ខ្មែរតែមួយ - Khmer Unity: March 2014

Monday, March 31, 2014

សេចក្តីប្រកាសព័ត៌មានរបស់សាលារាជធានីភ្នំពេញ ទាក់ទងនិងការចោទប្រកាន់របស់គណៈបក្សសង្រ្គោះជាតិ ចំពោះអាជ្ញាធរមានសមត្ថកិច្ច ព្រឹកថ្ងៃទី៣១ មីនា ២០១៣

បទអត្ថាធិប្បាយ ដោយ សៅ សុភៈ «គណបក្សសង្គ្រោះជាតិ ប៉ុនប៉ងបិទដង្ហើមសង្គមជាតិគ្រប់ច្រក តាមរយៈការវិលទៅរករូបមន្ត២ភាគ៣»

បទអត្ថាធិប្បាយ

គណបក្សសង្គ្រោះជាតិ ប៉ុនប៉ងបិទដង្ហើមសង្គមជាតិគ្រប់ច្រក

តាមរយៈការវិលទៅរករូបមន្ត២ភាគ៣

ការផ្លាស់ប្តូរគោលជំហរជាថ្មីរបស់គណបក្សសង្គ្រោះជាតិ ដោយលើកយករូបមន្ត២ភាគ៣ចូលក្នុងតុចរចា បានបង្កើតនូវការបង្អាក់ និងបង្កភាពរាំងស្ទះដល់កិច្ចប្រជុំនៃក្រុមការងារគណៈកម្មការចម្រុះរវាងគណបក្សទាំងពីរ ដែលគេបានមើលឃើញថា គណបក្សសង្គ្រោះជាតិកំពុងបោះដុំដែកដែលជាងងើគដ៏ក្រហមឆ្អៅ ទម្លាក់មកលើគណបក្សប្រជាជនកម្ពុជា ហើយដែលកម្តៅនោះអាចនឹងនាំឱ្យមានគ្រោះថ្នាក់ដល់សង្គមជាតិទាំងមូល ដោយសារឧបាយកលនេះ។

ក្នុងទឹកចិត្តរបស់ប្រជាជនកម្ពុជា ពិតណាស់ គឺមិនចង់វិលទៅរកអតីតកាលដ៏ជូរចត់នោះទេ ទាំងការកាប់សម្លាប់ដូចក្នុងរបបប្រល័យពូជសាសន៍ប៉ុល ពត និងទាំងការជាប់គាំងនៃស្ថានការណ៍នយោបាយ ពីព្រោះថា ប្រជាជនកម្ពុជា ធ្លាប់បានហែលឆ្លងកាត់នូវវិបត្តិដ៏រាំរ៉ៃនោះនិងឆ្អែតឆ្អន់មិនចង់ឃើញទៀតឡើយ។ ប៉ុន្តែ គណបក្សសង្គ្រោះជាតិ ហាក់បីដូចជាមិនបានអើពើទៅនឹងកង្វល់ពិតប្រាកដរបស់ប្រជាពលរដ្ឋនោះទេ ផ្ទុយទៅវិញគណបក្សប្រឆាំងរិតតែសម្ញើញឬទ្ធិ ពីមួយថ្ងៃទៅមួយថ្ងៃឥតឈប់ឈរ និងបង្កើតបញ្ហាថ្មីៗតាមគ្រប់រូបភាព ហាក់ដូចជាចង់បង្ហាញថា មានតែគណបក្សរបស់ពួកគេតែប៉ុណ្ណោះដែលគិតពីជាតិ និងធ្វើអ្វីៗគ្រប់យ៉ាងគោរពតាមឆន្ទៈពលរដ្ឋ។

ដើម្បីបានសម្រេចគោលដៅរបស់ខ្លួន មេដឹកនាំគណបក្សសង្គ្រោះជាតិដែលគ្មានបេះដូងស្រឡាញ់សន្តិភាពបន្តិចសោះនោះ បានបង្ខំចិត្តដើរចេញចាកឆ្ងាយពីរង្វង់ច្បាប់ជាហូរហែរ ដូចអ្វីដែលគេបានដឹងជាបន្តបន្ទាប់នូវពុតត្បុតទាំងនោះ តាមរយៈ ការបង្កនូវភាពក្តុងខ្ទាំង អូសទាញ ញុះញង់ អុចអាល ដុតបញ្ឆេះកំហឹងមហាជនឱ្យចូលក្នុងល្បែងនយោបាយដែលពួកគេធ្លាប់លេងអស់ពេល៥អាណត្តិមកហើយ ហើយល្បែងនេះនៅតែជាទីពេញនិយមសម្រាប់កំដរដៃក្រុមពួកគេដដែល។

គណបក្សសង្គ្រោះជាតិ មិនធ្លាប់ដែលហ៊ានចេញមកសារភាពនោះទេ នូវរាល់កំហុសនានាដែលខ្លួនបានបង្កឡើង ដូចជា ប្រើល្បិចក្នុងពេលរាល់មានកិច្ចចរចា តែងតែប្រកូកប្រកាសធ្វើបាតុកម្ម ក៏ដូចជាទាមទារចង់ឱ្យភាគីចរចាត្រូវតែយល់ព្រមធ្វើតាមសំណូមពរដែលពួកគេចង់បានជាមុនសិន ទើបនិយាយគ្នាបន្តទៀតដើម។ល។។

ប៉ុន្តែ ក្នុងចំណោមបញ្ហានានាដែលគណបក្សប្រឆាំងទាមទារ វាហាក់ដូចជាដាក់ការគាបសង្កត់ជ្រុលហួសហេតុមកលើគណបក្សប្រជាជនកម្ពុជា ហើយដែលសំណើទាំងនោះគណបក្សកាន់អំណាច មិនអាចនឹងទទួលយកបាន ក្នុងនោះ ដូចជា ការទាមទារក្នុងការកំណែទម្រង់ការបោះឆ្នោត ដោយចង់បានឱ្យ គជប ទៅជា ស្ថាប័នធម្មនុញ្ញ ហើយសមាសភាពរបស់ គជប ត្រូវតែអនុម័តដោយសម្លេង២ភាគ៣ នោះ គឺជាការដើរវិលថយក្រោយ និងក៏អាចចាត់ទុកថា មេដឹកនាំគណបក្សប្រឆាំងកំពុងតែបំពានលើការសម្រេចចិត្តរបស់ខ្លួនកាលពីអតីតកាល។

រូបមន្ត២ភាគ៣ នាពេលកន្លងមក បាននាំឱ្យសភាជាប់គាំង និងកម្ពុជាប្រឈមនឹងវិបត្តក្នុងពេលដ៏វែង។ គណបក្សសង្គ្រោះជាតិបានដឹងយ៉ាងច្បាស់ណាស់ថា រដ្ឋធម្មនុញ្ញឆ្នាំ ១៩៩៣ គឺតម្រូវឲ្យមានការអនុម័តច្បាប់ និងរាល់ឯកសារគតិយុត្តិផ្សេងៗ ដោយសំឡេង ២ ភាគ ៣ នៃសមាជិករដ្ឋសភា ហើយរាល់ពេលដំណើរការអនុម័តច្បាប់ម្តងៗ តែងតែជួបប្រទះនូវវិបត្តិជាញឹកញាប់ ជាពិសេស គឺវិបត្តិនៃការខ្វះកូរ៉ុមកនៃកិច្ចប្រជុំសភា ដែលគណបក្សមានសំឡេងភាគតិចនៅក្នុងរដ្ឋសភា តែងតែយកគណបក្សឈ្នះឆ្នោតដែលមានសំឡេងភាគច្រើនជាចំណាប់ខ្មាំង ដើម្បីផលប្រយោជន៍នយោបាយរបស់បក្សខ្លួនជានិច្ច។

ដោយយល់ច្បាស់អំពីបញ្ហាអស់ទាំងនេះហើយ ទើបកាលណោះ ក្នុងឆ្នាំ ២០០៦ លោក សម រង្ស៊ី ផ្ទាល់ បានធ្វើលិខិតស្នើទៅសម្តេចក្រុមព្រះនរោត្តមរណឬទ្ធិ និងគណបក្សប្រជាជនកម្ពុជា សុំឲ្យធ្វើវិសោធនកម្មរដ្ឋធម្មនុញ្ញពីការអនុម័តសម្លេង ២ ភាគ ៣ មក ៥០ ភាគរយបូក ១វិញ ដែលរូបមន្តថ្មីនេះ បាននាំឲ្យកម្ពុជា គេចផុតពីភាពជាប់គាំងនយោបាយ រហូតមកទល់បច្ចុប្បន្ននេះ ។

តើហេតុដូចម្តេចបានជាមកដល់ស្ថានការណ៍ចុងក្រោយនេះ គណបក្សសង្គ្រោះជាតិបែរជាខ្លាចរូបមន្ត ៥០ភាគរយ បូក ១ ដែលខ្លួនធ្លាប់ជាអ្នកស្នើកាលពីអតីតកាលនោះទៅវិញ?

ការចាញ់ឆ្នោតជាបន្តបន្ទាប់ អាចជាមូលដ្ឋានបណ្តាលឱ្យគណបក្សសង្គ្រោះជាតិ ប៉ាន់ប្រមាណខ្លួនឯងថា ការសម្រេចចិត្តកាលណោះ គឺដោយសារការជឿជាក់លើខ្លួនឯងហួសហេតុពេក ថា អាចនឹងដណ្តើមជ័យជំនះលើគណបក្សប្រជាជនកម្ពុជាបាន ប៉ុន្តែ នៅទីបំផុត គណបក្សសង្គ្រោះជាតិបានស្ថិតក្នុងសភាព ចាញ់ និងបាក់ស្បាត ទើបយកឱកាសដែលខ្លួនកំពុងចាញ់នេះ បន្លំភ្នែកប្រជាពលរដ្ឋ ងាកទៅរករូបមន្តចាស់វិញ ដើម្បីបន្តរុញច្រានស្ថានការណ៍ឱ្យចូលក្នុងអន្ទាក់ដែលពួកខ្លួនចង់បាន។

ការផ្លាស់ប្តូរឆន្ទៈនយោបាយ ដ៏ក្រឡាប់ចាក់បែបនេះ គឺបានបង្ហាញនូវពុតត្បុតដ៏អាក្រក់របស់គណបក្សដែលចាញ់ឆ្នោត គឺគ្មានអ្វីដែលច្បាស់លាស់ក្នុងការសម្រេចចិត្តនោះទេ។ បើបញ្ហាជាតិធ្វើតាមអារម្មណ៍បែបនេះ ប្រទេសជាតិនឹងជួបគ្រោះអន្តរាយដោយសារពួកគេទាំងនោះ។

ដូចនេះ ដើមហេតុនៃការបង្កឲ្យមានការអាក់ខានការចចាររវាងគណបក្សទាំងពីរ មិនមែនកើតឡើងដោយសារការជំទាស់របស់គណបក្សប្រជាជនកម្ពុជានោះទេ គឺពិតជាកើតចេញពីការចាប់បង្ខំទៅលើគណបក្សប្រជាជនកម្ពុជាឱ្យធ្វើការឆ្លើយតប និងយល់ព្រមទៅលើសំណើដែលផ្ទុយពីច្បាប់ ហើយច្បាប់នេះទៀតសោត នៅមានតម្លៃជាធរមាន និងប្រកបដោយអានុភាពទៀតផង។

វារិតតែគ្រោះថ្នាក់ខ្លាំងណាស់សម្រាប់សង្គមជាតិ ពីព្រោះ ក្នុងច្បាប់បោះឆ្នោតជ្រើសតាំងតំណាងរាស្ត្រ គឺរដ្ឋធម្មនុញ្ញ ជំពូកទី ៧ មាត្រា ៧៦ នៅក្នុងវាក្យខណ្ឌចុងក្រោយ បានចែងយ៉ាងច្បាស់ថា អង្គការរៀបចំការបោះឆ្នោត នីតិវិធី និងបទបញ្ជានៃការបោះឆ្នោត ត្រូវបានកំណត់ដោយច្បាប់បោះឆ្នោត។ បើបែបនេះ តើស្ថាប័នគណៈកម្មាធិការជាតិរៀបចំការបោះឆ្នោតចាំបាច់ ក្លាយជាស្ថាប័នធម្មនុញ្ញ នឹងត្រូវជ្រើសតាំងសមាសភាពសមាជិកគណៈកម្មាធិការជាតិរៀបចំការបោះឆ្នោត ហៅថា គ.ជ.ប នោះ ដោយសំឡេងបោះឆ្នោតគាំទ្រចំនួន ២ ភាគ ៣ នៃសមាជិករដ្ឋសភាដែរ ឬទេ?

