សម្តេច​តេជោផ្តល់​កាដូមួយ​ថែមទៀត​ដល់បង​ប្អូនជនរួម​ជាតិទាំងអស់​នៅក្នុងខួប ៧ មករា ២០១៦

សម្តេចនាយក​រដ្ឋមន្រ្តី ហ៊ុន សែន បានប្រកាសសម្រេច​លុបចោលប័ណ្ណបើកបរ ទោចក្រយានយន្ត ដែលមានកម្លាំងពីចាប់ពី 125CC ចុះក្រោម មិនចាំបាច់មា​នប័ណ្ណបើក​បរទៀតទេ នេះបើយោងតាមសេចក្តីសម្រេច របស់ប្រមុខរា​ជរដ្ឋាភិបាលកម្ពុជា ។

នៅក្នុងនោះសម្តេចតេជោ ហ៊ុន សែន បានបញ្ជាក់​លើ បណ្តាញFacebook របស់សម្តេច យ៉ាងដូច្នេះថា៖ « ក្រោយពីបានតាមដានស្តាប់នូវមតិយោបល់ សំណូមពរ និងសំណើរបស់បងប្អូនជនរួមជាតិ ជាពិសេស យុវជននិងសិស្សានុសិស្សទាក់ទងនិងតម្លៃនៃការធ្វើប័ណ្ណបើកបរម៉ូតូ ហើយក្រោយពីខ្ញុំបានពិភាក្សាជាមួយ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្រ្តីក្រសួងសាធារណការនិងដឹកជញ្ជូន គឺខ្ញុំបានសម្រេចបញ្ឈប់មិនចាំបាច់អោយមានប័ណ្ណបើកបរចំពោះម៉ូតូចាប់ពីកម្លាំង 125 CC ចុះក្រោម ចាប់ពីពេលនេះតទៅ។ ដូច្នេះប្រជាពលរដ្ឋដែលបើកបរម៉ូតូមានកម្លាំងចាប់ពី 125 CC ចុះក្រោម គឺមិនចាំបាច់បង់លុយថ្លៃធ្វើប័ណ្ណបើកបរ និងមិនចាំបាច់មានប័ណ្ណបើកបរឡើយ។ ប៉ុន្តែទន្ទឹមនឹងនេះ គឺសូមប្រជាពលរដ្ឋត្រូវតែរៀនច្បាប់ចរាចរណ៍ និងបើកបរត្រូវតែគោរពច្បាប់គ្រប់ៗគ្នា។ ខ្ញុំនឹងស្នើទៅអង្គការនីតិបញ្ញត្តិដើម្បីធ្វើវិសោធន:កម្មលើបទបញ្ញត្តិច្បាប់ដែលមានការពាក់ព័ន្ឋក្នុងពេលឆាប់ៗខាងមុខនេះ។ ខ្ញុំសង្ឃឹមថា នេះគឺជាការចូលរួមកាត់បន្ថយនូវការចំណាយ និងការលំបាកទាំងឡាយរបស់ប្រជាពលរដ្ឋទូទាំងប្រទេស។ នេះគឺជាកាដូមួយថែមទៀតដល់បងប្អូនជនរួមជាតិទាំងអស់នៅក្នុងខួប ៧ មករា ២០១៦ នេះ ! »

សម្តេចតេជោ ហ៊ុន សែន តែងតែគិតគូរការថែទាំសុខភាពដល់កម្មករ និយោជិត

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានចុះហត្ថលេខា លើ អនុក្រឹត្យ ដាក់ឱ្យអនុវត្តរបបថែទាំសុខភាពដល់កម្មករ និងកម្មការិនីសម្រាប់ឆ្នាំ២០១៦ នេះបើយោងតាមការបញ្ជាក់ឲ្យដឹងពី លោក ជាវ ប៊ុនរិទ្ធ អ្នកនាំពាក្យប្រចាំ បេឡារបបសន្តិសុខសង្គម ហៅកាត់ថា (ប.ប.ស) ថ្លែងប្រាប់ឱ្យដឹង នៅព្រលប់ថ្ងៃទី០៥ ខែមករា ឆ្នាំ២០១៦។ ជាដំណឹងដ៏ល្អមួយសម្រាប់បងប្អូន កម្មករ កម្មការិនី គឺចាប់ពីឆ្នាំ២០១៦តទៅ កម្មករ-កម្មការិនី នឹងទទួល បានរបបថែទាំសុខភាព ។
                                                                 
