Tuesday, May 19, 2015
អាជ្ញាធរជាតិអប្សរា ចេញសេចក្តីប្រកាសព័ត៌មាន ស្តីពីការដួលរលំដើមឈើ និងបាក់មែកឈើ នៅតំបន់អង្គរ
អាជ្ញាធរជាតិអប្សរា នៅថ្ងៃទី១៩ ខែឧសភា ឆ្នាំ២០១៥នេះ អំពីការដួលរលំដើមឈើ និងបាក់មែកឈើនៅតំបន់អង្គរ បន្ទាប់ពីមានភ្លៀង និងខ្យល់យ៉ាងខ្លាំងបោកបក់មកលើតំបន់អង្គរ ដែលបង្កឲ្យមានការដួលរលំដើមឈើ នៅតាមប្រាសាទមួយចំនួន ប៉ុន្តែ អាជ្ញាធរជាតិអប្សរា បញ្ជាក់ថា ដើមឈើ និងមែកឈើទាំងនោះ ពុំបានប៉ះពាល់ ឬបង្កការខូចខាតដល់ប្រាសាទ ឬរចនាសម្ព័ន្ធប្រាសាទណាមួយឡើយ៖
ខ្លឹមសារទាំងស្រុង នៃសេចក្តីប្រកាសព័ត៌មានរបស់អាជ្ញាធរជាតិអប្សរា មានដូចតទៅ៖
.jpg)
និស្សិតសាកល វិទ្យាល័យ ភូមិន្ទ ភ្នំពេញ៣៥២៣នាក់ ទទួលសញ្ញាបត្រ បញ្ចប់ ការសិក្សាថ្នាក់ឧត្តមសិក្សា
និសិ្សតសាកលវិទ្យាល័យភូមិន្ទភ្នំពេញ ចំនួន៣៥២៣នាក់ បានទទួលសញ្ញាបត្រកំរិត ឧត្តមសិក្សា ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នាព្រឹកថ្ងៃទី១៩ ខែឧសភានេះ ក្រោម អធិបតីភាពសម្តេចតេជោនាយករដ្ឋមន្រ្តី ហ៊ុន សែន នៅសាលសន្និបាតនិង ពិព័រណ៌កោះពេជ្រ។
រដ្ឋមន្រ្តីស្តីទីនៃក្រសួងអប់រំ យុវជន និងកីឡា ឯកឧត្តម ពិត ចំណាន បានបញ្ជាក់ថា គិត ចាប់ តាំង ពី ឆ្នាំ១៩៨០ មកដល់បច្ចុប្បន្ន សាកលវិទ្យាល័យភូមិន្ទភ្នំពេញ ដែលជាគ្រិះស្ថាន ឧត្តមសិក្សា ពហុជំនាញ របស់រដ្ឋមានវ័យចំណាស់ជាងគេ បានផ្តល់ការផ្តល់ការបណ្តុះ បណ្តាលជំនាញ កំរិតឧត្តម ដល់និស្សិត ជាង៣ម៉ឺន៤ពាន់នាក់ ក្នុងនោះមាននារីជាង ១ម៉ឺននាក់។ សាកលវិទ្យាល័យភូមិន្ទភ្នំពេញ ក៏កំពុងអនុវត្ត ផែនការយុទ្ធសាស្ត្រ រយៈពេល៥ឆ្នាំរបស់ខ្លួន ផ្សារភ្ជាប់ទៅនឹងផែនការយុទ្ធ សាស្រ្តវិស័យអប់រំ ឆ្នាំ ២០១៤-២០១៨ ដែលត្រៀមបម្រើដល់តំរូវការសមាហរណកម្មអាស៊ាននាចុងឆ្នាំ២០១៥នេះ។
