សម្តេចតេជោ​នាយករដ្ឋមន្រ្តី - ជួបសន្ទនាជា​មួយឯកឧត្តម បាន គីមូន និងពិធីពិសារអាហារ​ពេលល្ងាចនៃ​មេដឹកនាំអាស៊ាន

ឯកឧត្តម បាន គីមមូន អគ្គលេខាធិការអង្គការសហប្រជាជាតិ និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានពិភាក្សាគ្នាយ៉ាងយកចិត្តទុកដាក់ ក្នុងការធ្វើទំនាក់​ទំនង​រវាងអង្គការសហប្រជាជាតិ និងព្រះរាជាណាចក្រកម្ពុជា បញ្ហាតំបន់ និងអន្តរជាតិ ដែលមានការយក​ចិត្តទុក​ដាក់​ដូចគ្នា។ ក្នុងជំនួបដែលធ្វើឡើង កាលពីព្រលប់ថ្ងៃទី៦កញ្ញា នៅទីក្រុងវៀងច័ន្ទ ជាទីដែលមេដឹកនាំ​ទាំងពីរ​អញ្ជើញចូលរួមកិច្ចប្រជុំកំពូលអាស៊ានលើកទី២៨-២៩ និងកិច្ចប្រជុំកំពូលពាក់ព័ន្ធនានា របស់អាស៊ាន ឯកឧត្តម បាន គីមមូន មានប្រ​សាសន៍ដោយសេចក្តីសោមនស្សរីករាយ ដោយបានជួបសាជាថ្មីម្តងទៀត ជាមួយ ​សម្តេចតេជោនាយករដ្ឋមន្រ្តី បន្ទាប់ពីមេដឹកនាំទាំងពីរបានជួបពិភាក្សាជាច្រើន​លើកច្រើន​សារ​រួចមក​នោះ។ ក្នុងជំនួបពិភាក្សាគ្នានេះមេដឹកនាំទាំងពីរ បានធ្វើការពិភាក្សាគ្នាយ៉ាងស៊ីជម្រៅ​ទាក់ទិនទៅនិងតុលាការ​កាត់ទោសមេដឹកនាំខ្មែរក្រហម ក្នុងនោះឯកឧត្តមអគ្គ​លេខាធិការអង្គការសហប្រជាជាតិ បានស្នើឲ្យរាជរដ្ឋា​ភិបាល​កម្ពុជាបន្តការគាំទ្រដល់ការចំណាយ លើប្រតិបត្តិការ របស់សាលាក្តីនោះជាបន្តទៅទៀត។ ជាមួយគ្នា​ នេះ​ ឯកឧត្តមក៏បានថ្លែងនូវការកោតសរសើរ ចំពោះកងទ័ពមួកខៀវកម្ពុជា ដែលបានចូលរួម​ក្នុងប្រតិបត្តិការ​មនុស្សធម៌ និងសកម្មភាពបោសសំអាតគ្រាប់មីន និងយុទ្ធមិនទាន់ផ្ទុះក្រោម ឆ័ក្ររបស់អង្គការ​សហប្រជា​ជាតិ។

