ខ្មែរតែមួយ - Khmer Unity: 06/02/16

Thursday, June 02, 2016

ក្រសួងការបរទេសកម្ពុជាសម្តែងការព្រួយបារម្ភនានាចំពោះដំណើរការអនុវត្តន៍នីតិវិធីរបស់តុលាការកម្ពុជា

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិចេញថ្ងៃទី០២ ខែមិថុនា ឆ្នាំ២០១៦ នេះបានឲ្យដឹងថា រយៈពេលប៉ុន្មានថ្ងៃចុងក្រោយនេះ ក្រសួងបានសម្គាល់ឃើញនូវប្រតិកម្មពីសំណាក់ស្ថានបេសកកម្មការទូត មួយចំនួននៅភ្នំពេញ ដែលបានសំដែងនូវការងឿងឆ្ងល់ និងការព្រួយបារម្ភនានា ចំពោះដំណើរការអនុវត្តន៍នីតិវិធីរបស់តុលាការកម្ពុជា។

សេចក្តីប្រកាសព័ត៌មានក៏បានឲ្យដឹងទៀតថា ទាក់ទងនឹងបញ្ហានេះក្រសួងការបរទេស និងសហប្រតិបត្តិការអន្តរជាតិ យល់ឃើញថា ប្រតិកម្មខាងលើនេះ បានបង្ហាញឲ្យឃើញពីការមិនយល់ ឬការមិនចង់យល់អំពីវិធាននៃការអនុវត្តក្រមព្រហ្មទណ្ឌ និងក្រមនីតិវិធី

ព្រហ្មទណ្ឌនៃព្រះរាជាណាចក្រកម្ពុជា។ ការសូកប៉ាន់សាក្សី ត្រូវបានផ្តន្ទាទោសនៅក្នុងប្រទេសប្រជាធិបតេយ្យទាំងអស់ ហើយជាពិសេស នៅក្នុងប្រទេសសមាជិកសហភាព

អឺរ៉ុប។ ការផ្តន្ទាទោសនេះក៏មានដូចគ្នានៅប្រទេសកម្ពុជាដែរ។ ការបដិសេធមិនចូលខ្លួនមកឆ្លើយបំភ្លឺតាមរយៈការកោះហៅរបស់តំណាងអយ្យការ អាចត្រូវបានផ្តន្ទាទោសនៅក្នុងប្រទេសប្រជាធិបតេយ្យទាំងអស់ ជាពិសេសរដ្ឋសមាជិកទាំងអស់នៃសហភាពអឺរ៉ុប។ ហើយនៅប្រទេសកម្ពុជា ក៏មានដូចនេះដែរ។

សេចក្តីប្រកាសព័ត៌មានក៏បានបន្ថែមទៀតថា ការលើកឡើងអំពីការធ្វើទុក្ខបុកម្នេញខាងផ្លូវតុលាការទៅលើអ្នកនយោបាយខ្លះនោះ គឺជាការមិនសហេតុផលទាល់តែសោះ។

ក្រសួងការបរទេស និងសហប្រតិបត្តិការអន្តរជាតិ មានការភ្ញាក់ផ្អើល និងសោកស្តាយចំពោះការជ្រៀតជ្រែកបែបនេះចូលកិច្ចការផ្ទៃក្នុង របស់រដ្ឋអធិបតេយ្យមួយដែលគ្រាន់តែអនុវត្តវិធាន និងនីតិវិធីផ្លូវច្បាប់ និងតុលាការ ដូចគ្នានឹងការអនុវត្តន៍វិធាន និងនីតិវិធីផ្លូវច្បាប់ និងតុលាការរបស់រដ្ឋដែលជាម្ចាស់ប្រតិកម្មខាងលើនេះ៕

អង្គភាពព័ត៌មាន និងប្រតិកម្មរហ័ស បានចេញសេចក្ដីបំភ្លឺ ជុំវិញបញ្ហាការប្រៀបធៀបរវាងករណីកោះហៅឯកឧត្តម កឹម សុខា ដោយសាលាដំបូងរាជធានីភ្នំពេញ

