Tuesday, July 07, 2015
ក្រសួងមហាផ្ទៃ ប្រកាសផ្ទេរមុខងារផ្តល់សេវារដ្ឋបាល និងរង្វាន់លើកទឹកចិត្ត លើកិច្ចការស្ថិតិប្រជាពលរដ្ឋ
យោងតាមសេចក្តីប្រកាសរបស់ក្រសួងមហាផ្ទៃចុះថ្ងៃទី០១
ខែកក្កដា ឆ្នាំ២០១៥ ដែលចុះហត្ថលេខាដោយ សម្តេចក្រឡាហោម ស ខេង ដែលត្រូវបានចេញផ្សាយនៅថ្ងៃទី
០៧ ខែកក្កដា ឆ្នាំ២០១៥នេះ បានឲ្យដឹងថា ដើម្បីអនុវត្តការប្រមូលចំណូលពីកម្រៃសេវារដ្ឋបាល
និងដើម្បីជាគុណប្រយោជន៍ថវិកាជាតិ ក្រសួងមហាផ្ទៃសម្រេច ផ្ទេរមុខងារនៃការផ្តល់សេវារដ្ឋបាលកិច្ចការស្ថិតិប្រជាពលរដ្ឋ
ពីអគ្គនាយកដ្ឋានអត្តសញ្ញាណកម្ម ទៅឲ្យស្នងការដ្ឋាននគរបាលរាជធានី-ខេត្ត។
នៅក្នុងនោះ ស្នងការដ្ឋាននគរបាលរាជធានី-ខេត្ត
មានភារកិច្ចប្រមូលចំណូលពីការផ្តល់សេវារដ្ឋបាល និងទទួលខុសត្រូវក្នុងការគ្រប់គ្រងចំណូលដែលប្រមូលបាន
បង់ប្រាក់ចំណូលចូលថវិកាជាតិ និងធ្វើសលាកប័ត្រចំណូល ព្រមទាំងចុះបញ្ជីការគណនេយ្យស្តីពីកិច្ចប្រតិបត្តិការចំណូល
និងកត់ត្រាតាមដានប្រាក់ចំណូលនៅក្នុងជំពូក គណនីអនុគណនី នៃមាតិកាថវិកា ដែលអគ្គនាយកដ្ឋានភស្តុភារ
និងហិរញ្ញវត្ថុបានចង្អុលណែនាំ។
ក្នុងសេចក្តីប្រកាសដដែលបានបញ្ជាក់ទៀតថា
ស្នងការដ្ឋាននគរបាលរាជធានី-ខេត្ត ត្រូវធ្វើរបាយការណ៍អំពីលទ្ធផលនៃការផ្តល់សេវារដ្ឋបាល
លើការងារស្ថិតិប្រជាពលរដ្ឋរៀងរាល់ខែ មកកាន់អគ្គនាយកដ្ឋានអត្តសញ្ញាណកម្ម។
ក្រៅពីនេះនឹងមានការផ្តល់ប្រាក់រង្វាន់លើកទឹកចិត្ត
សម្រាប់ឧបត្ថម្ភជូនអង្គភាពដែលបានបំពេញភារកិច្ចផ្ទាល់ និងអង្គភាពពាក់ព័ន្ធលើការបម្រើសេវារដ្ឋបាល
ព្រមទាំងសម្រាប់ពង្រឹងយន្តការប្រមូលចំណូលដូចមានចែងក្នុងតារាងឧបសម្ព័ន្ធភ្ជាប់ជាមួយប្រកាសនេះ៕
ប្រទេសកម្ពុជាប្រារព្ធខួប ៧ឆ្នាំ នៃការដាក់បញ្ចូលប្រាសាទព្រះវិហារ ជាសម្បតិ្ត បេតិកភណ្ឌពិភពលោក
ថ្ងៃទី០៧ ខែកក្កដា ឆ្នាំ២០១៥ នេះ គឺជាខួប
៧ឆ្នាំ ដែលប្រទេសកម្ពុជា ក្រោមការដឹកនាំរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា
បានសម្រេចនូវសមិទ្ធផលដ៏មហាជាញជ័យ ដែលប្រាសាទព្រះវិហារត្រូវបានដាក់បញ្ចូលជាសម្បត្តិបេតិកភណ្ឌពិភពលោក។
ពិធីនេះត្រូវបានធ្វើឡើងនៅ ប្រាសាទព្រះវិហារ
ក្រោមអធិបតីភាព នាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទ
និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ
សុខ អាន ឧបនាយករដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងមានការចូលរួមពីឯកឧត្តម
អ៊ុំ ម៉ារ៉ា អភិបាលខេត្តព្រះវិហារ ព្រមទាំងថ្នាក់ដឹកនាំ អាជ្ញាធរជាតិអប្សរា
និងថ្នាក់ដឹកនាំជាច្រើននាក់ផ្សេងទៀត។
ការសម្រេចរបស់ អង្គការ UNESCO ដាក់បញ្ចូលប្រាសាទព្រះវិហារ
