ប្រមុខការទូតកម្ពុជា៖ បើមិនប្រកាន់ពហុភាគីនិយម ពិភពលោកនឹងមិនអាចយកឈ្នះ លើជំងឺរាតត្បាតបានទេ

 (ភ្នំពេញ)៖ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា បានថ្លែងថា បើបណ្តាប្រទេសនានាក្នុងពិភពលោក មិនប្រកាន់យកពហុភាគីនិយម ពិភពលោកនឹងមិនអាចយកឈ្នះលើជំងឺរាតត្បាត នាពេលបច្ចុប្បន្ន និងអនាគតបានទេ។

ប្រមុខការទូតកម្ពុជាថ្លែងបែបនេះ នៅក្នុងសន្និសីទរដ្ឋមន្ត្រីពាក់កណ្តាលឆមាស នៃចលនាមិនចូលបក្សសម្ព័ន្ធ ស្តីពី «ចលនាមិនចូលបក្សសម្ព័ន្ធ នៅចំណុចនៃកិច្ចខិតខំប្រឹងប្រែងពហុភាគី ក្នុងការឆ្លើយតបទៅនឹងការប្រឈមពិភពលោក» ដែលបានធ្វើឡើងចាប់ពីថ្ងៃទី១៣ ដល់ថ្ងៃទី១៤ ខែកក្កដា ឆ្នាំ២០២១។

ក្នុងសេចក្តីថ្លែងការណ៍របស់ខ្លួន, លោក ប្រាក់ សុខុន បានបញ្ជាក់យ៉ាងដូច្នេះថា៖ «ចំពោះកម្ពុជា មានតែនៅក្នុងក្របខ័ណ្ឌនៃពហុភាគីនិយមពិតប្រាកដមួយប៉ុណ្ណោះ ដែលសហគមន៍ អន្តរជាតិនឹងអាចដោះស្រាយនូវបញ្ហាប្រឈមសំខាន់ៗទាំងនេះបាន។ ការណ៍ដែលគ្រាន់តែរៀបរាប់ពីពហុភាគី និយមដើម្បីផលប្រយោជន៍ខ្លួនឯង ដោយមិនទទួលស្គាល់ពហុនិយមនៃពិភពលោក នោះគ្រាន់តែជាការនិយាយតែមាត់ប៉ុណ្ណោះ»។

លោកបន្តថា «ពហុភាគីនិយមពិតមានន័យថា ការទទួលយកភាពខុសគ្នា និងការប្រែក្លាយគូប្រជែងឱ្យទៅជាការប្រកួតប្រជែងដោយសន្តិវិធី និងភាពស្មោះត្រង់។ បើសិន ជាគ្មានចំណុចទាំងនេះទេ យើងនឹងមិនអាចយកឈ្នះលើជំងឺរាតត្បាតនាពេលបច្ចុប្បន្ន និងអនាគតបានទេ យើងនឹងមិនអាចបន្ថយល្បឿននៃការប្រែប្រួលអាកាសធាតុ និងអេកូឡូស៉ី ក៏ដូចជាយើងនឹងមិនអាចគ្រប់គ្រងបច្ចេកវិទ្យាថ្មី នៅក្នុងបរិបទនៃគូប្រកួតប្រជែង ដែលយើងកំពុងជួបប្រទះនាពេលបច្ចុប្បន្ននេះទេ»។

ប្រមុខការទូតកម្ពុជា បន្ថែមថា យោងតាមប្រវត្ដិសាស្ដ្រ ចលនាមិនចូលបក្សសម្ព័ន្ធបានផ្តួចផ្តើមគំនិតនៃទំនាក់ទំនងអន្តរជាតិ ដែលជួយទប់ស្កាត់សង្គ្រាមលោកថ្មី។ លោក ប្រាក់ សុខុន ជឿជាក់ថា សព្វថ្ងៃនេះ នៅក្នុងពិភពពហុភាគីនៃការក្រកួតប្រជែងប្រកបដោយគ្រោះថ្នាក់ គំនិតនៃការរួមរស់ដោយសន្តិសហវិជ្ជមាន ដូចដែលបានបង្កើតឡើងដោយសហស្ថាបនិកនៃចលនាមិនចូលបក្សសម្ព័ន្ធ គឺនៅតែមានភាពសមស្របជាងពេលណាទាំងអស់ ហើយគ្មានប្រទេសណាមួយដែលប្រសើរ ឬមានសមត្ថភាពជាងចលនាមិនចូលបក្សសម្ព័ន្ធ ក្នុងការលើកកម្ពស់គំនិតនេះ ម្តងទៀតនោះទេ។

នាពេលបច្ចុប្បន្ន ក្នុងចំណោមបញ្ហាប្រឈមសំខាន់ៗ ដែលកំពុងញាំញីពិភពលោក ក្នុងរយៈពេល ០២ឆ្នាំចុងក្រោយនេះ រួមនឹងការប្រណាំងប្រជែងភូមិសាស្រ្តនយោបាយរបស់មហាអំណាច ការផ្ទុះឡើងនៃជំងឺរាតត្បាតកូវីដ១៩ ដ៏កាចសាហាវ គឺជាដំណាក់កាលដ៏អាក្រក់បំផុតនៃវិបត្តិផ្នែកសុខភាព សេដ្ឋកិច្ច-សង្គមកិច្ច និងមនុស្សធម៌។ ការរើបកាន់តែខ្លាំងឡើងវិញនៃគ្រោះមហន្តរាយដោយធម្មជាតិ និងពីអាកាសធាតុ និងការផ្លាស់ប្តូរឆ្ពោះទៅរកសេដ្ឋកិច្ចឌីជីថល ដែលអាចនឹងកើតមានឡើងនាពេលបន្ទាប់។

បើតាមលោក ប្រាក់ សុខុន, កម្ពុជាជឿជាក់យ៉ាងមុតមាំថា ក្នុងការឆ្លើយតបទៅនឹងបញ្ហាប្រឈមជាសកលទាំងនេះ ការខិតខំប្រឹងប្រែងកិច្ចសហប្រតិបត្តិការពហុភាគី គួរតែត្រូវបានបញ្ចូលជាមូលដ្ឋាន នៅក្នុងប្រព័ន្ធបទបញ្ញត្តិនានា ដោយស្របតាមគោលការណ៍បានឌុង សេចក្តីថ្លែងការណ៍បាគូឆ្នាំ២០១៩ និងធម្មនុញ្ញអង្គការសហប្រជាជាតិ។

ខណៈដែលសហគមន៍អន្តរជាតិព្យាយាមជម្នះផលប៉ះពាល់នៃជំងឺរាតត្បាត យើងត្រូវពង្រឹងគុណតម្លៃនៃពហុភាគីនិយម និងកិច្ចសហប្រតិបត្តិការអន្តរជាតិ ដើម្បីធានាឱ្យប្រទេសទាំងអស់ទទួលបានវ៉ាក់សាំង និងឧបករណ៍វេជ្ជសាស្ត្រ ដោយគ្មានការរារាំង និងប្រកបដោយសមភាព។ ភាពចាំបាច់នេះ មានសារៈសំខាន់ណាស់ ក្នុងការធ្វើឱ្យប្រទេសជាសមាជិកចលនាមិនចូលបក្សសម្ព័ន្ឋ ដើរលើមាគ៌ាស្តារសេដ្ឋកិច្ចរបស់ខ្លួនឡើងវិញ។ វិធីសាស្រ្តទិសដៅពីរបច្ចុប្បន្នរបស់ប្រទេសអភិវឌ្ឍន៍ ប្រឆាំងនឹងប្រទេសកំពុងអភិវឌ្ឍន៍ អាចនឹងទទួលបរាជ័យដោយខ្លួនឯង។