ឯកឧត្តម ពិត ចំណាន ក៏បានបញ្ជាកើផងដែរថា សាកលវិទ្យាល័យភូមិន្ទភ្នំពេញកំពុងបន្តកិច្ច សហការ ជាមួយអង្គភាពប្រឆាំងអំពើរពូករលួយ ដែលធានាដល់ការគ្រប់គ្រងចំណូល និងចំណាយ ស្របពេល រហូតមកដល់ពេលនេះសាកលវិទ្យាល័យភូមិន្ទភ្នំពេញ កំពុងមាននិស្សិតសិក្សាទាំងផ្នែក អាហារូបករណ៌ របស់រដ្ឋាភិបាល និងការសិក្សាបង់ថ្លៃ ផងដែរ។
នៅក្នុងឱកាសនេះ សម្តេចតេជោ នាយករដ្ឋមន្រ្តី បានលើកឡើងថា មិនប្រាកដថា ប្រទេសដែលសំបូរ ដោយធនធានធម្មជាតិ តែខ្វះធនធានមនុស្ស អាចក្លាយជាប្រទេសអភិវឌ្ឍន៌នោះទេ ប្រៀបធៀប ទៅ នឹង ប្រទេសសិង្ហបុរីដែលពុំមានធនធានទឹកសាបប្រើប្រាស់ផងនោះ នៅតែក្លាយជាប្រទេសអភិវឌ្ឍន៍ ដោយសារកត្តាធនធានមនុស្ស ប៉ុន្តែជាក់ស្តែងកម្ពុជាថ្វីត្បិតតែសំបូរដោយធនធានធម្មជាតិតែកម្ពុជា នៅ តែជាប្រទេសក្រីក្រ ដោយសារតែនយោបាយខុស ដែលបានធ្វើបាត់បង់ធនធានមនុស្សក្នុងរបបប្រល័យពូជសាសន៍ប៉ុលពត។ សម្តេចតេជោ បានបញ្ជាក់ថា កម្ពុជានឹងក្លាយជាប្រទេស មានប្រាក់ចំណូលមធ្យមកំរិតខ្ពស់ នៅឆ្នាំ២០៣០ ហើយនឹងក្លាយជាប្រទេសកំពុងអភិវឌ្ឍន៌ នាឆ្នាំ២០៥០ ដែលផែនការ នេះត្រូវការឲ្យមានវិស័យឧស្សាហកម្មមានធនធានស្រាប់ក្នុងស្រុក និងឧស្សាហកម្មដែលមានចរិត ជា សកល។
សម្តេចតេជោ ហ៊ុន សែន ក៏បានជំរុញឲ្យក្រសួងអប់រំ យុវជន និងកីឡា រួមនិងក្រសួងសង្គមកិច្ច ត្រូវរៀប ចំការយកចិត្តទុកដាក់ចំពោះ សិស្ស និស្សិត និងយុទ្ធជនពិការ ដែលទទួលបាន ជោគជ័យពីអន្តរជាតិ៕
.jpg)
តំណាងក្រសួងការងារ ដឹកនាំគណៈប្រតិភូ ចុះទៅគោរពវិញ្ញាណក្ខ័ន្ធ កម្មករ កម្មការីនី ដែលស្លាប់ ដោយគ្រោះថ្នាក់ចរាចរណ៍ នៅខេត្តស្វាយរៀង
បើតាមការថ្លែងពីឯកឧត្តម ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា នារសៀលថ្ងៃទី១៩នេះ ឯកឧត្តម ហ៊ុយ ហ៊ានសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈនឹងដឹកនាំប្រតិភូក្រសួងចូលរួមពិធីគោរពវិញ្ញាណក្ខ័ន្ធកម្មករកម្មការិនីដែលបានបាត់បង់ជីវិតដោយសារគ្រោះថ្នាក់ចរាចរ នៅខេត្តស្វាយរៀងកាលពីព្រឹកថ្ងៃទី១៩នេះ។