ពិធីលាងសាយភោជន៍រៀបចំដោយវេទិកាសេដ្ឋកិច្ចពិភពលោក

នៅរាត្រីថ្ងៃទី១ ខែមិថុនា ឆ្នាំ២០១៦ ថ្នាក់ដឹកនាំនៃវេទិកាសេដ្ឋកិច្ចពិភពលោក បានប្រារព្ធរៀបចំពិធីលាងសាយភោជន៍ ជាមហាកិត្តិយសដ៏ខ្ពង់ខ្ពស់បំផុត ជូនបណ្តាមេដឹកនាំនយោបាយ និងសេដ្ឋកិច្ចពិភពលោក ដែលមានវត្តមានអញ្ជើញចូលរួមវេទិកាសេដ្ឋកិច្ចពិភពលោកលើកទី២៥ ស្តីពីអាស៊ាន នៅទីក្រុងគូឡាឡាំពួរ ប្រទេសម៉ាឡេស៊ី។ ពិធីដ៏មានអត្ថន័យនេះ ត្រូវបានការអញ្ជើញចូលរួមពី ឯកឧត្តម ណាជីប រ៉ាហ្សាក់ នាយករដ្ឋមន្រ្តី នៃប្រទេសម៉ាឡេស៊ី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ឯកឧត្តម Rui Maria de Araujo នាយករដ្ឋមន្រ្តីនៃប្រទេសទីម័រឡេស្តេ ឯកឧត្តម Jusuf Kalla អនុប្រធានាធិបតីនៃសាធារណរដ្ឋឥណ្ឌូណេស៊ី ឯកឧត្តម Trinh Dinh Dung ឧបនាយករដ្ឋមន្រ្តីវៀតណាម លោក Phillipp Rosler សមាជិកក្រុមប្រឹក្សាភិបាល នៃវេទិកាសេដ្ឋកិច្ចពិភពលោក ព្រមទាំងឯកឧត្តម លោកជំទាវ អស់លោក លោកស្រី ឥស្សរជននយោបាយ វាគ្មិនសេដ្ឋកិច្ច មកពីបណ្តាប្រទេសនានាជុំវិញពិភពលោកជាច្រើនរូប។

លោក Phillipp Rosler សមាជិកក្រុមប្រឹក្សាភិបាល នៃវេទិកាសេដ្ឋកិច្ចពិភពលោក មានប្រសាសន៍ ដោយសេចក្តីសប្បាយរីករាយដោយបានឃើញវត្តមាន នៃបណ្តាមេដឹកនាំនយោបាយនិងសេដ្ឋកិច្ចពិភពលោកដ៏ច្រើនកុះករ អញ្ជើញមកចូលរួម ក្នុងវេទិកាសេដ្ឋកិច្ចពិភពលោក លើកទី២៥ ស្តីពីអាស៊ាន នៅទីក្រុងគូឡាឡាំពួរ ប្រទេសម៉ាឡេស៊ី។ លោកប្រធានមានប្រសាសន៍បន្តថា ក្រោមប្រធានបទ ដែលផ្តោតសំខាន់លើរបៀបវារៈអាស៊ាន សម្រាប់បរិយាប័ន្ន និងកំណើន ដោយអ្នកចូលរួមទាំងអស់នឹងធ្វើការពិភាក្សាលើ បញ្ហាជាច្រើន ស្ថិតក្រោមសរសគ្រឹះសំខាន់ៗចំនួន៣ គឺទី១-ជំរុញការរីកចំរើនដោយចីរភាព និងបរិយាប័ន្ន សង្គម ទី២-ការស្វែងយល់ពីបដិវត្តន៍ឧស្សាហកម្មលើកទី៤ និងទី៣-ការពង្រឹងទំនាក់ទំនងតំបន់។ លោកប្រធានវេទិកាសេដ្ឋកិច្ចពិភពលោក ក៏បានជូនពរដល់បណ្តាមេដឹកនាំនយោបាយ និងសេដ្ឋកិច្ចពិភពលោក សូមមានសុខភាពល្អបរិបូរណ៍ ក្នុងការស្នាក់អាស្រ័យអញ្ជើញចូលរួមវេទិកាសេដ្ឋកិច្ចពិភពលោកលើកទី២៥ នៅទីក្រុងគូឡាឡាំពួរ ប្រទេសម៉ាឡេស៊ី ដើម្បីជានិម្មិតរូបនៃភាពរីកចំរើន របស់ពិភពលោកទាំងមូល។

