រូបសំណាកសេះសមុទ្របាញ់ទឹកក្នុងខេត្តកំពត កំពុងបង្អួតសម្រស់ និងទាក់ទាញភ្ញៀវទេសចរជាតិ-អន្តរជាតិ មកកម្សាន្តកាន់តែច្រើន

AKP កំពត ថ្ងៃទី០៩ ខែមេសា ឆ្នាំ២០២៤ --

ខេត្តកំពតកាន់តែមានភាពទាក់ទាញភ្ញៀវទេសចរថែមមួយកំរិតទៀត ក្រោយរូបសំណាកសេះសមុទ្របាញ់ទឹកនៅសួនច្បារមុខសាលាខេត្តចាស់បានសាងសង់រួចរាល់ ដែលរូបសំណាកសេះសមុទ្រនេះមានកម្ពស់ ៨ម៉ែត្រ មានបាញ់ទឹកចេញពីមាត់អមដោយការតុបតែងលម្អភ្លើងពណ៌។ ភ្ញៀវទេសចរជាតិ និងអន្តរជាតិជាច្រើនបានមកលេងកម្សាន្ត និងថតរូបអនុស្សាវរីយ៍ជាមួយនឹងសេះសមុទ្រ (ត្រីសេះសមុទ្រ)។

ក្នុងដំណើរចុះពិនិត្យរូបសេះសុទ្រ ដែលនឹងដាក់សម្ពោធជាផ្លូវការ នៅថ្ងៃទី១០ ខែមេសា ឆ្នាំ២០២៤ខាងមុខនេះ ឯកឧត្តម ម៉ៅ ធនិន អភិបាលខេត្តកំពត បានឱ្យដឹងថា ខេត្តកំពតគឺជាខេត្តប៉ូលទេសចរណ៍មួយដ៏សំខាន់ក្នុងការទាក់ទាញភ្ញៀវទេសចរជាតិ និងអន្តរជាតិឱ្យមកលេងកម្សាន្ត ដែលខេត្តនេះសំបូរទៅដោយធនធានធម្មជាតិជាច្រើនដែលបម្រើឱ្យវិស័យទេសចណ៍ ដូច្នេះក្នុងនាមអាជ្ញាធរខេត្តត្រូវតែមានការកែច្នៃ កែលម្អ តំបន់ដែលមានធនធានធម្មជាតិ និងមានសក្តានុពលទេសចរណ៍ទាំងនោះឱ្យដំណើរការ ក្នុងន័យជួយជំរុញដល់សេដ្ឋកិច្ចរបស់ប្រជាពលរដ្ឋក្នុងខេត្ត ព្រោះពេលណាដែលមានទេសចរមកលេងកម្សាន្តច្រើន នោះពលរដ្ឋនឹងទទួលបានចំណូលពីវិស័យទេសចរណ៍ក៏ច្រើន។  

ឯកឧត្តម ទិត សុធា ដឹកនាំប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុក ឃុំទាំង១១ និងក្រុមការងារលេខាធិការដ្ឋានស្រុកកំពង់ស្វាយ ខេត្តកំពង់ធំ

នៅព្រឹកថ្ងៃទី៩ ខែមេសា ឆ្នាំ២០២៤នេះ ឯកឧត្តម ទិត សុធា រដ្ឋលេខាធិការទីស្តីការគណៈរដ្ឋមន្ត្រី ប្រធានអង្គភាពព័ត៌មាននិងប្រតិកម្មរហ័ស និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់ស្វាយ ខេត្តកំពង់ធំ បានអញ្ជើញជាអធិបតី ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុក និងឃុំទាំង១១នៃស្រុកកំពង់ស្វាយ និងក្រុមការងារលេខាធិការដ្ឋានស្រុកកំពង់ស្វាយ ខេត្តកំពង់ធំ ។

ពិធីប្រកាសនេះ បានប្រារព្វធ្វើឡើងនៅរដ្ឋបាលស្រុកកំពង់ស្វាយ ដោយមានការអញ្ជើញចូលរួមពីក្រុមការងាររាជរដ្ឋាភិបាលចុះមូលដ្ឋានស្រុក ឃុំទាំង១១ និងក្រុមការងារលេខាធិការដ្ឋានស្រុកកំពង់ស្វាយ ព្រមទាំងវត្តមានចូលរួមរបស់ឯកឧត្តម លោកជំទាវ លោក លោកស្រី ប្រធានអនុប្រធានមន្ទីរជុំវិញខេត្ត និងមន្ត្រីរាជការ ប្រមាណ២០០នាក់ ។