ដោយឡែកនាថ្ងៃស្អែកទី២០ខែឧសភា ឆ្នាំ២០១៥ ឯកឧត្តមរដ្ឋមន្ត្រី អ៊ិត សំហេង នឹងដឹកនាំប្រតិភូទៅចូលរួមបុណ្យសព និងចូលសួរសុខទុក្ខអ្នករងរបួសនៅតាមមន្ទីរពេទ្យដោយផ្ទាល់។ ឯកឧត្តម ហេង សួរ បានឲ្យដឹងថា ក្នុងឱកាសដ៏រន្ធត់ និងក្រៀមក្រំនេះ ក្រសួងចូលរួមបច្ច័យបុណ្យសព ក្នុងសពម្នាក់ៗចំនួន ១លានរៀល និងជួយអ្នករងរបួសចំនួន ៥០ម៉ឺនរៀល។
ដោយឡែក បេឡាជាតិសន្តិសុខសង្គម របស់ក្រសួងការងារ និងបណ្តុះបណ្តាលវិជ្ជាជីវៈក៍បានធានាខុសត្រូវលើថ្លៃព្យាបាល ជនរងគ្រោះ ចិញ្ចឹមជនរងគ្រោះដែលធ្លាក់ខ្លួនពិការ និងអ្នករស់នៅក្នុងបន្ទុករបស់ជនរងគ្រោះដែលបានបាត់បង់ជីវិតដោយសារគ្រោះថ្នាក់ចរាចរនេះផងដែរ៕
ក្រុមប្រឹក្សាសហជីពជាតិកម្ពុជា ផ្ញើលិខិតចូលរួមលំលែកទុក្ខ ដល់ក្រុមគ្រួសារកម្មករ ដែលបានស្លាប់បាត់បង់ជីវិត ដោយសារគ្រោះថ្នាក់ ចរាចរណ៍
ក្រុមប្រឹក្សាសហជីពជាតិកម្ពុជា ដឹកនាំដោយលោក សោម អូន នៅរសៀលថ្ងៃទី១៩ ខែឧសភា ឆ្នាំ២០១៥នេះ បានផ្ញើសារចូលរួមរំលែកទុក្ខដល់កម្មករ កម្មការីនី១៨នាក់ដែលបានស្លាប់ និងរងរបួសធ្ងន់ស្រាលមួយចំនួន បន្ទាប់ពីមានឧប្បត្តិហេតុគ្រោះថ្នាក់ចរាចរណ៍ នៅតាមបណ្តោយផ្លូវជាតិលេខ១ ស្ថិតក្នុងភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង កាលពីព្រឹកថ្ងៃទី១៩ ខែឧសភានេះ។
ខ្លឹមសារនៃលិខិតចូលរួមរំលែកទុក្ខមានដូចតទៅ៖
សម្តេចតេជោ និងសម្តេចគតិព្រឹទ្ធបណ្ឌិត ឧបត្ថម្ភថវិកា ដល់អ្នកស្លាប់ និងរបួសក្នុងហេតុការណ៍ គ្រោះថ្នាក់ចរាចរណ៍ នៅខេត្តស្វាយរៀង
ក្រោយពីបាន ប្រកាសចូលរួមរំលែកទុកចំពោះគ្រួសារជនរងគ្រោះ
ដែលបានស្លាប់បាត់បង់ជីវិត និងរងបួសធ្ងន់ស្រាល ដោយសារគ្រោះថ្នាក់ចរាចរណ៍ នៅឯខេត្តស្វាយរៀង
កាលពីព្រឹកមិញនេះ សម្តេចតេជោ នាយករដ្ឋមន្ដ្រី និងសម្តេចគតិព្រឹទ្ធបណ្ឌិត បានឧបត្ថម្ភថវិកា
