ខ្មែរតែមួយ - Khmer Unity: 04/10/15

Friday, April 10, 2015

ឯកឧត្តម សម រង្ស៊ី និងលោកជំទាវ និងចូលរួមព្រឹត្តិការណ៍អង្គរសង្រ្កាន្ត នៅខេត្តសៀមរាប ជាមួយសម្តេចតេជោ ហ៊ុន សែន

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី ០៩ ខែមេសា ឆ្នាំ ២០១៥នេះ នៅមុខរដ្ឋសភាជាតិ បន្ទាប់ពីចេញពីប្រជុំសភា ដើម្បីបោះឆ្នោតជ្រើសតាំងសមាសភាព គ.ជ.ប ថ្មី បានមានប្រសាសន៍ថា តបតាមការអញ្ជើញ របស់សហភាព សហព័ន្ធយុវជនកម្ពុជា ឯកឧត្តម សម រង្ស៊ី និងលោកជំទាវ នឹងអញ្ជើញទៅចូលរួមក្នុងព្រឹត្តិការណ៍អង្គរសង្រ្កាន្ត នៅឯខេត្តសៀមរាបជាមួយ និងសម្តេចដែរ។

សម្តេចតេជោ បានលើកឡើងថា នេះជាប្រវត្តិរបស់កម្ពុជា ហើយប្រហែលជាកើតឡើងជាលើកដំបូងនៅលើទឹកដីកម្ពុជា។ សម្តេចបន្តថា ក្នុងប្រវត្តិសាស្ត្រទាំងពីអតីតកាល និងរហូតមកដល់ពេលនេះ ដែលមានគណបក្សនៅក្នុងរដ្ឋាភិបាល និងគណបក្សនៅក្រៅរដ្ឋាភិបាល ចូលរួមជាមួយគ្នាក្នុងវេទិកានៃទិវាចូលឆ្នាំរួមគ្នា។

សម្តេច បានរំលឹកថា ទិវាចូលឆ្នាំគេតែងតែ ចែកគ្នាទៅកន្លែងរៀងៗខ្លួន ប៉ុន្តែឆ្នាំនេះ ជាឆ្នាំពិសេសដែល ឯកឧត្តម សម រង្ស៊ី ក្នុងនាមជាបក្ស ក្រៅរដ្ឋាភិបាល និងសម្តេច ក្នុងនាមរាជរដ្ឋាភិបាលគឺចូលរួមជាមួយគ្នាក្នុងការបើកអង្គរសង្រ្កាន្តនៅឯទីក្រុងសៀមរាប។

ជាមួយគ្នានេះដែរ ឯកឧត្តម សម រង្ស៊ី បានលើកឡើងថា ពេលនេះយើងឈានជិតទៅដល់ចូលឆ្នាំថ្មីហើយ គឺដូចសម្តេចនាយករដ្ឋមន្ត្រី មានប្រសាសន៍អញ្ចឹង កាយវិការរបស់យើង នៅពេលនេះ គឺជាសារនយោបាយមួយជូនចំពោះជនរួមជាតិខ្មែរ ឲ្យលោកមានសេចក្តី ទុកចិត្តលើថ្នាក់ដឹកនាំប្រទេសកម្ពុជា ។ គឺថ្នាក់ដឹកនាំគ្រប់គណបក្សចេះនិយាយគ្នា ចាប់ដៃគ្នារកដំណោះស្រាយដោយសន្តិវិធី គឺខ្មែរ បានសុខ ខ្មែរឈប់ឈ្លោះគ្នា ខ្មែរខិតខំប្រើប្រាជ្ញារបស់ខ្លួនដើម្បីកសាងប្រទេសជាតិជាមួយគ្នា៕

អត្ថបទ៖ ច័ន្ទ ទេវី

ថ្នាក់ដឹកនាំជាន់ខ្ពស់គណបក្សនយោបាយទាំងពីរ គឺ សម្តេច តេជោ និងឯកឧត្តម សម រង្ស៊ី បង្ហាញការពេញចិត្តចំពោះលទ្ធផលនៃកិច្ចប្រជុំបោះឆ្នោតជ្រើសតាំងសមាសភាព គ.ជ.បថ្មី

នៅថ្ងៃទី ០៩ ខែមេសា ឆ្នាំ ២០១៥នេះ បន្ទាប់ពីបញ្ចប់កិច្ចប្រជុំសភា ដែលបានដំណើរការបោះឆ្នោតជ្រើសតាំងសមាសភាពថ្នាក់ដឹកនាំ គ.ជ.ប ថ្មី សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និង ឯកឧត្តម សម រង្ស៊ី ប្រធានគណបក្សសង្រ្គោះជាតិ បានបង្ហាញការសាទរ និងអរគុណ គណៈកម្មាធិការអចិន្ត្រៃយ៍សភា ដែលបានគាំទ្រសមាជិក គ.ជ.ប.ថ្មី ទាំងសម្តេច និងឯកឧត្តម សម រង្ស៊ី បានបញ្ជាក់ដូចគ្នាថា លទ្ធផលដែលកើតចេញនៅថ្ងៃនេះ សុទ្ធតែផ្តើមចេញពីវប្បធម៌សន្ទនា។

សម្តេចតេជោ ហ៊ុន សែន បានមានប្រសាសន៍ថា ស្មារតីសន្ទនាបានរីកដុះដាលគ្រប់ទីកន្លែង និងបន្តធ្វើដល់មូលដ្ឋាន។ “នយោបាយទឹកឡើងត្រីស៊ីស្រមោច ទឹកហោចស្រមាចស៊ីត្រី” ត្រូវបានបញ្ចប់ហើយ។ សម្តេចបន្តថា ច្បាប់បោះឆ្នោតថ្មី ពិសេសណាស់់ គឺបង្កើននូវជំនឿទុកចិត្ត សម្រាប់ការបោះឆ្នោត សង្ឃឹមថានឹងមិនមានបញ្ហាជ្រាំដែលទៀតទេ។