ជាសម្បត្តិមនុស្សជាតិពិភពលោក តាមសំណើរបស់រាជរដ្ឋាភិបាលកម្ពុជា ត្រូវបានធ្វើឡើងកាលពីថ្ងៃទី៧
ខែកក្កដា ឆ្នាំ២០០៨ ក្នុងសម័យប្រជុំលើកទី៣២ នៅទីក្រុងកេបិក ប្រទេសកាណាដា។
ការដាក់បញ្ចូលប្រាសាទព្រះវិហារទៅក្នុងបញ្ជីបេតិកភណ្ឌពិភពលោក បានធ្វើឡើងនៅចំពេលដែលក្រុមជាតិនិយមថៃមួយក្រុម
កំពុងធ្វើការតវ៉ាយ៉ាងខ្លាំងទាមទារយកប្រាសាទព្រះវិហារទៅជាកម្មសិទ្ធិរបស់ខ្លួន។
ប្រាសាទព្រះវិហារស្ថិតនៅលើជួរភ្នំដងរែក
ក្នុងខេត្តព្រះវិហារ លើរយៈកំពស់៦២៥ម៉ែត្រ។ ប្រាសាទនេះមានចំងាយប្រមាណ៤០០គីឡូម៉ែត្រខាងជើងរាជធានីភ្នំពេញ។រមណីយដ្ឋាននេះ
មានលក្ខណៈពិសេសទាំងគុណភាព ក្បាច់រចនា និងទីតាំងដ៏ពិសិដ្ឋសម្របទៅនឹងបរិស្ថានធម្មជាតិ
និងមុខងារសាសនារបស់ប្រាសាទ។ ប្រាសាទព្រះវិហារក៏ជាស្នាដៃឯក ដែលលេចធ្លោក្នុងចំណោមស្ថាបត្យកម្មខ្មែរផ្នែកប្លង់
ក្បាច់រចនាលម្អ និងទំនាក់ទំនងទៅនឹងបរិស្ថានទេសភាពធម្មជាតិដ៏ប្រណីត។
ប្រាសាទនេះមានតួប៉មជាច្រើនដែលតភ្ជាប់គ្នាដោយប្រព័ន្ធផ្លូវ
និងជណ្តើរដែលឡើងឆ្ពោះទៅកាន់ប្រាង្គប្រាសាទធំ ដែលស្ថិតនៅលើកំពូលច្រាំងចោត
នៅចុងខាងត្បូងបង្អស់នៃបរិវេណប្រាសាទ ដែលមានប្រវែងពីជើងទៅត្បូងសរុបជាង ៨០០ម៉ែត្រ។
ប្លង់នេះធ្វើឲ្យប្រាសាទព្រះវិហារជាស្ថាបត្យកម្មដ៏ពិសេស និងតែមួយគត់ក្នុងបណ្ដាសំណង់ប្រាសាទធំៗ
នៅក្នុងអារ្យធម៌ខ្មែរ។ សំណង់ជាច្រើនបន្តបន្ទាប់ ត្រូវបានកសាងនៅរមណីយដ្ឋានប្រាសាទព្រះវិហារនេះ
ដោយដំបូងបង្អស់នៅសតវត្សទី៩ និងបន្តមកទៀតនៅសតវត្សទី១១ ក្នុងរជ្ជកាលរបស់ព្រះបាទសូរ្យវរ្ម័នទី១
(១០០២-១០៥០) ដែលបានបន្សល់ទុកនូវសំណង់ប្រាសាទ រហូតមកដល់សព្វថ្ងៃនេះ។ រមណីយដ្ឋាននេះ
ជាកន្លែងសក្ការបូជាដ៏សក្ដិសិទ្ធ ឧទ្ទិសថ្វាយដល់ព្រះឥសូរដែលសម្ដែងជា «សិក្ខារេស្វរៈ» ឬអទិទេព នៃកំពូលភ្នំដែលមានឆ្លាក់បង្ហាញនៅតាមហោជាងនិងផ្ដែររបស់ប្រាសាទ។
ប្រការដែលអង្គការ UNESCO បានសំរេចដាក់ប្រាសាទព្រះវិហារ
ទៅក្នុងបញ្ជីបេតិកភណ្ឌពិភពលោកនេះ វាមិនមែនជារឿងងាយស្រួលនោះឡើយ គឺបានកើតចេញពីការ
និងប្រឹងប្រែងយ៉ាងខ្លាំងពីរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ
ហ៊ុន សែន ជាប្រមុខ។ ជាពិសេសការដាក់បញ្ចូលប្រាសាទព្រះវិហារ ទៅក្នុងក្នុងបញ្ជីបេតិកភណ្ឌពិភពលោក
បានធ្វើឲ្យកម្ពុជា អាចរក្សាសម្បត្តិដូនតាមួយនេះ ឲ្យនៅគង់វង់ចៀសផុតពីមហិច្ឆតាឈ្លានពាន
របស់ប្រទេសជិតខាង។ ទាំងអស់នេះហើយដែលបញ្ជាក់ថាប្រមុខរាជរដ្ឋាភិបាលកម្ពុជាតែងតែយក
ចិត្តទុកដាក់ជានិច្ចពីអនាគតរបស់ប្រទេស និងប្រជាជនកម្ពុជាដើម្បីបុព្វហេតុជាតិ
មាតុភូមិ។
មន្ត្រីគជប ជួបអ្នកជំនាញជប៉ុន ពិភាក្សាអំពីបច្ចេកទេសកុំព្យូទ័រ សម្រាប់ការចុះឈ្មោះបោះឆ្នោត
