មន្រ្តីរាជការសាធារណៈ អតីតមន្រ្តីរាជការ និងអតីតយុទ្ធជន ត្រូវទទួលបានការការពារពីរបបសន្តិសុខសង្គម

(ភ្នំពេញ)៖ របបសន្តិសុខសង្គមផ្នែកហានិភ័យការងារ សម្រាប់មន្រ្តីសាធារណៈ និងផ្នែកថែទាំ សុខភាព សម្រាប់មន្រ្តីសាធារណៈ អតីតមន្រ្តីរាជការ និងអតីតយុទ្ធជន ត្រូវបានបង្កើតឡើង ដោយព្រះរាជក្រឹត្យ ចុះថ្ងៃទី០១ ខែកុម្ភៈ ឆ្នាំ២០១៧។

ព្រះរាជក្រឹត្យនេះ មានគោលបំណងបង្កើតរបបសន្តិសុខសង្គមផ្នែកហានិភ័យការងារ សម្រាប់មន្រ្តីសាធារណៈ និងផ្នែកថែទាំសុខភាពសម្រាប់មន្រ្តីសាធារណៈ អតីតមន្រ្តីរាជការ និងអតីតយុទ្ធជន ដើម្បីលើកកម្ពស់សុខមាលភាពសង្គម។

សូមអានព្រះរាជក្រឹត្យខាងក្រោម៖

លោក សុខ ឥសាន៖ រាជរដ្ឋាភិបាលកម្ពុជា ប្រកាន់ខ្ជាប់នយោបាយចិនមួយ

នៅថ្ងៃទី០៧ ខែកុម្ភៈ ឆ្នាំ២០១៧នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា រាជរដ្ឋាភិបាលកម្ពុជាប្រកាន់ខ្ជាប់នយោបាយចិនមួយ។

លោក សុខ ឥសាន បានបញ្ជាក់ថា នៅក្នុងមាត្រា៥៣ ជំពូកទី៤ នៃរដ្ឋធម្មនុញ្ញព្រះរាជាណាចក្រកម្ពុជា ចែងថា ព្រះរាជាណាចក្រកម្ពុជា ប្រកាន់ខ្ជាប់ជានិច្ចនូវនយោបាយអព្យាក្រឹត្យ អចិន្ត្រៃយ៍ និងមិនចូលបក្សសម្ព័ន្ធ។ ព្រះរាជាណាចក្រកម្ពុជា រួមរស់ដោយសន្តិសហវិជ្ជមានជាមួយប្រទេសជិតខាង និងប្រទេសដទៃទៀត ទាំងអស់នៅលើសកលលោក។

អ្នកនាំពាក្យគណបក្សប្រជាជន ក៏បានបញ្ជាក់ថា ព្រះរាជាណាចក្រកម្ពុជា មិនឈ្លានពានប្រទេសណាដាច់ខាត មិនជ្រៀតជ្រែកកិច្ចការផ្ទៃក្នុងនៃប្រទេសដទៃដោយផ្ទាល់ ឬដោយប្រយោល ទោះបីក្រោមរូបភាពណាក៏ដោយ ដោះស្រាយរាល់បញ្ហាដោយសន្តិវិធី និងគោរពផលប្រយោជន៍គ្នាទៅវិញទៅមក។ ព្រះរាជាណាចក្រកម្ពុជា មិនចងសម្ព័ន្ធយោធា ឬចូលក្នុងកិច្ចព្រមព្រៀងយោធាណាមួយ ដែលមិនស្របនឹងអព្យាក្រឹត្យភាពរបស់ខ្លួនឡើយ។ ព្រះរាជាណាចក្រកម្ពុជា មិនអនុញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញាតឱ្យមានមូលដ្ឋានយោធារបស់ខ្លួននៅបរទេសដែរ លើកលែងតែក្នុងក្របខណ្ឌនៃសំណូមពររបស់អង្គការសហប្រជាជាតិ។ ព្រះរាជាណាចក្រកម្ពុជា រក្សាសិទ្ធិទទួលយកជំនួយបរទេស ជាសម្ភារៈយោធា គ្រាប់រំសេវ ការហ្វឹកហ្វឺនកងកម្លាំងប្រដាប់អាវុធ និងជំនួយផ្សេងៗទៀត ដើម្បីការពារខ្លួន និងធានាសណ្តាប់ធ្នាប់ និងសន្តិសុខសាធារណៈ នៅក្នុងផ្ទៃក្នុងប្រទេស ។