២លានរៀល សម្រាប់អ្នកស្លាប់ម្នាក់ៗ និង ១លានរៀល សម្រាប់អ្នករងរបួសម្នាក់។
សម្ដេចនាយករដ្ឋមន្ដ្រី
ហ៊ុន សែន និងសម្ដេចកិត្ដិព្រឹទ្ធបណ្ឌិត បានឧបត្ថម្ភថវិកា ចំនួន២លានរៀល ជូនគ្រួសារសពជនរងគ្រោះ
ដែលបានបាត់បង់ជីវិតចំនួន ១៨នាក់ (គិតត្រឹមម៉ោង៤រសៀល) និងឧបត្ថម្ភថវិកា ១លានរៀល
ជូនជនរងគ្រោះ ដែលរងរបួសនៅក្នុងហេតុការណ៍ គ្រោះថ្នាក់ចរាចរណ៍នៅខេត្ដស្វាយរៀង កាលពីព្រឹកថ្ងៃទី
១៩ ខែឧសភា ឆ្នាំ២០១៥នេះ ។
ថវិកាឧបត្ថម្ភ របស់សម្ដេចតេជោ
ហ៊ុន សែន ខាងលើនេះ ធ្វើឡើងតាមរយៈលោកជំទាវឧបនាយករដ្ឋមន្ដ្រី ម៉ែន សំអន ដែលបច្ចុប្បន្នកំពុងចុះជួយអន្ដរាគមន៍
និងសួរសុខទុក្ខអ្នកជំងឺ នៅឯខេត្ដស្វាយរៀង។
គួរបញ្ជាក់ថានៅក្នុងពិធីប្រគល់សញ្ញាប័ត្រ
ដល់និស្សិតនៃសកលវិទ្យាល័យភូមិន្ទភ្នំពេញ នៅថ្ងៃនេះ សម្តេចតេជោ ហ៊ុន សែន នាយករដ្ឋមន្រ្តី
នៃព្រះរាជាណាចក្រកម្ពុជា បានបង្ហាញអារម្មណ៍សោកស្តាយ និងចូលរួមរំលែកទុក្ខ
ជាមួយក្រុមគ្រួសារកម្មករទាំងអស់ ដែលបានជួបឧប្បត្តិហេតុគ្រោះថ្នាក់ចរាចរណ៍ដ៏រន្ធត់
នៅក្នុងខេត្តស្វាយរៀង និងបានជូនពរសំរាប់អ្នករងរបួស ដែលកំពុងសំរាកព្យាបាលឲ្យបានឆាប់ជាសះស្បើយ។
សម្តេចតេជោ ហ៊ុន សែន
ក៏បានគូសបញ្ជាក់ផងដែរថា បញ្ហាគ្រោះថ្នាក់ចរាចរណ៍ កំពុងតែធ្ងន់ធ្ងរទៅៗ ដែលទាមទារ
ឲ្យការអនុវត្តន៍ច្បាប់ចរាចរណ៍ ឲ្យបានកាន់តែតឹងរឹងថែមទៀត។ ដើម្បីធ្វើឲ្យស្ថានភាពគ្រោះថ្នាក់ចរាចរណ៍នៅកម្ពុជា
បានធូរស្បើយ សម្តេចបានស្នើឲ្យមានការចូលរួមទាំងអស់គ្នា ដើម្បីកែស្ថានភាពគ្រោះថ្នាក់នេះ
ឲ្យបានល្អប្រសើរនោះដែរ៕
អត្ថបទ៖
ច័ន្ទ ទេវី
ជនរងគ្រោះដោយសារគ្រោះថ្នាក់ចរាចរណ៍ នៅខេត្តស្វាយរៀង ទទួលបានការឧបត្ថម្ភ និងទំនុកបំរុង
ករណីគ្រោះថ្នាក់ចរាចរណ៍ដ៏រន្ធត់ ដែលបណ្តាលឲ្យកម្មករ ស្លាប់
និងរងរបួសធ្ងន់ស្រាលប្រមាណជា៣០នាក់ ដែលបណ្តាលមកពីឡានក្រុងបុកឡានដឹកកម្មករ