សូមបញ្ជាក់ដែរថា នេះគឺជាលើកទី២ហើយ ដែលប្រទេសម៉ាឡេស៊ី ធ្វើជាម្ចាស់ផ្ទះរៀបចំ វេទិកាសេដ្ឋកិច្ចពិភពលោក។ វេទិកាសេដ្ឋកិច្ចពិភពលោក ស្តីពីអាស៊ានលើកទី២៥ ត្រូវបានប្រារព្ធធ្វើឡើងក្នុងបរិបទមួយ ដែលអាស៊ានបានប្រែក្លាយខ្លួន ទៅជាសហគមន៍អាស៊ានជាផ្លូវការ កាលពីចុងឆ្នាំ២០១៥។ គោលបំណងដ៏សំខាន់មួយ នៃការបង្កើតសហគមន៍សេដ្ឋកិច្ចអាស៊ាន គឺដើម្បីពន្លឿនកំណើនសេដ្ឋកិច្ច ពង្រឹងការអភិវឌ្ឍពាណិជ្ជកម្មនៅក្នុងតំបន់ និងអនុញ្ញាតឲ្យមានចរាចរណ៍កាន់តែសេរីជាងមុននូវមុខទំនិញ សេវាកម្ម ពលករជំនាញ និងមូលធន។ នៅក្នុងកាលានុវត្តភាពរបស់ខ្លួន អាស៊ានគឺជាតំបន់មួយដែលមានកំណើន សេដ្ឋកិច្ចដ៏លឿនបំផុតមួយ នៅក្នុងពិភពលោក ដោយកំណើនប្រាក់ចំណូលរបស់ប្រជាពលរដ្ឋនៅតែខ្ពស់ ចាប់តាំងពីឆ្នាំ២០០០មក។ លើបញ្ហាប្រឈមបើទោះបីអាស៊ាន សម្រេចបាននូវសមិទ្ធផលគន្លឹះៗជាច្រើន នៅក្នុងដំណើរឆ្ពោះទៅកាន់ការធ្វើសមាហរណកម្មតំបន់ពេញលេញមួយក៏ដោយ ក៏បញ្ហាប្រឈមនៅក្នុង សហគមន៍សេដ្ឋកិច្ចអាស៊ាន ក្នុងដំណើរដ៏វែងឆ្ងាយសម្រាប់បណ្តារដ្ឋជាសមាជិក ត្រូវបន្តរួមគ្នាដោះស្រាយ ឲ្យខានតែបាន៕

អាម៉េរិក-កម្ពុជា អបអរសាទរសមិទ្ធផល៥ឆ្នាំ នៃកម្មវិធីសន្តិសុខស្បៀងសម្រាប់អនាគតនៅកម្ពុជា

យោងតាមសេចក្តីប្រកាសព័ត៌មានរបស់ស្ថានទូតអាម៉េរិក កាលពីថ្ងៃទី០១ ខែមិថុនា ឆ្នាំ២០១៦ បានឱ្យដឹងថា ឯកឧត្តម William A. Heidt ឯកអគ្គរដ្ឋទូតអាម៉េរិក និងឯកឧត្តមឧបនាយករដ្ឋមន្ត្រីបណ្ឌិត យឹម ឆៃលី នឹងអញ្ជើញជាអធិបតីក្នុងពិធីកត់សម្គាល់រយៈពេល៥ឆ្នាំនៃកម្មវិធីសន្តិសុខស្បៀងសម្រាប់អនាគត (Feed the Future) នៅកម្ពុជា ដែលនឹងប្រព្រឹត្តទៅនាព្រឹកថ្ងៃទី ០២ ខែមិថុនា ឆ្នាំ២០១៦ នេះនៅសណ្ឋារគារ Intercontinental Hotel ក្នុងរាជធានីភ្នំពេញ ។