ថ្លែងសំណេះសំណាលក្នុងពិធីនោះ ឯកឧត្តម ទិត សុធា បានមានប្រសាសន៍ថា ដោយមានការយកចិត្តទុកដាក់ពីប្រមុខរាជរដ្ឋាភិបាលដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី បានរៀបចំចាត់តាំងក្រុមការងាររាជរដ្ឋាភិបាលចុះមូលដ្ឋាន គឺដើម្បីសហការជាមួយអាជ្ញាធរថ្នាក់ក្រោមជាតិ ក្នុងការជួយស្វែងយល់ និងជួយសម្របសម្រួលដោះស្រាយបញ្ហាប្រឈមជាក់ស្តែងជូនដល់បងប្អូនប្រជាពលរដ្ឋ ស្របតាមគោលការណ៍ច្បាប់ ជាពិសេស ជួយរិះរកវិធីនានាដើម្បីការចូលរួមកសាង អភិវឌ្ឍមូលដ្ឋានភូមិឃុំឱ្យប្រជាពលរដ្ឋមានជីវភាពរស់នៅកាន់តែល្អប្រសើរ។

ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់ស្វាយ បានបញ្ជាក់បន្ថែមទៀតថា ក្រុមការងាររាជរដ្ឋាភិបាលចុះមូលដ្ឋាន មិនមែនជាការមកដណ្តើមអំណាចរបស់សមត្ថកិច្ចមូលដ្ឋាន ហើយក៏មិនមែនមកធ្វើការងារជំនួសមូលដ្ឋាននោះឡើយ ប៉ុន្តែក្រុមការងាររាជរដ្ឋាភិបាល មានតួនាទីភារកិច្ចក្នុងការតម្រង់ទិស តាមដាន វាយតម្លៃការអនុវត្តការងាររបស់អាជ្ញាធរមូលដ្ឋានស្របតាមយុទ្ធសាស្ត្របញ្ចកោណ-ដំណាក់កាលទី១ ដែលបានដាក់ចេញដោយរាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត។

ឯកឧត្តម ទិត សុធា ក៏បានគូសបញ្ជាក់ថា រាជរដ្ឋាភិបាល អាណត្តិទី៧នេះ គឺជា អាណត្តិកែទម្រង់ ដូចនេះយើងត្រូវចូលរួមទាំងអស់គ្នាក្នុងការបម្រើប្រជាពលរដ្ឋអស់ពីបេះដូង និងកម្លាំងកាយចិត្ត ប្រាជ្ញាស្មារតី ដោយមិនត្រូវយកអំណាច តួនាទីរបស់ខ្លួនទៅប្រព្រឹត្តអំពើខុសច្បាប់ណាមួយដើម្បីផលប្រយោជន៍លាភសក្ការៈផ្ទាល់ខ្លួន ដែលទង្វើខុសឆ្គងទាំងអស់នោះ នឹងអាចប្រឈមនឹងវិធានការច្បាប់ជាមិនខាន។

ឯកឧត្តម ទិត សុធា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់ស្វាយ ក៏បានផ្ដាំផ្ញើដល់ក្រុមការងារទាំងអស់ត្រូវតែសហការ សាមគ្គីភាពផ្ទៃក្នុងឱ្យបានរឹងមាំ ជាកម្លាំងតែមួយ មោះមុត និងប្តេជ្ញាចិត្តក្នុងការបំពេញភារកិច្ចរបស់ខ្លួនដោយស្មារតីទទួលត្រូវខ្ពស់ ដើម្បីបម្រើផលប្រយោជន៍ប្រជាជន។ 

