មានប្រជាពលរដ្ឋជាង ១ពាន់នាក់ចូលរួមរត់កម្សាន្តអបអរបុណ្យទន្លេនៅខេត្តស្ទឹងត្រែងថ្ងៃទី១

ពិធីបុណ្យទន្លេលើកទី៣ នៅខេត្តស្ទឹងត្រែង ចាប់ផ្ដើមថ្ងៃដំបូង នាព្រឹកថ្ងៃទី២៤ ខែមីនា ឆ្នាំ២០១៧នេះ ជាមួយនឹងសកម្មភាពផ្សេងជាច្រើន ក្នុងនោះក៏មានសកម្មភាពកីឡាផងដែរ ដោយព្រឹកនេះមានប្រជាពលរដ្ឋចាស់ក្មេងចំនួន ១២០០នាក់ បានចូលរួមរត់កម្សាន្តលើចម្ងាយ ៥គីឡូម៉ែត្រ និង ៣គីឡូម៉ែត្រ ដើម្បីអបអរសាទរព្រឹត្តិការណ៍ទេសចរណ៍នេះ ។

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) បានមានប្រសាសន៍ថា ពិធីបុណ្យទន្លេឆ្នាំនេះ NOCC បានត្រៀមកីឡាចំនួន ១១ប្រភេទ ដើម្បីប្រកួត និងសម្តែងជូនភ្ញៀវជាតិ-អន្តរជាតិទស្សនាកម្សាន្ត ពិសេសគឺដើម្បីអបអរសាទរពិធីបុណ្យទន្លេ លើកទី៣ ដែលនឹងប្រព្រឹត្តទៅរយៈពេល ០៣ថ្ងៃចាប់ពីថ្ងៃទី២៤ ដល់ថ្ងៃទី២៦ ខែមីនា ឆ្នាំ២០១៧ ។

ចំពោះប្រភេទកីឡាទាំងអស់ រួមមានកីឡារត់លក្ខណៈកម្សាន្ដចម្ងាយ ៣គីឡូម៉ែត្រ និង ៥គីឡូម៉ែត្រ, កីឡាបាល់ទាត់, បាល់ទះ, ល្បុក្កតោ និងកីឡារាំ ចាប់ផ្ដើមមុនគេនៅថ្ងៃទី២៤ ខែមីនា ។  រីឯកីឡាប្រណាំងកង់ ៤០គីឡូម៉ែត្រ និង ២០គីឡូម៉ែត្រ, ប្រដាល់គុនខ្មែរ, ចំបាប់មហាជន, កីឡាវាយសី, ទូកកានូ និងកីឡាទាញព្រ័ត្រ នឹងចាប់ផ្ដើមនៅថ្ងៃបន្ដបន្ទាប់ ។

លោក វ៉ាត់ ចំរើន បានបន្តថា តាមរយៈការរៀបចំកម្មវិធីកីឡាកន្លងមក មិនថាបុណ្យទន្លេ ឬបុណ្យសមុទ្រនោះទេ គឺតែងទទួលបានការគាំទ្រយ៉ាងផុសផុលពីមហាជនទាំងជាតិ និងអន្ដរជាតិ ។ ដូច្នេះហើយទើបគណៈកម្មាធិការ​ជាតិអូឡាំពិកកម្ពុជា សហការជាមួយ ក្រសួងទេសចរណ៍បន្ដរៀបចំសកម្មភាពកីឡា ។ ម្យ៉ាងការរៀបចំនេះ ក៏ចូលរួមជំរុញការអភិវឌ្ឍន៍វិស័យកីឡាកម្ពុជាឱ្យកាន់តែរីកចម្រើនទៀតផង ។

គួរបញ្ជាក់ថា បុណ្យទន្លេត្រូវបានរៀបចំឡើង ដោយក្រសួងទេសចរណ៍ ក្រោយទទួលបានអនុញ្ញាតពី រាជរដ្ឋាភិបាលកម្ពុជាដើម្បីរៀបចំព្រឹត្តិការណ៍នេះឱ្យក្លាយជាបុណ្យប្រចាំឆ្នាំមួយក្នុងប្រទេសកម្ពុជា ដោយកំណត់យកខែមីនា ដើម្បីរៀបចំជារៀងរាល់ឆ្នាំ ។ ចំពោះគោលបំណងធំនៃការរៀបចំពិធីបុណ្យទន្លេនេះ គឺផ្សព្វផ្សាយពីទេសចរណ៍សហគមន៍ តាមតំបន់ទន្លេមេគង្គ ដែលជាគោលដៅទេសចរណ៍ដ៏សំខាន់មួយ របស់ព្រះរាជាណាចក្រកម្ពុជា៕

តំណាងអចិន្រ្តៃយ៍កម្ពុជាប្រចាំ UN ៖ សេចក្តីថ្លែងការណ៍ចោទប្រកាន់អំពីការរំលោភសិទ្ធិមនុស្សនៅកម្ពុជា ប្រាសចាកទាំងស្រុងទៅនឹងអ្វីដែលបានកើតឡើងជាក់ស្តែង

នៅថ្ងៃទី២៣ ខែមីនា ឆ្នាំ២០១៧ លោក ណី សំអុល តំណាងអចិន្រ្តៃយ៍របស់កម្ពុជា ប្រចាំនៅអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ ប្រទេសស្វីស បានចេញសេចក្តីថ្លែងការណ៍មួយ ឆ្លើយតបនឹងសេចក្តីថ្លែងការណ៍មួយចំនួន ដែលបានរិះគន់កម្ពុជាអំពីបញ្ហាសិទ្ធិមនុស្ស។

លោក ណី សំអុល បានបញ្ជាក់ថា «សេចក្តីថ្លែងការណ៍ទាំងនោះ បកស្រាយយ៉ាងអយុត្តិធម៌ ក្នុងន័យអវិជ្ជមានមកលើស្ថានភាពសិទ្ធិមនុស្ស នៅក្នុងប្រទេសកម្ពុជា ដោយផ្អែកតែលើព័ត៌មានមិនគ្រប់ជ្រុងជ្រោយ ដែលប្រាសចាកទាំងស្រុងទៅនឹងអ្វីបានកើតឡើងជាក់ស្តែង ដោយព្រ​ងើយ​កន្តើយទៅនឹងការអភិវឌ្ឍន៍ទាំងឡាយ ដែលបានសម្រេចរហូតដល់បច្ចុប្បន្ន និងការតាំងចិត្តដ៏សុចរិតរបស់រាជរដ្ឋាភិបាលកម្ពុជាក្នុងការលើកស្ទួយ និងការការពារសិទ្ធិមនុស្ស»។

លោកបានបន្ថែមទៀតថា «កម្ពុជា​បានយល់ច្បាស់ពីសិទ្ធិ និងទំនួលខុសត្រូវទាំងឡាយ ដែលមានចែងនៅក្នុងសន្ធិសញ្ញាអន្តរជាតិនានាដែលខ្លួនជាសមាជិក។ ប៉ុន្តែយើងខ្ញុំក៏ជឿផងដែរថា សិទ្ធិគឺមានដែនកំណត់ មិនមែនដាច់ខាតនោះទេ ដូច្នេះហើយ បុគ្គលគ្រប់រូប គួរតែប្រើប្រាស់សិទ្ធិរបស់ពួកគេ ដោយទំនួលខុសត្រូវ»។

 ខាងក្រោមនេះជាសេចក្តីថ្លែងការណ៍របស់ តំណាងអចិន្រ្តៃយ៍កម្ពុជាប្រចាំ UN ៖

ក្រសួងទេសចរណ៍​ សហការជាមួយ​អាជ្ញាធរខេត្ត​ស្ទឹងត្រែង​ រៀបចំកម្មវិធី​ដាំដើមឈើ​ អនុស្សាវរីយ៍ក្នុងពិធីបុណ្យទន្លេឆ្នាំ២០១៧

នៅថ្ងៃទី២៤ ខែមីនា ឆ្នាំ២០១៧នេះ គឺជាថ្ងៃទីមួយនៃការប្រាព្ធពិធីបុណ្យទន្លេលើកទី៣ ក្រសួងទេសចរណ៍ បានសហការជាមួយអាជ្ញាធរខេត្តស្ទឹងត្រែង រៀបចំកម្មវិធីដាំដើមឈើអនុស្សាវរីយ៍ ក្រោមអធិបតីភាពលោក ទិត ចន្ថា រដ្ឋលេខាធិការ  និងជាតំណាងដ៏ខ្ពង់ខ្ពស់  លោក ថោង ខុន រដ្ឋមន្រ្តីក្រសួងទេសចរណ៍ និងលោក យ៉ង់ សុវឌ្ឍនា អភិបាលរងខេត្តស្ទឹងត្រែង ដោយមានការចូលរួមពីថ្នាក់ដឹកនាំ មន្ទីរជំនាញជុំវិញខេត្ត កងកំលាំងប្រដាប់អាវុធ ប្រតិបត្តិករទេសចរណ៍ ភ្ញៀវទេសចរជាតិ  និងអន្តរជាតិ  យុវជន យុវនារីប្រមាណ៣០០នាក់។

សូមបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ អញ្ជើញចូលរួមឲ្យបានច្រើនកុះករក្នុងពិធីបុណ្យទន្លេឆ្នាំ២០១៧ នេះ៕

ក្រសួងការងារ ចេញសេចក្តីប្រកាស អនុញ្ញាតឱ្យកម្មករ​ និយោជិត​ ឈប់សម្រាកពីការងារ ​ រយៈពេល៤ថ្ងៃ ​ដើម្បីចូលរួមអបអរ​បុណ្យចូលឆ្នាំថ្មី​

នៅថ្ងៃទី២៤ ខែមីនា ឆ្នាំ២០១៧នេះ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសមួយ ដោយបង្គាប់ឱ្យរោងចក្រ សហគ្រាសទាំងអស់នៅកម្ពុជា អនុញ្ញាតឱ្យកម្មករ និយោជិត ឈប់សម្រាកពីការងាររយៈពេល៤ថ្ងៃ ដោយត្រូវធ្វើឡើងចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០១៧ ដើម្បីចូលរួមអបអរដល់ពិធីបុណ្យចូលឆ្នាំថ្មី ប្រពៃណីខ្មែរ នៅពាក់កណ្តាលខែមេសាខាងមុខនេះ។

ក្នុងករណីដែលរោងចក្រ សហគ្រាស មិនអាចបញ្ឈប់សកម្មភាពរបស់ខ្លួនបាន នៅក្នុងអំឡុងបុណ្យចូលឆ្នាំនោះ ម្ចាស់រោងចក្រ សហគ្រាស ត្រូវធ្វើការសម្របសម្រួលជាមួយកម្មករ និយោជិត ឱ្យមានការស្ម័គ្រចិត្ត ព្រមទាំងបែងចែកឱ្យមានពេលវេលា និងថ្ងៃឈប់សម្រាកបុណ្យ ឱ្យបានសមស្រប និងត្រូវរៀបចំល្បែងកម្សានប្រជាប្រិយ ដើម្បីចូលរួមអបអរ ក្នុងឱកាសបុណ្យចូលឆ្នាំខ្មែរផងដែរ៕

ខាងក្រោមនេះជាសេចក្តីប្រកាសព័ត៌មាន៖

ក្រសួង​​ទឹក​ប្រកាស​ឱ្យប្រជាពលរដ្ឋ​ប្រុងប្រយ័ត្ន​ចំពោះបាតុ​ភូតផ្គរ រន្ទះ និ​ងខ្យល់កន្ត្រា​ក់ ចាប់​ពីចាប់ពីថ្ងៃទី២៣ ដល់​ថ្ងៃទី០២ មេសា

ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីប្រកាសស្ដីពីការព្យាករណ៍អាកាសធាតុប្រចាំសប្តាហ៍ ចាប់ពីថ្ងៃនេះរហូតដល់ថ្ងៃទី០៣ ខែមេសា ឆ្នាំ២០១៧ ដោយបញ្ជាក់ថា នៅរយៈពេលនេះ ភ្លៀងកក់ខែនៅតែបន្តធ្លាក់ សូមឱ្យប្រជាពលរដ្ឋប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចកើតមានឡើង នៅពេលមេឃរកកលភ្លៀង៕

លោកឧបនាយករដ្ឋមន្រ្តី ស ខេង ចាត់តំណាងក្រសួងមហាផ្ទៃឱ្យជួបពិភាក្សាជាមួយគណបក្សប្រឆាំងរឿងសមាជខុសច្បាប់

នៅថ្ងៃទី២៤ ខែមីនា ឆ្នាំ២០១៧នេះ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់បណ្តាញសារព័ត៌មាន Fresh News ឱ្យដឹងថា លោកឧបនាយករដ្ឋមន្រ្តី ស ខេង និងជារដ្ឋមន្រ្តីក្រសួងមហាផ្ទៃ បានចាត់តាំងតំណាងម្នាក់របស់ក្រសួងមហាផ្ទៃ ដើម្បីជួបពិភាក្សាជាមួយគណបក្សប្រឆាំងពាក់ព័ន្ធនឹងករណីធ្វើសមាជរៀបចំក្បាលម៉ាស៊ីនថ្មីរបស់បក្សខុសលក្ខន្តិកៈ។

ការចាត់តាំងតំណាងនេះ បានធ្វើឡើងបន្ទាប់ពីគណបក្សសង្រ្គោះជាតិបានរៀបចំលិខិតផ្លូវការមួយ នៅថ្ងៃទី២៣ ខែមីនា ឆ្នាំ២០១៧ម្សិលមិញ ដើម្បីសុំជួបលោកឧបនាយករដ្ឋមន្រ្តី ស ខេង ពន្យល់អំពីការរៀបចំសមាជរបស់ខ្លួនកាលពីដើមខែមីនា។

លិខិតរបស់គណបក្សសង្រ្គោះជាតិ បានធ្វើឡើងបន្ទាប់ពីក្រសួងមហាផ្ទៃបានជូនដំណឹងថា សមាជរបស់គណបក្សសង្រ្គោះជាតិ ជ្រើសរើសប្រធាន និងអនុប្រធានថ្មី ខុសលក្ខន្តិកៈនោះ ហើយក្រសួងនេះ ក៏ស្នើឱ្យគណបក្សសង្រ្គោះជាតិដូរសារនយោបាយ «ដូរមេឃុំបម្រើបក្ស ដាក់មេឃុំបម្រើរាស្រ្ត» ផងដែរ។

នាយឧត្តមសេនីយ៍ ខៀវ សុភ័គ បានឱ្យដឹងថា តំណាងក្រសួងមហាផ្ទៃ ដែលត្រូវជួបពិភាក្សាជាមួយបក្សប្រឆាំងនាពេលខាងមុខនេះ គឺលោក ប្រាក់ សំអឿន អគ្គនាយករដ្ឋបាល នៃក្រសួងមហាផ្ទៃ។ លោកថ្លែងថា ការជួបនោះគឺជាជំនួបថ្នាក់បច្ចេកទេស មិនមាននៅក្នុងក្របខណ្ឌនយោបាយនោះទេ។

