បើអ្នកនៅខាងក្រៅមើលទៅឃើញថា ក្រុមអ្នកដឹកនាំបក្សប្រឆាំងកំពុងតែមានការប្រទាញប្រទង់គ្នាកាន់តែច្រើនទៅៗ ពីបញ្ហាមួយទៅបញ្ហាមួយ ក្នុងនោះមានរឿង លោកស្រី ឡាក់ សុភាព ជាមួយ លោក កឹម សុខា រឿងលោក កឹម សុខា ជាមួយ លោក សម រង្ស៊ី។ល។ ឥឡូវលេចឮរឿងលោក គង់ គាំ ជាមួយ លោក សម រង្ស៊ី ទៀត។
ប៉ុន្តែមានមតិមួយក្រុមទៀត ជាក្រុមអ្នកវិភាគតាមតុកាហ្វេ គេនិយាយថា «ជារឿងនយោបាយ» ព្រោះថា បច្ចុប្បន្នអ្នកណាក៏ដឹងដែរថា លោក ហ៊ុន សែន កំពុងតែតាមយ៉ាងស្អិតលើករណី លោក កឹម សុខា អនុប្រធានគណបក្សសង្រ្គោះជាតិ លើករណីប៉ុនប៉ង «ធ្វើរដ្ឋប្រហារ» ទម្លាក់នាយករដ្ឋមន្រ្តី និងរដ្ឋាភិបាលស្របច្បាប់ តាមការប្រមូលផ្តុំមនុស្សធ្វើបាតុកម្ម និងនៅពីក្រោយចលនាកុប្បកម្ម ដែលប្រើប្រាស់ឧបករណ៍អាចសំលាប់ ជីវិតមនុស្សបាន នៅផ្លូវវេងស្រេង ដើម្បីតទល់នឹងក្រុមសមត្ថកិច្ច កាលពីខែមករា ដើមឆ្នាំ២០១៤ កន្លងទៅ។
ទោះជាការចោទប្រកាន់នេះ ត្រូវបាន លោក កឹម សុខា ឆ្លើយបកវិញយ៉ាងហី ថាខ្លួនគ្មានបំណងយ៉ាងនេះទេ ដែលផ្ទុយស្រឡះពីអ្វីដែលខ្លួនបាន «សារភាព» នៅចំពោះមុខការប្រមូលផ្តុំអាណិកជនខ្មែរនៅទីក្រុងឡុងប៊ិច សហរដ្ឋអាមេរិក ដែលបាននិយាយកោកៗថា «ខ្ញុំសូមទោសបងប្អូន ដែលពួកយើងត្រូវបរាជ័យក្នុងការផ្តួលរំលំ លោក ហ៊ុន សែន និងគណបក្សប្រជាជនកម្ពុជា»។ តើភាសានេះមិនប្រៀបបានទៅនឹងការសារភាពជាផ្លូវការ ទៅនឹងអ្នកស្តាប់រាប់រយនាក់ និងប្រព័ន្ធផ្សព្វផ្សាយតាមបណ្តាញសង្គមដូចជា(Facebook)
និងវិទ្យុអាស៊ីសេរី ជាដើម ទេឬអ្វី?។
តើលោក កឹម សុខា ដឹងថារឿងនេះវាធ្ងន់ធ្ងរ គឺជាចលនាតស៊ូមួយ បានផ្ទុះឡើងតាមរយៈការប្រមូលផ្តុំមនុស្សរាប់ម៉ឺននាក់ ស្ទើរតែរៀងរាល់ថ្ងៃ អស់រយៈពេលជិតមួយឆ្នាំ រហូតដល់មានការចរចាគ្នារវាងគណបក្សទាំងពីរ នាថ្ងៃទី២២ខែកក្កដាឆ្នាំ២០១៤ ដើម្បីព្រមព្រៀងគ្នាបញ្ចប់ចលនានេះ។ កិច្ចព្រមព្រៀងនេះបានធ្វើឲ្យពលរដ្ឋទូទាំងប្រទេសមានក្តីសង្ឃឹមថា ចលនាប្រទាញប្រទង់គ្នា រវាងក្រុមប្រឆាំងនឹងរាជរដ្ឋាភិបាលត្រូវបានបញ្ចប់ដោយសន្តិវិធី។ ប៉ុន្តែអ្វីដែលគេនៅតែឆ្ងល់នោះគឺថា ហេតុអ្វីក៏ លោក កឹម សុខា នៅតែមិនអស់ចិត្ត មិនអស់ថ្លើម លើកកកាយរឿងនេះឡើងវិញ? តើនេះក៏ដោយសារមច្ឆិហតាដ៏ធំធេងរបស់ខ្លួនទេឬអ្វី?។
តើចលនាក្នុងជួរបក្សប្រឆាំងដែលគេឃើញថា ខិតខំបង្វែរករណី លោក កឹម សុខា ឲ្យទៅជាគេមើលឃើញការបែកបាក់ផ្ទៃក្នុងឡើងទៀត រវាងលោក គង់ គាំ ជាមួយ លោកសម រង្ស៊ី គេគិតថា ជាឆាកល្ខោនដ៏កំប៉ិចកំប៉ុកទៅវិញទេ។ ឆាកនេះមិនអាចបង្វែរភ្នែកសាធារណៈឲ្យបំភ្លេចរឿង លោក កឹម សុខា បានឡើយ។
ដល់គិតយូរៗទៅ លោក កឹម សុខា បែបភ័យខ្លួន ប្តូរកម្មវិធីវិលត្រឡប់មកកម្ពុជា យ៉ាងតក់ក្រហល់ ពីថ្ងៃទី២៤ មកថ្ងៃទី២៥ ខែមីនាឆ្នាំ២០១៥ វិញ ដើម្បីឆ្លៀតយកឱកាសជិះយន្តហោះទៅអង្វករ លោក ប្រធាន លោក សម រង្ស៊ី របស់ខ្លួន នៅប្រទេសបារាំង ដើម្បីសុំឲ្យទៅចរចាជាមួយ លោក នាយករដ្ឋមន្រ្តី ហ៊ុន សែន ឲ្យបន្ធូរដៃរឿងនេះ ឬក៏អាចឈានដល់បំភ្លេចរឿងនេះចោល។
លោក កឹម សុខា គិតបែបនេះដូចជាមើលស្រាលរឿងរ៉ាវពេក គឺករណីច្បាប់ ឬនិតិរដ្ឋនៃប្រទេសមួយ «មហិច្ឆិតាផ្តួលរំលំរដ្ឋាភិបាល » គិតថាមេដឹកនាំមួយរូប គឺ លោក ហ៊ុន សែន ដែលជានិច្ចជាកាល ត្រូវក្រុមប្រឆាំងមានគំនិតចង់ផ្តួលរំលំ សុខចិត្តដេកធ្វើព្រងើយឲ្យផែនការពួកគេបានសម្រេច ឬយ៉ាងណា?
ជាសរុប អ្វីដែលយើងបានលើកឡើងពីដំបូង ការវែកញែកវិភាគតាមតុកាហ្វេ ពីរឿងការបង្វែរទិស រឿងធំឲ្យទៅរករឿងកុំប៉ិចកុំប៉ុក ដូចជាស្ថិតនៅលើគោកមែន! សូមរងចាំមើលតទៅទៀត។