មន្ត្រីជំនាញគជប បានចាប់ផ្តើមជួបប្រជុំជាមួយក្រុមអ្នកជំនាញការជប៉ុន
ចាប់ពីព្រឹកថ្ងៃទី៧ ខែ កក្កដា ឆ្នាំ២០១៥ ដើម្បីពិភាក្សាអំពីបច្ចេកទេសកុំព្យូទ័រ
សម្រាប់ការចុះឈ្មោះបោះឆ្នោត។ ក្នុង នោះ កិច្ចប្រជុំរវាងក្រុមបច្ចេកទេសកុំព្យូទ័ររបស់គជប
ក្រុមហ៊ុនលក់ប្រព័ន្ធកុំព្យូទ័រព្រមទាំង គណៈកម្មការចំពោះកិច្ចរបស់គជប ជាមួយនឹងក្រុមអ្នកបច្ចេកទេសជប៉ុន
និងមន្ត្រីស្ថានទូត ជប៉ុន នឹងត្រូវធ្វើជាបន្តបន្ទាប់ចាប់ពីថ្ងៃទី៧ ខែកក្កដានេះ
រហូតដល់ថ្ងៃទី១០ ខែកក្កដា ឆ្នាំ២០១៥។
សេចក្តីប្រកាសពីកម្មវិធីរបស់គជប ចុះថ្ងៃទី៦
ខែកក្កដា ឆ្នាំ២០១៥ បង្ហាញថា នៅម៉ោង ៨ ព្រឹកថ្ងៃទី៧ ខែកក្កដា ឆ្នាំ២០១៥ ក្រុមបច្ចេកទេសកុំព្យូទ័ររបស់គជប
ជួបប្រជុំជាមួយក្រុមអ្នកបច្ចេក ទេសជប៉ុន ដើម្បីពិភាក្សាអំពីបច្ចេកទេសកុំព្យូទ័រសម្រាប់ការចុះឈ្មោះ
បោះឆ្នោត។ នៅម៉ោង ៩ និង ៣០ នាទី ព្រឹកថ្ងៃទី៨ ខែកក្កដា ឆ្នាំ២០១៥ ក្រុមបច្ចេកទេសកុំព្យូទ័ររបស់គជប
និងក្រុម ហ៊ុនលក់ប្រព័ន្ធកុំព្យូទ័រត្រូវជួបប្រជុំជាមួយក្រុមបច្ចេកទេសជប៉ុន
ដើម្បីពិភាក្សាអំពីបច្ចេកទេស កុំព្យូទ័រសម្រាប់ការចុះឈ្មោះបោះឆ្នោត។ នៅម៉ោង
២ រសៀលថ្ងៃទី៩ ខែកក្កដាឆ្នាំ២០១៥ ក្រុម បច្ចេកទេសកុំព្យូទ័រ ត្រូវជួបប្រជុំជាមួយក្រុមបច្ចេកទេសជប៉ុន
ដើម្បីពិភាក្សាអំពីបច្ចេកទេសកុំព្យូទ័រ សម្រាប់ការចុះឈ្មោះបោះឆ្នោតនិងម៉ោង
៣ រសៀលថ្ងៃទី១០ខែកក្កដាឆ្នាំ២០១៥ គណៈ កម្មការចំពោះកិច្ចរបស់គជប ត្រូវជួបប្រជុំជាមួយមន្ត្រីស្ថានទូតជប៉ុន
និងក្រុមបច្ចេកទេសជប៉ុន ដើម្បីពិភាក្សាអំពីបច្ចេកទេសកុំព្យួទ័រសម្រាប់ការចុះឈ្មោះបោះឆ្នោត។
កម្មវិធីរបស់គជប ក៏បានបង្ហាញថា នៅព្រឹកថ្ងៃទី៨
និងថ្ងៃទី៩ខែកក្កដាឆ្នាំ២០១៥គណៈកម្មការ បច្ចេកទេសកិច្ចការបោះឆ្នោត និងគណៈកម្មការចំពោះកិច្ចរបស់គជប
ត្រូវជួបប្រជុំជាមយក្រុមអ្នកបច្ចេកទេសជប៉ុន នៅទីស្តីការគជប ដើម្បីពិភាក្សាអំពីសេចក្តីព្រាងបទបញ្ជា
និងនីតិវិធីសម្រាប់ការចុះឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់។
សេចក្តីព្រាងកម្មវិធីដដែល បង្ហាញថា
នៅរសៀលថ្ងៃទី៩ ខែកក្កដា ឆ្នាំ២០១៥ ប្រធាន-អនុប្រធាន និងសមាជិកគជប ត្រូវជួបប្រជុំជាមួយគណៈប្រតិភូសភាសហព័ន្ធអាល្លឺម៉ង់
ដើម្បីពិភាក្សាអំពីការកែទម្រង់ការបោះឆ្នោតនៅកម្ពុជា៕
គណៈកម្មការចម្រុះកិច្ចការព្រំដែនកម្ពុជា-វៀតណាម ជួបប្រជុំ នៅទីស្តីការគណៈរដ្ឋមន្ត្រី
គណៈកម្មការចម្រុះកិច្ចការព្រំដែនកម្ពុជា
និងវៀតណាម បានបើកកិច្ចប្រជុំចង្អៀត រយៈពេលពីរថ្ងៃ ចាប់ពី ថ្ងៃទី៧ ដល់ថ្ងៃទី៨
ខែកក្កដា ឆ្នាំ២០១៥ នៅទីស្តីការគណៈរដ្ឋមន្ត្រី។ កិច្ចប្រជុំនោះ រួមមានមន្ត្រីជំនាញព្រំដែនកម្ពុជា
