លិខិតរបស់ក្រសួងមហាផ្ទៃ ជម្រាបជូនលោកនិពន្ធនាយកសារព័ត៌មាន Phnom Penh Post

មហាក្សត្រ និង​គណៈ​ប្រតិ​ភូស្ថាប័ន​កំពូល ចូល​គោរព​វិញ្ញាណ​ក្ខន្ធ​សម្តេច ជា ស៊ីម

នាព្រឹកថ្ងៃទី១០ ខែមិថុនានេះ ព្រះមហាក្សត្រនៃព្រះរាជាណាចក្រកម្ពុជា ព្រះករុណា​ព្រះបាទសម្តេច ព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនីនាថ សីហនុ  បានយាងចូលគោរពវិញ្ញាណក្ខន្ធនៃសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ប្រធានគណបក្សប្រជាជនកម្ពុជា និងជាប្រធានគណៈអធិបតីកិត្តិយស​ក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា ដែលបានទទួលមរណៈភាពកាលពី វេលាម៉ោង១៥និង៤៥នាទី រសៀលថ្ងៃទី៨ ខែមិថុនាឆ្នាំ២០១៥ ដោយរោគាពាធ ក្នុងជន្មាអាយុ​៨៣ឆ្នាំ។​ ពិធីបុណ្យសព ត្រូវបានរៀបចំធ្វើនៅភូមិគ្រឹះរបស់សម្តេចអគ្គមហាធម្មពោ​ធិសាល​​​​ជា ស៊ីម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយព្រះរាជក្រឹត ចេញ​កាលពីថ្ងៃទី៨ ខែមិថុនាឆ្នាំ២០១៥ បានបង្គាប់ឲ្យបង្កើតគណៈកម្មការរៀបចំពិធីបុណ្យសពនេះ​ឲ្យបានល្អសក្តិសមទៅនឹងឋានៈរបស់សម្តេច។

រីឯវត្តមានរបស់គណៈប្រតិភូស្ថាប័នរដ្ឋសភាដែលចូលគោរពវិញ្ញាណក្ខន្ធ គឺដឹកនាំដោយ​សម្តេច​អគ្គមហាពញាចក្រី ហេង សំរិន ប្រធានរដ្ឋសភា ហើយក៏មានវត្តមានឯកឧត្តម កឹម សុខា អនុប្រធានទី១ រដ្ឋសភាផងដែរ។  ដោយឡែកសម្តេច តេជោ ហ៊ុន​ សែន នាយករដ្ឋមន្រ្តី និងជាអនុប្រធានគណបក្សប្រជាជនកម្ពុជា​បានដឹកនាំគណៈប្រតិភូរាជរដ្ឋាភិបាលកម្ពុជា ចូល​គោរពវិញ្ញាណក្ខន្ធសពសម្តេចអគ្គមហាធម្មពោ​ធិសាលជាស៊ីម នាព្រឹកថ្ងៃទី១០ ខែមិថុនា​នេះ​ផងដែរ។

វត្តមានជាបន្តបន្ទាប់ដែលចូលគោរពវិញ្ញាណក្ខន្ធ មានដូចជាគណៈប្រតិភូព្រឹទ្ធសភា ដឹកនាំ​ដោយ ឯកឧត្តម សាយ ឈុំ ដែលទើបបាន​ទទួលសំលេង​បោះឆ្នោតជា​ប្រធានថ្មីនៃ​ព្រឹទ្ធសភា កាលពីថ្ងៃទី ៩ ខែមិថុនាឆ្នាំ២០១៥នេះ។ គណៈប្រតិភូនៃក្រសួងព្រះបរមរាជវាំង ដឹកនាំដោយ​សម្តេច ចៅហ្វាវំាង គង់ សំអុល និងគណៈប្រតិភូកាកបាទក្រហមកម្ពុជា ដឹកនាំដោយ​សម្តេច​កិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា។

បើតាមសារាចរណែនាំរបស់រាជរដ្ឋាភិបាលកម្ពុជាចេញកាលពីថ្ងៃទី៨ ខែមិថុនាកន្លងមកនេះ​ បានបញ្ជាក់ថា នឹងយកថ្ងៃទី១៩ ខែមិថុនាឆ្នាំ២០១៥ ជាថ្ងៃកាន់ទុក្ខជាផ្លូវការ ដោយនៅក្នុង​ថ្ងៃ​កាន់​ទុក្ខនោះ គ្រប់ក្រសួងស្ថាប័នរដ្ឋនិងឯកជនទាំងអស់ ព្រមទាំងប្រជាជនទូទំាងប្រទេស ត្រូវបង្ហូត​ទង់ជាតិត្រឹមមួយភាគបីនៃដងទង់ជាតិចាប់លើ។ រីឯគ្រប់ស្ថានីយវិទ្យុទូរទស្សន៍​ជាតិ និងឯកជន គឺត្រូវផ្អាកការសម្តែងនិងការចាក់ផ្សាយដែលមានលក្ខណៈ​សប្បាយគគ្រឹក​គគ្រេង​ផងដែរក្នុងថ្ងៃកាន់ទុក្ខនោះ។ ហើយនៅក្នុងកម្មវិធីបុណ្យសពនេះ បានបញ្ជាក់ថា សពរបស់​សម្តេចអគ្គមហាធម្ម​ពោធិសាល ជាស៊ីម នឹងត្រូវធ្វើពិធីរំកិលចេញទៅលើរថយន្តបុស្បុក​និង​ដង្ហែ នៅព្រឹកថ្ងៃទី១៩ ខែមិថុនា ខាងមុខនេះ។