លោក ជាវ ប៊ុនរិទ្ធ ប្រធានការិយាល័យគោលនយោបាយនៃបេឡារបបសន្តិសុខសង្គម និងជាអ្នកនាំពាក្យ ប.ស.ស បានបញ្ជាក់ថា៖ អនុក្រឹត្យស្តីពីការដាក់ឱ្យដំណើរការ របបសន្តិសុខសង្គម គឺសម្រាប់ជនទាំងឡាយ ដែលស្ថិតនៅក្រោមបទប្បញ្ញាត្តិ នៃច្បាបស្តីពីការងារ។ ការដាក់ឱ្យដំណើការនេះ គឺប្រគល់ភារកិច្ចឱ្យអង្គភាព បសស នៃក្រសួងការងារ ជាស្ថាប័នមានសមត្ថកិច្ចតែមួយគត់ ក្នុងការអនុវត្តរបប សន្តិសុខសង្គម សម្រាប់កម្មករនិយោជិត។ នៅពេលរបបថែទាំសុខភាពនេះត្រូវបានដាក់ឱ្យដំណើរការហើយ គឺបងប្អូន កម្មករ-កម្មការិនី ទៅទទួលសេវាពិនិត្យសុខភាព និងសេវាព្យាបាល ដោយឥតគិតថ្លៃពីមូលដ្ឋានសុខាភិបាលទាំងមន្ទីរពេទ្យរដ្ឋ និងមន្ទីរពេទ្យឯកជន ដែលបានចុះកិច្ចព្រមព្រៀងផ្តល់សេវាឱ្យ ប.ស.ស។ ការចំណាយលើការទូទាត់សេវាមន្ទីរពេទ្យជាបន្ទុក បេឡារបបសន្តិសុខសង្គម។
                                                         
អ្នកនាំពាក្យរូបនោះបានបញ្ជាក់បន្ថែមថា ក្រោយពីទទួលបានដំណឹងនេះ កម្មករ-កម្មការិនីបានសម្តែងការសាទរ និងសប្បាយរីករាយចំពោះការចុះហត្ថលេខា លើអនុក្រឹត្យដាក់ឱ្យអនុវត្តរបបថែទាំសុខភាពដល់កម្មករ និងកម្មការិនីសម្រាប់ឆ្នាំ២០១៦ ពីសំណាក់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជានាពេលនេះ៕
អត្ថបទៈ តាំង ករុណា

ប្រធានរដ្ឋសភាវៀតណាម៖ វត្តមាន សម្តេច ហេង សំរិន ក្នុងថ្ងៃខូប៧០ឆ្នាំការបោះឆ្នោតសកល នៅវៀតណាម បង្ហាញឲ្យឃើញចំណងមិត្តភាព ដ៏រឹងមាំរបស់ប្រទេសទំាងពីរ

សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា បានដឹកនាំគណៈប្រតិភូ ជាន់ខ្ពស់រដ្ឋសភាកម្ពុជា បានអញ្ជើញដល់ទីក្រុងហាណូយ សាធារណរដ្ឋសង្គមនិយមវៀតណាម ដោយសុវត្ថិភាព កាលពីរសៀល ថ្ងៃទី៥ ខែមករា ឆ្នាំ២០១៦ នេះ ដើម្បីចូលរួមពិធីរម្លឹកខួប៧០ឆ្នាំ នៃការបោះឆ្នោតសកល លើកដំបូង និងការបង្កើតរដ្ឋសភា របស់ប្រទេសវៀតណាម ដែលនឹងប្រព្រឹត្តទៅនៅព្រឹកថ្ងៃទី៦ ខែមករា ឆ្នាំ២០១៦។
នៅពេលអញ្ជើញដល់ប្រទេសវៀតណាម គណៈប្រតិភូជាន់ខ្ពស់រដ្ឋសភាកម្ពុជា បានទទួលការស្វាគមន៍យ៉ាងកក់ក្តៅ ពីសំណាក់ថ្នាក់ដឹកនាំវៀតណាម ដោយនៅព្រលប់ ថ្ងៃទី៥ ខែមករា នោះ សម្តេចអគ្គមហាពញាចក្រី ហេង សំរិន និងសមាជិកគណៈប្រតិភូ បានចូលជួបសម្តែងការគួរសម ជាមួយ ឯកឧត្តម ង្វៀន ស៊ីញហុង ប្រធានរដ្ឋសភា នៃសាធារណរដ្ឋសង្គមនិយមវៀតណាម នាវិមានរដ្ឋសភាជាតិ របស់ប្រទេសវៀតណាម។
ក្នុងជំនួបនោះ ឯកឧត្តម ង្វៀន ស៊ីញហុង បានសម្តែងការអរគុណយ៉ាងជ្រាលជ្រៅ ចំពោះ សម្តេចអគ្គមហាពញាចក្រី ហេង សំរិន និង គណៈប្រតិភូទំាងអស់ ដែលបានអញ្ជើញមកចូលរួមក្នុងពិធីរម្លឹកខួប៧០ឆ្នាំនេះ។ ឯកឧត្តមបានសម្តែងក្តីរីករាយ ដោយបានគូសបញ្ជាក់ថា  វត្តមានរបស់ សម្តេច និងគណៈប្រតិភូរដ្ឋសភាកម្ពុជាទំាងអស់ ក្នុងឱកាសវិសេសវិសាលនេះ បានបង្ហាញ ពីការយកចិត្តទុកដាក់ របស់រដ្ឋសភាកម្ពុជា ចំពោះប្រទេសវៀតណាម ពិសេសរដ្ឋសភាវៀតណាម។ ឯកឧត្តមសង្កត់ធ្ងន់ថា វត្តមានរបស់ សម្តេចប្រធានរដ្ឋសភា បានបង្ហាញឲ្យឃើញពី ចំណងមិត្តភាព សាមគ្គីភាព និងកិច្ចសហប្រតិបត្តិការដ៏ល្អ រវាងប្រទេសទំាងពីរ ពិសេស គឺស្ថាប័ននីតិប្បញ្ញត្តិ នៃប្រទេសទំាងពីរ។
ឯកឧត្តមប្រធានរដ្ឋសភាវៀតណាម បានលើកឡើងថា កាលពី៧០ឆ្នាំមុន ពោលគឺ នៅថ្ងៃទី៦ ខែមករា ឆ្នាំ១៩៤៦ ប្រទេសវៀតណាម បានចាប់ផ្តើម ធ្វើការបោះឆ្នោតសកលលើកដំបូង បន្ទាប់ពីបានទទួលឯករាជ្យពីប្រទេសបារាំង។ ការបោះឆ្នោតនោះ ជាការបោះជំហានដ៏ធំមួយរបស់វៀតណាម ជាក្តីសង្ឃឹម របស់ប្រជាជនវៀតណាម ជាពិសេស ប្រមុខដឹកនាំវៀតណាម កាលសម័យនោះ គឺលោកប្រធាន ហូជីម៉ិញ។  “ការបោះឆ្នោតឆ្នាំ១៩៤៦ បានធ្វើឲ្យវៀតណាម មានឱកាសដឹកនាំប្រទេសដោយខ្លួនឯង ហើយធ្វើការអភិវឌ្ឍប្រទេស ឆ្ពោះទៅកាន់ការអភិវឌ្ឍ ការរីកចម្រើន ព្រមទាំងបាន កសាងសាមគ្គីភាពក្នុងប្រទេសយ៉ាងរឹងមាំ រហូតមកដល់ពេលបច្ចុប្បន្ននេះ “ នេះជាការលើកឡើងរបស់ ឯកឧត្តម  ង្វៀន ស៊ីញហុង ។