លោក សុខ ឥសាន ក៏បានបញ្ជាក់ថា ផ្អែកលើមូលដ្ឋាននេះ រាជរដ្ឋាភិបាលរបស់គណបក្សប្រជាជនកម្ពុជា ប្រកាន់ខ្ជាប់នយោបាយធ្វើមិត្តជាមួយគ្រប់ប្រទេសលើសកលលោក។ ដោយទ្បែកជាមួយសាធារណរដ្ឋប្រជាមានិតចិន ព្រះរាជាណាចក្រកម្ពជាប្រកាន់នយោបាយចិនតែមួយ ដោយចាត់ទុកចិនតៃវ៉ាន់ គឺជាផ្នែកមួយនៃប្រទេសចិន។ រាល់បញ្ហាកើតឡើងរវាងសាធារណរដ្ឋប្រជាមានិតចិន និងកោះតៃវ៉ាន់ គឺជាកិច្ចការផ្ទៃក្នុងរបស់ប្រទេសចិន។ សាធារណរដ្ឋប្រជាមានិតចិន ជាសមាជិកអង្គការសហប្រជាជាតិ ឯចិនតៃវ៉ាន់ មិនមែនជាសមាជិកអង្គការសហប្រជាជាតិទេ។ ការប្រកាន់ជំហរនយោបាយចិនមួយរបស់ព្រះរាជាណាចក្រកម្ពុជា គឺជាសិទ្ធិសម្រេចរបស់រាជរដ្ឋាភិបាលកម្ពុជា មិនអាចមានប្រទេសណាជ្រៀតជ្រែកបានឡើយ៕

កញ្ញា ធី សុវណ្ណថា អះអាងថា ការតម្លើងថ្លៃប្តឹងទារសងជំងឺចិត្ត៥០ម៉ឺនដុល្លារ ដោយសារលោក សម រង្ស៊ី «ឌឺពេកហើយ» !

(ភ្នំពេញ​)៖ ឆ្លើយតបនឹងសំណួរថា តើហេតុអ្វីបានកញ្ញា ធី សុវណ្ណថា សម្រេចប្តឹងលោក សម រង្ស៊ី ទាមទារសំណងឡើងដល់៥០ម៉ឺនដុល្លារ ត្រូវបានកញ្ញាអះអាង បញ្ជាក់ថា ដោយសារលោក សម រង្ស៊ី ឌឺពេកហើយ ព្រោះលោក សម រង្ស៊ី បាននិយាយនៅក្នុងវិទ្យុអាស៊ីសេរី ដែលជាវិទ្យុគាំទ្របក្សប្រឆាំងថា មានបណ្តឹងកាន់តែច្រើនកាន់តែល្អ។

 កញ្ញាបាននិយាយយ៉ាងដូច្នេះថា «ការតម្លើងថ្លៃទាមទារសំណងនេះ ដោយសារលោក សម រង្ស៊ី ឌឺពេកហើយ,ព្រោះក្រោយពីប្រកាសដាក់ពាក្យប្តឹង លោក សម រង្ស៊ី បានលើកឡើងតាមប្រព័ន្ធផ្សព្វផ្សាយថា ប្តឹងកាន់តែច្រើនកាន់តែល្អ ហើយអ្វីដែលខ្ញុំប្តឹងទារឡើងសំណងនេះ ដើម្បីបំពេញបំណងលោក សម រង្ស៊ី តែប៉ុណ្ណោះ»។

 សូមជំរាបថា នៅព្រឹកថ្ងៃទី០៧ ខែកុម្ភៈនេះ កញ្ញា ធី សុវណ្ណថា ប្រធានអង្គការយុវជនដើម្បីសង្គម អម​ដំណើរ​ដោយ​លោក​មេធាវី​ លី​ ច័ន្ទ​តុលា បានចូលទៅបំភ្លឺអយ្យការអមសាលាដំបូង រាជធានីភ្នំពេញ ពាក់ព័ន្ធនឹង​ការ​ប្តឹង​លោក ​សម​ រង្ស៊ី​ ពី​បទ​បរិហារកេរ្តិ៍​ជា​សាធារណៈ, ក្រោយពីបញ្ចប់ការបំភ្លឺកញ្ញា ធី សុវណ្ណថា បានថ្លែងប្រាប់អង្គភាពព័ត៌មាន Fresh News ឲ្យដឹងថា ការប្តឹងលោក សម រង្ស៊ី ទាមទារសំណងត្រូវបានផ្លាស់ប្តូរពី ២៥ម៉ឺនឡើងដល់ ៥០ម៉ឺនដុល្លារ។ ប្រសិនបើបានសម្រេចនេះកញ្ញានឹងយកទៅអភិវឌ្ឍន៍តំបន់អារ៉ែង។

 នៅរសៀលថ្ងៃទី០៧ ខែកុម្ភៈដដែលនេះ លោក គឹម សន្តិភាព អ្នកនាំពាក្យក្រសួងយុត្តិធម៌ បានបកស្រាយអំពីភាពខុសគ្នារវាង បណ្តឹងអាជ្ញា និងបណ្តឹងរដ្ឋប្បវេណី ដែលពលរដ្ឋខ្មែរភាគច្រើនពុំបានយល់ច្បាស់អំពីបញ្ហានេះ។ បណ្តឹងអាជ្ញា៖ បើតុលាការស្វែងរកឃើញថា ជនល្មើសមានពិរុទ្ធភាពគ្រប់គ្រាន់នោះ នឹងនាំអោយមានការផ្តន្ទាទោសជននេះ តាមច្បាប់កំណត់ ដែលអាចសម្រេច​ អំពីទោសដាក់ពន្ធនាគារ និងទោសពិន័យ ដែលមានកំណត់ច្បាស់លាស់ ក្នុងក្រមព្រហ្មទណ្ឌតាមប្រភេទបទល្មើសនីមួយៗ ដែលក្នុងន័យនេះប្រាក់ពិន័យ នៃអំពើល្មើសនីមួយៗត្រូវបង់ចូលថវិការដ្ឋ។

 អ្នកនាំពាក្យក្រសួងយុត្តិធម៌រូបនោះបានថ្លែងឲ្យដឹងថា ចំណែកនៅក្នុងបណ្តឹងរដ្ឋប្បវេណីវិញ ចំនួនទឹកប្រាក់នៃការប្តឹងទាមទារសំណងជម្ងឺចិត្ត ពុំមានកំណត់ក្នុងច្បាប់ឡើយ គឺជាសិទ្ធិសេរីភាពនៃការប្តឹងទាមទាររបស់ជនរងគ្រោះ ដែលជាដើមបណ្តឹងរដ្ឋប្បវេណី រីឯការពិចារណា​ សម្រេចគឺជាអំណាចរបស់តុលាការ៕

(ប្រភព៖ Fresh News)

លោក គឹម សន្តិភាព៖ បណ្តឹងអាជ្ញា និងបណ្តឹងរដ្ឋប្បវេណី ជាបណ្តឹងពីរខុសគ្នា

(ភ្នំពេញ)៖ នៅថ្ងៃទី០៧ ខែកុម្ភៈ ឆ្នាំ២០១៧នេះ លោក គឹម សន្តិភាព អ្នកនាំពាក្យក្រសួង​យុត្តិ​ធម៌ បាន​បង្ហោះនៅក្នុងទំព័រហ្វេសប៊ុករបស់លោក ដោយបានធ្វើការបំភ្លឺជូនសាធារណៈមតិទាំងអស់​អំពីប្រភេទនៃបណ្តឹងក្នុងរឿងព្រហ្មទណ្ឌ។

លោក គឹម សន្តិភាព បានបញ្ជាក់ថា យោងតាមមាត្រា២ នៃក្រមនីតិវិធីព្រហ្មទណ្ឌ បានកំណត់យ៉ាងច្បាស់លាស់អំពីប្រភេទនៃបណ្តឹងក្នុងរឿងព្រហ្មទណ្ឌគឺមានពីរប្រភេទ៖ ១-បណ្តឹងអាជ្ញា៖ បើតុលាការស្វែងរកឃើញថា ជនល្មើសមានពិរុទ្ធភាពគ្រប់គ្រាន់ នោះនឹងនាំឱ្យមានការផ្តន្ទាទោសជននេះតាមច្បាប់កំណត់ ដែលអាចសម្រេចអំពីទោសដាក់ពន្ធនាគារ និងទោសពិន័យ ដែលមានកំណត់ច្បាស់លាស់ក្នុងក្រមព្រហ្មទណ្ឌតាមប្រភេទបទល្មើសនីមួយៗ ដែលក្នុងន័យនេះប្រាក់ពិន័យនៃបទល្មើសនីមួយៗត្រូវបង់ចូលថវិការដ្ឋ ។ ២-បណ្តឹងរដ្ឋប្បវេណី៖ ជនរងគ្រោះអាចតាំងខ្លួនជាដើមបណ្តឹងរដ្ឋប្បវេណីក្នុងសំណុំរឿងព្រហ្មទណ្ឌ និងមានសិទ្ធិប្តឹងទាម​ទារជួសជុលការខូចខាតដែលជាសំណងជម្ងឺចិត្តបណ្តាលមកពីអំពើល្មើសណាមួយ ដែលប្រាក់​សំណងនេះ នឹងត្រូវប្រគល់ជូនទៅដើមបណ្តឹងរដ្ឋប្បវេណីបន្ទាប់ពីមានសេចក្តីសម្រេចស្ថាពររបស់តុលាការ។

អ្នកនាំពាក្យក្រសួងយុត្តិធម៌ ក៏បានបញ្ជាក់ថា ចំនួនទឹកប្រាក់ដែលជាកម្មវត្ថុនៃការប្តឹងទាមទារនេះពុំមានកំណត់ក្នុងច្បាប់ឡើយ គឺជាសិទ្ធិសេរីភាពនៃការប្តឹងទាមទាររបស់ជនរងគ្រោះដែលជាដើមបណ្តឹងរដ្ឋប្បវេណី រីឯការពិចារណាសម្រេចគឺជាអំណាចរបស់តុលាការ៕

