សិក្ខាសាលាផ្សព្វផ្សាយគោលការណ៍ណែនាំ ស្ដីពី ការប្រើប្រាស់គោលការណ៍ណែនាំ អនុវត្តការវាស់គំហើញសិស្សតាមសាលារៀន

នៅព្រឹក​ថ្ងៃទី១៩ ខែកុម្ភៈ ឆ្នាំ២០១៦ ឯកឧត្តម​បណ្ឌិត ហង់ ជួន ណារ៉ុន រដ្ឋមន្ត្រី​ក្រសួងអប់រំ    យុវជន និងកីឡា អញ្ជើញជា​អធិបតីភាព ក្នុងសិក្ខាសា​លាផ្សព្វផ្សាយគោល​ការណ៍ណែនាំស្ដីពី ការប្រើប្រាស់គោល​ការណ៍ណែនាំអនុវត្តការវាស់គំ​ហើញសិស្សតាមសាលា​រៀន នៅសណ្ឋាគារ Imperial Garden Villa and Hotel មានវត្តមានចូល​រួមពីលោក​ជំទាវ ឱ វ៉ាន់ឌីន អគ្គនាយកនៃ​ក្រសួងសុខាភិបាល ឯកឧត្តម លោកជំទាវ លោក លោកស្រីតំ​ណាងអង្គការដៃគូ និងមន្ត្រីពាក់​ព័ន្ធជាច្រើន​រូបទៀត។

ឯកឧត្ត​មរដ្ឋមន្ត្រី ហង់ ជួន ណារ៉ុន បានថ្លែង​អំណរគុណដ៏​ជ្រាលជ្រៅចំ​ពោះដៃគូ និងស្ថាប័នពាក់ព័ន្ធនានា ដែលបាន​ផ្ដួចផ្ដើមធ្វើ​ឲ្យគោលការណ៍ ណែនាំអនុវត្តការវាស់​គំហើញសិស្ស​តាមសាលា​រៀន បានលេច​ចេញជារូបរាង​ឡើង។

ឯក​ឧត្តមរដ្ឋមន្ត្រី ហង់ ជួន ណារ៉ុន ក៏បានថ្លែង​បន្តទៀតថា ក្រសួង​អប់រំ យុវជន និងកីឡា បាននឹងកំពុង​យកចិត្តទុកដាក់​យ៉ាងខ្លាំងចំពោះ​ការអប់រំសុខភាព​របស់កុមារ និងយុ​វជន ក្នុងគោលបំណងធ្វើឲ្យពូក​គាត់អភិវឌ្ឍទាំងផ្នែ​ករាងកាយ បញ្ញា ស្មារតី សីលធម៌ ដើម្បីក្លា​យជាពលរដ្ឋល្អក្នុងសង្គម​ស្របតាមសសរស្តម្ភទាំង​៤របស់វិស័យអប់រំគឺ៖ រៀនដើម្បី​មានចំណេះដឹង រៀនដើម្បីមាន​ចំណេះធ្វើ រៀនដើម្បីឲ្យក្លាយពលរដ្ឋល្អ និងរៀនដើម្បី​រួមរស់ជា​មួយគ្នា៕

គណបក្ស​សង្គ្រោះ​ជាតិ​បានមាក់ងាយ​ខ្មែរ​នៅ​សហរដ្ឋ​អាមេរិកថា «ជាជន​ស៊ី​ឈ្នួល»

ទស្សនៈពលរដ្ឋខ្មែរ​

 បងប្អូន​ខ្មែរ​ប្រមាណ​ជាង៦០០នាក់នៅ​សហរដ្ឋ​អាមេរិក​ បានចំ​ណាយ​យក​ពេល​វេលាដ៏មានតម្លៃ​ខិតខំធ្វើដំ​ណើរមក​ពី​តំបន់​ឆ្ងាយៗ អ្នកខ្លះ​ជិះទ្បាន អ្នកខ្លះ​ជិះយន្តហោះ​មក​ពី​រដ្ឋ​ផ្សេងៗទៀត មក​កាន់​រដ្ឋកាលីហ្វ័រញ៉ា ​ដើម្បី​​ទទួល​ស្វាគមន៍រាក់​ទាក់ និងអបអរសាទរ​ លោកនាយករដ្ឋមន្ត្រី ហ៊ុន សែន ដែលបាន​អញ្ជើញ​មកចូល​រួម​កិច្ច​ប្រជុំ​កំពូល​ពិសេសអាស៊ាន‑ អាមេរិក នៅ​លើ​ទឹក​ដី​សហរដ្ឋ​អាមេរិក​​ កាល​ថ្ងៃ​ទី១៥ និង១៦ ខែ​មក​រា ឆ្នាំ​២០១៦។ នេះសបញ្ជាក់ឲ្យឃើញ​ពី​កាយ​វិការដ៏​ប្រពៃមិន​អាចកាត់​ថ្លៃបាន​របស់​បងប្អូន​ខ្មែរ​ដែល​បាន​​សម្តែងការ​​គោរព ​ស្រលាញ់ និង​គាំទ្រលោកនាយក​រដ្ឋ​មន្រ្តី ហ៊ុន សែន ដែល​ជា​ឥស្សជន​ឆ្នើមរបស់​កម្ពុជា​ ដែលបាននាំមកនូវ​សុខសន្តិភាព និងការ​អភិវឌ្ឍន៍ប្រទេស និង​​ធ្វើ​ឲ្យ​​ពិភព​លោកទទួល​ស្គាល់​ពី​​កិត្យា​នុភាព​របស់​កម្ពុជាលើឆាកអន្តរជាតិ ​​​។ ​

នៅក្នុង​កំទ្បុង​ពេល​ទៅ​ចូល​រួម​កិច្ច​ប្រជុំ​ពិសេសអាស៊ាននៅអាមេរិក​​ លោកនាយក​រដ្ឋ​មន្ត្រី ​ហ៊ុន សែន ក៏បាន​​ឆ្លៀត​យក​ពេល​វេលា​នោះជួប​ជុំសួរ​សុទុក្ខ និងសំណេះ​សំណាល​ជា​មួយ​បងប្អូន​ខ្មែរ​នៅ​សហរដ្ឋ​អាមេរិក​​ ដោយ​​​បានធ្វើ​ការ​អំពាវនាវ​ឲ្យ​​​ប្រជាពលរដ្ឋ​ខ្មែរនៅ​អាមេរិក​ចេះរួបរួម​គ្នា​ ដើម្បី​ការពារផល​ប្រយោជន៍​ជាតិជាធំ បើ​ទោះ​បី​ជាគាំទ្រគណ​បក្ស​ខាងណា ឬ​កាន់​សាសនា​អ្វី​ក៏​ដោយក៏​យើងនៅ​តែ​ជា​ខ្មែរ​​តែមួយ។

ក្រោយពីបាន​ស្តាប់​ប្រសាសន៍​លោកនាយក​រដ្ឋ​មន្ត្រី ហ៊ុន សែន ពេល​នោះបានធ្វើ​ឱ្យបងប្អូន​ខ្មែរ​រស់នៅ​សហរដ្ឋ​អាមេរិក​បាន​ដឹង​កាន់តែច្បាស់​អំពីល្បិច​កិច្ច​កល​ និ​ង​ការ​ឃោសនាមិន​ពិត​របស់​គណ​បក្ស​​សង្គ្រោះជាតិ​ដែល​ជាបុគ្គល​ជ្រុល​និយម​តែង​​​​​និយាយ​អាក្រក់​ពី​កម្ពុជាកន្លង​មក ​ដែលពួកគេ​ធ្លាប់បាន​ញុះ​ញង់​បំបែក​បំបាក់​ឲ្យ​ខ្មែរ​​ស្អប់​ខ្មែរគ្នាឯង ​ហើយ​សកម្ម​ភាពញុះ​ញង់​មិន​មែន​កើត​មាន​តែក្នុង​ប្រទេស​ទេ សូម្បី​​​តែ​នៅ​ក្រៅ​ប្រទេស​ក៏បាន​បំផុសបំផុល​ផង​ដែរ។ យ៉ាងណាមិញ សូម្បីតែការជួប​សំណេះ​សំណាល​លោកនាយក​រដ្ឋមន្ត្រីហ៊ុន សែន ជាមួយ​បង​ប្អូន​ខ្មែរនៅអាមេរិកក៏ត្រូវបានគណបក្សសង្គ្រោះជាតិចោទ​ប្រកាន់ថា​ ជាអ្នកស៊ីឈ្នួលក្នុងតម្លៃ​ទឹកប្រាក់​ពី​១០០​​ដុល្លារ ទៅ ២០០ដុល្លារអាមេរិកដែរ។

