សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហាញពីការមិនយល់ស្របទៅ និងការប្រើភាសារបស់បណ្តាញឃោសនានានានៅលើពិភពលោក ដែលតែងតែលើកឡើងអំពីមូស្លីមនិយមជ្រុល។ សម្ដេចតេជោក៏បានអំពាវនាវសម្រាប់ផ្នែកសារព័ត៌មាន តែសារព័ត៌មានកម្ពុជាមិនសូវជាប៉ុន្មានទេ ក៏ប៉ុន្ដែខ្ញុំបានឃើញទូរទស្សន៍ធំៗ និង កាសែតធំៗរបស់ពិភពលោកតែងបាននិយាយទៅដល់ពាក្យមូស្លីមនិយមជ្រុល ខ្ញុំគិតថា ភាសានេះពិតជាមានការខុសឆ្គងដ៏ធ្ងន់ធ្ងរនៅក្នុងបញ្ហាការបែងចែកតំបន់ពិភពលោក ដែលឈានទៅដល់ការរើសអើងជាតិសាសន៍នៅក្នុងពិភពលោក។ ដោយឡែកសំរាប់ព្រះរាជាណាចក្រកម្ពុជា សម្តេចអគ្គមហាសេនាបតីតេជោ ហ៊ុន សែន បានវាយតម្លៃខ្ពស់ចំពោះភាពសុខដុមនីយកម្មជនជាតិ និងសាសនាថា ពិតជាមានសារសំខាន់ខ្លាំងណាស់នៅក្នុងការថែរក្សាស្ថិរភាពជាតិ ឯកភាពជាតិរបស់កម្ពុជា។
នារាត្រីថ្ងៃទី១៨ ខែកក្កដា ឆ្នាំ២០១៤ នៅមជ្ឈមណ្ឌលសន្និបាតកោះពេជ្រ ពេលអញ្ជើញចូលរួមជាលើកទី១ និងជាផ្លូវការក្នុងពិធីអាហារស្រាយបួសខែរ៉ាម៉ាឌន នៃសាសនាឥស្លាមកម្ពុជា ដោយមានការអញ្ជើញចូលរួមពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាផង សម្ដេចតេជោបានមានប្រសាសន៍បញ្ជាក់ថា បញ្ហានិយមជ្រុលមិនមែនចេញមកពីប្រភពរបស់មូស្លីមនោះទេ ជ្រុលនិយមវាមានចេញមកពីគ្រប់ជាតិសាសន៍ និងគ្រប់សាសនាទាំងអស់ ដូច្នេះមិនគួរនិយាយឡើង«មូស្លីមនិយមជ្រុល» នោះទេ ហើយរឿងនេះពិតជាមិនអាចទទួលយកបានមិនថា ករណីបងប្អូនជាមូស្លីមនោះទេ ប៉ុន្តែខ្ញុំជាអ្នកកាន់សាសនាព្រះពុទ្ធ ខ្ញុំក៏មិនអាចទទួលយកបាន ដោយចោទប្រកាន់ថា ឲ្យតែមូស្លីមសុទ្ធតែនិយមជ្រុល។
សម្តេចតេជោមានប្រសាសន៍ថា និយមជ្រុលចេញពីព្រះពុទ្ធក៏និយមជ្រុល ហិនណ្ឌូក៏និយមជ្រុល គ្រិស្តក៏និយមជ្រុល ក្នុងមូស្លីមក៏និយមជ្រុល ដូច្នេះមិនអាចប៉ាវទៅលើផ្នែកណាមួយបានទេ សូម្បីតែនៅកម្ពុជា ក៏មានក្រុមតូចមួយនិយមជ្រុលដែរ ហើយក្រុមនោះក៏មិនមែនជាឥស្លាមទៅទៀត នៅប្រទេសនានាមានដូចគ្នា ដូច្នេះបញ្ហានេះទាមទារឲ្យមានការប្រុងប្រយ័ត្ន។