ដឹកនាំដោយឯកឧត្តមទេសរដ្ឋមន្ត្រី វ៉ា គឹមហុង និងភាគីវៀតណាម ដឹកនាំដោយលោក ហូ
ស្វឹនសឺន ( Ho Xuan Son ) អនុរដ្ឋមន្ត្រីទី១
និងជាប្រធានគណៈកម្មការចម្រុះកិច្ចការព្រំដែនវៀតណាម។
កិច្ចប្រជុំរយៈពេល ពីរថ្ងៃនេះ ដើម្បីពិភាក្សាលើបញ្ហាព្រំដែន
ដែលមិនទាន់ដោះស្រាយចប់ និងបាតុភាពដែលបានកើតឡើងតាមបណ្តោយព្រំដែននាពេលថ្មីៗនេះ។
នៅពេលបើកកិច្ចប្រជុំ តំណាងភាគីកម្ពុជា
និងវៀតណាម បានចាត់ទុកកិច្ចប្រជុំរវាងគណៈកម្មការចម្រុះកិច្ចការព្រំដែននៃប្រទេសទាំងពីរ
នាពេលនេះ ថាជាកិច្ចប្រជុំ ដែលមានសារៈសំខាន់ជាទីបំផុតដើម្បីរក្សាបាននូវសុខសន្តិភាពនៃប្រទេសទាំងពីរ។
របៀបវារៈ នៃកិច្ចប្រជុំរវាងប្រធានគណៈកម្មការចម្រុះខណ្ឌសីមា
និងបោះបង្គោលព្រំដែនគោក កម្ពុជា-វៀតណាម វៀតណាម-កម្ពុជា នៅរាជធានីភ្នំពេញ ថ្ងៃទី៧
និងថ្ងៃទី៨ ខែកក្កដា ឆ្នាំ២០១៥ បានបង្ហាញនូវចំណុច ដែលត្រូវពិភាក្សា រួមមាន៖
ស្តាប់របាយការណ៍របស់ប្រធានក្រុមការងារពិសេស ដែលបានចុះអនុវត្តន៍លើដីជាក់ស្តែង
នៅ ៥ តំបន់ ( ៣០-៤០, ៤០-៤៥, ១៣៨-១៤៧,
២៤៧-២៥៣ និង២៩៥-៣០២ ) កាលពីថ្ងៃទី៣ ដល់ថ្ងៃទី១៩ ខែមិថុនា ឆ្នាំ២០១៥ តាមខ្លឹមសារដូចមានក្នុងចំនុច
១.១ និង១.២ នៃកំណត់ហេតុកិច្ចប្រជុំរវាងគណៈកម្មការចម្រុះទាំងពីរនៅទីក្រុងហាណូយនាថ្ងៃទី២២ដល់ថ្ងៃទី២៧ខែមេសាឆ្នាំ២០១៥។
កិច្ចប្រជុំ ក៏អនុម័តយកកំណត់ហេតុទាំង៥ របស់ក្រុមការងារពិសេស
ដែលបានចុះអនុវត្តន៍លើដីជាក់ស្តែង កាលពីថ្ងៃទី៣ ដល់ថ្ងៃទី១៩ ខែមិថុនា ឆ្នាំ២០១៥។ក្នុងនោះ
កិច្ចប្រជុំ ក៏និយាយពីដំណើរការបោះបង្គោលព្រំដែនបន្តទៀត និងពិភាក្សាពីចំណែកដី
ដែលនៅបន្តគ្រប់គ្រងដោយភាគីទាំងពីរ បន្ទាប់ពីឯកភាពលើខ្សែព្រំដែន។
កិច្ចប្រជុំក្រុមជំនាញ លើកទី២៣ គឺដើម្បីបន្តការងារបច្ចេកទេសដែលនៅសេសសល់។
សំណើរបស់ប្រធានក្រុមបច្ចេកទេសចម្រុះ ស្នើបន្ថែមបង្គោលបំពេញបន្ថែមចំនួន ១៥ ទៀត
នៅខេត្តព្រៃវែង-ដុងថាប់។
របៀបវារៈក៏បានបង្ហាញថា កិច្ចប្រជុំ នឹងពិភាក្សាស្តីពីតំបន់បង្គោលព្រំដែនលេខ
១៣៧ ( ១.២ ) ការកំណត់កាលបរិច្ឆេទសម្ពោធបង្គោលព្រំដែនបំពេញបន្ថែម និងតម្រុយបង្គោលព្រំដែន
នៅខេត្តត្បូងឃ្មុំ-ប៊ិនភឿក ដោយប្រធានទាំងពីរ ព្រមទាំងការអនុវត្តគោលការណ៍ទាំងឡាយ
ដែលបានឯកភាពគ្នាកន្លងមក។
ក្នុងបញ្ហាផ្សេងៗ កិច្ចប្រជុំគណៈកម្មការចម្រុះព្រំដែនកម្ពុជា
និងវៀតណាម រយៈពេលពីរថ្ងៃនេះ ក៏ត្រូវពិភាក្សា ស្តីពី តំបន់បាតុភាពដែលកើតមាននៅតាមបណ្តោយព្រំដែន
ការសាងសង់ប៉ុស្តិ៍យាម និងផ្លូវយុទ្ធសាស្ត្រនៅតាមបណ្តោយព្រំដែនដោយវៀតណាម និងបាតុភាពនៅទីតាំងបង្គោលព្រំដែនលេខ២០២និង២០៣នៅខេត្តស្វាយរៀង-តៃនិញ។