តាមពិតស្ថាបនិក​សន្តិភាពដូច​លោកនាយក​រដ្ឋមន្ត្រី ហ៊ុន សែន  ​គឺមិនមាន​វប្បធម៌​ក្នុង​ការ​ទិញ​លក់​ ឬជួញ​ដូរ​មនុស្សឲ្យស៊ី​ឈ្នួល​ធ្វើ​បាតុកម្ម​ដូចគណបក្ស​សង្គ្រោះ​ជាតិ​បាន​ធ្វើ​កន្លងមក​នោះ​ទ្បើយ។

ក្នុង​​​នាម​ខ្ញុំ​ជា​ពល​រដ្ឋ​ខ្មែរ​​​មួយ​រូបចាត់​ទុក​ថា ​ការ​លាប​ពណ៌បងប្អូន​ខ្មែរ​នៅសហរដ្ឋ​អាមេរិកថា ជា​អ្នក​​ស៊ី​ឈ្នួលដោយគ្រាន់​តែ​ការ​ជួប​ជា​មួយ​លោក ហ៊ុន សែននោះ ​គឺបង្ហាញ​នូវ​​​ទម្លាប់​អាក្រក់​បំផ្លាញ​​វប្បធម៌ល្អ​ផូរផង់របស់​ខ្មែរ និងមិន​ឲ្យ​តម្លៃ​ចំពោះខ្មែរគ្នាឯង ហើយ​ការ​បន្ទាប​បន្ថោក​នេះ ​មិន​ត្រឹម​តែ​ប្រជា​ពល​រដ្ឋ​ខ្មែរ នៅ​សហរដ្ឋអាមេរិក​ជាង៦០០​នាក់​ទេ គឺនៅមាន​ខ្មែរ​ជា​ច្រើន​នាក់​ទៀតក៏ទទួលយក​ការ​តេះដៀល​ចោទ​ប្រកាន់​លាប​ពណ៌នោះមិនបាន​ដែរ។ យើងខ្ញុំ​ជាបញ្ញវន្ត​ខ្មែរ​មួយរូបក៏មិនខុស​ពីបងប្អូន​ខ្មែរនៅ​ក្នុង​ប្រទេស​​ដ៏​ច្រើន​​​លើស​លប់​ដែរយល់ឃើញថា  បងប្អូនខ្មែរមិនមែនជាទំនិញសម្រាប់ការជួញដូរ ហើយក៏​មិន​​លក់​ឆន្ទៈ​ស្នេ​ហា​​​ជាតិក្នុងតម្លៃថោក ១០០ ទៅ២០០ដុល្លារអាមេរិក ដូចការចោទប្រកាន់របស់គណបក្ស​សង្គ្រោះ​ជាតិ​នោះ​ដែរ។

យើង​សូម​សួរ​ទៅវិញ​ថា ​ចុះ​បើ​គេ​ចោទ​ក្រុម​បាតុករ​ប្រឆាំង លោក​នាយក​រដ្ឋមន្ត្រី ហ៊ុន សែន ប្រមាណ​ជា៥០ ទៅ​៦០នាក់​នោះ ជា​​ជន​ស៊ី​ឈ្នួល​​ដាច់​ថ្លៃ​ឲ្យ​បក្ស​ប្រឆាំង​វិញ តើ​ពួកគេទទួល​យក​បាន​ដែរឬ​ទេ? ប៉ុន្តែ សម្រាប់​ក្រុម​ជន​មនុស្ស​មួយ​ចំ​នួន​ដែល​ជាជនលក់ឧត្តមគតិ និង​ស៊ី​ឈ្នួល​ធ្វើ​បាតុកម្ម​ជា​អាជីព​ចិញ្ចឹម​ជីវិត​ គឺ​ពួក​គេមិនខឹង​សម្បាតបវិញ​ទេ ប៉ុន្តែ​ ចំ​ពោះ​បង​ប្អូន​ខ្មែរ​យើង​នៅ​សហរដ្ឋ​អាមេរិក​ទាំង​៦០០នាក់ និង​បងប្អូន​ខ្មែរជា​ច្រើន​ទៀត​ដែល​កំ​ពុង​រស់​នៅ​ទី​នោះ​ គឺ​រស់​នៅ​ជា​មួយ​តម្លៃ​ជា​បុគ្គល​ថ្លៃ​ថ្នូរ និង​កិត្តិយសខ្ពង់ខ្ពស់​ គឺ​មិន​ថោក​ដូច​ពួក​ក្រុម​ប្រឆាំង​ផ្កាប់​មុខឡើយ  ពី​ព្រោះ​សូម្បី​តែពាក្យ​សម្តី​នៅ​ពេល​ធ្វើ​បាតុកម្ម​ក៏ពួក​គេប្រើពាក្យ​អសុរោះ​ និយាយបំ​ភ្លើស​ខុសពី​ស្ថានការណ៍​ពិត​នៅ​កម្ពុជា​ដែរ។

 ដូច្នេះ សូមថ្នាក់​ដឹកនាំ​ និង​សកម្ម​មួយ​ចំ​នួន​របស់គណបក្ស​សង្គ្រោះជាតិដែល​មាន​ទម្លាប់​លាប​ពណ៌ បញ្ឈប់​ទៅ​នូវការប្រមាថ និងមាក់​ងាយមកលើបងប្អូនខ្មែរនៅសហរដ្ឋអាមេរិកថា​ជាអ្នកលក់​ឆន្ទៈ​ស្នេហាជាតិ ដើម្បី​​ប្តូរ​ជា​មួយ​នឹង​​​​ទឹកប្រាក់នោះ ពីព្រោះ​ការ​ចោទ​ប្រកាន់​ដែលដែល​គ្មាន​មូលដ្ឋាន និង​​ប្រាស់​ចាក​ពី​ការពិត​ គ្មាន​អ្វី​ចំ​ណេញ​សម្រាប់​ជាតិ​យើង​នោះ​ទេ គឺផ្ទុយ​ទៅ​វិញ​ការចោទ​ប្រកាន់​ទាំង​នោះ​នាំ​ឲ្យ​តែខ្មែរ​ឈ្មោះ​បែក​បាក់​សាមគ្គីគ្នាតែ​ប៉ុណ្ណោះ​៕

សុន្ទរកថា ឯកឧត្តម​បណ្ឌិត​សភាចារ្យ សុខ អាន ឧបនាយក​រដ្ឋមន្ដ្រី រដ្ឋមន្រ្តី​ទទួល​បន្ទុក​ទីស្តីការ​គណៈរដ្ឋមន្រ្តី ថ្លែងក្នុងពិធី​បើក​មហោ​ស្រព​គីហ្សូណា ជប៉ុន-កម្ពុជា ឆ្នាំ២០១៦ (ប្រភពពី PressOCM)