ជាមួយគ្នានេះដែរ ឯកឧត្តម សម រង្ស៊ី មានប្រសាសន៍បញ្ជាក់ដែរថា សូមគាំទ្រនូវប្រសាសន៍ របស់សម្តេច ហ៊ុន សែន ពេញទំហឹង។ រាល់ពាក្សពេចន៍សម្តេចហ៊ុន សែន ត្រូវចងចាំជាប្រវត្តិសាស្ត្រ ។ ឯកឧត្តម អបអរសាទរចំពោះរដ្ឋសភាជាតិ ដែលបានជ្រើសរើសសមាជិក គ.ជ.ប.ថ្មី។ ឯកឧត្តម បញ្ជាក់ថា ចាប់ពីពេលនេះតទៅ ប្រជាជនមានជំនឿលើ គ.ជ.ប. ហើយការបោះឆ្នោតទៅថ្ងៃមុខមិនមានបញ្ហាដូចមុនៗទេ។ ឯកឧត្តម ឲ្យដឹងទៀតថារាល់ការសម្រេចរបស់ គ.ជ.ប ថ្មី ត្រូវឈរលើមតិភាគច្រើនក្នុងចំណោមសមាជិកទាំង៩ ពោលគឺសំឡេងចំនួន៥។

តាមប្រសាសន៍របស់ប្រមុខរាជរដ្ឋាភិបាលកម្ពុជា សម្តេចតេជោ បានឲ្យដឹងថា សមាជិក គ.ជ.ប ទាំង៩នឹងលាលែងតំណែងពីគណបក្សនយោបាយដើម្បីធ្វើកិច្ចការនេះ។ សម្តេចបន្តថាសមាជិកទាំង៩នឹងជ្រើសរើសអគ្គលេខាធិការ និងអគ្គលេខាធិការរង គ.ជ.ប ដោយខ្លួនឯង និងគ្មានការជ្រៀតជ្រែកពីគណបក្សទាំងពីរ ។

សម្តេចបន្តថា សមាជិកគ.ជ.បថ្មីនឹងស្បថចូលកាន់តំណែនៅថ្ងៃសៅរ៍ ចុងសប្ដាហ៍នេះ ក្រោមវត្តមានសម្ដេចចៅហ្វាវាំង គង់ សំអុល និងផ្ទេរមុខតំណែងពីសមាជិកគ.ជ.ប ចាស់នៅថ្ងៃច័ន្ទ ទី១៣ ខែមេសា ឆ្នាំ២០១៥ ពោលគឺមុន ពិធីបុណ្យចូលឆ្នាំខ្មែរមួយថ្ងៃ។ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសនៅក្នុងកិច្ចប្រជុំសភាពេញអង្គ នាព្រឹក ថ្ងៃទី០៩ ខែមេសា នេះថា សមាជិក គ.ជ.ប ទាំងអស់ ចាប់ពីថ្ងៃនេះតទៅ លែងស្ថិតនៅក្រោម គណបក្សនយោបាយទៀតហើយ។ សម្តេច ក៏បានជំរុញឲ្យសមាជិក គ.ជ.ប ថ្មី ត្រូវលាលែងពីតួនាទីក្នុង អង្គការសសង្គមស៊ីវិល ដែលខ្លួនបានបំពេញការងារនាពេលកន្លងទៅ។

គួរបញ្ជាក់ថា រដ្ឋសភានៅព្រឹកថ្ងៃទី ០៩ នេះ បានបោះឆ្នោតផ្តល់សេចក្តីទុកចិត្តដល់ ឯកឧត្តម ស៊ិក ប៊ុនហុក មកពីគណបក្សប្រជាជនកម្ពុជាឲ្យក្លាយជាប្រធានគណៈកម្មាធិការជាតិរៀបចំ ការបោះឆ្នោត(គ.ជ.ប)ថ្មី និងឯកឧត្តម គួយ ប៊ុនរឿន មកពីគណបក្សសង្រ្គោះជាតិ ជាអនុប្រធាន គ.ជ.ប តាមការរៀបចំរបស់គណបក្សទាំងពីរ និង៧រូបទៀតជាសមាជិក គ.ជ.ប៕

អត្ថបទ៖ ច័ន្ទ ទេវី

សម្តេចតេជោមោទនភាពនឹងកំណើនផលិតផលកសិកម្មព្រមទាំងបន្ទោសជនបរទេសដែលដើរតួជាក្រុមប្រឹក្សាធម្មនុញ្ញ

នៅវិទ្យាស្ថានជាតិអប់រំ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាក្នុងឱកាសអញ្ជើញជាអធិបតីក្នុងពិធីបិទសន្និបាតបូកសរុបការងារកសិកម្ម រុក្ខាប្រមាញ់ និងនេសាទ ឆ្នាំ ២០១៤-២០១៥ និងទិសដៅឆ្នាំ ២០១៥-២០១៦ នារសៀលថ្ងៃទី៨ ខែមេសា ឆ្នាំ២០១៥ បានថ្លែងដោយកត់សម្គាល់ថា នៅក្នុង ២០១៤ កន្លងទៅ ទោះបីជាកម្ពុជាបានទទួលរងនូវបាតុភូតគ្រោះធម្មជាតិ ដូចជា ទឹកជំនន់ និងគ្រោះរាំងស្ងួត ដែលបានអូសបន្លាយកាលពីដើមរដូវ និងពាក់កណ្តាលរដូវវស្សាក៏ដោយ ក៏វិស័យកសិកម្មកម្ពុជារីកចម្រើនគួរឱ្យកត់សម្គាល់ ដែលក្នុងនោះ ទទួលបានផលស្រូវសរុបក្នុងបរិមាណជាង ៩,៣២លានតោន និងមានអតិរេកស្បៀងប្រមាណ ៤,៧លានតោនស្រូវ ឬ គិតជាអង្ករ សរុបមានជាង៣ លានតោន ដែលនេះគឺជាជោគជ័យមួយដ៏ធំសម្រាប់កម្ពុជា ។