សូមរម្លឹកថា ដំបូងឡើយ កិច្ចប្រជុំរវាងគ
គណៈកម្មការចម្រុះព្រំដែនកម្ពុជា និងវៀតណាម ត្រូវបើកកិច្ចប្រជុំចង្អៀត នៅទីរួមខេត្តសៀមរាប
ចាប់ពីថ្ងៃទី៦ ដល់ថ្ងៃទី៩ ខែកក្កដា ឆ្នាំ២០១៥ ដើម្បីដោះស្រាយបញ្ហាព្រំដែន ដែលនៅសេសសល់
និងដោះស្រាយបាតុភាពទាំងឡាយ ដែលបានកើតឡើង កាលពីពេលថ្មីៗនេះ នៅតាមបណ្តោយព្រំដែនរវាងប្រទេសទាំងពីរ។
ក៏ប៉ុន្តែ កិច្ចប្រជុំនោះ ត្រូវផ្លាស់ប្តូរទីកន្លែង
មកធ្វើនៅភ្នំពេញវិញ។ មូលហេតុ ត្រូវបានលោកជំទាវ កុយ ពិសី អនុប្រធានគណៈកម្មាធិការកិច្ចការព្រំដែនរបស់រដ្ឋាភិបាល
លើកឡើងថា ដើម្បីកាត់បន្ថយការចំណាយពេលធ្វើដំណើររបស់ថ្នាក់ដឹកនាំ៕
ឯកឧត្តម ថោង ខុន បញ្ជាក់ពីមូលហេតុដែលនាំឲ្យមានកំណើនភ្ញៀវទេសចរណ៍
ថ្លែងក្នុងកិច្ចប្រជុំបូកសរុបលទ្ធផលអនុវត្តការងារទេសចរណ៍ឆមាសទី១
ឆ្នាំ២០១៥ និងទិសដៅអនុវត្តបន្តឆមាសទី២ ឆ្នាំ២០១៥ ឯកឧត្តម ថោង ខុន រដ្ឋមន្ត្រីក្រសួងទេសចរណ៍
មានប្រសាសន៍ថា ភ្ញៀវទេសចរបរទេស ចូលមកទស្សនានៅកម្ពុជា មានការកើនឡើងបែបនេះ គឺដោយសារមួយផ្នែកធំក្រសួង
បានបង្កើតនូវព្រឹត្តិការណ៍ទេសចរណ៍ជាច្រើន ដែលធ្វើឱ្យមានភាពទាក់ទាញ ទាំងភ្ញៀវទេសចរជាតិ
និងអន្តរជាតិ។ ក្នុងរយៈពេល៥ខែ ដើមឆ្នាំ២០១៥នេះ ចំនួនភ្ញៀវទេសចរអន្តរជាតិ មកទស្សនាកម្ពុជា
មានចំនួន ១.៩៨៣.៧២៣នាក់ មានការកើន៤,៤ភាគរយ បើធៀបនឹងរយៈពេលដូចគ្នា
ឆ្នាំ២០១៤។ នេះបើយោងតាមរបាយការណ៍របស់ក្រសួងទេសចរណ៍បូកសរុបថ្ងៃទី០៦ ខែកក្កដា
ឆ្នាំ២០១៥។
ឯកឧត្តម ថោង ខុន បានបញ្ជាក់បន្ថែមថា
មូលហេតុមួយទៀតដែលធ្វើឲ្យមានកំណើនភ្ញៀវទេសចរណ៍នោះគឺ ភាពជោគជ័យនៃការរៀបចំសន្និសីទទេសចរណ៍វប្បធម៌ពិភពលោក
នៅខេត្តសៀមរាប បានធ្វើឲ្យថ្នាក់ដឹកនាំធំៗ នៅលើពិភពលោកបានចូលរួម និងមានការបន្តជួយ
ផ្សព្វផ្សាយពីសក្តានុពលនៅកម្ពុជា។
ឯកឧត្តម ថោង ខុន បានបន្តទៀតថា ភ្ញៀវទេសចរណ៍មិនមែនតម្រង់តែអង្គរវត្តមួយនោះទេ
គឺគេត្រូវការទៅកម្សាន្តតំបន់ទេសធម្មជាតិ អេកូទេសចរណ៍ និងតំបន់ទេសចរណ៍ផ្សេងទៀត
ដែលកម្ពុជាមាន។ ប្រទេសកម្ពុជានាពេលបច្ចុប្បន្ននេះ មានសណ្ឋាគារ និងផ្ទះសំណាក់ច្រើនគ្រប់គ្រាន់ហើយ
សម្រាប់ឆ្លើយតបនឹងចំនួនភ្ញៀវទេសចរណ៍ដែលមកស្នាក់នៅក្នុងប្រទេសកម្ពុជា ប៉ុន្តែចំណុចដែលខ្វះខាតនោះគឺ
កន្លែងរមណីយដ្ឋានសម្រាប់ភ្ញៀវទេសចរណ៍ទៅកំសាន្ត ដែលទាមទារឱ្យមានការរៀបចំ
និងអភិវឌ្ឍន៍បន្ថែមទៀត៕
ក្រសួងសេដ្ឋកិច្ចនិងហិរញ្ញវត្ថុប្រកាសពីការប្រមូលពន្ធនិងផាកវិន័យទៅលើមធ្យោបាយដឹកជញ្ជូន និងយាន្តជំនិះគ្រប់ប្រភេទសម្រាប់ឆ្នាំ២០១៥
ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៥
នឹងត្រូវដាក់ឲ្យអនុវត្តចាប់ពីថ្ងៃទី១០ ខែកក្កដា ឆ្នាំ២០១៥ រហូតដល់ថ្ងៃទី៣០