កឧត្តម Yuji Kumamaru ឯកអគ្គរាជទូត​ជប៉ុន​ប្រចាំនៅកម្ពុជា
ព្រះអង្គម្ចាស់ ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ​ និងក្មួយៗសិស្ស និស្សិតជាទីស្រឡាញ់!
ខ្ញុំមានសេចក្ដីសោមនស្សរីករាយ ចូលរួមជាថ្មី​ម្ដងទៀតក្នុងពិធីបើក «មហោស្រពគីហ្សូណា ជប៉ុន-កម្ពុជា ឆ្នាំ២០១៦» ដើម្បីអបអរសារទរការផ្លាស់ប្ដូរបទ​ពិសោធន៍​វប្បធម៌ដ៏ស្រស់បំព្រង ក៏ដូចជាសមិទ្ធផលនានានៅក្នុងទំនាក់ទនងមិត្តភាព និងកិច្ចសហប្រតិបត្តិការរវាងប្រជាជនជប៉ុន និ​ង​ប្រជាជនកម្ពុជា។ ខ្ញុំសូមសម្ដែងអំណរអរគុណយ៉ាងជ្រាលជ្រៅ​ចំពោះ​ស្ថានទូតជប៉ុន ជាពិសេស ឯកឧត្តមឯកអគ្គរាជទូត Kumamaru និងមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ក្នុងការបន្ដរៀបចំព្រឹត្តិការណ៍ដ៏មានអត្ថន័យនេះ។ ខ្ញុំពិតជារីករាយណាស់​ ដែលបានចូលរួមក្នុងព្រឹត្តិការណ៍ដ៏អធិកអធមនេះជា​មួ​យ​​យុវជន យុវនារី របស់ប្រទេសកម្ពុជា និងជប៉ុន។
សំរាប់ខ្ញុំផ្ទាល់  មហោស្រពគីហ្សូណា គឺជាព្រឹត្តិការណ៍ផ្លាស់ប្ដូរ​បទ​ពិសោធន៍​វប្បធម៌ដ៏សំខាន់ ប្រមូលផ្ដុំនូវសិល្បៈករ សិល្បៈការិនី យុវជន និងយុវនារី ដែលមានចំណង់ចំណូលចិត្តរាំ ច្រៀង លេងតូរ្យតន្ដ្រី និងភ្លក់រស់ជាតិអាហារផ្សេងៗ។ នេះគឺជាឱកាសដ៏ល្អសំរាប់ សិល្បៈករ សិ​ល្បៈ​ការិនីវ័យក្មេង នៃប្រទេសទាំងពីរ ដែល​មិនត្រឹមតែអាចបញ្ចេញទេពកោសល្យ​របស់ខ្លួនឱ្យ​ទស្សនិកជនទស្សនាប៉ុណ្ណោះទេ ប៉ុន្ដែថែមទាំងទទួលបាននូវអត្ថប្រយោជន៍​ជាច្រើនពីអន្តរទំនាក់ទំនងវប្បធម៌នេះ។ លើសពីនេះទៀត តាមរយៈការផ្លាស់ប្ដូរ​បទ​ពិសោធន៍​ដ៏សម្បូរបែប ព្រឹត្តិការណ៍​ នេះជួយឱ្យយើងទាំងអស់គ្នាយល់កាន់តែច្បាស់អំពីតម្លៃនៃវប្បធម៌របស់​ យើងរៀងៗខ្លួន ដែល​ តម្លៃទាំងនោះបានវិវត្តតាមពេលវេលាដ៏យូលង់​ ក្លាយ​ជាធាតុ​ផ្សំនៃ​ជីវភាពដ៏រស់រវើកនិងអរិយធម៌នៃ​ប្រទេសទាំង​ពីរ។
អ្វីដែលគួរជាទីចាប់អារម្មណ៍ និងកត់សម្គាល់នោះគឺ ចាប់តាំងពីការចាប់ផ្ដើម​នៃមហោ​ស្រព​នេះនៅឆ្នាំ ២០១២ មហោស្រពគីហ្សូណា បានក្លាយទៅជា ព្រឹត្តិការណ៍ដ៏ជោគជ័យមួយ ដែល​ត្រូវបាន​ចារិក​ក្នុង​ប្រតិទិនវប្បធម៌របស់​កម្ពុជា រំលេច​ឡើងនូវ​ទិដ្ឋភាព​វប្បធម៌​ដ៏សម្បូរបែប។ ខ្ញុំជឿជាក់ថា អ្នករៀបចំកម្មវិធីនេះ​ ក៏ដូចជាសិល្បៈករ សិល្បៈការិនីទាំងអស់ ពិតជា​មាន​ការ​លំបាក​ច្រើន​ក្នុងការប្រឹងប្រែងបញ្ចេញកម្លាំងកាយចិត្ត និងកិច្ច​សហការគ្នាពី​ព្រោះ​​របៀបរបប វិធីសា​ស្រ្ដ និងរចនាបថ​ខុសៗគ្នារបស់ពួកគេ។ ដោយសារតែកិច្ចខិតខំប្រឹងប្រែងអស់ពីកម្លាំងកាយចិត្តរបស់សិល្បៈករ សិល្បៈការិនីទាំងអស់ មហោស្រពនេះបាននាំឱ្យយើង និងសិល្បៈករ សិល្បៈការិនី មកជួបជុំគ្នាម្ដងទៀតនៅឆ្នាំនេះ ដើម្បីទស្សនាការសម្ដែងតន្ដ្រីសម័យ​ សម្លៀកបំពាក់ប្រពៃណី និងភ្លក់អា​ហារនៅមជ្ឈមណ្ឌល CJCC នេះផ្ទាល់។ ពិសេសជាងនេះទៅទៀត ក្នុងកម្មវិធីឆ្នាំនេះ ក្រុមសិល្បៈដ៏ល្បីមួយពី​ប្រទេស​ជប៉ុន ត្រូវបានអញ្ជើញឱ្យមកចូលរួមសម្ដែងរបាំ «AWA ODORI» ដែលជាពិធីបុណ្យដ៏ធំរបស់ប្រទេសជប៉ុន។ យើងពិតជាមានសំណាងខ្លាំងណាស់ ដែលបានទស្សនាការសម្ដែងដ៏ពិសេសនេះ​ នៅរាត្រីនេះ។
-              ឯកឧត្តម លោកជំទាវ អស់លោក លោកស្រី
-              ក្មួយៗសិស្ស និស្សិត
ឆ្លៀតក្នុងឱកាសនេះ ខ្ញុំសូមគូសបញ្ជាក់​ដោយ​សង្ខេប​នូវសមិទ្ធផលសំខាន់ៗមួយចំនួននៅក្នុង​ទំនាក់​ ទំនង​មិត្តភាព និងកិច្ចសហប្រតិបត្តិ​លើវិស័យនានា នៃប្រទេសទាំងពីរ។
ប្រទេសជប៉ុន និងកម្ពុជា មានឆន្ទៈយ៉ាងមោះមុតចំពោះការការពារ និងអភិរក្ស ​ក៏ដូចជាការលើកកម្ពស់បេតិកភណ្ឌនិងវប្បធម៌។ យើងទាំងអស់គ្នាដឹងហើយថា ជប៉ុនគឺជា​ដៃគូដ៏សំខាន់របស់កម្ពុជា​ជាយូរមកហើយ នៅក្នុងការការពារ និង​ថែរក្សាបេតិកភណ្ឌវប្បធម៌​នៅកម្ពុជា។ ជាក់ស្ដែង ស្ថាប័នដៃគូជប៉ុនបាននិងកំពុងអនុវត្ត​គម្រោង​​របស់ខ្លួន​នៅ​​ប្រាសាទសំខាន់​ នានា ដូចជាប្រាសាទអង្គរវត្ត ប្រាសាទបាយ័ន ប្រាសាទបន្ទាយក្ដី និង​ប្រាសាទព្រះវិហារជាដើម។ ខ្ញុំសូមបញ្ជាក់ថា សមិទ្ធផល​របស់ស្ថាប័នដៃគូជប៉ុននៅតាម​រមណីយដ្ឋានទាំងនេះ​ ពិតជា វិសេសវិសាល​គួឱ្យកត់សម្គាល់។ ប្រទេសជប៉ុន រួម​ជា​មួយ​​ប្រទេសបារាំង ក៏ជាសហ​ប្រធាន នៃគណៈកម្មាធិការអន្តរជាតិសម្របសម្រួល​កិច្ច​គាំពារ និងអភិវឌ្ឍ​ន៍​រមណីយដ្ឋាន​ប្រវត្តិសាស្ត្រ​អង្គរ (ហៅកាត់ថា ICC អង្គរ) ផងដែរ ចាប់តាំងពីការបង្កើតគណៈកម្មាធិការនេះ នៅឆ្នាំ១៩៩៣ ហើយបានរួមចំណែកយ៉ាងសំខាន់ដល់កិច្ចពិភាក្សា​ជាអន្តរជាតិ​អំពី​កិច្ច​ ការអភិរក្ស និងការគ្រប់គ្រង​រមណីយដ្ឋានបេតិកភណ្ឌ​ពិភពលោក។
ហើយថ្ងៃនេះ ខ្ញុំរីករាយនឹងចែករំលែកជាមួយនឹងព្រះអង្គម្ចាស់ ឯកឧត្តម លោកជំទាវ អស់លោក លោកស្រី​ នូវដំណឹងដ៏សំខាន់ពីរទៀតគឺ៖
ទីមួយ ក្រុមការងារជប៉ុន-អាជ្ញាធរអប្សរា នឹងចាប់ផ្ដើមដំណាក់​កាលថ្មី​មួយទៀត​នៃ​គម្រោង​ស្ដារស្ពានហាលខាងលិចរបស់​ ប្រាសាទអង្គរវត្ត (ស្ពានធំឆ្លងទៅច្រកចូល​ប្រា​សាទ​អង្គរវត្ត)។
ទីពីរ បន្ថែមលើអង្គការ JICA ស្ថាប័នរដ្ឋាភិបាលមួយទៀត គឺ មូលនិធិជប៉ុន (Japan Foundation) ដែលដើរតួនាទីសំខាន់នៅក្នុងការលើក​ស្ទួយ​វប្បធម៌ និងការអប់រំតាមរយៈ​​ការសិក្សាស្រាវជ្រាវនិងការអភិវឌ្ឍធនធាន​មនុស្ស ទើបតែបានបើក​ការិយាល័យរបស់ខ្លួន​នៅរាជធានីភ្នំពេញ។
ចំពោះកិច្ច​សហប្រតិបត្តិការសេដ្ឋកិច្ច និងការអភិវឌ្ឍ ប្រទេសជប៉ុនគឺជាប្រទេសមួយ​ក្នុងចំណោមដៃគូនាំមុខគេរបស់កម្ពុជា។ យើងទាំងអស់គ្នានៅចាំយ៉ាងច្បាស់អំពីពិធីសម្ពោធយ៉ាង​អធិកអធមកាលពីឆ្នាំ២០១៥ ស្ពាន ស៊ូបាសា ឆ្លងកាត់​ទន្លេមេគង្គនៅអ្នកលឿងខេត្តព្រៃវែង ​ក្រោមអធិបតី​ភាពដ៏ខ្ពង់ខ្ពស់បំផុត​របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយដែលស្ពាននេះគឺជាសមិទ្ធផលថ្មី​មួយទៀតនៃមិត្តភាព និងកិច្ច​សហប្រតិបត្តិការដ៏យូរអង្វែង​របស់ប្រទេសយើងទាំងពីរ។ ស្ពាននេះ ក៏ដូចជាស្ពានផ្សេងៗទៀត​ដែល​ប្រទេសជប៉ុនបាន​ជួយ​សាងសង់នៅ​រាជធានីភ្នំពេញ និងខេត្តកំពង់ចាមដែរ បានសម្រួលដល់ការធ្វើចរាចរណ៍ផ្លូវគោក និងការអភិវឌ្ឍសេដ្ឋកិច្ចជាច្រើន។
នៅឆ្នាំនេះ យើងក៏នឹងមានការចាប់ផ្ដើម​បើក​ផ្លូវ​​​ហោះហើរត្រង់​​រាជធានីភ្នំពេញ​​ ទី​​ក្រុងតូក្យូ ដែលនឹងជួយ​ជំរុញដល់​លំហូរភ្ញៀវទេសចរនៃ​ប្រទេសទាំងពីរផងដែរ។
ខ្ញុំជឿជាក់ថា ទំនាក់ទំនងដ៏ជិតស្និទ្ធរវាង​ប្រទេសជប៉ុននិងកម្ពុជា នឹងបន្តអភិវឌ្ឍ​​កាន់តែខ្លាំងក្លាលើ​វិស័យ​ផ្សេងៗ​​បន្ថែមទៀតនៅពេលអនាគត។
មុននឹងបញ្ចប់ ខ្ញុំសូមអរគុណម្ដងទៀតចំពោះអ្នករៀបចំកម្មវិធី និងសិល្បៈករ សិល្បៈការិនី​​កម្ពុជា និងជប៉ុនទាំងអស់ សម្រាប់កិច្ចខិតខំប្រឹងប្រែង និងកិច្ចសហប្រតិបត្តិការដ៏ជិតស្និទ្ធ ក្នុងការរៀបចំឱ្យ​មានព្រឹត្តិការណ៍នេះឡើង។ ខ្ញុំក៏សូមថ្លែងអំណរគុណផងដែរចំពោះព្រះអង្គម្ចាស់ ឯកឧត្តម លោកជំទាវ ភ្ញៀវកិត្តិយស ក្មួយៗយុវជន និងអស់លោក លោកស្រីទាំងអស់ ដែលបាន​ចូលរួម​ និងផ្ដល់ការគាំទ្រ ដែល​ញ៉ាំង​ឱ្យ​ពិធីបើកមហោស្រពនេះ និងកម្មវិធី ៤ថ្ងៃបន្ទាប់ទៀត កាន់តែមានអត្ថន័យជ្រាលជ្រៅ និងកាន់តែសប្បាយរីករាយថែមទៀត។
ជាទីបញ្ចប់ ខ្ញុំសូមជូនពរឱ្យមហោស្រពគីហ្សូណា ជប៉ុន-កម្ពុជា ឆ្នាំ២០១៦ ទទួល​បានជោគជ័យ។ ខ្ញុំជឿជាក់ថា ប្រជាជនកម្ពុជា និងប្រជាជនជប៉ុន ​នឹង​កាន់តែយល់ច្បាស់​បន្ថែមទៀតអំពីវប្បធម៌ តម្លៃ និងក្រឹត្យ​ក្រម​សង្គម តាមរយៈទំនាក់ទំនង​នេះ។
ខ្ញុំសូមជូនពរព្រះអង្គម្ចាស់ ឯកឧត្តម លោកជំទាវ អស់លោក លោកស្រី សូមមានសុខភាពល្អ ជោគជ័យគ្រប់ភារកិច្ច និងសុភមង្គលក្នុងគ្រួសារ។

