មុនមួយថ្ងៃនៃការអ ញ្ជើញចូលរួមកិច្ចសន្ទនាដើម្បីពង្រឹងភាពជាដៃគូការតភ្ជាប់ និងកិច្ចប្រជុំកំពូល នាយកប្រតិបត្តិនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក នៅរសៀលថ្ងៃទី ៧ ខែវិច្ឆិកា ឆ្នាំ២០១៤ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញចូលជួបសំដែងការគួរសម និងពិភាក្សាការងារជាមួយឯកឧត្តមស៊ីជីភីងប្រធានាធិបតីនៃសាធារណរដ្ឋប្រជាមានិតចិន។
ក្នុងជំនួបដែលធ្វើឡើងនៅវិមានប្រជាជនចិនក្នុងទីក្រុងប៉េកាំង ឯកឧត្តមស៊ីជីភីង មានប្រសាសន៍ថាក្នុងរយៈពេលកន្លះមកនេះ ឯកឧត្តមបានជួបពិភាក្សាដោយផ្ទាល់ជាមួយនឹងសម្តេចតេជោនាយករដ្ឋមន្រ្តីចំនួនពីរលើករួចមកហើយពោល គឺលើកទី១ធ្វើឡើងកាលពីខែឧសភា នៅទីក្រុងសៀងហៃប្រទេសចិនក្នុងឱកាសដែលសម្តេចអញ្ជើញចូលរួមកិច្ចប្រជុំកំពូល នៃសន្និសីទស្តីពី អន្តរសកម្មភាពនិងវិធានការកសាងទំនុកចិត្តនៅអាស៊ី។ ឯកឧត្តមប្រធានាធិបតីបានមានប្រសាសន៍បន្តថា ឯកឧត្តមមានការចងចាំជានិច្ច ចំពោះកាលដែលឯកឧត្តមបានដឹកនាំគណៈប្រតិភូជាន់ខ្ពស់របស់ប្រទេសចិនទៅបំពេញទស្សនកិច្ចផ្លូវរដ្ឋនៅក្នុងប្រទេសកម្ពុជាកាលពីឆ្នាំ២០០៩ តាមរយៈការទទួលយ៉ាងកក់ក្តៅបំផុតពីសំណាក់ព្រះមហាក្សត្រ សម្តេចតេជោនាយករដ្ឋមន្រ្តីរាជរដ្ឋាភិបាល និងប្រជាជនកម្ពុជា។ ឯកឧត្តមប្រធានាធិបតីមានប្រសាសន៍សង្កត់ធ្ងន់ថា ប្រទេសយើងទាំងពីរចិនកម្ពុជា គឺជាប្រទេសដែលមានវាសនាតែមួយមានផលប្រយោជន៍គ្នានិងមិត្តភាពដ៏ស្មោះជាមួយគ្នា។
សម្តេចតេជោនាយករដ្ឋមន្រ្តីមានប្រសាសន៍ថាកិច្ចប្រជុំកំពូលនៅទីក្រុងសៀងហៃកន្លងទៅ គឺជាកិច្ចប្រជុំមួយដ៏មានសារៈសំខាន់ និងមានអត្ថន័យធំធេងសំរាប់នយោបាយរបស់ប្រទេសកម្ពុជា ជាពិសេសគឺជំនួបកំពូលរវាងឯកឧត្តមប្រធានាធិបតី និងសម្តេចកើតឡើងក្រោយពីការបោះឆ្នោតសកលក្នុងប្រទេសកម្ពុជាដែលនោះ គឺជាការបង្ហាញពីការគាំទ្ររបស់ប្រទេសចិនចំពោះប្រទេសកម្ពុជាពិសេសគឺគាំទ្រចំពោះរាជរដ្ឋាភិបាលកម្ពុជាដែលបានបង្កើតឡើងនោះ។ សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងន់ថា ជំនួយរបស់ប្រទេសចិននាពេលកន្លងមក និងពេលបច្ចុប្បន្ន គឺមិនគ្រាន់តែផ្តល់នូវការគាំទ្រខាងផ្នែកសេដ្ឋកិច្ច និងការអភិវឌ្ឍរបស់ប្រទេសកម្ពុជាប៉ុណ្ណោះទេប៉ុន្តែនឹងជួយពង្រឹងដល់ឯករាជ្យភាពក៏ដូចជាអធិបរតយ្យភាពរបស់កម្ពុជាទាំងមូលផងដែរ។ សម្តេចតេជោនាយករដ្ឋមន្រ្តីមានប្រសាសន៍បន្តថា ថ្វីត្បិតកម្ពុជាមិនមែនជាសមាជិករបស់កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក ក៏ពិតមែន ប៉ុន្តែប្រទេសកម្ពុជាត្រូវបានអញ្ជើញឲ្យមកចូលរួមវេទិកាដ៏មានសារៈសំខាន់នេះដើម្បីធ្វើការពិគ្រោះយោបល់និងការតភ្ជាប់សំរាប់តំបន់ទាំងមូល។
សម្តេចតេជោក៏បានផ្តល់នូវសេចក្តីសង្ឃឹមថា នៅពេលអនាគតដ៏ខ្លីខាងមុខ ប្រទេសដែលជាម្ចាស់នៃកិច្ចប្រជុំកំពូល APEC នឹងបន្តការផ្តល់នូវការយកចិត្តទុកដាក់ក្នុងការអញ្ជើញដល់បណ្តាប្រទេសដែលជាមិនសមាជិក APEC មកចូលរួមប្រជុំកំពូល APEC ដូចដែរប្រទេសចិនបានធ្វើនៅពេលនេះ។
ទាក់ទិនទៅនឹងទំនាក់ទំនងទ្វេភាគីនៃប្រទេសទាំងពីរកម្ពុជា‑ចិន សម្តេចតេជោនាយករដ្ឋមន្រ្តីមានប្រសាសន៍ស្នើដល់ភាគីចិនបន្តធ្វើកិច្ចសហប្រតិបត្តិការលើគ្រប់វិស័យ នៃប្រទេសទាំងពីរឲ្យកាន់តែស្អិតរមួតទ្វេឡើងថែមទៀត ពិសេស ការផ្លាស់ប្តូរនូវដំណើរទស្សនកិច្ចពីគ្រប់កំរិតទាំងអស់ ទី១ ចាប់តាំងពីថ្នាក់ដឹកនាំនយោបាយរហូតដល់កំរិតមហាជន និងប្រជាជន ទី២បន្តពង្រីកកិច្ចសហប្រតិបត្តិការក្នុងការរៀបចំចងសម្ព័ន្ធមេត្រីភាពរវាងខេត្ត និងខេត្តទីក្រុងនិងទីក្រុងនៃប្រទេសទាំងពីរ និងទី៣បន្តកិច្ចសហប្រតិបត្តិការលើការបណ្តុះបណ្តាលធនធានមនុស្ស ជាពិសេសការផ្លាស់ប្តូរយុវជនក៏ដូចជាសមាគមស្រ្តីនៃប្រទេសទាំងពីរ។ ជាមួយគ្នាសម្តេចតេជោនាយករដ្ឋមន្រ្តីក៏បានស្នើដល់ភាគីចិនបន្តជួយគាំទ្រដល់ការអភិវឌ្ឍសេដ្ឋកិច្ចរបស់ប្រទេសកម្ពុជាតាមរយៈការផ្តល់កម្ចីហិរញ្ញប្បទាន ពី៥០០លានដុល្លាទៅ៧០០លានដុល្លាអាមេរិកក្នុង១ឆ្នាំ និងបើកចំហទីផ្សាររបស់ប្រទេសចិនក្នុងការនាំយកនូវទីផ្សារកសិផលពីកម្ពុជាមកកាន់ប្រទេសចិន ពិសេសការនាំចូលអង្ករពីកម្ពុជាមកកាន់ប្រទេសចិន។ ក្នុងជំនួបពិភាក្សាគ្នានោះដែរ សម្តេចតេជោក៏បានស្នើដល់ភាគីចិនជួយជំរុញអ្នកទេសចរណ៍ចិនមកកាន់កម្ពុជាឲ្យកាន់តែច្រើនឡើងថែមទៀត ពោល គឺកម្ពុជាចង់ឃើញទេសចរណ៍ចិននៅកម្ពុជាឈរក្នុងអាត្រាកំណើនចំណាត់ទី១នៅកម្ពុជា។
ឯកឧត្តមប្រធានាធិបតីចិន ស៊ីជីភីង មានប្រសាសន៍ថ្លែងនូវអំណរគុណចំពោះប្រទេសចិនក្នុងការនាំប្រទេសមិនសមាជិករបស់APECមកចូលរួមក្នុងប្រជុំកំពូលនៅពេលនេះ ដែលធ្វើឡើងក្នុងទិសដៅដើម្បីពង្រឹងកិច្ចសហប្រតិបត្តិការរវាងប្រទេសជាមិត្តនិងប្រទេសជាសមាជិករបស់APEC។