សូមបញ្ជាក់ថា កាលពីថ្ងៃទី០២ ខែមីនា ឆ្នាំ២០១៧ គណបក្សសង្រ្គោះជាតិ បានរៀបចំសមាជដើម្បីជ្រើសរើសក្បាលម៉ាស៊ីនដឹកនាំថ្មីរបស់គណបក្សបន្ទាប់ពីលោក សម រង្ស៊ី លាលែងចេញពីតំណែង។ បន្ទាប់ពីធ្វើសមាជនេះ បក្សប្រឆាំងបានបោះឆ្នោតគាំទ្រឱ្យលោក កឹម សុខា ធ្វើជាប្រធានគណបក្សសង្រ្គោះជាតិ ហើយមានអនុប្រធាន ៣នាក់ រួមមាន លោក ប៉ុល ហំម, លោកស្រី មូរ សុខហួរ និងលោក អេង ឆៃអ៊ាង។ ជាមួយគ្នានេះ បក្សប្រឆាំងក៏បានបង្កើតសារនយោបាយមួយថា «ដូរមេឃុំបម្រើបក្ស ដាក់មេឃុំបម្រើរាស្រ្ត» ដែលមេឃុំ ចៅសង្កាត់ជាច្រើនចាត់ទុកថា ជាការប្រមាថដល់កិត្តិយសរបស់ពួកគេ។

សូមជម្រាបថា ពាក់ព័ន្ធនឹងបញ្ហាកាលពីថ្ងៃទី២៣ ខែមីនា ឆ្នាំ២០១៧ សមាជិកគណៈកម្មាធិការនាយក នៃគណបក្សសង្រ្គោះជាតិ លោក នេត ណាត បានចេញលិខិតចំហមួយ ដោយប្រកាសមិនគាំទ្រ ចំពោះសមាជខុសច្បាប់របស់គណបក្សសង្រ្គោះជាតិ និងទាមទារឱ្យលោក កឹម សុខា លាលែងពីតំណែង។

នៅក្នុងលិខិតចំហរបស់លោក នេត ណាត បានសរសេរបញ្ជាក់ថា «លក្ខន្តិកៈរបស់គណបក្ស គឺជាច្បាប់កំពូលរបស់គណបក្សដែលទាំងអស់គ្នាត្រូវតែគោរព និងត្រូវអនុវត្តតាមយ៉ាងម៉ឺងម៉ាត់បំផុត។ គ្រប់គ្នាបានដឹងច្បាស់ថា ការរៀបចំសមាជវិសាមញ្ញដើម្បីជ្រើសរើសក្បាលម៉ាស៊ីនដឹកនាំរបស់គណបក្សសង្រ្គោះជាតិកន្លងទៅ គឺធ្វើឡើងយ៉ាងតក់ក្រហល់ និងពុំមានការគាំទ្រពីសមាជិក-សមាជិកាភាគច្រើនរបស់គណបក្សសង្រ្គោះជាតិនោះទេ ជាពិសេសមកពីកូតាគណបក្ស សម រង្ស៊ី»៕

ក្រុម​ហ៊ុន China Railway International Group ចាប់អារម្មណ៍វិនិយោគ​លើវិស័យ​ផ្លូវដែក​នៅ​កម្ពុជា​

ភ្នំពេញ៖ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានជួបពិភាក្សាការងារជាមួយលោក Wang Lijie អនុប្រធាន និងជាប្រធានវិស្វករនៃក្រុមហ៊ុន China Railway International Group នៅទីស្តីការក្រសួងសាធារណការ និងដឹកជញ្ជូន ថ្ងៃទី២៣ ខែមីនា ឆ្នាំ២០១៧ ។

នាឱកាសនោះដែរ លោក Wang បានជម្រាបជូនលោករដ្ឋមន្ត្រីថា ក្រុមហ៊ុននេះ មានចំណាប់អារម្មណ៍ក្នុងការវិនិយោគលើវិស័យផ្លូវដែកនៅកម្ពុជា។
លោករដ្ឋមន្ត្រី ស៊ុន ចាន់ថុល បានផ្តល់អនុសាសន៍ឱ្យលោក Wang ពិចារណាក្នុងការវិនិយោគលើគម្រោងនានាដោយផ្អែកលើគោលការណ៍ “កសាង ប្រតិបត្តិ និងផ្ទេរ”៕

លោក សុខ ឥសាន ៖ ចង់បានប្រជាប្រីយ៍ភាព?

អ្នកនាំពាក្យ​គណបក្ស​ប្រជាជនកម្ពុជា​លោក សុខ ឥសាន នៅ​ព្រឹក​ថ្ងៃទី​២៤ ខែមីនា ឆ្នាំ​២០១៧​នេះ បាន​លើក​ឡើង​ពីការ​គិត​គូរ​របស់​រាជរដ្ឋាភិបាលដឹកនាំ​ដោយ​គណបក្ស​ប្រជា​ជនកម្ពុជា​ ដែល​តែង​តែ​គិតគូ​ពី​ប្រយោ​ជ​ន៍​របស់​ប្រជាជន​ ស្រប​តាម​កម្ម​វិធី​នយោបាយ​របស់​ខ្លួន​ ហើយ​សង្ឃឹម​ថា ប្រជាជន​កម្ពុជា​គាំទ្រ​ឲ្យ​ដឹកនាំ​ប្រទេស​ទៀត​ជាក់​ជា​មិន​ខាន។

ខាង​ក្រោម​នេះ​ជា​ខ្លឹម​សារ​ទាំង​ស្រុង​របស់​លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា៖

ជាធម្មតាគណបក្សនយោបាយណាក៏ដោយ តែធ្វើអ្វីៗតែងតែគិតពីផលចំណេញដល់គណបក្សខ្លួន។ សំរាប់​គណ​បក្សប្រជាជនកម្ពុជា និងរាជរដ្ឋាភិបាលកម្ពុជាធ្វើអ្វីៗ ស្រប​តាម​កម្ម​វិធីនយោ​បាយ​របស់​ខ្លួន​ដែល​ត្រូវ​បាន​ប្រជាជនគាំទ្ររួចហើយ និងតែងតែគិតគូពីផលប្រយោជន៍របស់ប្រជាជនជានិច្ច។ ផ្អែក​តាម​ឧត្តមគតិ​នេះ​ហើយ គណបក្សប្រជាជនកម្ពុជា នឹងត្រូវបានប្រជាជនកម្ពុជា នឹងត្រូវបានប្រជាជនកម្ពុជាបន្តគាំទ្រ ឲ្យ​ដឹកនាំ​ប្រទេស​ទៅទៀ​តជាក់ជាមិនខាន។ នេះជាសច្ចធ៌ម ដែលមិនអាចបដិសេធបានជាដាច់ខាត។

អ្វីជាផលប្រយោជន៍ប្រជាជន ពិតជាត្រូវបានឆ្លើយតបពីប្រជាជន ជាមិនខាន។

បើ​តាម​លោក សុខ ឥសាន រាជរដ្ឋាភិបាល​សម្រេច​បាន​សមិទ្ធផល​ជូន​ជាតិ និង​ប្រជាជនកម្ពុជា​ច្រើន​ណាស់​ក្នុង​នោះ​រួម​មាន៖

* ការបញ្ចុះអត្រាការប្រាក់គ្រឹះស្ថានមីក្រូហិរញ្ញវត្ថុ គឺដើម្បីជួយសំរាលបន្ទុករបស់ប្រជាជន។ * ការ​លុប​ចោល​កិច្ច​សន្យា​វិនិយោគផ្លូវវេងស្រេង និងផ្លូវជាតិលេខ៤ គឺពិតជាជួយសំរាល​ការចំណាយ​របស់​ប្រជា​ជន។ * ការ​ប្រគល់​តូបលក់ដូរជូនអាជីវករកាន់កាប់ធ្វើការកស៊ីតកូន-តចៅនៅតាមផ្សារ គឺ​ជា​ការ​គិតគូ​ពី​សុខ​ទុក្ខ​របស់​ប្រ​ជា​ជន​​ដែលជាឧត្តមគតិរបស់គណបក្សប្រជាជនកម្ពុជា។ * ការលុបចោលកិច្ចសន្យាវិនិយោគ​ដី​សម្បទា​ន​សេដ្ឋ​កិច្ចដែលមិនគោរពកិច្ចសន្យា រឹបអូសយកដីមកចែកជាសម្បទានសង្គមកិច្ច។ * ការ​លុបចោល​ការ​បង់​ពន្ធ​​បហរថាប់​ត្រា ៤ភាគរយ ក្នុងការផ្ទេរកម្មសិទ្ធិទៅឲ្យកូន-ចៅបង្កើត ក៏គឺជាការគិតគូពី​ផល​ប្រយោជន៍​ប្រជា​ជ​ន។ * ការសំរួលកាត់ឈ្មោះការទិញដូរមធ្យោបាយធ្វើដំណើរ ក៏ជាការសំរាលការចំណាយរបស់ប្រជាជន។ * ការ​ខិតខំកសាងហេដ្ឋារចនាសម្ព័ន្ធ ផ្លូវថ្នល់ សាលារៀន មន្ទីរពេទ្យ អណ្តូងទឹក ស្រះទឹក គឺពិតជា​ដើម្បី​បំរើផល​ប្រយោជ​ន៍​ប្រជាជនយ៉ាងពិតប្រាកដ។ * ការយកចិត្តទុកដាក់កសាងព្រះវិហារ សេនាសនៈតាមទីវត្តអារ៉ាម គឺ​ជា​ការ​លើកកំពស់វិស័យពុទ្ធសាសនា ដើម្បីពុទ្ធបរិស័ទបានធ្វើបុណ្យទាន។

លោក សុខ ឥសាន បញ្ជាក់​ថា ការខិតខំប្រឹងប្រែងកសាងសមិទ្ធផលផ្សេងៗសំរាប់សង្គមជាតិ គឺ​សំដៅ​បំរើ​ផល​ប្រយោជន៍ប្រជាជន ដែលធ្វើឲ្យប្រជាជនទទួលផលផ្ទាល់ក្នុងជីវភាពរស់នៅ ។ ជាការ​ឆ្លើយតបប្រជា​ជន​ពិត​ជា​គាំទ្រដល់អ្នកកសាងនោះ ជាមិនខាន ប្រជាជនមិនទៅគាំទ្រអ្នកដែលមិនបានកសាងនោះទេ៕

លោក យឹម សុវណ្ណ ដាក់លិខិត​ស្នើសុំជួប​លោក​ឧបនាយក​រដ្ឋមន្រ្តី ស ខេង ដើម្បី​សុំការ​ពន្យល់​រឿង​សមាជ​ខុសច្បាប់

សមាជិក​គណៈ​កម្មា​ធិការ​នាយក​គណបក្សសង្រ្គោះជាតិ ផ្ញើលិខិត​ចំហរ ទាមទារ​ឲ្យ​លោក កឹម សុខា ចុះចេញ​ពីតំណែង​ប្រធាន​គណបក្ស​សង្គ្រោះជាតិ

នៅមុននេះបន្តិច លោក នេត ណាត សមាជិកគណៈកម្មាធិការនាយក និងជាសមាជិក​គណៈ​កម្មាការ​ប្រតិបត្តិ​ខេត្ត​កណ្តាល​ បានផ្ញើលិខិតចំហរមួយចម្លងជូនទៅក្រសួងមហាផ្ទៃ និងផ្ញើទៅលោក យឹម សុវណ្ណ ប្រធាន​គណៈ​កម្មា​ធិការ​​ប្រតិបត្តិនៃគណបក្សសង្គ្រោះជាតិ ដោយទាមទារឲ្យរៀបចំក្បាលម៉ាស៊ីនដឹកនាំគណបក្សឡើងវិញ និង​ឲ្យ​លោក​ កឹម សុខា ត្រូវតែលាលែងចេញពីតំណែងប្រធានគណបក្សសង្គ្រោះជាតិ ជាបន្ទាន់។
សូមអានខ្លឹមសារនៃលិខិតចំហរដូចតទៅ៖

លោកនាយករដ្ឋមន្រ្តី ហ៊ុន សែន ៖ រាជរដ្ឋាភិបាល នឹងបន្តគិតគូរអំពីការតម្លើងប្រាក់បៀរវត្សជូន ដល់គ្រូបង្រៀននិងបុគ្គលិកសិក្សា

ថ្លែងនៅក្នុងឱកាសបិទសន្និបាតបូកសរុបលទ្ធផលការងារឆ្នាំសិក្សា ឆ្នាំ២០១៥-២០១៦ និងលើកទិសដៅសម្រាប់ឆ្នាំសិក្សា២០១៦-២០១៧ របស់ក្រសួងអប់រំ យុវជន និងកីឡា ដែលធ្វើឡើងនៅវិទ្យាស្ថានបច្ចេកវិទ្យាកម្ពុជា នៅថ្ងៃទី២៣ ខែមីនា ឆ្នាំ២០១៧នេះ លោកនាយក​រដ្ឋមន្រ្តី ហ៊ុន សែន  បានថ្លែង​ថា រាជរដ្ឋា​ភិបាល នឹង​បន្ត​គិត​គូរអំពីការតម្លើងប្រាក់បៀរវត្សជូន ដល់គ្រូបង្រៀននិងបុគ្គលិកសិក្សា។

ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន​ សែន បានបញ្ជាក់ថា រាជរដ្ឋាភិបាល នឹងបន្តវិភាជន៍ថវិកាបន្ថែមប្រចាំឆ្នាំដល់វិស័យអប់រំ ការផ្តល់អាទិភាពជ្រើសរើស និងបណ្តុះ បណ្តាលគ្រូបង្រៀនដើម្បីបន្ថែមដល់ការងារពង្រាយគ្រូ និងជំនួសគ្រូដែលត្រូវចូលនិវត្តន៍ ការ​ធ្វើវិក្រឹត្យការគ្រូបង្រៀន ការកែលម្អកម្មវិធីសិក្សា ការធ្វើអធិការកិច្ច ការពង្រឹងសមត្ថភាព គ្រប់គ្រងគុណភាពប្រឡង ជាដើម។

លោកនាយករដ្ឋមន្រ្តី ហ៊ុន សែន ក៏បានបញ្ជាក់បន្ថែមថា ទន្ទឹមនឹងនេះរាជរដ្ឋាភិបាល នឹង​បន្ត​គិតគូរអំពីការតម្លើងប្រាក់បៀរវត្សជូនដល់គ្រូបង្រៀននិងបុគ្គលិកសិក្សាជាបន្តបន្ទាប់ទៀត ព្រមទាំងធ្វើការខិតខំកៀងគរធនធានមកពីគ្រប់មជ្ឈដ្ឋានដើម្បីវិនិយោគក្នុងការអប់រំ បណ្តុះ​បណ្តាលវិជ្ជាជីវៈ ឱ្យមានលក្ខណៈប្រទាក់ក្រឡាគ្រប់ជ្រុងជ្រោយ ធានាស្ថិរភាពទី​ផ្សារការងារ ការលើកកម្ពស់ផលិតភាព និងជីវភាពរស់នៅរបស់ប្រជាជន៕

លោកនាយករដ្ឋមន្រ្តី ហ៊ុន សែន ៖ កម្ពុជា បាននិងកំពុងមានការផ្លាស់ប្តូរយ៉ាងច្រើនលើគ្រប់វិស័យ

នៅថ្ងៃទី២៣ ខែមីនា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា កម្ពុជា បាននិងកំពុងមានការផ្លាស់ប្តូរយ៉ាងច្រើនលើគ្រប់​វិស័យ ទាំងផ្នែកនយោបាយ សេដ្ឋកិច្ច ពាណិជ្ជកម្ម និងសង្គម។ លោក បានថ្លែង​ដូចនេះ ក្នុងឱកាសអញ្ជើញជាអធិបតីភាពក្នុងពិធីបិទសន្និបាតបូកសរុបលទ្ធផលការងារឆ្នាំសិក្សា ឆ្នាំ ២០១៥-២០១៦ និងលើកទិសដៅសម្រាប់ឆ្នាំសិក្សា២០១៦-២០១៧ របស់ក្រសួងអប់រំ យុវជន និងកីឡា ដែលធ្វើឡើងនៅវិទ្យាស្ថានបច្ចេកវិទ្យាកម្ពុជា។

ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន​ សែន បានបញ្ជាក់ថា កម្ពុជា ត្រូវបាន ទទួលស្គាល់ថាមានការផ្លាស់ប្តូរយ៉ាងច្រើនទាំងផ្នែកនយោបាយ សេដ្ឋកិច្ច ពាណិជ្ជកម្ម និង​សង្គម ដែលក្នុងនោះកម្ពុជាកំពុងស្ថិតលើគន្លងផ្លូវដ៏ត្រឹមត្រូវលើការអភិវឌ្ឍដែលកាន់តែរីក ចម្រើនឡើងជាលំដាប់លើគ្រប់វិស័យពីមួយឆ្នាំទៅមួយឆ្នាំ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់បន្ថែមថា ជាក់ស្តែងកម្ពុជាសម្រេចបាន​កំ​ណើន​សេដ្ឋកិច្ចប្រចាំឆ្នាំជាមធ្យម៧.១%  វិស័យហេដ្ឋារចនាសម្ព័​ន្ធរូបវ័ន្តកាន់តែមាន​ភាពរស់​រវើកតភ្ជាប់គ្រប់ទិសតំបន់ ដែលមិនត្រឹមតែធ្វើសមាហរណកម្មហេដ្ឋារចនា​សម្ព័ន្ធផ្ទៃក្នុង​ប្រទេសប៉ុណ្ណោះទេ ប៉ុន្តែថែមទាំងធ្វើសមាហរណកម្មប្រទាក់ក្រឡាទៅនឹង​ប្រទេសជិតខាង​ទៀតផង៕

លោកនាយករដ្ឋមន្រ្ដី ហ៊ុន សែន អញ្ជើញជាអធិបតីបិទសន្និបាតក្រសួងអប់រំ យុវជន និងកីឡា

នៅថ្ងៃទី ២៣ ខែមីនា ឆ្នាំ២០១៧ រសៀល លោក ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញជាអធិបតីដ៏ខ្ពង់ខ្ពស់នៅក្នុងពិធីបិទសន្និបាតបូកសរុបលទ្ធផលការងារឆ្នាំសិក្សា ឆ្នាំ២០១៥-២០១៦ និងលើកទិសដៅសម្រាប់ឆ្នាំសិក្សា២០១៦-២០១៧ របស់ ក្រសួងអប់រំ យុវជន និងកីឡា នៅវិទ្យាស្ថានបច្ចេកវិទ្យាកម្ពុជា។

លោកនាយករដ្ឋមន្រ្ដី ហ៊ុន សែន បានមានប្រសាសន៍ថា វឌ្ឍនៈភាពនៃវិស័យអប់រំមិនមែនកើតឡើងដោយចៃដន្យនោះទេ គឺសុទ្ធតែមានការចូលរួមគ្រប់ដំណាក់កាល។ ក្នុងរយៈពេលប៉ុន្មានឆ្នាំចុងក្រោយនេះ វិសយ័អប់រំបានដើរតួរយ៉ាងសំខាន់ក្នុងការអភិវឌ្ឍន៍ធនធានមនុស្សអោយទទួលបាននូវចំណេះដឹង ចំណេះធ្វើ និង ជំនាញផ្សេងៗដើម្បីចួលរួមចំណែកអភិវឌ្ឍន៍ប្រទេសជាតិអោយមានកាន់តែរីចម្រើនរុងរឿង ។ នៅក្នុងពីរទសវត្សចុងក្រោយនេះ ប្រទេសកម្ពុជាទទួលបានកំណើនសេដ្ឋកិច្ចជាមធ្យម ៧.៧% ។ រាជរដ្ឋាភិបាលកម្ពុជា តែងតែខិតខំយកចិត្តទុកដាក់ជានិច្ចចំពោះវិស័យអប់រំតាមរយៈការធ្វើកំណែទំរង់ និងការតំឡើងប្រាក់ខែជូនគ្រូបង្រៀនជាបន្តបន្ទាប់ ដើម្បីអោយវិស័យអប់រំកាន់តែមានប្រសិទ្ធិភាព។

លោកនាយករដ្ឋមន្ត្រីបានផ្តល់អនុសាសន៍ណែនាំ ៦ចំនុចសំខាន់ៗដូចជា ទី១)-បន្តរអោយមានសកម្មភាពបន្ថែមទៀតដើម្បីឈានទៅរកសមធម៍ ដោយខិតខំអប់រំកុមារតូចៗ អោយបានសិក្សារៀនសូត្រយ៉ាងតិច ៩ ឆ្នាំ ជាពិសេស ចូលរួមផ្នែកអនាម័យ តាមរយះបង្កើតអោយមានជាបង្គន់អនាម័យតាមសាលារៀនជនបទ ខិតខំអប់រំផ្លូវចិត្ត ផ្លូវកាយ និងខិតខំបង្ហាត់ភាសារបរទេសដល់កុមារតូចៗផងដែរ។ ទី២)- ពង្រឹងប្រពន្ធ័ការងារគ្រូបង្រៀនតាមគ្រឹះស្ថាននានា ក្នុងការបណ្តុះបណ្តាលដល់សិស្សានុសិស្ស ប្រកបដោយការទទួលខុសត្រូវអោយមានប្រសិទ្ធិភាពខ្ពស់។ ទី ៣)-អនុវត្តសកម្មភាពលើការងារយុវជន ត្រូវពង្រឹងសកម្មភាពការងារយុវជនទាំងបច្ចេកទេស បច្ចេកវិទ្យា សកម្មភាពការងារចុះជួយតាមមូលដ្ឋាន ក្នុងការអភិវឌ្ឍន៍សង្គមជាតិផងដែរ។ ទី ៤)-ជម្រុញការអនុវត្តសកម្មភាពលើការលេងកីឡាអោយបានច្រើនបន្ថែមទៀត ជាពិសេសអនុវត្តកម្មវិធីអប់រំកាយ និងកីឡា តាមគ្រឹះស្ថានសិក្សានានា ដោយមានកម្មវិធីហ្វឹកហ្វឹនលក្ខណៈជាតិនិង អន្តរជាតិ ព្រមទាំងបំផុសស្មារីអោយលេងកីឡា និងស្ថាប័នពាក់ព័ន្ធត្រូវលើកទឹកចិត្តដល់វិស័យកីឡាជាពិសេសហ្វឹកហាត់ត្រៀមខ្លួនសម្រាប់ការប្រកួត Sea-Games) ឆ្នាំ ២០២៣ ខាងមុខនេះ។ សាលារៀនត្រូវរៀបចំអោយមានទីធ្លាកីឡាអោយបានច្រើន រួមទាំងតារាងបាល់ទះ បាល់បោះ បាល់ទាត់ និងកីឡាកាយសម្ព័ន្ឋដើម្បីក្មួយៗសិស្សានុ សិស្សមានឱកាសបានហ្វឹកហាត់គ្រប់កម្រិត និងគ្រប់អាយុ។ ទី ៥)-បង្កើតប្រសិទ្ធិភាពហិរញ្ញប្បទាន ដើម្បីចូលរួមចំនែកក្នុងការលប់បំបាត់គ្រឿងញឿន ជួញដូរស្ត្រី និងកុមារ មេរោគអេដស៍ ជំងឺអេដស៍ និងការលប់បំបាត់ចោរកម្មផ្សេងៗ ។

លោកនាយករដ្ឋមន្រ្ដី ហ៊ុន សែន បានអំពាវនាវ ដល់ប្រជាពលរដ្ឋទាំងអស់ជាពិសេសយុវជន អោយចូលរួមលេងកីឡាដើម្បីសុខភាពចៀសវាងការសេពគប់គ្រឿងញៀន និងប្រព្រឹត្តអំពើអបាយមុខផ្សេងៗ។
ចុងបញ្ជប់ លោកនាយករដ្ឋមន្រ្តី បានបំពាក់គ្រឿងឥស្សរីយយស ជូនដល់មន្ត្រីដែលទទួលបានស្នាដៃឆ្នើមល្អក្នុងការបណ្តុះបណ្តាលការងារអប់រំនៅក្នុងប្រទេសកម្ពុជា៕

លោកនាយករដ្ឋមន្រ្តី ហ៊ុន សែន បានថ្លែងថា ត្រូវថែរក្សាទុកសួនច្បារក្នុងទីក្រុងនានាជូនប្រជាពលរដ្ឋហាត់ប្រាណ

នៅថ្ងៃទី២៣ ខែមីនា ឆ្នាំ២០១៧ លោកនាយករដ្ឋមន្រ្តី ហ៊ុន សែន បានថ្លែងថា បានថ្លែងថា ត្រូវថែរក្សាទុកសួនច្បារក្នុងទីក្រុងនានាជូនប្រជា​ពលរ​ដ្ឋហាត់ប្រាណ។ លោក បានថ្លែង​ដូចនេះ ក្នុងឱកាសអញ្ជើញជាអធិបតីភាពក្នុងពិធីបិទសន្និបាតបូកសរុបលទ្ធផលការងារឆ្នាំសិក្សា ឆ្នាំ២០១៥-២០១៦ និងលើកទិសដៅសម្រាប់ឆ្នាំសិក្សា២០១៦-២០១៧ របស់ក្រសួងអប់រំ យុវជន និងកីឡា ដែលធ្វើឡើងនៅវិទ្យាស្ថានបច្ចេកវិទ្យាកម្ពុជា។

ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន​ សែន បានបញ្ជាក់ថា ការលេងកីឡាគឺ ដើម្បីសុខភាពផ្ទាល់ខ្លួនផង និងដើម្បីគ្រួសារផងផង និងថែរក្សាទុកនូវសួនច្បារនៅតាម​ទី​សាធារណៈនានាដើម្បីឱ្យប្រជាពលរដ្ឋបានហាត់ប្រាណចៀសវាងពីជំងឺផ្សេងៗដូចជាជំងឺដាច់សរសៃឈាមជាដើម។ លោក ក៏បានអំពាវនាវឱ្យប្រជាពលរដ្ឋនាំគ្នាហាត់ប្រាណ គឺយ៉ាង​ហោច​​ណាស់ឱ្យចេះលេងកីឡាមួយមុខយ៉ាងតិចផងដែរ៕

នៅក្នុងការប្រណាំងប្រជែងផ្នែកហេដ្ឋារចនាសម្ព័ន្ធនៅតំបន់អាស៊ី វៀតណាមកំពុងស្ថិតក្នុងចំណោមមេដឹកនាំ

ប្រទេសវៀតណាមអាចជាផ្នែកមួយនៃសេដ្ឋកិច្ចតូចជាងគេបំផុតនៅក្នុងតំបន់អាស៊ី ក៏ប៉ុន្តែ វៀតណាមកំពុងស្ថិតក្នុងចំណោមអ្នកដែលនាំមុខក្នុងការប្រណាំងប្រជែងផ្នែកហេដ្ឋារចនាសម្ព័ន្ធ។

យោងទៅតាមធនាគារអភិវឌ្ឍន៍អាស៊ីបានឱ្យដឹងថា ការវិនិយោគហេដ្ឋារចនាសម្ព័ន្ធវិស័យឯកជន និងវិស័យសាធារណៈរបស់វៀតណាមមានអត្រាជាមធ្យម ៥,៧ ភាគរយនៃផលិតផលក្នុងស្រុកសរុបនៅក្នុងប៉ុន្មានឆ្នាំចុងក្រោយនេះ ដែលខ្ពស់បំផុតនៅក្នុងតំបន់អាស៊ីអាគ្នេយ៍ ហើយបើ ធៀបជាមួយនឹង ៦,៨ ភាគរយនៅក្នុងប្រទេសចិន។ ប្រទេសឥណ្ឌូនេស៊ី និងហ្វីលីពីនបានចំណាយ តិចជាង ៣ ភាគរយ ខណៈដែលប្រទេសម៉ាឡេស៊ី និងថៃចំណាយតិចនៅក្រោម ២ ភាគរយ។

ធនាគារអភិវឌ្ឍន៍អាស៊ីបានប៉ាន់ប្រមាណថា ប្រទេសដែលមានសេដ្ឋកិច្ចកំពុងរីកចម្រើននៅក្នុងតំបន់នេះ នឹងត្រូវការបណ្តាក់ទុនជិត ២៦ ទ្រីលានដុល្លារ រហូតដល់ឆ្នាំ២០៣០ ដើម្បីសាងសង់បណ្តាញដឹកជញ្ជូន បង្កើនការផ្គត់ផ្គង់ថាមពល និងធ្វើឱ្យប្រសើរឡើងគ្រឿងបរិក្ខារអនាម័យ និងទឹកស្អាត។ វៀតណាម ស្ថិតក្នុងចំណោមប្រទេសដែលមានកំណើនសេដ្ឋកិច្ចយ៉ាងលឿនបំផុត នៅលើពិភពលោក ដែលកំពុងបង្កើនហេដ្ឋារចនាសម្ព័ន្ធដើម្បីទាក់ទាញវិនិយោគិនបរទេសថែមទៀត នៅពេលដែលវៀតណាមចាត់ទុកខ្លួនឯងថា ជាសេដ្ឋកិច្ចខ្លាថ្មី ( next Tiger Economy) របស់អាស៊ី។

លោក Eugenia Victorino សេដ្ឋវិទូម្នាក់នៅក្រុមធនាគារ ANZ នៅក្នុងប្រទេសសិង្ហបុរីបាននិយាយថា «រដ្ឋាភិបាលបានដឹងថា ប្រសិនបើពួកគេចង់ប្រកួតប្រជែងសម្រាប់ការវិនិយោគ ប្រាក់ឈ្នួលទាបគឺមិនគ្រប់គ្រាន់នោះទេ»។ «ពួកគេត្រូវការហេដ្ឋារចនាសម្ព័ន្ធល្អគ្រប់គ្រាន់ក្នុងការទាក់ទាញក្រុមហ៊ុនឱ្យដំឡើងរោងចក្រ។ ការអភិវឌ្ឍនេះត្រូវបានពង្រីកខ្លួនដោយស្មើភាព ដោយមានព្រលានយន្តហោះ និងផ្លូវត្រូវបានសាងសង់ឡើងនៅទូទាំងប្រទេស»។

កិច្ចខិតខំប្រឹងប្រែងទាំងនោះកំពុងទទួលបានលទ្ធផល។ ការវិនិយោគផ្ទាល់ពីបរទេសនេះបានកើនឡើងដល់កម្រិតខ្ពស់បំផុត ១៥,៨ ពាន់លានដុល្លារនៅឆ្នាំ២០១៦ និងសេដ្ឋកិច្ចត្រូវបានព្យាករដោយធនាគារពិភពលោកក្នុងការពង្រីកជាង ៦ ភាគរយរហូតដល់ឆ្នាំ២០១៩ ក្នុងចំណោមអ្នកប្រតិបត្តិកំពូលនៅទសវត្សរ៍នេះ។