នៅស្វាយរៀង នៅវេលាម៉ោង ៧ព្រឹក ថ្ងៃទី ១៩ ខែឧសភា ឆ្នាំ២០១៥នេះ គឺបេឡាជាតិសន្តិសុខសង្គម
(បសស) ទទួលបន្ទុកផ្តល់ធានារ៉ាប់រងគ្រោះថ្នាក់ការងារ ជូនដល់កម្មកររងគ្រោះទាំងអស់
ទាំងអ្នកស្លាប់បាត់បង់ជីវិត និងអ្នករបួសដែលត្រូវព្យាបាល។
ជាគោលការណ៍ចំពោះជនរងគ្រោះដែលបានអ្នកស្លាប់បាត់បង់ជីវិត បសស
នឹងផ្តល់ថ្លៃដឹកសព ដល់គេហដ្ឋាន រឺកន្លែងធ្វើបុណ្យ និងថ្លៃសោហ៊ុយបូជាសព ចំនួន៤លានរៀល
និងចិញ្ចឹម ប្រពន្ធ ឬ ប្តី និងកូន ព្រមទាំងចិញ្ចឹមជនចាស់ជរា និងអ្នកនៅក្នុងបន្ទុករបស់ជនរងគ្រោះ។
ដោយឡែកចំពោះអ្នករងរបួស បេឡាជាតិសន្តិសុខសង្គម ទទួលបន្ទុកលើការព្យាបាលរហូតដល់ជាសះស្បើយ
ផ្តល់ថ្លៃព្យាបាល ថ្លែថែទាំ ប្រាក់បំណាច់ប្រចាំថ្ងៃ។ ក្រោយការព្យាបាលបើពិការភាពចិញ្ចឹម
១ ជីវិត ផ្តល់ ដៃ ជើង អវៈយវៈសិប្បនិមិត្ត រទេះរុញ និងបណ្តុះបណ្តាលវិជា្ជជីវៈឡើងវិញ។
ការទទួលបន្ទុករបស់ បេឡាជាតិសន្តិសុខសង្គម ក៏ព្រោះតែកម្មករទាំងនោះជាសមាជិក
របស់បេឡាជាតិសន្តិសុខសង្គម ដូច្នេះពួកគាត់ត្រូវទទួលបានការធានារ៉ាប់រងពី
បេឡាជាតិសន្តិសុខសង្គម តាមច្បាប់។
គិតមកដល់ម៉ោង ៤ល្ងាច ថ្ងៃទី ១៩ ខែឧសភា ឆ្នាំ ២០១៥នេះ ចំនួនអ្នកស្លាប់ដោយសារគ្រោះថ្នាក់ចរាចរណ៍ដ៏រន្ធត់នាព្រឹកមិញនេះ
បានកើនដល់១៨នាក់ហើយ និងអ្នករងរបួសធ្ងន់ស្រាល ២១នាក់ ដែលកំពុងសង្គ្រោះបន្ទាន់
និងសំរាកព្យាបាលនៅមន្ទីរពេទ្យរដ្ឋ និងគ្លីនិកឯកជន ហើយនៅក្នុងចំណោមអ្នករងរបួសទាំងអស់
មានពីរនាក់ត្រូវបានបញ្ជូនមកសង្រ្គោះនៅមន្ទីរពេទ្យកាល់ម៉ែត។
គួរបញ្ជាក់ថា គ្រោះថ្នាក់ខាងលើបានកើតឡើងនៅវេលាម៉ោងជិត
៧ព្រឹកថ្ងៃទី១៩ ខែឧសភា ឆ្នាំ២០១៥នេះ ស្ថិតនៅតាមបណ្តោយ ផ្លូវជាតិលេខ១ ស្ថិតក្នុងភូមិដើមពោធិ៍
ឃុំកណ្តៀងរាយ ស្រុកស្វាយទាប ខេត្តស្វាយរៀង។ បើតាមការឲ្យដឹងពីសមត្ថកិច្ច នៅក្នុងរថយន្តដឹកកម្មករដែលជួបគ្រោះថ្នាក់គឺផ្ទុកកម្មករជាង