សម្ដេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ក្រសួងកសិកម្ម រុក្ខាប្រមាញ់ និងនេសាទបានជំរុញផលិតកម្មកសិកម្ម លើគ្រប់មុខព្រួញ ជាពិសេសការបង្កបងើនផលដំណាំជា យុទ្ធសាស្ត្រ មានជាឤទិ៍ដំណាំកៅស៊ូ និងដំណាំឧស្សាហកម្មផ្សេងទៀត ដូចជា ពោត, ដំឡូងមី, ម្រេច, សណ្តែកសៀង, សណ្តែកបាយ, សណ្តែកដី, អំពៅ ៘ ដែលកំពុងមានសន្ទុះមួយគួរឱ្យចាប់ ឤរម្មណ៍ ។

ទោះបីយ៉ាងណាសម្តេចតេជោ មានប្រសាសន៍ទទួលស្គាល់ថា ការនាំចេញអង្ករ១លានតោនក្នុងឆ្នាំ២០១៥ មិនអាចធ្វើទៅបានទេ មូលហេតុគឺដោយសារកំរិតកែច្នៃ និងការប្រមូលទិញស្តុកទុកនៅមានកំរិត។ សម្តេចតេជោក៏បានមានប្រសាសន៍ឲ្យដឹងថា បើយោងតាមតួរលេខនៃការវិនិយោគក្នុងការកសាងរោងម៉ាស៊ីនកិនស្រូវ នៅពេលខាងមុខនេះ កម្ពុជា នឹងមានលទ្ធភាពក្នុងការផលិតអង្កររហូតដល់ ៣លានតោនសម្រាប់នាំចេញ ដែលកន្លងមកនេះ កម្ពុជាមានទីផ្សារអង្ករចំនួន ៦០ប្រទេសរួចទៅហើយ។

សម្ដេចតេជោនាយករដ្ឋមន្ត្រី បានថ្លែងកោតសរសើរចំពោះវិទ្យាស្ថានស្រាវជ្រាវ និង អភិវឌ្ឍកសិកម្មកម្ពុជានៃក្រសួងកសិកម្ម រុក្ខាប្រមាញ់ និង នេសាទ ដែលបានបញ្ចេញ នូវពូជស្រូវថ្មីៗ ចំនួនពីរពូជទៀត គឺពូជស្រូវ ផ្ការំដួលប្រាំង និងពូជស្រូវ ខា១៤ ជូនកសិករ ដាំដុះបន្ថែមលើពូជដំណើប ស្បៃមង្គល ដែលបានបញ្ចេញនាឆ្នាំ ២០១៤ កន្លងមក។

សម្ដេចតេជោមានប្រសាសន៍បញ្ជាក់ថា ការយកចិត្តទុកដាក់ ក្នុងការជំរុញការងារបង្កបងើ្កនផល, ការស្តារឡើងវិញនូវផ្ទៃដីខូចខាត ដោយគ្រោះធម្មជាតិ, ការកែសម្រួលហេដ្ឋារចនាសម្ព័ន្ធរូបវ័ន្ត និងប្រព័ន្ធធារាសាស្ត្រ, ភាពម្ចាស់ការរបស់ប្រជាកសិករលើការងារស្រែចម្ការ, ការរៀបចំសហគមន៍កសិកម្ម, ការផ្លាស់ប្តូរបច្ចេកទេស, ការផ្លាស់ប្តូរពូជស្រូវដែល មានទិន្នផលខ្ពស់ បានធ្វើឱ្យគុណភាពអង្ករកម្ពុជា ក្នុងរយៈពេលប៉ុន្មានឆ្នាំចុងក្រោយនេះ ជាពិសេសអង្ករពូជ ផ្ការំដួល នៅតែមានការទទួលស្គាល់ពីទីផ្សារអន្តរជាតិ និងបានទទួលចំណាត់ថ្នាក់ថាជាអង្ករមានរសជាតិឆ្ងាញ់លេខ ១ នៅលើពិភពលោក បីឆ្នាំជាប់ៗគ្នា ចាប់ពីឆ្នាំ ២០១២ រហូត មកដល់ឆ្នាំ ២០១៤ ។

ជាមួយនឹងការទទួលស្គាល់អំពីការរីកចម្រើនរបស់កសិករ ក្នុងការប្រើប្រាស់ម៉ាស៊ីនគោយន្តសម្រាប់ជាមធ្យោបាយបង្កបង្កើនផល សម្ដេចតេជោបានបង្ហាញក្ដីបារម្ភ ចំពោះការថយចុះ ការចិញ្ចឹមគោក្របី ជាសត្វពាហនៈ ដែលការថយចុះនេះ ក៏នាំ ទៅដល់ការបាត់បង់ជីធម្មជាតិផងដែរ។ ជាថ្មីម្ដងទៀត សម្ដេចតេជោ លើកទឹកចិត្តនិង សង្ឃឹមថា កសិករនឹងបន្តការចិញ្ចឹម គោក្របី តទៅទៀត បើទោះបីបច្ចុប្បន្ន កសិករបានបង្វែរការភ្ជួររាស់ និងដឹកជញ្ជូនកសិផល មកប្រើគោយន្ត ហើយក៏ដោយ ។