ឯកឧត្តមប្រធានាធិបតីមានប្រសាសន៍សង្កត់ធ្ងន់ថា ប្រទេសចិនសូមគាំទ្រប្រទេសកម្ពុជាក្នុងការចូលជាសមាជិកពេញសិទ្ធរបស់APEC តាមរយៈសុំឲ្យប្រទេសកម្ពុជាធ្វើការចរចារជាមួយនិងបណ្តាប្រទេស APEC មួយចំនួនទៀត។ ឯកឧត្តមមានប្រសាសន៍សង្កត់ធ្ងន់ថាដោយសារតែប្រទេសទាំងពីរជាប្រទេសមានភាពជាដៃគូយុទ្ធសាស្រ្តគ្រប់ជ្រុងជ្រោយ ចិនបាន់ចាត់ទុកថា កម្ពុជា គឺជាប្រទេសដ៏មានសារៈសំខាន់និងចាត់ទុកសម្តេចតេជោ គឺជាមិត្តនិងជាបងប្អូនរបស់ប្រទេសចិន និងសូមទទួលស្វាគមន៍ជានិច្ចចំពោះវត្តមាននៃដំណើរទស្សនកិច្ចរបស់សម្តេចតេជោមកកាន់ប្រទេសចិន។
ឯកឧត្តមមានប្រសាសន៍សង្កត់ធ្ងន់ថា ចាប់តាំងពីឆ្នាំ២០០៩នៅពេលដែលឯកឧត្តមបំពេញទស្សនកិច្ចនៅកម្ពុជា ឯកឧត្តមបានឃើញដោយផ្ទាល់ចំពោះសម្តេចតេជោ និងរាជរដ្ឋាភិបាលកម្ពុជាដែលតែងតែប្រកាន់ខ្ជាប់នូវនយោបាយចិនតែមួយ ហើយបើទោះបីពេលនេះកម្ពុជារងសម្ពាធពីខាងក្រៅមួយចំនួនក៏ពិតមែន ប៉ុន្តែកម្ពុជានៅតែប្រកាន់យកនយោបាយចិនតែមួយ តាមរយៈនេះយើងអាចបញ្ជាក់បានថា ចិននិងកម្ពុជានៅតែបន្តជួយគ្នាទៅវិញទៅមក ទាំងក្នុងទំនាក់ទំនងទ្វេភាគីតំបន់និងអន្តរជាតិដែលមានការយកចិត្តទុកដាក់ដូចគ្នា។ ឯកឧត្តមប្រធានាធិបតីក៏បានសំដែងនូវការវាយតំលៃខ្ពស់ចំពោះសភាពការណ៍នយោបាយនៅកម្ពុជាដែលបាននិងកំពុងវិត្តន៍រីកចំរើនទៅមុខ ពិសេសគណបក្សនយោបាយទាំងពីរបានចូលសភាក្នុងការបន្តនិរន្តរភាពទៅមុខ និងបានផ្តល់នូវសេចក្តីសង្ឃឹម ថាក្រោមការដឹកនាំរបស់សម្តេចតេជោនាយករដ្ឋមន្ត្រីជាប្រមុខ។ ជាមួយគ្នានេះ ឯកឧត្តមប្រធានាធិបតីមានប្រសាសន៍បន្តថា ប្រទេសចិននឹងបន្តផ្តល់ជំនួយ និងបន្តការគាំទ្រគ្រប់បែបយ៉ាងលើការ អភិវឌ្ឍសេដ្ឋកិច្ចជាតិរបស់ប្រទេសកម្ពុជាឲ្យកាន់តែរីចំរើនទ្វេឡើងថែមទៀត។ ក្នុងជំនួបពិភាក្សាគ្នានោះដែរ ឯកឧត្តមប្រធានាធិបតីចិន និងសម្តេចតេជោនាយករដ្ឋមន្រ្តី បានវាយតំលៃខ្ពស់ពីការបង្កើតវិថីសូត្រសមុទ្រដែលបានស្នើឡើងដោយប្រទេសចិន និងបង្កើនសមាជិកភាពនៃវេទិកាដ៏មានសារៈសំខាន់នោះដែលមានប្រទេសចូលរួមរហូតដល់៦៥ប្រទេស។ ក្នុងជំនួបពិភាក្សាគ្នានោះដែរ ឯកឧត្តមប្រធានាធិបតីចិនក៏បានគូសបញ្ជាក់ពីការជួយដល់យុវជនកម្ពុជាចំនួន១០០នាក់ មកទស្សនកិច្ចសិក្សានៅប្រទេសចិនក្នុងឆ្នាំ២០១៥។