ខ្ញុំសូម​ប្រកាសបើកមហោស្រពគីហ្សូណា ជប៉ុន-កម្ពុជា ឆ្នាំ២០១៦ ចាប់ពីពេលនេះតទៅ។

ឯកឧត្តម​ ថោង ​ខុន បានមានប្រសាសន៍ថាកម្ពុជាយកឆ្នាំ ២០១៦ ជាឆ្នាំកំណត់យុទ្ធសាស្ត្រស៊ីហ្គេម

     រដ្ឋ​មន្ត្រី​ក្រសួង​ទេស​ចរណ៍​ ឯកឧត្តម ​ថោង​ខុន បាន​ថ្លែង​ថា ក្នុង​ការ​ត្រៀម​លក្ខណៈ​នេះ កម្ពុជា​បាន​យក​ឆ្នាំ​២០១៦ ​នេះ គឺ​ជា​ឆ្នាំ​កំណត់​នូវ​យុទ្ធ​សាស្ត្រ​ ។ ប្រសាសន៍​របស់​ ឯកឧត្តម​ ថោង ​ខុន ដែល​យក​ឆ្នាំ ​២០១៦​ កំណត់​យុទ្ធ​សាស្ត្រ​នេះ បាន​ធ្វើ​ឡើង​ក្នុង​មហា​សន្និបាត​មួយ ​នៅ​ថ្ងៃ​ទី​១៨ ខែ​កុម្ភៈនេះ​ ក្នុង​ក្រសួង​ទេស​ចរណ៍​ ។

     ប្រសាសន៍​របស់​ ឯកឧត្តម​រដ្ឋ​មន្ត្រី ​ថោង ​ខុន ​ដែល​ជា​ប្រធាន​គណៈ​កម្មា​ធិ​ការ​ជាតិ​អូឡាំពិក​កម្ពុជា​ បាន​ប្រព្រឹត្ត​ទៅ ​ស្រប​ពេល​ដែល​កម្ពុជា​បាន​ត្រៀម​រៀប​ចំ​ការ​ប្រកួត​ល្បែង​កីឡា​ជាតិ​ ចាប់​តាំង​ពី​ឆ្នាំ ​២០១៦​នេះ​ផង​ដែរ​… ហើយ​ការ​ប្រកួត​កីឡា​ជាតិ​នេះ នឹង​ត្រូវ​ធ្វើ​ដោយ​ទៀង​ទាត់​ក្នុង​រយៈ​ពេល​ ២​ឆ្នាំ​ម្តង យ៉ាង​ហោច​ឱ្យយ​បាន​បួន​ដង​រហូត​ដល់​ឆ្នាំ ​២០២៣ ​ដែល​កម្ពុជា​ធ្វើ​ជា​ម្ចាស់​ផ្ទះ​នៃ​កីឡា​ស៊ី​ហ្គេម​ ។

     ទោះ​ជា​យ៉ាង​ណា​ក៏​ដោយ មាន​សេចក្តី​រាយ​ការណ៍​រិះ​គន់​ថា មាន​សហព័ន្ធ​កីឡា​ជាតិ​មួយ​ចំនួន មិន​ទាន់​មាន​សកម្មភាព​អ្វី​លេច​ចេញ​ជា​រូប​រៀង​ដែរ ដែល​ចាំ​បាច់​ត្រូវ​តែ​មាន​ផែន​ការ​ជា​បន្ទាន់ ​ក្នុង​ការ​សម្រេច​គោល​ដៅ​ជា​យុទ្ធ​សាស្ត្រ​សម្រាប់​ត្រៀម​ប្រកួត​ប្រជែង ​ក្នុង​ព្រឹត្តិ​ការណ៍​អន្ដរ​ជាតិ​នានា​ ។