ឆ្លៀតក្នុងឱកាសនោះដែរ ឯកឧត្តម ទិត សុធា ក៏បានថ្លែងអំណរគុណដល់អាជ្ញាធរគ្រប់លំដាប់ថ្នាក់ ក៏ដូចជា ក្រុមការងាររាជរដ្ឋាភិបាលអាណត្តិមុនៗ ដែលបានប្រឹងប្រែងអស់ពីកម្លាំងកាយ ចិត្ត បញ្ញា ស្មារតីក្នុងការងាររហូតសម្រេចបានសមិទ្ធផលជាច្រើននាពេលកន្លងមកនេះ  និងប្តេជ្ញាបន្តរួមកម្លាំងសាមគ្គីគ្នាជាធ្លុងមួយ ដើម្បីការកសាង សមិទ្ធផលថ្មីៗថែមទៀត និងប្រែក្លាយជីវភាពរស់នៅរបស់ប្រជាពលរដ្ឋនៅក្នុងមូលដ្ឋានឱ្យកាន់តែរីកចម្រើន រុងរឿង៕

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្រាបបង្គំទូលថ្វាយ សារលិខិតថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងអភិលក្ខិតសម័យដ៏មហានក្ខត្តឫក្សឧត្តុង្គឧត្តម នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤នេះ។

 សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្រាបបង្គំទូលថ្វាយ សារលិខិតថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងអភិលក្ខិតសម័យដ៏មហានក្ខត្តឫក្សឧត្តុង្គឧត្តម នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤នេះ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្រាបបង្គំទូលថ្វាយ សារលិខិតថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងអភិលក្ខិតសម័យដ៏មហានក្ខត្តឫក្សឧត្តុង្គឧត្តម នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤នេះ។

 សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្រាបបង្គំទូលថ្វាយ សារលិខិតថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងអភិលក្ខិតសម័យដ៏មហានក្ខត្តឫក្សឧត្តុង្គឧត្តម នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤នេះ។

សម្ដេចធិបតី ហ៊ុន ម៉ាណែត លើកទឹកចិត្ដឲ្យពលរដ្ឋយកកូនឱ្យបានច្រើន ដើម្បីបង្កើនប្រជាជនវ័យក្មេងបន្ថែមទៀត

សម្ដេចធិបតី ហ៊ុន ម៉ាណែត បានលើកទឹកចិត្ដឲ្យពលរដ្ឋយកកូនឱ្យបានច្រើន ដើម្បីបង្កើនចំនួនប្រជាជនវ័យក្មេងបន្ថែមទៀតឱ្យបានច្រើនចៀសវាងបញ្ហាថយចុះនៃកម្លាំងពលកម្ម ក្នុងការចូលរួមអភិវឌ្ឍប្រទេសជាតិ។

ការលើកឡើងខាងលើរបស់សម្ដេចធិបតី ធ្វើឡើងក្នុងពេលដែលសម្ដេចអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤។

សម្ដេចធិបតី បានលើកឡើងបន្តថា គោលនយោបាយជាតិ ប្រជាជនឆ្នាំ២០១៦-២០៣០ គឺឈរលើគោលការណ៍ទទួលស្គាល់និងគាំទ្រចំពោះសិទ្ធិរបស់គូស្វាមីភរិយា និងបុគ្គលទាំងអស់ឱ្យមានសិទ្ធិជាមូលដ្ឋាននៅក្នុងការសម្រេចចិត្ដដោយសេរី និងទទួលខុសត្រូវលើចំនួនកូន និងការពន្យាកំណើត ដោយពួកគាត់មានលទ្ធភាពទទួលបានព័ត៌មានអំពី សេវា មធ្យោបាយ និងការសម្រេចចិត្ដ។ 

ជាមួយគ្នានោះដែរ សម្ដេចធិបតីបានលើកទឹកចិត្ដដល់គូស្វាមីភរិយាដែលមានលទ្ធភាពសេដ្ឋកិច្ច គួរមានកូនច្រើនលើសពីចំនួនកំណត់ ដើម្បីចៀសវាងហានិភ័យពីកង្វះពលកម្ម។

សម្ដេចធិបតី បានបន្ដថា តាមជំរឿននៅឆ្នាំ២០៥០ ចំនួនពលរដ្ឋវ័យចាស់គឺមានច្រើនជាងអ្នកមានវ័យតិចជាង១៥ឆ្នាំ ហើយអ្នកអាយុកណ្ដាលគឺជាធាតុផ្សំ ដោយហេតុថា បន្ដិចទៀតក្មេងអាយុ១៥ឆ្នាំ នឹងឡើងមកដល់វ័យកណ្ដាល ហើយមនុស្សវ័យកណ្ដាលនឹងឡើងដល់វ័យចំណាស់។ 