បញ្ហាប្រឈមរបស់ខ្លួនគឺគួរឱ្យខ្លាច។ វៀតណាមត្រូវការប្រមាណ ៤៨០ ពាន់លានដុល្លារ រហូតដល់ឆ្នាំ២០២០ សម្រាប់ហេដ្ឋារចនាសម្ព័ន្ធ រួមទាំងរោងចក្រថាមពលចំនួន ១១ កន្លែង ដោយ មានសមត្ថភាពសរុបចំនួន ១៣.២០០ មេហ្គាវ៉ាត់ និងផ្លូវហាយវ៉េ (highways) ប្រមាណ ១.៣៨០ គីឡូម៉ែត្រ នេះបើយោងតាមរដ្ឋាភិបាល។ កាលពីសប្តាហ៍មុន នាយករដ្ឋមន្រ្តីវៀតណាមលោក Nguyen Xuan Phuc បានបញ្ជាឱ្យក្រសួងដឹកជញ្ជូនពន្លឿនផែនការដើម្បីទាក់ទាញការវិនិយោគឯកជនបន្ថែមទៀតសម្រាប់ហេដ្ឋារចនាសម្ព័ន្ធ ដូចជាគម្រោងថវិការបស់រដ្ឋត្រឹមតែអាចបំពេញបានតាមតម្រូវការផ្នែកហិរញ្ញវត្ថុមួយភាគបីប៉ុណ្ណោះ។

លោក Rana Hasan ប្រធានផ្នែកអភិវឌ្ឍសេដ្ឋកិច្ចរបស់ធនាគារអភិវឌ្ឍអាស៊ីបាននិយាយថា ការចូលរួមក្នុងការវិនិយោគឯកជនក្នុងការចំណាយលើផ្នែកហេដ្ឋារចនាសម្ព័ន្ធនៅវៀតណាម អាចនឹងតិចជាង ១០ ភាគរយ។ គាត់បាននិយាយថា នៅប្រទេសឥណ្ឌា វិស័យឯកជនដើរតួនាទីយ៉ាងធំ ដែលមានចំនួនជាង ៣០ ភាគរយនៃការវិនិយោគផ្នែកហេដ្ឋារចនាសម្ព័ន្ធសរុបនៅក្នុងប៉ុន្មានឆ្នាំចុងក្រោយនេះ។

ប្រធានាធិបតីហ្វីលីពីនលោក Rodrigo Duterte បានផ្តោតលើគោលដៅប្រកបដោយមហិច្ឆតានៃការចំណាយផ្នែកហេដ្ឋារចនាសម្ព័ន្ធនៅត្រឹម ៧ ភាគរយនៃ GDP ដែលមានតម្លៃ ១៦០ ពាន់លានដុល្លារ រហូតដល់ឆ្នាំ២០២២៕

ប្រភព : Bloomberg

លោកឧកញ៉ា អូស្មាន ហាស្សាន់ ប្រាប់ដល់សាសនិកឥស្លាមកម្ពុជាឲ្យបន្តការគាំទ្រចំពោះរាជរដ្ឋាភិបាលដើម្បីការអភិវឌ្ឍ

កាលពីថ្ងៃទី២១ ខែមីនា ឆ្នាំ២០១៧ ម្សិលមិញសង្គ្រាមបែកបាក់ជាតិ និងរបបប្រល័យពូជសាសន៍ នាពេលកន្លងទៅបានធ្វើឲ្យកម្ពុជា រងនូវការខាតបង់ច្រើនឥតគណនារាប់ទាំងអាយុជីវិតប្រជាពលរដ្ឋ ហេដ្ឋារចនាសម្ព័ន្ធ នយោបាយ និងសេដ្ឋកិច្ច-សង្គម។ល។ ដែលយើងទាំងអស់គ្នាមិនចង់ឲ្យវាកើតមាននៅលើទឹកដី នៃមាតុភូមិរបស់យើងជាថ្មីម្តងទៀតឡើយ។

នេះជាការលើកឡើងរបស់លោកឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាថ្នាក់ដឹកនាំជាន់ខ្ពស់សាសនិកឥស្លាមកម្ពុជា ក្នុងពិធីសំណេះសំណាលជា មួយប្រជាពលរដ្ឋ តំណាងសាសនិកឥស្លាមគ្រូបង្រៀនឥស្លាម និងក្រុមយុវជនឥស្លាមកម្ពុជា
នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ
។
លោកឧកញ៉ា អូស្មាន ហាស្សាន់ បានបញ្ជាក់ថា កម្ពុជាទើបតែរកបានសន្តិភាពការឯកភាពជាតិទាំងស្រុងនាឆ្នាំ១៩៩៨ ក្រោមនយោបាយ ឈ្នះ ឈ្នះ របស់លោកនាយរដ្ឋមន្ត្រី ហ៊ុន សែន ហើយចាប់ពីពេលនោះមក យើងមានឱកាសពេញលេញក្នុងការកសាងប្រទេស និង
ខឿនសេដ្ឋកិច្ចជាតិ ដោយក្នុងរយៈពេលប៉ុន្មានឆ្នាំចុងក្រោយនេះកម្ពុជាសម្រេចបាននូវកំណើនសេដ្ឋកិច្ចប្រចាំឆ្នាំក្នុងកម្រិតជាង៧% រីឯជីវភាពរបស់ប្រជាពលរដ្ឋក៏បានប្រសើរជាលំដាប់ ដោយយើងបានកាត់បន្ថយនូវអត្រានៃភាពក្រីក្រជារៀងរាល់ឆ្នាំប្រកបដោយមោទនភាព។
លោកថា ទាំងអស់នេះសុទ្ធតែកើតចេញពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានលោក ហ៊ុន សែន ជានាយករដ្ឋមន្ត្រី។ ដូច្នេះប្រជាពលរដ្ឋ ក្នុងនោះ បងប្អូនសាសនិកឥស្លាមកម្ពុជាទាំងអស់ត្រូវមានស្មារតី និងឆន្ទះក្នុងការបន្តការគាំទ្រចំពោះ ការដឹកនាំរបស់រាជរដ្ឋាភិបាលដើម្បីការរីកចំរើនជាបន្តទៀត ពិសេសការទទួលបាននូវការ
យកចិត្តទុកដាក់ពីរាជរដ្ឋាភិបាល មកលើសហគមន៍ឥស្លាមកម្ពុជា បន្ទាប់ពីយើងទទួលបានរួចហើយនូវសេរីភាព ខាងជំនឿសាសនា និងសេរីភាពខាងនយោបាយ។
ក្នុងនាមជាថ្នាក់ដឹកនាំជាន់ខ្ពស់សាសនិកឥស្លាមកម្ពុជា លោកឧកញ៉ា អូស្មាន ហា ស្សាន់ បានប្រាប់ដល់បងប្អូនឥស្លាមកម្ពុជាទាំងអស់ឲ្យគោរពច្បាប់របស់ប្រទេសកម្ពុជា ហើយសូមអ្នកដែលបានចុះឈ្មោះបោះឆ្នោតរួចហើយ ទៅបោះឆ្នោតឲ្យបានគ្រប់ៗគ្នានាពេលខាង មុខ ក្នុងនោះយើងនឹងមានការបោះឆ្នោតជ្រើសក្រុមប្រឹក្សាឃុំ/សង្កាត់ នាថ្ងៃទី៤ ខែមិថុនា ឆ្នាំ ២០១៧ និងការបោះឆ្នោតជ្រើសតាំងតំណាងរាស្ត្រឆ្នាំ២០១៨៕
ប្រភព GN

ការ​វាយ​តម្លៃ​សហគមន៍​សេដ្ឋកិច្ច​​អាស៊ាន​

អាស៊ីបូព៌ា​នៅតែ​បន្ត​​ធ្វើ​ឲ្យ​ចីរភាព​កម្រិត​ខ្ពស់​នៃ​កា​រធ្វើ​សមាហរណកម្ម​សេដ្ឋកិច្ច ប៉ុន្តែ​​​តួរលេខ​គួរ​ឲ្យ​កត់​សម្គាល់​​នៃ​ពាណិជ្ជកម្ម​ខាង​ក្រៅ​តំបន់​នៅតែ​បង្ហាញ​ឡើង​ដោយ​កិច្ច​ព្រមព្រៀង​នា​នា​ដើម្បី​ការ​ពារ​ទប់​ទល់​នឹង​ការ​គាំពារ​និយម​នៅពេល​បច្ចុប្បន្ន​និង​អាច​នៅ​អនាគត។ ​ បើ​គ្មាន​ចល​នា​ពហុភាគី​​ស្ថិត​ក្រោម​អង្គការ​ពាណិជ្ជកម្ម​ពិភព​លោក​នោះទេ សមាហរណកម្ម​តំបន់​បន្ថែម​ទៀត​អាច​បន្ត​​ទៅ​មុខ​តែ​តាម​រយៈ​​កិច្ច​ព្រមព្រៀង​ដែល​កាត់​បន្ថយ​រនាំង​ពាណិជ្ជកម្ម​នៅ​ក្នុង​តំបន់ប៉ុណ្ណោះ​។​

អាស៊ាន​ហាក់​បីដូចជា​កំពុងនាំ​មុខ​​តំបន់​អាស៊ី​ប៉ាស៊ីហ្វិក​ក្នុងការ​បង្កើត​ FTA។ តំបន់​ពាណិជ្ជកម្ម​សេរីអាស៊ាន​ត្រូវ​បាន​អនុវត្ត​នៅ​ឆ្នាំ ១៩៩៣ ហើយ​សហគមន៍​សេដ្ឋកិច្ច​អាស៊ាន​ត្រូវ​បាន​ដំណើរការ​ជា​ផ្លូវ​ការ​នៅចុង​ឆ្នាំ ២០១៥។ សហគមន៍សេដ្ឋកិច្ច​អាស៊ាន​​បាន​ជំរុញ​ទឹក​ចិត្ត​ឲ្យ​ធ្វើ​ហួស​ពី​កិច្ច​ព្រមព្រៀង​ពាណិជ្ជកម្ម​​ធម្មតា​ ដោយ​មាន​គោល​ដៅ​បង្កើត​​ទីផ្សារ​តែ​មួយ​និង​មូល​ដ្ឋាន​ផលិត​កម្ម​ជា​មួយ​នឹង​ការ​អភិវឌ្ឍន៍​ស្មើ​ភាព​ទៅ​ទូទាំង​ប្រទេស​សមាជិក​ទាំង​ ១០ របស់ខ្លួន។​

អាស៊ាន​នឹង​ប្រារព្វ​ខួបទី ៥០ របស់ខ្លួន​នៅ​ឆ្នាំ ២០១៧។ ក្នុង​ខណៈ​ដែល​អាស៊ាន​បាន​​សម្រេច​សមិទ្ធិផល​​នយោ​បាយ​គួរ​ឲ្យ​កត់​សម្គាល់​មួយ​ចំនួន​ក្នុង​អំឡុង​ ៥ ទសវត្សរ៍​កន្លង​ទៅ​នេះ ផែនការ​សមាហរណកម្ម​សេដ្ឋកិច្ច​របស់ខ្លួន​នៅតែ​ជា​ការងារ​កំពុង​ដំណើរការ​នៅ​ឡើយ​ ហើយ​អាច​នៅតែ​ត្រូវ​ការ​ពេល​ជា​ច្រើន​ឆ្នាំ​ ឬ​រហូត​ដល់​រាប់​ទសវត្សរ៍​ទៅ​មុខ​ទៀត។​

លេខាធិការដ្ឋាន​អាស៊ាន​បាន​អះអាង​ថា ការអនុវត្ត​​​ផែនការ​សហគមន៍​សេដ្ឋកិច្ច​អាស៊ាន​ ២០១៥ (AEC Blueprint 2015) ​សម្រេច​បាន​យ៉ាង​ច្រើន​​ក្នុង​រយៈ​ពេល​ប៉ុន្មាន​ឆ្នាំ​កន្លងទៅ​នេះ។ តាម​ជាក់​ស្តែង កម្រិត​នៃ​សមាហរណកម្ម​​នោះ​មាន​ការ​ប្រែប្រួល​យ៉ាង​ធំ​តាម​វិស័យ។ ​ជោគ​ជ័យ​ច្បាស់​ជាង​គេ​តែ​មួយ​ដែល​អាស៊ាន​អាច​មាន​នោះ​គឺ​ការ​កាត់​បន្ថយ​ពន្ធគយ​ក្នុង​ចំណោម​ប្រទេស​សមាជិក​។ ចាប់​តាំង​ពីរ​ការ​អនុវត្ត​​កិច្ច​ព្រមព្រៀង​​ការ​លើក​លែង​ពន្ធ​គយ​ (Common Effective Preferential Tariff) នៅ​ទសវត្សរ៍ទី ៩០ មក ​ចំនួន​ប្រហែល ៩៩ ភាគ​រយ​នៃ​បណ្តាញ​ពន្ធ​គយ​រវាង​ប្រទេស​សមាជិក​នោះ​​ត្រូវ​បាន​កាត់​បន្ថយ​ដល់​សូន្យ។

ជាង​នេះទៅទៀត លំហូរ​ទំនិញ​សេរី​ក្នុង​ចំណោម​ប្រទេស​សមាជិក​អាស៊ាន​​នោះនៅតែ​បន្ត​​រំាង​ស្ទះ​ដោយ​ការ​ប្រើ​ប្រាស់​វិធានការ​មិន​យក​ពន្ធ​គយ (Non-Tariff Measures – NTMs)។ ទាំង​នេះ​អាច​​ជា​​ផល​វិបាក​អវិជ្ជមាន​​លើ​ការ​សម្រេច​ចិត្ត​​របស់​បណ្តា​ក្រុម​ហ៊ុន​និង​រចនាសម្ព័ន្ធ​​របស់​ពាណិជ្ជកម្ម​និង​ឧស្សាហកម្ម​ពាក់​ព័ន្ធ។​

បណ្តា​ប្រទេស​ដូចជា​ឥណ្ឌូនេស៊ី​ ឬ​ម៉ាឡេស៊ី​ដែល​​ប្រើ​ប្រាស់​គោល​នយោ​បាយ​ឧស្សាហកម្ម​ដ៏​សកម្ម​នោះ​បាន​អនុវត្ត​​ NTMs កាន់តែ​ច្រើន។ រោង​ចក្រ​តម្លើង​រថយន្ត​​នៅ​ថៃ ជា​ឧទាហរណ៍ បាន​ត្អូញ​ត្អែ​ជា​យូរ​មក​ហើយ​អំពី​ការ​រឹតត្បឹត​របស់​ម៉ាឡេស៊ី​លើ​ចំនួន​រថយន្ត​ជា​ច្រើន​ដែល​នាំ​ចូល​ទៅ​ម៉ាឡេស៊ី។​

ក្នុង​ខណៈ​ការ​កាត់​បន្ថយ​រនាំង​មិន​យក​ពន្ធ​គយ​គឺ​ជា​គោល​ដៅ​សកម្មភាព​នៅ​ក្នុង​ផែនការ​​សមាហរណកម្ម​សេដ្ឋកិច្ច​អាស៊ាន​នោះ អាស៊ាន​បាន​ពឹង​ផ្អែក​លើ​វិធីស្ម័គ​ចិត្ត​​មួយ​ដើម្បី​កាត់​បន្ថយ​វា ដោយ​ទទួល​ជោគ​ជ័យ​យ៉ាង​មាន​កម្រិត​។ ស្ថិត​ក្រោម​វិធី​ស្ម័គ​ចិត្ត​នោះ ប្រទេស​សមាជិក​អាច​មាន​ចំណុច​មិន​ល្អ​​ដើម្បី​រាយការណ៍​បន្ទាប​​ចំពោះ​រនាំង​ដែល​គេ​កំពុង​ប្រើ​ប្រាស់​នោះ។ ជាង​នេះទៅ​ទៀត មិន​មាន​ប្រព័ន្ធ​ឃ្លាំមើល​ប្រសិទ្ធិភាព​​ក្នុងការ​តាម​ដាន​ការ​ផ្លាស់ប្តូ​របស់ NTMs ក្នុងចំណោម​ប្រទេស​សមាជិក​នោះទេ។