     ឯកឧត្តម ​ថោង​ ខុន ត្រូវ​គេ​ដក​ស្រង់​ប្រសាសន៍​ដែល​ព្រមាន​ថា ​បើ​សហ​ព័ន្ធ​ណា​មួយ នៅ​មិន​ទាន់​មាន​សកម្មភាព​អ្វី​ទៀត​នោះ គណៈ​កម្មា​ធិការ​ជាតិ​អូឡាំពិក​កម្ពុជា នឹង​មាន​វិធាន​ការ​ក្ដៅ ដើម្បី​ជំរុញ​សហព័ន្ធ​នោះ ឲ្យ​មាន​សកម្មភាព បើ​ពុំ​ដូច្នេះ​ទេ សហព័ន្ធ​នោះ​នឹង ត្រូវ​ប្រឈម​នឹង​ការ​ដក​សិទ្ធិ​ចូល​រួម​ប្រកួត​ក្នុង​ព្រឹត្តិ​ការណ៍​ផ្សេង​ៗ​តែ​ម្ដង​ ។ កម្ពុជា​មាន​សហព័ន្ធ​ជាតិ​ចំនួន​៥ ដែល​សហព័ន្ធ​មួយ​មិន​មែន​ជា​ប្រភេទ​កីឡា​អូឡាំ​ពិក​ឡើយ​ គឺ​សហ​ព័ន្ធ​កីឡា​គូប៊ូដូ និង​យូដូ ឯ​មួយ​សហព័ន្ធ​ទៀត ​ជា​សហ​ព័ន្ធ​ក្រប​ខណ្ឌ​អន្តរ​ជាតិ​ គឺ​សហ​ព័ន្ធ​គុន​ខ្មែរ​អន្តរ​ជាតិ​ និង​ ៣​សហ​ព័ន្ធ​ទៀត រួម​មាន​សហ​ព័ន្ធ​ក្រប​ខណ្ឌ​អូឡាំ​ពិក គឺ​សហ​ព័ន្ធ​បាញ់​កាំ​ភ្លើង កីឡា​ស្គី​ទឹក​កក និង​សហ​ព័ន្ធ​ទូក​ក្ដោង​ ៕

កម្ពុជាទទួលបានផ្លែផ្កាច្រើនពិសេស បានពង្រឹងមិត្តភាព និងកិច្ចសហការល្អវាងកម្ពុជា និងសហរដ្ឋអាមេរិក ក្នុងកិច្ចប្រជុំ អាស៊ាន- អាមេរិក

យោងតាមគេហទំព័រផ្ទាល់ខ្លួនរបស់ សម្តេចអគ្គមហាសេនាបតីតេជោ ហ៊ុន សែន samdechhunsen.gov.kh បានឲ្យដឹងថា នៅវេលាម៉ោង ១១យប់ ថ្ងៃទី ១៨ កុម្ភៈ សម្តេចតេជោ ហ៊ុន សែន បានដឹកនាំគណៈប្រតិភូវិលត្រឡប់មកដល់កម្ពុជាវិញដោយសុវត្ថិភាព បន្ទាប់ពី សម្តេច បានអញ្ជើញទៅចូលរួមប្រជុំកំពូលពិសេស អាស៊ាន-អាមរិក (១៤-១៨ កុម្ភៈ) ដែលទទួលបានជោគជ័យយ៉ាងត្រចះត្រចង់។

នៅក្នុងគេហទំព័រនោះបានបញ្ជាក់ផងដែរថា កិច្ចប្រជុំកំពូលពិសេស អាស៊ាន- អាមេរិក ដែលបានពិភាក្សាផ្លាស់ប្តូរយោបល់ប្រកបដោយភាពស្និទ្ឋស្នាល គោរពយោគយល់ក្នុងភាពជាដៃគូយុទ្ឋសាស្រ្ត ដែលបានរួមគ្នាដោះស្រាយបញ្ហាសំខាន់ៗជាច្រើនដើម្បីជំរុញវិបុលភាពក្នុងតំបន់ តាមរយៈការលើក កំពស់ភាពឆ្នៃប្រឌិតថ្មី និងសហគ្រិនភាព ការអភិវឌ្ឍសហគ្រាសធុនតូច និងមធ្យម ការជំរុញពាណិជ្ជកម្ម និងវិនិយោគ ការជំរុញការតភ្ជាប់រវាងប្រជាជន ជាពិសេសរវាងយុវជនសំដៅបង្កើនការយល់ដឹងពីគ្នាទៅវិញទៅមក និងការពង្រឹងចំណងមិត្តភាព និងកិច្ចសហប្រតិបត្តិការជាយុទ្ធសាស្រ្តរវាងតំបន់ធំៗទាំងពីរ។ អាមេរិកនឹងជួយដល់ប្រទេសអាស៊ានក្នុងការសិក្សាភាសាអង់គ្លេសដែលជាភាសា ទំនាក់ទំនងកិច្ចការពាណិជ្ជកម្មអន្តរជាតិ និងការបណ្តុះបណ្តាលធនធានមនុស្សដែលជាកត្តាចាំបាច់បំផុត។ ទន្ទឹមនិងនេះ អាស៊ាន-អាមេរិក ប្តេជ្ញា រក្សាការពារសន្តិភាព វិបុលភាព និងសន្តិសុខក្នុងតំបន់ និង អាស៊ីប៉ាស៊ីហ្វិក ដែលក្នុងនោះរួមមានបញ្ហាសន្តិសុខចរាចរតាមដែនសមុទ្រ ការប្រយុទ្ធប្រឆាំងភេរវកម្ម ទប់ស្កាត់ឧក្រិដ្ឋកម្មរត់ពន្ធ និងជួញដូរមនុស្ស និងបញ្ហាការប្រែប្រួលអាកាសធាតុជាដើម។

កិច្ចប្រជុំកំពូលពិសេស អាស៊ាន- អាមេរិកនេះ មិនត្រឹមតែបានផ្តល់ឱកាសដល់ប្រទេស អាស៊ាន និងសហរដ្ឋអាមេរិកក្នុងការពង្រឹងភាពជាដៃគូរយុទ្ធសាស្រ្ត និងកិច្ចសហការលើវិស័យអាទិភាពជាច្រើនប៉ុណ្ណោះទេ គឺថែមទាំងបានពង្រឹងនូវទំនាក់ទំនងមិត្តភាព និងកិច្ចសហការល្អរវាងប្រមុខដឹកនាំកម្ពុជា សម្តេចតេជោ ហ៊ុន សែន និងប្រមុខដឹកនាំអាមេរិក លោក បារ៉ាក អូបាម៉ា អោយកាន់តែមានភាពស្និទ្ឋស្នាល ដែលជាចំណែកដ៏សំខាន់បំផុតក្នុងការរួមចូលរួមថែរក្សាសន្តិភាពក្នុងតំបន់ ដែលផ្តល់ផលប្រយោជន៍កាន់តែច្រើនឡើងដល់ប្រជាជាតិទាំមូល៕

សម្តេចតេជោ ហ៊ុន សែន ដោះស្រាយបំណុលការងារនៅថ្ងៃនេះ បន្ទាប់ពីវិលត្រលប់មកពីចូលរួមកិច្ចប្រជុំកំពូល ASEAN US

នៅប៉ុន្មាននាទីមុននេះសម្តេចតេជោ ហ៊ុនសែន បានបង្ហោះនៅក្នុងទំព័រ facebook ផ្ទាល់ខ្លួនរបស់សម្តេចថា «ថ្ងៃនេះខ្ញុំត្រូវសងបំណុលដែលខ្ញុំជំពាក់ នោះគឺឯកសារ ដែលខ្ញុំត្រូវពិនិត្យសំរេច និងចុះហត្ថលេខា» 

សម្តេចតេជោ ហ៊ុន សែន បានបញ្ជាក់ថា៖ «ការងារប្រទេសជាតិពិតជាច្រើនដែលត្រូវបំពេញ ទោះជាបញ្ហាពេលម៉ោងសំរាក នៅមានបញ្ហាខ្លះៗ ព្រោះប៉ុន្មានថ្ងៃនេះខ្ញុំទម្លាប់ តាមម៉ោងអាមេរិកដែលនេះជាពេលយប់។ ជូនពរបងប្អូនជនរួមជាតិជួបតែសំណាងល្អ»។