ទាក់ទិននឹងការងារការពារព្រៃឈើ សម្ដេចតេជោបានមានប្រសាសន៍រំលឹកជាថ្មីទៀតថា បញ្ហាព្រៃឈើជា បញ្ហាធ្ងន់ធ្ងរ ហើយកុំឱ្យឆ្លើយដាក់គ្នា ដោយអំណាចបានប្រគល់ឱ្យថ្នាក់ក្រោមជាតិ ថ្នាក់ខេត្តអស់ហើយ សំខាន់អស់លោកធ្វើឬមិនធ្វើតែប៉ុណ្ណោះ។ បន្ថែមពីនេះបញ្ហាព្រៃ សម្បទាន សម្តេចបានលើកទឹកចិត្តដោះស្រាយឱ្យបានច្បាស់លាស់ ហើយសុំកុំឆ្លើយដាក់គ្នា ហើយកំលាំងប្រដាប់អាវុធត្រូវជួយគាំទ្រ តែមិនត្រូវទៅជួយកាប់ឈើទេ។ សម្តេចតេជោបានណែនាំថា សូមក្រោកឡើង ឱ្យវាឌីណាមិច បានន័យថាឱ្យរហ័សរហួន ដោយធ្វើការជាក្រុម ដោយពុំចាំបាច់អនុសាសន៏សម្តេចទៀតនោះទេ ធ្វើដោយផ្អែកលើច្បាប់ លើអនុត្រិត្យ ហើយសូមកុំឆ្លើយដាក់គ្នាចាប់ពីពេលនេះតទៅ។

ថ្លែងទៅនឹងរឿងនយោបាយ សម្តេចបានបញ្ជាក់ថា សភាពការណ៏នយោបាយខ្មែរ បានឈានដល់ផ្ដាច់ព្រ័ត្រនៅថ្ងៃស្អែកនេះ(ទី៩មេសា)ហើយ ដោយការឯកភាពគ្នារវាង បក្សនយោបាយទាំងពីរ ។

សម្តេចតេជោមានប្រសាសន៍ឲ្យដឹងថា ទី១យើងសម្រេច ការងារនេះមុនផែនការលើកំណែទម្រង់ការបោះឆ្នោត ហើយទី២យើងទុកពេល វេលាវែងឱ្យទៅចូលឆ្នាំ។ តាមគម្រោងការបោះឆ្នោតរើស គជប គឺនៅថ្ងៃទី១៣ ខែមេសា ប៉ុន្តែដោយការស្រុះស្រួលគ្នារវាងគណបក្ស ប្រជាជន កម្ពុជា និងគណ បក្សសង្គ្រោះជាតិ ហើយការជួបគ្នារវាងឯកឧត្តម ស ខេង និងឯកឧត្តម សម រង្ស៊ី កាលពីថ្ងៃទី០៦ ខែមេសា និងការជួបគ្នារវាងខ្ញុំជាមួយឯកឧត្តម សម រង្ស៊ី កាល ពីថ្ងៃទី០៧ ខែមេសា និងការជួបគ្នារវាងឯកឧត្តម ស ខេង និងឯកឧត្តម សម រង្ស៊ី នៅល្ងាចថ្ងៃនេះ ដើម្បីផ្គូផ្គងបញ្ជី ដែលបានត្រូវរ៉ូវគ្នាអស់ហើយ។ នៅថ្ងៃស្អែក នេះ រដ្ឋសភាមិនមែនបោះឆ្នោតរើសមាជិកម្នាក់ៗនោះទេ គឺបោះឆ្នោតទុកចិត្តលើ បញ្ជីទាំងមូលតែម្តង ។

សម្តេចតេជោនាយករដ្ឋមន្ត្រីមានប្រសាសន៍ថា យើងបានឯកភាពគ្នាអស់ហើយ ដែលនេះជាស្មារតីសន្ទនា ដែលបង្កើតឡើងដោយកម្ពុជាខ្លួនឯង។ នៅពេលជួបជាមួយឯកឧត្តម សម រង្ស៊ី ខ្ញុំបាននិយាយថា ឯកឧត្តមខ្មែរយើងចេះទាស់គ្នា ខ្មែរ យើងក៏ចេះនិយាយគ្នាដែរ ហើយនៅក្នុងព្រះរាជសារ ព្រះមហាក្សត្រជាទីសក្ការៈ ដ៏ខ្ពង់ខ្ពស់បំផុត ព្រះអង្គបានមានព្រះរាជបន្ទូលថា ខ្មែរយើងមានលទ្ធភាពដោះ ស្រាយបញ្ហា តាមរយៈការសន្ទនាខាងនយោបាយ ។

ដោយបានសម្តែងនូវការសោកស្តាយចំពោះការលើកឡើង មិនថា ជននោះជាខ្មែរ ឬជាជនជាតិបរទេសទេ ដែលបាននិយាយថា ច្បាប់ថ្មីនេះ (ច្បាប់ស្តីពីការបង្កើតជាតិរៀបចំការបោះឆ្នោត) មិនស្របនឹងរដ្ឋធម្មនុញ្ញ សម្តេចមានប្រសាសន៍ថា ខ្ញុំគ្រាន់តែបញ្ជាក់អស់ លោកទាំងឡាយឱ្យបានជ្រាបថា មិនថាខ្មែរឬជនជាតិបរទេសទេ គ្មានសិទ្ធិនឹង បកស្រាយទេ បើសិនជាវាផ្ទុយនឹងរដ្ឋធម្មនុញ្ញ ប្រហែលជាក្រុមប្រឹក្សាធម្មនុញ្ញ របស់កម្ពុជា ទាត់ចោលច្បាប់នេះរួចស្រេចទៅហើយ។ ស្ថាប័នខ្មែរមិនល្ងង់រហូត ទៅឱ្យជនបរទេស ឬបុគ្គលរូបវ័ន្តណាមួយមកធ្វើការបកស្រាយច្បាប់ កុំថា ឡើយ រូបវ័ន្តបុគ្គល នីតិបុគ្គលក៏អត់មានសិទ្ធិជំនួសឱ្យក្រុមប្រឹក្សាធម្មនុញ្ញទេ។ ខ្ញុំសុំឯកឧត្តមអស់លោក និងប្រជាពលរដ្ឋយល់ឱ្យបាន ព្រោះយើងត្រូវមានការយល់ដឹង មួយច្បាស់អំពីសិទ្ធិអំណាចនៃស្ថាប័ន ។