ម៉្យាងវិញទៀត ក្នុងបរិបទនេះ គឺគេបានដឹងច្បាស់ណាស់ថា ប្រសិនជាធ្វើតាមសំណើរបស់គណបក្សសង្គ្រោះជាតិ ប្តូររូបមន្តពី៥០ភាគរយ បូក១ មក ២ភាគ៣មែននោះ បញ្ហាទាំងអស់នឹងជាប់គាំង ពីព្រោះថា គណបក្សសង្គ្រោះជាតិ នឹងមិនអោយមានការអនុម័តអ្វីបានទាំងអស់ និយាយជារួម រាល់សំណើណាមួយរបស់គណបក្សប្រជាជន ក្នុងការពន្លឿនប្រសិទ្ធិភាពក្នុងការអនុវត្តច្បាប់នានា ប្រាកដជានឹងត្រូវបានបដិសេធដោយគណបក្សជំទាស់។ នោះហើយជាពហុវិបត្តិជាថ្មីរបស់កម្ពុជា ។

ក្នុងនាមជាគណបក្សកាន់អំណាច គេនឹងមិនអនុញ្ញាតឱ្យគណបក្សចាញ់ឆ្នោតរុញស្ថានការណ៍ វិលទៅរកភាពអាក្រក់វិញនោះឡើយ។

លើសពីនេះទៅទៀត បើ គ.ជ.ប ពិតជាត្រូវអនុម័តដោយសំឡេង ២ ភាគ ៣ នោះភាពជាប់គាំងកាន់តែមានសភាពធ្ងន់ធ្ងរជាងរូបមន្ត ២ ភាគ ៣ នៃការបង្កើតរាជរដ្ឋាភិបាលទៅទៀត ព្រោះថា អតីតកាល រដ្ឋធម្មនុញ្ញមាត្រា ៩០ វាក្យខណ្ឌទី ៨ បានសរសេរថា (រដ្ឋសភាបោះឆ្នោត ទុកចិត្តដល់រាជរដ្ឋាភិបាលតាមមតិគាគច្រើន ២ ភាគ ៣ នៃសមាជិកសភាទាំងមូល) ហើយរូបមន្តនេះ បានធ្វើឲ្យមានការជាប់គាំងនយោបាយនៅក្រោយការបោះឆ្នោតម្តងៗតែប៉ុណ្ណោះ។ ប៉ុន្តែ ក្រោយមក ដោយឆន្ទៈនយោបាយក្នុងការបង្រួបបង្រួមជាតិរបស់គណបក្សប្រជាជនកម្ពុជា បានទម្លុះទម្លាយនៃភាពជាប់គាំងនេះ ដោយមានការបង្កើតរាជរដ្ឋាភិបាលចម្រុះ រវាងគណបក្ស ប្រជាជនកម្ពុជា និងគណបក្សហ៊្វុនស៊ីនប៉ិច ។ ប៉ុន្តែ បើ ២ ភាគ ៣ មិនអាចបង្កើត គ.ជ.ប វិញនោះ នៅកម្ពុជាក៏មិនអាចមានការបោះឆ្នោតបាន ហើយបើមិនបានបោះឆ្នោតក៏មិនអាច មានរាជរដ្ឋាភិបាល ហើយបើមិនមានរាជរដ្ឋាភិបាល ដំណើរការប្រជាធិបតេយ្យសេរីពហុបក្សនៅកម្ពុជា ពិតជាត្រូវបានបំផ្លាញ។

តើមេរៀនប្រវត្តិសាស្ត្រដែលនាំដល់ការជាប់គាំងនយោបាយនេះ គួរត្រូវបានជ្រើសយក មកអនុវត្តទ្បើងវិញនៅកម្ពុជា ក្រោមហេតុផលដោះស្រាយវិបត្តិនយោបាយដែរ ឬទេ?

ការប៉ុនប៉ងប្រើកលល្បិចរបស់មេដឹកនាំគណបក្សប្រឆាំង ដើម្បីឱ្យកម្ពុជាធ្លាក់ចូលក្នុងវិបត្តិ ជាថ្មី គឺមិនមែនជាបំណងរបស់ប្រជាពលរដ្ឋនោះឡើយ។

ទោះយ៉ាងណា គេរំពឹងថា រាជរដ្ឋាភិបាលកម្ពុជាដែលប្រសូតចេញពីការបោះឆ្នោតតាមលទ្ធិប្រជាធិបតេយ្យ សេរីពហុបក្ស ប្រាកដជាមានកាតព្វកិច្ចការពារជាតិ ហើយនឹងប្រកាន់យកគ្រប់វិធានការទាំងអស់ ដើម្បីការពាររដ្ឋធម្មនុញ្ញ ការពារបាវចនាជាតិ សាសនា ព្រះមហាក្សត្រ និងជាពិសេសការពារលទ្ធិប្រជាធិបតេយ្យ សេរីពហុបក្ស ក៏ដូចជាធានានូវប្រក្រតីភាពនៃដំណើរការសង្គម និងសេដ្ឋកិច្ច ជាពិសេសជីវភាពរស់នៅរបស់ប្រជាពលរដ្ឋ នឹងមិនធ្វើអ្វី ដើម្បីបំពេញចិត្តក្រុមបក្សប្រឆាំង ហើយមកបំផ្លាញផលប្រយោជន៍រួមរបស់ជាតិនោះទេ៕

មេដឹកនាំគណបក្សប្រឆាំង គួរបញ្ចប់ទៅ នូវវប្បធម៌« ដុតឱ្យខ្លោច រោចឱ្យឆៅ» ។ ក្នុងន័យថា សំឡេងឆ្នោតដែលប្រជាពលរដ្ឋបានបោះជូនគណបក្សសង្គ្រោះជាតិចំនួន៥៥ អាសនៈ គឺអាចឱ្យក្រុមអ្នកតំណាងរាស្ត្រចូលទៅបំពេញកាតព្វកិច្ចជូនជាតិបាននៅក្នុងរដ្ឋសភា ដែលមិនគួរគប្បីធ្វើខ្លួនឯងដូចជាសត្វក្របីព្រៃ បើមិនបានស៊ីស្មៅទាំងអស់ ឬក៏គ្រប់គ្រងអាណាចក្រនោះទេ នឹងជាន់កំទេចស្មៅចោលទាំងអស់ នោះហើយជាមាយាទអន់របស់ថ្នាក់ដឹកនាំនៃគណបក្សសង្គ្រោះជាតិ។

បើបក្សសង្គ្រោះជាតិនៅតែប្រកាន់ជំហរដូចនោះមែន វិបត្តិនឹងកើតមានឡើងជាថ្មី និងគ្មានផ្លូវដោះស្រាយរួចឡើយ មិនខុសអ្វីពីការប៉ុនប៉ងបិទដង្ហើមសង្គមជាតិគ្រប់ច្រកនោះទេ។

អត្ថបទដោយ៖ សៅ សុភៈ

វិស័យកសិកម្មកម្ពុជាកំពុងមានសក្តានុពលក្នុងការជួយកាត់បន្ថយភាពក្រីក្រជូនប្រជាពលរដ្ឋ

សម្តេចអគ្គមហាសេនាបតីតេជោ ហ៊ុន សែន មានប្រសាសន៍ឲ្យដឹងនាព្រឹកថ្ងៃទី២៨ ខែមីនា ឆ្នាំ ២០១៤ ថា បច្ចុប្បន្ននេះវិស័យកសិកម្មកម្ពុជាកំពុងមានសក្កានុពលយ៉ាងខ្លាំង ហើយទាក់ទាញ បាននូវទំហំវិនិយោកទុនយ៉ាងច្រើន ដែលបានរួមចំណែកសំខាន់ដល់ការបង្កើតការងារប្រាក់ចំ ណូល និងការកាត់បន្ថយភាពក្រីក្ររបស់ប្រជាជនផងដែរ។

ក្នុងឱកាសអញ្ជើញជាអធិបតីក្នុងពិធីបិទសន្និបាតប្រចាំឆ្នាំរបស់ក្រសួងកសិកម្ម រុក្ខា ប្រមាញ់ និងនេសាទ នៅសាលសន្និសីទចតុម្មុខសម្តេចតេជោមានប្រសាសន៍រំលឹកឡើងជាថ្មីទៀតថា ការដាក់ចេញនូវយុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាលបានបង្ហាញយ៉ាងច្បាស់ពីការយកចិត្តទុកដាក់លើវិស័យកសិកម្មនេះ ក្នុងចំណោមវិស័យអាទិភាពចំនួន ៤ គឺ១-ការអភិវឌ្ឍធនធានមនុស្ស ដើម្បីបង្កើនសមត្ថភាពប្រកួតប្រជែងក្នុងទីផ្សារពលកម្មក្នុងតំបន់ ដែលកាន់តែបើកចំហ ២-ការបន្តវិនិយោគលើវិស័យហេដ្ឋារចនាសម័្ពន្ធដឹកជញ្ជូន ៣-ការបន្តអភិវឌ្ឍ និងការបង្កើនតម្លៃបន្ថែមក្នុងវិស័យកសិកម្ម និង៤-ការពង្រឹងអភិបាលកិច្ច និងសមត្ថភាពស្ថាប័នរដ្ឋ សំដៅបង្កើនប្រសិទ្ធភាពនៃសេវាសាធារណៈ និងកែលម្អបរិយាកាសវិនិយោគ។

សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា ចក្ខុវិស័យរបស់កម្ពុជា គឺបន្តធ្វើទំនើបកម្មវិស័យកសិកម្ម ដោយជំរុញប្រពលវប្បកម្ម ការប្រើប្រាស់បច្ចេកវិទ្យាទំនើប ការស្រាវជ្រាវ និងការអភិវឌ្ឍយន្តូបនីយកម្ម ព្រមទាំងការបង្កើនសមត្ថភាពស្រោចស្រព ការគ្រប់គ្រងដីធ្លីកសិកម្មប្រកបដោយប្រសិទ្ធភាព ដើម្បីលើកកម្ពស់ផលិតភាពកសិកម្ម ធានាចីរភាពនៃការអភិវឌ្ឍផលិតកម្មកសិកម្ម។ “ខ្ញុំមានសុទិដ្ឋិនិយមថា មូលដ្ឋានគ្រឹះសេដ្ឋកិច្ចរបស់យើងនៅតែមានលក្ខណៈរឹងមាំ ដោយយើងរំពឹងថា សេដ្ឋកិច្ចកម្ពុជានឹងមានកំណើនលើសពី ៧% សម្រាប់ឆ្នាំ២០១៤ នេះ និងរយៈពេលមធ្យមខាងមុខ ដោយសារការរីកចម្រើនបន្ថែម ទាំងក្នុងវិស័យកសិកម្ម ថាមពល ហេដ្ឋារចនាសម័្ពន្ធ កំណើនសមត្ថភាពប្រកួតប្រជែងការកែលម្អកិច្ចសម្រួលពាណិជ្ជកម្ម និងបរិយាកាសវិនិយោគ”។