លោក សុខ ឥសាន៖ ការធ្វើវិសោធនកម្មច្បាប់ គឺជាការពង្រឹងលទ្ធិប្រជាធិបតេយ្យ

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ច្បាប់ទាំងទ្បាយ ដែលត្រូវបានស្ថាប័ននីតិប្បញត្តិ អនុម័ត និងដាក់ឱ្យប្រើប្រាស់ វាស្របទៅនឹងសភាពការណ៍បច្ចុប្បន្នភាព នៅពេលអនុម័តនោះ  បើមានការព្យាករណ៍ ក៏មិនអាចប៉ាន់ស្មានបានរយៈពេលវែងទៅមុខដែរ លុះត្រាតែឆ្លងកាត់ការអនុវត្តជាក់ស្តែងមួយរយៈ ទើបលេចចេញនូវបញ្ហាមួយ ឬច្រើន ដែលលែងស្របតាមសភាពការណ៍ថ្មី
ដែលជាសំណូមពរចាំបាច់ទាមទារឱ្យមានការធ្វើវិសោធនកម្មបញ្ហាទាំងនោះ ។ លោក សុខ ឥសាន បានបន្ថែមទៀតថា នៅបណ្តាប្រទេសលើពិភពលោក ក៏គេធ្វើវិសោធនកម្មច្បាប់របស់ប្រទេសគេដែរ ។ ដូច្នេះ ការធ្វើវិសោធនកម្មច្បាប់ឱ្យស្របតាមសភាពការណ៍ គឺជាការបង្កើតប្រសិទ្ធភាពនៃការអនុវត្តច្បាប់ ដើម្បីធានាប្រសិទ្ធភាពនៃការគ្រប់គ្រងរដ្ឋ ហើយករណីនេះ ក៏ជាការពង្រឹងលទ្ធិប្រជាធិបតេយ្យ ផងដែរ៕

គណបក្សនយោបាយចំនួន២ គាំទ្រឱ្យមានការធ្វើវិសោធនកម្មច្បាប់ស្តីពីគណបក្សនយោបាយ

(ភ្នំពេញ)៖ លោក ញឹក ប៊ុន ឆៃ ប្រធានគណបក្ស​ខ្មែរ​រួបរួម​ជាតិ បាន​គាំទ្រនូវ​គំនិត​ផ្តួចផ្តើម​របស់ លោកនាយក​រដ្ឋមន្ត្រី ហ៊ុន សែន ប្រមុខ​ដឹកនាំគណបក្ស​ប្រជាជន​កម្ពុជា ក្នុងការ​ស្នើ​ធ្វើ​វិសោធនកម្មច្បាប់ ​ស្តីពី​គណបក្សនយោបាយ គឺ​អ្នក​មានទោស មិនអាច​ធ្វើជា​ប្រធាន ឬ អនុប្រធានគណបក្សនយោបាយបានទេ ហើយ​បើ​ទោស​ធ្ងន់ធ្ងរ នឹង​អាចឈានដល់ការ​រំលាយ​គណបក្សថែម​ទៀតផង​។​

លោក​ញឹក ប៊ុនឆៃ ប្រធាន​គណបក្សខ្មែរ​រួបរួម​ជាតិ បាន​មានប្រសាសន៍នៅ​ព្រឹក​ថ្ងៃទី០​៦ ខែកុម្ភៈ ឆ្នាំ២០១៧ នេះ​ថា នៅ​កម្ពុជា គួរតែមាន​ច្បាប់​នេះ គឺ​អ្នក​ដែលមាន​ទោស មិនអាច​ធ្វើជា​ប្រធាន និង​អនុប្រធានគណបក្ស​បានទេ ហើយ​នៅ​ប្រទេស​ថៃក៏មាន​ច្បាប់​នេះដែរ​។ លោក​ បាន​លើកឡើងថា កន្លងមក លោក​ក៏​ធ្លាប់​ទាមទារឱ្យ​មាន​ការធ្វើ​វិសោធនកម្ម ច្បាប់​ស្តីពី​គណបក្សនយោបាយ​នេះដែរ គឺ​បើសិន​ជាមាន គណបក្ស​ណាមួយ រំលោភ​ទៅលើច្បាប់បោះឆ្នោត​។ បើ​មានច្បាប់​នេះ ប្រហែលជា​អាចធ្វើ​ឱ្យអ្នក​ដែល​ចង់​ប្រព្រឹត្ត​ខុស ប្រយ័ត្នប្រយែង មិន​ធ្វើ​ឱ្យខុស និង​គួរតែ​អនុវត្តច្បាប់​​ឱ្យបាន​តឹងរឹង ដើម្បី​កុំ​ឱ្យអ្នកប្រព្រឹត្ត​ខុស ចេះតែ​រួចខ្លួន​។

​លោក​បាន​បញ្ជាក់ថា ការអនុវត្ត​ច្បាប់ មិនបាន​ល្អ ធ្វើឱ្យ​មនុស្ស​ប្រព្រឹត្ត​អ្វី ដែល​ផ្ទុយ​នឹង​ច្បាប់ ហើយ​សម្រាប់​លោក គឺ​លោក​គាំទ្រ​ចំពោះការដាក់ទោសទណ្ឌ អ្នក​ដែល​ធ្វើ​ផ្ទុយ​នឹង​ច្បាប់បោះឆ្នោត​របស់​យើង​។ នៅពេលដែល​ច្បាប់ ចេញមក​ហើយកាលណា​ គឺតម្រូវ​ថាមេបក្សមិនត្រូវ​មានទោស ប៉ុន្តែ​បើ​យើងមានទោស​ គឺមិនអាចទៅ​ដឹកនាំ​គណបក្សនោះ​បានទេ​។​