អាស៊ាន​បាន​និង​កំពុង​ចរចា​លើ​សេរីភាវូបនីយកម្ម​សេវាកម្ម​ចាប់​តាំង​ពី​ការ​បង្កើត​កិច្ច​ព្រម​ព្រៀង​ក្រប​ខ័ណ្ឌ​អាស៊ាន​ស្តី​ពីសេវាកម្ម​ក្នុង​ឆ្នាំ ១៩៩៦ មក។ ផែនការ​សហ​គមន៍​សេដ្ឋកិច្ច​អាស៊ាន​​បាន​បង្កើត​គោល​ដៅ​ច្បាស់​ដើម្បី​ដក​ចេញ​ការ​រឹតត្បឹត​ទាំង​អស់​លើ​ពាណិជ្ជកម្ម​ផ្នែក​សេវាកម្ម​នៅ​ត្រឹម​ឆ្នាំ ២០១៥។ ប៉ុន្តែ​បណ្តាប្រទេស​អាស៊ាន​ខ្លះ​ រួម​ទាំង​ថៃ ហ្វីលីពីន និង​ឥណ្ឌូនេស៊ី​ មិន​អាច​បំពេញ​តាម​គោល​ដៅ​របស់​គេ​នៅ​ត្រឹម​ថ្ងៃកំណត់​នោះទេ។

កាន់តែ​ធ្ងន់ សេរីភាវូបនីយកម្ម​សេវាកម្ម​ស្ថិត​ក្រោម​អាស៊ាន​មិន​មាន​ការ​ប្តេជ្ញា​ចិត្ត​​ក្នុងការ​ដោះ​ស្រាយ​បញ្ហា​ឆ្លង​​ដែន​នោះទេ ដូចជា​ការ​តភ្ជាប់​គ្នា​ទៅ​វិញទៅ​មក​សម្រាប់​សេវាកម្ម​ទូរគមនាគមន៍ ឬ​ការ​អាច​ប្រើ​ប្រាស់​ម៉ាស៊ីន​ដក​ប្រាក​ស្វ័យ​ប្រវត្ត​​សម្រាប់​ធនាគារ ដែល​សំខាន់​ចំពោះ​ការ​បង្កើត​​ទីផ្សារ​ប្រកួត​ប្រជែង​។ ភាព​ខុស​គ្នា​ផ្នែក​ច្បាប់​និង​បទប្បញ្ញត្តិ​ក្នុង​ចំណោម​ប្រទេស​សមាជិក​នោះ​ក៏​បណ្តាល​ឲ្យ​មាន​បញ្ហា​ផង​ដែរ។

សេរីភាវូបនីយកម្ម​សេវាកម្ម​ស្ថិត​ក្រោម​អាស៊ាន​នៅ​ក្នុង​ទម្រង់​បច្ចុប្បន្ន​របស់ខ្លួន​នឹង​បរាជ័យ​​ក្នុងការ​បង្កើត​ទីផ្សារ​សេវាកម្ម​តែ​មួយ។ ប្រទេ​សថៃ ហ្វីលីពីន និង​ឥណ្ឌូនេស៊ី​នៅតែ​មិន​អាច​បំពេញ​តាម​គោល​ដៅ​នោះ​នៅ​ត្រឹម​ពេល​កំណត់​ឆ្នាំ ២០១៥ ដដែល។ ការ​ប្តេជ្ញាចិត្ត​ច្បាស់លាស់​របស់​ឥណ្ឌូ​នេស៊ី​និង​ថៃ​ស្ថិត​ក្រោម​ការ​សន្យា​​ចុង​ក្រោយ​នោះ​មាន​​សេវាកម្ម​ជា​ច្រើន​ដែល​​មិន​សំខាន់ ឬ​ថែម​ទាំង​មិន​ផ្តល់​ប្រយោជន៍។​

ក្នុង​ន័យ​នៃ​ការ​លើក​កម្ពស់​ការ​បំលាស់​ទីការ​ងារ​​ឆ្លងដែននោះ អាស៊ាន​ស្ទើ​តែ​មិន​បាន​សម្រេច​​បាន​ទាល់​តែ​សោះ។ ចេញពីទស្សនៈ​​អភិវឌ្ឍន៍​សេដ្ឋកិច្ច​​នោះ ការ​បើក​ច្រក​ទីផ្សារ​​ពល​ករ​គ្មាន​ជំនាញ​តាម​រយៈ​ FTA នោះ​​នឹង​ជា​ជម្រើស​គោល​នយោ​បាយ​ដ៏មាន​ប្រយោជន៍​ ដោយ​ហេតុ​​តែ​ភាព​សម្បូបែប​យ៉ាង​ច្រើន​​ដល់​ពលកម្ម​គ្មាន​ជំនាញ​នៅ​ក្នុង​ប្រទេស​អាស៊ាន​ជា​ច្រើន​ ប៉ុន្តែ​ផែនការ​​សហគមន៍​សេដ្ឋកិច្ច​អាស៊ាន​​នោះ​មាន​បំណង​សម្រួល​​តែ​ការ​បំលាស់​ទី​នៃ​អ្នក​មាន​អាជីព​ជំនាញ​ៗ​ ដែល​បច្ចុប្បន្ន​​រួម​មាន​​អាជីពការ​ងារ​ត្រឹម​តែ​ ៨ ប៉ុណ្ណោះ។ ការ​រៀប​ចំ​​ដើម្បី​សម្រួល​​ការ​បំលាស់​ទី​​​អ្នក​មាន​អាជីព​ទាំង​នេះ​ក៏​បណ្តាល​ឲ្យ​មាន​បញ្ហា​ដែរ។ ក្នុងករណី​ប្រទេស​ថៃ ជា​ឧទាហរណ៍​ លក្ខខណ្ឌ​​​​ដែល​ដាក់​លើ​អ្នក​មាន​អាជីព​​នៅ​អាស៊ាន​នោះ​គឺ​ដូច​គ្នា​ទៅ​នឹង​លក្ខខ​ណ្ឌ​របស់​បណ្តា​ប្រទេស​មិន​មែន​អាស៊ាន​ដែរ។

សម្រាប់​អ្នក​សង្កេតការណ៍​ សមាហរណកម្ម​អាស៊ាន​ កន្លងទៅ បាន​ផ្តល់​លទ្ធផល​ជាក់​ស្តែង​តិចតួចណាស់។ លោកស្រី​ Deborah Elms របស់​មជ្ឈមណ្ឌល​ពាណិជ្ជកម្ម​អាស៊ី​បាន​សន្និដ្ឋាន​ថា មន្ត្រី​អាស៊ាន​បាន​ប្តូរ​វោហារសាស្ត្រ​​​ នៅពេល​ថ្ងៃផុត​កំណត់​នោះ​ដោយ​លើក​ឡើង​ជា​ជំនួស​វិញថា សហគមន៍​សេដ្ឋ​កិច្ច​អាស៊ាន​គួរ​តែ​ត្រូវគេ​មើល​ឃើញ​ថា ជា​ដំណើរការ​ ​មិន​មែន​ជា​ទិសដៅ​នោះ​ទេ។

​ការ​ខ្វះ​ភាព​រីក​ច្រើន​ដើម្បី​ឲ្យ​ស៊ី​ជម្រៅ​ដល់​សមាហរណកម្ម​តំបន់​នៅ​អាស៊ាន​នោះ​គឺ​ភាគ​ច្រើន​ជា​ផល​វិបាក​នៃ​ជំហរ​គាំពារ​និយម​របស់​ប្រទេស​សមាជិក​ភាគ​ច្រើន​ ​លើក​លែង​ចេញ​តែ​សិង្ហបូរី​ប៉ុណ្ណោះ។ ប្រទេសអាស៊ាន​ជា​ច្រើន​បាន​មើល​ឃើញ​គ្នា​ទៅ​វិញទៅ​មក​ថា ជា​គូរ​ប្រជែង​នៅ​ក្នុងការ​​នាំ​ចេញ​ទំនិញ​ទៅ​កាន់ទី​ផ្សារ​ពិភព​លោក ឬ​ការ​ទាក់​ទាញ​វិនិយោគិន​ផ្ទាល់​បរទេស។

ជម្លោះ​នយោ​បាយ​ក្នុង​ស្រុក​ រួម​ជា​មួយ​នឹង​ការ​ខ្វះ​​រដ្ឋាភិបាល​ខ្លាំងនិង​ស្ថិរភាព​នោះ បាន​នាំ​ឲ្យ​មេដឹកនាំ​នយោ​បាយ​នៅ​ក្នុង​ប្រទេស​អាស៊ាន​ជា​ច្រើន​​សម្លឹង​តែ​លើ​ផល​ប្រយោជន៍​ខ្លួន​ឯង ហើយ​បាត់​បង់​ចំណាប់​អារម្មណ៍​របស់​គេ​ដល់​សមាហរណកម្ម​តំបន់។ បើ​មិន​ប្រឈម​មុខ​នឹង​បញ្ហា​សំខាន់​នៃ​ផែនការ​សមាហរណកម្ម​របស់ខ្លួន​នោះទេ អាស៊ាន​នឹង​មិន​សម្រេច​បាន​ទស្សនៈវិស័យ​​ទីផ្សារ​តែ​មួយ​និង​មូល​ដ្ឋាន​ផលិត​កម្ម​តែ​មួយ​នោះបាន​ទេ។​

អាស៊ាន​មាន​មោទនភាព​ខ្លួន​ឯង​ថា ជា​ទី​តាំង​នៃ​កិច្ច​ព្រមព្រៀង​ពាណិជ្ជកម្ម​សេរី​ទ្វេភាគី​នៅ​អាស៊ាន​បូព៌ា។ គំនិត​នៃ​មជ្ឈភាព​អាស៊ាន​ដែល​ស្ថិត​នៅ​ក្នុង​ការ​ផ្តួច​ផ្តើម​គំនិត​របស់​អាស៊ាន​នោះ​បាន​ផ្តោត​លើ​តួនាទី​របស់ខ្លួន​ក្នុងការ​សម្រួល​ដល់​សមាហរណកម្ម​សេដ្ឋកិច្ច​នៅ​តំបន់។ ប៉ុន្តែ​សមាហរណកម្ម​សេដ្ឋកិច្ច​ក្នុង​ចំណោម​ប្រទេស​អាស៊ាន​ កន្លងមក បាន​ផ្តោត​លើ​ការ​បង្កើត​កញ្ចប់កាន់​តែ​ទាក់​ទាញ​មួយ​សម្រាប់​ពហុជាតិ​សាសន៍​ដែល​សម្លឹង​មើល​ធ្វើ​ប្រតិបត្តិការនៅ​ក្នុង​តំបន់​ ជា​ជាង​​លើ​ការ​បង្កើត​ចំណង​កាន់តែរឹង​មាំ​រវាង​សេដ្ឋកិច្ច​របស់​សមាជិក​ទាំងនោះ។​

នៅពេល​វា​ដល់​រឿង​សមាហរណកម្ម​សេដ្ឋកិច្ច​ អាស៊ាន​ត្រូវតែ​មាន​គោល​ដៅ​សម្រេច​បាន​ដល់​ទិសដៅ​សំខាន់​ៗ​ក្នុង​ខណៈ​ទុក​ចោល​គោល​ដៅ​មិន​សូវ​សំខាន់។ និយាយ​បែប​ផ្សេង អាស៊ាន​ត្រូវ​តែ​ផ្តោត​​ខ្លាំង​ជាងអ្វីដែល​ខ្លួន​កំពុង​ធ្វើ​នាពេល​នេះ។ ផែនការ​នាពេល​បច្ចុប្បន្ន​របស់ខ្លួន​​មាន​មហិច្ឆិតា​ជ្រុល​ពេក​ក្នុងការ​ពិចារណា​លើ​ធនធាន​ដ៏មាន​កម្រិត​របស់ខ្លួន។ ផែនការ​សហគមន៍​សេដ្ឋកិច្ច​អាស៊ាន​នោះ​បាន​បង្កើត​​សមាសភាព​សំខាន់​ៗ​ចំនួន ១៧ និង​កំណត់​សកម្ម​ភាព​អាទិភាព​ចំនួន ១៧៦ ដោយ​គ្រប​ដណ្តប់​លើ​លំហូរ​ដោយ​សេរី​នូវ​ទំនិញនិង​ដើម​ទុន​​ ការ​បំលាស់​ទី​​ពល​កម្ម​ជំនាញ​ ការ​អភិវឌ្ឍន៍​​ដោយ​ស្មើ​ភាព​និង​ការ​ការ​ពារ​សិទ្ធិ​លើ​កម្ម​សិទ្ធិ​បញ្ញា។

ការ​ផ្តោ​ត​កាន់តែ​ខ្លាំង​នោះ​នឹង​ជួយ​អាស៊ាន​​ឲ្យ​​ផ្តល់​លទ្ធផល​ជាក់​ស្តែង​​និង​មាន​ន័យ​​ដោយ​មិន​​បំបាត់​​ប្រទេស​សមាជិក ជា​ពិសេស​ប្រទេស​អភិវឌ្ឍ​តិច​ជាង​គេ ចេញ​ពី​ធនធាន​ដ៏​មាន​កម្រិត​របស់គេ។ នេះ​តម្រូវ​ឲ្យ​អាស៊ាន​វិល​ទៅ​រក​បេសកម្ម​សំខាន់​របស់​កិច្ច​ព្រមព្រៀង​ពាណិជ្ជកម្ម​សេរី​ ពោល​គឺ ការ​កាត់​បន្ថយ​រនាំង​​ពាណិជ្ជកម្ម​និង​ការ​សម្រួល​ដល់​ការ​ធ្វើ​ពាណិជ្ជកម្ម​ឆ្លង​កាត់​ព្រំដែន​​ផ្នែក​ទំនិញ សេវា​កម្ម និង​កា​របំលាស់​ទី​ពល​កម្ម​។

ប៉ុន្តែ​កត្តា​ប្រឈម​ពិតប្រាកដ​​សម្រាប់​អាស៊ាន​នោះ​គឺ​មិនមែន​​សេដ្ឋកិច្ច​នោះទេ ប៉ុន្តែ​គឺ​នយោ​បាយ។ អធិបតេយ្យ​ជាតិ​និង​សមាហរណកម្ម​សេដ្ឋកិច្ច​ពេញ​លេញ​​មិន​ស៊ី​សង្វាក់​គ្នា​នោះទេ។ ជោគ​ជ័យ​នៃ​សហមាហរណកម្ម​ពាណិជ្ជកម្ម​របស់​សហភាព​អឺរ៉ុប​ ជាឧទាហរណ៍​ ផ្អែក​លើ​អធិបតេយ្យ​ជា​ក្រុម។ គំនិត​នៃ​អធិបតេយ្យ​ជា​ក្រុម​នោះ​មិន​​​មែនជា​ការ​ធ្វើ​អ្វីមួយ​​ឲ្យ​ចប់​តែ​ម្តង​នោះទេ។ នៅពេល​ចាប់​ផ្តើម សហភាព​អឺរ៉ុប​គឺមានផែនការ​ដ៏សាមញ្ញ​មួយ​ប៉ុណ្ណោះ។ ខ្លួន​មាន​សមាជិក​តិច​ ហើយ​វិស័យ​​លើ​គោល​នយោ​បាយ​តែ​មួយ​គត់​សម្រាប់​អធិបតេយ្យ​ជា​ក្រុម​នោះ​គឺ​ ទីផ្សាររួម​សម្រាប់​ធ្យូង​ថ្ម​និង​ដែក​ថែប។ ខ្លួន​បាន​ពង្រីក​សមាជិក​ភាព​និង​បេសកកម្ម​របស់ខ្លួន​ជា​សន្សឹម​ៗ​។

