ព្រៈវិហារថ្មី រួមជាមួយសមិទ្ធផលផ្សេងៗជាច្រើននៅវត្តរស្មីមហារះភ្នំសន្លុង ស្ថិតក្នុងឃុំ សន្លុង ស្រុកទ្រាំង ខេត្តតាកែវ ដែលទើបនឹងសាងរួចរាល់ ដោយមានការជួយឧបត្ថម្ភ ពីប្រជាពុទ្ធបរិស័ទ្ធគ្រប់ស្រទាប់វណ្ណៈ ពិសេសតាមរយៈក្រុមការងារថ្នាក់ជាតិចុះជួយខេត្តតាកែវ ដោយបានចំណាយថវិកា សរុបប្រមាណជិត៦០ម៉ឺនដុល្លារ អាមេរិក។
ពិធីបញ្ចុះខណ្ឌសីមា និងសម្ពោធដាក់ឲ្យប្រើប្រាស់ជាផ្លូវការនេះ បានធ្វើឡើងក្រោមអធិបតីភាពឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដីទទួលបន្ទុកទីស្ដីការគណរដ្ឋមន្ដ្រី និងលោកជំទាវ កាលព្រឹកថ្ងៃទី២៦ ខែកក្កដា ឆ្នាំ ២០១៥។
មានប្រសាសន៍សំណេះសំណាលជាមួយប្រជាពុទ្ធបរិស័ទ និងមន្ត្រីអ្នកចូលរួម ឯកឧត្តមបណ្ឌិតសភាចារ្យ សុខ អាន បានថ្លែងថា ៖ សមិទ្ធផលជាច្រើននៅទូទាំងប្រទេស រួមទាំងវត្តអារាម និងសាលារៀនផងដែរ ត្រូវបានបំផ្លិចបំផ្លាញស្ទើរតែទាំង អស់នៅក្នុងរបបប្រល័យពូជសាសន៍ ប៉ុល ពត។ ឯកឧត្តម បានបន្ថែមថា ចាប់តាំងពីក្រោយថ្ងៃរំដោះ ៧ មករា ១៩៧៩ រាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា សម្រេចបានសមិទ្ធផលនានាជាច្រើន ជាពិសេសហេដ្ឋារចនាសម្ព័ន្ធរូបវ័ន្តទាំងឡាយ ត្រូវបានស្ដារជួសជុល និងកសាងឡើងវិញជាបន្តបន្ទាប់។
ឯកឧត្តមឧបនាយករដ្ឋមន្រ្ដី បានមានប្រសាសន៍បន្ដថា៖ ជាការពិត ព្រះពុទ្ធសាសនា និងទីវត្តអារាម ដើរតួនាទីយ៉ាងសំខាន់ក្នុងការអប់រំសីលធម៌ និងចរិយាធម៌នៅក្នុងសង្គម ហើយក៏ជាទី សក្ការៈ បូជា និងជាថ្នាលបណ្តុះបណ្ដាលធនធានមនុស្សដ៏សំខាន់ផងដែរ។ ទាំងនេះពិតជារួមចំណែកដល់ការធ្វើឱ្យមានសុខុដុមរមនីយកម្មក្នុងសង្គមជាតិ ដែលជាមូលដ្ឋានគ្រឹះដ៏ចាំបាច់សម្រាប់ការ អភិវឌ្ឍសេដ្ឋកិច្ច និងសង្គមប្រកបដោយសមធម៌និងមានចីរភាព។
ឯកឧត្តមឧបនាយករដ្ឋមន្ត្រី បានសង្កត់ធ្ងន់ថា ក្នុងស្មារតីនេះ រាជរដ្ឋាភិបាលកម្ពុជា ក្រោមការដឹក នាំរបស់គណបក្សប្រជាជនកម្ពុជា តែងតែយកចិត្តទុកដាក់ចូលរួមជាប្រចាំ ជាមួយព្រះតេជគុណ លោកយាយ លោកតា និងបងប្អូនប្រជាពលរដ្ឋទាំងអស់ ដើម្បីធ្វើការអភិវឌ្ឍឱ្យបានរីកចម្រើនព្រមគ្នាទាំងផ្នែកពុទ្ធចក្រ និងអាណាចក្រ។
ម៉្យាងវិញទៀតការចូលរួមក្នុងវិស័យព្រៈពុទ្ធសាសនា មិនត្រឹមតែឆ្លុះបញ្ចាំងឱ្យឃើញពីជំនឿ និងការគោរពប្រណិប័តដ៏ជ្រាលជ្រៅរបស់យើងទាំងអស់គ្នា ចំពោះព្រះពុទ្ធសាសនា ដែលត្រូវបានចាត់ទុកជាសាសនារបស់រដ្ឋប៉ុណ្ណោះទេ ប៉ុន្តែថែមទាំងបង្ហាញឱ្យឃើញនូវស្មារតីសាមគ្គីភាព និងការគាំទ្រចំពោះកិច្ចខិតខំប្រឹងប្រែងរបស់ ជារាជរដ្ឋាភិបាល ក្នុងការស្វែងរកគ្រប់មធ្យោបាយ ដើម្បីបម្រើផលប្រយោជន៍ដ៏ឧត្តុងឧត្តមជូនប្រជាជន សំដៅលើកកម្ពស់កម្រិតជីវភាពរស់នៅឱ្យកាន់តែប្រសើរឡើងថែមទៀតផងដែរ៕