ដោយឡែកនៅរសៀលថ្ងៃដដែលនោះដែរ សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញចូលជួបសំដែងការគួរសម និងពិភាក្សាការងារជាមួយឯកឧត្តម លីយ៉ុនចាវ អនុប្រធានាធិបតីនៃសាធារណរដ្ឋប្រជាមានិតចិន។ ក្នុងជំនួបពិភាក្សាដែលធ្វើឡើងនៅផ្ទះទទួលភ្ញៀវរដ្ឋ ក្នុងទីក្រុងប៉េកាំងឯកឧត្តមលីយ៉ុនចាវ មានប្រសាសន៍សំដែងនូវការស្វាគមន៍ចំពោះវត្តមានរបស់សម្តេចតេជោ នាយករដ្ឋមន្រ្តីដែលបានអញ្ជើញមកចូលរួមក្នុងកិច្ចប្រជុំកំពូល APEC នៅទីក្រុងប៉េកាំងប្រទេសចិន។ឯកឧត្តមមានប្រសាសន៍បន្តថា វត្តមានរបស់សម្តេចតេជោនាយករដ្ឋមន្រ្តីនៅពេលនេះ នឹងធ្វើឲ្យកិច្ចប្រជុំកំពូលនេះនឹងទទួលបានជោគជ័យទ្វេឡើងថែមទៀត ពិសេសការជំរុញទំនាក់ទំនងនៃប្រទេសទាំងពីរកម្ពុជា‑ចិន កាន់តែរឹងមាំទ្វេឡើងថែមទៀត។ឯកឧត្តមអនុប្រធានាធិបតីមានប្រសាសន៍បន្តថា កាលពីឆ្នាំ២០១១ ឯកឧត្តមបានដឹកនាំគណៈប្រតិភូអញ្ជើញទៅបំពេញទស្សនកិច្ចនៅកម្ពុជា ដែលនៅពេលនោះឯកឧត្តមសូមសំដែងដោយស្មោះចំពោះការរីកចំរើនរបស់ប្រទេសកម្ពុជា ពិសេស ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោនាយករដ្ឋមន្រ្តី។ ឯកឧត្តមអនុប្រធានាធិបតីមានប្រសាសន៍សង្កត់ធ្ងន់ថា ចិននឹងពិនិត្យគ្រប់លទ្ធភាពក្នុងការបន្តជួយដល់ប្រទេសកម្ពុជា ដើម្បីជំរុញសេដ្ឋកិច្ចរបស់ប្រទេសកម្ពុជាកាន់តែមានភាពប្រសើរឡើងថែមទៀត។ ឯកឧត្តមមានប្រសាសន៍សង្កត់ធ្ងន់ថា ប្រទេសយើងទាំងពីរកម្ពុជាចិនមានទំនាក់ទំនងជាមួយគ្នាជាយូរលង់ណាស់មកហើយ និងមានប្រវត្តិធ្លាប់ជួយគ្នាទៅវិញទៅមក។ ជាមួយគ្នានេះប្រទេសចិនសូមថ្លែងនូវអំណរគុណចំពោះប្រទេសកម្ពុជាដែល តែងតែគាំទ្រចំពោះនយោបាយចិនមួយ និងបានចាត់ទុកថា ការគោរពអធិបតេយ្យភាពរបស់ចិន ដូចគ្នានឹងការគោរពអធិបតេយ្យភាពរបស់កម្ពុជាដូច្នោះដែរ។
សម្តេចតេជោនាយករដ្ឋមន្រ្តី បានមានប្រសាសន៍ថ្លែងនូវអំណរគុណចំពោះរដ្ឋាភិបាល និងប្រជាជនចិនដែលតែតែគាំទ្រចំពោះប្រទេសកម្ពុជាក្នុងការផ្តល់ជំនួយឥតសំណង កម្ចីគ្មានការប្រាក់ និងកម្ចីហិរញ្ញប្បទានដល់ការស្តារនិងអភិវឌ្ឍន៍សេដ្ឋកិច្ចកម្ពុជាឡើងវិញ។
សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងន់ផងដែរថា ការផ្តល់ជំនួយរបស់ប្រទេសចិនមិនគ្រាន់តែរួមចំណែកដល់ការស្តារ និងអភិវឌ្ឍន៍សេដ្ឋកិច្ចប៉ុណ្ណោះទេ ប៉ុន្តែថែមទាំងបានជួយពង្រឹងដល់ឯករាជ្យរបស់កម្ពុជាផងដែរ៕
