នៅក្នុងសន្និសីទសារព័ត៌មាន
នៅថ្ងៃទី១៣ ខែកុម្ភៈ ឆ្នាំ២០១៥នេះ លោក សោម អូន ប្រធានក្រុមប្រឹក្សាសហភាពសហជីពជាតិកម្ពុជា
បានអំពាវនាវឲ្យគ្រប់សហព័ន្ធសហជីពទាំងអស់ទាំងថ្មីទាំងចាស់ គឺធ្វើយ៉ាងណាអនុវត្តទៅតាមគោលការណ៍ច្បាប់ឲ្យបានល្អ
ពោលគឺធ្វើទៅតាមនីតិវិធីច្បាប់។ សហព័ន្ធសហជីពមួយដែលស្របច្បាប់ គឺត្រូវឆ្លងកាត់ការបោះឆ្នោតពីសហជីពដែលជាសមាជិកសហព័ន្ធរបស់ខ្លួន
ហើយន្ទាប់មកគឺរៀបចំចុះបញ្ជីកាឲ្យបានត្រឹមត្រូវនៅក្រសួងការងារ និងក្រសួងស្ថាប័នដែលពាក់ព័ន្ធ។
ក្នុងករណីដែលសហព័ន្ធនោះ ធ្វើសកម្មភាពដោយមិនមានបញ្ជីកា និងមិនមានការបោះឆ្នោតទេ
គឺមានន័យថាគេកំពុងធ្វើខុសទៅនឹងគោលការណ៍ច្បាប់ការងារ និងច្បាប់របស់សហជីពហើយ។
ការលើកឡើងរបស់លោក
សោម អូន ខាងលើ គឺឆ្លើយតបទៅនឹង សេចក្តីថ្លែងការណ៍របស់ GMAC ដែលបានចេញផ្សាយកាលពីថ្ងៃទី ១១ ខែកុម្ភៈ ឆ្នាំ២០១៥កន្លងទៅ ថា
ការបន្តទាមទារ និងការដាក់សំណើ ដែលទទួលបានស្នាមមេដៃគាំទ្រពីកម្មករនិយោជិតមួយចំនួនតូច
ក្នុងចំណោមកម្មករនិយោជិតមួយភាគធំ ហើយពេលខ្លះស្នាមមេដៃទាំងនោះបានពីការលួងលោម
និងសន្យាជាមួយកម្មករថា និងទាមទារឲ្យបានអត្ថប្រយោជន៍បន្ថែមប្រសើរជាងច្បាប់
កំពុងក្លាយជាសកម្មភាព ដ៏ពេញនិយមរបស់សហព័ន្ធសហជីពការងារដែលគ្មានបញ្ជីកា សម្រាប់ការបង្កការស្មុគស្មាញដល់រោងចក្រ។
សកម្មភាពនេះបានគម្រាម កំហែងយ៉ាងខ្លាំងដល់ភាពសុខដុមរមនា
របស់រោងចក្រសហគ្រាសក្នុងវិស័យកាត់ដេរ សម្លៀកបំពាក់ និងផលិតស្បែកជើង។
នៅក្នុងសេចក្តីថ្លែងការណ៍ដដែលបានបន្តថា
សកម្មភាពរបស់សហព័ន្ធសហជីពគ្មានបញ្ជីកាទាំងនោះ ពិតជាបានបង្កភាពស្មុគស្មាញ
និងបញ្ហាមិនចេះចប់មិនចេះហើយ ដល់រោងចក្រ។ សកម្មភាពរំខានទាំងនេះ មិនបានផ្តល់ឪកាសឲ្យនិយោជក
និងសហជីពដែលបានចុះបញ្ជីការត្រឹមត្រូវតាមច្បាប់
សហការគ្នាធ្វើការ ដើម្បីបង្កើនប្រសិទ្ធភាព និងផលិតភាពការងារនោះទេ។
សមាគមរោងចក្រកាត់ដេរ ក៏បានអំពាវនាវឲ្យក្រសួងការងារ និងបណ្តុះបណ្តាលវិជ្ជាជីវៈ
និងអាជ្ញាធរមានសមត្ថកិច្ចដែលពាក់ព័ន្ធ មេត្តាជួយអន្តរាគមន៍
និងមានចំណាត់ការចំពោះសហព័ន្ធសហជីពគ្មានបញ្ជីកា ដែលបន្តអុកឡុក និងបង្កបញ្ហាដល់និយោជកក្នុងវិស័យនេះ។
ចំពោះសេចក្តីថ្លែងការណ៍របស់សមាគមរោងចក្រកាត់ដេរខាងលើ
ត្រូវបានលោក សោម អូន យល់ឃើញថា វាជាសេចក្តីថ្លែងការណ៍មួយដែលផ្តោតទៅលើ
សហព័ន្ធសហជីព ខ្លះដែលគាត់មិនមានការបោះឆ្នោតត្រឹមត្រូវ ហើយមិនមានការចុះបញ្ជីកា។
«ជាគោលការណ៍ច្បាប់ ខ្ញុំគិតថា នេះជាការធ្វើខុសទៅនឹងនីតិវិធីនៃច្បាប់ការងារបស់យើង
ក៏ដូចជាអនុសញ្ញាអន្តរជាតិ លេខ ៨៧៩៨ ហើយក៏ផ្ទុយទៅនឹង ច្បាប់រដ្ឋធម្មនុញ្ញដែរ»។
ប៉ុន្តែលោក សោម អូន បានបញ្ជាក់ថា គ្រប់សកម្មភាពរបស់សហព័ន្ធសហជីពដែលមាន
ឬគ្មានបញ្ជីកាត្រឹមត្រូវ សុទ្ធតែអាចប៉ះពាល់ដល់និយោជក និងកម្មករនិយោជិតដូចគ្នា
ប្រសិនជាសកម្មភាពទាំនោះ ធ្វើឡើងដោយខុសនិងច្បាប់ ដូចជាការធ្វើកូដកម្មខុសនីតិវិធី
រឺធ្វើអ្វីមួយខុសនិងគោលការណ៍ច្បាប់ដែលបានកំណត់។
លោក សោម អូន ក៏បានលើកផងដែរ ពីក្តីបារម្ភរបស់អ្នកវិនិយោគ
ដែលពួកគាត់ផ្តោត សំខាន់ទៅលើសហជីពនេះឯង។ ដូច្នេះ លោក សូមអំពាវនាវឲ្យសហជីពទាំងអស់ត្រូវដូរឥរិយាបថ
ធ្វើយ៉ាងម៉េចអនុវត្តទៅតាមគោលការណ៍ច្បាប់ទាំងអស់គ្នា។ ហើយដោយឡែកភាគីនិយោជកក៏ដូចគ្នាដែរ
ត្រូវរួមគ្នាអនុវត្តច្បាប់ឲ្យបានល្អប្រសើរ។ ការអនុវត្តច្បាប់នេះមិនមែនតែសហជីព
ហើយក៏មិនមែនតែនិយោជកទេ គឺគ្រប់ភាគីពាក់ព័ន្ធទាំងអស់ត្រូវធ្វើទាំងអស់គ្នា
ដើម្បីធ្វើឲ្យវិស័យឧស្សាហកម្មកាត់ដេររបស់កម្ពុជាមានស្ថេរភាពល្អ និងមិនប៉ះពាល់ទៅដល់ការវិនិយោគទាំងក្នុងនិងក្រៅប្រទេស។
អត្ថបទដោយ៖
ច័ន្ទ ទេវី