ក្នុងជំនួបពិភាក្សាគ្នានេះដែរ ឯកឧត្តមអគ្គលេខាធិការអង្គការសហប្រជាជាតិ បានស្នើដល់ សម្តេចតេជោ​នាយក​រដ្ឋមន្រ្តី ពីការគាំទ្រដល់អង្គការសហប្រជាជាតិ លើអនុសញ្ញានៃការ​បម្រែបម្រួល​អាកាស​ធាតុ ដើម្បីឲ្យ​អនុសញ្ញានោះចូលជាធរមាន។ សម្តេចតេជោនាយករដ្ឋមន្រ្តី បានគាំទ្រទៅ និងការស្នើឲ្យកម្ពុជាធ្វើការ​គាំទ្រ​ដល់អនុសញ្ញានៃការបម្រែបម្រួលអាកាសធាតុ របស់អង្គការសហប្រជាជាតិ ដោយបានគូសបញ្ជាក់ថា នៅពេល​ដែលរដ្ឋសភាកម្ពុជា ចូលរួមបើកសម័យកាលនៃកិច្ចប្រជុំជាថ្មី បន្ទាប់ពីការឈប់​សម្រាក់​នោះ រាជរដ្ឋាភិបាល​កម្ពុជា និងដាក់សំណើរនោះទៅសម័យពេញអង្គសភា ធ្វើការពិភាក្សាអនុម័ត ដើម្បីកម្ពុជា​ផ្តល់សច្ចាប័នលើអនុសញ្ញាប័ននោះ។ សម្តេចតេជោនាយករដ្ឋមន្រ្តី មានប្រសាសន៍សង្កត់ធ្ងន់ថា សម្តេច​និង​ចាត់​ឲ្យ ឯកឧត្តមទេសរដ្ឋមន្រ្តី ប្រាក់ សុខុន ទៅ​ធ្វើសេចក្តីថ្លែងការណ៍តំណាងសម្តេច ក្នុងសម័យ​ប្រជុំ​របស់​អង្គកា​រសហប្រជាជាតិ នាបំណាច់ខែកញ្ញានេះ ក្នុងការ​ប្រកាសគាំទ្រដល់អនុសញ្ញា ដ៏មានសារៈសំខាន់នោះ ឲ្យបានហើយរួចរាល់ នៅមុនបំណាច់ឆ្នាំ២០១៦នេះ។ ឯកឧត្តមអគ្គលេខាធិការអង្គការសហប្រជាជាតិ បានថ្លែងនូវអំណរគុណជូនចំពោះ សម្តេចតេជោនាយករដ្ឋមន្រ្តី ដែលបានខិត​ខំសហការយ៉ាងពេញទំហឹង ក្នុងការធ្វើឲ្យសម្រេចបាននូវអនុសញ្ញាស្តីពីបម្រែបម្រួលអាកាសធាតុ ដែលជាបំណង​ប្រាថ្នារួមរបស់​ពិភព​លោកទាំងមូល។

បន្ទាប់មកនៅរាត្រីថ្ងៃទី៦កញ្ញា ឯកឧត្តមបណ្ឌិត ថងលូន ស៊ីសូលីត នាយករដ្ឋមន្រ្តីនៃសាធារណរដ្ឋប្រជាធិប តេយ្យ​ប្រជាមានិតឡាវ និងជាប្រធានកិច្ចប្រជុំកំពូលអាស៊ានលើកទី២៨-២៩ និងលោកជំទាវ បានប្រារព្ធ​រៀបចំពិធីលាងសាយភោជន៍ ជាមហាកិត្តិយសដ៏ខ្ពង់ខ្ពស់បំផុត ថ្វាយនិងជូនព្រះករុណាស៊ុលតង សម្តេច ឯកឧត្តម លោកជំទាវ ប្រមុខរដ្ឋ ប្រមុខរដ្ឋាភិបាលអាស៊ានទាំង១០ប្រទេស រួមទាំងអគ្គលេខាធិការអាស៊ាន ដែលបានអញ្ជើញចូលរួមក្នុងកិច្ចប្រជុំកំពូលអាស៊ានលើកទី២៨-២៩ និងកិច្ចប្រជុំកំពូលពាក់ព័ន្ធនានា នៅទី​ក្រុង​វៀងច័ន្ទប្រទេសឡាវ។ ពិធីដ៏មានអត្ថន័យនោះ ក៏មានការអញ្ជើញចូលរួមពីឥស្សរជនជាន់ខ្ពស់ នៃបណ្តា​ប្រទេសជាសមាជិកអាស៊ានជាច្រើនរូប។