សូមជំរាបផងដែរថា សម្តេចតេជោ ហ៊ុន សែន រួមទាំងគណៈប្រតិភូ បានត្រឡប់មកដល់ប្រទេសកម្ពុជាវិញ នៅម៉ោង១១៖០០យប់ ថ្ងៃទី១៨ ខែកុម្ភៈ ឆ្នាំ២០១៦នេះម្សិលមិញ បន្ទាប់ពីចូលរួមកិច្ចប្រជុំកំពូល អាស៊ាន-អាមេរិក នៅរដ្ឋកាលីហ្វ័រញ៉ា សហរដ្ឋអាមេរិក រយៈពេល២ថ្ងៃនោះ។

បន្ទាប់ពីត្រលប់មកដល់ប្រទេសកម្ពុជាប្រកបដោយសុវត្ថិភាព សម្តេចតេជោ បានបង្ហោះតាមរយៈ facebook ភ្លាមផងដែរថា «មកដល់មាតុប្រទេសវិញ បំណុលដែលខ្ញុំជំពាក់ពិតជាមានច្រើន។ ឯកសារពិតជានៅកកកុញរង់ចាំខ្ញុំពិនិត្យសំរេច និងចុះហត្ថលេខា។ ខ្ញុំត្រូវធ្វើកិច្ចការទាំងអស់នេះនៅថ្ងៃស្អែក ដើម្បីជំរុញល្បឿនការងារ ព្រោះបើនាយករដ្ឋមន្ត្រីមិនសំរេច ឬមិនចុះហត្ថលេខាទេ ការងារនឹងយឺតយ៉ាវ ។»

គួររំលឹកផងដែរថា កិច្ចប្រជុំកំពូល អាស៊ាន-អាមេរិក ត្រូវបានធ្វើឡើងនៅមជ្ឈមណ្ឌលសាន់នីឡែនស៍ រដ្ឋកាលីហ្វរញ៉ា សហរដ្ឋអាមេរិក នៅថ្ងៃទី១៥-១៦ ខែកុម្ភៈ ឆ្នាំ២០១៦។ កិច្ចប្រជុំនេះ ត្រូវបានរៀបចំឡើងដោយសហរដ្ឋអាមេរិក ដោយបានសម្រេចជាគោលការណ៍រួមចំនួន១៧ចំណុច ដែលជារួមគឺបង្កើនចំណងមិត្តភាព ជម្រុញកំណើនសេដ្ឋកិច្ច និងសហការគ្នាក្នុងការរក្សាសន្តិភាព ស្ថេរភាពក្នុងតំបន់។

ក្រៅពីកិច្ចប្រជុំនោះ សម្តេចតេជោ ហ៊ុន សែន និងគណៈប្រតិភូកម្ពុជា ក៏បានជួបសំណេះសំណាលជាមួយប្រជាពលរដ្ឋខ្មែរ-អាមេរិកាំង រួមទាំងបងប្អូនចាមខ្មែរ-អាមេរិកាំង និងព្រះសង្ឃដែលបាននិមន្តមកពីរដ្ឋផ្សេងៗមកជួបជុំសំណេះសំណាលជាមួយនៅរដ្ឋកាលីហ្វ័រញ៉ា សហរដ្ឋអាមេរិក ប្រមាណ៦០០នាក់ផងដែរ ដើម្បីផ្សព្វផ្សាយអំពីនយោបាយ និងការអភិវឌ្ឍនៅក្នុងប្រទេសកម្ពុជា ក្រោយពីបានស្តាប់ អ្នកចូលរួមទាំងអស់បានសម្តែងនូវការពេញចិត្តបំផុតចំពោះ សម្តេចតេជោ ហ៊ុន សែន ដែលបានដឹកនាំកសាងប្រទេសបានរីកចម្រើន ព្រមទាំងបានថែរក្សាសុខសន្តិភាពដែលជាបំណងប្រាថ្នាដ៏ធំបំផុតរបស់ប្រទេសជាតិទាំងមូល មិនដូចក្រុមប្រឆាំងមួយចំនួនតូចដែលមិនខ្វល់អំពីសុខសន្តិភាពរបស់ប្រទេសជាតិ ដែលគួរអោយសោកស្តាយបំផុត៕

មន្ត្រីនៃអគ្គលេខាធិការដ្ឋានរដ្ឋសភា ចូលរួមបរិច្ចាគឈាម ដោយស្ម័គ្រចិត្ត ក្រោម ប្រធានបទ « សូមអរគុណចំពោះ ការជួយ សង្គ្រោះជីវិតខ្ញុំ»