ខែវិច្ឆិកា ឆ្នាំ២០១៥។ ប្រជាពលរដ្ឋទូទៅដែលត្រូវបង់ពន្ធអាចបង់ពន្ធនៅនាយកដ្ឋានគ្រប់គ្រងអ្នកជាប់ពន្ធធំ
សាខាពន្ធដារខេត្ត-ខ័ណ្ឌ សាខាធនាគារកាណាឌីយ៉ា សាខាធនាគារ អេស៊ីលីដា។ នេះបើយោងតាមសេចក្តីជូនដំណឹង
ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៥
ចុះថ្ងៃទី០៣ ខែកក្កដា ឆ្នាំ២០១៥។
សំរាប់យានយន្តដែលបង់ពន្ធលើកដំបូង ឬយានយន្តដែលពុំទាន់ទទួលបានបណ្ណសម្គាល់ការបង់ពន្ធមធ្យោបាយដឹកជញ្ជូន
និងយានជំនិះគ្រប់ប្រភេទត្រូវបំពេញលិខិតប្រកាសបង់ពន្ធមួយសន្លឹក ដែលត្រូវភ្ជាប់មកជាមួយនូវច្បាប់ថតចម្លងបណ្ណសម្គាល់យានយន្ត
និងច្បាប់ថតចម្លងវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ដែលចេញដោយអគ្គនាយកដ្ឋានដឹកជញ្ជូននៃក្រសួងសាធារណការ
និងដឹកជញ្ជូន និងច្បាប់ថតចម្លងអត្តសញ្ញាណបណ្ណ ឬលិខិតឆ្លងដែន ឬសំបុត្រកំណើតរបស់ម្ចាស់យានយន្ត។
ប៉ុន្តែសំរាប់យានយន្តដែលបានទទួលបណ្ណសម្គាល់ការបង់ពន្ធ គឺពុំចាំបាច់ត្រូវបំពេញលិខិតប្រកាសបង់ពន្ធទៀតទេ។
ក្រោយពេលបង់ពន្ធម្ចាស់យានយន្តនឹងទទួលបានលិខិតបញ្ជាក់ការបង់ប្រាក់ពន្ធមួយសន្លឹកបង្កាន់ដៃបង់ពន្ធមួយសន្លឹកដែលត្រូវថែរក្សាទុកជាប់និងយានយន្ត
សម្រាប់បង្ហាញមន្ត្រីមានសមត្ថកិច្ច និងជាឯកសារសម្រាប់ប្រកាសបង់ពន្ធនៅឆ្នាំបន្ទាប់
ព្រមទាំងទទួលបាននូវលតាបត្របង់ពន្ធមួយសន្លឹក សម្រាប់បិទភ្ជាប់មធ្យោបាយដឹកជញ្ជូន។
សំរាប់ពន្ធនេះត្រូវបានលើកលែងចំពោះ៖
១/ រថយន្តគិលានសង្គ្រោះ, រថយន្តពន្លត់អគ្គិភ័យជាកម្មសិទ្ធរបស់រដ្ឋ
២/ យានយន្តដែលជាកម្មសិទ្ធរបស់អង្គភាពកងយោធពលខេមរភូមិន្ទ
កងរាជអាវុធហត្ថ នរគបាលជាតិដែលបម្រើការងារសម្រាប់កិច្ចការការពារជាតិ ជាមធ្យោបាយប្រើប្រាស់ដឹកជញ្ចូនសម្ភារទ័ព
ឬដឹកជញ្ជូនកងទ័ព ក៍ដូចជាសម្រាប់កិច្ចការសន្តិសុខ និងសណ្តាប់ធ្នាប់សង្គម ដូចមានចែងក្នុងមាត្រា១១
និងមត្រា១២ នៃអនុក្រឹត្យលេខ៧៧ អនក្រ.បក ចុះថ្ងៃទី២៨ ខែវិច្ឆិកា ឆ្នាំ២០០៣
ស្តីពីការចេញស្លាកលេខសម្គាល់ យានជំនិះ និងយានយន្តដែលពាក់ស្លាកលេខ ខ.មឬ ន.ប
ជាផ្លូវការ ដែលមានការទទួលស្គាល់ និងបញ្ជាក់ពីក្រសួងការពារជាតិ ឬក្រសួងមហាផ្ទៃ។
៣/ យានយន្តដែលជាកម្មសិទ្ធរបស់ស្ថានទូត
ឬស្ថានកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាល។
គួរបញ្ជាក់ផងដែរថា ចាប់ពីថ្ងៃទី០១ ខែមករា
ឆ្នាំ២០១៦ តទៅ អង្គភាពពន្ធដារនឹងចុះត្រួតពិនិត្យ និងផាកពិន័យចំពោះមធ្យោបាយដឹកជញ្ជូន
និងយានជំនិះទាំងឡាយណាដែលមិនទាន់បានប្រកាសបង់ពន្ធក្នុងឆ្នាំកន្លងមក និងត្រូវបង់ប្រាក់ពន្ធ
និងបង់ប្រាក់ពិន័យ ១០០% នៃប្រាក់ដែលត្រូវបង់។
រដ្ឋសភាសម្រេចអនុម័តច្បាប់ស្ដីពីផ្ទះជួល