ថ្លែងសុន្ទរកថា ក្នុងពិធីលាងសាយភោជន៍នោះ ឯកឧត្តមបណ្ឌិត ថងលូន ស៊ីសូលីត នាយករដ្ឋមន្រ្តីនៃ​សាធា​រណ​រដ្ឋ​ប្រជាធិបតេយ្យប្រជាមានិតឡាវ និងជាប្រធានកិច្ចប្រជុំកំពូលអាស៊ានលើកទី២៨-២៩ មានប្រសាសន៍​ក្នុងនាមរដ្ឋាភិបាល និងប្រជាជនឡាវថា ឯកឧត្តមពិតជាមានកិត្តិយសខ្លាំងណាស់ ក្នុងការជួបប្រាស្រ័យ​ទាក់ទង​ដោយជិតស្និតបំផុត ជាមួយបណ្តាមេដឹកនាំអាស៊ានទាំងអស់ ដើម្បីធ្វើការពិភាក្សា​ទៅលើបញ្ហា​ជាច្រើនសម្រាប់បម្រើឲ្យផលប្រយោជន៍របស់តំបន់នៃយើងទាំងមូល។ ឯកឧត្តមមានប្រសាសន៍ដែរថា នៅក្នុង​រយៈពេល៤ថ្ងៃ នៃកិច្ចប្រជុំកំពូលរបស់យើង យើងនឹងបន្តធ្វើការពិភាក្សាកាន់តែមានជិតស្និតជាមួយដៃគូតំបន់ និងក្រៅតំបន់ ដើម្បីបង្កើនកិច្ចសហប្រតិបត្តិការ និងការជួយគ្នាទៅវិញទៅមក៕

ពិធីចុះហត្ថ​លេខាលើសេចក្តី​ថ្លែងការអាស៊ាន - មេដឹកនាំអាស៊ាន​ជួបសន្ទនា​ជាមួយ អន្តរសភា​អាស៊ាន យុវជន​អាស៊ាន ក្រុមប្រឹក្សា​ផ្តល់យោបល់​ធុរកិច្ចអាស៊ាន និងពិ​ធីលាងសាយ​ភោជន៍ដល់មេ​ដឹកនាំ​អាស៊ាន

បន្ទាប់ពីបញ្ចប់កិច្ចប្រជុំកំពូលអាស៊ានលើកទី២៨-២៩រួចមក មេដឹកនាំនៃបណ្តាប្រទេសអាស៊ាន​ទាំង១០ ប្រទេសអញ្ជើញចុះហត្ថលេខាលើសេចក្តីថ្លែងការណ៍ អាស៊ានស្តីពីអាស៊ានមួយ ការឆ្លើយ​តប​មួយ ការឆ្លើយតបរបស់​អាស៊ានមួយ ទៅនឹងគ្រោះមហន្តរាយនៅក្នុងតំបន់ និង ក្រៅតំបន់។ ជាមួយ​និងពិធីចុះហត្ថលេខានោះ ទទួលបាននូវ អំណរសាទរ ពីសំណាក់មេដឹកនាំ អាស៊ាន​ទាំងអស់ ដែលបានខិតខំរួមគ្នាក្នុងរយៈពេលកន្លងមក ក្នុងការសម្រេចបាន​នូវចក្ខុវិស័យ​របស់​អាស៊ាន ដើម្បីឆ្លើយតបឲ្យបានទាន់ពេលវេលាក្នុងការទប់ស្កាត់ និងសង្រោ្គះ​ឲ្យបាន​យ៉ាង​ឆាប់​រហ័ស ទៅ​និង​គ្រោះមហន្តរាយនៅក្នុងតំបន់ និងក្រៅតំបន់ ដែលមេដឹកនាំនៃប្រទេសអាស៊ាន និង​បណ្តាមេដឹកនាំនានាលើពិភពលោកកំពុងយកចិត្តទុកដាក់ដូចគ្នា។

បន្ទាប់ពីបានបញ្ចប់ពិធីចុះហត្ថលេខាលើសេចក្តីថ្លែងការណ៍អាស៊ាន ស្តីពីការឆ្លើយតបមួយ ការ​ឆ្លើយ​តបរបស់​អាស៊ានមួយ ទៅនឹងគ្រោះមហន្តរាយនៅក្នុងតំបន់ និងក្រៅតំបន់រួចមក មេដឹកនាំ​នៃ​ប្រទេសអាស៊ានទាំងអស់ បានអញ្ជើញជួបសន្ទនាដាច់ដោយឡែកៗពីគ្នាជាមួយ ប្រតិភូ​តំណាង​អន្តរសភាអាស៊ាន តំណាងយុវជនអាស៊ាន និងតំ​ណាងក្រុមប្រឹក្សាភិបាល​ផ្តល់យោបល់​ធុរកិច្ច​អាស៊ាន។ នៅក្នុងកិច្ចប្រជុំកំពូលដ៏មានសារៈសំខាន់នោះ បណ្តាមេដឹក​នាំអាស៊ាន បានសំដែង​នូវការ​វាយតម្លៃខ្ពស់ និងកោតសរសើរចំពោះអន្តរសភាអាស៊ាន យុវជនអាស៊ាន និងក្រុមប្រឹ​ក្សា​ភិបាល​បាលផ្តល់យោបល់ធុរកិច្ចអាស៊ាន ដែលបានផ្តល់នូវកិច្វសហការដ៏ទូលំទូលាយ​ដល់ផ្នែក​រដ្ឋាភិបាល ក្នុងការឈានទៅសម្រេចបាននូវគោលដៅជាអាទិភាពជាច្រើន ក្នុងរយៈពេលកន្លងមក ពិសេសការឈានទៅបង្កើតសហ​គមន៍អាស៊ាន កាលពីថ្ងៃទី៣១ ខែធ្នូឆ្នាំ២០១៥ កន្លងទៅ។