ឯកឧត្តម ឡេង ប៉េងឡុង អគ្គលេខាធិការរដ្ឋសភា និងលោក វេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិ ផ្តល់ឈាម បានអញ្ជើញជាអធិបតីភាព ក្នុងពិធី អប់រំផ្សព្វផ្សាយ និងការបរិច្ចាគ ឈាមដោយស្ម័គ្រចិត្ត ក្រោមប្រធានបទ « សូមអរគុណចំពោះ ការជួយសង្គ្រោះជីវិតខ្ញុំ» ដែលបានរៀបចំធ្វើនៅវិមានរដ្ឋសភា នាព្រឹកថ្ងៃទី១៨ ខែកុម្ភៈ ឆ្នាំ២០១៦ ។
ឯកឧត្តម ឡេង ប៉េងឡុង អគ្គលេខាធិការរដ្ឋសភា បានមាន ប្រសាសន៍ថា សកម្មភាពមនុស្សធម៌ដែលកំពុងប្រព្រឹត្តនាពេលនេះ បានឆ្លុះបញ្ចាំងឲ្យឃើញពីសា្មរតីនៃការចូលរួមក្នុងចលនាផ្តល់ឈាមដែលជាចលនាមួយកំពុងតែរីកសាយទាំងផ្ទៃប្រទេស ក្រោមការដឹកនាំ និងកិច្ចខិតខំប្រឹងប្រែងរបស់ក្រសួងសុខាភិបាលនិងមជ្ឈមណ្ឌលជាតិផ្តល់ឈាម និងស្របតាមសេចក្តីអំពាវនាវ ដ៏ខ្ពង់ខ្ពស់របស់ សម្តេច អគ្គមហាសេនាបតីតេជោ ហ៊ុន សែន ប្រមុខនៃ រាជរដ្ឋាភិបាលកម្ពុជា។
ឯកឧត្តមបន្តថា ការបរិច្ចាគឈាម គឺជាកាយវិការមនុស្សធម៌ ដ៏មាន តម្លៃសម្រាប់ជួយសង្គ្រោះអាយុជីវិតជនរងគ្រោះ។ ជាក់ស្តែង នៅថ្ងៃ នេះ ដើម្បីចូលរួមចលនាផ្តល់ឈាម ឲ្យកាន់តែផុលផុស មន្រ្តីនៃ អគ្គលេខា ធិការដ្ឋានរដ្ឋសភា បានស្ម័គ្រចិត្តមកចូលរួមយ៉ាងច្រើន ក្នុងការបរិច្ចាគឈាម ដើម្បីឲ្យមជ្ឈមណ្ឌលជាតិផ្តល់ឈាម មានឈាមស្តុកគ្រប់គ្រាន់ សម្រាប់បម្រើឲ្យការព្យាបាល ជួយ សង្រ្គោះជនរងគ្រោះ ដែលត្រូវការឈាម នៅគ្រប់មន្ទីរពេទ្យ ក្នុងប្រទេសកម្ពុជា។
ឯកឧត្តមបន្ថែមថា ឈាមជាតម្រូវការចាំបាច់សម្រាប់ជួយ សង្គ្រោះ ជីវិតជនរងគ្រោះ ដោយសារគ្រោះថ្នាក់ចរាចរណ៍ ស្រ្តីពេលសម្រាល កូន អ្នកជម្ងឺត្រូវវះកាត់ ក៏ដូចជាជនរងគ្រោះក្នុងឧប្បត្តិវហេតុផ្សេងៗ។
ឯកឧត្តមបានបញ្ជាក់ថា ក្រោយពីធ្វើការបរិច្ចាគឈាម អ្នកនឹង ទទួលបានប័ណ្ណមួយសន្លឹកពីមជ្ឈមណ្ឌលជាតិផ្តល់ឈាម ដែលប័ណ្ណនេះមានន័យថា គាត់អាចធ្វើការដោះដូរ បានឈាម មួយផ្លោកមកវិញ ប្រសិនជាថ្ងៃក្រោយគាត់មាន បងប្អូន ឬសាច់ ញាតិណាម្នាក់ ត្រូវការឈាមជាបន្ទាន់ សម្រាប់ប្រើប្រាស់។
ចំណែកលោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិ ផ្តល់ឈាមបានមានប្រសាសន៍ឲ្យដឹងថា ការបរិច្ចាគឈាម មិនមានផលប៉ះពាល់អ្វីដល់សុខភាពអ្នកបរិច្ចាគនោះទេ ផ្ទុយទៅវិញ គឺវាបានធ្វើឲ្យកាន់តែមានសុខភាពល្អប្រសើរថែមទៀត។ លោកវេជ្ជបណ្ឌិត បញ្ជាក់ថា មនុស្សកាន់តែមានអាយុច្រើន ឈាម កាន់តែមានកំហាប់ នៅពេលបានបរិច្ចាគឈាម គឺហាក់ដូចជា បានដកកំហាប់ឈាមមួយចំណែកចេញ បន្ទាប់មករាងកាយ ក៏ផលិតឈាមថ្មីដែលរាវជាងមុន នឹងធ្វើឲ្យឈាមរត់ស្រួល ក្នុងរាងកាយ ហើយសុខភាពរបស់យើងក៏ល្អប្រសើរផងដែរ។
លោកវេជ្ជបណ្ឌិត ហុក គឹមចេង មានប្រសាសន៍ទៀតថា តាងនាម ឲ្យជនរងគ្រោះទាំងអស់ លោក សូមថ្លែងអំណរគុណចំពោះឯកឧត្តម ឡេង ប៉េងឡុង អគ្គលេខាធិការដ្ឋានរដ្ឋសភា ដែលបានសហការជា បន្តបន្ទាប់ជាមួយនឹងមជ្ឈមណ្ឌលជាតិផ្តល់ឈាម ក្នុងការលើកកម្ពស់ ដល់ការបរិច្ចាគឈាម ដោយស្ម័គ្រចិត្តនេះ និងក៏សូមអរគុណចំពោះ មន្ត្រី នៃអគ្គលេខាធិការដ្ឋានរដ្ឋសភាដែលមានទឹកចិត្តសប្បុរស ចូលរួមផ្តល់ឈាម ក្នុងបុព្វហេតុជួយជីវិតមនុស្ស ដោយគ្មាន ការរើសអើង នៅទូទាំងប្រទេសកម្ពុជា។
មន្ត្រីនៃអគ្គលេខាធិការដ្ឋានរដ្ឋសភា ដែលបានចូលរួមបរិច្ចាគឈាម បានបង្ហាញពីទឹកចិត្តរីករាយដែលបានចូលរួម ក្នុងការបរិច្ចាគឈាម នៅពេលនេះ។ ពួកគាត់មានជំនឿថា ការបរិច្ចាគឈាមមិនត្រឹមតែជា បុណ្យកុសល សម្រាប់ជួយសង្គ្រោះអាយុជីវិត ជនរងគ្រោះប៉ុណ្ណោះទេ ប៉ន្តែវាក៏អាចជួយឲ្យយើងមានសុខភាពកាន់តែប្រសើរ ព្រោះក្រោយ ពីធ្វើការបរិច្ចាគឈាម សរីរាង្គកាយរបស់យើងនឹងធ្វើការ ផលិតគ្រាប់ ឈាមជាថ្មីដែលល្អមកជំនួសវិញ។
ជាមួយនឹងមោទនភាព និងការអះអាងថានឹងផ្តល់ឈាម ជាបន្តទៀត នាថ្ងៃអនាគត មន្ត្រីដែលបានធ្វើការបរិច្ចាគឈាម នាពេលនេះ ក៏បានសំណូមពរ និងអំពាវនាវដល់មន្ត្រីផ្សេងទៀត សូមចូលរួម បរិច្ចាគឈាម ឲ្យបានកាន់តែច្រើនថែមទៀត ដើម្បីរួមចំណែកជួយ សង្រ្គោះអាយុជីវិត ជនរងគ្រោះដែលត្រូវការឈាមបន្ទាន់។
សូមបញ្ជាក់ថា អគ្គលេខាធិការដ្ឋានរដ្ឋសភា ធ្លាប់បានរៀបចំ កម្មវិធី បរិច្ចាគឈាមម្ដងរួចមកហើយ កាលពីខែមករា ឆ្នាំ២០១៥។ កម្មវិធី អប់រំផ្សព្វផ្សាយ និងការបរិច្ចាគឈាមដោយស្ម័គ្រចិត្ត នាពេលនេះ រៀបចំដោយអគ្គលេខាធិការដ្ឋានរដ្ឋសភា សហការ ជាមួយ មជ្ឈមណ្ឌល ជាតិផ្ដល់ឈាម តាមរយៈ លេខាធិការដ្ឋាន សម្របសម្រួលបច្ចេកទេសនៃសភាកម្ពុជា៕

គណៈប្រតិភូសហភាពអន្តរសភា(IPU) អរគុណរដ្ឋសភាកម្ពុជា ដែលបានសម្របសម្រួល ដំណើរទស្សនកិច្ចសិក្សាស្វែងយល់ពី ស្ថានការណ៍នយោបាយនៅកម្ពុជាដោយបើកចំហ

គណៈប្រតិភូនៃគណៈកម្មាធិការសិទ្ធិមនុស្ស របស់សហភាពអន្តរសភា (IPU) បានបញ្ជាក់ថា បេសកកម្ម ក្នុងការសិក្សាស្វែងយល់ពី ស្ថានការណ៍​នយោបាយ និងបញ្ហា​សិទ្ធិ​មនុស្ស របស់ ខ្លួន នៅកម្ពុជា​រយៈពេលបីថ្ងៃ បានបញ្ចប់ដោយ​ជោគជ័យ។ នៅចំពោះ​មុខឯកឧត្ត​មបណ្ឌិត ងួន ញ៉ិល អនុប្រធានទី២ នៃរដ្ឋសភា និងជាតំណាង​ដ៏ខ្ពង់ខ្ពស់​សម្តេចប្រធាន​រដ្ឋសភា គណៈ ប្រតិភូ បានគូសបញ្ជាក់ថា ផ្លែផ្កា​នៃដំណើរ​ទស្សនកិច្ចនេះ បានមក​ពីកិច្ចសហការ និង​ការ សម្រប​សម្រួល​ដ៏ល្អ របស់រដ្ឋស​ភាកម្ពុជា។

ផ្តើមទស្សន​កិច្ចនៅ​ព្រះរាជាណាចក្រកម្ពុជា​ចាប់ពីថ្ងៃទី១៥ ដល់ថ្ងៃទី១៧ ខែកុម្ភៈ នេះ គណៈ ប្រតិភូបានចូលជួប​សម្តែងការគួរសម​ជួបពិភាក្សាការងារ ជាមួយ​ថ្នាក់ដឹកនាំសំខាន់ៗ នៅខាង ស្ថាប័ននីតិប្ប​ញ្ញត្តិ នីតិប្រតិបត្តិ ថ្នាក់ដឹកនាំ​គណបក្ស​នយោបាយ ដែល​មាន​អាសនៈ រដ្ឋសភា និងអង្គការ សង្គមស៊ីវិល​ជាដើម។

មុនបញ្ចប់​បេសកកម្ម​ពីកម្ពុជា​នៅរសៀល​ថ្ងៃពុធទី១៧ ខែកុម្ភៈ ឆ្នាំ​២០១៦នេះ គណៈ​ប្រតិ​ភូ បាន ចូល​សម្តែងកា​រគួរសម និងរាយ​ការណ៍ពីលទ្ធផល​នៃដំណើរ​ទស្សនកិច្ច ជូន​ឯក​ឧត្តម​បណ្ឌិត ងួន ញ៉ិល ។ នៅក្នុងឱកាស​នោះ គណៈប្រតិភូ​បានគូស​បញ្ជាក់ថា រយៈពេល​បីថ្ងៃនេះ គណៈ​ប្រតិភូ​បានជួប​ពិភាក្សាការងារ​ជាមួយថ្នាក់​ដឹកនាំស្ថាប័ន​សំខាន់ៗ សមាជិក​ព្រឹទ្ធសភា​រដ្ឋ​សភា គណ​បក្សនយោបាយ ព្រមទំាង​អង្គការសង្គម​ស៊ីវិល។ “គណៈប្រតិភូ​បាន​ជូប​ពិ​ភា​ក្សា អ្នក​ពាក់​ព័ន្ធ​ដោយសេរី និងដោយកា​របើកចំហរ ក្នុងការប្រមូល​ព័ត៌មានគ្រប់​ជ្រុងជ្រោយ។ ទាំង ជាផ្នែក​សំខាន់​ណាស់ ដែលជំរុញ​ឲ្យយើងខ្ញុំ ទទួលបានព័ត៌មាន​ជាច្រើន​មកពីគ្រប់​ភាគី ។ យើងខ្ញុំយល់ឃើញថា យើងបានជជែកគ្នា ដោយភាពស្មោះត្រង់”។