យោងតាមសេចក្តីប្រកាសព័ត៌មាន របស់អគ្គលេខាធិការដ្ឋានរដ្ឋសភា
ស្តីពីលទ្ធផលសម័យប្រជុំរដ្ឋសភាលើកទី៤ នីតិកាលទី៥ ថ្ងៃទី ០៦ ខែកក្កដា ឆ្នាំ២០១៥
បានឲ្យដឹងថា អង្គសភាបានអនុម័តយល់ព្រមលើសេចក្តីស្នើច្បាប់ស្តីពីភតិសន្យាពិសេស
(ច្បាប់ផ្ទះជួល) ចំនួន ១០២សំឡេង លើ១០៤សំឡេង។ សេចក្តីស្នើច្បាប់នេះមានចំនួន៤ចំនួន
រូមមាន១១មាត្រា។ ចំពោះសេចក្តីស្នើច្បាប់នេះដែរ គឺឯកឧត្តមបណ្ឌិត ប៉ែន បញ្ញា
ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា ជាអ្នករាយការណ៍ជូនអង្គសភា
អំពីលទ្ធផលនៃការពិនិត្យនិងសិក្សា សេចក្តីស្នើច្បាប់ និងលោកជំទាវ គ្រួច សំអាន
តំណាងក្រុមតំណាងរាស្ត្រហត្ថលេខី និងសហការី ជាអ្នកការពារសេចក្តីស្នើច្បាប់នេះ។
គួរបញ្ជាក់ថា សម័យប្រជុំរដ្ឋសភានេះធ្វើឡើង
ក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភា និងមានអ្នកតំណាងរាស្ត្រចូលរួមប្រជុំ
១០៤រូប ហើយសមាជិករដ្ឋសភាដែលមានមតិមានចំនួន២រូបគឺ ឯកឧត្តម សម រង្ស៊ី មកពីគណបក្សសង្គ្រោះជាតិ
និងឯកឧត្តម ឈាង វុន មកពីគណបក្សប្រជាជនកម្ពុជា។
ឯកឧត្តម សម រង្ស៊ី ប្រធានក្រុមមតិភាគតិចនៃរដ្ឋសភា
និងជាប្រធានគណបក្សសង្គ្រោះជាតិ មានមតិគាំទ្រចំពោះខ្លឹមសារនៃច្បាប់នេះថា វានឹងរួមចំណែកអភិវឌ្ឍសង្គមជាតិកម្ពុជា
ប្រកបដោយចីរភាព យុត្តិធម៌ និងសមធម៌សង្គមផង។
មាត្រា១នៃច្បាប់នេះបានចែងថា ច្បាប់នេះមានគោលបំណងធានាការពារសិទ្ធិ
និងផលប្រយោជន៍របស់ម្ចាស់ផ្ទះជួល និងអ្នកជួលផ្ទះ ដើម្បីស្ថិរភាពក្នុងជីវភាពរស់នៅ
សណ្ដាប់ធ្នាប់ និងរបៀបរៀបរយសាធារណៈ ចៀសវាងការកើតមានទំនាស់រវាងម្ចាស់ផ្ទះជួល
និងអ្នកជួល។ តំណាងរាស្ត្រនៃគណបក្សទាំងពីរ បានវាយតម្លៃខ្ពស់ចំពោះការបង្កើតច្បាប់កិច្ចសន្យាផ្ទះជួលនេះ
ព្រោះជួយការពារផលប្រយោជន៍ទាំងម្ចាស់ផ្ទះជួល និងអ្នកជួលផ្ទះ ជាពិសេសច្បាប់នេះ
មិនអនុញ្ញាតឲ្យម្ចាស់ផ្ទះដំឡើងថ្លៃស្រេចតែចិត្តនោះទេ គួររំលឹកផងដែរថា សេចក្តីព្រាងច្បាប់ស្តីពីផ្ទះជួល
និងឈានដល់ការអនុម័ត បានធ្វើឡើងក្រោមគំនិតផ្តួចផ្តើមរបស់សម្តេចតេជោ ហ៊ុន
សែន ក្នុងគោលបំណងជួយសម្រួលដល់ប្រជាពលរដ្ឋអ្នកជួលផ្ទះ ជាពិសេស បងប្អូនកម្មករ
និងដើម្បីកាត់បន្ថយការលំបាកដល់ប្រជាពលរដ្ឋទូទៅ៕
អភិបាលរាជធានីភ្នំពេញ លើកឡើងថា ក្រុម ទេព វន្នី និង យ៉ោម បុប្ផា គឺធ្វើបាតុកម្មដើម្បីតែលុយប៉ុណ្ណោះ
ឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ
បានអះអាងថា ក្រុម បឹងកក់ ដឹកនាំដោយ ទេព វន្នី និង យ៉ោម បុប្ផា ដែលតែងតែដើរធ្វើបាតុកម្មតាមដងផ្លូវ
លើគ្រប់រឿងទាំងអស់នោះ គ្រាន់តែជាបាតុករពហុវិស័យតែប៉ុណ្ណោះ មិនមែនធ្វើសម្រាប់បុព្វហេតុបឹងកក់ទៀតទេ