ដោយឡែកចំណែក​លោកស្រី ឡាក់ សុភាព ប្រធាន​គណបក្ស​ខ្មែរ​សាមគ្គីបាន​មានប្រ​សា​ស​ន៍​​​​ថា លោកស្រី គាំទ្រចំពោះ​ផ្លូវច្បាប់ និង​គាំទ្រ ចំពោះ​គំនិត​ផ្តួចផ្តើម របស់ ​លោក​នាយក​រដ្ឋមន្រ្តី ហ៊ុន សែន ។ លោកស្រី សុំ​ឱ្យ​ច្បាប់​អនុវត្តតាម​នីតិវិធី និង​សូម​ឱ្យអនុវត្ត​ច្បាប់ឱ្យ​បាន​ម៉ឹងម៉ាត់ កុំ​ឱ្យបុគ្គល ដែលមាន​កំហុសឆ្គងធ្វើជា​ប្រធាន អនុប្រធាន​គណបក្ស​។

លោកស្រី បាន​លើកឡើងថា បញ្ហា​ផ្នែក​ច្បាប់ បុគ្គល​ជា​ប្រធាន​គណបក្សណាមួយដែល ទាក់​ទិន​នឹង​បទល្មើស ឬក៏​ប្រព្រឹត្តទោសទណ្ឌ​ណាមួយ នីតិវិធី​អង្គហេតុ និង​អង្គច្បាប់ គឺ​បុគ្គល​ដែលមាន​ទោសទណ្ឌនោះ មិនអាច​ឈរ​ឈ្មោះជា​បេក្ខជន ដោយសារ​ប្រធាន​គណបក្ស ទាំងអស់នោះ (​គណបក្ស​សង្គ្រោះ​ជាតិ​) ជា​ទណ្ឌិត​៕

ទស្សនៈ៖ដើម្បី​ដឹង​ការ​ពិត​!​

នៅប៉ុន្មានថ្ងៃកន្លងមកនេះ មានបែកធ្លាយវីដេអូឃ្លីបពាក់ពន្ធនឹងរឿងអាស្រូវផ្លូវភេទរបស់មេដឹកនាំ និងមន្ត្រីជាន់ខ្ពស់មួយចំនួន នៃគណៈបក្សសាង្គ្រោះជាតិដែលធ្វើឱ្យមជ្ឈដ្ឋាននានានាំគ្នាចាប់អារម្មណ៏ ហើយនាំគ្នាវិភាគតាមការយល់ឃើញរបស់ខ្លួន ។  អ្នកខ្លះយល់ថា គឺជារឿងពិត ពីព្រោះ ទាំងសម្លេង និងចលនាសកម្មភាព ស៊ីគ្នាទៅនឹងការជាក់ស្តែង គ្មានអ្នកណាអាចបន្លំសម្លេងរបស់ម្ចាស់ដើមបានទេ ទោះបីមានទេពកោសល្យបញ្ចូលសម្លេង បែបបញ្ចូលសម្លេងក្នុងខ្សែភាពយន្តក៏ដោយសម្លេងពិត និងសម្លេងបញ្ចូលយ៉ាងណាក៏មិនដូចគ្នាដែរ ។ ចំណែកអ្នកខ្លះទៀតយល់ថាអំពើទាំងអស់ដែលកើតឡើងគឺជាល្បិចកលរបស់គណៈបក្សកាន់អំណាច ប្រឌិតរឿងដើម្បីដាក់កំហុសនិងធ្វើឱ្យគណៈបក្សប្រឆាំងធ្លាក់ប្រជាប្រីយភាពខណៈដែលការបោះឆ្នោតជិតឈានមកដល់ ។

ទស្សនៈយល់ឃើញខុសៗគ្នាខាងលើនេះ គ្រាន់តែជាការយល់ឃើញនិងការគិតរៀងខ្លួនប៉ុណ្ណោះ មិនអាចយកជាការត្រឹមត្រូវ ឬជាការពិតបានទេ។ ចង់បានការពិត និងច្បាស់លាស់លុះត្រាតែសាម៉ីជនដែលមានឈ្មោះក្នុងវីដេអូឃ្លីបនោះ ក្លាហានហ៊ានចេញមុខមកដាក់ពាក្យជាផ្លូវការប្តឺងសុំអន្តរាគមពីស្ថាប័នមានសមត្ថកិច្ចនិងតុលាការ ដើម្បីបើកការស៊ើបអង្កេតតាមបច្ចេកទេសទៅ នោះនឹងរកការពិតឃើញជាក់ស្តែងជាមិនខាន តើសាម៉ីជនពាក់ពន្ធបានប្រព្រឹត្តមែនឬ អត់។ ចំណែក អ្នកដែលហ៊ានលួចថតសម្លេងគេ និងយកមកចាក់ផ្សាយដោយគ្មានការអនុញាត ត្រូវទទួលទោសតាមច្បាប់ជាធរមាន នោះទើបរកឃើញការពិត មិនអាចប្រកែកបានហើយការបកស្រាយ

តាមការយល់ឃើញ និងតាមនិន្នាការនយោបាយ លាបព៌ណគ្នា វាយប្រហារគ្នា នឹងត្រូវបញ្ចប់ ។ផ្ទុយទៅវិញ បើសាម៉ីជនពាក់ពន្ធ នៅតែសម្ងំស្ងៀម មិនហ៊ានចេញមុខប្តឹងរកការពិតទេ បញ្ហានឹងនៅតែជាបញ្ហាដដែល នៅតែបន្ត បើអូសបន្លាយ វានឹងនាំដល់ការប្រទូសរ៉ាយនៅក្នុងសង្គមជាតិកាន់តែធំជាក់ជាមិនខាន ៕