សម្តេចតេជោមានប្រសាសន៍កត់សម្គាល់អំពីការរីកចំរើនលើវិស័យកសិកម្មកម្ពុជា កាលពីឆ្នាំ ២០១៣ កន្លងមកនេះ ដែលក្នុងនោះបរិមាណផលស្រូវសរុបទទួលបាន ៩,៣៨លានតោន និងអាចសល់ស្រូវជាស្បៀងប្រមាណ ៤,៨២លានតោន ឬគិតជាអង្ករសរុបប្រមាណជាង ៣លានតោនថា «ជាជោគជ័យដ៏ធំសម្រាប់កម្ពុជា»។ សម្តេចតេជោមានប្រសាសន៍បញ្ជាក់ថា ចំណុចនេះ បានបង្ហាញឲ្យឃើញយ៉ាងប្រត្យក្សអំពីការខិតខំជំរុញការងារបង្កបង្កើនការស្តារឡើងវិញនូវផ្ទៃដីដែលបានខូចខាតដោយគ្រោះទឹកជំនន់ ទឹកភ្លៀង និងរាំងស្ងួត ការកែសម្រួលហេដ្ឋារចនាសម័្ពន្ធ ក៏ដូចជាការអភិវឌ្ឍប្រព័ន្ធធារាសាស្រ្ត ភាពម្ចាស់ការច្នៃប្រឌិតរបស់ប្រជាកសិករលើការងារគ្រប់គ្រងស្រែចម្ការ ការរៀបចំសហគមន៍កសិកម្ម ការផ្លាស់ប្តូរពូជដែលមានទិន្នផលខ្ពស់ជាដើម។ យើងអាចវាយតម្លៃបានថា ផលិតផលស្រូវរបស់យើងពីមួយឆ្នាំ ទៅមួយឆ្នាំមានការកើនឡើងគួរឲ្យកត់សម្គាល់ ពិសេសក្នុងអំឡុងពេល ២ទសវត្សរ៍ ចុងក្រោយនេះ ហើយផលិតកម្មកសិកម្មស្រូវនៅតែជាផលិតកម្មចម្បងមួយសម្រាប់ទ្រទ្រង់ជីវភាពប្រជាជននៅជនបទក្នុងប្រទេសកម្ពុជា និងការនាំចេញ ដើម្បីកំណើនសេដ្ឋកិច្ច។

ក្រៅពីដំណាំស្រូវសម្តេចតេជោបានលើកសរសើរ ក្រសួងកសិកម្ម រុក្ខាប្រមាញ់ និងនេសាទដែលបានជំរុញផលិតកម្មកសិកម្ម លើគ្រប់មុខព្រួញ ពិសេសការបង្កបង្កើនផលដំណាំជាយុទ្ធសាស្រ្ត មានជាអាទិ៍ ដំណាំកៅស៊ូ ដែលកំពុងមានសន្ទុះ គួរឲ្យចាប់អារម្មណ៍ និងដំណាំឧស្សាហកម្មផ្សេងៗទៀត ក៏ដូចជា ការចិញ្ចឹមសត្វ និងវារីវប្បកម្ម ដែលកិច្ចការនេះមិនត្រឹមតែអាចឆ្លើយតបបានទៅនឹងតម្រូវការស្បៀងក្នុងស្រុកប៉ុណ្ណោះទេ ប៉ុន្តែថែមទាំងអាចនៅសល់សម្រាប់ការនាំចេញទៀតផង។

សម្តេចតេជោនាយករដ្ឋមន្រ្តីបានអំពាវនាវ ចំពោះក្រសួងស្ថាប័នពាក់ព័ន្ធរដ្ឋបាល ថ្នាក់ក្រោមជាតិ កងកម្លាំងប្រដាប់អាវុធ ដៃគូអភិវឌ្ឍន៍ អង្គការជាតិ អន្តរជាតិ និងវិស័យឯកជន សូមបន្តចូលរួមតាមគ្រប់រូបភាពក្នុងការជួយដល់កសិករ និងការងារអភិវឌ្ឍន៍វិស័យកសិកម្មជាតិឲ្យមានការរីកចម្រើនជាលំដាប់ ដែលនឹងរួមចំណែកសំខាន់ក្នុងការធ្វើសមាហរណកម្មក្នុងសហគមន៍សេដ្ឋកិច្ចអាស៊ាននាឆ្នាំ២០១៥ ខាងមុខនេះ។

ថ្លែងក្នុងសន្និបាតប្រចាំឆ្នាំរបស់ក្រសួងកសិកម្ម រុក្ខា ប្រមាញ់ និងនេសាទសម្ដេចអគ្គមហាសេនាបតីតេជោ ហ៊ុន សែន ក៏បានរំលឹកឡើងវិញអំពីលុបចោលនូវគម្រោងវិនិយោគដីសម្បទានណា ដែលមិនគោរពកិច្ចសន្យាផងដែរ ដោយសម្តេចបានបញ្ជាឲ្យក្រសួង ស្ថាប័នពាក់ព័ន្ធត្រូវចាត់វិធានការឲ្យបានម៉ឺងម៉ាត់ ចំពោះគម្រោងវិនិយោគទាំងឡាយណា ដែលមិនគោរពតាមកិច្ចសន្យា ដោយការដាក់ពិន័យ ឬលុបចោលការលើកទឹកចិត្ត ឬលុបកិច្ចសន្យាសម្បទានក្នុងករណីធ្ងន់ធ្ងរ ដើម្បីដកដីសម្បទានសេដ្ឋកិច្ចនោះ បង្វែរទៅប្រើប្រាស់ជាដីសម្បទានសង្គមកិច្ចវិញ។

សម្ដេចតេជោមានប្រសាសន៍រំលឹកជាថ្មីទៀតអំពីបទបញ្ជារឲ្យបញ្ឈប់ការកាប់ព្រៃរំលោភយកដីធ្វើកម្មសិទ្ធិថា “ត្រូវបញ្ឈប់ជាដាច់ខាតការកាប់រាន ដុត ហ៊ុំព័ទ្ធ រំលោភយកដីព្រៃឈើធ្វើជាកម្មសិទ្ធិ ដែលបានកើតឡើងក្រោយថ្ងៃទី៧ ខែឧសភា ឆ្នាំ២០១២ បើមិនដូច្នេះទេត្រូវទទួលទោសតាមច្បាប់ស្ដីពីព្រៃឈើ”។ ទន្ទឹមនឹងនេះក៏ត្រូវបន្តអនុវត្តន៍ឲ្យមានប្រសិទ្ធភាពនូវបទបញ្ជា ដែលខ្ញុំបានដាក់នាពេលថ្មីៗនេះ អំពីការបង្ក្រាបបទល្មើសព្រៃឈើគ្រប់ប្រភេទ។ ជាមួយនេះក្រសួងស្ថាប័នពាក់ព័ន្ធ ពិសេសក្រុមប្រឹក្សាអភិវឌ្ឍន៍កម្ពុជា ក្រសួងសេដ្ឋកិច្ច និងហិរញ្ញវត្ថុត្រូវបន្តចុះពិនិត្យផ្ទៀងផ្ទាត់ជាប់ប្រចាំ ចំពោះសកម្មភាពវិនិយោគរបស់ក្រុមហ៊ុននានា ដែលទទួលបានដីសម្បទាន ដើម្បីធានាដល់កិច្ចដំណើរការវិនិយោគ ទប់ស្កាត់នូវភាពអសកម្មផ្សេងៗ ដែលអាចកើតមានទាក់ទងនឹងដីសម្បទាននេះ រួមទាំងការបង់ថ្លៃសម្បទានដី និងកម្រៃសួយសារផ្សេងៗជូនរដ្ឋតាមកិច្ចសន្យា។

បន្ថែមលើនេះត្រូវបន្តជំរុញកំណែទម្រង់ព្រំប្រទល់ដែនព្រៃឈើ ធ្វើចំណាត់ការ និងចុះបញ្ជីសម្បត្តិព្រៃឈើអចិន្ត្រៃយ៍ និងការបន្តកំណត់តំបន់ព្រៃឈើរិចរិល ដើម្បីស្ដារព្រៃដាំដុះឲ្យក្លាយជាតំបន់ព្រៃឈើមានតម្លៃឡើងវិញ។

នៅក្នុងពិធីបិទសន្និបាតបូកសរុបការងារកសិកម្ម រុក្ខាប្រមាញ់ និងនេសាទ ឯកឧត្តម អ៊ុក រ៉ាប៊ុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានរាយការណ៍ឲ្យដឹង ថា ការបង្កបង្កើនផលស្រូវឆ្នាំ២០១៣ កន្លងមក នៅទូទាំងប្រទេសអនុវត្តន៍បាននៅលើផ្ទៃដីចំនួន ៣,០៥២ លានហិកតាកើនឡើងចំនួន ១,៤៩% នៃផ្ទៃដីធៀបនឹងឆ្នាំ២០១២។ តែដោយសារគ្រោះរាំងស្ងួតនៅដើមរដូវ និងគ្រោះទឹកជំនន់ធ្ងន់ធ្ងរនៅខេត្តចំនួន១៩ ទូទាំងប្រទេស គួបផ្សំនឹងការបំផ្លាញដោយសត្វល្អិតផង ផ្ទៃដីដំណាំស្រូវដែលត្រូវប្រមូលផលនៅសល់ត្រឹមតែ ២,៩៦ លានហិកតាប៉ុណ្ណោះ និងទទួលផលិតផលស្រូវសរុបបានចំនួន ៩,៣៨ លានតោន (ទិន្នផលជាមធ្យមប្រចាំឆ្នាំគឺមាន ៣,១៦តោនក្នុងមួយហិកតា) បើប្រៀបធៀបឆ្នាំ២០១២ គឺកើនលើសចំនួនជាង៩២ម៉ឺនតោន។

ឯកឧត្តមរដ្ឋមន្រ្តីបានឲ្យដឹងថា ជាក់ស្តែងផ្ទៃដីដំណាំស្រូវវស្សាអនុវត្តន៍បានចំនួន ២,៥៦៧ ហិកតាធៀបនឹងឆ្នាំ២០១២ កើនឡើង ៧%។ ប៉ុន្តែផ្ទៃអាចប្រមូលផលបានមានត្រឹមតែ ២,៤៨៥លានហិកតាប៉ុណ្ណោះ ដោយទទួលផលស្រូវបានចំនួន ៧,២៧១ លានតោន (ទិន្នផលជាមធ្យម ២,៩២៥តោនក្នុងមួយហិកតា)។ រីឯផ្ទៃដីស្រូវប្រាំងអនុវត្តន៍បានចំនួន ៤៨៤.៦៩៧ ហិកតាបើធៀបនឹងឆ្នាំ២០១២ កើនលើស ២៦,៣៤% និងទទួលផលស្រូវបានចំនួន ២,១១៨ លានតោន (ទិន្នផលជាមធ្យម ៤,៣៨៣តោន ក្នុងមួយហិកតា)។