ជាមួយ​គ្នានេះ​បណ្តាមេដឹកនាំអាស៊ានទាំងអស់ បានសំដែងនូវការកោតសរសើរ និងវាយតម្លៃខ្ពស់ ចំពោះ​របក​គំហើញ និងអនុសាសន៍គោលនយោបាយនានា ដែលអន្តរ​សភាអាស៊ាន យុវជន​អាស៊ាន និងក្រុមប្រឹ​ក្សាភិបាលបាលផ្តល់យោបល់ធុរកិច្ចអាស៊ាន ​បានផ្តល់ជូនមេដឹកនាំអាស៊ាន ក្នុងកា​រ​ពង្រឹង​ឧត្តមភាពប្រកួតប្រជែងរបស់អាស៊ាន ពិសេសការជម្រុញពាណិជ្ជកម្មផ្ទៃក្នុង​របស់​អាស៊ាន ក្នុងនោះរួម ទាំងអនុសាសន៍ទាំង១០ចំណុច ដែលទើបត្រូវបានលើកឡើងដោយ ក្រុមប្រឹ​ក្សា​ភិបាល​បាលផ្តល់យោបល់ធុរកិច្ច​អាស៊ាន ដើម្បីសម្រួលដល់ការធ្វើពាណិជ្ជកម្ម និងវិនិយោគក្នុង​វិស័​យ​កសិកម្ម ម្ហូបអាហារ ពាណិជ្ជកម្មអេឡិចត្រូនិចឡូជីស្ទីក សហគ្រាសមីក្រូធុនតូចនិងមធ្យម។ ជាមួយគ្នា​នេះមេដឹកនាំអាស៊ានក៏បាន គូសបញ្ជាក់ដែរថា តំបន់​អាស៊ាន​មានទស្សនៈអនាគត​ល្អ​សម្រាប់ការបន្តទាក់ទាញការវិនិយោគ ដើម្បីជំរុញកំណើនសេដ្ឋកិច្ច។ ដោយមានការយកចិត្ត ទុកដាក់​ទៅលើការធ្វើឲ្យប្រសើរឡើង និងភាពប្រទាក់ក្រឡាគ្នាសម្រាប់ស្រទាប់យុវជន បណ្តា​មេដឹក​នាំ​អាស៊ាន បានជម្រុញឲ្យយុវជននៃបណ្តាប្រទេសអាស៊ានទាំងអស់ មិនគ្រាន់តែការបង្កើន​ឲ្យមានការផ្លាស់ប្តូរដំណើរទស្សនកិច្ច​សិក្សា ក្នុងចំណោមប្រទេសជាសមាជិក​អាស៊ាន​ដូចគ្នា​នោះទេ ផ្ទុយទៅវិញគឺយើងខិតខំយ៉ាងណាជំរុញ ឲ្យមានការ​ផ្លាស់ប្តូរដំណើរទស្សនកិច្ច​ជាមួយ​យុវជននៃប្រទេសជាដៃគូសន្ទនារបស់អាស៊ាន និងបណ្តាប្រទេសក្រៅតំបន់ ដើម្បីឲ្យយុវជន​របស់យើងកាន់តែទទួលបាននូវចំណេះដឹងចំណេះធ្វើ និងការប្រាស្រ័យទាក់ទង​គ្នាក្នុងភាព​ជិតស្និទ្ធ និងមានភាពស្វាហាប់ក្នុងជីវិត។

