ខ្មែរតែមួយ - Khmer Unity: 04/08/15

Wednesday, April 08, 2015

សមាសភាព គ. ជ. ប ថ្មី ទាំង៩រូប ត្រូវបាន គណបក្សប្រជាជនកម្ពុជា និងគណបក្សសង្រ្គោះជាតិ បង្ហាញជាសាធារណៈ

នៅថ្ងៃទី ០៨ ខែមេសា ឆ្នាំ២០១៥នេះ គណបក្សប្រជាជនកម្ពុជា និងគណបក្សសង្គ្រោះជាតិបានចេញនូវលិខិតជាផ្លូវការរបស់ខ្លូន ដើម្បីបង្ហាញជាសាធារណៈនូវសមាសភាព ទាំង៩រូប នៃសមាជិកគណៈកម្មាធិការជាតិរៀបចំការបោះឆ្នោតថ្មី (គ.ជ.ប) ដែលប្រជាពលរដ្ឋ និងសាធារណៈជនកំពុងរង់ចាំមើលថា តើជាអ្នកណា និងក្លាយជាតំណាងគណបក្សទាំងពីរក្នុងនាមជាសមាជិក គ.ជ.ប? និងតើអ្នកណាដែលនឹងត្រូវជ្រើសរើសជាសមាជិកទី៩ នៃ គ.ជ.ប ថ្មីនេះ? ដើម្បីធ្វើការងារបោះឆ្នោតនៅឆ្នាំ២០១៨ខាងមុខ ដែលគេរំពឹងថា និងទទួលបានការពេញចិត្តពីគ្រប់មជ្ឈដ្ឋានបន្ទាប់ពី គ.ជ.ប ថ្មីត្រូវបានធ្វើកំណែទម្រង់ស៊ីជម្រៅ នៅក្នុងអាណត្តិទី៥នេះ។

យោងតាមលិខិតរបស់ គណបក្សប្រជាជនកម្ពុជា ដែលចុះហត្ថលេខា ដោយ សម្តេចតេជោ ហ៊ុន សែន នៅថ្ងៃទី ០៨ ខែមេសា ឆ្នាំ២០១៥ ផ្ញើរជូនសម្តេចពញាចក្រី ហេង សំរិន ប្រធានរដ្ឋសភា គឺសមាសភាព ៤រូប ដែលស្នើឡើងដើម្បីឲ្យរដ្ឋសភាបោះឆ្នោតអនុម័តនោះ រួមមាន ៖ ទី១. លោក ស៊ិក ប៊ុនហុក (ប្រធាន), ទី២. លោក មាន សទិ (សមាជិក) ទី៣. លោក ឌុច សុន (សមាជិក) និងទី៤. លោក ឯម សូផាត (សមាជិក)។

ដោយឡែក យោងតាមលិខិតរបស់ គណបក្សសង្រ្គោះជាតិ ដែលចុះហត្ថលេខា ដោយ ឯកឧត្តម សម រង្ស៊ី ផ្ញើរជូនសម្តេចពញាចក្រី ហេង សំរិន នៅថ្ងៃនេះដែរ គឺសមាសភាព ៤រូប ដែលស្នើរួមមាន៖ ទី១. លោក គួយ ប៊ុនរឿន ទី២. លោក រ៉ុង ឈុន ទី៣. លោក ហ៊ីង ធីឫទ្ធិ និងទី៤. លោកស្រី តែ ម៉ានីរ៉ុង។

ជាមួយគ្នានេះ លិខិតរួមរបស់គណបក្សទាំងពីរ ដែលចុះហត្ថលេខា ដោយ សម្តេចតេជោ ហ៊ុន សែន និងឯកឧត្តម សម រង្ស៊ី ចេញផ្សាយនៅថ្ងៃនេះ ផ្ញើរជូនសម្តេចពញាចក្រី ហេង សំរិន គឺគណបក្សទាំងពីរ បានព្រមព្រៀងគ្នា ជ្រើសតាំងលោក ហង្ស ពុទ្ធា ជាសមាជិកទី៩ នៃ គ.ជ.ប ផងដែរ៕