ដូច្នេះតាមការវាយតម្លៃតុល្យភាពស្បៀងឆ្នាំ២០១៣ បានបង្ហាញឲ្យឃើញថា ផលិតផលស្រូវមានអតិរេកចំនួន ៤,៨២ លានតោនគឺកើនលើស ១,៩៦% បើធៀបនឹងឆ្នាំ ២០១២ ហើយបើគិតជាអង្ករគឺមានចំនួន ៣,០៨លានតោន។ ក្រៅពីដំណាំស្រូវ ក៏មានដំណាំរួមផ្សំ និងដំណាំកសិឧស្សាហកម្មផ្សេងៗ រួមមានៈ ដំឡូងមី ពោត សណ្តែក អំពៅ ថ្នាំជក់..។ល។ បានដាំដុះនៅលើផ្ទៃដីជាង ៩៤១.០០០ហិកតា ដោយទទួលបានផលសរុបជាង ១០,៥៤០ លានតោន គឺកើនឡើងប្រមាណ ១៣,៦៧% ធៀបនឹងឆ្នាំ ២០១២៕

សារលិខិតជូនពរសម្តេចអគ្គមហាសេនាបតីតេជោ ហ៊ុន សែន, នៅក្នងឱកាសបុណ្យខួបកំណើតគម្រប់ខួបកំណើតគម្រប់ ៦៣ឆ្នាំ ឈានចូល ៦៤ឆ្នាំ ថ្ងៃទី ០៤ ខែ មេសា ឆ្នាំ២០១៤

Sunday, March 30, 2014

ពិធីសន្និបាតបូកសរុបការងារ កសិកម្មរុក្ខាប្រមាញ់ និងនេសាទឆ្នាំ ២០១៣-២០១៤ និង លើកទឹសដៅការងារ ឆ្នាំ ២០១៤ - ២០១៥

ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា

Friday, March 28, 2014

សាលារាជធានីភ្នំពេញ ជម្រាបជូនគណបក្សសង្រ្គោះជាតិ ស្តីពីសំណើរសុំរៀបចំបង្សុកូល នៅចេតីយទល់មុខអតីតមន្ទីរដ្ឋសភាជាតិ ថ្ងៃទី៣០ មីនា ២០១៤

សាលារាជធានីភ្នំពេញ ជម្រាបជូនគណបក្សសង្រ្គោះជាតិ ស្តីពីសំណើរសុំរៀបចំសមាជមហាជននៅទីលានប្រជាធិបតេយ្យ ថ្ងៃទី៣០ មីនា ២០១៤

រដ្ឋមន្ត្រីការបរទេសសាធារណរដ្ឋបេឡារុសចាប់អារម្មណ៍ការរីកចំរើននៅកម្ពុជា

ឯកឧត្ដម Vladimir MAKEI រដ្ឋមន្ត្រីការបរទេសនៃសាធារណរដ្ឋបេឡារុស ក្នុងឱកាសចូលជួបសម្ដែងការគួរសម ជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៧ ខែមីនា ឆ្នាំ២០១៤ នៅវិមានសន្តិភាព បានសម្តែងការចាប់អារម្មណ៍យ៉ាងខ្លាំងចំពោះការរីកចំរើន និងកំណើនសេដ្ឋកិច្ចយ៉ាងខ្លាំងនៅកម្ពុជា។

ឯកឧត្តម អ៊ាង សុផល្លែត ជំនួយការសម្ដេចតេជោបានឲ្យដឹងថា ឯកឧត្ដម Vladimir បាន ជម្រាបជូនសម្ដេចតេជោថា នេះគឺជាលើកទីមួយហើយដែលឯកឧត្ដមបានមកកាន់ព្រះរាជាណាចក្រកម្ពុជា ហើយមានចំណាប់អារម្មណ៍យ៉ាងខ្លាំងចំពោះកំណើនសេដ្ឋកិច្ច ជោគជ័យ និងការអភិវឌ្ឍន៍របស់កម្ពុជាលើគ្រប់វិស័យ រួមទាំងវិស័យកសិកម្មផងដែរ។ វត្តមានរបស់ឯកឧត្ដមនៅកម្ពុជា ជាមួយ នឹងការបើកសម្ពោធរោងចក្រដំឡើងត្រាក់ទ័រនៅកម្ពុជានេះ គឺជាការចាប់ផ្ដើមនូវទំនាក់ទំនងរវាងកម្ពុជា និងបេឡារុស ដែលការចាប់ផ្ដើមនេះមានសក្ដានុពលយ៉ាងខ្លាំង។ ទាក់ទងនឹងបញ្ហានេះ ឯកឧត្ដម Vladimir បានមានប្រសាសន៍ថា ប្រទេសយើងទាំងពីរមានសក្ដានុពលបំពេញឲ្យគ្នាទៅវិញទៅមក ដែលក្នុងនោះកម្ពុជាមានផលិតផលកសិកម្មច្រើន និងល្អ ដោយឡែកបេឡារុសមានគ្រឿងចក្រកសិកម្ម ដែលអាចជួយបំពេញឲ្យគ្នាដើម្បីបម្រើ និងជំរុញការអភិវឌ្ឍន៍លើវិស័យកសិកម្មនេះ។

ដោយបានជម្រាបរាយការណ៍ជូនសម្ដេចតេជោនាយករដ្ឋមន្ត្រី អំពីការចូលរួមកាលពីព្រឹកថ្ងៃដដែល ដើម្បីសម្ពោធដាក់ឲ្យប្រើប្រាស់នូវរោងចក្រដំឡើងត្រាក់ទ័រនៅកម្ពុជា ដែលមានម៉ូដែលខុសៗគ្នា ដែលត្រាក់ទ័រនេះ គឺមិនគ្រាន់តែសម្រាប់បម្រើតែទីផ្សារកម្ពុជាទេ គឺនឹងត្រូវយកទៅបម្រើក្នុងទីផ្សារប្រទេសជិតខាង ឬក្នុងតំបន់ដែរនោះ ឯកឧត្ដម Vladimir រដ្ឋមន្ត្រីការបរទេសនៃសាធារណរដ្ឋបេឡារុស បានមានប្រសាសន៍បញ្ជាក់ថា កម្ពុជា គឺជាប្រទេសមួយដែលមានការអភិវឌ្ឍន៍យ៉ាងជឿនលឿន ហើយបេឡារុសបានពិចារណាហើយថា កម្ពុជាគឺជាដៃគូដ៏ល្អសម្រាប់សហការជាមួយបេឡារុស។

សម្ដេច តេជោនាយករដ្ឋមន្ត្រីបានសម្តែងនូវការពេញចិត្តចំពោះទស្សនវិស័យ នៃទំនាក់ទំនងកម្ពុជា និងបេឡារុស ជាពិសេសផ្ដោតលើការយកចិត្តទុកដាក់ទៅលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍នេះ។ ឯកឧត្តម អ៊ាង សុផល្លែត បានឲ្យដឹងថា សម្ដេចបានមានប្រសាសន៍យល់ស្របជាមួយ ឯកឧត្ដម Vladimir ដែលថា ប្រទេសយើងទាំងពីរគឺបំពេញឲ្យគ្នាទៅវិញទៅមក មិនមែនជា ប្រទេស ដែលប្រកួតប្រជែងគ្នានោះទេ។ កម្ពុជាកំពុងតែផ្ដោតការយកចិត្តទុកដាក់ទៅលើ វិស័យកសិកម្ម នៅពេលដែលបេឡារុសមានគ្រឿងចក្រកសិកម្ម ដែលយើងអាចសហការគ្នា បានយ៉ាងល្អប្រសើរ៕

សម្តេចតេជោអំពាវនាវដល់ពលរដ្ឋខ្មែរទាំងអស់ត្រូវរួបរួម និងឯកភាពជាតិ

នៅក្នុងឱកាសអញ្ជើញជាអធិបតីសម្ពោធដាក់ឲ្យដំណើរការវារីអគ្គិសនីស្ទឹងអាតៃ និងខ្សែបណ្តាញបញ្ជូនអគ្គិសនីភ្នំពេញ កំពង់ឆ្នាំង ពោធិ៍សាត់ បាត់ដំបង នាព្រឹកថ្ងៃទី២៧ ខែមីនា ឆ្នាំ២០១៤ សម្តេចអគ្គមហាសេនាបតីតេជោ ហ៊ុន សែន បានប្រកាសឲ្យដឹងថា សម្តេចគាំទ្ររាល់ការបញ្ចេញមតិ ប៉ុន្តែមិនមែនជាការបញ្ចេញមតិ ដែលនាំឲ្យប្រទេសជាតិមានសង្គ្រាមនោះទេ។ សម្តេចតេជោក៏បានអំពាវនាវដល់ពលរដ្ឋខ្មែរទាំងអស់ត្រូវ រួបរួមឯកភាពជាតិ ពិសេសអ្នកនៅមូលដ្ឋានកុំឲ្យមានទំនាស់នឹងគ្នា ដោយសារតែការបែងចែកគណបក្សនយោបាយនៅក្រោយការបោះឆ្នោតនៅពេលនេះ។

សម្តេចតេជោនាយករដ្ឋមន្ត្រីបានមានប្រសាសន៍គូសបញ្ជាក់ថា សូមបញ្ចេញមតិចុះ ប៉ុន្តែកុំនាំគ្នាបង្កើតសង្គ្រាម។ យើងបង្រួបបង្រួម ជាតិនៅគ្រប់ពណ៌សម្បុរ កម្លាំងប្រដាប់អាវុធ ៤ភាគីច្បាំងគ្នា មកនៅក្រោមរដ្ឋធម្មនុញ្ញតែមួយ ព្រះមហាក្សត្រតែមួយ នីតិប្បញ្ញត្តិតែមួយ នីតិប្រតិបត្តិតែមួយ និងកម្លាំងប្រដាប់អាវុធតែមួយ ពីប្រទេសមួយតំបន់ត្រួតត្រាច្រើន ទៅជាប្រទេសមួយ ដែលមានតំបន់ត្រួតត្រាតែមួយដែលនេះមិនមែនជាការងាយស្រួលទេ ។ យើងបានយកជីវិតធ្វើដើមទុន ដើម្បីធ្វើឲ្យប្រទេសមានការបង្រួបបង្រួមគ្នាបែបនេះ ហើយការបង្រួបបង្រួម និងសន្តិភាពនោះ ហើយដែលផ្តល់ឱកាសឲ្យយើងបានអភិវឌ្ឍន៍ដូចសព្វថ្ងៃនេះ ។ សម្តេចតេជោបានថ្លែងថា កម្ពុជាជាប្រទេសរបស់ប្រជាជនកម្ពុជា មិនមែនជាប្រទេសរបស់អ្នកណាម្នាក់ទេ ហើយចាប់ប្រទេសធ្វើជាចំណាប់ខ្មាំងក៏អត់បានដែរ។

សម្តេចតេជោមានប្រសាសន៍អំពាវនាវថា កុំនាំគ្នាបង្កើតសង្គ្រាមព្រោះសង្គ្រាមតែកើត ហើយមិនងាយរំលត់ទេ ។ សង្គ្រាមធ្វើឲ្យវាកើតគឺងាយទេ ប៉ុន្តែរំលត់វាទើបជាការលំបាក។ ឥឡូវនេះទើបតែរំលងទៅប៉ុន្មានថ្ងៃប៉ុណ្ណោះនៃខួប ៤៤ ឆ្នាំ នៃរដ្ឋប្រហារទម្លាក់សម្តេចព្រះ នរោត្តម សីហនុ ព្រះបិតាជាតិរបស់យើង (១៨ មីនា ១៩៧០-១៨មីនា ២០១៤) ដែល បង្កើតឡើងនូវសង្គ្រាម។ ទាក់ទងនឹងការធ្វើរដ្ឋប្រហារកាលពីឆ្នាំ១៩៧០ សម្តេចតេជោបានមានប្រសាសន៍ថា ការសម្រេចចិត្តតាមរបៀប លន់ នល់ សិរិមតៈ ចេង ហេង អ៊ិន តាំ ធ្វើតែមួយភ្លែត ប៉ុន្តែផលវិបាករបស់វាធ្វើឲ្យយើងដោះស្រាយ មិនទាន់ចប់ទេ ដូចជាបញ្ហាមីនក្រោមដី ផលវិបាកនៃជនពិការ ស្ត្រីមេម៉ាយ និងកុមារកំព្រា ជាដើមវាមិនទាន់ចប់ទេ ។