គួររំលឹកថា សម្តេចអគ្គមហាធម្មពោធិសាល ជា ស៊ីម បានក្លាយជាប្រធាន​គណបក្ស​ប្រជាជន​កម្ពុជាចាប់តាំងពីឆ្នាំ១៩៩១មកដល់ពេលបច្ចុប្បន្ន។ ហើយពីឆ្នាំ១៩៨១ដល់ឆ្នាំ១៩៩៩ ជា​ប្រធាន​​រដ្ឋសភា។ ពីឆ្នាំ១៩៩៩មកដល់ពេលទទួលមរណៈភាព គឺជាប្រធានព្រឹទ្ធសភា ដោយ​នៅក្នុង​ឆ្នាំ២០១០​​​ សម្តេច​អគ្គមហាធម្មពោធិសាល ជា ស៊ីម បានទទួលសញ្ញាបត្រ​បណ្ឌិត​កិត្តិយស​ផ្នែកទស្សនវិជ្ជា និងផ្នែកជាអ្នកដឹកនាំកិច្ចការព្រឹទ្ធសភាពីសាកលវិទ្យាល័យ ឌីអូជិន សឺមីណឺរី សហរដ្ឋអាមេរិក។

ចំពោះគ្រឿងឥស្សរិយយស និងគោរមងារវិញ សម្តេច​អគ្គមហាធម្មពោធិសាល ជា ស៊ីម បាន​ទទួលងារជា សម្តេច ពីព្រះករុណា ព្រះបាទសម្តេចព្រះ នរោត្តម សីហនុ កាលពីឆ្នាំ​១៩៩៣ និងបានទទួលងារជា សម្តេចអគ្គមហាធម្មពោធិសាល ពីព្រះករុណាសម្តេចព្រះបាទ ព្រះបរម​នាថ នរោត្តម សីហមុនី កាលពីឆ្នាំ២០០៧។​ និងក្នុងឆ្នាំ ២០១១ បានទទួលគោរមងារជា កិត្តិព្រឹទ្ធបណ្ឌិត នៃរាជបណ្ឌិតសភាកម្ពុជា ពីព្រះមហាក្សត្រ។

ក្រៅពីនេះ ក្នុងឆ្នាំ២០០៩ក៏បានទទួលគ្រឿង​ឥស្សរយយសមាស ខ្ពស់បំផុត ពីប្រធានរដ្ឋសភា​នៃប្រជាធិបតេយ្យប្រជាមានិតឡាវ។ និងក្នុងឆ្នាំ២០១៣កន្លងមកនេះ បានទទួលគ្រឿង​ឥស្សរិយយស ថ្នាក់ខ្ពស់បំផុតនៃប្រទេសជប៉ុន ដែលហៅថា Grand cordon of the Orders of the Rising Sun ពីអធិរាជជប៉ុនផងដែរ៕       

សម្តេចតេជោ ហ៊ុន សែន ជួប​គណៈ​ប្រតិ​ភូបក្ស​កុំម្មុយ​នីស្តវៀតណាម

នៅក្នុងជំនួបសម្តែងការគួរសមរបស់ ឯកឧត្តម ឡឺ ហុងអាញ់ សមាជិកការិយាល័យ​នយោបាយ​នៃគណបក្សកុំម្មុយនីស្តវៀតណាម នារសៀលថ្ងៃទី០៩ ខែមិថុនានេះ​ នៅវិមាន សន្តិភាព​សម្តេចតេជោនាយករដ្ឋមន្ត្រី ហ៊ុន សែន បានស្នើឲរដ្ឋាភិបាលវៀតណាមបន្ត រក្សា ស្ថានភាព ស្ងៀមស្ងាត់នៅតំបន់ព្រំដែនកម្ពុជា-វៀតណាម ជាពិសេសក្នុងតំបន់ ព្រំដែន នៃ ខេត្តរតនគិរីរបស់កម្ពុជា ដែលរដ្ឋាភិបាលប្រទេសទាំង២​កំពុងធ្វើការសំរបសំរួល និងរក ដំណោះស្រាយលើបញ្ហាមិនទាន់ឯកភាពគ្នា ធ្វើយ៉ាងណាឲទំនាក់​ទំនងភាគីប្រទេសទាំង​២កម្ពុជា-វៀតណាមនៅតែល្អ​ដដែល។ ចំពោះសំណើរនេះ គណៈប្រតិភូវៀតណាម ក៏បាន ឯកភាពបន្តរក្សាស្ថានភាពរវាងប្រទេសទាំង២ដដែល។