កញ្ញា ធី សុវណ្ណថា សម្រេចតម្លើងការទាមទារសំណងពី ២៥ម៉ឺន ដល់ ៥០ម៉ឺនដុល្លារ ពីលោក សម រង្ស៊ី

(ភ្នំពេញ​)៖ នៅព្រឹកថ្ងៃទី០៧ ខែកុម្ភៈ ឆ្នាំ២០១៧នេះ កញ្ញា ធី សុវណ្ណថា ប្រធានអង្គការយុវជនដើម្បីសង្គម បានសម្រេចទាមទារតម្លើងសំណងពីលោក សម រង្ស៊ី ពី ២៥ម៉ឺនឡើងដល់ ៥០ម៉ឺនដុល្លារ។  កញ្ញា ធី សុវណ្ណថា បានបញ្ជាក់នៅព្រឹកថ្ងៃនេះយ៉ាងដូច្នេះ​ថា «ការប្តឹងទាមទារសំណងនេះបានផ្លាស់ប្តូរហើយ គឺពី២៥ម៉ឺន ដល់៥០ម៉ឺនដុល្លារ ដោយក្នុងពាក្យបណ្តឹងដាក់ទាមទារ២០០លានរៀល, នៅពេលនេះការបំភ្លឺនៅអយ្យការ​បានចប់រួចរាល់ហើយ»។

សូមជំរាបថា កញ្ញា​ ធី​ សុវណ្ណថា​ បាន​ប្តឹង​​លោក ​សម​ រង្ស៊ី​ ដោយ​ភ្ជាប់​យក​ករណី​ដែល​លោក ​សម​ រង្ស៊ី​ ចោទប្រកាន់​លោក​នាយករដ្ឋមន្ត្រី​ថា ​បាន​សូក​ប្រាក់ ​កញ្ញា​ ធី​ សុវណ្ណថា​ ចំនួន​១លាន​ដុល្លារ​អាមេរិក ឱ្យរូបនាងធ្វើសកម្មភាព ប្រឆាំងនឹងគណបក្សសង្រ្គោះជាតិ។​ ដើម្បី​បង្ហាញ​​ភាព​ស្អាតស្អំ​ ទើប​កញ្ញា​ ធី​ សុវណ្ណថា​ បានប្តឹង​ទៅ​តុលាការ​ឱ្យ​ជួយ​រក​យុត្តិធម៌​ និង​ផ្តន្ទា​ទោស​លោក​ សម​ រង្ស៊ី​ តាម​ច្បាប់​។

កន្លង​មក ​ក​ញ្ញា​ ធី​ សុវណ្ណថា​ បញ្ជាក់​ថា​ ក្នុង​ឱកាស​ជំនួប​សំណេះសំណាល​ជាមួយ​សកម្មជន​គណបក្ស​សង្គ្រោះ​ជាតិ​ប្រចាំ​ប្រទេស​បារាំង​ កាលពី​ថ្ងៃទី​១៤​ ខែ​មករា​ ឆ្នាំ​២០១៧​ លោក​ សម​ រង្ស៊ី​ បាន​និយាយ​ថា​ លោក ហ៊ុន សែន បាន​សូក​ប្រាក់​ កញ្ញា ​ធី​ សុវណ្ណថា​ ចំនួន​១លាន​ដុល្លារអាមេរិក​….។ កញ្ញា ធី​ សុវណ្ណថា​ ចាត់​ទុកថា​ ការ​លើកឡើង​គ្មាន​មូលដ្ឋាន​ច្បាស់​លាស់​នេះ​ គឺ​ជា​ការ​ចោទប្រកាន់​មួល​បង្កាច់​ ជា​ការ​អះអាង​ដោយ​បំផ្លើស​និង​ជា​ការ​ទម្លាក់​កំហុស​ដោយ​ទុច្ចរិត​ ហើយ​បាន​ធ្វើ​ឱ្យប៉ះពាល់​យ៉ាង​ធ្ងន់ធ្ងរ​ដល់​កិត្តិយស ​កេរ្តិ៍​ឈ្មោះ​ និង​សេចក្ដី​ថ្លៃថ្នូរ​របស់​ កញ្ញា​ ធី​ សុវណ្ណថា​។