បើ​បណ្តា​ប្រទេស​អាស៊ាន​មិន​មាន​ឆន្ទៈ​​បង្កើត​អធិបតេយ្យ​របស់​គេ​ជា​ក្រុម​និង​ដោះ​ស្រាយ​កត្តា​ប្រឈម​នយោ​បាយ​នៅ​ចំពោះ​មុខ​នោះទេ ផែនការ​សហគមន៍​សេដ្ឋកិច្ច​អាស៊ាន​នឹង​មិន​មាន​ដំណើរ​ការ​នោះទេ ហើយ​អាស៊ាន​នឹង​មិន​គួរ​តែ​ជា​ទី​កន្លែង​​​និយាយ​ការ​ងារ​ចោល​នោះទេ៕

លោក ហោ ណាំហុង ប្រធានគណៈកម្មាធិការសម្របសម្រួលខាងកម្ពុជាបានដឹកនាំកិច្ចប្រជុំផ្ទៃក្នុងកម្ពុជាដើម្បីត្រៀមរៀបចំ កិច្ចប្រជុំលើកទី៤នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន

កាលពីថ្ងៃទី២២ ខែមីនា ឆ្នា២០១៧ លោកឧបនាយករដ្ឋមន្ត្រី ហោ ណាំហុង ប្រធានគណៈកម្មាធិការសម្របសម្រួលខាងកម្ពុជាបានដឹកនាំកិច្ចប្រជុំផ្ទៃក្នុងកម្ពុជាដើម្បីត្រៀមរៀបចំ កិច្ចប្រជុំលើកទី៤នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន នាពេលខាងមុខ ដោយកិច្ចប្រជុំនេះបានប្រព្រឹត្តទៅនៅវិមានសន្តិភាព ។

ក្នុងកិច្ចប្រជុំនេះលោកឧបនាយករដ្ឋមន្ត្រី ហោ ណាំហុង បានលើកយកនូវបញ្ហាមួយចំនួន និងបានជំរុញឱ្យស្ថាប័នពាក់ព័ន្ធនានាយកចិត្តទុកដាក់ក្នុងនោះមាន៖
វិស័យ ហេដ្ឋារចនាសម្ព័ន្ធ ដោយពង្រឹងការតភ្ជាប់ហេដ្ឋារចាសម្ព័ន្ធដឹកជញ្ជូន ជាពិសេសផ្លូវល្បឿន លឿន ភ្នំពេញ-ព្រះសីហនុ ផ្លូវដែក ផ្លូវទឹក និងផ្លូវអាកាស ធ្វើយ៉ាងណាឲ្យមានការហោះហើរ ត្រង់ពីចិនមកកម្ពុជា ដើម្បីឲ្យមានទេសចរចិនមកកាន់កម្ពុជាកាន់តែច្រើន។ រួមគ្នាជំរុញ “ផ្លូវ មួយ ខ្សែក្រវ៉ាត់មួយ” ដែលមានសារៈសំខាន់ជាគន្លឹះសម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយ។
វិស័យថាមពលៈ លោកឧបនាយករដ្ឋមន្រ្តី ហោ ណាំហុងស្នើចិនជួយដល់កម្ពុជារៀបចំផែនការថាមពលប្រើ ប្រាស់ពន្លឺថ្ងៃ ដែលមានតម្លៃថោក និងជាថាមពលស្អាត។ លើកទឹកចិត្តឲ្យសហគ្រាសចិនចូល រួមកសាង និងពង្រីកបណ្តាញអគ្គិសនីតាមជនបទ។
វិស័យកសិកម្មៈ ស្នើចិនជួយកម្ពុជា បង្កើតផែនការអភិវឌ្ឍកសិកម្មតាមបែបទំនើប បង្កើនកិច្ចសហប្រតិបត្តិការលើដំណាំកៅស៊ូ ធម្មជាតិ អង្ករ ដំឡូងមី បន្លែ ផ្លែឈើ ពោត។ល។ ជំរុញកិច្ចសហប្រតិបត្តិការលើការចិញ្ចឹម សត្វ និងនេសាទ ដើម្បីបង្កើនកម្រិតបច្ចេកវិទ្យាកសិ-ឧស្សាហកម្ម ដើម្បីនាំចេញទៅបរទេស។

ការសាងសង់កំពង់ផែសមុទ្រនៅខេត្តព្រះសីហនុ និងការអភិវឌ្ឍន៍តំបន់សេដ្ឋកិច្ចពិសេស នៅខេត្តព្រះសីហនុ ក្នុងនោះរួមមានការពង្រីកការសាងសង់កំពង់ផែសមុទ្រ ជាពិសេសកំពង់ផែនៅខេត្តព្រះសីហនុ ដែលជាចម្រុះនៃការនាំចេញ-នាំចូលទំនិញ។ លើកទឹកចិត្តសហគ្រិន ចិន ដើម្បីជម្រុញតំបន់សេដ្ឋកិច្ចពិសេសខេត្តព្រះសីហនុ ឱ្យក្លាយទៅជាទីតាំងសំខាន់សម្រាប់ សហគ្រាសចិនធ្វើការវិនិយោគនៅកម្ពុជា។ វិស័យវប្បធម៌ៈ លើកទឹកចិត្តក្នុងការធ្វើទំនាក់ទំនង និងកិច្ចសហប្រតិបត្តិការវប្បធម៌ ដើម្បីលើកកម្ពស់ការយល់ដឹង និងការទទួលស្គាល់ តម្លៃស្នូលនៃវប្បធម៌បុរាណ និងទំនើបរបស់ប្រទេសកម្ពុជា និងចិន ។

ជម្រុញកិច្ចសហប្រតិបត្តិការឲ្យបានគ្រប់ជ្រុងជ្រោយលើវិស័យទេសចរណ៍ ធ្វើយ៉ាងណាឱ្យមានទេសចរចិន ប្រមាណ២លាននាក់មកទស្សនាកម្ពុជាក្នុងឆ្នាំ២០២០។
គណៈកម្មាធិការសម្របសម្រួលអន្តររដ្ឋាភិបាលខាងកម្ពុជា បានចាត់ទុកកិច្ចសហប្រតិ បត្តិការកម្ពុជាចិន ភាពជាដៃគូយុទ្ធសាស្ត្រគ្រប់ជ្រុងជ្រោយ គឺមិនគ្រាន់តែដើម្បីបំរើផល ប្រយោជន៍ជាមូលដ្ឋានសម្រាប់ប្រជាជននៃប្រទេសទាំងពីរទេ តែវាជាការរួមចំណែកជាវិជ្ជមាន ដល់សន្តិភាព ស្ថេរភាព និងការអភិវឌ្ឍន៍សម្រាប់តំបន់ថែមទៀតផង។
សូមបញ្ជាក់ថា កិច្ចប្រជុំលើកទី៤ នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិននឹងធ្វើឡើងនៅខេត្តសៀមរាប នាចុងខែមីនា ឆ្នាំ២០១៧នេះ៕
ប្រភពពី GN

បន្ទាប់​ពីការចាកចេញរបស់អង់គ្លេស តើ​កិច្ច​ព្រមព្រៀងពាណិជ្ជកម្ម​អាស៊ាន និងអឺរ៉ុប​មាន​ន័យ​ដូចម្តេច​?​

បន្ទាប់​ពីមាន​សកលភាវូនីយកម្ម​ជាបន្តបន្ទាប់​ក្រោយ​សង្គ្រាម​លោកលើទី២មក ព្រឹត្តិការណ៍​ជាប​ន្តបន្ទាប់​បាន​ឱ្យដឹងថា ការ​ធ្វើ​សកលភាវូនីយកម្ម​នេះកំពុងតែ​មាន​ភាព​បត់បែន​​។ ពាណិជ្ជ​កម្ម​អន្តរជាតិ ដែលមានសមាមាត្រ​មួយ​នៅក្នុង​ផលិតផល​ក្នុងស្រុកសរុប​ GDP របស់​សកលលោក​នោះ បាន​ឈប់​កើនឡើង​ទៀតហើយ​នៅក្នុង​សតវត្សរ៍ចុង​ក្រោយនេះ​។

អារម្មណ៍​ប្រឆាំងនឹង​សកលភាវូនីយកម្ម​ក៏កំពុងតែងើបឡើង​ផងដែរ ​នៅក្នុង​សហភាពអឺរ៉ុប​ កន្លែង ដែល​ប្រើប្រាស់​រូបិយបណ្ណ​​រួម​មួយ (​បើទោះបីជា​អង់គ្លេស​មាន​រូបិយ​បណ្ណ​ផោន​ដោយខ្លួន​ឯង​ក៏​ដោយ)។

នៅពេលដែល​អង់គ្លេស​បានបោះឆ្នោតចាកចេញ​ពីសហភាពអឺរ៉ុប​កាលពីឆ្នាំ​មុន លោកស្រី​ Theresa May ត្រូវបាន​ដាក់​ជំនួស​លោក David Cameron ដែលជា​នាយក​រដ្ឋមន្ត្រី​អង់គ្លេស​។ សម្រាប់​លោកស្រី និង​គណៈរដ្ឋមន្ត្រី​របស់លោកស្រី​បាន​ឱ្យដឹងថា ការចាកចេញ​របស់​អង់គ្លេស​គឺនៅតែមាន​ន័យថា ជា​ការចាកចេញ​របស់អង់គ្លេស​ដដែល​ (Brexit mean Brexit) ហើយ​នៅ​​ចុង​ខែ​មីនា​ លោកស្រី មាន​បំណងចង់​សម្រេច​បញ្ចប់នូវ​គម្រោង​ចាកចេញពីសហភាពអឺរ៉ុប​ក្នុងរយៈពេល​ ២ឆ្នាំ​។​

បន្ទាប់​ពីការចាកចេញ​ពីសហភាពអឺរ៉ុប​របស់អង់គ្លេសនេះ តើ​សហភាពអឺរ៉ុប​មាន​ន័យ​យ៉ាង​ដូច​ម្តេច​ចំពោះ​អាស៊ាន​? ចាប់ពីឆ្នាំ​២០០៥ដល់​២០១៥មក សហភាពអឺរ៉ុបដែលមាន ២៨ប្រទេស​មាន​ន័យថា សហភាពអឺរ៉ុប​ជាទីផ្សារ​នៃការ​នាំចេញ​របស់​អាស៊ាន​ដល់ទៅ​ ១៣ភាគរយ​។ ការនាំចេញ​របស់​អាស៊ាន​ទៅកាន់សហភាពអឺរ៉ុប​មាន​ដូចជា គ្រឿងអេឡិចត្រូនិក(២៥​ភាគរយ) ម៉ាស៊ីន​(១៥ភាគរយ) សំលៀកបំពាក់(៨ភាករយ) និង​ស្បែកជើង​(៦ភាគរយ)។ កាលពីឆ្នាំ​២០១៥ ការនាំចេញ​របស់​អង់គ្លេស​ទៅកាន់​អាស៊ាន​មានចំនួន ១,៥​ភាគរយ​។

ចាប់ពីឆ្នាំ២០០៥ដល់២០១៥ដដែល​ សហភាពអឺរ៉ុប ​ដែលមាន​ ២៨ប្រទេសនេះ​មាន​ន័យថា​ជាប្រភពនៃការនាំចូលរបស់​អាស៊ាន​ដល់​ទៅ​ ១០ភាគរយ​។ ការនាំចូល​​សំខាន់រ​បស់​អាស៊ាន​ពីសហភាពអឺរ៉ុប​រួមមាន​ គ្រឿងម៉ាស៊ីន(២០ភាគរយ) គ្រឿង​អេឡិកត្រូនិក​(១៦ភាគរយ) យន្ត​ហោះ​(៥ភាគរយ) រថយន្ត(៥ភាគរយ) និង​ឱសថ​(៥ភាគរយ)​។ អង់គ្លេសគឺជាប្រភពនៃការនាំចូល​របស់​អាស៊ា​ន​ចំនួន ១,១​ភាគរយ។

សហភាពអឺរ៉ុប​ក៏មានន័យផងដែរថា ខ្លួន​មាន ១៩ភាគរយ​នៃ​ការវិនិយោគ​បរទេសផ្ទាល់​សរុប​នៅក្នុង​តំបន់អាស៊ាន​ពីឆ្នាំ​២០០៥ ដល់ ​២០១៥​ដែរ​។ អ្នកវិនិយោគច្រើន​ជាងគេ​របស់​អឺរ៉ុប​នៅក្នុង​តំបន់អាស៊ាន​មានដូចជា ប្រទេស Netherland (៦ភាគរយ)​ UK (៤ភាគរយ) Luxembourg (៣ភាគរយ) France (៣ភាគរយ) និង Denmark (១ភាគរយ)។

ភាគច្រើន​នៃការវិនិយោគរបស់​សហភាពអឺរ៉ុប​គឺ​ពាណិជ្ជកម្ម​លក់រាយនិង​ដុំ​ ហិរញ្ញវត្ថុនិង​ធានារ៉ាប់រង រ៉ែ និង​ធ្យូងថ្ម ហើយនិង​អចលនទ្រព្យ​ជាដើម​។

ឥឡូវនេះ តើ​អាស៊ាន​នឹង​ប៉ះពាល់ដល់​សហភាពអឺរ៉ុបឬទេ?​ ពីឆ្នាំ​២០០៥ដល់២០១៥​ អាស៊ាន​មានតែ ២ភាគរយប៉ុណ្ណោះ​នៃទីផ្សារ​នាំចេញរបស់សហភាពអឺរ៉ុប​ និង​មាន ៣ភាគរយនៃ​ការនាំចូល​របស់​សហភាពអឺរ៉ុប​។ ប៉ុន្តែយ៉ាងណាក៏ដោយ រឿងនេះនឹង​ផ្លាស់ប្តូរ​។ ប្រសិនបើ​យើង​ក្រឡេក​ទៅលើ​ទិន្នាការ​ពាណិជ្ជកម្ម​នៅក្នុងរយៈពេល​ ៣ទសវត្សរ៍ចុងក្រោយ​នេះ​ ប្រទេស ៥ ក្នុង​ចំណោម​ប្រទេស ៧ ដែលទទួលបាន​ផល​ចំណេញ​ពី​តម្លៃ​បន្ថែម​នៅក្នុង​វិស័យឧស្សាហកម្ម​គឺ​ជាប្រទេស​កំពុងអភិវឌ្ឍ​ ដូចជា ចិន កូរ៉េ ឥណ្ឌា ឥណ្ឌូនេស៊ី និង​ថៃ​។

ត្រឹម​ឆ្នាំ​២០៥០ ប្រទេស ៦ក្នុងចំណោម​ប្រទេសសេដ្ឋកិច្ច​ដ៏ធំបំផុត​ចំនួន ៧​នឹង​ក្លាយជា​ប្រទេស​ដែលមាន​សេដ្ឋកិច្ច​ទំនើប​។ ឥណ្ឌូនេស៊ីនឹងស្ថិតលំដាប់ទី​៤។ ហ្វីលីពីន វៀតណាម ថៃ និងម៉ាឡេស៊ី​ នឹង​ស្ថិតក្នុង​ចំណោម​ប្រទេស​សេដ្ឋកិច្ច​ធំ​បំផុត​ក្នុងចំណោម​២៥​ ដោយ​រួម​ជាមួយនឹង​ប្រទេស​អាល្លឺម៉ង់ ចក្រភពអង់គ្លេស បារាំង និង​អ៊ីតាលី​។ ដូច្នេះ នឹងមានការ​ផ្លាស់ប្តូរ​នៅក្នុង​កំណើន​សេដ្ឋកិច្ច និង​ពាណិជ្ជកម្ម ​ជាក់ជាមិនខាន​។