ជាមួយការអបអរសាទរ ដល់រដ្ឋសភា រដ្ឋាភិបាល និងប្រជាជនវៀតណាម ដែលក្នុងរយៈពេល ៧០ឆ្នាំកន្លងមកនេះ បានខិតខំបំពេញភារកិច្ច យ៉ាងច្រើន ដើម្បីសេចក្តីសុខ និងការរីកចម្រើន របស់ប្រទេសជាតិ។  សម្តេចអគ្គមហាពញាចក្រី ហេង សំរិន បានមានប្រសាសន៍ថា ការប្រារព្ធខួប ៧០ឆ្នាំនៅពេលនេះ គឺជាការរម្លឹកដល់ព្រឹត្តិការណ៍ប្រវត្តិសាស្រ្ត ពោរពេញដោយខ្លឹមសារយ៉ាងសំខាន់ចំពោះរដ្ឋសភា និង ប្រជាជនវៀតណាម ក្នុងដំណើរការតស៊ូ ដើម្បីឯករាជ្យ ។
សម្តេច បានលើកឡើងថា កម្ពុជា វៀតណាម មានប្រវត្តិសាស្រ្តប្រហាក់ប្រហែលគ្នា គឺធ្លាប់ឆ្លងកាត់ ទទួលរងនូវរបបអាណានិគមចក្រពត្តិនិយម។ ប្រជាជនទាំងពីរ ធ្លាប់ជួយគ្នាទៅវិញទៅមក សហការគ្នាដោយភាពស្មោះត្រង់ ប្រកៀកស្មារគ្នា តស៊ូប្រយុទ្ធដើម្បីទទួលបានឯករាជ្យ សន្តិភាព សេរីភាព ជូនប្រទេសរៀងៗខ្លួន ។ សម្តេចអគ្គមហាពញាចក្រី បានសម្តែងក្តីរីករាយ ដោយឃើញចំណងមិត្តភាពកម្ពុជា វៀតណាម រីកចម្រើន ជាលំដាប់ ហើយនៅរយៈពេលចុងក្រោយនេះ ការវិវឌ្ឍន៍ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទាំងក្នុងក្របខណ្ឌ បក្ស រដ្ឋសភា រដ្ឋាភិបាល ត្រូវបានពង្រឹងពង្រីកឥតឈប់ឈរ ក្រោមពាក្យស្លោកថា អ្នកភូមិផងល្អ មិត្តភាព សាមគ្គីភាព ជាប្រពៃណី និងកិច្ចសហប្រតិបត្តិការ លើគ្រប់វិស័យ និងយូរអង្វែង ។
នៅក្នុងរាត្រីនោះ ឯកឧត្តម ង្វៀន ស៊ីញហុង ក៏បានរៀបចំពិធីលាងសាយភោជន៍ ជូន សម្តេចអគ្គមហាពញាចក្រី ហេង សំរិន និងគណៈប្រតិភូ រដ្ឋសភាកម្ពុជា ព្រមទំាងគណៈប្រតិភូរដ្ឋសភា បណ្តាប្រទេសនានាឯទៀត ដែលបានអញ្ជើញចូលរួម អបអរសាទរខូប៧០ឆ្នាំ  នៃថ្ងៃបោះឆ្នោតសកល លើកដំបូង របស់ប្រទេសវៀតណាម យ៉ាងជិតស្និទ្ធ រាក់ទាក់ជាទីបំផុត៕
អត្ថបទនិងរូបភាព នាយកដ្ឋានព័ត៌មាន