ពាក់ព័ន្ធនឹងគ្រោះមហន្តរាយដោយធម្មជាតិ និងពីអាកាសធាតុ ការប្រឈមនានាដែលយើងកំពុងជួបប្រទះ ត្រូវការចាំបាច់នូវវិធីសាស្រ្តរួមមួយ ដែលកើតចេញពីការសាមគ្គីភាព ការប្តេជ្ញាចិត្តដោយមិនគិតពីផលប្រយោជន៍ផ្ទាល់ខ្លួន និងស្មារតីមនុស្សធម៌។ នៅក្នុងបរិបទនេះ កិច្ចការនៃចលនាមិនចូលបក្សសម្ព័ន្ធ មានសារៈសំខាន់បំផុតក្នុងការសម្រេចឱ្យបាននូវការអភិវឌ្ឍប្រកបដោយចីរភាព និងវិបុលភាពសម្រាប់មនុស្សទាំងពួង។ ឧទាហរណ៍៖ ការអនុវត្តនៃគោលដៅសកម្មភាពអាកាសធាតុ និងការអភិវឌ្ឍប្រកបដោយចីរភាព ត្រូវបានលើកទឹកចិត្តតាមរយៈការអនុម័តប្រភពថាមពលកកើតឡើងវិញ ដែលជួយទប់ស្កាត់ការបំភាយកាបូន នឹងមានផលប្រយោជន៍ដល់ពិភពលោកទាំងមូល។

ការប្រឈមជាសកល ដែលត្រូវបានផ្សារភ្ជាប់ជាមួយនឹងការមកដល់នៃបដិវត្តឧស្សាហកម្មទី៤ នឹងតម្រូវឱ្យយើងសហការគ្នាក្នុងការផ្ទេរបច្ចេកវិទ្យា និងការចែករំលែកបច្ចេកវិទ្យា មិនមែនគ្រាន់តែរវាងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ប៉ុណ្ណោះទេ។ ការផ្តល់ការគាំទ្រផ្នែកបច្ចេកវិទ្យាបែបនេះ មានតួនាទីយ៉ាងសំខាន់ក្នុងការរក្សានិរន្តរភាពសេដ្ឋកិច្ចរបស់បណ្តាប្រទេសសមាជិកចលនាមិនចូលបក្សសម្ព័ន្ធនីមួយៗ ក្នុងអំឡុងពេលផ្លាស់ប្តូរ ឆ្ពោះទៅរកសេដ្ឋកិច្ចឌីជីថលពិភពលោក។

ការទាក់ទាញការវិនិយោគផ្នែកបច្ចេកវិទ្យានៅក្នុងប្រព័ន្ធហេដ្ឋារចនាសម្ព័ន្ធ ការអប់រំ និងសុខាភិបាល នឹងជួយជំរុញដល់កំណើនសេដ្ឋកិច្ច៕

COVAX សម្រេចប្រើវ៉ាក់សាំងចិន, ក្រុមហ៊ុនចិន នឹងផ្តល់១១០លានដូស ជូនទៅកូវ៉ាក់ ដើម្បីចែកចាយទៅប្រទេសក្រីក្រី

(ភ្នំពេញ)៖ មជ្ឈមណ្ឌលកូវ៉ាក់ (COVAX Facility) បានសម្រេចប្រើវ៉ាក់សាំងចំនួនពីររបស់ចិន ដើម្បីបម្រើដល់ផែនការរបស់ខ្លួន ក្នុងការចែកចាយវ៉ាក់សាំងទៅកាន់ប្រទេសក្រីក្រ។

ស្ថានទូតចិនប្រចាំនៅកម្ពុជា បានចេញផ្សាយនៅព្រឹកថ្ងៃទី១៣ ខែកក្កដា ឆ្នាំ២០២១នេះថា វ៉ាក់សាំងរបស់ចិន ស៊ីណូហ្វាម និងស៊ីណូវ៉ាក់ ត្រូវបានដាក់បញ្ចូលក្នុងបញ្ជីនៃយន្តការ COVAX ដោយជោគជ័យហើយ។

បើតាមស្ថានទូតចិននៅកម្ពុជា បានឱ្យដឹងថា កាលថ្ងៃទី១២ ខែកក្កដា សម្ព័ន្ធថ្នាំបង្ការសកល (GAVI) បានប្រកាសពីការចុះហត្ថលេខាលើកិច្ចព្រមព្រៀងទិញមុន (Pre Order) ជាមួយក្រុមហ៊ុន China National Pharmaceutical Group Corporation និងក្រុមហ៊ុន Sinovac Biotech។

ស្ថានទូតចិនបានបញ្ជាក់បន្ថែមថា តាមរយៈកិច្ចព្រមព្រៀងនេះ វ៉ាក់សាំងចិនស៊ីណូហ្វាម និងស៊ីណូវ៉ាក់ បានចូលក្នុងបញ្ជីឈ្មោះនៃយន្តការ COVAX ដែលអាចផ្គត់ផ្គង់វ៉ាក់សាំងជូន COVAX ដើម្បីប្រើប្រាស់ក្នុងកិច្ចទប់ស្កាត់ជំងឺវីរុសនៅក្នុងប្រទេសកំពុងអភិវឌ្ឍន៍ចាប់ពីខែកក្កដា នេះតទៅ។

ប្រភពបន្តថា យោងតាមកិច្ចព្រមព្រៀងនេះ ក្រុមហ៊ុនចិនទាំងពីរ នឹងផ្គត់ផ្គង់វ៉ាក់សាំងកូវីដចំនួន ១១០លានដូសទៅកាន់ COVAX មុនចុងខែតុលាឆ្នាំនេះ ហើយនឹងបន្តផ្គត់ផ្គង់រយៈពេលវែងជាបន្តបន្ទាប់ថែមទៀតផង។

ស្ថានទូតចិន បានបញ្ជាក់ថា ការចុះហត្ថលេខាលើកិច្ចព្រមព្រៀងរវាងក្រុមហ៊ុនចិនទាំងពីរ ជាមួយសម្ព័ន្ធ GAVI ជាការបង្ហាញពីលក្ខណៈសំខាន់នៃការអនុវត្តសកម្មភាពជាក់ស្តែងរបស់ចិនក្នុងការចាត់ទុកវ៉ាក់សាំងជា «ផលិតផលសាធារណៈ»។

សូមបញ្ជាក់ថា មជ្ឈមណ្ឌលកូវ៉ាក់ គឺជាយន្តការមួយបង្កើតឡើងដោយសម្ព័ន្ធអង្គការដៃគូអន្តរជាតិ ជាពិសេសអង្គការមនុស្សធម៌ រួមជាមួយអង្គការសុខភាពពិភពលោក ដើម្បីស្វះស្វែងរកវ៉ាក់សាំងផ្គត់ផ្គង់ទៅកាន់ប្រទេសក្រីក្រ និងប្រទេសកំពុងអភិវឌ្ឍន៍។