បច្ចុប្បន្ន យើងមានអ្នកអាយុវ័យកណ្ដាលច្រើននៅឡើយ ប៉ុន្ដែបើចំនួនអ្នកកើតមានចំនួនតិចជាងអ្នកចាស់ នោះមិនយូរទេយើងនឹងមានបញ្ហាមិនខាន ដែលជាក់ស្ដែងប្រទេសជិតខាងរបស់យើងកំពុងតែជួបបញ្ហានេះបណ្ដើរៗហើយ។

ទន្ទឹមនឹងនេះ សម្ដេចធិបតី បានមានប្រសាសន៍ថា បើទោះបីជានៅឆ្នាំ២០៥០ យើងនៅមានមនុស្សវ័យកណ្ដាលច្រើនក៏ដោយ ប៉ុន្ដែ÷

១- ប្រទេសកម្ពុជារបស់យើង ទោះជាតូចមិនទាន់ធំក៏ដោយ ប៉ុន្ដែប្រទេសរបស់យើងនៅសល់សក្ដានុពលច្រើនណាស់ 

២- ការថយចុះនៃភាគរយរបស់មនុស្សវ័យក្មេង និងមនុស្សចាស់ក៏ជាបញ្ហាចោទ។ ឥឡូវនេះ យើងនាំចេញកម្លាំងពលកម្មទៅក្រៅប្រទេសច្រើន ខណៈពេលដែលប្រទេសមួយចំនួនបាននិងកំពុងខ្វះកម្លាំងពលកម្ម។ 

សម្ដេចបានបន្ដថា នៅក្នុងឆ្នាំ២០៥០ យើងចាប់ផ្ដើមមើលឃើញជាបណ្ដើរៗនូវការថយចុះកម្លាំងពលកម្ម ពោលបើទោះបីជាការព្យាករដោយផ្អែកទៅលើទិន្នន័យនៃការធ្វើជំរឿននេះមិនទាន់មានបញ្ហាចោទនៅឆ្នាំ២០៥០ ក្ដី ប៉ុន្ដែយើងបានមើលឃើញនូវសញ្ញានៃការថយចុះ គម្លាតរវាងអ្នកដែលមានអាយុចាស់លើសកម្លាំង និងអ្នកដែលមានអាយុវ័យកណ្ដាលចាប់ផ្ដើមកើនឡើងហើយ៕

សម្ដេចធិបតី ហ៊ុន ម៉ាណែត៖ ផែនការយុទ្ធសាស្រ្ដអភិវឌ្ឍជាតិ គឺជាឯកសារផែនការដ៏មានសារៈសំខាន់សម្រាប់អនុវត្ដគោលនយោបាយអទិភាពរបស់រាជរដ្ឋាភិបាល

សម្ដេចធិបតី ហ៊ុន ម៉ាណែត បានលើកឡើងថា ផែនការយុទ្ធសាស្រ្ដអភិវឌ្ឍជាតិ គឺជាឯកសារផែនការដ៏មានសារៈសំខាន់សម្រាប់អនុវត្ដគោលនយោបាយអទិភាពរបស់រាជរដ្ឋាភិបាល ដែលរួមមានទាំងយុទ្ធសាស្រ្ដបញ្ចកោណដំណាក់កាលទី១ និងគោលដៅអនុសញ្ញាសកលនានា ដែលកម្ពុជាកំពុងផ្ដល់សច្ចាប័នជាដើម។

ការលើកឡើងខាងលើរបស់សម្ដេចធិបតី ធ្វើឡើងក្នុងពេលដែលសម្ដេចអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤។