ព្រោះឯកឧត្តមសង្កេតឃើញថារឿងអ្វីក៏ពួកគាត់ធ្វើបាតុកម្មបានដែរ ឲ្យតែឲ្យពួកគាត់ធ្វើ។
ក្នុងឱកាសអញ្ជើញជាអធិបតីក្នុងកិច្ចប្រជុំពិគ្រោះយោបល់ស្តីពី
អាទិភាពនៃការអភិវឌ្ឍន៏របស់កម្ពុជា ក្នុងរយ:ពេល៣ឆ្នាំខាងមុខ នៅថ្ងៃទី០៦ ខែកក្កដា
ឆ្នាំ២០១៥នេះ ឯកឧត្តម ប៉ា សុជាតិវង្ស បានមានប្រសាសន៍ថា ករណីបឹងកក់ ទេព វន្នី
និង យ៉ោម បុប្ផា គ្រាន់តែជាបាតុករពហុវិស័យតែប៉ុណ្ណឹង ហើយអាជីពពហុវិស័យរបស់គាត់នៅត្រង់ថា
សហគមន៍របស់គាត់ មិនមែនធ្វើសម្រាប់បុព្វហេតុបឹងកក់ទៀតទេ គឺគាត់ធ្វើដើម្បីឲ្យខ្លួនគាត់អស្ចារ្យ
និងទទួលបានពានរង្វាន់ក្រៅប្រទេសប៉ុណ្ណោះ។
ឯកឧត្តម អភិបាលរាជធានីភ្នំពេញ បានបញ្ជាក់ថា
តាមដែលឯកឧត្តមដឹង គាត់ធ្វើបាតុកម្ម១ថ្ងៃ បាន១០ដុល្លារ និងមួយព្រឹក បាន៥ដុល្លារ
និងបានប្រាក់ឧបត្ថម្ភច្រើនលើសពីនេះប្រចាំខែរាប់រយដុល្លារ។ ដូច្នេះគេចង់ឲ្យគាត់ស្លៀកស
គឺស, ចង់ឲ្យគាត់កោសក់ គាត់កោ។
ឯកឧត្តមបន្តថា អ្វីដែលពួកគាត់ធ្វើមកដល់ពេលនេះ មិនមែនធ្វើតែបឹងកក់ទេ រឿងជនភៀសខ្លូនអូស្ត្រាលី, រឿងអារ៉ែង និងសូម្បីរឿងលោកសង្ឃក៏គាត់ធ្វើបាន
សំខាន់ឲ្យតែឲ្យលុយ ព្រោះពួកគាត់បានក្លាយជាអ្នកតវ៉ាពហុវិស័យទៅហើយ។
ទោះជាយ៉ាងណា ឯកឧត្តម ប៉ា សុជាតិវង្ស
បានមានប្រសាសន៍ថា «ការតវ៉ាទាំងឡាយ
មើលមួយភ្លែត ដូចជាប្រឆាំង ប៉ុន្តែយើងកុំចាត់ទុកថា រាល់ការតវ៉ារបស់ប្រជាពលរដ្ឋ
គឺជាការប្រឆាំង ត្រូវចាត់ទុកថាវាជាបាតុភូតធម្មតានៃដំណើររីកចម្រើននៃលទ្ធិប្រជាធិបតេយ្យហើយប្រទេសកម្ពុជា
ប្រកាន់លទ្ធិប្រជាធិបតេយ្យ ដូច្នេះសកម្មភាពតវ៉ានានាអាចកើតមានឡើងបានគ្រប់ពេល។
ឯកឧត្តមបន្តថា បញ្ហាបឹងកក់ សាលាក្រុងនៅតែនៅចង់រៀបចំឲ្យតំបន់សហគមន៍បឹងកក់
និងតំបន់អភិវឌ្ឍន៍បឹងកក់មានតុល្យភាព។ បើតំបន់បឹងកក់នេះ យើងធ្វើឲ្យការអភិវឌ្ឍន៍តែផ្ទុយទៅវិញដីទំហំ១២,៤ហិកតា ដែលសហគមន៍បឹងកក់កំពុងរស់នៅ មិនបានអភិវឌ្ឍន៍
ធ្វើឲ្យទឹកលិច ធ្វើឲ្យផ្ទះរញ៉េរញ៉ៃ បញ្ចូលសេវាសាធារណៈមិនបាន ទឹកភ្លើងលូប្រឡាយមិនបានល្អ
និងធ្វើឲ្យពួកគាត់រស់នៅក្នុងស្ថានភាពមិនល្អ។ គោលដៅរបស់សាលារាជធានីភ្នំពេញ
គឺចង់កែលម្អ ដោយមិនមានអំពើហិង្សា។
គួរបញ្ជាក់ថាកិច្ចប្រជុំពិគ្រោះយោបល់ស្តីពី
អាទិភាពនៃការអភិវឌ្ឍន៏របស់កម្ពុជា ក្នុងរយ:ពេល៣ឆ្នាំខាងមុខ ធ្វើឡើងដោយមានកិច្ចសហការពីធនាគារពិភពលោក
និងសាលារាជធានីភ្នំពេញ។ កិច្ចប្រជុំនេះ ធ្វើឡើងនៅសណ្ឋាគារហ៊ីម៉ាវ៉ារី ក្នុងរាជធានីភ្នំពេញ
ដោយមានការចូលរួមរបស់លោក អាឡាសាន់ សូ ប្រធានគ្រប់គ្រងធនាគារពិភពលោក ពីតំណាងក្រុមប្រឹក្សារាជធានីភ្នំពេញ
កំពង់ស្ពឺ កំពង់ឆ្នាំង ខេត្តកណ្តាល និងខេត្តពោធិសាត់ សរុបប្រមាណជាង១០០នាក់៕
Subscribe to:
Posts (Atom)