៣០នាក់។ រថយន្តក្រុង ដែលបុករថយន្តដឹកកម្មករ ជារបស់ក្រុមហ៊ុនដឹកអ្នកដំណើរកម្ពុជា-វៀតណាម
ដែលមានទីតាំង ស្ថិតនៅជាប់របងពហុកីឡាដ្ឋានជាតិអូឡាំពិក ក្បែរកន្លែងលក់ផ្លែឈើចាស់។
តាមការអះអាងរបស់សមត្ថកិច្ចគ្រោះថ្នាក់នេះ បណ្តាលមកពីរថយន្តក្រុង ដែលធ្វើដំណើរមកពីប្រទេសវៀតណាម
ឆ្ពោះមករាជធានីភ្នំពេញ ក្នុងល្បឿនយ៉ាងលឿននោះ បានបើកជែង ហើយទៅចំណែកផ្លូវរថយន្តដឹកកម្មករ
ដែលបញ្ច្រាសទិស រួច បុកពេញទំហឹងលាន់ឮដូចរន្ទៈ។
ដោយមើលឃើញពីសោកនាដកម្មដ៏គួរឲ្យរន្ធត់ និងសង្វេគនេះ
មន្រ្តីជាន់ខ្ពស់រាជរដ្ឋាភិបាលកម្ពុជាជាច្រើនរូប បានបរិច្ចាគថវិកាផ្ទាល់ខ្លួន
ជួយកម្មករជួបគ្រោះថ្នាក់ចរាចរ នៅខេត្តស្វាយរៀងនាព្រឹកមិញ ដើម្បីដោះស្រាយទុក្ខលំបាកផ្សេងៗ។ សប្បុរសជនដែលបានបរិច្ចាគ ថវិកាចូលរួមសម្រាលទុក្ខលំបាករបស់កម្មករ
និងក្រុមគ្រួសារកម្មកររងគ្រោះរួមមាន៖
-
សម្តេចអគ្គមហាពញ្ញាចក្រី ហេង សំរិន បរិច្ចាគ ១លានរៀលសម្រាប់អ្នកស្លាប់
និងអ្នករងរបួស ៥០ម៉ឺនរៀល។
-
លោក ជំទាវ ម៉ែន សំអន ឧបនាយករដ្ឋមន្រ្តីរដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា
និងអធិការកិច្ច បរិច្ចាគថវិកាសម្រាប់អ្នកស្លាប់ និងអ្នករងរបួសម្នាក់ៗ
៥០ម៉ឺនរៀល។
-
ឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស
បរិច្ចាគថវិកាសម្រាប់អ្នកស្លាប់ និង អ្នករងរបួសម្នាក់ៗ ២០ម៉ឺនរៀល។
-
ឯកឧត្តម ចៅ ភារុណ បរិច្ចាគថវិកាសម្រាប់អ្នកស្លាប់ និងរងរបួសម្នាក់ៗ
១៥ម៉ឺនរៀល។
-
ឯកឧត្តម កឹម ងួន បរិច្ចាគថវិកាសម្រាប់អ្នកស្លាប់ និងអ្នករងរបួសម្នាក់
៥ម៉ឺនរៀល។
-
កាកបាទក្រហមកម្ពុជាខេត្តស្វាយរៀង បរិច្ចាគថវិកាសម្រាប់អ្នកស្លាប់
និងអ្នករងរបួសម្នាក់ៗ ៤០ម៉ឺនរៀល។
-
លោកជំទាវ ម៉ែន ភក្តី ហុក ឡង់ឌី បរិច្ចាគថវិកាសម្រាប់អ្នកស្លាប់ម្នាក់ៗ
២០០ដុល្លារ សម្រាប់អ្នករងរបួសម្នាក់ៗ ៣០ម៉ឺនរៀល។
-