ដើមឡើយមជ្ឈមណ្ឌលកូវ៉ាក់ បានប្រើប្រាស់តែវ៉ាក់សាំងអាស្ត្រាហ្សេនីកាតែប៉ុណ្ណោះក្នុងការចែកចាយទៅកាន់ប្រទេសក្រីក្រី និងប្រទេសកំពុងអភិវឌ្ឍន៍។ តាមរយៈយន្តការកូវ៉ាក់នេះ ប្រទេសកម្ពុជា បានទទួលវ៉ាក់សាំងអាស្ត្រាហ្សេនីកា ដែលផលិតនៅប្រទេសឥណ្ឌាចំនួន ៣២៤,០០០ដូស កាលពីខែមីនា កន្លងទៅនេះផងដែរ៕

លោកនាយរដ្ឋមន្ត្រី ​៖ សូមអបអរសាទរចំពោះបងប្រុសឈ្មោះ ណុប មាន អាយុ៧០ឆ្នាំជាកសិកររស់នៅភូមិសែនសំ ឃុំអូរស្វាយ ស្រុកត្រពាំងប្រាសាទ

នៅព្រឹកថ្ងៃអង្គារ ទី១៣ ខែកក្កដា ឆ្នាំ២០២១នេះ លោកនាយករដ្ឋមន្រ្តី ហ៊ុន សែន បានចូលរួមអបអរសាទរចំពោះលោក ណុប មាន អាយុ៧០ឆ្នាំជាកសិកររស់នៅភូមិសែនសំ ឃុំអូរស្វាយ ស្រុកត្រពាំងប្រាសាទខេត្ត ឧត្តរមានជ័យដែលទទួលបាននូវការចាក់វ៉ាក់សាំងទី៥លាននៅព្រឹកថ្ងៃទី១៣ខែកក្កដាឆ្នាំ២០២១នេះ។

លោកនាយករដ្ឋមន្រ្តី ហ៊ុន សែន បានបញ្ជាក់ថា លោកជំទាវ ឱ វណ្ណឌីន  នឹងនាំយកថវិកាចំនួន  ១០លានរៀលព្រមទាំងសម្ភារៈផ្សេងទៀតដែលជាជំនួយឧបត្ថម្ភទៅប្រគល់ជូនដោយផ្ទាល់។ លោកនាយករដ្ឋមន្រ្តីបានជូនពរថា «សូមអរគុណបងប្អូនជនរួមជាតិដែលបានចូលរួមប្រយុទ្ធប្រឆាំងកូវីដ១៩ តាមរយៈការទទួលយកការចាក់វ៉ាក់សាំងដើម្បីការពារខ្លួននិងក្រុមគ្រួសារ។»

លោកនាយករដ្ឋមន្រ្តី ហ៊ុន សែន បានកោតសរសើរក្រុមគ្រូពេទ្យនិងអាជ្ញាធរគ្រប់លំដាប់ថ្នាក់ដែលបានចូលរួមចាក់វ៉ាក់សាំងជូនប្រជាជនយើង ដែលមកដល់ពេលនេះយើងចាក់បាន៥០ភាគរយនៃចំនួនប្រជាជនដែលនឹងត្រូវចាក់១០លាននាក់៕

តើឧបករណ៍តេស្តរហ័សរកកូវីដ-១៩ អាចរកទិញនៅកន្លែងណាបាន?

 ភ្នំពេញ៖ បន្ទាប់ពីក្រសួងសុខាភិបាលបានអនុញ្ញាតឱ្យមានការធ្វើតេស្ដរកកូវីដ-១៩ ដោយខ្លួនឯង ព្រមទាំងទទួលស្គាល់ឧបករណ៍ធ្វើតេស្តរហ័សចំនួន៤ក្រុមហ៊ុន លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល បានមានប្រសាសន៍ប្រាប់ “កម្ពុជាថ្មី” នៅថ្ងៃនេះថា ច​រាចរណ៍ទិញលក់ឧបករណ៍ធ្វើតេស្តរហ័សរកអង់ទីហ្សែនមេរោគកូវីដ-១៩នេះ អាស្រ័យលើក្រុមហ៊ុនឯកជនដែលមានច្បាប់ជាអ្នកនាំចូល ដោយតម្រូវឱ្យដាក់លក់តាមឱសថស្ថានស្របច្បាប់។ 

ទាក់ទងទៅនឹងមានការឃោសនាលក់ឧបករណ៍ធ្វើតេស្ដកូវីដ-១៩ តាមបណ្ដាញសង្គមនោះ អ្នកនាំពាក្យក្រសួងសុខាភិបាលខាងលើនេះ មានប្រសាសន៍បន្តថា ការធ្វើតេស្តដោយឧបករណ៍មិនមានការទទួលស្គាល់ពីក្រសួងសុខាភិបាល  គឺមិនអាចជឿទុកចិត្តបានទេ។

ជាមួយគ្នានេះ លោកស្រីវេជ្ជបណ្ឌិត ឱ វណ្ណឌីន បានអំពាវនាវដល់សាធារណជនមានការប្រុងប្រយ័ត្ន និងពិនិត្យឱ្យបានច្បាស់លាស់ មុននឹងទិញ និងយកឧបករណ៍តេស្ដរហ័សកូវីដ-១៩ ណាមួយមកប្រើប្រាស់ ដើម្បីទទួលបានប្រសិទ្ធភាពពិតប្រាកដ។

បច្ចុប្បន្នក្រសួងសុខាភិបាលបានផ្ដល់ការទទួលស្គាល់ និងអនុញ្ញាតឱ្យប្រើប្រាស់តេស្ដរហ័សរកអង់ទីហ្សែនកូវីដ-១៩ ពី៤ក្រុមហ៊ុនមានដូចជា ក្រុមហ៊ុន Abbott ផលិតឧបករណ៍តេស្ដរហ័សរកអង់ទីហ្សែនកូវីដ-១៩ ឈ្មោះ ABBOTT PANBIO^TM COVID-19 Ag RAPID TEST DEVICE ក្រុមហ៊ុន Roche ផលិតឧបករណ៍តេស្ដរហ័សរក អង់ទីហ្សែនកូវីដ-១៩ ឈ្មោះ ROCHE SARS-CoV-2 Rapid Antigen Test 25T ក្រុមហ៊ុន SD Biosensor ផលិតឧបករណ៍តេស្ដរហ័សរកអង់ទីហ្សែនកូវីដ-១៩ ឈ្មោះ STANDARD Q COVID-19 Ag Test និងក្រុមហ៊ុន Phase Scientific ផលិតឧបករណ៍តេស្ដរហ័សរកអង់ទីហ្សែនកូវីដ-១៩ ឈ្មោះ INDICAID COVID-19 Rapid Antigen Test។

ជាមួយគ្នានេះ ក្រសួងសុខាភិបាល នឹងសិក្សាលើឧបករណ៍តេស្តរហ័សផ្សេងទៀត ដើម្បីផ្ដល់ការទទួលស្គាល់ និងការអនុញ្ញាតឧ្យមានការប្រើប្រាស់នៅកម្ពុជា ដោយផ្អែកលើគោលការណ៍ប្រសិទ្ធភាពខ្ពស់ សុវត្ថិភាព និងភាពងាយស្រួលក្នុងការប្រើប្រាស់ ភាពឆាប់រហ័សនៃការរកឃើញលទ្ធផល និងថ្លៃទាបសមរម្យ។ គួររំលឹកផងដែរថា នៅដើមខែកក្កដានេះ ក្រសួងប្រៃសណីយ៍ និងទូរគមនាគមន៍ បានឱ្យដឹងថា នឹងនាំចូលឧបករណ៍តេស្តរហ័សអង់ទីហ្សែនកូវីដ-១៩ (Covid-19 rapid antigen test) ពីប្រទេសកូរ៉េ ដើម្បីចែកចាយបន្តក្នុងតម្លៃដើម ៣.៧ ដុល្លារ ក្នុងគោលដៅ​យកទៅ​ប្រើប្រាស់ប៉ុណ្ណោះ ដើម្បីរារាំងការឆ្លងរាលដាលនៃជំងឺកូវីដ-១៩ និងរារាំងការផ្ទុះក្នុង​សហគមន៍។

