ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានមានប្រសាសន៍នារសៀលថ្ងៃទី៩ ខែវិច្ឆិកា ឆ្នាំ២០១៤ នៅព្រលានយន្តហោះអន្តរជាតិភ្នំពេញឲ្យដឹងថា ប្រទេសចិននឹងបន្តផ្តល់ជំនួយ និងបន្តការគាំទ្រគ្រប់បែបយ៉ាងដល់ការអភិវឌ្ឍសេដ្ឋកិច្ចជាតិ របស់ប្រទេសកម្ពុជា ឲ្យកាន់តែរីកចម្រើន ទ្វេឡើងថែមទៀត។
គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត នាល្ងាចថ្ងៃទី៩ ខែវិច្ជិកា ឆ្នាំ២០១៤ បាននិវត្តន៍មកកាន់មាតុប្រទេសវិញ ប្រកបដោយសុខសុវត្ថិភាព បន្ទាប់ពីបានចំណាយពេល ៣ថ្ងៃ នៅទីក្រុងបេកាំងនៃសាធារណរដ្ឋប្រជាមានិតចិន ដើម្បីចូលរួមក្នុងកិច្ចសន្ទនាដើម្បីពង្រឹងភាពជាដៃគូនៃការតភ្ជាប់ និងកិច្ចប្រជុំកំពូលនាយកប្រតិបត្តិ នៃកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក(APEC) ដែលចាប់ផ្តើម ពីថ្ងៃទី៧ ដល់ ថ្ងៃទី៩ខែវិច្ឆិកា ឆ្នាំ២០១៤ នៅទីក្រុងប៉េកាំង។
ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ដែលអមដំណើរសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ា ហ៊ុនសែន បានមានប្រសាសន៍ឲ្យដឹងថា នៅទីក្រុងប៉េកាំង នៃសាធារណរដ្ឋប្រជាមានិតចិន រយៈពេល៣ថ្ងៃ គឺនៅថ្ងៃទី៧ ដល់ថ្ងៃទី៩ ខែវិច្ឆិកានេះ ក្រៅពីអញ្ជើញចូលរួម ក្នុងកិច្ចសន្ទនា និងកិច្ចប្រជុំកំពូលខាងលើ សម្ដេចអគ្គមហាសេនាបតីតេជោ ហ៊ុន សែន ក៏បានជួបសំដែងការគួរសម និងពិភាក្សាការងារជាមួយប្រធានា ធិបតីចិន ឯកឧត្តម ស៊ី ជីនភីង(XI Jinping), ជាមួយអនុប្រធានាធិបតីចិន ឯកឧត្តម លីយ៉ុនចាវ (LI Yuanchao) និងទទួលជួបជាមួយ ឯកឧត្តម វង់ ជារុយ អនុប្រធានសភាពិគ្រោះនយោបាយ និងជារដ្ឋមន្រ្តីគណៈទាក់ទងអន្តរជាតិនៃគណៈកម្មាធិការកណ្តាលបក្សកុម្មុយនីស្តចិន និងបានអនុញ្ញាតឲ្យប្រធានក្រុមហ៊ុនចិនចំនួនបី ផ្សេងទៀត ចូលជួបសំដែងការគួរសមជាបន្តបន្ទាប់ផងដែរ។
ឯកឧត្តម កៅ គឹមហួន បានមានប្រសាសន៍ថា ក្នុងអំឡុងពេលនៃជំនួបពិភាក្សា ជាមួយនឹងការវាយតម្លៃយ៉ាងខ្ពស់ចំពោះសម្ដេចតេជោ ហ៊ុន សែន និងរាជរដ្ឋាភិបាលកម្ពុជា ដែលជារៀងដ៍រាបមក បានប្រកាន់ជំហរគាំទ្រនយោបាយ «ចិនតែមួយ» នោះ ឯកឧត្តម ស៊ី ជិនភីង (XI Jinping) ប្រធានាធិបតីនៃសាធារណរដ្ឋប្រជាមានិតចិនបញ្ជាក់ថា ប្រទេសចិននឹងបន្តផ្តល់ជំនួយ និងបន្តការគាំទ្រគ្រប់បែបយ៉ាងដល់ការអភិវឌ្ឍសេដ្ឋកិច្ចជាតិ របស់ប្រទេសកម្ពុជា ឲ្យកាន់តែរីកចម្រើនទ្វេឡើងថែមទៀត។ ដោយឡែកទាក់ទិននឹងទំនាក់ទំនងទ្វេភាគី សម្តេចតេជោនាយករដ្ឋមន្រ្តី បានស្នើឲ្យភាគីចិនបន្តធ្វើកិច្ចសហប្រតិបត្តិការលើគ្រប់វិស័យ ឲ្យកាន់តែស្អិតល្មួតទ្វេឡើងថែមទៀត ជាពិសេសការផ្លាស់ប្តូរដំណើរទស្សនកិច្ចគ្រប់កំរិត ចាប់តាំងពីថ្នាក់ដឹកនាំនយោបាយ រហូតដល់កំរិតមហាជន និងប្រជាជន, បន្តពង្រីកកិច្ចសហប្រតិបត្តិការ ក្នុងការរៀបចំការចងសម្ព័ន្ធមេត្រីភាព រវាងខេត្ត និងខេត្ត ទីក្រុង និងទីក្រុង នៃប្រទេសទាំងពីរ និងបន្តកិច្ចសហប្រតិបត្តិការ លើការបណ្តុះបណ្តាលធនធានមនុស្ស ជាពិសេសការផ្លាស់ប្តូរយុវជន ក៏ដូចជាសមាគមនារី នៃប្រទេសទាំងពីរ។
សម្តេចតេជោក៏បានស្នើដល់ភាគីចិនផងដែរឲ្យបន្តជួយគាំទ្រ ដល់ការអភិវឌ្ឍសេដ្ឋកិច្ចរបស់ប្រទេសកម្ពុជា តាមរយៈការផ្តល់កម្ចីហិរញ្ញប្បទាន ពី៥០០លានដុល្លា ទៅ៧០០លាន ដុល្លារអាមេរិក ក្នុង១ឆ្នាំ និងបើកចំហទីផ្សាររបស់ប្រទេសចិន ក្នុងការទទួលយកកសិផលកម្ពុជា ពិសេសការនាំចូលអង្ករពីកម្ពុជា មកកាន់ប្រទេសចិន និងបានស្នើឱ្យថ្នាក់ដឹកនាំចិន ជួយជំរុញទេសចរណ៍ចិន មកកាន់កម្ពុជា ឲ្យកាន់តែច្រើនឡើងថែមទៀត ដោយកម្ពុជាចង់ឃើញទេសចរណ៍ចិន ឈរក្នុងអាត្រាកំណើនចំណាត់ថ្នាក់ទី១នៅកម្ពុជា។
ដោយផ្អែកលើទំនាក់ទំនងកិច្ចសហប្រតិបត្តិការរវាងប្រទេសទាំងពីរ (ចិន-កម្ពុជា) ឈានដល់កំរិតទំនាក់ទំនងកិច្ចសហប្រតិការ ដៃគូយុទ្ធសាស្រ្តគ្រប់ជ្រុងជ្រោយ ឯកឧត្តម កៅ គឹមហួន បានមានប្រសាសន៍ថា ឯកឧត្តមប្រធានាធិបតីចិន បានលើកឡើងថា ចិនបានចាត់ទុកកម្ពុជា គឺជាប្រទេសដ៏មានសារៈសំខាន់ និងចាត់ទុក សម្តេចអគ្គមហាសេនាបតីតេជោ ហ៊ុន សែន គឺជាមិត្ត និងជាបងប្អូន។ ប្រទេសចិននឹងស្វាគមន៍ជានិច្ច ចំពោះវត្តមានសម្តេចតេជោសែន ក្នុងការទៅទស្សនកិច្ចនៅប្រទេសចិន។ ក្នុងនោះដែរ ឯកឧត្តមប្រធានាធិបតីនៃសាធារណរដ្ឋប្រជាមានិតចិន ក៏បានបញ្ជាក់ជាថ្មីទៀតអំពីការជួយឧបត្ថម្ភដល់យុវជនកម្ពុជា ចំនួន១០០នាក់ ទៅទស្សនកិច្ចសិក្សានៅប្រទេសចិន ក្នុងឆ្នាំ២០១៥ផងដែរ។