ទាក់ទងនឹងបរិយាកាសនយោបាយនៅកម្ពុជា សម្តេចតេជោក៏បានគូសបញ្ជាក់ផងដែរថា នៅពេលនេះនៅកម្ពុជាទោះជានរណានិយាយអីនិយាយទៅ ប៉ុន្តែពេលនេះកម្ពុជាមានស្ថិរភាពនយោបាយ និងស្ថិរភាពសង្គម ហើយស្ថាប័នរដ្ឋគ្រប់ជាន់ថ្នាក់នៅដំណើរការធម្មតា ហើយសាលារៀន និងមន្ទីរពេទ្យជា ដើម ដំណើរការជាធម្មតា។

ក្នុងពិធីសម្ពោធវារីអគ្គិសនីស្ទឹងអាតៃ ដែលមានប្រជាពលរដ្ឋ ចូលរួមជាង១ម៉ឺននាក់សម្តេចតេជោនាយករដ្ឋមន្ត្រីមានប្រសាសន៍ថា សូមបងប្អូនប្រជាពលស្វែងយល់ដោយខ្លួនឯងចុះក្រុមប្រឆាំងបានទៅចលនា នៅឯបរទេសថា សូមកុំមកវិនិយោគ និងកុំមកទិញទំនិញស្រុកខ្មែរ នៅពេលដែលរាជរដ្ឋាភិបាលបានខិតខំទាក់ទាញវិនិយោគ ។ ឥឡូវនេះសល់តែមនុស្ស ២ក្រុមទេ មួយក្រុមថាកុំមកវិនិយោគនៅស្រុកខ្មែរ ហើយមួយក្រុមទៀតថា ត្រូវតែមកវិនិយោគ ហើយក្រុមដែលថាឲ្យបរទេសមកវិនិយោគនៅស្រុកខ្មែរបានទទួលជោគជ័យ ហើយជាក់ស្តែងថ្ងៃនេះក្រុមហ៊ុនចិនដែលមកវិនិយោគបានសម្ពោធវារី អគ្គិសនី ដែលមានកម្លាំងដល់ទៅ ១២០ មេហ្គាវ៉ាត់ ហើយក៏មានក្រុមហ៊ុនជាច្រើនគ្រោងហ្នឹងមកទៀតដែរ។

សម្តេចអគ្គមហាសេនាបតីតេជោ ហ៊ុន សែន មានប្រសាសន៍បញ្ជាក់ថា ការពិតអ្នកដែលសម្លាប់ប្រជាជនមិនមែនរាជរដ្ឋាភិបាលទេ ព្រោះរាជរដ្ឋាភិបាលបាននិងកំពុងប្រឹងប្រែងដើម្បីធ្វើយ៉ាងណាដោះស្រាយ បញ្ហាទឹក បញ្ហាផ្លូវ បញ្ហាភ្លើង បញ្ហាមនុស្ស បញ្ហាសន្តិភាព និងបញ្ហាស្ថិរភាពនយោបាយ។ សម្តេចតេជោនាយករដ្ឋមន្ត្រីបានផ្តល់ជាអនុសាសន៍ថា ការធ្វើសកម្មភាពអ្វីក៏ដោយត្រូវគោរពច្បាប់ ហើយសូមកុំឲ្យហួសពីក្របខណ្ឌច្បាប់នោះ។

ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល មានប្រសាសន៍ឲ្យដឹងថា គម្រោងវារីអគ្គិសនីស្ទឹងអាតៃ គឺជាគម្រោងមួយស្ថិតនៅតំបន់ត្រីកោណនៃខេត្តកំពង់ស្ពឺ កោះកុង ពោធិ៍សាត់ ដែលមានស្ថានីយក្នុងឃុំអូរសោម ស្រុកវាលវែង ខេត្តពោធិសាត់ ក្នុងចំងាយប្រមាណ ១៧៥ គីឡូម៉ែត្រពីទីរួមខេត្តពោធិសាត់។

ជារៀងរាល់ឆ្នាំស្ទឹងអាតៃមានផ្ទៃរងទឹកភ្លៀង ៥៩០គីឡូម៉ែត្រក្រឡា ដែលអាចត្រង់យកទឹកភ្លៀងប្រមាណ៥១០លានម៉ែត្រគីប ដែលបរិមាណទឹក នេះ បានហូរចូលក្នុងសមុទ្រដោយពុំមានប្រើប្រាស់អ្វីទេ ដោយឃើញស្ថានភាពធម្មជាតិ និងភូមិសាស្ត្រ របស់ស្ទឹងនេះ អាចផ្តល់លទ្ធភាពឲ្យយើងសាងសង់ជាទំនប់ ដើម្បីស្តុកទឹក បង្កើតជាវារីអគ្គិសនីមួយយ៉ាងប្រសើរ ដែលមានឈ្មោះថា ទំនប់វារីអគ្គិសនីស្ទឹងអាតៃ។

យោងតាមកិច្ចព្រមព្រៀងគម្រោង វារីអគ្គិសនីស្ទឹងអាតៃ មានទំហំវិនិយោគសរុបមានចំនួនជាង២៥៥លាន ក្នុងនោះទំហំវិនិយោគសំរាប់វារីអគ្គិសនីស្ទឹងអាតៃមានចំនួនជិត ២០០ លានដុល្លារ និងសម្រាប់អនុស្ថានីយ៍រួមអូរសោម និងខ្សែបណ្តាញបញ្ជូនទៅអនុស្ថានីយពោធិសាត់មានចំនួនជាង ៥៥ លានដុល្លារអាមេរិក ក្រោមរូបភាពសាងសង់ ដំណើរការ និងផ្ទេរ (BOT) ។ ដោយឡែកគម្រោង ខ្សែបណ្តាញបញ្ជូនភ្នំពេញ កំពង់ឆ្នាំង ពោធិសាត់ បាត់ដំបង ត្រូវបានវិនិយោគក្នុងទំហំទឹកប្រាក់ ប្រមាណជាង ១១៣ លានដុល្លារអាមេរិក ដែលមានរយៈពេលសម្បទាន ២៧ ឆ្នាំ ក្នុងនោះ ២ ឆ្នាំសម្រាប់ធ្វើការសាងសង់ និង ២៥ ឆ្នាំសម្រាប់ធ្វើអាជីវកម្ម។

គម្រោងវារីអគ្គិសនីនេះ មានលទ្ធភាព ផលិតអគ្គិសនី ជាមធ្យមប្រចាំឆ្នាំមានចំនួន ៤៦៥ លានគីឡូវ៉ាត់ក្នុងមួយឆ្នាំ ហើយតម្លៃថាមពល អគ្គិសនីមូលដ្ឋាន ដែលត្រូវលក់នោះមានចំនួន៧,១៤សេនក្នុយមួយគីឡូវ៉ាត់ម៉ោង ក្នុងនោះ ៥,៨សេន គឺថ្លៃផលិត ដោយវារីអគ្គិសនី និង១,៣៤សេនក្នុងមួយគីឡូវ៉ាត់ម៉ោង គឺជាថ្លៃរំលោះលើការវិនិយោគ ខ្សែបណ្តាញ បញ្ជូនភ្ជាប់មកអនុស្ថានីយ៍ពោធិសាត់។ វារីអគ្គិសនីស្ទឹងអាតៃបានបើកការដ្ឋានសាង សង់កាលពីថ្ងៃ ១០ វិច្ឆិកា ២០០៩ និងបញ្ចប់ការសាងសង់ ព្រមជាមួយ នឹងការធ្វើអាជីវកម្មជាធរមាន នៅថ្ងៃទី ០១ កញ្ញា ២០១៣ ពោលសាងសង់រួចរាល់មុនការកំណត់៦ខែ៕

បទអត្ថាធិប្បាយ ដោយ ពង្ស សុក្រឹត្យ «កលល្បិចថ្មីក្នុងការធ្វើឱ្យមានការជាប់គាំងនយោបាយនៅកម្ពុជា»

បទអត្ថាធិប្បាយ

ពង្ស សុក្រឹត្យ

កលល្បិចថ្មីក្នុងការធ្វើឲ្យមានការជាប់គាំងនយោបាយនៅកម្ពុជា

ការលើកឡើងអំពីប្រធានបទថ្មីរបស់លោក សម រង្ស៊ី និងលោក កឹម សុខា ដើម្បីទាមទារឲ្យស្ថាប័នគណៈកម្មាធិការជាតិរៀបចំការបោះឆ្នោត ( គ ជ ប ) ទៅជាស្ថាប័នធម្មនុញ្ញ និងការទាមទារឲ្យមានការអនុម័តសមាសភាព គ ជ ប ដោយសំឡេង២ភាគ៣នៃសមាជិកដែលមានក្នុងរដ្ឋសភា គឺជាសញ្ញា នៃការចង់ឲ្យប្រទេសកម្ពុជា ធ្លាក់ទៅរកភាពជាប់គាំងខាងនយោបាយ សារជាថ្មី ដូចបទពិសោធន៍ដ៏ជូរចត់ កាលពីទស្សវត្សឆ្នាំ១៩៩៣ ឆ្នាំ១៩៩៨ និងឆ្នាំ២០០៣ យ៉ាងពិតប្រាកដ។

បើក្រឡេកមើលទៅអតីតកាល រដ្ឋធម្មនុញ្ញឆ្នាំ១៩៩៣ គឺតម្រូវឲ្យមានការអនុមត្តិច្បាប់ និងរាល់ឯកសារគតិយុត្តិផ្សេងៗ ដោយសម្លេង២/៣ នៃសមាជិករដ្ឋសភា។ នៅក្នុងដំណាក់កាលនោះ រាល់ដំណើរការអនុមត្តិច្បាប់តែងតែជួបប្រទះនូវវិបត្តិនយោបាយជាញឹកញាប់ ជាពិសេសគឺវិបត្តិនៃការខ្វះកូរ៉ុមក្នុងកិច្ចប្រជុំម្តងៗ។ គណបក្សដែលមានសម្លេងភាគ តិចនៅក្នុងរដ្ឋសភា តែងតែយកគណបក្សឈ្នះឆ្នោតដែលមានសម្លេងភាគច្រើនជាចំណាប់ខ្មាំង ដើម្បីផលប្រយោជន៍នយោបាយរបស់បក្សខ្លួនជានិច្ច។

ជាក់ស្តែង កាលណោះ គណបក្ស សម រង្ស៊ី ដែលជាគណបក្សតូចតាចមួយ មានការបែកបាក់ជាមួយគណបក្ស ហ៊្វុនស៊ីនប៉ិច ដែលដឹកនាំដោយទ្រង់រណឬទ្ធិ ។ ដោយសារគណបក្សខ្លួន មិនបានទទួលផលប្រយោជន៍ពីការអនុមត្តិច្បាប់ដោយសម្លេង២/៣នេះ និងដោយសារលោក សម រង្ស៊ី ចង់រំសាយកំហឹងជាមួយទ្រង់រណឬទ្ធិផង ទើបកាលពីថ្ងៃទី១៣ ខែកុម្ភៈ ឆ្នាំ២០០៦ គឺលោក សម រង្ស៊ី ខ្លួនឯងផ្ទាល់ បានធ្វើសំណើ ទៅប្រធានរដ្ឋសភា ក្នុងអាណត្តិរបស់ទ្រង់រណឬទ្ធិ ជាប្រធានរដ្ឋសភា ដើម្បីធ្វើវិសោធនកម្មរដ្ឋធម្មនុញ្ញពីមតិ២/៣ ទៅជាការសម្រេចដោយសមាជិកសភា ត្រឹម៥០ បូក១ វិញ។