ពិធីនេះគឺជាការចាប់ផ្តើមនៃសន្និសីទរយៈពេល ២ ថ្ងៃ ដើម្បីពិនិត្យមើលលើសមិទ្ធផលដ៏គួរឱ្យកត់សម្គាល់ក្នុងវិស័យកសិកម្ម អាហារូបត្ថម្ភ និងការកាត់បន្ថយភាពក្រីក្រ ដែលបានអនុវត្តអស់រយៈពេល ៥ ឆ្នាំមកនេះ តាមរយៈកម្មវិធីសន្តិសុខស្បៀងសម្រាប់អនាគត ដែលអនុវត្តដោយទីភ្នាក់ងារសហរដ្ឋអាមេរិកសម្រាប់អភិវឌ្ឍន៏អន្តរជាតិ (USAID) ក្នុងកិច្ចសហប្រតិបត្តិការជាមួយរាជរដ្ឋាភិបាលនៃព្រះរាជាណាចក្រកម្ពុជា។ សន្និសីទនេះនឹងមានការចូលរួមរបស់កសិករ អ្នកបង្កើតគោលនយោបាយ ម្ចាស់ជំនួយ មន្ត្រីរាជរដ្ឋាភិបាល ក្រុមហ៊ុនឯកជន និងសមាជិកនៃអង្គការសង្គមស៊ីវិល។

សេចក្តីប្រកាសព័ត៌មានដដែលបានបញ្ជាក់ថា រដ្ឋាភិបាលអាម៉េរិកបានបង្កើតកម្មវិធីសន្តិសុខស្បៀងសម្រាប់អនាគតនេះនៅកម្ពុជា នៅឆ្នាំ ២០១០ ក្នុងខេត្តចំនួន៤ ជុំវិញបឹងទន្លេសាប (ខេត្តពោធិ៍សាត់ បាត់ដំបង កំពង់ធំ និង សៀមរាប) ដើម្បីកាត់បន្ថយភាពអត់ឃ្លាន និងភាពក្រីក្រ ដោយទន្ទឹមនឹងនោះដោះស្រាយបញ្ហាសមធម៌យេនឌ័រ បរិស្ថាន និងបញ្ហានៃការប្រែប្រួលអាកាសធាតុ។

កម្មវិធីសន្តិសុខស្បៀងសម្រាប់អនាគតស្របតាមផែនការរបស់រាជរដ្ឋាភិបាលកម្ពុជាក្នុងការបង្កើនផលិតផលកសិកម្ម និងបង្កើនសន្តិសុខស្បៀង ។ រយៈពេល៥ឆ្នាំកន្លងទៅនេះ កម្មវិធីសន្តិសុខស្បៀងសម្រាប់អនាគតបានផ្តល់ថវិការជាង ៥៥ លានដុល្លារអាម៉េរិកដើម្បីជួយកសិករកម្ពុជា ក្នុងការបង្កើនទិន្នផលកសិកម្ម និងប្រាក់ចំណូល ព្រមទាំងជួយពួកគេឱ្យមានលទ្ធភាពផ្គត់ផ្គង់អាហារបំប៉នសុខភាពដល់គ្រួសាររបស់ពួកគេ និងកាត់បន្ថយកង្វះអាហារូបត្ថម្ភ ។

ឯកឧត្តមឯកអគ្គរដ្ឋទូតអាមេរិក William Heidt និងឯកឧត្តមឧបនាយករដ្ឋមន្ត្រីបណ្ឌិត យឹម ឆៃលី នឹងទស្សនាស្តង់តាំងពិព័រណ៍បន្ទាប់ពីថ្លែងសុន្ទរកថា ហើយនឹងធ្វើសេចក្តីថ្លែងខ្លីមួយព្រមទាំងឆ្លើយសំណួរផ្សេងៗរបស់អ្នកសារព័ត៌មានផងដែរ៕