សម្ដេចធិបតី បានបន្ដថា កម្មវិធីវិនិយោគ៣ឆ្នាំរំកិល គឺជាឧបករណ៍សម្រាប់អនុវត្ដគោលនយោបាយអាទិភាពដែលមានចែងនៅក្នុងផែនការយុទ្ធសាស្រ្ដអភិវឌ្ឍជាតិ និងជាធាតុចូលសម្រាប់ការរៀបចំក្របខ័ណ្ឌហិរញ្ញវត្ថុសាធារណៈរយៈពេលមធ្យម ក្រមខ័ណ្ឌថវិការយៈពេលមធ្យម និងច្បាប់ហិរញ្ញវត្ថុសម្រាប់ការគ្រប់គ្រងប្រចាំឆ្នាំ។ សម្ដេចធិបតីបានបន្តថា គោលដៅអភិវឌ្ឍប្រកបដោយចីរភាព និងរបាយការណ៍ត្រួតពិនិត្យថ្នាក់ជាតិនិងថ្នាក់ក្រោមជាតិ គឺឯកសារដែលមានសារៈសំខាន់សម្រាប់អនុវត្ដគោលដៅ និងអនុសញ្ញាសកលដែលកម្ពុជាបានផ្ដល់សច្ចាប័ន។ ជាមួយគ្នានេះ កម្មវិធីធ្វអត្ដសញ្ញាណកម្មគ្រួសារក្រីក្រ បានជួយដល់គ្រួសារក្រីក្រនិងគ្រួសារងាយរងហានិភ័យតាមរយៈកម្មវិធីគាំពារសង្គម និងការគាំពារសុខភាព។

ទន្ទឹមនឹងនេះ សម្ដេចធិបតី បានមានប្រសាសន៍ថា គោលនយោបាយផែនការនិងយុទ្ធសាស្រ្ដទាំងនេះ នឹងមិនអាចវាស់វែងបានទេ បើមិនមានសូចនាករ ត្រួតពិនិត្យនិងវាយតម្លៃ។ ហើយការបង្កើតសូចនាករដែលសាមញ្ញ ជាក់លាក់ អាចវាស់វែងបាន អាចជឿទុកចិត្ដបាន និងមានពេលវេលាជាក់លាក់ ត្រូវមានទិន្នន័យ និងស្ថិតិដែលមានសុក្រឹតភាពនិងទាន់ពេលវេលា។ ដូច្នោះការងារស្ថិតិនិងទិន្នន័យ ពិតជាមានសារៈសំខាន់ណាស់ ក្នុងការជួយឱ្យអ្នករៀបចំគោលនយោបាយធ្វើការងារបានស៊ីជម្រៅ៕

សម្ដេចធិបតី ហ៊ុន ម៉ាណែត៖ ទិន្នន័យដែលត្រឹមត្រូវ អាចធ្វើឱ្យយើងដាក់ចេញផែនការត្រឹមត្រូវ ហើយទិន្នន័យគ្រប់ជ្រុងជ្រោយអាចធ្វើឱ្យយើងធានានូវនិរន្ដភាពនិងប្រសិទ្ធិភាពនៃការអនុវត្ដ

 

នៅក្នុងឱកាសអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤ សម្ដេចធិបតី ហ៊ុន ម៉ាណែត បានផ្ដល់នូវទស្សនៈផ្ទាល់ខ្លួនមួយចំនួន ដល់ក្រសួងផែនការ ក្នុងការប្រៀបធៀបរៀបចំផែនការនិងស្ថិតិ ដោយក្នុងនោះសម្ដេចធិបតី បានលើកឡើងថា ទិន្នន័យត្រឹមត្រូវ អាចធ្វើឱ្យយើងដាក់ចេញផែនការត្រឹមត្រូវ ហើយទិន្នន័យគ្រប់ជ្រុងជ្រោយអាចធ្វើឱ្យយើងធានានូវនិរន្ដភាពនិងប្រសិទ្ធិភាពនៃការអនុវត្ដ។ សម្ដេចថា បច្ចុប្បន្នបើគេចង់ធ្វើអ្វីមួយ គឺគេត្រូវផ្ដោតទៅលើវិទ្យាសាស្រ្ដទាំងអស់ ដោយមិនអាចគ្រាន់តែទស្សទាយបានោះទេ។  