សម្ដេចតេជោបន្តថា ខ្ញុំកាន់តែមិនយល់ស្រប ហើយថែមទាំងរកគ្រប់វិធី ដើម្បីរារាំងនូវការចោទប្រកាន់ផ្សេងៗ របស់ប្រទេសខ្លះពាក់ព័ន្ធទៅនឹងសកម្មភាពរបស់មូស្លីមកម្ពុជា ដូចជាការចោទប្រកាន់ថា មូស្លីមកម្ពុជាបានទៅប្រយុទ្ធនៅទីនេះ ឬទីនោះ ហើយចុងក្រោយនេះមានការលើកឡើងពីពួកក្រុម ដែលធ្វើសកម្មភាពនានាថា មូស្លីមកម្ពុជាមានការចូលរួមចំណែកប្រយុទ្ធនៅកន្លែងនេះ ឬនៅកន្លែងនោះ។
សំរាប់ព្រះរាជាណាចក្រកម្ពុជាសម្តេចតេជោបានមានប្រសាសន៍បញ្ជាក់ថា សុខដុមនីយកម្មជនជាតិ និងសាសនាពិតជាមានសារសំខាន់ខ្លាំងណាស់ នៅក្នុងស្ថិរភាពជាតិ ឯកភាពជាតិ របស់កម្ពុជា ដូច្នេះតាំងពីដើមរហូតដល់ចប់ បន្ទាប់ពីថ្ងៃរំដោះ៧ មករា ឆ្នាំ១៩៧៩ តាំងពីដំណាក់កាលទី១ យើងបានយកចិត្តទុកដាក់ បំផុតទៅលើការធ្វើសុខដុមនីយកម្មរវាងជនជាតិ និងសាសនា ដែលក្នុងនោះបន្ទាប់ ពីព្រះពុទ្ធសាសនា គឺមានឥស្លាមសាសនា។ នៅកម្ពុជាយើងមានមោទនភាពមិនត្រឹមតែបញ្ហានិកាយខុសគ្នាប៉ុណ្ណោះទេ ក៏ប៉ុន្តែសាសនាខុសគ្នាដែលរួមមានសាសនាទីទៃៗពីគ្នា ក៏មិនដែលមានបញ្ហាជាមួយគ្នានោះទេ ហើយនេះជាការបង្ហាញអំពីសាមគ្គីភាពនៅក្នុងប្រទេសរបស់យើង។
សម្ដេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ជាការពិតសមិទ្ធផលសំខាន់ៗដែលសាសនិកអ៊ីស្លាមកម្ពុជាទទួលបាន បន្ទាប់ពីថ្ងៃរំដោះមកដល់បច្ចុប្បន្នដែលមានរយៈពេលជាង៣០ឆ្នាំមកនេះ គឺបានឈរលើបរិយាកាសសង្គមមួយ ដែលប្រកបដោយលក្ខណៈ អំណោយផល មានសន្ដិភាព និងស្ថិរភាព និងការយកចិត្ដទុកដាក់ខ្ពស់របស់រាជរដ្ឋាភិបាលកម្ពុជា។ តាមរយៈនេះ យើងក៏អាចមើលឃើញប្រត្យក្សផងដែរថា អ្វីៗដែលយើងទទួលបានក្នុងពេល នេះមិនមែនរឿងធម្មតានោះទេ ពីព្រោះថា ក្នុងអំឡុងពេលដែលកម្ពុជាកំពុងកសាងប្រទេសជាតិមួយពីគំនរនៃផេះផង់ ដែលស្ថិតក្នុងកម្រិតសូន្យ ឬក្រោមសូន្យនៅក្រោយថ្ងៃ៧ មករា ១៩៧៩នោះ កម្ពុជាក៏ត្រូវធ្វើឱ្យមានសុខដុមនីយកម្មក្នុងចំណោមសាសនិកនានានៅលើទឹកដីកម្ពុជាទាំងមូល។
សម្ដេចតេជោបន្ដថា នៅកម្ពុជាយើង មានមោទនភាពណាស់មិនត្រឹមតែបញ្ហានិកាយខុសគ្នាប៉ុណ្ណោះទេ ប៉ុន្ដែសាសនាខុសគ្នា ដែលរួមមានសាសនាទីទៃៗពីគ្នា ក៏ប៉ុន្ដែមិនមានបញ្ហាជាមួយគ្នានោះទេ។ សម្ដេចបានបញ្ជាក់ថា សម្ដេចមានមោទនភាពយ៉ាងខ្លាំង នៅពេលដែលសម្ដេចអញ្ជើញទៅសម្ពោធសមិទ្ធផលខាងសាសនាអ៊ីស្លាម មានពុទ្ធសាសនិកចូលរួម ហើយនៅពេលដែល សម្ដេចទៅសម្ពោធសមិទ្ធផលព្រះពុទ្ធសាសនានៅមូលដ្ឋាន គឺមានសាសនិក អ៊ីស្លាមចូលរួមដែរនេះ ជាការបង្ហាញ ពីសាមគ្គីភាពនៅក្នុងប្រទេសរបស់យើង។