សម្តេចតេជោថ្លែងថា បើច្បាប់ខុសរដ្ឋធម្មនុញ្ញតើក្រុមប្រឹក្សាធម្មនុញ្ញទុកធ្វើអ្វី ហើយព្រះមហាក្សត្រឡាយព្រះហស្តលេខាធ្វើអ្វី ? នេះជាការ ប្រមាថធ្ងន់ធ្ងរ លើអធិបតេយ្យ និងលើសិទ្ធិអំណាចរបស់ស្ថាប័នធម្មនុញ្ញ ហើយកាន់តែមើល ស្រាលចំពោះគណបក្សទាំងពីរដែលមានអាសនៈ នៅក្នុងសភា ក្នុងឋានៈជាតំ ណាងឱ្យប្រជាជាតិខ្មែរ ដែលរួមគ្នាធ្វើច្បាប់នេះ ហើយជាការប្រមាថមើលងាយ ចំពោះស្ថាប័នសភា និងព្រឹទ្ធសភា ក្រុមប្រឹក្សាធម្មនុញ្ញ និងព្រះមហាក្សត្រដែល ឡាយព្រះហស្តលេខា ។

សម្តេចតេជោ ហ៊ុន សែន មានប្រសាសន៍ថា ខ្ញុំគ្រាន់តែចង់ដាស់តឿន ដើម្បីឱ្យមានការយល់គ្នា ហើយឱ្យគោរពកាតព្វកិច្ច ក្នុងឋានៈជាជន ជាតិខ្មែរឬ ជនជាតិបរទេស។ ទោះបីខ្ញុំជានាយករដ្ឋមន្ត្រី ក៏ខ្ញុំអត់មានសិទ្ធិបកស្រាយច្បាប់ ជំនួសឱ្យក្រុមប្រឹក្សាធម្មនុញ្ញទេ មានរឿងដែល មិនច្បាស់ ត្រូវសួរទៅក្រុមប្រឹក្សា ធម្មនុញ្ញឱ្យគេបកស្រាយ ។ ប៉ុន្តែជាការគួរឱ្យសោកស្តាយអត្ថាធិប្បាយខ្លះត្រូវ បានបន្លឺនៅទីនេះ នៅទីនោះថា ច្បាប់នេះមិនស្របនឹងរដ្ឋធម្មនុញ្ញទេ។ ខ្លួនឯងជាបុគ្គលម្នាក់ ហើយជួនកាលជាជនជាតិបរទេសទៅទៀត បែរជាមានសិទ្ធិប្រើពាក្យនេះ។ តើអនុ សញ្ញាក្រុងយែនវានៅកន្លែងណា ដែលជនជាតិបរទេសមក ហ៊ានជ្រៀតជ្រែកថាច្បាប់នេះត្រូវ ច្បាប់នេះខុស សូម្បីតែស្ថាប័នជាតិរបស់ខ្មែរ ក៏គ្មានសិទ្ធិទៅលើការបកស្រាយច្បាប់ណាមួយជំនួសឱ្យក្រុមប្រឹក្សាធម្មនុញ្ញនេះ៕

បទវិចារណកថា ដោយ៖ រត្ន័ សណ្ដាប់, ទេវតាឆ្នាំថ្មី នឹងបន្ដប្រោះព្រំពរជ័យដល់ប្រជាជនខ្មែរ!

នៅ ថ្ងៃទី១៤,១៥ និងទី១៦ ខែមេសា ខាងមុខនេះ ថ្នាក់ដឹកនំារាជរដ្ឋាភិបាល គណបក្សនយោបាយនានា ប្រជាជនខ្មែរ រួមទំាងកងកម្លំាងប្រដាប់អាវុធទូទំាងប្រទេស នឹងប្រារព្វធ្វើបុណ្យប្រពៃណីជាតិ «ចូលឆ្នាំខ្មែរ»។ គេគ្រប់គ្នាកំពុងត្រៀមជាបណ្ដើរៗ កំពុងសញ្ជឹងគិត ថាតើអាត្មាអញបានធ្វើអ្វីខ្លះ នាពេលកន្លងមក? តើអាត្មាអញបានធ្វើអ្វីខ្លះក្នុងដែលរៀបនឹងកន្លងផុតទៅ ដែលជាសកម្មភាពនំាសេចក្ដីរីករាយ សេចក្ដីសុខសប្បាយ និងការអភិវឌ្ឍជូនស្រុកទេសនោះ? ទន្ទឹមនឹងនេះ គេគ្រប់គ្នាក៏បានត្រៀមខ្លួនបួងសួងដល់ទេវតាឆ្នាំ ថ្មី ដើម្បីជួយជីវិតពួកគេ ដើម្បីបន្ថែមនូវថាមពលដល់ពួកគេ ឲ្យនៅតែមានលទ្ធភាពបន្ដការរស់ នៅរឹតតែប្រសើរជាង ឆ្នាំចាស់ទៀត។

ក្នុងន័យនេះ រាជរដ្ឋាភិបាលដែលមានលោកនាយករដ្ឋមន្រ្ដី ហ៊ុន សែន ជាមគ្គុទេសក៍ ក៏កំពុងខិតខំបូកបញ្ជីរបស់លោក «ថាតើអាត្មាអញបានធ្វើអ្វីខ្លះជូនប្រជាជនខ្មែរ»? តើអាត្មាអញបានដឹកនំាស្រុកទេសដើម្បីបន្ដការអភិវឌ្ឈ បន្តលើកកម្ពស់ជីវភាពប្រជាជន នឹងសេដ្ឋកិច្ចប្រទេសជាតិនៅឆ្នាំខាងមុខនេះ បែបណា។

ទោះជាយ៉ាងក៏ដោយ យើងយល់ថា ប្រជាជនទូទៅទូទំាងប្រទេសមានជំនឿយ៉ាងមុខមំាថា ប្រមុខរាជរដ្ឋាភិបាលក៏នឹងបួងសួងដល់ទេវតាឆ្នាំថ្មី សូមផ្តល់នូវថាមពលដល់លោក ដើម្បីបន្ដការងារដឹកនំាប្រទេសជាតិនៅឆ្នាំខាងមុខ ឲ្យបានតែចំរើនឡើង។