គួររំលឹកផងដែរថា លោក សម រង្ស៊ី ត្រូវបានតុលាការកាត់ទោសឱ្យជាប់ពន្ធនាគារ២ឆ្នាំ ពាក់ព័ន្ធនឹងការចោទប្រកាន់ញុះញង់វាយប្រហារ លើលោកឧបនាយករដ្ឋមន្រ្តី ហោ ណាំហុង ថា ជាមេគុកបឹងត្របែក ហើយប្រធានបក្សប្រឆាំងរូបនេះ ក៏ត្រូវបានតុលាការកាត់ទោស ឱ្យជាប់ពន្ធនាគារ៥ឆ្នាំថែមទៀត កាលពីចុងខែធ្នូ ឆ្នាំ២០១៦ ពាក់ព័ន្ធនឹងករណីក្លែងឯកសារព្រំដែនកម្ពុជា-វៀតណាម។ ក្រៅពីនោះ លោក សម រង្ស៊ី ក៏កំពុងជាប់ពាក់ព័ន្ធនឹងបណ្តឹង នៅតុលាការច្រើនថែមទៀត ដែលមិនទាន់ កាត់ទោស ដែលភាគច្រើនជាបណ្តឹង បរិហារកេរ្តិ៍ជាសាធារណៈ៕

ក្រសួង​បរិស្ថាន បើក​វគ្គបណ្តុះ​បណ្តាល​ស្តីពី​ការគ្រប់​គ្រង​បរិស្ថាន និង​ធនធាន​ធម្មជាតិ ​រយៈ​ពេល ១០ថ្ងៃ

ភ្នំពេញ៖ លោក សាយ សំអាល់ រដ្ឋមន្ត្រីក្រសួងបរិស្ថាន បានបើកវគ្គបណ្តុះបណ្តាលស្តីពីការគ្រប់គ្រងបរិស្ថាន និងធនធានធម្មជាតិដែលមានរយៈពេល ១០ ថ្ងៃ ចាប់ពីថ្ងៃទី០៦ ដល់ថ្ងៃទី១៧ ខែកុម្ភៈ ឆ្នាំ ២០១៧ ដោយមានការចូលរួមពីមន្ត្រីវ័យក្មេងក្នុងក្របខណ្ឌចំនួន ១៤៩ នាក់ នៅថ្ងៃទី០៦ ខែកុម្ភៈ ឆ្នាំ ២០១៧ ។

សូមជម្រាបផងដែរថា ប្រធានបទចំនួន៧ ត្រូវបានបញ្ចូលក្នុងវគ្គបណ្តុះបណ្តាលនោះរួមមាន ការងាររដ្ឋបាល និងធនធានមនុស្ស ការងារហិរញ្ញវត្ថុ ការងារលទ្ធកម្ម ការងារផែនការថវិកា ការគ្រប់គ្រងធនធានធម្មជាតិ ការគ្រប់គ្រងសហគមន៍តំបន់ការពារធម្មជាតិ ការងារកិច្ចគាំពារបរិស្ថាន ការងារចំណេះដឹង និងព័ត៌មានបរិស្ថាន ការអភិវឌ្ឍដោយចីរភាព និងយុវជនគំរូ ពលរដ្ឋល្អ មន្ត្រីឆ្នើម។
គោលបំណងនៃការបើកវគ្គបណ្តុះបណ្តាលនេះ គឺដើម្បីពង្រឹងសមត្ថភាព និងប្រសិទ្ធភាពការងារតាមរយៈការបណ្តុះបណ្តាលជំនាញទាក់ទងនឹងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព និងចំណេះដឹងផ្សេងទៀត ជូនដល់មន្ត្រីវ័យក្មេងបន្ថែមលើឯកទេសដែលខ្លួនបានសិក្សា។ លោក សាយ សំអាល់ បានផ្តាំផ្ញើដល់មន្ត្រីវ័យក្មេងទាំងអស់ត្រូវយកចិត្តទុកដាក់លើការធ្វើបទបង្ហាញ និងការចែករំលែកបទពិសោធន៍ពីគ្រូឧទ្ទេសនាមនានា៕

លោក ផៃ ប៊ុនឈឿន ប្រកាសផ្ទេរភារកិច្ច និងការតែងតាំងប្រធានមន្ទីរបរិស្ថាន រាជធានីភ្នំពេញ និងខេត្តកំពង់ស្ពឺ

(ភ្នំពេញ)៖ នៅព្រឹកថ្ងៃទី០៧ ខែកុម្ភៈ ឆ្នាំ២០១៧នេះ លោក ផៃ ប៊ុនឈឿន រដ្ឋលេខា​ធិការ​ក្រសួងបរិស្ថាន បានអញ្ជើញជាអធិបតីក្នុងពិធីប្រកាសផ្ទេរភារកិច្ច និងការតែងតាំងមន្រ្តីរាជការស៊ីវិលក្រសួងបរិស្ថាន ចំនួន២រូប ថ្នាក់ប្រធានមន្ទីរ នៅសាលារាជធានីភ្នំពេញ។

យោងតាមសេចក្តីសម្រេចរបស់ក្រសួងបរិស្ថាន បានបញ្ជាក់ឱ្យដឹងថា ក្រសួងបានសម្រេចផ្ទេរភារកិច្ច លោក គាត រង្សី ពីប្រធានមន្ទីរបរិស្ថានខេត្តកំពង់ស្ពឺ មកជាប្រធានមន្ទីរបរិស្ថានរាជធានីភ្នំពេញ។ នៅក្នុងពិធីនោះ ក៏មានការតែងតាំង លោក ឈឹន សុធន ពីប្រធានស្តីទីមន្ទីរបរិស្ថានរាជធានីភ្នំពេញ ជាប្រធានមន្ទីរបរិស្ថានខេត្តកំពង់ស្ពឺផងដែរ។