សម្ដេចតេជោនាយករដ្ឋមន្ត្រីបានសម្តែងនូវក្ដីមោទនផងដែរ ចំពោះគោលនយោបាយដែលសម្ដេចបានដាក់ចេញនោះ គឺគោលនយោបាយអនុញ្ញាតឲ្យសិស្ស និស្សិត ដែលជាសាសនិក ឥស្លាមអាចស្លៀកសម្លៀកបំពាក់របស់ខ្លួនចូលទៅតាមសាលាគ្រប់កម្រិត តាំងពីបឋមរហូតទៅដល់សាកលវិទ្យាល័យ ដោយសម្ដេចបានបញ្ជាក់ថា នៅប្រទេសមួយចំនួនបានរារាំងនិស្សិតមូស្លីមមិនអនុញ្ញាតឲ្យស្លៀកសម្លៀកបំពាក់ តាមបែបមូស្លីមចូលទៅក្នុងសាលានោះទេ ក៏ប៉ុន្តែសម្រាប់កម្ពុជា ដោយមើលឃើញថា មានការចាំបាច់នូវការគោរពប្រណិប័តន៍ជាពិសេស គឺនិស្សិតជាស្ត្រី ដែលមិនអាចឲ្យអ្នកផងទាំងពួងអាចមើលឃើញនូវត្រចៀក ឬក៏រូបកាយ ឬអាថ៌កំបាំងយ៉ាងណានោះ គឺរាជរដ្ឋាភិបាលសម្រេចចិត្តបើកឱកាសសម្រាប់ស្ត្រី ឬក៏ជាបុរស អាចស្លៀកពាក់បានយ៉ាងដូច្នេះ ដែលការនេះក៏ជាការដោះរបាំងមួយ ដើម្បីអភិវឌ្ឍន៍ធនធានមនុស្ស ក្នុងសាសនិកឥស្លាមផងដែរ។
ទាក់ទិននឹងសកម្មភាពអ្នកកាន់សាសនាឥស្លាមនៅលើពិភពលោក សម្តេចតេជោបានមានប្រសាសន៍ឲ្យដឹងថា ខ្ញុំក៏សូមជម្រាបជូនបងប្អូនថ្នាក់ដឹកនាំឥស្លាមក៏ដូចជាសាសនិកឥស្លាមផងដែរថា បន្ទាប់ពីមានសំណើរបស់ឯកឧត្ដម អូស្មាន ហា ស្សាន់ រួចមក ក្រសួងការបរទេស និងសហប្រតិបត្តិការអន្តរជាតិ ដែលដឹកនាំដោយឯកឧត្ដម ឧបនាយករដ្ឋមន្ត្រី ហោ ណាំហុង បានធ្វើការសិក្សាហើយនៅពេលខាងមុខនេះ កម្ពុជានឹងស្នើសុំចូលជាអ្នកសង្កេតការណ៍ នៃប្រទេសជាសន្និសីទឥស្លាម កម្ពុជានឹងខិតខំដើម្បីជំរុញខ្លួនឲ្យក្លាយទៅជាអ្នកសង្កេតការណ៍ ដោយសារប្រទេសរបស់ខ្លួនក៏មានបងប្អូនមូស្លីម ហើយម្យ៉ាងទៀតបើសិនជាយើងអាចរួមចំណែកបាននៅក្នុងការធ្វើសុខដុមនីយកម្មជាតិសាសន៍ សាសនា នៅលើពិភពលោកវាក៏ជាការប្រសើរ។
សម្ដេចអគ្គមហាសេនាបតីតេជោ ហ៊ុន សែន ក៏បានប្រកាសឲ្យដឹងថា សម្តេចនឹងចូលរួមនៅ ក្នុងបុណ្យ រ៉ាម៉ាឌន របស់សាសនិក អ៊ិស្លាមកម្ពុជាជារៀងរាល់ឆ្នាំ ហើយបន្ទុកនៃការចំណាយទៅលើការរៀបចំ ពិធីបុណ្យនេះ គឺរាជរដ្ឋាភិបាលជាអ្នករ៉ាប់រង៕