ចាប់ពីពេលនោះមក វិបត្តិជាប់គាំងនយោបាយដោយសារការខ្វះកូរ៉ុម ត្រូវបានផុតរលត់រហូតមកដល់ពេលបច្ចុប្បន្ននេះ។

ដូច្នេះ ការលើកឡើងនូវរូបមន្តឲ្យស្ថាប័ន គ ជ ប ទៅជាស្ថាប័នរដ្ឋធម្មនុញ្ញ និងទាមទារឲ្យមានការអនុមត្តិសមាសភាព គ ជ ប ដោយសម្លេង២/៣ជាថ្មីនាពេលនេះ របស់គណបក្សសង្គ្រោះជាតិ គឺជាចេតនា ដែលនឹងនាំឲ្យមានការជាប់គាំងខាងនយោបាយ យ៉ាងពិតប្រាកដរបស់គណបក្សសង្គ្រោះជាតិ ហើយទីបំផុត វានឹងនាំដល់ការបរាជ័យក្នុងការចរចា នៃការធ្វើកំណែទម្រង់នៃការបោះឆ្នោតនាពេលខាងមុខ ដែលបានឯកភាពគ្នានៅក្នុងជំនួបកំពូល ជាមិនខាន។ មានន័យថា គណបក្សសង្គ្រោះជាតិ គ្មានឆន្ទៈក្នុងការដោះស្រាយនូវវិបត្តិនយោបាយបច្ចុប្បន្ននេះឡើយ និងបានប្រើនូវល្បិច « ស្វាស៊ីបាយរួច ទៅលាបមាត់ពពែ » ដោយគណបក្សសង្គ្រោះជាតិជាអ្នកលើកបញ្ហាឲ្យជាប់គាំង ហើយទម្លាក់កំហុសមកលើគណបក្សប្រជាជនកម្ពុជា ជាអ្នកដោះស្រាយទៅវិញ។

ម៉្យាងទៀតចំណុច ដែលគណបក្សសង្គ្រោះជាតិ ទាមទារឲ្យដាក់ស្ថាប័នរៀបចំការបោះឆ្នោតជាស្ថាប័នធម្មនុញ ហើយអនុម័តដោយសំឡេង២ភាគ៣នៃសមាជិកដែលមានក្នុងរដ្ឋសភានេះ គឺជាគំនិតដែលអត្តនោម័ត ចាប់បង្ខំភាគីម្ខាងទៀត ឲ្យធ្វើតាមគំនិតរបស់ខ្លួន ព្រមទាំងគម្រាមថានឹងធ្វើមហាបាតុកម្មជាថ្មីទៀត នៅពេលដ៏ខ្លីខាងមុខ ទៀតផង។

ការលើកឡើងបែបនេះ បញ្ជាក់ថា នៅរាល់ពេលដែលមានវត្តមានរបស់ លោក សម រង្ស៊ី នៅក្នុងប្រទេស គឺតែងតែផ្តល់នូវភាពវឹកវរដល់សង្គម តាមរយះការប្រកូកប្រកាសឲ្យមានបាតុកម្ម បង្កនូវចលាចល និងអសន្តិសុខសង្គម ជាដរាប។ ប៉ុន្តែ ការបង្កនូវព្យុះភ្លៀងទាំងនោះ នឹងមិនអាចគេចផុតពីសំណាញ់ច្បាប់ នាពេលណាមួយជាក់ជាមិនខាន។

គណបក្សសង្គ្រោះជាតិ តែងតែប្រកាសហើយប្រកាសទៀតថា ខ្លួននឹងមិនយកខ្មែរណាធ្វើសត្រូវទេ តែធាតុពិត វាគ្រាន់តែជាពាក្យសម្រាប់លួងលោមអ្នកគាំទ្ររបស់ខ្លួន ឲ្យឃើញថា ជាបក្សស្លូតត្រង់មួយតែប៉ុណ្ណោះ។ តាមពិត គោលដៅចុងក្រោយរបស់បក្សប្រឆាំង និងពួកអ្នកនៅពីក្រោយខ្នងគណបក្សនេះមិនមែនត្រឹមតែចង់យកជ័យជម្នះ អោយបានលើគណបក្សប្រជាជនកម្ពុជាដោយប្រើគ្រប់វិធីនោះទេ ប៉ុន្ដែគឺពួកគេមានចេតនាចង់កម្ទេចគណបក្សប្រជាជនកម្ពុជាអោយរលាយសាបសូន្យតែម្ដង។ បើគេឈ្នះឆ្នោតក៏ពួកគេត្រូវតែកម្ទេចតាមវិធីផ្សេង ហើយបើគេចាញ់ឆ្នោតវិញក៏ពួកគេត្រូវតែកម្ទេចអោយបានតាមវិធីផ្សេងមួយទៀតដែរ។

ដូច្នេះរាល់ការប៉ុនប៉ង ក្នុងការផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត គឺជាការដើរផ្ទុយទៅនឹងលទ្ធិប្រជាធិបតេយ្យ សេរីពហុបក្ស ដែលមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។ រាជរដ្ឋាភិបាលមានកាតព្វកិច្ចពេញលេញ ជាអ្នកទទួលខុសត្រូវ ថែរក្សា និងការពារដាច់ខាតនូវរដ្ឋធម្មនុញ្ញ ដើម្បីឧត្តមប្រយោជន៍ជាតិ និងមាតុភូមិ គឺមានសិទ្ធិក្នុងការចាត់វិធានការផ្លូវច្បាប់គ្រប់ពេល ដើម្បីធានាស្ថេរភាពនយោបាយ និងសន្តិសុខជាតិ។ សូមកុំភ្លេចថា « កុកតែងតែភ្លេចជុង រីឯជុងវិញមិនដែលភ្លេចកុកនោះទេ »៕

ពិធីសម្ភោធដាក់ឲ្យដំណើរការវ៉ារីអគ្គិសនី ស្ទឹងអាតៃ និងខ្សែបណ្តាញបញ្ជូន

ពិធីសម្ភោធដាក់ឲ្យដំណើរការវ៉ារីអគ្គិសនី ស្ទឹងអាតៃ និងខ្សែបណ្តាញបញ្ជូន ភ្នំពេញ-កំពង់ឆ្នាំង-ពោធិសាត់ និង បាត់ដំបង ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា

Thursday, March 27, 2014

ទស្សនៈ ដោយ Allen Myers «កម្ពុជាបានឈានដល់ «រដូវឆ្កួតៗ» ហើយ»

ទស្សនៈ

កម្ពុជាបានឈានដល់ «រដូវឆ្កួតៗ» ហើយ

នៅប្រទេសអូស្ដ្រាលី មានកាសែតជាច្រើន បានឲ្យឈ្មោះសប្ដាហ៍ជុំវិញបុណ្យណូអែល និងជុំវិញបុណ្យឆ្នាំថ្មីសកល ថាជា «រដូវឆ្កួតៗ» ៖ ព្រោះថា ប្រជាជនគេបានរវល់ណាស់នៅក្នុងរដូវវិសមកាលនេះ ហើយគេពុំរវល់នូវព័ត៌មានសំខាន់ៗណានោះទេ។ គឺជារដូវប្រចាំឆ្នាំ ដែលគេរវល់នឹងស៊ីចុក និងជួបជុំគ្នា។

បើគេមើលទៅហាក់ដូចឃើញថាកម្ពុជាកំពុងតែឈានជើងដល់ «រដូវឆ្កួតៗ» របស់ខ្លួន ដែលគេកំពុងឆ្ពោះទៅរដូវចូលឆ្នាំថ្មី។ នេះគឺបានបង្ហាញជាក់ស្ដែងយ៉ាងសាមញ្ញ រឿងរ៉ាវដែលលេចចេញក្នុងទំព័រកាសែត Cambodia Daily និងទំព័រកាសែត Phnom Penh Post ចុះផ្សាយកាលពីថ្ងៃសុក្រកន្លងទៅ។ កាសែតទាំងនេះ បានផ្សាយថា មាន “អង្គការសិទ្ធិមនុស្សមួយក្រុម” ដែលមិនបញ្ចេញឈ្មោះ ហើយនិងបុគ្គលមួយចំនួន បានចុះឈ្មោះប្ដឹងទៅតុលាការព្រហ្មទណ្ឌអន្ដរជាតិ (ICC) ចោទប្រកាន់នាយករដ្ឋមន្ដ្រី ហ៊ុន សែន ពីបទប្រល័យពូជសាសន៍ និងបទឧក្រិដ្ឋផ្សេងៗទៀត។

លោក Morton Sklar ដែលជាមេធាវីតំណាងឲ្យដើមចោទ ដែលគេបានដកស្រង់សម្ដីរបស់គាត់ និយាយថា៖ “ដែលគេបានចោទអំពីបទប្រល័យពូជសាសន៍នោះ គឺគេបានផ្អែកទៅលើការខិតខំប្រឹងប្រែងរបស់ លោក ហ៊ុន សែន ក្នុងការលូកដៃចូលទៅក្នុងដំណើរការ នៃការប្រព្រឹត្តទៅរបស់តុលាការកាត់ទោសមេដឹកនាំខ្មែរក្រហម ហើយនិងបំណងបញ្ឈប់ការស៊ើបអង្កេត និងការចោទប្រកាន់ពីទោសអំពើឃោរឃៅនៃរបបខ្មែរក្រហមកន្លងមក ដើម្បីការពារសមាជិកមួយចំនួនក្នុងរដ្ឋាភិបាល លោក ហ៊ុន សែន ពីការជាប់ទោសឧក្រិដ្ឋ ។ ”

ក្នុងន័យនេះ លោក Sklar និងក្រុមអថិតិជនរបស់គាត់ជាក់ស្ដែងកំពុងមានជំងឺបាត់ការចងចាំ។ វាឆ្ងាយពីការចោទប្រកាន់ ដែលគេថាបានលូកលាន់ទៅនឹងការស៊ើបអង្កេត និងការកាត់ទោសពីបទឧក្រិដ្ឋកម្មនៃរបបខ្មែរក្រហមនោះ លោក ហ៊ុន សែន ប្រហែលជាបានធ្វើអ្វីៗ លើសពីនរណាៗទាំងអស់នៅក្នុងពិភពលោក ដើម្បីរកយុត្តិធម៌ឲ្យអ្នកទាំងនោះ។

នៅឆ្នាំ១៩៩៧ សហនាយករដ្ឋមន្ដ្រី គឺលោក ហ៊ុន សែន និង នរោត្តម រណឫទ្ធិ ជាអ្នកដែលបានសរសេរលិខិតទៅកាន់អង្គការសហប្រជាជាតិ សុំការជួយយ៉ាងណាយកខ្មែរក្រហមទៅកាត់ទោស។