នៅក្នុងអង្គពិធីខាងលើនេះ ក៏មានការចូលរួមពី លោក ម៉ប់ សារិន ប្រធានក្រុមប្រឹក្សា និងលោក អៀង អូននី អភិបាលរងរាជធានីភ្បំពេញ និងមន្រ្តីពាក់ព័ន្ធជាច្រើនរូបទៀតផងដែរ៕

សហព័​ន្ធ​កីឡា​​ទាញ​ព្រ័​ត្រ​ក​ម្ពុជា ត្រៀម​ខ្លួនស​ម្រាប់​ព្រឹត្តិកា​រណ៍ជើង​​ឯក​​​អាស៊ី និង​អាស៊ីអា​គ្នេយ៍​​​

ភ្នំពេញ៖ ព្រឹត្តិការណ៍​​កីឡា​ទាញ​ព្រ័ត្រ​អាស៊ី និង​អាស៊ីអាគ្នេយ៍​លើក​ទី​១១ នៅប្រទេសថៃ នឹងរៀបចំឡើងនៅ ​ថ្ងៃ​ទី​២៦ ដល់ ៣០​ ខែ​មេសា ឆ្នាំ​២០១៧ ខាង​មុខ​នេះ កីឡាករទាញព្រ័ត្ររបស់កម្ពុជា ក៏នឹងមានវត្តមាននៅទីនោះដែរ។

លោក មាស សារិន ប្រធាន​សហព័ន្ធ​កីឡា​ទាញ​ព្រ័ត្រ​កម្ពុជា ថ្លែងនៅក្នុងសន្និសីទសារព័ត៌មាន ​បាន​ឱ្យ​ដឹង​ថា ការ​ចូល​រួម​ប្រកួត​ព្រឹត្តិការណ៍​ខាង​លើ​នេះ​កម្ពុជា​បាន​ត្រៀម​ខ្លួនល្អរួចជាស្រេច ហើយកម្ពុជា​ក៏សង្ឃឹម​​​ថានឹងទទួល​បាន​លទ្ធផល​ល្អ ព្រម​ទាំង​​អាច​ប្រជែង​យក​មេដាយមកជូនប្រទេសជាតិវិញ។

សហព័ន្ធកីឡាទាញព្រ័ត្រកម្ពុជា នឹងបញ្ជូនកីឡាករ និងកីឡាការិនី សម្រាប់វិញ្ញាសាចំនួន​៤​ ចូលរួម​​ប្រកួតក្នុងនោះ​​​មាន ​២៣​ឆ្នាំ​បុរស ​​ក្រោម២៣​ឆ្នាំ​បុរស ក្រោម​២៣​ឆ្នាំ​នារី និង​លើ​២៣ ឆ្នាំ​នារី៕

កញ្ញា ធី សុវណ្ណថា ចូលបំភ្លឺជូនតុលាការពាក់ព័ន្ធនឹងការប្តឹង លោក សម រង្ស៊ី ទារសំណងជំងឺចិត្ត២៥ម៉ឺនដុល្លារ (មានវីដេអូ)

(ភ្នំពេញ​)៖ នៅព្រឹកថ្ងៃទី០៧ ខែកុម្ភៈ ឆ្នាំ២០១៧នេះ កញ្ញា ធី សុវណ្ណថា ប្រធានអង្គការយុវជនដើម្បីសង្គម បានទៅដល់សាលាដំបូងរាជធានីភ្នំពេញ ដើម្បីចូលបំភ្លឺជូនតំណាងអយ្យការអមសាលាដំបូង រាជធានីភ្នំពេញ ពាក់ព័ន្ធនឹង​ការ​ប្តឹង​ លោក ​សម​ រង្ស៊ី​ ពី​បទ​បរិហារកេរ្តិ៍​ជា​សាធារណៈ​​ ដោយទាមទារ​សំណង​ជំងឺ​ចិត្ត​ចំនួន​២៥ម៉ឺន​ដុល្លារ​អាមេរិក​។

កញ្ញា​ ធី​ សុវណ្ណថា​ បាន​ប្តឹង​​លោក ​សម​ រង្ស៊ី​ ដោយ​ភ្ជាប់​យក​ករណី​ដែល​លោក ​សម​ រង្ស៊ី​ ចោទប្រកាន់​លោក​នាយករដ្ឋមន្ត្រី​ថា ​បាន​សូក​ប្រាក់ ​កញ្ញា​ ធី​ សុវណ្ណថា​ ចំនួន​១លាន​ដុល្លារ​អាមេរិក ឱ្យរូបនាងធ្វើសកម្មភាពប្រឆាំងនឹងគណបក្សសង្រ្គោះជាតិ។​ ដើម្បី​បង្ហាញ​ភាព​ស្អាតស្អំ​ ទើប​កញ្ញា​ ធី​ សុវណ្ណថា​ បានប្តឹង​ទៅ​តុលាការ​ឱ្យ​ជួយ​រក​យុត្តិធម៌​ និង​ផ្តន្ទា​ទោស​លោក​ សម​ រង្ស៊ី​ តាម​ច្បាប់​៕