ជនរួមជាតិកម្ពុជា នៅតែចងចាំអត្ថន័យនៃ ថ្ងៃជ័យជម្នះ ៧ មករា

បើយើងសម្លឹងមើលត្រឡប់ក្រោយ ទិវាជ័យជំនះជាប្រវត្តិសាស្រ្តថ្ងៃ៧ មករា មានអាយុកាលជាង ៣៧ឆ្នាំ ហើយ (៧មករា ១៩៧៩-៧មករា ២០១៦) ដែលគណបក្សប្រជាជនកម្ពុជាបានដឹកនាំចលនាផ្តួលរំលំរបបប្រល័យពូជសាសន៍ ប៉ុល ពត ធ្វើឱ្យប្រជាជាតិបានរស់ឡើងវិញ ហើយបានស្ថិតស្ថេរគង់វង្ស និងរីកចម្រើនរហូតមកដល់សព្វថ្ងៃនេះ។
                                                                               
សម្តេចតេជោ ហ៊ុន សែន ប្រមុខដឹកមួយរូប ក្នុងចំណោមប្រមុខដឹកនាំជាច្រើនរូបទៀត ដែលបានដឹកនាំចលនា តស៊ូរំដោះជាតិ បានគូសបញ្ជាក់ថា ក្រោយរដ្ឋប្រហារថ្ងៃ ១៨ មីនា ឆ្នាំ១៩៧០ ដឹកនាំដោយលោក លន់ នល់ ទម្លាក់សម្តេចព្រះ នរោត្តម សីហនុ បានធ្វើឲ្យប្រទេសកម្ពុជា ធ្លាក់ចូលទៅក្នុងភ្នក់ភ្លើងសង្រ្គាមយ៉ាងសន្ធោរសន្ធៅបំផុត ដែលបានបង្កមហាវិនាសកម្មពុំអាចនឹងពណ៌នាបានឡើយ។
ក្រោយថ្ងៃជ័យជម្នះលើពួក លន់ នល់ នៅថ្ងៃទី១៧ មេសា ឆ្នាំ១៩៧៥ ប្រជាជនកម្ពុជា ដែលសង្ឃឹមបានរស់នៅក្នុងសន្តិភាពវិញនោះ ត្រូវរលាយបង់តែមួយប៉ព្រិចភ្នែក ក្រោមអំពើផ្តាច់ការនៃបនក្បត់ ប៉ុល ពត ដែលបានអនុវត្តនយោបាយប្រល័យពូជសាសន៍ ដ៏សាហាវយង់ឃ្នងបំផុត ចំពោះជាតិមាតុភូមិ និងប្រជាជនកម្ពុជា។ ក្នុងរយៈពេល ៣ឆ្នាំ ៨ខែ និង ២០ថ្ងៃនេះ ពួកបនប្រល័យពូជសាសន៍ ប៉ុល ពត បានបំផ្លាញសង្គមជាតិទាំងមូល ឱ្យទទួលរងការវិនាសដោយសារសង្រ្គាម ៥ឆ្នាំរួចមកហើយនោះ (ពីឆ្នាំ១៩៧០-១៩៧៥) ឲ្យរលាយខ្ទេចខ្ទីទាំងស្រុងដល់ឬសគល់។ ប្រជាជនកម្ពុជា ត្រូវពួកឃាតករបំបិទសិទ្ធិសេរីភាពសព្វបែបយ៉ាងទាំងស្រុង ក្លាយជាទាសករ បាត់បង់អស់កិត្តិយស និងសេចក្តីថ្លៃថ្នូររបស់មនុស្ស ហើយរង់ចាំតែពេលពួក ប៉ុល ពត សម្លាប់តែប៉ុណ្ណោះ។
                                         
របបប្រល័យពូជសាសន៍ ប៉ុល ពត បានប្រែក្លាយកម្ពុជា ទៅជាវាលពិឃាតគួរឲ្យរន្ធត់បំផុត ប្រជាជាតិទាំងមូលត្រូវជ្រមុជយ៉ាងជ្រៅទៅក្នុងសមុទ្រឈាម និងទឹកភ្នែក ដែលពុំធ្លាប់មានក្នុងប្រវត្តិសាស្រ្តរបស់មនុស្សជាតិ។ ប្រជាជន ដែលពុំទាន់ត្រូវបានសម្លាប់ មានតែការលើកដៃបួងសួងបន់ស្រន់ សូមឲ្យទេវតា និងវត្ថុស័ក្តិសិទ្ធទាំងឡាយមកជួយសង្រ្គោះឲ្យរួចផុតពីឋាននរកអវចី។
ថ្ងៃ ៧ មករា គឺជាថ្ងៃកំណើតទី២ របស់ប្រជាជនកម្ពុជា ដែលជាសច្ចធម៌ប្រវត្តិសាស្រ្ត គួរយល់ដឹងច្បាស់លាស់ និងចងចាំជារៀងរហូត។ យើងមិនមែនត្រូវរស់នៅក្នុងស្រមោល នៃអតីតកាលឡើយ ប៉ុន្តែក្នុងជំហានទៅមុខឆ្ពោះទៅរកអនាគត ដ៏រុងរឿង យើងចាំបាច់ ត្រូវតែយល់ពីប្រវត្តិសាស្រ្ត ឲ្យបានត្រឹមត្រូវ ត្រូវ រៀនសូត្រអំពីមេរៀនជាប្រវត្តិសាស្រ្តទាំងឡាយ ដើម្បីបន្តកសាង និងការពារជាតិយើងតទៅមុខទៀត ឲ្យរុងរឿង ស្ថិតសេ្ថរគង់វង្ស ដោយជៀសឲ្យផុតពីការកើតមានជាថ្មីនូវសោកនាដកម្ម និងគ្រោះមហន្តរាយ ដូចដែលប្រជាជាតិយើងធ្លាប់បានឆ្លងកាត់ ហើយមិនធ្លាក់ទៅក្នុងឧបាយកលរបស់សមាសភាពអាក្រក់ និងមជ្ឈដ្ឋានអគតិណាដែលចង់សម្រេចនូវមហិច្ឆតារបស់ខ្លួននោះ។
                                                       