សូម​បញ្ជាក់ថា ឝណៈប្រតិភូសហភាព​អន្តរសភា ដែលបានមក​បំពេញបេសកកម្ម​នៅកម្ពុជា នៅពេល​នេះ មាន​ឯកឧត្តម Alioune Abatalib GUEYE សមាជិក រដ្ឋ​សភា ប្រទេស សេ​ណេ ហ្គាល់ ឯកឧត្តម Alis ALARADI សមាជិករដ្ឋសភា ប្រទេសបារ៉ែន និង​លោកស្រី Gaelle LAROQUE មន្រ្តីការិយាល័យ​សិទ្ធិមនុស្ស នៃអគ្គ​លេខាធិការ​ដ្ឋានសហភាព​អន្តរសភា (IPU)។

យោងតាម​ដំណើរទស្សន​កិច្ចដែលបាន​ជួបពិភាក្សា​ការងារ ជាមួយ​អ្នកពាក់ព័ន្ធ​ជាច្រើនបែប​នេះ គណៈប្រតិភូបាន​ជម្រាបជូន ឯកឧត្តមបណ្ឌិត ងួន ញ៉ិល ថាជារួមគណៈ​ប្រតិភូបាន​វាយ តម្លៃខ្ពស់ ចំពោះ​វប្បធម៌សន្ទនា​នៅកម្ពុជា ហើយមាន​សង្ឃឹមថា វប្បធម៌ សន្ទនា នឹង អនុវត្ត បន្តទៀត ក្នុងការ​ដោះស្រាយ​បញ្ហាផ្សេងៗទៀត។

ជាមួយគ្នានេះ ឯកឧត្តម Alioune Abatalib GUEYE បានលើកឡើងថា តាម​រយៈ​ដំណើរ ទស្សន​កិច្ចនេះ​គណៈប្រតិភូក៏បានមើលឃើញពី ការរីកចម្រើន របស់កម្ពុជាផងដែរ។ កំណើន សេដ្ឋកិច្ច​នៅកម្ពុជា ដែលមាន​ក្នុងរង្វង់៧% ជាប់ៗ​គ្នារយៈ​ពេលប៉ុន្មាន​ឆ្នាំ​ចុង​ក្រោយ​នេះ ជា​សក្តានុពល យ៉ាងខ្លំាងរបស់​កម្ពុជាក្នុង​ការអភិវឌ្ឍ​ប្រទេសជាតិ។

ឯកឧត្តមបណ្ឌិត ងួន ញ៉ិល បានស្វាគមន៍ និងបានវាយ​តម្លៃខ្ពស់ ចំពោះ​ដំណើរ​ទស្សនកិច្ច របស់​គណៈកម្មការ​សិទ្ធិមនុស្ស នៃសហភាព​អន្តរសភា (IPU) នៅកម្ពុជា។ ឯកឧត្តម​បណ្ឌិត បាន​លើក​ឡើង​ថាក្នុងនាម​ជាសមាជិក (IPU) តំាងពីឆ្នាំ​១៩៩៧មកសភា​កម្ពុជាតែ​ងបំពេញ កាតព្វ​កិច្ច​និងភារកិច្ចរបស់ខ្លួន​យ៉ាងខ្ជាប់ខ្ជួន ពិសេស​គណៈ​ប្រតិភូ​សភាកម្ពុជា ដែល​តែងតែ មាន​វត្តមានក្នុង​កិច្ច​ប្រជុំ របស់​សហភាព​អន្តរ​សភា មិនដែរ​ខាននោះទេ។

ឯកឧត្តមបណ្ឌិត ងួន ញ៉ិល បានជម្រាប​ជូនគណៈប្រតិភូ ពីកិច្ចខិត​ខំរបស់​សភាកម្ពុជា លើ វិស័យ​ការទូត​សភាផងដែរ។            ឯកឧត្តមបណ្ឌិត បានលើក​ឡើងថា ក្រៅពី​ជា​សមាជិក សហភាព​អន្តរសភា សភាកម្ពុជាជា​សមាជិក អង្គការ​សភាពិ​ភពលោក និង​តំបន់​ជា​ច្រើន ទៀត។ ដោយឡែក នៅពេល​នេះ​សភាកម្ពុជាកំពុង​ស្ថិតក្នុង​តួនាទីជា​ប្រធាន​សភា​តំបន់​អាស៊ី (APA) ក្នុង​អាណត្តិ​ពីរឆ្នាំ។

ឯកឧត្តមបណ្ឌិត ងួន ញ៉ិល បានលើក​ឡើងថា កម្ពុជាដែល​បានឆ្លង​កាត់សង្រ្គាមជា​ច្រើន ទស្សវត្សរ៍ និង​បាន​បញ្ចប់​សង្រ្គាម​ផ្ទៃក្នុង​នៅឆ្នាំ​១៩៩៨ ក្រោម​យុទ្ធសាស្រ្ត​ឈ្នះ​ឈ្នះ របស់ សម្តេច​អគ្គមហា​សេនា​បតីតេជោ ហ៊ុន សែន កម្ពុជាមាន​ភារកិច្ចសំខាន់​ណាស់ក្នុង​ការ ថែ​រក្សា​សុខ​សន្តិភាព ស្ថេរភាព ជូនប្រជាជ​ពលរដ្ឋ និង​ប្រទេសជាតិ។

ឯកឧត្តម​បណ្ឌិត អនុប្រធាន​ទី២ នៃ​រដ្ឋសភា បានលើក​ឡើង​ថា កាល​ពីឆ្នាំ​២០១៥ សភា​កម្ពុជា បានរៀបចំ​មហា​សន្និបាត​សភាតំបន់​អាស៊ី លើក​ទី៨ បាន​ជោគ​ជ័យ​យ៉ាង​ធំធេង ហើយ​ត្រៀម ធ្វើជា​ម្ចាស់ផ្ទះ​មហា​សនិ្នបាត​លើក​ទី៩ នៃស្ថាប័ន​នេះទៀត នៅចុង​ឆ្នាំ២០១៦នេះ។

ឯកឧត្តម​បណ្ឌិត បានគំាទ្រ​ចំពោះការ​លើក​ឡើង​របស់ គណៈ​ប្រតិភូពី​វប្បធម៌សន្ទនា។ វប្បធម៌ សន្ទនា​ដែលថ្នាក់​ដឹកនាំ គណបក្ស​ប្រជាជន​កម្ពុជា និងថ្នាក់​ដឹកនាំ​គណបក្ស​សង្រ្គោះជាតិ បាន​បង្កើត​ឡើង​នៅថ្ងៃទី២២ ខែកក្កដា ឆ្នាំ២០១៤ ក្នុងទិសដៅ​ដើម្បី​បង្រួប​បង្រួមជាតិ ជំរុញ​ដំណើរ​ការ​លទ្ធិប្រជាធិ​បតេយ្យ​ក្នុងថ្នា​ក់ជាតិ និងថ្នាក់​ក្រោម​ជាតិ។ តែវប្បធម៌​សន្ទនា មិន​អាច​រំលោភ​លើ​ច្បាប់ ពិសេស​ច្បាប់រដ្ឋ​ធម្មនុញ្ញ​របស់​ប្រទេស បាននោះ​ឡើយ។

នៅទី​បញ្ចប់ ឯកឧត្តមបណ្ឌិត បានស្នើ​ដល់គណៈប្រតិភូ ត្រូវមាន​ព័ត៌មាន​គ្រប់​គ្រាន់ គ្រប់​ជ្រុង​ជ្រោយ​មិនលម្អៀង ក្នុង​របាយការណ៍ និង​ត្រូវ​មាន​យុត្តិធម៌ សម្រាប់​សភា​កម្ពុជា ហើយ​ធ្វើការ​វិនិច្ឆ័យ​ឲ្យបាន​គ្រប់​ជ្រុង គ្រប់​ទិដ្ឋភាព​ច្បាប់ នៅក្នុង​បេសកកម្ម នៅពេលនេះ ៕