សម្តេចតេជោ ហ៊ុនសែន ក៏បានជំរាបជូនថា នាពេលខាងមុខ គណបក្សប្រជាជនកម្ពុជា នឹង រៀបចំ សមាជពិសេសមួយ ដើម្បីរៀបចំអ្នកដឹកនាំគណបក្ស ប៉ុន្តែនៅក្នុងទ្រង់ទ្រាយយ៉ាង ណានោះ គណបក្សប្រជាជនកម្ពុជា មិនទាន់បានបញ្ជាក់នៅឡើយ។

ក្នុងជំនួបនោះដែរ ភាគីកម្ពុជា-វៀតណាម ក៏បានពិភាក្សាគ្នា​ជាច្រើនធ្វើយ៉ាងណាឲ្យ​ទំហំ​ពាណិជ្ជកម្ម​​ រវាងប្រទេសទាំង២អាចបន្តកើនឡើងរហូតដល់៥ពាន់លាន​ដុល្លារអាមេរិកក្នុង​មួយឆ្នាំ ដោយបច្ចុប្បន្ន​​ទំហំ​​ពាណិជ្ជកម្មរវាង ប្រទេសកម្ពុជានិងវៀតណាម មានជាង​២ពាន់​លាន​ដុល្លារអាមេរិក៕  

សម្តេច ហេង សំរិន ដឹកនាំសមាជិក សមាជិកា និងថ្នាក់ដឹកនាំនៃរដ្ឋសភា ចូលគោរពវិញ្ញាណក្ខន្ធសព សម្តេចអគ្គមហាធម្មពោធិសាល ជា ស៊ីម

សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ដឹកនាំសមាជិក សមាជិកានិងថ្នាក់ដឹកនាំនៃរដ្ឋសភា ចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា នាព្រឹកថ្ងៃទី១០ ខែមិថុនា ឆ្នាំ២០១៥ នៅភ្នំពេញ។
រូបថតៈ ស៊ិន សារ៉េត

សម្តេចនាយករដ្ឋមន្រ្តី ហ៊ុន សែន ដឹកនាំសមាជិក សមាជិកា និងថ្នាក់ដឹកនាំ ក្នុងរាជរដ្ឋាភិបាល អញ្ជើញចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាល ជា ស៊ីម

សម្តេចអគ្គមហាសេនាបតីតេជោហ៊ុនសែននាយករដ្ឋមន្រ្តីនៃព្រះរាជាណាចក្រកម្ពុជាដឹកនាំសមាជិក
សមាជិកា និងថ្នាក់ដឹកនាំក្នុងរាជរដ្ឋាភិបាល អញ្ជើញចូលគោរពវិញ្ញាណក្ខន្ធសពសម្តេចអគ្គមហា
ធម្មពោធិសាល ជា ស៊ីម អតីតប្រធានព្រឹទ្ធសភា នាព្រឹកថ្ងៃទី១០ ខែមិថុនា ឆ្នាំ២០១៥ នៅភ្នំពេញ។
រូបថតៈ ស៊ិន សារ៉េត

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដឹកនាំគណៈប្រតិភូកាកបាទក្រហមកម្ពុជា អញ្ជើញចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាល ជា ស៊ីម

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែនប្រធានកាកបាទក្រហមកម្ពុជាដឹកនាំគណៈប្រតិភូកាកបាទក្រហមកម្ពុជា អញ្ជើញចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាល ជា ស៊ីម អតីតប្រធាន
ព្រឹទ្ធសភា នាព្រឹកថ្ងៃទី១០ ខែមិថុនា ឆ្នាំ២០១៥ នៅភ្នំពេញ។
រូបថតៈ ស៊ិន សារ៉េត

ប្រធានរដ្ឋសភាវៀតណាម អញ្ជើញចូលគោរពវិញ្ញាណក្ខន្ធសព សម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភានៃព្រះរាជាណាចក្រកម្ពុជា

ឯកឧត្តម Nguyen Sinh Hung ដឹកនាំគណៈប្រតិភូសភាវៀតណាម អញ្ជើញចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភាកម្ពុជា នាព្រឹកថ្ងៃទី១០ ខែមិថុនា ឆ្នាំ២០១៥ នៅភ្នំពេញ។
រូបថតៈ ស៊ិន សារ៉េត