ក្រសួងនឹងលក់ឧបករណ៍ធ្វើតេស្តរហ័សរកជំងឺកូវីដ-១៩​ដល់ស្ថាប័នណាដែលមាន​បុគ្គលិក​ធ្វើការ​កកកុញ ចាប់ពី១០០​នាក់ឡើងទៅ និងស្ថាប័នណា​ដែល​មាន​ទីតាំងស្ថិតក្នុង​តំបន់ហានិភ័យ​នៃការឆ្លងរាលដាលនៃជំងឺកូវីដ-១៩។ ចំណែក​ឯស្ថាប័នឯកជនដែលមានបុគ្គលិកធ្វើការក្រោម១០០នាក់ជាប្រចាំថ្ងៃ និងមិនស្ថិតក្នុង​តំបន់​រាលដាលខ្លាំងនៃជំងឺ​កូវីដ-១៩ ក្រសួងនឹងលក់ឧបករណ៍ធ្វើតេស្តរហ័សរកជំងឺកូវីដ-១៩​ជូន​តាមក្រោយ។
គួរបញ្ជាក់បន្ថែមថា កាលពីថ្ងៃទី០១ ខែកក្ដដា ឆ្នាំ២០២១កន្លងទៅនេះ សម្តេចតេជោ ហ៊ុន សែន បានប្រកាសបើកឱកាស​ឱ្យក្រុមហ៊ុនឯកជន អាចប្រើប្រាស់ឧបករណ៍តេស្ដរហ័ស ធ្វើតេស្ដសុខភាពបុគ្គលិក ឬកម្មកររបស់ខ្លួន ដើម្បីងាយស្រួលគ្រប់គ្រង និងបញ្ជូនទៅសម្រាកព្យាបាលបានលឿន ក្នុងករណីរកឃើញវិជ្ជមានកូវីដ-១៩ ខណៈប្រជាពលរដ្ឋមានចំនួនច្រើន ហើយក្រុមគ្រូពេទ្យមានចំនួនតិច និងដើម្បីបញ្ចៀសភាពយឺតយ៉ាវ និងគ្រប់គ្រងសភាពការណ៍មិនបានទាន់ពេលវេលា៕
ប្រភព៖ កម្ពុជាថ្មី

អភិបាលខេត្តស្វាយរៀង បានបើកយុទ្ធនាការចាក់វ៉ាក់សាំងការពារជំងឺឆ្លងកូវីដ-១៩ ប្រគេនព្រះសង្ឃ ប្រជាពលរដ្ឋ និងកម្មករកម្មការិនី ស្រុកស្វាយជ្រំ

 ស្វាយរៀង៖ នៅថ្ងៃទី១២ ខែកក្កដា ឆ្នាំ២០២១នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានបើកយុទ្ធនាការចាក់វ៉ាក់សាំងការពារជំងឺឆ្លងកូវីដ១៩ ប្រគេនព្រះសង្ឃ ជូនប្រជាពលរដ្ឋ និងកម្មករកម្មការិនី ស្រុកស្វាយជ្រំ ។

ដោយមានការចូលរួមពី លោក អ៉ឹម សារ៉ា ប្រធានក្រុមការងារចុះជួយឃុំគ្រួស លោកប្រធានមន្ទីរសុខាភិបាល នៃរដ្ឋបាលខេត្ត លោកប្រធានមន្ទីរសាធារណៈការ និងដឹកជញ្ជូនខេត្ត លោកអភិបាល អភិបាលរងស្រុកស្វាយជ្រំ លោកមេភូមិ មេឃុំ យុវជនស.ស.យ.ក ក្រុមគ្រូពេទ្យ និងប្រជាពលរដ្ឋ អាជ្ញាធរពាក់ព័ន្ធមួយចំនួនទៀត។

នាឱកាសនោះ លោក ម៉ែន វិបុល បានបញ្ជាក់ថា យុទ្ធនាការចាក់វ៉ាក់សាំងការពារជំងឺកូវីដ១៩ ដែលបានប្រព្រឹត្តិទៅនៅថ្ងៃនេះ គឺជាការគិតគូដោយយកចិត្តទុកដាក់បំផុតរបស់លោកនាយករដ្ឋមន្ត្រី ហ៊ុន សែន ជូនដល់ប្រជាពលរដ្ឋឱ្យមានសុខភាពមាំមួន ក្នុងការបង្កើនភាពស៊ាំ និងអង់ទីគ័រការពារប្រឆាំងនឹងជំងឺឆ្លងរាតត្បាតកូវីដ-១៩ ជាពិសេសវ៉ាក់សាំងនេះអាចជួយកាត់បន្ថយការឆ្លងរាលដាលបានមួយផ្នែកធំ ទោះបីវាមានការឆ្លង ក៏អ្នកជំងឺមិនធ្ងន់ធ្ងរ មិនមានហានិភ័យដល់អាយុជីវិតនោះឡើយ។

លោកអភិបាលខេត្តក៏បានបន្តថា ការចាក់វ៉ាក់សាំងនៅក្នុងខេត្តស្វាយរៀងកន្លងទៅ គឺបានចាក់ជូនដល់មន្ត្រី-រាជការ ហើយបច្ចុប្បន្នកំពុងដំណើការចាក់ជូនដល់ប្រជាពលរដ្ឋ ព្រះសង្ឃ កម្មករ កម្មការិនីចំនួន០៤ ស្រុក-ក្រុង រួមមាន៖ (១)ក្រុងបាវិត (២)ស្រុកកំពង់រោទិ៍ (៣)ស្រុករំដួល និងក្រុងស្វាយរៀង ទន្ទឹមនេះនៅថ្ងៃទី១២ ខែកក្កដា ឆ្នាំ២០២១នេះ រដ្ឋបាលខេត្តបានរៀបចំបើកយុទ្ធនាការចាក់វ៉ាក់សាំង ចំនួន០៤ស្រុក បន្ថែមទៀតរួមមាន៖ ស្រុកស្វាយជ្រំ ស្រុករមាសហែក ស្រុកស្វាយទាប និងចន្ទ្រាស្រុកចន្ទ្រា ។