ឯកឧត្តម សុខ ឥសាន បកស្រាយអំពី ចម្ងល់ ដែលបានលើកឡើងថា តុលាការនៅកម្ពុជាមានស្តង់ដាពីរ

ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានធ្វើការបកស្រាយនូវ ចម្ងល់ ដែលបានលើកឡើងថា តុលាការកម្ពុជា មានស្តង់ដារពីរ៖

១-ករណី សម្តេចចក្រី ហេង សំរិន សម្តេចធម្មពោធិសាល ជា ស៊ីម ឯកឧត្តម ហោ ណាំហុង ឯកឧត្តម គាត ឈន់ ឯកឧត្តម ស៊ឹម កា និង ឯកឧត្តម អ៊ុក ប៊ុនឈឿន មិនចូលខ្លួនទៅតុលាការខ្មែរក្រហម : តុលាការខ្មែរក្រហម ជាតុលាការវិសាមញ្ញ ដែលរាជរដ្ឋាភិបាល និង អ ស ប បានឯកភាពគ្នាបង្កើតទ្បើង ដើម្បីកាត់ទោសមេដឹកនាំជាន់ខ្ពសខ្មែរក្រហម និង អ្នកទទួលខុសត្រូវខ្ពស់បំផុតនៃខ្មែរក្រហម ចន្លោះ១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។ មិនមែនជាតុលាការធម្មតា ទេ។

២-ឥស្សរជន ទាំង ៦ រូប : ក៏ជាអ្នករងគ្រោះដោយសាររបបខ្មែរក្រហមដូចប្រជាជនទូទៅដែរ៖

ជាអ្នកបានរួមចំណែកផ្តួលរំលំរបបប្រល័យពូជសាសន៏ ខ្មែរក្រហម ។
ជាអ្នករួមចំណែកធ្វេីច្បាប់កាត់ទោសមេដឹកនំាខ្មែរក្រហម ។ បេីយកពួកគាត់ទៅធ្វេីជាសាក្សី គឺមិនមានតុល្យភាពទេ ។

៣-ការកោះអញ្ជើញ : មានតែភាគីអន្តរជាតិ តែ១ មិនមានខាងភាគីកម្ពុជាទេ ដែលជាការខុសនីតិវិធី នៃតុលាការខ្មែរក្រហម ។

៤-ក្រមព្រហ្មទណ្ឌ ត្រូវបានអនុម័តនៅឆ្នាំ២០០៩ ឯតុលាការខ្មែរក្រហមកេីតឆ្នាំ២០០៦ ដូច្នេះ មិនមានប្រតិសកម្មទៅលើតុលាការខ្មែរក្រហមទេ ។

៥-ចំពោះ ករណី ឯឧ កឹម សុខា គឺ :

ជាបញ្ហាពលរដ្ឋម្នាក់ ស្ថិតនៅក្រោមច្បាប់ជាធរមាន ។ . -មាត្រា ៥៣៨នៃក្រមព្រហ្មទណ្ឌគ្របដណ្តប់លើករណី ឯកឧត្តម កឹម សុខា។ . – រដ្ឋសភា ក្នុងសម័យប្រជុំពេញអង្គ លើកទី ៦ នីតិកាលទី៥បានអនុម័តបើកផ្លូវឲុ្យតុលាការ និងសមត្ថកិច្ចបន្តនីតិវិធីតាមផ្លូវច្បាប់ ត្រឹមត្រូវតាមរដ្ឋធម្មនុញ មិនមានរំលោភរដ្ឋធម្មនុញ និង មិនបំពានលើអភ័យឯកសិទិ្ធ ឯកឧត្តម កឹម សុខា ទេ ។ ពីព្រោះ ឯឧ កឹម សុខា បានប្រព្រឹត្តបទល្មើសជាក់ស្តែង ដែលមិនអនុវត្តតាម ដិកាឲ្យចូលខ្លួនចំនួនពីរដង ដែលមានចែងក្នុងមាត្រា៥៣៨ នឌក្រមព្រហ្មទឋណ្ឌ ។

ស្ថាប័នរដ្ឋសភា ទាត់ចោលការស្នើតំណាងរាស្ត្រ គណបក្សសង្គ្រោះជាតិ

ស្ថាប័នរដ្ឋសភាបានចេញសេចក្តីថ្លែងការណ៍នៅថ្ងៃទី១ ខែមិថុនានេះ បញ្ជាក់ថាការស្នើអោយផ្អាកការចោទប្រកាន់ លោក កឹម សុខា មិនអាចធ្វើបានឡើយ ។