ដោយឡែកទាក់ទិនទៅ​និងការជួបប្រាស្រ័យយ៉ាងស្និតស្នាល​រ៉ាក់ទាក់ជាមួយ និងក្រុម​ប្រឹ​ក្សា​ភិបាល​បាលផ្តល់យោបល់ធុរកិច្ចអាស៊ាន បណ្តាមេដឹកនាំអាស៊ាន​បានធ្វើការពិភាក្សាគ្នា​ដោយផ្តោត​ការ​យក​ចិត្តទុកដាក់ ទៅលើកិច្ចការជាអាទិភាពមួយចំនួន រួមមានទី១ ការលុបបំបាត់ឲ្យអស់​នូវ​របាំង​នានា ដែលមានផលប៉ះពាល់​ជាអវិជ្ជមានដល់ដំណើរការពាណិជ្ជកម្ម និងវិនិយោគ ទី២ការបន្ត​ផ្តោត​លើការសម្រួលពាណិជ្ជកម្ម និងកែលម្អបរិយា​កាសវិនិយោគនៅក្នុងតំបន់ ពិសេសតាមរយៈ​ការអនុវត្ត​ឲ្យបានពេញលេញនូវបញ្ជរតែមួយរបស់អាស៊ាន និងបញ្ជារតែ មួយរបស់​ប្រទេស​ជា​សមាជិក​អាស៊ានទី៣ ការលើកម្ពស់សេរីភាវូបនីយកម្មលើវិស័យសេវា ដូចជាវិស័យធានារ៉ាប់រង តាមរយៈការពង្រឹងកិច្ចសហប្រតិបត្តិការពាណិជ្ជកម្ម និងការវិនិយោគ និងទីការលើក​កម្ពស់​ការ​តភ្ជាប់ និងប្រព័ន្ធឡូជីស្ទីក ដើម្បីពង្រឹងភាពប្រកួតប្រជែង នៃវិស័យឧស្សាហកម្មក្នុងតំបន់ដោយ​ទាក់ទាញដៃគូពាក់ព័ន្ធទាំងអស់ចូលរួម ពោលគឺរបកគំហើញ និងអនុសាសន៍ទាំងអស់នេះ គឺពិត​ជាមានសារៈសំខាន់សម្រាប់ប្រទេសជាសមាជិកអាស៊ាន ដើម្បីឈានទៅសម្រេចបាននូវចក្ខុវិស័យ​អាស៊ានឆ្នាំ២០២៥។

នៅក្នុងកិច្ចសន្ទនាជាមួយ និងប្រតិភូអន្តរសភាអាស៊ាន តំណាងយុវជន​អាស៊ាន និងក្រុមប្រឹ​ក្សា​ភិបាលបាលផ្តល់យោបល់ធុរកិច្ចអាស៊ាន បណ្តាមេដឹកនាំអាស៊ានទាំងអស់ ក៏បានស្នើឲ្យ​មានការ​ចូលរួម​ចំណែកយ៉ាងសកម្មខ្លាំងក្លាថែមទៀត ក្នុងការផ្តល់ជាយោបល់​និង​គំនិតល្អ ដើម្បីឈាន​ទៅសម្រេចលើចក្ខុវិស័យនានារបស់អាស៊ាន ដែលជាបំណងប្រាថ្នា​របស់​ប្រជាជនអាស៊ាន​ទាំងជាង​៦២០លាននាក់ រស់នៅប្រកបដោយសុចសន្តិភាព ស្ថេរភាព វិបុលភាព និង​ការអភិវឌ្ឍរីកចម្រើន​គ្រប់ក្រុមគ្រូសារទាំងអស់ ពិសេសការរស់នៅដោយភាពសុខដុមរមនា៕     

អង្គការ​ជួស​ជុល​ប្រាសាទនៃ​រដ្ឋា​ភិបាល​ជប៉ុន​សហការ​ជា​មួយ​ អាជ្ញា​ធរ​ជាតិ​អប្សរា​ (JASA) ធ្វើ​ការ​​ជួស​ជុល​​កែ​លម្អប្រាសាទ​បាយ័ន​