លោក ម៉ែន វិបុល ក៏បានអំពាវនាវប្រជាពលរដ្ឋដែលមកទទួលការចាក់វ៉ាក់សាំង ត្រូវមកតាមការកំណត់របស់អាជ្ញាធរ ចៀសវាងមកប្រជ្រៀតគ្នាធ្វើឱ្យបាត់សណ្ដាប់ធ្នាប់ជាដើម។ ចំពោះប្រជាពលរដ្ឋដែលដល់វេនមកទទួលវ៉ាក់សាំង ត្រូវអញ្ជើញមកទទួលវ៉ាក់សាំងដូសទី១ ដោយយកឯកសារមកជាមួយមានដូចជា អត្តសញ្ញាណប័ណ្ណ សៀវភៅគ្រួសារ សំបុត្រកំណើត ឬឯកសារពាក់ព័ន្ធនានា ។ ម្យ៉ាងទៀតក្រោយទទួលបានវ៉ាក់រួចត្រូវតែបន្តប្រកាន់ភ្ជាប់នូវវិធានការ”៣ការពារ ៣កុំ”របស់ប្រមុខរាជរដ្ឋាភិបាលឲ្យបានខ្ជាប់ខ្ជួន។ ឯកឧត្តមបន្តថា ការគិតគូរដ៏ឈ្លាសវ៉ៃនិងប៉ិនប្រសព្វរបស់លោកនាយករដ្ឋមន្រ្តី ហ៊ុន សែន បានផ្តល់វាក់សាំងដើម្បីជូនដល់ប្រជាពលរដ្ឋ កម្មករ កម្មការិនីព្រះសង្ឃដែលមានអាយុចាប់ពី ១៨ឆ្នាំឡើងទៅដោយឥតគិតថ្លៃ ហើយនៅថ្ងៃនេះ និងជំហានបន្តបន្តបន្ទាប់ទៀតនៅពេលខាងមុខ ប្រជាពលរដ្ឋក្នុងខេត្តស្វាយរៀងទាំងមូល និងទទួលបានការចាក់វ៉ាក់សាំងគ្រប់ៗគ្នា ក្នុងទប់ស្កាត់នៃការឆ្លងជំងឺកូវីដ-១៩ ព្រមទាំងធ្វើឱ្យស្ថានភាពសេដ្ឋកិច្ច វិលទៅរកភាពដើមវិញនាពេលខាងមុខ។

សូមបញ្ជាក់ថា យុទ្ធនាការចាក់វ៉ាក់នៅក្នុងស្រុកស្វាយជ្រំចាប់ផ្ដើមពីថ្ងៃទី១២ ខែកក្កដា ឆ្នាំ២០២១នេះ នៅតាមទីតាំងដែលបានរៀបចំ ចំនួន១៦ទីតាំង រួមមាន ៖
១-ឃុំអង្គតាសូ សាលាបឋមសិក្សារកា ២-ឃុំបាសាក់ នៅសាលាបឋមសិក្សាស្វាយតាភ្ល
៣-ឃុំចំបក់ នៅអនុវិទ្យាល័យចំបក់ ៤-ឃុំកំពង់ចំឡង នៅសាលាបឋមសិក្សាតាជៃ ៥-ឃុំតាសួស នៅសាលាបឋមសិក្សាចំបក់កោង ៦- ឃុំឈើទាល នៅមណ្ឌលសុខភាពឈើទាល ៧-ឃុំដូនស នៅសាលាបឋមសិក្សាល្ងើន ៨-ឃុំគោកព្រីង នៅសាលាបឋមសិក្សាអង្គកប្បាស ៩-ឃុំក្រោលគោ នៅវិទ្យាល័យហ៊ុនសែនក្រោលគោ ១០-ឃុំគ្រួស នៅសាលាបឋមសិក្សាគ្រោះ ១១-ឃុំពោធិរាជ នៅសាលាបឋមសិក្សាវត្តស្វាយ ១២-ឃុំស្វាយអង្គ នៅអនុវិទ្យាល័យស្វាយផ្អែម ១៣-ឃុំស្វាយជ្រំ នៅសាលាបឋមសិក្សាស្វាយជ្រំ ១៤-ឃុំស្វាយធំ នៅវត្តទួលសាមគ្គីឧត្តម ១៥- ឃុំស្វាយយា នៅសាលាបឋមសិក្សាឈូកមាស ១៦- ឃុំធ្លក នៅសាលាបឋមសិក្សាធ្លក ៕

កងរាជអាវុធហត្ថរាជធានីភ្នំពេញ​ ចូលរួមអបអរសាទរខួបអនុស្សាវរីយ៍លើកទី២៨ ទិវាកំណើតកងរាជអាវុធហត្ថ ១៤ កក្កដា ១៩៩៣ - ១៤ កក្កដា ២០២១

 (ភ្នំពេញ)៖ កងរាជអាវុធហត្ថ គឺជាអង្គភាពទ័ពជំនាញមួយ នៃកងយោធពលខេមរភូមិន្ទ មានការអភិវឌ្ឍ គ្រប់ផ្នែកដូចជា ការកសាងកម្លាំង ការកសាងហេដ្ឋារចនាសម្ពន្ធជំរំជម្រក ការអប់រំហ្វឹកហ្វឺនរៀនសូត្រ ការងារប្រតិបត្តិការតួនាទី ភារកិច្ចប្រកបដោយវិន័យ គោរពច្បាប់ គោរពសិទ្ធមនុស្ស។ បច្ចុប្បន្ន កងរាជអាវុធហត្ថ ត្រូវបានដឹកនាំបញ្ជារួម ដោយលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ដែលមាន ទស្សនវិស័យវែងឆ្ងាយ មានសេចក្តីក្លាហាន មានការទទួលខុសត្រូវខ្ពស់ ចំពោះភារកិច្ចដែលថ្នាក់លើប្រគល់ជូន ជាពិសេស ចូលរួម ពង្រឹងការអនុវត្តច្បាប់ ការពាររដ្ឋធម្មនុញ្ញ ការពាររាជរដ្ឋាភិបាលក្រោមការដឹនាំ របស់លោកនាយករដ្ឋមន្រ្តី តេជោ ហ៊ុន សែន ។

កងរាជអាវុធហត្ថ បានត្រៀមកម្លាំង និងមធ្យោបាយ ក្នុងការបំពេញតួនាទីភារកិច្ច អនុវត្តបទបញ្ជា គ្រប់កាលៈទេសៈ គ្រប់ពេលវេលា ដើម្បីចូលរួមរក្សាឲ្យបានសុខសន្តិភាព សុវត្ថិភាព ស្ថិរភាព សណ្តាប់ធ្នាប់សាធារណៈ និងរបៀបរៀបរយសង្គមជូនប្រជាជន និងប្រទេសជាតិតាមមាគ៌ាដឹកនាំដ៏ខ្ពង់ខ្ពស់របស់ប្រមុខរាជរដ្ឋាភិបាល៕

ប្រជាពលរដ្ឋ ប្រមាណ ៤០ម៉ឺននាក់ នៅក្នុងស្រុកចំនួន ៥ ទៀត នឹងទទួលបានវ៉ាក់សាំងបង្ការជម្ងឺកូវីដ ​១៩ បន្ទាប់ពី ប្រជាពលរដ្ឋជា ២៨ម៉ឺននាក់ នៅក្នុងក្រុង ស្រុកចំនួន ៥ នៃភូមិសាស្ត្រ ខេត្តកំពង់ចាម ទទួលបានវ៉ាក់សាំងបង្ការ ក្នុងដូសទី១ រួចហើយនោះ