ជាងនេះទៅទៀតនោះ នៅពេលដែលមានទំនាក់ទំនង​ពាណិជ្ជកម្ម​ អាស៊ាន​នឹង​ក្លាយជា​តំបន់មួយដែល​អាច​ត្រៀម​លក្ខណៈ​ទុកជាមុនបាន​​។ អាស៊ាន​បានបង្កើត​តំបន់ពាណិជ្ជកម្ម​សេរី​​របស់ខ្លួន​​កាលពីឆ្នាំ​១៩៩២ មុនអង្គការ​ពាណិជ្ជកម្ម​ពិភពលោក​ ហើយបាន​បង្កើត​​ពាណិជ្ជកម្ម​អាស៊ាន​នៅក្នុង​កិច្ចព្រមព្រៀង​ទំនិញ​ឆ្នាំ​២០០៩​។ នៅក្នុងក្របខណ្ឌ​នៃ​ការ​ធ្វើ​សមាហរណកម្ម ការប្រឈមសំខាន់រ​បស់​អាស៊ាន​នៅពេល​នេះ​​គឺវិធាន​ការ​គ្មាន​ពន្ធគយ​(non-tariff measures – NTMs)។ ខណៈដែល​វិធានការ​គ្មាន​ពន្ធគយ​ជាច្រើន​មិនបាន​ឆ្លុះបញ្ចំាងនូវ​កម្រិត​គាំពានិយម​នោះ តម្លាភាព​នៃវិធានការ​នេះ​​ពិតជា​បង្ក​បញ្ហាដល់ពាណិជ្ជកម្ម​នៅក្នុងតំបន់​នេះ​។ គំនិត​នៃការ​ធ្វើឱ្យប្រសើ​រឡើងនៃ​​តម្លាភាព​នៅក្នុង​វិធានការ​គ្មានពន្ធគយ​នេះ​គឺ​មានភាពយឺតយ៉ាវ​ចាប់តាំងពីដំបូង​។​

យ៉ាងណាក៏ដោយ មាន​ ឬគ្មានការ​ចាកចេញរបស់​អង់គ្លេស​ សហភាពអឺរ៉ុប​នៅតែ​ទីផ្សារ​ដ៏សំខាន់​មួយរបស់​អាស៊ានដដែល​។ ប៉ុន្តែ​សហភាពអឺរ៉ុប​នឹងមិនអាចក្លា​យ​ជា​គំរូរបស់​អាស៊ាន​ទេ​។

ដោយ​រៀនតាម​គំរូកិច្ច​ព្រមព្រៀង​ពាណិជ្ជកម្មរ​របស់​សហភាពអឺរ៉ុប វាប្រហែល​ជា​បន្សល់​នូវ​ការ​ងារជាច្រើន​ដល់​បណ្តាប្រទេស​អាស៊ាន​ភាគច្រើន​ ប្រសិនបើ​អាស៊ាន​បន្ត​ចូល​ក្នុង​កិច្ចព្រមព្រៀង​ពាណិជ្ជកម្ម​អាស៊ាន-​អឺរ៉ុបនោះ​ ជាពិសេស​បញ្ហា​កម្មសិទ្ធ​បញ្ញា ការវិនិយោគ សហគ្រាស​របស់​រដ្ឋ​ គោលនយោបាយ​ប្រកួតប្រជែង ច្បាប់ការងារ និង​ច្បាប់​ដែលទាក់ទងនឹង​បរិស្ថាន​ពាណិជ្ជកម្ម​ជាដើម​។

ប៉ុន្តែ​សម្រាប់​រឿងមួយ​ ដែល​អាស៊ាន​ និង​អឺរ៉ុប​ត្រូវ​​ចាប់ផ្តើម​​ធ្វើការងារ​ជាមួយគ្នានោះ​ គឺ​វិធានការ​គ្មាន​ពន្ធគយ​។ ស្នងការពាណិជ្ជកម្ម​របស់​សហភាពអឺរ៉ុប​ លោកស្រី​ Cecilia Malstrom បានបង្ហាញនៅក្នុងកិច្ច​ប្រជុំកំពូល​ពាណិជ្ជកម្មសហភាពអឺរ៉ុប-អាស៊ានថា សហភាពអឺរ៉ុប​នៅតែបន្ត​ភ្ជាប់​​ពាណិជ្ជកម្ម​ជាមួយនឹង​ដៃគូរពាណិជ្ជកម្មដដែល​ ខណៈដែល​សហភាពអឺរ៉ុបនៅតែបន្ត​ជំរុញ​តម្លៃនៃការអភិវឌ្ឍ​ប្រកបដោយ​ចីរភាព និង​កំណើន​សេដ្ឋកិច្ច​ដាច់ខាតដដែល​។

នេះ​បានបង្កប់ន័យថា សហភាពអឺរ៉ុបនឹង​បន្ត​ភ្ជាប់​ពាណិជ្ជកម្មជាមួយនឹង​តំបន់​អាស៊ាន និង​ប្រទេស​ជាច្រើន​ផ្សេងទៀត ប្រសិនបើ​ប្រទេសទាំងអស់នោះអាច​ផ្តល់​នូវ​បទ​ដ្ឋាន​តាមសហភាពអឺរ៉ុប​បានផ្តល់ឱ្យ​ ដោយរាប់ទាំងសុវត្ថិភាព សុខភាព និង​បរិស្ថាន​ជាដើម​៕

ប្រភព : Jakarta Post ចុះថ្ងៃទី២១ ខែមីនា ឆ្នាំ២០១៧

លោក សុខ ឥសាន ៖ គណបក្សចាញ់ឆ្នោតឆ្លៀតកេងចំណេញខាងនយោបាយ!

នៅថ្ងៃទី២៣ ខែមីនា ឆ្នាំ២០១៧ លោក សុខ ឥសាន អ្នកនាំពាក្យគណបក្សប្រជាជន​កម្ពុជា បានបញ្ជាក់ ជូនសាធារណជនពីការពិតពាក់ព័ន្ធនឹងគណបក្សចាញ់ឆ្នោតដែល​តែង​តែកេងចំណេញខាងនយោបាយនាពេលកន្លងមក ដែលមានខ្លឹមសារដូចខាងក្រោម៖

លោក សុខ ឥសាន បានបញ្ជាក់ថា នៅក្នុងរបបប្រជាធិបតេយ្យសេរីពហុបក្ស និងការបោះឆ្នោតអនុវត្តតាមប្រព័ន្ធសមាមាត្រនៅពេលគណបក្សណាបានឈ្នះឆ្នោតគឺគណបក្សនោះយកកម្មវិធីនយោបាយរបស់ខ្លួនមកអនុវត្ត​និងប្រែក្លាយទៅជាកម្មវិធីនយោបាយរបស់រាជរដ្ឋាភិបាលរបស់ខ្លួនដែលត្រូវបានប្រជាពល​រដ្ឋជាម្ចាស់ឆ្នោតគាំទ្រ។

លទ្ធផលនៃកម្មវិធីនយោបាយរបស់រាជរដ្ឋាភិបាល គឺជាស្នាដៃរបស់រាជរដ្ឋាភិបាល ក៏ដូចជារបស់គណបក្សឈ្នះឆ្នោតដែរ។ ប៉ុន្តែ  តាមការកត់សម្គាល់ នៅពេលគណបក្សឈ្នះឆ្នោត និងរាជរដ្ឋាភិបាលយកកម្មវិធីនយោបាយរបស់ខ្លួនទៅអនុវត្តបានចេញជាលទ្ធផល ឬជាជ័យជំនះ បែរជាគណបក្សចាញ់ឆ្នោតឆ្លៀតកេងយកចំណេញខាងនយោបាយ ដោយពោលពាក្យថា លទ្ធផល ឬជ័យជំនះទាំងនេះ  បានមកដោយសារខ្លួនតវ៉ាឬខិតខំទាមទារទៅវិញ។ ឧទា​​ហរណ៍​ដូចជា៖ – ការតម្លើងប្រាក់បៀរវត្សបុគ្គលិកមន្ត្រីរាជការកងកម្លាំងប្រដាប់អាវុធ – ការ​ប្រគល់តូបក្នុងផ្សារជូនអាជីវករកាន់កាប់លក់ដូរតកូនតចៅ – ការបញ្ចុះអត្រាការប្រាក់ពីគ្រឹះស្ថានមីក្រូហិរញ្ញវត្ថុមកនៅ១៨ភាគរយក្នុង១ឆ្នាំ – ការបង្កើតទីផ្សារការងារជូនយុវជនទាំងនៅក្នុងស្រុកនិងក្រៅស្រុក – ការបោះបង្គោលព្រំដែនជាមួយប្រទេសជិតខាង – ការលុបចោលកិច្ចសន្យាវិនិយោគរបស់ក្រុមហ៊ុនមួយចំនួនដែលមិនគោរពកិច្ចសន្យា  – ការបញ្ចុះថ្លៃប្រើប្រាស់ឋាមពលអគ្គិសនី  – ការលុបចោលកិច្ចសន្យាវិនិយោគផ្លូវវេងស្រេងនិងផ្លូវជាតិលេខ៤ដោយទុកឱ្យប្រជាជនប្រើប្រាស់មិនបង់ថ្លៃ – ការលុបចោលគំរោងសាងសង់ទំនប់វារីអគ្គិសនី នៅតំបន់អារ៉ែង ។ល និងល។

សរុបមក ការខិតខំអនុវត្តកម្មវិធីនយោបាយរបស់រាជរដ្ឋាភិបាលតាមផែនការកំណត់ត្រូវបានបក្សប្រឆាំងឆ្លៀតឃោសនាបំភ័ន្តមតិប្រជាជនថាមកពីខ្លួនតវ៉ា ឬទាមទារ ទើបបានសម្រេចលទ្ធផលយ៉ាងដូច្នេះ  នេះហើយបានហៅថាជាការឆ្លៀត«កេងចំណេញខាងនយោបាយ»៕

ឃាតករ ជួប សម្លាប់ ត្រូវបានតុលាការកាត់ទោសជាប់គុកមួយជីវិត និងបើកការស៊ើបអង្កេតដល់អ្នកផ្តល់អាវុធ

ឃាតករ ជួប​ សម្លាប់ ត្រូវបានតុលាការសម្រេចកាត់ទោសដាក់គុកមួយជីវិតពាក់ព័ន្ធករណីបាញ់សម្លាប់បណ្ឌិត កែម ឡី នេះបើយោងតាមមន្រ្តីសាលាដំបូងរាជធានីភ្នំពេញឱ្យដឹងនៅថ្ងៃ​ទី២៣ ខែមីនា ឆ្នាំ២០១៧។ ក្រៅពីតុលាការសម្រេចកាត់ទោសឃាតករ ជួប​ សម្លាប់ អស់មួយជីវិត តុលាការបានសម្រេចបំបែកសំណុំរឿងមួយទៀត ដោយប្រកាសបើកការស៊ើបអង្កេត​ទៅលើអ្នកផ្តល់អាវុធដើម្បីសម្លាប់លោក កែម ឡី និងអ្នកនាំឃាតករ ជួប សម្លាប់ មកស្គាល់លោក កែម ឡី នេះ​បើ​តាម​ការ​បញ្ជាក់​របស់​លោក​ យុង​ ផានិត​ មេធាវី​ការពារ​ក្ដី​ ជួប​ សម្លាប់។

តាមមន្រ្តីតុលាការឱ្យដឹងថា ឃាតករ ជួប​ សម្លាប់ ត្រូវបានតុលាការសម្រេចកាត់ទោសដាក់គុកមួយជីវិតពាក់ព័ន្ធករណីបាញ់សម្លាប់ បណ្ឌិត កែម ឡី កាលពីថ្ងៃទី​១០ ខែ​កក្កដា​ ឆ្នាំ​២០១៦​ នៅចំណុច​ក្នុង​ទីតាំង​ស្តារម៉ាត​ នៃ​ស្ថានីយ​ប្រេង​ឥន្ធនៈ​កាល់តិច​បូកគោ​ ស្ថិត​នៅ​កាច់ជ្រុង​មហា​វិថី​ព្រះ​មុនីវង្ស​ និង​មហាវិថី​ម៉ៅសេទុង​ ក្នុង​សង្កាត់​ទន្លេ​បាសាក់​ ខណ្ឌ​ចំការមន​។ ការប្រកាសសាលក្រមនេះ ធ្វើឡើងបន្ទាប់ពីតុលាការក្រុងភ្នំពេញ បានបើកសវនាការ កាលពីថ្ងៃទី០១ ខែមីនា ឆ្នាំ២០១៧ ជាមួយនឹងការបង្ហាញវីដេអូមួយស្តីអំពីឃាតកម្មនេះ។ លោក ជួប សម្លាប់ ត្រូវបានមន្ត្រីពន្ធនាគារ នាំទៅដល់សាលាដំបូងរាជធានីភ្នំពេញនៅវេលាម៉ោង៨៖០០នាទី ព្រឹកថ្ងៃព្រហស្បតិ៍ទី២៣​ ខែមីនា ឆ្នាំ២០១៧នេះ ដើម្បីស្តាប់សាលក្រម។ ចំណែកសន្តិសុខនៅសាលាដំបូងរាជធានីភ្នំពេញ ត្រូវបានរឹតបន្តឹងខុសធម្មតា។ នៅក្នុងសវនាការជាបន្តបន្ទាប់កន្លងទៅនោះ លោក «ជួប​ សម្លាប់»​ បានសារភាពថា​ ខ្លួនជា​អ្នក​បាញ់​សម្លាប់​ លោក​បណ្ឌិត​ កែម​ ឡី​ ដោយសារ​ខឹង​លោក​ កែម​ ឡី​ ជំពាក់​ប្រាក់​មិន​សង​ ហើយ​​​អះអាងថា គ្មាន​អ្នក​នៅ​ពី​ក្រោយ​ខ្នងនៃឃាតកម្មនេះនោះ​ទេ​។

សូម​បញ្ជាក់​ថា​ បុរសម្នាក់ដែលមានរហ័សនាមថា «ជួប​ សម្លាប់»​ ​អាយុ៣៨ឆ្នាំ ត្រូវ​បាន​សមត្ថកិច្ច​ឃាត់​ខ្លួន​ភ្លាមៗ​ ក្រោយ​ពី​បាញ់​សម្លាប់​លោក​បណ្ឌិត​ កែម​ ឡី​ កាលពី​វេលា​ម៉ោង​៨៖៥០នាទី​ ព្រឹក​ថ្ងៃ​ទី​១០ ខែ​កក្កដា​ ឆ្នាំ​២០១៦​ នៅចំណុច​ក្នុង​ទីតាំង​ស្តារម៉ាត​ នៃ​ស្ថានីយ៍​ប្រេង​ឥន្ធនៈ​កាល់តិច​បូកគោ​ ស្ថិត​នៅ​កាច់ជ្រុង​មហា​វិថី​ព្រះ​មុនីវង្ស​ និង​មហាវិថី​ម៉ៅសេទុង​ ក្នុង​សង្កាត់​ទន្លេ​បាសាក់​ ខណ្ឌ​ចំការមន​។ ក្រោយការចាប់ខ្លួននេះ តំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ «ជួប សម្លាប់» ចំនួន២ករណី ក្នុងនោះរួមមានបទឃាតកម្មគិតទុកជាមុន និងបទកាន់កាប់អាវុធគ្មានការអនុញ្ញាត៕

