ខ្មែរតែមួយ - Khmer Unity: 11/24/14

Monday, November 24, 2014

សម្តេចអគ្គមហាសេនាបតីតេជោ ហ៊ុន សែន អញ្ជើញទៅចូលរួមកិច្ចប្រជុំកំពូលកម្ពុជា ឡាវ វៀតណាម (CLV) លើកទី៨ នៅឡាវ

នារសៀលថ្ងៃទី២៣ ខែវិច្ឆិកា ឆ្នាំ២០១៤ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា រួមជាមួយគណៈប្រតិភូអមដំណើរបានចាកចេញពីរាជធានីភ្នំពេញ ដើម្បីចូលរួមកិច្ចប្រជុំកំពូលកម្ពុជា ឡាវ វៀតណាម (CLV) លើកទី៨ ដែលនឹងប្រព្រឹត្តទៅពីថ្ងៃទី២៤ ដល់ថ្ងៃទី២៥ ខែវិច្ឆិកា ឆ្នាំ២០១៤ នៅទីក្រុងវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ។

គណៈប្រតិភូជាន់ខ្ពស់រាជរដ្ឋាភិបាល បានអញ្ជើញទៅដល់ចំណតអាកាសយានដ្ឋានអន្តរជាតិវ៉ាត់តៃ នៃសាធារណរដ្ឋប្រជាធិបតេយ្យប្រជាមានិតឡាវ ប្រកបដោយសុវត្ថិភាព កាលពីវេលាម៉ោង១៦ និង៣០នាទី ថ្ងៃដដែល។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ទទួលបានការធ្វើបដិសណ្ឋារកិច្ចស្វាគមន៍ ពីឯកឧត្តម Boon Preet SamSangSaih រដ្ឋមន្រ្តីក្រសួងយុត្តិធម៌នៃសាធារណរដ្ឋ ប្រជាធិបតេយ្យប្រជាមានិតឡាវ ឯកឧត្តមឯកអគ្គរដ្ឋទូតឡាវប្រចាំកម្ពុជា ឯកឧត្តម ហើស សេរីធន ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំប្រទេសឡាវ ព្រមទាំងឯកឧត្តម លោកជំទាវ ជាឥស្សរជនជាន់ខ្ពស់ នៃប្រទេសឡាវ និងមន្រ្តីការទូតនៃព្រះរាជាណាចក្រកម្ពុជាជាច្រើនរូបទៀត។

តាមកម្មវិធីដែលបានគ្រោងទុក ក្រៅពីការអញ្ជើញចូលរួមកិច្ចប្រជុំកំពូលលើកទី៨ ស្តីពីកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម សម្តេចតេជោនាយករដ្ឋមន្រ្តី នឹងអញ្ជើញចូលជួបសំដែងការគួរសមជាមួយឯកឧត្តម ជុំម៉ាលី សាយ៉ាសន ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ ព្រមទាំងជួបពិភាក្សាទ្វេភាគីជាមួយឯកឧត្តម ង្វៀន តាន់យ៉ុង (Nguyen Tan Dung) នាយករដ្ឋមន្រ្តី នៃសាធារណរដ្ឋសង្គមនិយមវៀតណាម ក្នុងខណៈដែលប្រមុខដឹកនាំរដ្ឋាភិបាលនៃប្រទេសទាំងពីរអញ្ជើញចូលរួមកិច្ចប្រជុំកំពូលនេះ៕

សម្តេចតេជោ៖អ្នកដឹកនាំមិនប្រកាន់អាយុ សំខាន់លើប្រសិទ្ធភាពការងារ

លោក រ៉ាឌី ម៉ម( Rady Mom) តំណាងរាស្ត្រតំបន់ទី១៨ ទីក្រុងឡូវេល នៃរដ្ឋម៉ាស្សាឈូសេត សហរដ្ឋអាមេរិក ដែលមានដើមកំណើតជាខ្មែរនៅថ្ងៃទី២១ ខែវិច្ឆិកា ឆ្នាំ២០១៤ បានសម្តែងការសប្បាយរីករាយ និងអរគុណចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់ការអនុញ្ញាត ឲ្យលោកបានជួបសម្តែងគួរសមស្វែងយល់ពីសភាពការណ៍ក្នុងព្រះរាជាណាចក្រកម្ពុជា និងបានទទួលអនុសាសន៍បទពិសោធន៍ពីសម្តេចតេជោក្នុងការដឹកនាំប្រទេសផងដែរ។ នេះបើតាមឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឱ្យដឹង។