សេចក្តីថ្លែងការណ៍របស់មន្ត្រីនាំពាក្យរដ្ឋសភាថ្ងៃនេះ បានសរសេរបញ្ជាក់ថា ករណីស្នើអោយផ្អាកការចោទប្រកាន់ ឯកឧត្តម កឹម សុខា នាពេលនេះ ពុំអាចទទួលបានការគាំទ្រតាមការកំណត់របស់ច្បាប់បានឡើយ ព្រោះគណបក្សសង្គ្រោះជាតិ ដែលគាំទ្រអោយផ្អាកការចោទប្រកាន់មានតែ ៣៧នាក់ យោងញ្ញត្តិចុះថ្ងៃទី២៨ ឧសភា ឆ្នាំ ២០១៦ របស់តំណាងរាស្ត្រគណបក្សសង្គ្រោះជាតិ… ចំណែកឯសមាជិករដ្ឋសភា គណបក្សប្រជាជនកម្ពុជា ៦៨រូប សុទ្ធពុំគាំទ្រការផ្អាកនោះទេ ។

សេចក្តីថ្លែងការណ៍របស់រដ្ឋសភាថ្ងៃ១ ខែមិថុនា បង្ហាញជំហរប្រឆាំងការផ្អាកចោទប្រកាន់ លោក កឹម សុខា នេះ គឺជាលិខិតដែលបានឆ្លើយតប នឹងក្រុមសមាជិករដ្ឋសភាគណបក្សសង្គ្រោះជាតិ ដែលចោទថា រដ្ឋសភាបានធ្វើការតាមការគាបសង្កត់ពីស្ថាប័នផ្សេង ពាក់ព័ន្ធនឹងការការពារអភ័យឯកសិទ្ធិសភារបស់តំណាងរាស្ត្រ ។ សេចក្តីថ្លែងការណ៍ដដែលបានបំភ្លឺថាកិច្ចប្រជុំរបស់រដ្ឋសភាកាលពីថ្ងៃទី៣០ ខែឧសភាកន្លងមកនេះ បានស្របតាមបទបញ្ញត្តិនៃមាត្រា ៨០ នៃរដ្ឋធម្មនុញ្ញ… គឺក្រោយការរាយការណ៍របស់ព្រះរាជអាជ្ញានៃអយ្យការសាលាដំបូងរាជធានីភ្នំពេញ ដែលបានចោទប្រកាន់ លោក កឹ មសុខា ដែលជាតំណាងរាស្ត្រមណ្ឌលកំពង់ចាមពីបទ «បដិសេធក្នុងការចូលខ្លួន»។ សេចក្តីថ្លែងការណ៍បានបង្ហាញថាក្នុងកិច្ចប្រជុំរដ្ឋសភាកាលពីថ្ងៃទី៣០ ខែឧសភានោះ គឺមានវត្តមានអ្នកតំណាងរាស្ត្រតែ ៦៨រូប ប៉ុណ្ណោះដែលគាំទ្រទាំងអស់ តុលាការបន្តនីតិវិធីរបស់ខ្លួន…និងពុំមានសម្លេងណាដែលស្នើអោយផ្អាកការចោទប្រកាន់នោះទេ ដែលមានន័យថា រដ្ឋសភាបានអនុម័តឱ្យសមត្ថកិច្ចបន្តនីតិវិធីរបស់ខ្លួនជាបន្តទៀត ។ សេចក្តីថ្លែងការណ៍ដដែលបានថ្លែងថា អ្វីទាំងនេះ គឺស្របនឹងបទបញ្ញត្តិនៃមាត្រា៨០ នៃរដ្ឋធម្មនុញ្ញ និងស្របតាមបទបញ្ញត្តិនៃប្រការ ៤១ថ្មី នៃបទបញ្ជាផ្ទៃក្នុងរបស់រដ្ឋសភា ។

Pages