កំពង់ចាម៖ ថ្លែងនៅក្នុងឱកាស ដឹកនាំកិច្ចប្រជុំពិភាក្សា លើផែនការចាក់វ៉ាក់សាំងបង្ការកូវីដ ១៩ ជូនប្រជាពលរដ្ឋ ក្នុងស្រុកចំនួន ៥ នៃខេត្តកំពង់ចាម នៅព្រឹកថ្ងៃទី១៣ ខែកក្កដា ឆ្នាំ២០២១ នេះ លោក អ៊ុន ចាន់ដា អភិបាលខេត្ត និងជាប្រធានគណៈកម្មការចំពោះកិច្ច ចាក់វ៉ាក់សាំងថ្នាក់ខេត្ត បានលើកឡើងថា ៖«ប្រជាពលរដ្ឋ មានអាយុ ១៨ឆ្នាំឡើងទៅ ប្រមាណ ៤០ម៉ឺននាក់ នៅក្នុងស្រុកចំនួន ៥ ទៀត នឹងទទួលបានវ៉ាក់សាំងបង្ការជម្ងឺកូវីដ ​១៩ បន្ទាប់ពី ប្រជាពលរដ្ឋ ប្រមាណជា ២៨ម៉ឺននាក់ នៅក្នុងក្រុង ស្រុកចំនួន ៥ នៃភូមិសាស្ត្រខេត្តកំពង់ចាម ទទួលបានវ៉ាក់សាំងបង្ការ ក្នុងដូសទី១ រួចហើយនោះ» ។ កិច្ចប្រជុំនេះ ក៏មានការអញ្ជើញចូលរួម ពីលោក លោកស្រី ជាអភិបាលរងខេត្ត ថ្នាក់ដឹកនាំ មន្ទីរ អង្គភាព ក្នុងជួរគណៈកម្មការចំពោះកិច្ច ព្រមទាំង តំណាងអាជ្ញាធរស្រុក និងមន្ត្រីពាក់ព័ន្ធ ជាច្រើនរូបទៀត ផងដែរ ។

លោក អ៊ុន ចាន់ដា មានប្រសាសន៍ថា មកដល់ពេលនេះ ស្រុកចំនួន ៥ នៃខេត្តកំពង់ចាម យើង មិនទាន់ដំណើរការចាក់វ៉ាក់សាំងបង្ការ ជូនប្រជាពលរដ្ឋ នៅឡើយទេ ។ ដោយឡែក ក្រុង/ស្រុក ចំនួន ៥ នៃខេត្តកំពង់ចាម មាន ក្រុងកំពង់ចាម កំពង់សៀម ព្រៃឈរ ជើងព្រៃ និងស្រុកបាធាយ គឺបានដំណើរការ ចាក់វ៉ាក់សាំងបង្ការជម្ងឺកូវីដ ១៩ ជូនប្រជាពលរដ្ឋ ក្នុងដូសទី១ រួចមកហើយ ដែលជាលទ្ធផល សម្រេចបានប្រមាណជាង ២៨ម៉ឺននាក់ លើផែនការ ប្រមាណ ៣៥ម៉ឺននាក់ មកនោះ ។ ដូចគ្នានោះដែរ ប្រជាពលរដ្ឋ ដែលយើងគ្រោងក្នុងផែនការ ដើម្បី ផ្ដល់វ៉ាក់សាំងបង្ការ នាពេលឆាប់ៗខាងមុខនេះ គឺទៅលើប្រជាពលរដ្ឋដែលមានអាយុ ១៨ឆ្នាំ ឡើងទៅ មានប្រមាណជា ៤០ម៉ឺននាក់ ។ ហើយផែនការនេះ ក៏គ្រោងនឹងដំណើរការបើកយុទ្ធនាការចាក់ដូសទី១ នៅថ្ងៃទី១៥ កក្កដា ខាងមុខនេះ ។ ដូច្នេះ ស្រុកដែលពាក់ព័ន្ធទាំងអស់ សូមណែនាំដល់អាជ្ញាធរភូមិ ឃុំ ដើម្បី ដឹកនាំប្រជាពលរដ្ឋ ដោយផ្ទាល់ មកទទួលវ៉ាក់សាំង នៅតាមមណ្ឌលនីមួយៗ ។ ជាមួយនោះ ស្រុកទាំង ៥ ក៏ត្រូវរៀបចំកម្លាំងការពារ ដើម្បី ថែរក្សាសន្តិសុខ សណ្ដាប់ធ្នាប់ ក៏ដូចជា សុខសុវត្ថិភាព ជូនប្រជាពលរដ្ឋ ឲ្យបានល្អប្រសើរ ផងដែរ ។

បើតាម លោកវជ្ជបណ្ឌិត គីមសួរ ភិរុណ ប្រធានមន្ទីរសុខាភិបាល នៃរដ្ឋបាលខេត្តកំពង់ចាម បានគូសបញ្ជាក់ថា បច្ចុប្បន្ន វ៉ាក់សាំងបង្ការកូវីដ ១៩ ប្រភេទ ស៊ីណូវ៉ាក់ ទាំងដូសទី១ និងដូសទី ២ មានចំនួន ៥៤៣.២០៦ដូស នឹងបានមកដល់ខេត្តកំពង់ចាម រួចហើយ ។ ដោយឡែក ប្រជាពលរដ្ឋទាំង ៥ស្រុក ត្រូវទទួលវ៉ាក់សាំងបង្ការនេះ មានចំនួន ២៧១.៦០៣នាក់ ។ ដូច្នេះ តាមការប៉ាន់ប្រមាណ វ៉ាក់សាំងទាំងអស់នេះ គឺអាចចាក់ជូនប្រជាពលរដ្ឋទាំង ៥ស្រុក បានហើយ ។

សូមបញ្ជាក់ថា ផ្អែកតាមផែនការ នៃកិច្ចដំណើរការយុទ្ធនាការចាក់វ៉ាក់សាំងបង្ការ ក្នុងជំហ៊ានបន្តនោះ ត្រូវអនុវត្តលើស្រុកសេសសល់ ចំនួន ៥ គឺ ស្រុកស្ទឹងត្រង់ ចំការលើ ស្រីសន្ធរ កោះសូទិន និងស្រុកកងមាស ។ ក្នុងនោះ ផែនការ នៃយុទ្ធនាការនេះ ត្រូវប្រើប្រាស់បុគ្គលិកពេទ្យ និងក្រុមគ្រូពេទ្យស្ម័គ្រចិត្ត ចំនួន ៦៤០នាក់ ចែកចេញជា ៦៤ក្រុម ដើម្បី បំរើសេវាចាក់ជូនប្រជាពលរដ្ឋ ក្នុងតំបន់នីមួយៗ ដោយត្រូវអនុវត្ត នៅក្នុងទីតាំង ចំនួន ៤៣កន្លែង ៕

ប្រភព ព័ត៌មានខេត្តកំពង់ចាម

ព្រះសង្ឃ និងប្រជាពលរដ្ឋ ក្នុងក្រុងក្រចេះ និងស្រុក២ទៀតបាន ចាប់ផ្តើមទទួលបានការចាក់វ៉ាក់សាំងការពារជំងឺកូវិដ-១៩ ដោយឥតគិតថ្លៃ និងដោយស្ម័គ្រចិត្ត

 ក្រចេះ ៖ ព្រះសង្ឃ និងប្រពលរដ្ឋប្រុសស្រី ក្នុងក្រុងក្រចេះ ស្រុកឆ្លូង និងស្រុកព្រែកប្រសព្វ ជាង៣០.០០០នាក់ ទទួលបានការចាក់វ៉ាក់សាំងការពារជំងឺកូវិដ-១៩ ដោយឥតគិតថ្លៃ និងដោយស្ម័គ្រចិត្ត យុទ្ធនាការចាក់វ៉ាក់សាំង នេះបានចាប់ផ្តើមព្រឹកថ្ងៃទី១២ ខែកក្កដា រហូតដល់ ថ្ងៃទី១៧ ខែកក្កដា ឆ្នាំ២០២១។