នៅក្នុងជំនួបនៅវិមានសន្តិភាព លោក រ៉ាឌី ម៉ម( Rady Mom) បានមានប្រសាសន៍ថា អ្វីដែលជាកិច្ចប្រឹងប្រែងរបស់លោកនៅសហរដ្ឋអាមេរិក ជាពិសេសនៅក្រុងឡូវែលនេះ គឺដើម្បីជាបង្គោលជួយដល់ប្រជាជនកម្ពុជា ក៏ដូចជាដើម្បីបម្រើការងារនៅក្នុងសហរដ្ឋអាមេរិកផងដែរ។ លោក រ៉ាឌី ម៉ម (RadyMom) បញ្ជាក់ថា លោកចូលជួបសម្តែងការគួរសមជាមួយសម្តេចតេជោនាពេលនេះ គឺដើម្បីសុំស្វែងយល់អំពីកម្ពុជាផង និងដើម្បីគោរពសុំនូវអនុសាសន៍ ដើម្បីជាការសិក្សាក្នុងការដឹកនាំប្រទេសរបស់សម្តេចតេជោ ដែលបានដឹកនាំកម្ពុជាបានទទួលមកនូវសន្តិភាព ស្ថិរភាព និងកំពុងតែអភិវឌ្ឍន៍នេះ។

សម្តេចតេជោនាយករដ្ឋមន្ត្រីបានសម្តែងនូវការសប្បាយរីករាយអបអរសាទរ ជូនចំពោះលោក រ៉ាឌី ម៉ម (Rady Mom) ដែលត្រូវបានទទួលការគាំទ្រធ្វើជាតំណាងរាស្ត្រអាមេរិក។ សម្តេចតេជោបានថ្លែងអំណរគុណជូនចំពោះគណៈប្រតិភូអមដំណើរជាមួយលោក រ៉ាឌី ម៉ម (Rady Mom) ដែលទោះបីជានៅទីណាក៏ដោយ ឆ្ងាយពីប្រទេសកម្ពុជាក៏ដោយ ក៏នៅចាត់ទុកខ្លួនថា ជាជនជាតិខ្មែរដដែល។ សម្តេចតេជោបានរលឹកថា ករណីដែលប្រជាពលរដ្ឋខ្មែរនៅទីក្រុងឡូវេល បាននាំនូវទូកប្រណាំងមួយទៅទីក្រុងនោះ គឺជាការឆ្លុះបញ្ចាំងពីការយកចិត្តទុកដាក់ទៅលើវប្បធម៌ទំនៀមទម្លាប់ និងប្រពៃណីរបស់កម្ពុជា ដែលជាអត្តញ្ញាណមួយបញ្ជាក់នៅកម្ពុជា។

សម្តេចតេជោបានមានប្រសាសន៍ជូនលោក រ៉ាឌី ម៉ម (Rady Mom) នូវចំណុចសំខាន់ៗ ជាទស្សនាទានថា អ្នកដឹកនាំយុវវ័យអាយុគឺមិនសំខាន់ទេ អ្វីដែលកត្តាសំខាន់នោះ គឺប្រសិទ្ធភាពការងារ។ ធ្វើការកាន់តែខ្ពស់ត្រូវឱនឱ្យកាន់តែទាប ដែលនេះជាពាក្យស្លោករបស់កម្ពុជា ដែលនិយាយថា ងើយ ស្កក ឱនដាក់គ្រាប់។ សម្តេចតេជោមានប្រសាសន៍បញ្ជាក់ថា ទោះបីមានតួនាទីខ្ពស់យ៉ាងណាក៏ដោយ គឺមិនត្រូវភ្លេចអ្នកក្រនោះទេ។ ធ្វើជាតំណាងរាស្ត្រមិនត្រូវឆ្មើងកន្ទ្រើងជាមួយប្រជាជននោះទេ។ ភាពឆ្មើងកន្ទ្រើងនោះ គឺនាំទៅដល់ភាពឯកោដោយខ្លួនឯង។ សម្តេចតេជោមានប្រសាសន៍សង្កត់ធ្ងន់ថា ប្រសិទ្ធភាពការងារ គឺស្ថិតនៅលើព័ត៌មាន ដែលក្តាប់បាន ហើយការងារនឹងបង្រៀនយើង ព្រោះគ្មានសាលាណាបង្រៀនឱ្យធ្វើជាតំណាងរាស្ត្រ ឬឱ្យធ្វើជាអ្វីនោះទេ។

ក្នុងឱកាសជួបសំណេះសំណាលនោះដែរ សម្តេចតេជោនាយករដ្ឋមន្ត្រី ក៏បានរំលឹកអំពីប្រវត្តិ និងដំណើរការនៃយុទ្ធសាស្ត្រ ឈ្នះ!ឈ្នះ! រំលាយអង្គការចាត់តាំងនយោបាយ និងយោធាខ្មែរក្រហម ដោយមិនមានការបង្ហូរឈាម នាំមកនូវសុខសន្តិភាព និងការបង្រួបបង្រួមជាតិ ដែលសម្តេចបានដាក់ចេញប្រវត្តិនៃទំនាក់ទំនងរបស់កម្ពុជា ជាមួយប្រទេសជិតខាងផង ក៏ដូចជាស្ថានភាពទូទៅនៅក្នុងពិភពលោកផងដែរ៕

Pages

Monday, November 24, 2014

សម្តេច​តេជោ៖​អ្នក​ដឹកនាំ​មិន​ប្រកាន់​អាយុ សំខាន់​លើ​ប្រសិទ្ធ​ភាព​ការងារ

សម្តេចតេជោ៖អ្នកដឹកនាំមិនប្រកាន់អាយុ សំខាន់លើប្រសិទ្ធភាពការងារ