ឧបនាយករដ្ឋមន្រ្តី ទៀ បាញ់៖ ក្រសួងការពារជាតិមិនបានចំណាយថវិកាលើសលប់ និងខ្ជះខ្ជាយឡើយ

ឧបនាយករដ្ឋមន្រ្តី ទៀ បាញ់ រដ្ឋមន្រ្តីក្រសួងការពារជាតិ បានថ្លែងប្រតិកម្មចំពោះអ្នករិះគន់ និងចោទប្រកាន់ថា ក្រសួងការពារជាតិបានចំណាយថវិកាលើសលប់ និងមិនត្រឹមត្រូវទៅតាមផែនការកំណត់។ លោកឧបនាយករដ្ឋមន្រ្តីថា ថវិកាដែលចំណាយសម្រាប់ក្រសួងការពារជាតិ គឺត្រូវបានគិតគូរយ៉ាងច្បាស់លាស់និងមិនមានភាពខ្ជះខ្ជាយនោះឡើយ។

ឆ្លើយតបការរិះគន់រឿងចាយវាយថវិកានេះ ក្នុងពិធីប្រគល់និងទទួលសម្ភារៈយោធា របស់កូរ៉េខាងត្បូង នៅវិទ្យាស្ថានបច្ចេកទេសយោធាតេជោ ហ៊ុន សែន ស្ថិតក្នុងស្រុកសំរោងទង ខេត្តកំពង់ស្ពឺ នាថ្ងៃទី២៣ ខែមីនា ឆ្នាំ២០១៧នេះ ឧបនាយករដ្ឋមន្រ្តី ទៀ បាញ់ បានបញ្ជាក់ថា ក្រសួងការពារជាតិបានកំណត់និងផ្តោតជាសំខាន់ការចំណាយទៅលើកិច្ចការសង្គមជាសំខាន់ៗ និយាយឱ្យចំគឺចំណាយលើការបើកប្រាក់បៀវត្សរ៍ជូនកងទ័ពឱ្យមានភាពប្រសើរឡើង ជាង​មុនតាមរយៈការផ្តល់ប្រាក់ប្រៀវត្សរ៍ឱ្យកាន់តែកើនឡើងស្របតាមគោលការណ៍របស់រាជរដ្ឋាភិបាល មិនមែនតែកងទ័ពទេគឺជាទូទៅរហូតដល់ឆ្នាំ២០១៨មិនឱ្យទាបជាង ១លានរៀលនោះទេ។

លោកឧបនាយករដ្ឋមន្រ្តី ទៀ បាញ់ បានបញ្ជាក់ថា «អ្នកដែលរិះគន់នេះ បានតែថាទេ ពេលខ្លះ មិនបានដឹងពីការលំបាករបស់បងប្អូនកងទ័ពយ៉ាងណា? ការផ្តល់ និងការជួយនេះ គឺជាឱកាសល្អមួយ ចឹងបានខ្ញុំចេះតែអរគុណ ដូចជាប្រទេសកូរ៉េ បានជួយកម្ពុជាដូចជាជួយរំលែកការលំបាកមួយហើយយើងក៏គ្មានថវិកាណាទៅទិញនិងបង្កើនសម្ភារៈ បំពាក់ដល់ អង្គភាពនោះទេ អត់មានលុយទេ លុយនឹងបើកតែប្រាក់ខែ អស់បាត់ហើយគ្មានលុយឯណោះទៅចំណាយខ្ជះខ្ជាយលើសលប់ដូចការចោទប្រកាន់នោះទេ»៕

អភិបាលរាជធានី៖ ម្លប់នៃសន្តិភាព បានផ្តល់ឱកាសសម្រាប់ពលរដ្ឋគ្រប់រូបមានអ្វីៗគ្រប់បែបយ៉ាង រួមទាំងការកាន់ជំនឿសាសនាផងដែរ

នៅថ្ងៃទី២៣ ខែមីនា ឆ្នាំ២០១៧ អភិបាល នៃគណៈអភិបាលរាជធានីភ្នំពេញ លោក ប៉ា សុជាតិវង្ស បានថ្លែងថា ម្លប់នៃសន្តិភាព បានផ្តល់ឱកាសសម្រាប់ពលរដ្ឋគ្រប់រូបមានអ្វីៗគ្រប់បែបយ៉ាង រួមទាំងការកាន់ជំនឿសាសនាផងដែរ។ លោក បានថ្លែងដូចនេះ ក្នុងឱកាសអញ្ជើញ​ជាអធិបតីក្នុងពិធីសម្ពោធដាក់ឱ្យប្រើប្រាស់សមិទ្ធផលនានាក្នុងវត្តសែនសុខស្ថិតក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

លោកអភិបាលរាជធានី បានបញ្ជាក់ថា ម្លប់នៃសន្តិភាព បានផ្តល់ឱកាសសម្រាប់ពលរដ្ឋគ្រប់រូបមានអ្វីៗគ្រប់បែបយ៉ាង រួមទាំងការកាន់ជំនឿសាសនាផងដែរ ហើយលោក ក៏បានអំពាវ​នាវ​ឱ្យគ្រប់គ្នាត្រូវបន្តថែរក្សាសន្តិភាពនេះឱ្យបានយូរអង្វែងទៅទៀត។

វត្តសែនសុខ គឺជាវត្តថ្មីដែលទើបកកើតឡើងប្រមាណជា ៤ឆ្នាំមុន ក្រោមការខិតខំប្រឹងប្រែងរបស់ព្រះអង្គចៅអធិការ និងជំនឿយ៉ាងមុតមាំរបស់ប្រជាពុទ្ធបរិស័ទ ក្នុងការរួមកម្លាំងកសាងសមិទ្ធផលទាំងឡាយក្នុងទីអារាមនេះ៕

កម្ពុជា – វៀតណាម បានចុះអនុស្សរណៈ ក្នុងគោល​បំណងរួមគ្នា​ទប់ស្កាត់​ មិនឲ្យមានការកេង​ប្រវ័ញ្ច​កម្លាំងពលកម្ម​ និងការ​ជួញដូរមនុស្ស​

នៅថ្ងៃទី២២  ខែមីនា  ឆ្នាំ២០១៧   ក្នុងដំណើរទស្សនកិច្ចនៅរដ្ឋធានីហាណូយ    ប្រទេសវៀតណាម   លោក អ៊ិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានចុះអនុស្សរណៈជាមួយរដ្ឋមន្រ្តីក្រសួងការងារ ជនពិការ និងសង្គមកិច្ចវៀតណាម លោក Dao Ngoc Dung ក្នុងគោលបំណងរួមគ្នាទប់ស្កាត់ មិនឲ្យមានការកេងប្រវ័ញ្ចកម្លាំងពលកម្ម  និងការជួញដូរមនុស្ស ព្រមទាំងជំរុញកិច្ចសហប្រតិបត្តិការមួយចំនួនទៀត។

លោកបានឲ្យដឹងថា វាមានភាពប្រទាក់ក្រឡាគ្នាទៅនឹងវិស័យការងារ និងបណ្តុះបណ្តាលវិជ្ជាជីវៈ រវាងប្រទេសក្បែរខាងគ្នានេះ ដែលជាវិស័យចម្បង ក្នុងការគាំទ្រដល់វិស័យពាណិជ្ជកម្ម និងវិនិយោគ ក្នុងនោះរួមមាន៖ ១. ការផ្លាស់ប្ដូរព័ត៌មានពីគ្នាទៅវិញទៅមក ដើម្បីទប់ស្កាត់ការជ្រើសរើស និងប្រើប្រាស់ពលករខុសច្បាប់ ក៏ដូចជាការបង្ការ និងប្រយុទ្ធប្រឆាំងការកេងប្រវ័ញ្ចកម្លាំងពលកម្ម និងការជួញដូរមនុស្ស។ ២​. ផ្លាស់ប្តូរប្រព័ន្ធកម្មវិធីសិក្សាជំនាញឯកទេស ការស្រាវជ្រាវ ការសិក្សា និងព័​ត៌​មានពាក់ព័ន្ធនានា រួមទាំងការសិក្សាប្រៀបធៀប លើវិស័យ​កា​រងារ មុខ​របរ​ ការបណ្ដុះបណ្ដាលវិជ្ជាជីវៈ និងរដ្ឋបាលការងារ ដូចជា ការចរចាជាសមូហភាព ការដា​ក់​ឱ្យអនុវត្ត និងការអនុវត្តច្បាប់ ការដោះស្រាយវិវាទការងារ សន្តិសុខសង្គម ការគាំពារពលកម្ម សេរីភាពខាងសមាគម សុខភាព និងសុវត្ថិភាពការងារ ការគ្រប់គ្រងហត្ថពលកម្មបរទេស និងកា​រផ្លាស់ប្ដូរព័ត៌មាន ទៅលើការពង្រឹងផលិតភាពការងារ។ ​ ៣. លើកទឹកចិត្តដល់ការផ្លាស់ប្តូរទស្សនកិច្ច រវាងមន្រ្តីទទួលបន្ទុក និងមន្រ្តីជំនាញ។  ៤. ​គ្រប់គ្រងទេសន្តរប្រវេសន៍ការងារ រវាងប្រទេសទាំងពីរ។  ៥. ផ្តោតលើផ្នែកផ្សេងៗទៀត     នៃកិច្ចសហប្រតិបត្តិការ    ដែលភាគីទាំងពីរបានព្រមព្រៀងគ្នា​លើវិស័​យ​​ការងារ។

លោក  អ៊ិត   សំហេង បានថ្លែងបន្តថា ភាគីទាំងពីរបានព្រមព្រៀងគ្នាថា នឹងសហការគ្នាឲ្យបានជិតស្និទ្ធ ក្នុងការអភិវឌ្ឍមុខជំនាញ ចំណេះដឹង និងការចែករំលែកបច្ចេក​ទេស ដើម្បីបង្កើនសមត្ថភាពជំនាញហត្ថពលកម្ម និងពង្រឹងផលិតភាពការងារ ហើយក៏បានឯកភាពសហប្រតិបត្តិការគ្នា លើការគ្រប់គ្រងពលករទេសន្តរប្រវេសន៍ ដែលបានធ្វើចំណាកស្រុកទៅវិញទៅមក រវាងប្រទេសទាំងពីរ។

សូមបញ្ជាក់ថា កិច្ចសហប្រតិបត្តិការទាំងប៉ុន្មានខាងលើ នឹងអនុវត្តតាមរយៈការផ្លាស់ប្តូរព័ត៌មានជាប្រចាំ សី្តពីស្ថានភាពវិស័យការងារនៃប្រទេសទាំងពីរ ដែលកំពុងបម្រើការងារ លើទឹកដីនៃប្រទេសមួយទៀត។ លើសពីនោះភាគីទាំងពីរ ក៏ឯកភាពគ្នាថា នឹងសម្រួលដល់ពលករតាមព្រំដែន ក្នុងការដាក់ពាក្យស្នើសុំឯកសារធ្វើការស្របច្បាប់ ដោយអនុលោមតាមច្បាប់ និងបទប្បញ្ញត្តិនានា ព្រមទាំងបង្កនូវលក្ខខណ្ឌងាយស្រួលដល់ពលករ ដែលទទួលបានឯកសារធ្វើការស្របច្បាប់ ដើម្បីអាចបន្តការស្នាក់នៅ និងធ្វើការស្របច្បាប់ទៀតផង៕

លោក កឹម គុណវឌ្ឍ៖ អ្នកសារព័ត៌មានត្រូវឈរលើលក្ខណៈស្ថាបនា «សត្យានុម័ត ពិតប្រាកដ ត្រឹមត្រូវ និងគ្រប់ជ្រុងជ្រោយ» លើវិស័យផ្សព្វផ្សាយព័ត៌មាន

លោក កឹម គុណវឌ្ឍ អគ្គនាយកនៃទូរទស្សន៍ជាតិកម្ពុជាបានលើកឡើងថា ដើម្បីការអភិវឌ្ឍនៃ​តំបន់អាស៊ី​របស់យើង ប្រព័ន្ធសារព័ត៌មាន និងផ្សព្វផ្សាយអាស៊ី ត្រូវតែដើរតួនាទីកាន់តែធំៗឡើង យើងត្រូវតែរួមគ្នាដោយ ឈរលើតួនាទីទទួលខុសត្រូវពិតប្រាកដមួយ និងដោយមាន លក្ខណៈស្ថាបនាលើវិស័យផ្សព្វផ្សាយព័ត៌មានប្រកបដោយសត្យានុម័តពិតប្រាកដត្រឹមត្រូវ និងគ្រប់ជ្រុងជ្រោយ។

ការលើកឡើងរបស់ លោក កឹម គុណវឌ្ឍ អគ្គនាយកនៃទូរទស្សន៍ជាតិកម្ពុជា បានធ្វើឡើងនៅក្នុងវេទិកា «Boao Forum for ASIA BFA Annual Conference 2017» សម្រាប់កិច្ចពិភាក្សតុមូល របស់អ្នកដឹកនាំព័ត៌មានដែលនឹងរំពឹងទុកចំពោះកិច្ចសហប្រតិបត្តិការក្នុងវិស័យផ្សព្វផ្សាយនៅអាស៊ី Media Leaders Roundtable on: New Prospects for ASIAN Media Cooperation។ កិច្ចពិភាក្សានេះ ធ្វើនៅថ្ងៃទី២៣ ខែមីនា ឆ្នាំ២០១៧ នៅក្រុងបូអៅ ខេត្តហាយណាន់ ប្រទេសចិន ដោយមានអ្នកជំនាញឯកទេស អ្នកគ្រប់គ្រង អ្នកដឹកនាំវិស័យផ្សព្វផ្សាយ ចំនួន ២៨រូបមកពី៩ប្រទេសចូលរួមក្នុងកិច្ចពិភាក្សាតុមូលក្នុងកិច្ចពិភាក្សា។

លោក កឹម គុណវឌ្ឍ បន្តថាបើទោះបីជាប្រទេសណាមួយនៅក្នុងតំបន់អាស៊ី រហូតដល់ពិភពលោកទាំងមូលក្តី គឺសុទ្ធតែត្រូវការបរិយាកាសនូវមតិអន្តរជាតិដ៏ល្អប្រសើរមួយ។ បណ្តាប្រ​ទេសនានានៅអាស៊ីមានទំនាក់ទំនង ទីតាំងភូមិសាស្ត្រយ៉ាងជិតស្និទមានប្រវត្តិសាស្រ្តដ៏យូរអង្វែង និងប្រពៃណីវប្បធម៌មានលក្ខណៈពិសេសរៀងៗខ្លួន។ អ្នកសារព័ត៌មានមានការប្រា​ស្រ័យទាក់ទងគ្នាតាំងពីបុរាណកាល យើងបានរៀនសូត្រពីគ្នានូវសមទ្ធិផលអរិយធម៌ពីគ្នារៀនសូត្រពីបទពិសោធន៍អភិវឌ្ឍជាដៃគូភាគីនឹងគ្នាសំដៅជំរុញដល់ការអភិវឌ្ឍ និងការរីកចម្រើនរៀងៗខ្លួន។ នេះជាទស្សនទាននៃអ្នកចូលរួមក្នុងកិច្ចពិភាក្សាតុមូលពាក់ព័ន្ធលើការបង្កើតនិងការចូលរួមជាសមាជិកនៃ «អង្គការសហប្រតិបត្តិការប្រព័ន្ធសារព័ត៌មានអាស៊ី»៕