យុទ្ធនាការចាក់វ៉ាក់សាំង ជូនប្រជាពលរដ្ឋក្នុងក្រុងក្រចេះ មានទីតាំងដូចខាងក្រោម៖
ទី១- សម្រាប់ពលរដ្ឋក្នុងក្រុងក្រចេះ ត្រូវចាក់នៅទីតាំងនៅក្នុងមន្ទីរសុខាភិបាលខេត្ត សាលាខេត្តក្រចេះ មណ្ឌលសុខភាពសង្កាត់អូរឬស្សី សាលាបឋមសិក្សាក្រគរ និងនៅសាលាសង្កាត់កោះទ្រង់ ក្រុងក្រចេះ ។
ទី២- ស្រុកឆ្លូង មានទីតាំងនៅការិយាល័យសុខាភិបាល ស្រុកប្រតិបត្តិឆ្លូង
ទី៣- និងស្រុកព្រែកប្រសព្វ មានទីតាំងក្នុងមន្ទីរពេទ្យបង្អែកស្រុកព្រែកប្រសព្វ។

នាឱកាសនោះ លោកអភិបាលរងខេត្ត តំណាងលោក វ៉ា ថន អភិបាលខេត្ត បានលើកឡើងថា នេះជាយុទ្ធនាការចាក់វ៉ាក់សាំងជូនប្រជាពលរដ្ឋ លើកទី៣សម្រាប់ខេត្តក្រចេះ ដែលមានប្រជាពលរដ្ឋ ៥សង្កាត់ និង២ឃុំ ស្មើនិងប្រជាពលរដ្ឋជាង៣មុឺននាក់ សម្រាប់ប្រជាពលរដ្ឋក្នុងក្រុងក្រចេះក្នុងការចាក់ទាំង២លើក លោកបន្តថាដោយមានការគិតគូពីប្រមុខថ្នាក់ដឹកនាំដែលមានលោកនាយករដ្ឋមន្ត្រី ហ៊ុន សែន បានខិតខំពុះពារស្វះស្វែងរកវ៉ាក់សាំងសម្រាប់ចាក់ជូនដល់ ប្រជាពលរដ្ឋដើម្បីការពារពីការចម្លងជំងឺកូវីដ-១៩ ដែលកំពុងតែយាយីពិភពលោកក៏ដូចជា ប្រទេសកម្ពុជាយើងផងដែរ។

ទន្ទឹមនឹងនោះ លោកប្រធានមន្ទីរសុខាភិបាលខេត្តក្រចេះ ក៏បានបញ្ជាក់បន្ថែមថា សម្រាប់ប្រជាពលរដ្ឋដែលទទួលបានវ៉ាក់សាំងហើយក៏ដោយក៏មិនត្រូវមើលស្រាលជំងឺកូវីដ-១៩ នោះដែរព្រោះវាអាចឆ្លងគ្រប់ពេលបើសិនជាយើងមានការធ្វេសប្រហែសហើយយើងក៏ត្រូវតែបន្តចូលរួមអនុវត្តវិធានការសុខាភិបាលឲ្យ បានខ្ជាប់ខ្ជួនទាំងអស់គ្នា ពិសេសអនុវត្តវិធាន”៣ការពារ ៣កុំ ” ឲ្យបានទាំងអស់គ្នាជាប់ជាប្រចាំ ដើម្បីចូលរួមទប់ស្កាត់ការពារការឆ្លងរាលដាលជំងឺកូវីដ-១៩ ដើម្បីឈានដល់ការបិទបញ្ចប់ព្រឹត្តិការណ៍សហគមន៍២០កុម្ភៈ ឲ្យបានឆាប់ៗនាពេលខាងមុខនេះ។

សូមបញ្ជាក់ដែរថាសម្រាប់ខេត្តក្រចេះ គិតមកដល់ថ្ងៃទី ១១ ខែកក្កដា ឆ្នាំ២០២១ ក្នុងខេត្តក្រចេះបានរកឃើញអ្នកឆ្លងជំងឺកូវីដ-១៩ សរុបចំនួន១៨០នាក់ ព្យាបាលជាសះស្បើយចំនួន៦៦នាក់ កំពុងសម្រាក់ព្យាបាល ចំនួន១១០នាក់ នៅមន្ទីរបង្អែកខេត្ត និងនៅមណ្ឌលព្យាបាលជំងឺកូវីដ-១៩ នឹងមានករណី
ស្លាប់៤នាក់ហើយ ៕

ក្រសួងធនធានទឹក ជូនដំណឹងពីស្ថានភាពអាកាសធាតុ ចាប់ពីថ្ងៃទី១៤-២០ ខែកក្កដា នឹងមានភ្លៀងធ្លាក់ពីមធ្យមទៅខ្លាំង សូមប្រុងប្រយ័ត្នចំពោះបាតុភូតធម្មជាតិ !

 ក្រសួងធនធានទឹក និងឧតុនិយម នៅថ្ងៃទី១៣ ខែកក្កដា ឆ្នាំ២០២១នេះ បានចេញសេចក្តីជូនដំណឹងពីស្ថានភាពធាតុអាកាសនៅកម្ពុជា ចាប់ពីថ្ងៃទី១៤-២០ ខែកក្កដា ឆ្នាំ២០២១។

ក្រសួងបានឲ្យដឹងថា ចាប់ពីថ្ងៃទី១៣-១៤ ខែកក្កដានេះទៅ ប្រទេសកម្ពុជា បាននិងកំពុងទទួលនូវឥទ្ធិពលនៃជ្រលងសម្ពាធទាប ។ បន្តពីថ្ងៃទី១៥-២០ ខែកក្កដា ប្រព័ន្ធសម្ពាធទាប ITCZ នឹងកើតឡើងសារជាថ្មី ហើយបង្កើនឥទិ្ធពលរបស់ខ្លួនជាលំដាប់ ដោយអូសបន្លាយកាត់លើព្រះរាជាណាចក្រកម្ពុជា គួបផ្សំនឹងខ្យល់មូសុងនិរតីក៏មានល្បឿនជាបង្គួរផងដែរ។ ស្ថានភាពបែបនេះនឹងធ្វើឲ្យ៖
១៖ បណ្តាខេត្តនៅតំបន់វាលទំនាបកណ្តាល
* សីតុណ្ហភាពអប្បបរមា មានពី ២៤-២៦ °C
* សីតុណ្ហភាពអតិបរមា មានពី ៣១-៣៣ °C
* នឹងអាចមានភ្លៀងធ្លាក់ក្នុងកម្រិតពីមធ្យម ទៅច្រើនលាយឡំនឹងផ្គរ រន្ទះ ខ្យល់កន្ត្រាក់។ ក្នុងអំឡុងពេលជាមួយគ្នាផងដែរផ្នែកខ្លះ នៃបណ្តាខេត្តមួយចំនួន ក៏នឹងអាចមានភ្លៀងធ្លាក់ក្នុងកម្រិតខ្លាំង។
២៖ បណ្តាខេត្តជាប់ជួរភ្នំដងរែក និងខ្ពង់រាបឦសាន
* សីតុណ្ហភាពអប្បបរមា មានពី ២២-២៤ °C
* សីតុណ្ហភាពអតិបរមា មានពី ៣០-៣២ °C
* នឹងអាចមានភ្លៀងធ្លាក់ក្នុងកម្រិតពីមធ្យមទៅខ្លាំង។
៣៖តំបន់មាត់សមុទ្រ
* សីតុណ្ហភាពអប្បបរមា មានពី ២៤-២៦ °C
* សីតុណ្ហភាពអតិបរមា មានពី ២៩-៣១ °C
* នឹងអាចមានភ្លៀងធ្លាក់ក្នុងកម្រិតពីមធ្យមទៅខ្លាំង ទន្ទឹមនឹងនោះនៅលើផ្ទៃសមុទ្រក៏នឹងអាចមានភ្លៀងខ្យល់ខ្លាំង និងរលកសមុទ្រមានកម្ពស់ខ្ពស់។

