ ដែលមានអ្នកចូលរួម ពីសមាជិក សមាជិការដ្ឋសភា ព្រឹទ្ធសភា តំណាងរាជរដ្ឋាភិបាលដៃគូអភិវឌ្ឍន៍ និងអង្គការមិនមែនរដ្ឋាភិបាល ដែលពាក់​ព័ន្ធ​នានាជាច្រើនរូបទៀត៕

សម្តេច ហេង សំរិន បានបញ្ជាក់ថា រាជរដ្ឋាភិបាលកម្ពុជា បានសម្រេចបានសមិទ្ធផលធំធេង និងគួរឲ្យកត់សម្គាល់ តួរយ៉ាង ការកំណត់គោលដៅក្នុងការរក្សាកំណើនសេដ្ឋកិច្ចខ្ពស់ ដែល​ជា​មធ្យមកំណើនស្ថិតក្នុងរង្វង់ ៧ភាគរយ ជាប់ៗគ្នា ដែលធ្វើឲ្យកម្ពុជាក្លាយជាប្រទេសទី៦ ក្នុង​ចំណោម​ឯកទគ្គករកំណើនទាំង៨ នៅលើពិភពលោក និងធ្វើឲ្យកម្ពុជាទទួលបានចំណាត់​ថ្នាក់​​ជាប្រទេសជោគជ័យបំផុតទី៤ លើពិភពលោកក្នុងការកាត់បន្ថយភាពក្រីក្រ និងប្រែក្លាយ​កម្ពុជា​​ពីប្រទេសក្រីក្រ ឲ្យទៅជាប្រទេសដែលមានចំណូលមធ្យមកម្រិតទាប និងទាញ​កម្ពុជា​ឲ្យ​ក្លាយជាកូនខ្លាមួយនៅអាស៊ី។ ការពិតណាស់លទ្ធផលទាំងនេះ វាជា​បេសកកម្ម​ដ៏​លំបាក​មួយ និងមានបញ្ហាប្រឈមនានាទាំងខាងក្នុង និងខាងក្រៅរួមមានការប្រកួតប្រជែង ក្នុងតំបន់​​​និងពិភពលោក ការវាទទីសេដ្ឋកិច្ចពីសំណាក់ប្រទេសអ្នកមាន មកលើប្រទេសក្រីក្រ ពិសេស​ហានិភ័យនៃគ្រោះធម្មជាតិភាពរាំងស្ងួតដែលពិភព​លោក និង​កម្ពុជា​ជួប​ប្រទះ​ក្នុង​ឆ្នាំ​២០១៦​នេះ ៕

ឯក​ឧត្តមនាយ​ឧត្តមសេ​នីយ៍ នេត សាវឿន ដឹកនាំក្រុម​ការងារ ប្រជុំត្រួ​តពិនិត្យលើ​លទ្ធផល នៃការធ្វើ​កោសល្យ​វិច័យស្នាមមេ​ដៃ អ្នកគាំទ្រគ​ណបក្ស​សង្រ្គោះ​ជាតិ

នៅព្រឹកថ្ងៃទី១៤ ខែមិថុនា ឆ្នាំ២០១៦នេះ ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងជាប្រធានគណៈកម្មការស្រាវជ្រាវ និងធ្វើកោសល្យវិច័យលើស្នាមមេដៃ បានដឹកនាំក្រុមការងារប្រជុំត្រួតពិនិត្យលើលទ្ធផល នៃការធ្វើកោសល្យវិច័យស្នាមមេដៃ អ្នកគាំទ្រគណបក្សសង្រ្គោះជាតិ ។

កិច្ចប្រជុំត្រួតពិនិត្យលើលទ្ធផល នៃការធ្វើកោសល្យវិច័យស្នាមមេដៃអ្នកគាំទ្រគណបក្សសង្រ្គោះជាតិ នាពេលនេះ បានធ្វើឡើងបន្ទាប់ពីគណៈកម្មការស្រាវជ្រាវបានធ្វើកោសល្យ         វិច័យលើស្នាមមេដៃប្រជាពលរដ្ឋ នៅលើញត្តិរបស់គណបក្សសង្គ្រោះជាតិ ដែលត្រូវបានចាត់តាំងភារកិច្ច ឲ្យអនុវត្តទៅតាមជំនាញនីមួយៗ កាលពីថ្ងៃទី០៦ ខែមិថុនា ឆ្នាំ២០១៦។

សូមរំលឹកផងដែរថា ការចាប់ផ្តើមការធ្វើកោសល្យវិច័យលើស្នាមមេដៃរបស់ប្រជាពលរដ្ឋ គឺបន្ទាប់ពីរាជរដ្ឋាភិបាលបានសម្រេចឲ្យក្រសួងមហាផ្ទៃ ធ្វើការស្រាវជ្រាវនិងធ្វើកោសល្យវិច័យ លើស្នាមមេដៃដែលគណបក្សសង្គ្រោះជាតិ បានយកទៅថ្វាយព្រះមហាក្សត្រសុំព្រះរាជអន្តរាគមន៍ កាលពីថ្ងៃទី៣០ ខែឧសភា ឆ្នាំ២០១៦ ដើម្បីចៀសវាងការប្រើប្រាស់ស្នាមមេដៃបោកប្រាស់ប្រជាពលរដ្ឋ និងជាពិសេសព្រះមហាក្សត្រ។

យោងតាមសេចក្តីសម្រេច របស់ក្រសួងមហាផ្ទៃ បេសកកម្មធ្វើកោសល្យវិច័យ លើស្នាមមេដៃប្រជាពលរដ្ឋនៅលើញត្តិរបស់គណបក្ស សង្គ្រោះជាតិ ត្រូវធ្វើ ក្នុងរយៈពេលរង្វង់៣០ថ្ងៃ។ ក្រុមការងាររបស់ អគ្គស្នងការនគរបាលជាតិ សន្យាថានឹងខិតខំប្រឹងប្រែងធ្វើរឿងនេះឲ្យបានទាន់ពេលវេលា និងមានប្រសិទ្ធភាព៕