គួបញ្ជាក់ផងដែរថា ឯកឧត្តម ស៊ី ជីពីង ប្រធានាធិបតីចិន នៅក្នុងពិធីបើកកិច្ចសន្ទនា ស្តីពីការពង្រឹង ភាពជាដៃគូ នៃការតភ្ជាប់(Dialogue on Strengthening Connectivity Partnership) របស់កិច្ចប្រជុំកំពូល នៃកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វីក (APEC) ដែលបានប្រារព្ធពិធីបើកជាផ្លូវការ នៅរសៀលថ្ងៃទី ៨ ខែ វិច្ឆិកា នៅទីក្រុងប៉េកាំង បានមានប្រសាសន៍ថា រដ្ឋាភិបាលចិន នឹងចំណាយថវិកាប្រមាណ ៤ពាន់លានដុល្លារ អាមេរិក ដើម្បីបង្កើតផ្លូវដែក នៅក្នុងប្រទេសប៉ាគីស្ថាន បង់ក្លាដែស មីយ៉ាន់ម៉ារ ឡាវ កម្ពុជា ម៉ុងហ្គោលី និង តាជីគីស្ថាន និងប្រទេសចិន។ ការប្រកាសនេះគឺចិនចង់បញ្ជាក់ថា គោលដៅសំខាន់ៗរបស់ចិន ទាំងអតីតកាលបច្ចុប្បន្នកាល និងអនាគត គឺធ្វើការរួមចំណែកលើការកសាងសេដ្ឋកិច្ចពាណិជ្ជកម្ម និងសំខាន់បំផុតគឺរួមចំណែកកសាងជាមួយ និងបណ្តាប្រទេសផ្លូវសូត្រ លើការកសាងហេដ្ឋារចនាសម្ព័ន្ធ។
ដូចគ្នានិងសុន្ទរកថា របស់បណ្តាមេដឹកនាំ នៃប្រទេសដែលជាដៃគូតភ្ជាប់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជាបានមានប្រសាសន៍ចាត់ទុកថា ផែនការមេ ស្តីពីការតភ្ជាប់តំបន់ អាស៊ាន បានបង្កើតក្របខណ្ឌ មិនត្រឹមតែសម្រាប់កិច្ចសហប្រតិបត្តិការក្នុងតំបន់អាស៊ានប៉ុណ្ណោះទេ ប៉ុន្តែថែមទាំងផ្តល់ជាវេទិកា សម្រាប់ដៃគូយុទ្ធសាស្ត្ររបស់អាស៊ាន ពិសេសក្នុងក្របខណ្ឌអាស៊ានបូក១ និងអាស៊ានបូក៣ ដើម្បីផ្តល់ការគាំទ្រ ដល់ការអនុវត្តផែនការមេនោះ ទាំងការតភ្ជាប់ហេដ្ឋារចនាសម្ព័ន្ធផ្នែករឹង និងផ្នែកទន់ ជាពិសេសលើការតភ្ជាប់គមនាគមន៍ ទាំងផ្លូវគោក ផ្លូវទឹក ផ្លូវរដែក (ផ្លូវរថភ្លើង) និងផ្លូវអាកាស ព្រមទាំងការតភ្ជាប់នាវាសមុទ្រជាដើម។
សម្តេចតេជោនាយករដ្ឋមន្ត្រី បានសំដែងនូវការស្វាគមន៍ និងការគាំទ្រពេញទំហឹង ចំពោះគំនិតផ្តួចផ្តើម ខ្សែក្រ វ៉ាត់ផ្លូវសេដ្ឋកិច្ចសូត្រ និងផ្លូវសូត្រសមុទ្រ សម្រាប់សតវត្សទី២១ ដែលនឹងធានាឲ្យគ្រប់ភាគីពាក់ព័ន្ធទាំងអស់អាចរួមចំណែកដល់ការតភ្ជាប់ កាន់តែទូលំទូលាយ និងការបំពេញឲ្យគ្នាទៅវិញទៅមក រវាងគ្រប់អនុតំបន់ និងបានស្វាគមន៍ ចំពោះការបង្កើតធនាគារវិនិយោគហេដ្ឋារចនាសម្ព័ន្ធអាស៊ី ដែលជាគំនិតផ្តួចផ្តើមរបស់ប្រទេសចិន និងមានជំនឿថា ធនាគារនោះ នឹងផ្តល់អាទិភាព ជាពិសេសដល់សេចក្តីត្រូវការ ក្នុងការតភ្ជាប់ទាំងរបស់អាស៊ាន និយាយជារួម និងទាំងរបស់កម្ពុជា និយាយដោយឡែក៕