ក្រសួងធនធានទឹក បានអំពាវនាវដល់ប្រជាពលរដ្ឋបង្កើនការប្រុងប្រយ័ត្ន ចំពោះបាតុភូតធម្មជាតិ ដែលអាចបង្កគ្រោះថ្នាក់ជាយថាហេតុ៕

TOP NEWS: រដ្ឋាភិបាលជប៉ុន ប្រកាសផ្តល់វ៉ាក់សាំង AstraZeneca ចំនួន១លានដូសដល់កម្ពុជា

(ភ្នំពេញ)៖ រដ្ឋាភិបាលជប៉ុន ប្រកាសផ្តល់វ៉ាក់សាំងប្រឆាំងជំងឺកូវីដ១៩ AstraZeneca ចំនួន ១លានដូស ដល់រាជរដ្ឋាភិបាល និងប្រជាជនកម្ពុជា។ ការផ្តល់ជំនួយវ៉ាក់សាំង ត្រូវបានប្រកាសដោយ លោក មិកាមិ ម៉ាសាហ៉ីរ៉ូ ឯកអគ្គរាជទូតជប៉ុនប្រចាំនៅកម្ពុជា នៅថ្ងៃទី១៣ ខែកក្កដា ឆ្នាំ២០២១នេះ។

លោក មិកាមិ ម៉ាសាហ៉ីរ៉ូ បានថ្លែងថា ការផ្ដល់ជំនួយវ៉ាក់សាំងចំនួន ១លានដូស នេះធ្វើឡើងស្របតាមចំណងមិត្តភាពរវាង ជប៉ុន និងកម្ពុជា និងដោយផ្អែកលើស្ថានភាពកូវីដ១៩ នៅកម្ពុជានាពេលបច្ចុប្បន្ន។

លោកឯកអគ្គរាជទូត បានបញ្ជាក់ថា វ៉ាក់សាំង ដែលត្រូវបានផ្តល់អាជ្ញាបណ្ណផលិតក្នុងប្រទេសជប៉ុន នឹងត្រូវបានដឹកជញ្ជូនមកដល់រាជធានីភ្នំពេញ ក្នុងពេលដ៏ឆាប់ខាងមុខនេះ នៅពេលការរៀបចំភ័ស្តុភារដោយ COVAX Facility បានបញ្ចប់។

«ខ្ញុំសង្ឃឹមថា ជំនួយនេះនឹងជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងកូវីដ១៩ ក៏ដូចជាកាត់បន្ថយការព្រួយបារម្ភមួយចំនួន របស់ប្រជាជនកម្ពុជា។ ប្រឈមមុខនឹងការរីករាលដាលនៃមេរោគឆ្លងថ្មីដែលពិភពលោកកំពុងជួបប្រទះនេះ ការចាក់វ៉ាក់សាំង និងការពង្រឹងប្រព័ន្ធសុខាភិបាល គឺជាកត្តាសំខាន់សម្រាប់រាជរដ្ឋាភិបាលនិងប្រជាជនកម្ពុជា»។ នេះជាការបញ្ជាក់របស់លោក មិកាមិ ម៉ាសាហ៉ីរ៉ូ។

លោកឯកអគ្គរាជទូត ក៏បានបញ្ជាក់ដែរថា មកទល់ពេលនេះ រដ្ឋាភិបាលជប៉ុនបានផ្តល់ជំនួយស្មើនឹងទឹកប្រាក់ សរុបជាង ៥០លានដុល្លារអាមេរិកហើយ ដល់កម្ពុជា។ អំណោយទាំងនោះរួមមាន៖ ការផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រដល់គម្រោងរបស់អង្គការអន្តរជាតិនានាសម្រាប់ វិធានការទប់ស្កាត់ការចម្លងជំងឺតាមព្រំដែន ក៏ដូចជាការផ្ដល់បរិក្ខារសម្រាប់ដឹកជញ្ជូន និងរក្សាទុកវ៉ាក់សាំងឱ្យ បានត្រឹមត្រូវផងដែរ។

ក្រៅពីនោះរដ្ឋាភិបាលជប៉ុន ក៏បានផ្តល់ជាកម្ចីប្រមាណ ២២៧លានដុល្លារអាមេរិក ដែលត្រូវបានប្រើប្រាស់ក្នុងកម្មវិធីឧបត្ថម្ភសាច់ប្រាក់ដល់ប្រជាជនដែលរងផលប៉ះពាល់ដោយសារកូវីដ១៩ និងសម្រាប់ការពង្រឹងប្រព័ន្ធសុខាភិបាល។

លោកឯកអគ្គរាជទូតជប៉ុន ក៏បានឆ្លៀតឱកាសនេះសម្តែងនូវការគោរពដ៏ខ្ពង់ខ្ពស់ចំពោះអ្នកជំនាញសុខាភិបាល និងមន្ត្រីរដ្ឋាភិបាលពាក់ព័ន្ធទាំងអស់ដែលកំពុងតែចាត់វិធានការប្រយុទ្ធប្រឆាំងនឹងកូវីដ១៩ ព្រមទាំងប្រជាពលរដ្ឋ ទាំងអស់ដែលត្រូវខិតខំប្រឈមនឹងស្ថានភាពដ៏លំបាកនេះ។

លោកឯកអគ្គរាជទូត ក៏បានបង្ហាញនូវជំហរមុតមាំរបស់រដ្ឋាភិបាលជប៉ុនក្នុងការចូលរួមប្រយុទ្ធប្រឆាំងនឹងជំងឺកូវីដ១៩នៅកម្ពុជាផងដែរ។ លោកឯកអគ្គរាជទូត បានគូសបញ្ជាក់ថា ក្នុងការប្រយុទ្ធប្រឆាំងនឹងកូវីដ១៩ដែលជាបញ្ហាពិភពលោកនេះ ជប៉ុននឹងបន្តសហការ និងធ្វើការរួមគ្នាជាមួយកម្ពុជាដែលជាមិត្តដ៏សំខាន់។

លោកបង្ហាញក្តីសង្ឃឹមថា ស្ថានភាពនឹងអាចល្អប្រសើរឡើងក្នុងពេលដ៏ឆាប់ខាងមុខនេះ ហើយការផ្លាស់ប្ដូររវាង ប្រទេសទាំងពីរកម្ពុជា-ជប៉ុន ក៏ដូចជាក្នុងពិភពលោកនឹងអាចចាប់ផ្តើមឡើងវិញ៕