សម្ដេចបានបន្ដថា យើងត្រូវមានផែនការយូរអង្វែងដោយប្រៀបធៀបនិងតាមដាននូវការវិវឌ្ឍនៃវិស័យសេដ្ឋកិច្ច និងការប្រែប្រួលលើពិភពលោក ជាពិសេសលើវិស័យនយោបាយនិងសន្ដិសុខជាតិ ដែលជាមូលដ្ឋាននៃការកសាងផែនការរបស់យើង ជាពិសេសការរៀបចំនូវផែនការយុទ្ធសាស្រ្ដរយៈពេលវែង ដូចជាយុទ្ធសាស្រ្ដបញ្ចកោណជាដើមដែលមានរយៈពេល២៥ឆ្នាំ។ បើយើងរៀបចំផែនការតាមតែអារម្មណ៍ និងការនឹកឃើញ ១ឆ្នាំម្ដង ២ឆ្នាំម្ដង ដោយគ្មានទិសដៅ គ្មានសង្គតិភាពរយៈពេលវែងទេ យើងនឹងច្រលំបល់ ហើយធនធានមនុស្សរបស់យើងក៏មិនអាចធានាបានដូចគ្នា។ ដូច្នោះការរៀបចំផែនការគឺជារឿងសំខាន់ណាស់ ពោលគឺសំខាន់ទៅលើការរៀបចំ ប្រមូលវិភាគទិន្នន័យបានច្បាស់លាស់។

ទន្ទឹមនឹងនេះ ការងារប្រជាជននិងការអភិវឌ្ឍ ប្រៀបដូចទៅនឹងដងខ្លួនមនុស្សទាំងមូល។ ក្នុងន័យនេះ ការរៀបបចំផែនការមួយដែលមានលក្ខណៈគ្រប់គ្រាន់ គ្រប់ជ្រុងជ្រោយ និងឆ្លើយតបទៅនឹងតម្រូវការសង្គម ទាមទារនូវទិន្នន័យចាំបាច់ដើម្បីធានាឱ្យបាននូវប្រសិទ្ធភាព។ ដូច្នេះការងារផែនការ ស្ថិតិ ប្រជាជន និងការអភិវឌ្ឍត្រូវតែអនុវត្ដ និងត្រូវតែប្រកាន់ខ្ជាប់នូវអភិក្រមចុល្លភាពនៃប្រព័ន្ធតួអង្គតែមួយ ដែលនឹងបង្កើតជាកម្លាំងចលករយ៉ាងសំខាន់សម្រាប់គ្រប់ភាគីពាក់ព័ន្ធ និងអនុវត្ដការងារកែទម្រង់ដែលមានសង្គតិភាព ទាំងការពង្រឹងអភិបាលកិច្ចនិងការពង្រឹងគុណភាពស្ថាប័ន។ នៅក្នុងន័យនេះ ការគ្រប់គ្រងទិន្នន័យ វិភាគទិន្នន័យ និងការប្រមូលទិន្នន័យគឺមានភាពចាំបាច់ណាស់ ដែលទាមទារឱ្យក្រសួង ស្ថាប័ននីមួយៗត្រូវពង្រឹងសមត្ថភាពមន្រ្ដីរបស់ខ្លួនឱ្យមានសមត្ថភាពក្នុងការប្រមូលទិន្នន័យ។ 

សម្ដេចបន្តថា រាជរដ្ឋាភិបាលមាន៣០ស្ថាប័ន ហើយបើស្ថាប័ននីមួយៗយកទិន្នន័យរបស់ខ្លួនទៅធ្វើផែនការនោះ ប្រាកដជាវីវរមិនខាន។ ដូច្នេះហើយយើងត្រូវមានតួអង្គរួមមួយដែលជាអ្នកសំយោគនិងជាអ្នកដាក់ចេញនូវផែនការសម្រាប់ស្ថាប័នទាំងជាង៣០អនុវត្ត៕

សម្ដេចធិបតី អរគុណដល់ ឯកឧត្តម កិតិ្ដសេដ្ឋាបណ្ឌិត ឆាយ ថន ដែលបានដឹកនាំក្រសួងផែនការយ៉ាងល្អក្នុងរយៈពេលជាង២៥ឆ្នាំកន្លងមក

សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានថ្លែងអំណរគុណ និងដឹងគុណដល់ឯកឧត្តមកិតិ្ដសេដ្ឋាបណ្ឌិត ឆាយ ថន ដែលបានដឹកនាំក្រសួងផែនការយ៉ាងល្អក្នុងរយៈពេលជាង២៥ឆ្នាំកន្លងមក។ សម្ដេចធិបតីបានសង្កត់ធ្ងន់ថា ឯកឧត្តម កិតិ្ដសេដ្ឋាបណ្ឌិត ឆាយ ថន ពិតជាបានកសាងនិងរក្សាទុកនូវសមិទ្ធផលជាច្រើនទុកឱ្យអ្នកជំនាន់ក្រោយ ជាពិសេសការអភិវឌ្ឍមូលធនមនុស្សលើវិស័យផែនការ ស្ថិតិព្រមទាំងប្រជាសាស្រ្ដនិងកាអភិវឌ្ឍ។ 

ការលើកឡើងនូវការដឹងគុណ របស់សម្ដេចធិបតី នេះ ធ្វើឡើងនៅក្នុងឱកាសដែលសម្ដេចអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤៕

សម្ដេចធិបតី ហ៊ុន ម៉ាណែត៖ ក្រសួងផែនការមានតួនាទីសំខាន់ ជាសេនាធិការរបស់រាជរដ្ឋាភិបាល នៅក្នុងការសម្របសម្រួល ការរៀបចំផែនការយុទ្ធសាស្រ្ដអភិវឌ្ឍជាតិ

សម្ដេចធិបតី ហ៊ុន ម៉ាណែត បានលើកឡើងថា ក្រសួងផែនការមានតួនាទីសំខាន់ ជាសេនាធិការរបស់រាជរដ្ឋាភិបាល នៅក្នុងការសម្របសម្រួល ការរៀបចំផែនការយុទ្ធសាស្រ្ដអភិវឌ្ឍជាតិ ផែនការវិនិយោគសារធារណៈ ការងារអត្ដសញ្ញាណគ្រួសារក្រីក្រ និងគ្រួសារងាយរងហានិភ័យ ការងារលើកកម្ពស់អាហាររូបត្ថម្ភ ការងាររៀបចំនិងគ្រប់គ្រងប្រព័ន្ធទិន្នន័យជាតិនិងផលិត និងផ្សព្វផ្សាយស្ថិតិជាតិលើវិស័យចម្បងៗដែលរួមមានស្ថិតិប្រជាសាស្រ្ដ សេដ្ឋកិច្ច សុខភាព សង្គមកិច្ច និងកសិកម្មសម្រាប់ក្រសួង ស្ថាប័ននានាប្រើប្រាស់ក្នុងការរៀបចំផែនការអភិវឌ្ឍ និងការតាមដានត្រួតពិនិត្យតាមវិស័យរបស់ខ្លួន និងការងារប្រជាជន និងការអភិវឌ្ឍ។

ការលើកឡើងខាងលើរបស់សម្ដេចធិបតី ធ្វើឡើងក្នុងពេលដែលសម្ដេចអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤។

ជាមួយគ្នានេះ សម្ដេចធិបតីបានបន្ដថា ក្រសួងផែនការគឺជាសេនាធិការរបស់រាជរដ្ឋាភិបាល នៅក្នុងការរៀបចំ និងសម្របសម្រួលការងារ ក្នុងផែនការអន្តរជាតិជាច្រើនទៀត រួមមាន៖ ការងារគោលដៅអភិវឌ្ឍប្រកបដោយចីរភាព ការងារពង្រឹងនិងតាមដានការអនុវត្ដកម្មវិធីសកម្មភាពនៃសន្និសិទអន្ដរជាតិស្ដីពីប្រជាជននិងការអភិវឌ្ឍ ការងាររៀបចំចាកចេញរបស់កម្ពុជាពីចំណាប់ថ្នាក់ប្រទេសអភិវឌ្ឍតិចតួច នៅក្នុងនោះសាលាជាតិផែនការ និងស្ថិតិ គឺជាមជ្ឈមណ្ឌលបណ្ដុះបណ្ដាលធនធានមនុស្សដ៏មានសារៈសំខាន់លើវិស័យផែនការ ស្ថិតិ និងវិទ្យាសាស្រ្ដ ដែលស្របជាមួយនឹងគោលនយោបាយរបស់រាជរដ្ឋាភិបាលក្នុងការអភិវឌ្ឍធនធានមនុស្ស៕