រយៈពេល ៣៧ឆ្នាំ ក្រោយការផ្តួលរំលំរបប ប៉ុល ពត ស្មារតី ៧ មករា នៅតែស្ថិតស្ថេរជានិច្ច ក្នុងដួងចិត្តរបស់ប្រជាជនកម្ពុជា ជាប្រទីបបំភ្លឺផ្លូវ ដែលបាននាំកម្ពុជា ឈានពីជ័យជម្នះមួយ ទៅជ័យជម្នះមួយទៀត ឥតឈប់ឈរ។ ៧ មករា គឺជាមោទនភាព ដ៏ថ្លៃថ្លាបំផុតរបស់ប្រជាជនកម្ពុជាទាំងអស់គ្នា។មានតែអ្នកស្រឡាញ់របបប្រល័យពូជសាសន៍ ប៉ុល ពត ប៉ុណ្ណោះ ដែលប្រឆាំងនឹង ថ្ងៃ ៧ មករា។
                         
ប្រជាជនកម្ពុជា នាពេលបច្ចុប្បន្ន កំពុងរស់នៅប្រកបដោយសុទិដ្ឋិនិយមជា មួយក្តីសោមនស្សរីករាយក្រៃលែងចំពោះសមិទ្ធផល ដែលបានកើតឡើងជាបន្តបន្ទាប់ក្រោយថ្ងៃរំដោះ ៧ មករា។ ខឿនឯករាជ្យអធិប តេយ្យ បូរណភាពទឹកដី និងសន្តិភាព ត្រូវបានការពារគត់មត់ ស្ថិរភាពនយោបាយ សន្តិសុខ និងសណ្តាប់ធ្នាប់សង្គមមានភាពល្អប្រសើរទោះបីជាមានការរំខានពីសកម្មភាពនយោបាយខ្លះក្តី៕
អត្ថបទៈ តាំង ករុណា

សម្ដេចតេជោ ហ៊ុន សែន ផ្ញើសាររំលឹកខួបលើកពី ៣៧ នៃថ្ងៃរំដោះ៧ មករា ១៩៧៩-៧ មករា ២០១៦ជូនពលរដ្ឋកម្ពុជា

