ក្រសួងព្រះបរមរាជវាំង ទាត់ចោលទាំងស្រុង នូវព័ត៌មាន ដែលថាព្រះមហាក្សត្រ និងកោះហៅមេដឹកនាំគណបក្ស នយោបាយធំៗទាំង៣ ជួបពិភាក្សារឿងព្រំដែន

យោងតាមសេចក្តី​ប្រកាសព័ត៌មាន ​ចុះនៅថ្ងៃទី ​២៧ ខែកក្កដា ​ឆ្នាំ២០១៥នេះ​ ក្រសួង​ព្រះបរមរាជវាំង​ បានបដិសេធ ​និងទាត់ចោលទាំងស្រុង​នូវព័ត៌មានអាក្រក់ប្រាសចាកការ​ពិត ដូចដែលមានចុះផ្សាយ​ក្នុងសារព័ត៌មាន​ភ្នំពេញប៉ុស្តិ៍​ និងសារព័ត៌មាន​នានា​ ដែលបាន​ចេញផ្សាយថា​ សម្តេចក្រុមព្រះ ​នរោត្តម រណឬទ្ធិ ​មានបន្ទូលថា​ ព្រះមហាក្សត្រ​គ្រោងនឹង​កោះហៅមេដឹកនាំ​គណបក្សនយោបាយធំៗ​ទាំង៣ ​មកប្រជុំពិភាក្សា​លើបញ្ហា​ព្រំដែន។

ចំពោះអត្ថបទនេះ​ ក្រសួងព្រះបរមរាជវាំង ​សូមប្រកាសជាព័ត៌មាន ​ជូនសាធារណៈជន​ប្រាបថា​ ព្រះករុណា​ព្រះមហាក្សត្រ​ នៃព្រះរាជាណាចក្រ​កម្ពុជា​ ជាទីគោរពសក្ការៈដ៏​ខ្ពង់ខ្ពស់បំផុត​ ព្រះអង្គពុំមាន​ព្រះរាជតម្រិះ​ ឬព្រះរាជឱង្ការ ​ឬមានផែនការ​កោះហៅមេ​ដឹកនាំគណបក្សធំៗ​ទាំង៣​ មកពីភាក្សា​អំពីបញ្ហាព្រំដែនឡើយ។ ​

ប៉ុន្តែក្រសួងព្រះបរមរាជវាំង បានបញ្ជាក់យ៉ាងច្បាស់ថា៖  បើមានកិច្ចពិភាក្សា​អំពីបញ្ហា​សំខាន់ៗ ​ទាក់ទងនឹង​ប្រទេសជាតិនោះ​ ព្រះករុណាព្រះមហា​ក្សត្រនៃព្រះរាជា​ណាចក្រកម្ពុជា ​ជាទីគោរពសក្ការៈ​ដ៏ខ្ពង់ខ្ពស់បំផុត ​ព្រះអង្គនឹងពិគ្រោះ​យោបល់ជាមួយ ​សម្តេចអគ្គមហា​សេនាបតីតេជោ ​ហ៊ុន សែន​ នាយករដ្ឋមន្ត្រីនៃ​ព្រះរាជាណាចក្រកម្ពុជា ​ក្នុងនាមថ្នាក់ដឹកនាំ​កំពូលនៃស្ថាប័ន​នីតិប្រតិបត្តិ​ ហើយព្រះអង្គ​ក៏មិមាន​ទម្លាប់ពិគ្រោះ​ជាមួយគណបក្ស​នយោបាយឡើយ៕