ខ្ញុំ ជាអ្នកនិពន្ធ នាពេលនេះ មិនចង់រំឭកនូវអ្វីដែលជាអវិជ្ជមាន និង ទុទិដ្ឋិនិយមនោះទេ ព្រោះថា អ្វីដែលគេគិតថាជាអវិជ្ជមាននោះ គេត្រូវបោះបង់ចោលឲ្យផុតពីឆ្នាំចាស់។ គេគួររំឭកនូវអ្វីដែលមានភាពជាវិជ្ជមាន ត្រូវមានគំនិត សុទិដ្ឋិនិយម ប្រទេសកម្ពុជាដែលបច្ចុប្បន្ន មានមុខមាត់នៅក្នុងតំបន់ និងនៅលើឆាកអន្ដរជាតិនោះគឺ យ៉ាងហោចណាស់មានកត្តាដូចខាងក្រោម ៖

ទី១) ប្រទេសត្រូវបានគេទទួលស្គាល់គ្រប់ទិសទី។ សុខសន្ដិភាពដែលប្រជាពលរដ្ឋ និងប្រទេសជាតិទទួលបាន ញុំាងឲ្យអ្នកដឹកនំាប្រទេសទូទំាងពិភពលោក មកបំពេញទស្សនកិច្ចនៅ កម្ពុជា ដោយពុំមានភាពញញើតញញើម ដូចកាលពីទសវត្សរ៍មុនៗនោះទេ។ កំណើនទេសចរណ៍ និងប្រាក់ចំណូលវិស័យទេសចរណ៍រាប់ពាន់លានដុល្លារអាមេរិកជារៀង រាល់ឆ្នាំ បានជាចំណែកមួយនៃការលើកកម្ពស់ជីវភាពប្រជាជន និងការលើកកម្ពស់កំណើនសេដ្ឋកិច្ចជាតិ។

ទី២) បរិស្ថានសុខសន្ដិភាព និងមាគ៌ានយោបាយរបស់រាជរដ្ឋាភិបាល បានទាក់ទាញអ្នកវិនិយោគទុន ក្រុមហ៊ុនឧស្សាហកម្មតូចធំ មកវិនិយោគនៅកម្ពុជា រីឯអ្នកកំពុងធ្វើវិនិយោគក៏បង្កើនទុនរបស់ខ្លួនដែរ។ កត្ដានេះបានញុំាងដល់ការផ្ដល់លទ្ធភាពដល់យុវជន ឲ្យមានការធ្វើ ដែលអាចសន្សំនូវប្រាក់កំរ៉ៃដែលខ្លួនទទួលបាន ផ្ញើទៅក្រុមគ្រួសារ របស់ខ្លួននៅស្រុក មានចំនួនរាប់ម៉ីនគ្រួសារ ញុំាងឲ្យជីវភាពពួក គេធំធាត់ជាងកាលពីមុន។ ម្យ៉ាងទៀត ក៏ជាកត្ដាចម្បងមួយអាចឲ្យវិស័យនេះ ក្លាយជាប្រភពចំណូលសេដ្ឋកិច្ចក្នុងប្រទេស តាមរយៈការនំាចេញផលិតផល ទំាងនេះទៅក្រៅប្រទេសនានាលើពិភពលោក ផងដែរ។

ទី៣) នយោបាយបើកទូលាយរបស់រាជរដ្ឋាភិបាល ក្នុងការសម្របសម្រួលជាមួយ ប្រទេសអ្នកត្រូវការ គួបផ្សំនឹងតម្រូវការរកការងារធ្វើរបស់ប្រជាជនខ្មែរ ទំាងចាស់ទំាង ក្មេង ពិសេសយុវជនដែលអាចធ្វើសំណាកស្រុក សំណាកប្រទេស ដូចជាទៅប្រទេសថៃ មាទ្បេស៊ី សិង្ហបុរី កូរ៉េ ជាដើម មានចំនួនរាប់សែននាក់។ លទ្ធផលគឺ ប្រទេសទំាងនោះបានផ្ដល់ប្រាក់កំរ៉ៃពលករយ៉ាងក្រាសក្រែល មកប្រទេស របស់ខ្លួន។ កត្តានេះគឺដោយសារកម្ពុជាមិនទាន់ក្លាយជាប្រទេសដែលអាចប្រគួត ប្រជែងទីផ្សារការងារជាមួយប្រទេសជិតខាងបាននៅទ្បើយ។ ប្រាក់ចំណូលដែលបានមកពីការសន្សំរបស់បងប្អូនប្អូនយើង ក៏បានផ្ញើ មកក្រុមគ្រួសារ ដែលជាសរុបមានចំនួនរាប់រយលានដុល្លារអាមេរិក ប្រៀបដូចជាឧស្សាហកម្មគ្មានផ្សែង ផងដែរ។ នេះជាកត្ដាមួយទៀតជាអំណោយផលដល់ជីវភាពគ្រួសាររាប់សែននាក់នៅ ក្នុងប្រទេស ក៏ដូចជាអំណោយផលនៃកំណើនសេដ្ឋកិច្ចជាតិ ផងដែរ។