ឯកឧត្តម ជៀង អំ អភិបាលខេត្តស្វាយរៀង បរិច្ចាគថវិកាសម្រាប់អ្នកស្លាប់
និងរបួសម្នាក់ៗ ១០ម៉ឺនរៀល ក្រៅពីនេះមានសប្បុរសជន ជាច្រើនទៀត ដែលបានចូលរួមឧបត្ថម្ភជាថវិកាដល់គ្រួសារជនរងគ្រោះ៕
អត្ថបទ៖ ច័ន្ទ ទេវី
សម្តេចតេជោបញ្ជាក់ថា អ្នកបំបែកមិនសំខាន់តែសំខាន់លើភាគីទាំងពីរ ចង់បែករឺមិនបែក
នៅថ្ងៃទី ១៩ ខែឧសភា ឆ្នាំ ២០១៥នេះ ក្នុងពិធីប្រគល់សញ្ញាប័ត្រ
ថ្នាក់បរិញ្ញាប័ត្រ និងបរិញ្ញាប័ត្រជាន់ខ្ពស់ ដល់និស្សិតនៃសកលវិទ្យាល័យភូមិន្ទភ្នំពេញ
នៅមជ្ឈមណ្ឌលកោះពេជ្រ សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា
សម្ដេចបានផ្ញើសារ តាមទូរស័ព្ទទៅឯកឧត្តម សម រង្ស៊ី ដើម្បីឲ្យប្រាប់ទៅគ្នារបស់គាត់
អាចនិយាយសំដៅទៅ ឯកឧត្តម កឹម សុខា ថា កុំឲ្យប្រហើន និងបំពានវប្បធម៌សន្ទនា
ប្រយ័ត្នគណបក្សប្រជាជនកម្ពុជា បោះឆ្នោតទម្លាក់ពីតំណែងអនុប្រធានទី១រដ្ឋសភា។
សម្ដេចតេជោ ហ៊ុនសែន បញ្ជាក់ថា « ខ្ញុំបានប្រាប់
ឯកឧត្តម សម រង្ស៊ី ថា បើឡើង គឺឡើង តាមសន្លឹកឆ្នោតរបស់គណបក្សប្រជាជន ហើយបើធ្លាក់
គឺក៏ធ្លាក់តាមគណបក្សប្រជាជនដែរ ហើយកុំព្រហើន បើគេមិនពេញចិត្ត
នឹងទម្លាក់ជារឿងរបស់គេ ព្រោះខ្លួនតែងតែដើរដៀមដាមនិង ជេរគេហើយកុំថាគេគំរាម
។ វប្បធម៌សន្ទនារវាងសម្តេច និង ឯកឧត្តម
សម រង្ស៊ី តម្រូវឲ្យមានការគោរពគ្នា តម្រូឲ្យមានការពិភាក្សាគ្នា មិនមែនតម្រូវឲ្យដើរវាយប្រហាគ្នាឡើយ
»។
ទាក់ទងនិងសំដីរបស់ឯកឧត្តម កឹម សុខា នៅក្រុងកំពតកាលពីពេលថ្មីៗនេះ
ដែលបានលើកឡើងដោយពាក្យវាយប្រហារមិនចំឈ្មោះ ប៉ុន្តែក្នុងគោលដៅរិះគន់មកលើគណបក្សប្រជាជនកម្ពុជា
មានបំណងបំបែកបំបាក់ខ្លួន និងឯកឧកត្តម សម រង្ស៊ី នោះត្រូវបាន សម្តេចតេជា ហ៊ុនសែន
មានប្រសាសន៍ឆ្លើយតប «បែកឬមិនបែកវាអាស្រ័យលើសាមីខ្លួន
មិនមែនអាស្រ័យលើអ្នកបំបែកនោះទេ ហើយកុំនិយាយរឿងបញ្ហាលក់
ឬមិនលក់ គំរាមមិនខ្លាចព្រោះគ្មានអ្នកណាគំរាមលោកឡើយ ឬ ទិញលោកឡើយ បើលោក ចង់រត់ក៏រត់ចុះ