នៅដើមឆ្នាំ២០០២ នៅពេលដែលការិយាល័យទទួលបន្ទុកផ្នែកកិច្ចការច្បាប់របស់អង្គការសហប្រជាជាតិ បានដកខ្លួនចេញពីកិច្ចចរចាគ្នាដើម្បីបង្កើតសាលាក្ដីខ្មែរក្រហមនោះ រដ្ឋាភិបាលរបស់ លោក ហ៊ុន សែន បានប្រឹងប្រែងបន្ដធ្វើកិច្ចការទូត អស់រយៈពេលប្រមាណ១០ខែ ដើម្បីជំរុញឲ្យមានសេចក្ដីសម្រេចនៅមហាសនិ្នបាតអង្គការសហប្រជាជាតិ ដើម្បីតម្រូវឲ្យការិយាល័យទទួលបន្ទុកផ្នែកកិច្ចការច្បាប់នេះ ចូលខ្លួនវិញមកចរចាគ្នាជាមួយនឹងកម្ពុជាដើម្បីរៀបចំបង្កើតសាលាក្ដីមួយនេះ។

ទោះបីកាលដើមឡើយ គេប្រមើលគិតថា សាលាក្ដីនេះនឹងមានរយៈ

ពេលតែ៣ឆ្នាំប៉ុណ្ណោះ តែការពិតការប្រព្រឹត្តិទៅនៃសាលាក្ដីនេះ បានដំណើរការជាង ១ទសវត្សន៍ទៅហើយ រីឯការចំណាយរបស់រដ្ឋាភិបាលកម្ពុជា បានកើនយ៉ាងសន្ធឹកសន្ធាប់ ច្រើនដងហួសពីការគិត។ កម្ពុជា ជាប្រទេសទីបី ដែលបានផ្ដល់ថវិកាច្រើនជាងគេដល់ដំណើរការនៃតុលាការនេះ បើប្រៀបធៀបការផ្ដល់ជំនួយជាថវិកានេះ ទៅនឹងផលិតផលក្នុងស្រុកសរុប (GDP) កម្ពុជាគឺជាប្រទេសផ្ដល់ជំនួយធំជាងគេបង្អស់។

ការខិតខំប្រឹងប្រែងដើម្បីយកមេដឹកនាំខ្មែរក្រហមមកកាត់ទោស មិនមែនទើបតែនឹងចាប់ផ្ដើមនៅឆ្នាំ១៩៩៧ នោះទេ។ នៅថ្ងៃទី១៧ ខែកញ្ញា ឆ្នាំ១៩៨៦ លោក ហ៊ុន សែន បានសរសេរលិខិតផ្ញើជូនអគ្គលេខាធិការអង្គការសហប្រជាជាតិ អំពាវនាវសុំឲ្យមានសាលាក្ដីអន្ដរជាតិសម្រាប់កាត់ទោសខ្មែរក្រហម។ កាលណោះ ការអំពាវនាវនេះ អង្គការសហប្រជាជាតិមិនបានអើពើទេ។ យើងសូមអរគុណណាស់ចំពោះសហរដ្ឋអាមេរិក និងរដ្ឋាភិបាលលោកខាងលិចមួយចំនួនទៀត ដែលបានប្រើឥទ្ធិពលអនុញ្ញាតឲ្យខ្មែរក្រហមនៅកាន់កាប់អាសនៈកម្ពុជានៅអង្គការសហប្រជាជាតិ។ លោក Ronald Reagan បានទទួលអនិច្ចកម្មទៅហើយ ដូច្នេះវាយឺតពេលហើយ ដែលយកលោកទៅកាត់ទោសក្នុងពេលដែលលោកការពាររបបខ្មែរក្រហម ប៉ុន្ដែអនុប្រធានាធិបតីរបស់លោក George H.W Bush នៅរស់នៅឡើយ អញ្ចឹងប្រហែលជាកូនក្ដីរបស់លោក Sklar អាចនឹងកែសម្រួលពាក្យបណ្ដឹងរបស់ពួកគេ រួមបញ្ចូលទាំងរូបលោក Bush ផ្ញើទៅតុលាការ ICC ផងដែរ។ (ពិតណាស់ នេះពិតជាមិនអាចទៅរួចនោះទេ ពីព្រោះសហរដ្ឋអាមេរិកបានរួចខ្លួនពីយុត្តាធិការរបស់តុលាការឧក្រិដ្ឋកម្មអន្តរជាតិ)។

នៅខែសីហា ឆ្នាំ១៩៧៩ រដ្ឋាភិបាលកម្ពុជាដែលមានអាយុកាលទើបតែ៧ខែ ហើយលោក ហ៊ុន សែន ដែលជាសមាជិកមួយរូបដែរនោះ បានដំណើរការការកាត់ទោសជាសាធារណៈទៅលើមេដឹកនាំកំពូលពីរនាក់នៃរបបខ្មែរក្រហម គឺ ប៉ុល ពត និង អៀង សារី។ ការកាត់ទោសនោះ ត្រូវបានធ្វើឡើងដោយកំបាំងមុខ ពីព្រោះជនជាប់ចោទទាំងពីររូបបានរស់នៅដោយសុវត្ថិភាពក្នុងជំរុំតាមបណ្តោយព្រំដែនថៃ ដែលនៅទីនោះលោកខាងលិច និងចិនបានការពារ និងបានផ្ដល់ជំនួយផ្នែកយោធា ដើម្បីអនុញ្ញតឲ្យពួកគេអនុវត្តការលួចវាយឆ្មក់ចូលក្នុងផ្នែកជាច្រើននៃប្រទេសកម្ពុជា។

លើសពីនេះទៀត ប្រសិនបើយើងប្តូរការចាប់អារម្មណ៍ពីការដាក់ទោសលើអំពើឃោរឃៅរបស់ខ្មែរក្រហម ទៅលើអ្វីថា «តើអំពើឃោរឃៅទាំងនេះត្រូវបានចប់ដោយរបៀបណា» នោះ កំណត់ត្រារបស់ សម្ដេច ហ៊ុន សែន ជាថ្មី ម្តងទៀត គឺល្អណាស់។ លោកគឺជាមនុស្សម្នាក់ក្នុងចំណោមប្រជាជនកម្ពុជាមួយចំនួនតូចដែលបានប្រថុយជិវិតក្នុងការកៀងគរ ប្រមូលផ្តុំគ្នាបះបោរប្រឆាំងនឹងរបបខ្មែរក្រហម។ ក្រោយពេលដែលក្រុមនេះទទួលបានជោគ ជ័យ ក្នុងការស្វែងរកជំនួយគាំទ្រពីប្រទេសវៀតណាមក្នុងការផ្តួលរំលំរបបខ្មែរក្រហមនោះពីអំណាច ពួកគេបានបន្តកិច្ចការដ៏លំបាកក្រៃលែងទាំងការកសាង និងការពារប្រទេសពីការ វាយប្រហារដោយសព្វាវុធទំនើបៗរបស់ខ្មែរក្រហមជាបន្ដបន្ទាប់។

ក្រោយអំឡុងឆ្នាំ១៩៩១-១៩៩២ នៅពេលមានអន្តរាគមន៍របស់UNTAC បានធ្វើឲ្យក្រុមយោធាខ្មែរក្រហមពង្រីកប្រតិបត្តិការយោធា នៅក្នុងតំបន់ជនបទជាច្រើននៃប្រទេសកម្ពុជាភាគច្រើននោះ គឺសម្ដេចនាយករដុ្ឋមន្ដ្រី ហ៊ុន សែន ទេ ដែលបានដើរតួនាទីយ៉ាងសំខាន់ក្នុងការរំលាយអង្គការចាត់តាំងនយោបាយ និងយោធារបស់ក្រុមខ្មែរក្រហម ក្រោមការដឹកនាំនយោបាយរបស់លោក ហើយបានបញ្ចប់ទាំងស្រុងនូវវត្តមានប្រកបដោយការគំរាមកំហែងរបស់ពួកនេះ។

ឥឡូវនេះ មនុស្សមួយចំនួន ដែលភាគច្រើនដែលរស់នៅក្នុងសហរដ្ឋអាមេរិកដែល មិនចង់ឲ្យមានសេចក្តីសម្រេចពាក់ព័ន្ធនឹងថាតើត្រូវឲ្យមានសាលាក្តីខ្មែរក្រហម ឬមិនឲ្យមាននោះ បានសម្រេចចិត្តថា សម្ដេច ហ៊ុន សែន កំពុងការពារក្រុមខ្មែរក្រហម។ «ឆ្កួតលីលាបំផុត» ពាក្យនេះហាក់ដូចជាមិនទាន់ខ្លាំងគ្រប់គ្រាន់នៅឡើយទេ៕

ដោយ Allen Myers

http://letters2pppapers.wordpress.com/

សម្តេចតេជោ៖ វារីអគ្គិសនីស្ទឹងអាតៃជាធុងអាគុយរបស់កម្ពុជា

ទំនប់វារីអគ្គិសនីស្ទឹងអាតៃ ដែលមានអានុភាព ១២០មេហ្កាវ៉ាត់ ស្ថិតនៅក្នុងទឹកដីឃុំអូរពាម ស្រុកភ្នំវាលវែង ខេត្តពោធិ៍សាត់ ដែលវិនិយោគសាងសង់ដោយក្រុមហ៊ុន China Datang Corporation (ឆាយណាដាតាំងគ្រុប) នឹងត្រូវសម្ពោធដាក់ឲ្យដំណើរការជាផ្លូវការនាព្រឹក ថ្ងៃទី២៧ ខែមីនា ឆ្នាំ២០១៤ ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រោយពីសាងសង់ចប់មុនផែនការកំណត់រយៈពេល ៦ខែ។ នេះបើតាមការឲ្យដឹងពីឯកឧត្តម អ៊ាង សុផល្លែត ជំនួយការផ្ទាល់សម្តេចតេជោនាយករដ្ឋមន្រ្តី។

ដោយបានចាត់ទុក តំបន់អាតៃថា ជាធុងអាគុយរបស់កម្ពុជា នៅក្នុងឱកាសទទួលជួបសវនាការជាមួយលោក Wang Yeping ប្រធានក្រុមហ៊ុន China Datang Corporation នាព្រឹកថ្ងៃទី២៦ ខែមីនា ឆ្នាំ២០១៤ នៅវិមានសន្តិភាព ទីស្តីការគណៈរដ្ឋមន្ត្រី សម្ដេចតេជោនាយករដ្ឋមន្ត្រី បានកោតសរសើរចំពោះការខិតខំរបស់ក្រុមហ៊ុន China Datang Corporation ដែលបានរួមចំណែកដល់ការអភិវឌ្ឍ នៅក្នុងព្រះរាជាណាចក្រកម្ពុជា តាមរយៈការអភិវឌ្ឍវារីអគ្គិសនីស្ទឹងអាតៃ។

សម្ដេចតេជោនាយករដ្ឋមន្ត្រី មានប្រសាសន៍ថា ជាការពិតណាស់ក្រុមហ៊ុន China Datang Corporation បានចូលរួមចំណែកអភិវឌ្ឍន៍នៅ ក្នុងព្រះរាជាណាចក្រកម្ពុជា ជាពិសេសតាមរយៈការអភិវឌ្ឍវារីអគ្គិសនីស្ទឹងអាតៃ។ សម្ដេចតេជោបន្តថា ពីដើមមកមិនដែលមានការគិតច្រើនទេថា តំបន់អាតៃអាចក្លាយទៅជាធុងអាគុយរបស់កម្ពុជា គឺមានតែអ្នកវិទ្យាសាស្ត្រតែប៉ុណ្ណោះដែលអាចគិតឃើញ ហើយពេលនេះទៀតគម្រោងនេះ ត្រូវបានសាងសង់ចប់មុនកាលកំណត់។ ព្រមជាមួយការកោតសរសើរសម្តេចតេជោនាយករដ្ឋមន្ត្រី ក៏បានស្វាគមន៍ដល់ក្រុមហ៊ុនដាតាំងឱ្យចូលរួមអភិវឌ្ឍន៍លើគម្រោងដទៃទៀតដែលក្រុមហ៊ុន អាចមានលទ្ធភាពជាពិសេសលើវិស័យហេដ្ឋារចនាសម្ព័ន្ធ។

ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឱ្យដឹងថា លោក Wang Yeping ប្រធានក្រុមហ៊ុន China Datang Corporation បានជម្រាបសម្ដេចតេជោថា ក្រុមហ៊ុនរបស់លោក គឺជាក្រុមហ៊ុនមួយស្ថិតក្នុងចំណោមក្រុមហ៊ុនធំៗ ចំនួន៥០០ នៅទូទាំងពិភពលោក។ ក្រុមហ៊ុន China Datang Corporation បានផលិតអគ្គិសនី១២០ លានគីឡូវ៉ាត់ នៅក្នុងប្រទេសចិន ដោយឡែកនៅក្នុងប្រទេសកម្ពុជា ក្រុមហ៊ុនមានគម្រោងចំនួន២ ក្នុងនោះគម្រោងទី១ គឺគម្រោងវារីអគ្គិសនីស្ទឹងអាតៃ។ លោក វ៉ាង យីពីង (Wang Yeping) បន្តថា វត្តមានរបស់លោកមកកាន់កម្ពុជា នៅពេលនេះ គឺដើម្បីចូលរួមពិធីសម្ពោធបើកប្រើប្រាស់វារីអគ្គិសនីស្ទឹងអាតៃ នៅថ្ងៃទី២៧មីនា ដោយវារីអគ្គិសនីស្ទឹងអាតៃនេះ បានសាងសង់ចប់មុនផែនការកំណត់៦ខែ។ លោកប្រធានក្រុមហ៊ុន សង្ឃឹមថា តាមរយៈគម្រោងវារីអគ្គិសនីស្ទឹងអាតៃ នឹងបានចូលរួមចំណែកក្នុងការអភិវឌ្ឍព្រះរាជាណាចក្រកម្ពុជា៕

ឯកឧត្តមបណ្ឌិតសភាចារ្យ សុខ អាន នាំយកថវិការាជរដ្ឋាភិបាលជិត ១លានដុល្លារជូនអត្ថពលិកជ័យលាភីពីព្រឹត្តិការណ៍អន្តរជាតិធំៗចំនួន៦

នៅទីស្នាក់ការគណៈកម្មាធិការជាតិអូឡាំពិកកម្ពុជានាព្រឹកថ្ងៃអង្គារ ទី២៥ ខែមីនា ឆ្នាំ២០១៤ ថវិការបស់រាជរដ្ឋាភិបាលកម្ពុជា ចំនួន ៣.៩២៣.៤០០.០០០រៀល គឺប្រមាណជិត ១លានដុល្លារសហរដ្ខអាមេរិក ត្រូវបានឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីតំណាងដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជានាំយក កប្រគល់ជូនកីឡាករ-កីឡាការិនីកម្ពុជា ដែលដណ្ដើមបានមេដាយក្នុងព្រឹត្ដិការណ៍ប្រកួតជាលក្ខណះអន្ដរជាតិធំៗ ចំនួន៦ ដែលបញ្ចប់កាលពីឆ្នាំ២០១៣ កន្លងមកនេះ។

ដោយចាត់ទុកការជួបជុំគ្នាទទួលការឧបត្ថម្ភថវិកាថ្ងៃនេះ គឺជាសក្ខីភាពបញ្ជាក់នូវការលើកទឹកចិត្ត និងការគាំទ្ររបស់រាជរដ្ឋាភិបាលដល់វិស័យកីឡា ជាពិសេសក្មួយៗកីឡាករ កីឡាការិនីទាំងអស់ ដែលបានចូលរួមប្រកួតកីឡាស៊ីហ្គេមលើកទី២៧ និងការប្រកួតអន្តរជាតិនានានាពេលកន្លងមកក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្នុងនាមផ្ទាល់ខ្លួនឯកឧត្តមបណ្ឌិតសភាចារ្យ សុខ អាន បានសម្តែងនូវការកោតសរសើរ និងអបអរសាទរដល់ជ័យលាភីទាំងអស់ ចំពោះកិច្ចខិតខំប្រឹងប្រែង និងស្មារតីប្តេជ្ញាចិត្តខ្ពស់រហូតទទួលបានជ័យជំនះ ដ៏ធំធេងជូនជាតិមាតុភូមិ។

ឯកឧត្តមបណ្ឌិតសភាចារ្យ សុខ អាន បានមានប្រសាសន៍សម្តែងនូវការកោតសរសើរ និងវាយតម្លៃខ្ពស់ផងដែរ ដល់ថ្នាក់ដឹកនាំក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា សហព័ន្ធកីឡាជាតិ និងស្ថាប័នពាក់ព័ន្ធទាំងអស់ ជាពិសេសគ្រូបង្វឹក ដែលបានរួមចំណែកយ៉ាងសំខាន់ ធ្វើឱ្យសម្រេចឡើងនូវសមិទ្ធផលដ៏ត្រចះត្រចង់នេះ។

ឯកឧត្តមបណ្ឌិតសភាចារ្យ សុខ អាន បានមានប្រសាសន៍ផ្តល់ជានុសាសន៍ថា “បើទោះបីជាការប្រកួតក្នុងព្រឹត្តិការណ៍អន្ដរជាតិធំៗកន្លងមក កីឡាករ-កីឡាការិនីកម្ពុជាយើងបានខិតខំដណ្ដើមបានជ័យលាភីល្អប្រសើរក៏ពិតមែន ប៉ុន្ដែយើងទាំងអស់គ្នាត្រូវដឹងថា នៅឆ្នាំ២០២៣ខាងមុខនេះ កម្ពុជាត្រូវរៀបចំធ្វើជាម្ចាស់ផ្ទះការប្រកួតកីឡា SEA Games លើកទី៣២។ ដូច្នេះថ្នាក់ដឹក កីឡាគ្រប់កម្រិតទាំងអស់ត្រូវខិតខំប្រមូលផ្ដុំ និងអភិវឌ្ឍន៍សមត្ថភាពកីឡាករ-កីឡាការិនី ឲ្យមានភាពរីកចម្រើនខ្លាំងជាងនេះទៀត ដើម្បីដណ្ដើមមេដាយឲ្យបានច្រើនជូនប្រទេសជាតិក្នុងនាមយើងជាម្ចាស់ផ្ទះ”។ ទន្ទឹមនឹងនេះ ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិ គួរបន្តជំរុញការកសាងធនធានមនុស្សផ្នែកកីឡាប្រកបដោយគុណភាព តាមរយៈការពង្រឹងអង្គភាព ស្ថាប័នហ្វឹកហ្វឺនកីឡាជាតិ និងការផ្តល់ឱកាសបន្ថែមទៀតដល់ក្មួយៗយុវជន ដែលមានចំណង់ចំណូលចិត្ត និងទេពកោសល្យផ្នែកកីឡាគ្រូបង្វឹក និងមន្ត្រីជំនាញកីឡាទៅសិក្សានិងបណ្តុះបណ្តាលបន្តនៅបណ្តាប្រទេសដែលមានជំនាញខ្ពស់ផ្នែកកីឡាទាំងនោះ។

ជាងនេះទៅទៀត នៅតាមគ្រឹះស្ថានសិក្សា ក៏ដូចជានៅតាមពហុកីឡដ្ឋានរាជធានី-ខេត្ត ក្រសួងអប់រំ យុវជន និងកីឡា ត្រូវយកចិត្តទុកដាក់ជួសជុល កែលម្អទីលានកីឡា កសាងហេដ្ឋារចនាសម្ព័ន្ធរូបវន្ត បំពាក់ឧបករណ៍ និងសម្ភារៈកីឡា ដើម្បីបង្កលក្ខណៈ និងផ្តល់ឱកាសដល់យុវជនយើងធ្វើលំហាត់អប់រំកាយ និងកីឡា រួមចំណែកដល់ការកាត់បន្ថយភាពអសកម្ម នៅក្នុងសង្គម។

ព្រឹត្តិការណ៍ប្រកួតជាលក្ខណះអន្តរជាតិធំៗទាំង៦ ដែលឯកឧត្តមបណ្ឌិតសភាចារ្យ សុខ អាន នាំយកប្រាក់រង្វាន់រាជរដ្ឋាភិបាលមកប្រគល់ជូនអត្តពលិកកម្ពុជានោះ រួមមាន៖

ទី១, ប្រាក់រង្វាន់សម្រាប់មេដាយដណ្ដើមបានពីការប្រកួតកីឡា SEA Games លើកទី២៧ នៅមីយ៉ាន់ម៉ាមានចំនួន ២.៤២៩.៦០០.០០០រៀល។

ទី២, ការប្រកួតកីឡាប៉េតង់ជើងឯកអាស៊ីលើកទី១៧ នៅឥណ្ឌូនេស៊ីទឹកប្រាក់ចំនួន ១៥៧.០០០.០០០រៀល។

ទី៣, ការប្រកួតកីឡាវ៉ូវីណាមជើងឯកអាស៊ីលើកទី២ នៅខេត្តសៀមរាបទឹកប្រាក់ចំនួន ២០៩.៦០០.០០០រៀល។

ទី៤, ការប្រកួតកីឡាប៉េតង់អាស៊ីលើកទី១៦ នៅវៀតណាមទឹកប្រាក់ចំនួន ៨៤.០០០.០០០រៀល។

ទី៥, ការប្រកួតកីឡា VII Jeux De la Francophonie លើកទី៧ នៅបារាំង ទឹកប្រាក់ចំនួន ២២.០០០.០០០រៀល។

ទី៦, ការប្រកួតកីឡាតេក្វាន់ដូជើងឯកក្នុងតំបន់ប្រទេសនិយាយភាសាបារាំងលើកទី៩ ទឹកប្រាក់ចំនួន ២១.០០០ .០០០រៀល។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានថ្លែងឲ្យដឹងថា “ជ័យលាភីដែលអត្តពលិកដណ្ដើមបានពីការប្រកួតកីឡា SEA Games សម្រាប់រង្វាន់មេដាយមាស គឺទទួលបាន ៤០លានរៀល, មេដាយប្រាក់ ៣០លានរៀល និងមេដាយសំរិទ្ធ ១៦លានរៀល។ ប្រាក់រង្វាន់ជ័យលាភីជើងឯកអាស៊ី និងការប្រកួតកីឡា Francophonie មេដាយមាស ទទួលបាន ១៦លានរៀល, មេដាយប្រាក់ ១៣លានរៀល និងមេដាយសំរិទ្ធ ចំនួន ១១លានរៀល។ រីឯប្រាក់រង្វាន់ជើងឯកអាស៊ីអាគ្នេយ៍ និងជើងឯកតេក្វាន់ដូ Francophonie មេដាយមាសទទួលបាន ៩លានរៀល, មេដាយប្រាក់ ៨លានរៀល និងមេដាយសំរិទ្ធ ទទួលបាន ៧លានរៀល។

សូមបញ្ជាក់ដែរថា ការយកចិត្តទុកដាក់ និងការគាំទ្រទាំងនេះ ក្រៅពីការចំណាយថវិការដ្ឋដ៏ច្រើនសម្រាប់វិស័យនេះ សម្តេចអគ្គមហាសេនាបតីតេជោ ហ៊ុន សែន ក៏បានផ្តល់ជាអនុសាសន៍ណែនាំ និងការផ្តល់ថវិកាផ្ទាល់របស់សម្តេចតេជោជូនដល់គ្រប់កីឡាករ កីឡាការិនី មុនពេលចេញទៅប្រកួតផងដែរ៕

Pages

Monday, March 31, 2014

Sunday, March 30, 2014

Friday, March 28, 2014

Thursday, March 27, 2014