ទី៤) រាជរដ្ឋាភិបាលអាណត្ដិទី៥ ក្នុងយុទ្ធសាស្រ្ដរបស់ខ្លួន បានកែលម្អជីវភាពរបស់ប្រជាជន និងប្រទេសជាតិ ក្នុងបរិការចាំបាច់តម្រូវដល់ដំណើរការអភិវឌ្ឈសេដ្ឋកិច្ច របស់ប្រជាជន និងប្រទេសជាតិ គឺត្រូវធ្វើការស្ដារ និងអភិវឌ្ឈហេដ្ឋារចនាសម្ព័ន្ធ។ ក្នុងនោះ គឺស្ថាបនាផ្លូវថ្នល់ និងស្ពាន។ បច្ចុប្បន្ន គ្មាននរណាម្នាក់ អាចចោទសួរជាសំនួរថា យើងគ្មានផ្លូវថ្នល់ ឬថា យើងគ្មានស្ពាន ទ្បើយ។ ផ្លូវថ្នល់តូចធំ នៅទីក្រុង ក៏ដូចនៅតាមជនបទ បានត្រូវជួសជុល និងស្ថាបនាថ្មីរាប់រយខ្សែ រាប់ពាន់គីទ្បូម៉ែត្រ។ ស្ពានបេតុងថ្មីៗវែងខ្លីត្រូវបានស្ថាបនា។ ស្ពានឆ្លងកាត់ទន្លេក៏ត្រូវបានសាងសង់ជាច្រើន។ ជាសក្ខីភាព កាលពីថ្ងៃទី៦ ខែមេសា ឆ្នាំ២០១៥ កន្លងមកនេះ ប្រមុខរាជរដ្ឋាភិបាលកម្ពុជា រួមនឹងថ្នាក់ដឹកនាំរបស់ប្រទេសម្ចាស់ជំនួយគឺជប៉ុន បានប្រារព្វពិធីជាផ្លូវការ បើកឲ្យប្រើប្រាស់ស្ពានត្សឹបាសា (Tsubasa) នៅ អ្នកលឿង មានប្រវែងជាង ២០០០ ម៉ែត្រ បូកផ្សំនឹងតួផ្លូវភ្ជាប់នឹងសាច់ស្ពាន សរុបប្រមាណជាង៥ពាន់ម៉ែត្រ ដែលមានទទឹង១៣ម៉ែត្រ គឺជាស្ពានធំបំផុតនៅប្រទេសកម្ពុជា។ ក្នុងពិធីដ៏ប្រពៃនេះ តំណាងរដ្ឋាភិបាលជប៉ុន បានសន្សាចំពោះប្រមុខរាជរដ្ឋាភិបាល ក៏ដូចប្រជាជនកម្ពុជា ថាប្រទេសជប៉ុន មានមោទនភាពនឹងធ្វើកិច្ចសហប្រតិបត្ដិការជាមួយកម្ពុជា ទំាង វិស័យសេដ្ឋកិច្ច និងវិស័យដ៏ទៃទៀត និងបង្កើនការខិតខំប្រឹងប្រែងរបស់ខ្លួន ធ្វើកិច្ចសហ ប្រតិបត្ដិការជាមួយកម្ពុជាតទៅទៀត ។ តើនេះ ពុំមែនជាមោទនភាពរបស់ខ្មែរទេអី?

ទី៥) ក្នុងវិស័យកែលម្អសេវាសាធារណៈ រាជរដ្ឋាភិបាលបាន ដាក់ទិសចាប់តាំងពីថ្ងៃបដិសន្ធិរាជរដ្ឋារដ្ឋាភិបាលអាណត្ដិទី៥ នូវកំណែទម្រង់ស៊ីជម្រៅ ដែលប្រជាជនក្ដី ប្រទេសជាមិត្ដក្ដីបាន មើលឃើញកំណែទម្រង់នេះបានវិវត្ដន៍ទៅមុខយ៉ាងស្រួចស្រាវ។ ក្នុងនោះមានកំណែទម្រង់អភិបាលកិច្ចល្អ នៅថ្នាក់ក្រោមជាតិ ពីឃុំ ស្រុក ខេត្ដ រាជធានី រហូតដល់ថ្នាក់ជាតិ ធ្វើយ៉ាងណាផ្តល់សេវាកម្មជូនប្រជាជនឲ្យមាន ភាពកក់ក្ដៅ។ កំណែទម្រង់វិស័យអប់រំ សុខាភិបាល សង្គមកិច្ច បរិស្ថាន តុលាការ។ល។ ក៏ឃើញមានដំណើរការឈានទៅមុខក្នុងភាពវិជ្ជមាន។

ទី៦) ក្នុងការលើកម្ពស់នូវអត្ដសញ្ញាណវប្បធម៌របស់ជាតិ រាជរដ្ឋាភិបាលបានអនុញ្ញាត និងគំាទ្រឲ្យក្រុមយុវជនដែលមានឈ្មោះថា សហភាពសហព័ន្ធយុវជនកម្ពុជា «ស.ស.យ.ក.» ដឹកនាំការងារដ៏វិសេសវិសាល រៀបចំកម្មវិធីដ៏ថ្លៃថ្លា ក្នុងការទទួលទេវតាឆ្នាំថ្មី ដែលនឹងប្រព្រឹត្ដទៅនៅដែនដីអច្ឆរិយៈ ទីក្រុងអង្គរ ខេត្ដសៀមរាប ។ កម្មវិធីនេះគឺសំដៅជាចម្បង ទៅលើការលើកកម្ពស់អត្ដសញ្ញាណវប្បធម៌ ខ្មែរ ដែលមានតំាងពីសម័យអង្គរមក ឲ្យមានភាពរស់រវើក ដូចជាល្បែងចោលឈូង បោះអង្គញ់ ទាញព្រ័ត លោតអន្ទាត់ លាក់កន្សែង ចាប់កូនខ្លែង ស្ដេចចង់ ត្រុដិ ប្រដាល់ក្បាច់ខ្មែរ ជាដើម។ ក្នុងនេះក៏បានបង្ហាញ ថា យុវជនក្មេងៗ បានធ្វើការកៀតស្មានឹងស្មា ជាមួយអ្នកចាស់ទុំ អ្នកកាន់អំណាច ក្នុងន័យ «ទំពំាងស្នងឫស្សី»។ ព្រឹត្ដិការណ៍នេះ ត្រូវបានបណ្ដោញព័ត៌មានធំៗ លើពិភពលោក ដូចជា CNN បានផ្សព្វផ្សាយការរៀបចំនេះពេញពិភពលោក ដែលជាហេតុអាចទាក់ទាញអ្នកទេសចរណ៍ ងាកមកទស្សនាកម្ពុជា នៅក្នុង ពិធីអបអរសាទរចូលឆ្នាំថ្មី ជាមួយប្រជាជនខ្មែរ ។ អ្នកវិភាគខាងវិស័យទេសចរណ៏បានប្រមើលថា អាចនឹងទាក់ទាញអ្នកទេសចរបានប្រមាណ១លាននាក់។