យោងតា​មទំព័រហ្វេសប៊ុករ​បស់សម្ដេចតេជោ ហ៊ុន សែន ដែលមាន​ឈ្មោះថា Samdech  Hun Sen, Cambodian Prime Minister ចុះផ្សាយថ្ងៃ​ទី០៦ ខែមករា ឆ្នាំ២០១៦នេះ បានបង្ហោះ​នូវខ្លឹមសាររំលឹកខួប​លើកពី ៣៧ នៃថ្ងៃរំដោះ៧ មករា ១៩៧៩-៧ មករា ២០១៦ដែល សម្តេច​បានសរសេរថា« បងប្អូនជនរួម​ជាតិជាទីគោរព​ស្រឡាញ់! ថ្ងៃស្អែក​ជាខួបលើក​ពី ៣៧ នៃថ្ងៃរំដោះ​៧ មករា ១៩៧៩-៧ មករា ២០១៦ ជាថ្ងៃដែល​ប្រជាជនកម្ពុជាទូទាំង​ប្រទេសបាន​រួចចាក​ផុតពីរបបប្រល័យ​ពូជសាសន៍ប៉ុល ពត។ បើទោះជារូប​ខ្ញុំជាតួអង្គមួយ​រូបក្នុងចំណោម​តួអង្គសំខាន់ៗ​ដែលនាំមក​នូវជ័យជំនះនេះ​ក៏ដោយ ក៏ខ្ញំនៅតែ​និយាយថា បើគ្មាន​ថ្ងៃ ៧ មករា១៩៧៩ ទេគឺគ្មានអ្វីៗ​ទាំងអស់នៅ​ពេលនេះ។ គ្មាន ៧មករា គ្មានជីវិត គ្មានវេទិការចរចា​ស្វែងរកសន្តិភាព សីហនុ-ហ៊ុន សែន ហើយ​ក៏គ្មាន​កិច្ចព្រមព្រៀង​ប៉ារីស ដែរ។ បើ ហ៊ុន សែន ស្លាប់បាត់​ទៅហើយ តើបានអ្នក​ណាទៅចរចានិង​ចុះហត្ថលេខា​ទៀត? នេះជាសច្ច:ភាព​នៃប្រវត្តិសាស្ត្រ។ សិទ្ធិមនុស្សត្រូវចាប់​ផ្តើមពីសិទ្ធិរស់រាន​មានជីវិត​សិន។ បើមនុស្សស្លាប់​បាត់ទៅហើយ តើឱ្យខ្មោច​មកបង្កើតបក្ស​នយោបាយ ឬសមាគម ឬសារព័ត៍​មាន…។ល។ ម៉្តេចបាន?។ សូម្បីតែចំនួន​ប្រជាជន គឺទាល់តែម៉ែ ឪនៅរស់ទើប​អាចបង្កើតកូន​បាន។ ចំនួនប្រជាជន​ឆ្នាំ១៩៧៩ មានប្រមាណ​៥លាននាក់ ពេលនេះមាន​ប្រមាណ១៥ លាន​នាក់។ ការកើនឡើង​នេះក៏មានមូលដ្ឋានពី​ថ្ងៃ ៧ មករា ១៩៧៩ មកដែរ»។

ស​ម្តេចក៏បានសរ​សេរបន្ថែមទៀតថា «វិលមកគ្រួសារខ្ញុំវិញ បន្ទាប់ពីឆ្លងកាត់​ឈាម និងទឹកភ្នែក យើងបានចូលរួម​ជាមួយប្រជាជន​កម្ពុជាទូទាំងប្រទេស​ដើម្បីការពារ និងកសាង​ប្រទេស​ឡើងវិញ និងកសាងគ្រួសារមួយដែល​សម្បូណ៍ដោយ​ចៅ។ ថ្ងៃ ៥ មករា ជាខួប៤០ ឆ្នាំនៃការ​រៀបការរបស់​ខ្ញុំ និង ភរិយា។ យើងមិនបានរៀបចំ​ពិធីអ្វីទេ តែកូនៗរបស់ខ្ញុំ​បានរៀបចំ​ឱ្យមានការជួប​ជុំចៅៗក្នុងឯក​សណ្ឋានកីឡា ហើយសុំឱ្យ​ខ្ញុំស្លៀកពាក់​ជាកីឡាករ ដើម្បីលេង​កីឡា និងថតរូបជាមួយ​ចៅៗទុកជា​អនុស្សាវរីយ៍។ ពិតជាកូន​មួយតៅ ចៅមួយថាំងមែន ទោះមានកិច្ច​ការច្រើនយ៉ាងណា ក៏ត្រូវធ្វើតាម​សំណូមពរកូនៗនិងចៅៗដែរ។នេះជាជីវិតនៃ​គ្រួសារខ្ញុំដែ​លការជួបជុំជា​មួយកូនៗចៅៗក្នុងស្ថានភាព​សាមញ្ញនេះអាចផ្តល់​នូវមនោសញ្ចេតនា​ដ៏ជ្រាលជ្រៅមួយ​
សំរាប់​ពួកគេ។ នេះជាវិធីមួយ​ក្នុងចំណោម​វិធីអប់រំកូន និងចៅឱ្យ​ស្ថិតនៅក្នុងភា​ពសាមញ្ញ​មួយដែល​មនុស្សភាគ​ច្រើនត្រូវ​ការ»៕