បើលោកចង់បែកក៏បែកចុះគេគ្មានពេលទៅបំបែកអ្នកឡើយ»។
សម្តេចក៏បានឲ្យដឹងដែរថា ឯកឧត្តម សម រង្ស៊ី បានផ្ញើរមកសម្តេចម្សិលមិញថា
ឯកឧត្តមបានធ្វើដំណើរទស្សនៈកិច្ចយ៉ាងរលូន និងពន្យល់ដល់ប្រជាជនខ្មែរនៅអាម៉េរិក
អំពីរបត់នយោបាយ ថ្មីៗនៅកម្ពុជានិងឲ្យយល់ពីវប្បធម៌សន្ទនា តែដោយឡែកអ្នកនៅក្នុងស្រុកគិតតែនិយាយ
បំបែក មិនបែក ។
គួរបញ្ជាក់ថា ប្រតិកម្មរបស់សម្តេចតេជោ ហ៊ុន សែន បានធ្វើឡើងបន្ទាប់ពីកាសែតភ្នំពេញប៉ុស្តិ៍
ចេញផ្សាយនៅព្រឹកថ្ងៃទី១៩ ខែឧសភា ឆ្នាំ២០១៥ ដែលមានចំណងជើងថា « កឹម
សុខា ថា បក្សប្រជាជនកំពុងខំបំបែកសង្រ្គោះជាតិ»។
ក្នុងអត្ថបទ របស់កាសែតភ្នំពេញប៉ុស្តិ៍ បានដកស្រង់សំដី ឯកឧត្តម កឹម សុខា
អនុប្រធានគណបក្សសង្រ្គោះជាតិ ក្នុងគ្រាចុះជួបជាមួយសកម្មជនរបស់ខ្លួន
នៅខេត្តកំពត កាលពីព្រឹកថ្ងៃទី១៧ ខែឧសភា ថា « យើងបានស្គាល់យុទ្ធសាស្រ្តរបស់ពួកគេរួចហើយ
ហើយពួកគេចង់បំបែកបំបាក់យើង ព្រោះប្រសិនបើក្រុមរបស់យើងបែកបាក់ យើងទន់
ខ្សោយណាស់»។ ឯកឧត្តម កឹម សុខា បញ្ជាក់ថាសម្ព័ន្ធភាពរវាងរូបឯកឧត្តម
និងឯកឧត្តម សម រង្ស៊ី គឺមិនមានថ្ងៃបែកបាក់ឡើយ គឺឯកឧត្តម និងឯកឧត្តម សម រង្ស៊ី
ជាមនុស្សតែមួយ។
ទោះជាយ៉ាងណាក៏ដោយ សម្តេចតេជោ បញ្ជាក់ថា សម្តេចមិនសូវមានជំនឿលើការចុះផ្សាយរបស់កាសែតភ្នំពេញប៉ុស្តទេ
ដោយសារកាសែតនេះធ្លាប់មានកំហុស ក្នុងចុះផ្សាយព័ត៌មានរបស់ខ្លូន ទោះជាយ៉ាងណាសម្តេចបានបញ្ជាក់ថា
ចំពោះការលើកឡើង ថាមានការបំបែកបំបាក់ឯកឧត្តម សម រង្ស៊ី និងឯកឧត្តម កឹម សុខា
នោះគឺវាមិនអាស្រ័យលើអ្នកបំបែកបំបាក់ទេ វាអាស្រ័យដោយផ្ទាល់លើសាមីខ្លូន
ថាចង់បែកបាក់គ្នារឺអត់?
សម្តេចបានលើកឧទាហរណ៍ថា ដូចប្តីប្រពន្ធចឹង ទោះបីឪពុកម្តាយចង់បំបែកបំបាក់ក៏មិនបែកដែរ
បើកូននោះមិនព្រមបែកខ្លូនឯងនោះ៕
អត្ថបទ៖ ច័ន្ទ ទេវី
Subscribe to:
Posts (Atom)