ជា សរុប មជ្ឃដ្ឋានជាតិ និងអន្ដរជាតិ ថ្នាក់ដឹកនាំកំពូលៗ រួមទំាងអ្នកគំាទ្រគណបក្សនយោបាយទំាងអស់ ក្នុងរបបប្រជាធិប តេយ្យ សេរីពហុបក្ស នៅព្រះរាជាណាចក្រកម្ពុជា ច្បាស់ជានឹងខិតខំបន្ដនូវអ្វីៗ គេបានឃើញសមិទ្ធិផលដ៏ប្រពៃ ដូចបានរៀបរាប់ខាងលើ ដើម្បីបន្តនិរន្ដរភាព ហើយសុំទេវតាឆ្នាំថ្មីបន្ដប្រោះព្រំពរជ័យ ដល់កម្ពុជា នៅ «ឆ្នាំ មមែ» នេះ៕

លោកជំទាវ អាយ អាន្នី សុខ អាន អញ្ជើញជាអធិបតីក្នុងពិធីចំរើនព្រះបរិត្ត លើកជោគជតា សិរីសួស្តី មុនចូលឆ្នាំថ្មី នៅទីស្តីការគណៈរដ្ឋមន្ត្រី

ដើម្បីចូលរួមអបអរសារទរចូលឆ្នំាថ្មី ថ្នាក់ដឹកនាំគ្រប់លំដាប់ថ្នាក់ និងមន្ត្រីរាជការ នៃទីស្តីការគណៈរដ្ឋមន្ត្រី បានរៀបចំពិធីចំរើនព្រះបរិត្ត សម្រាប់ឱកាសចូលឆ្នាំថ្មីប្រពៃណីជាតិ ឆ្នាំមមែ សប្ដស័ក ព.ស ២៥៥៩ ដែលនឹងចូល មកដល់ថ្ងៃខាងមុខនេះ ។

ពិធីនេះ ប្រារព្ធនៅអគារមិត្តភាព នាព្រឹកថ្ងៃទី៩ ខែមេសានេះ ដោយមាននិមន្ត សម្ដេចព្រះ អគ្គមហាសង្ឃរាជ សម្ដេចព្រះសង្ឃនាយក គណៈមន្ត្រីសង្ឃ និងព្រះសង្ឃ ចំនួន៧អង្គ ចំរើនព្រះបរិត្ត ប្រោះព្រំ ប្រសិទ្ធពរជ័យ សិរីសួស្តី ចំពោះលោកជំទាវអាយ អានី សុខ អាន , ព្រមទាំង សមាជិកសមាជិការាជរដ្ឋាភិបាល , ថ្នាក់ដឹកនាំគ្រប់លំដាប់ថ្នាក់ និងមន្ត្រីរាជការទាំងអស់ នៃទីស្តីការគណៈរដ្ឋមន្ត្រី នៅក្នុងការបំពេញភារៈកិច្ច នាឆ្នាំថ្មីខាងមុខ ។

គួរកត់សំគាល់ថា ជារៀងរាល់ឆ្នាំ នាឱកាសបុណ្យចូលឆ្នាំថ្មី ប្រពៃណីជាតិ និងបុណ្យភ្ជុំបិណ្ឌជាដើម ថ្នាក់ដឹកនាំ និងមន្ត្រីរាជការ ក្រោមឱវាទទីស្តីការគណៈរដ្ឋមន្ត្រី តែងតែប្រារព្ធពិធី ព្រះពុទ្ធសាសនាបែបនេះ ម្យ៉ាង គឺដើម្បីសុំសេចក្តីសុខចំរុងចំរើន ដល់មន្ត្រីរាជការ និងម្យ៉ាងទៀត ដើម្បីប្រោះព្រំ ឲ្យមានភាពសុខដុមរមនា ដល់ទីស្តីការគណៈរដ្ឋមន្ត្រី ដែលជាទីតាំងស្ថាប័នកំពូលមួយរបស់រាជរដ្ឋាភិបាល ជាក្បាលម៉ាស៊ីនប្រមូលផ្តុំ នូវកម្លាំងបញ្ញាញាណ គ្រប់ស្រទាប់ ដែលបម្រើឲ្យគ្រប់កិច្ចការនយោបាយរបស់រាជរដ្ឋាភិបាល ទាំងលើការងារអភិបាលកិច្ច និងកំណែទំរង់នានា ។

ក្រោយពីបញ្ចប់កម្មវិធីចម្រើនព្រះបរិត្ត លោកជំទាវ អាយ អាន្នី សុខ អាន ព្រមទាំងឯកឧត្ដម លោកជំទាវ ជាសមាជិក សមាជិកា រាជរដ្ឋាភិបាល និង មន្ត្រីរាជការ ក្រោមឱវាទទីស្តីការគណៈរដ្ឋមន្ត្រី បានបន្តទៅទស្សនារបាំត្រុដ និង របាំជូនពរ ដែលសិល្បករ សិល្បការិនី សំដែងនៅខាងមុខ វិមានសន្តិភាព ដើម្បីអបអរសារទរ ជូនពរ ជាពិសេស បណ្តេញឲ្យអស់នូវភាពឧបទ្រុបទាំងឡាយក្នុងឆ្នាំចាស់ និងផ្លាស់យកជោគជ័យ សិរីសួស្តី សម្រាប់ឆ្នាំថ្មី ៕