អត្ថបទ៖ ច័ន្ទ ទេវី

សាររបស់ឯកឧត្តម ហ៊ុន ម៉ានី ផ្ញើរជូន ក្រុមការងារសហភាពសហព័ន្ធយុវជនកម្ពុជា ស្តីពីជំហរដែលក្រុមការងាររៀបចំព្រឹត្តិការណ៍អង្គរសង្រ្កាន្ត គួរប្រកាន់យក

នៅថ្ងៃទី ០៨ ខែមេសា ឆ្នាំ២០១៥នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសរសេរសារ នៅលើទំព័រ Facebook ផ្ទាល់ខ្លូនរបស់ឯកឧត្តម ដោយបានបង្ហាញពីអារម្មណ៍ពិត និងការកត់កំគាល់ជុំវិញមតិសាធារណៈដែលនិយាយអំពីខ្លោងទ្វារ អង្គរសង្រ្កាន្ត។ ឯកឧត្តមបានលើកឡើងថាទោះបីបុគ្គលមួយចំនួនចង់ឃើញ ឬមានចេតនាបំផ្លាញយើង (ស.ស.យ.ក) និងព្រឹត្តិការណ៍អង្គរសង្ក្រាន្តទាំងមូលយ៉ាងណាក៏ដោយ សូម ក្រុមការងារគ្រប់រូបបន្តខិតខំប្រឹងប្រែងបន្ថែមទៀត ដើម្បីបំពេញបេសកម្មដ៏ឧត្តុងឧត្តមនេះសម្រាប់នាំជូន យុវជនយើង ក្រុមគ្រួសារយើង ក្រុមការងារយើង លោកគ្រូអ្នកគ្រូ សាស្រ្តចារ្យយើង សិល្បៈករសិល្បៈការិនីយើង ប្រជាជនយើងទូទាំងប្រទេស ព្រមទាំងមិត្តភក្តិបរទេស ទទួលបានអនុស្សាវរីយ៍ បទពិសោធន៍ក្នុងភាពសម្បូរបែបនៃវប្បធម៌ជាតិយើង និងនាំមកនូវមោទភាពសម្រាប់យើងគ្រប់រូបដែលជាយុវជនជំនាន់ក្រោយ។

ឯកឧត្តមបានមានប្រសាសន៍ថា ក្រុមគ្រួសារសហភាពសហព័ន្ធយុវជនកម្ពុជា(ស.ស.យ.ក.), ក្រុមការងារ និងជនរួមជាតិដែលបានចូលរួមចំណែកយ៉ាងសកម្ម ព្រឹត្តិការណ៍អង្គរសង្ក្រាន្តកន្លងមក។ នេះជាវេលាដ៏មមាញឹក ដែលក្រុមការងារគ្រប់ផ្នែកកំពុងសស្រាក់សស្រាំរៀបចំដំណើរការ ផែនការតាមកម្មវិធីនៃផ្នែកការងាររៀងៗខ្លួន ក្នុងគោលដៅសម្រេចទៅបានដោយជោគជ័យនៃព្រឹត្តិការណ៍អង្គរសង្ក្រាន្ត ព.ស.២៥៥៨-ព.ស.២៥៥៩ គ.ស.២០១៥ សម្រាប់ជនរួមជាតិខ្មែរ។ សមិទ្ធផលដ៏ជោគជ័យរបស់អង្គរសង្ក្រាន្តឆ្នាំកន្លងទៅ គឺការចូលរួមក្នុងនាមមហាគ្រួសារខ្មែរ ការចងចាំនូវអនុស្សាវរីយ៍ដ៏សប្បាយរីករាយ និងស្នាមញញឹមដិតជាប់ក្នុងបេះដូងកូនខ្មែរគ្រប់រូប។ ម្យ៉ាងវិញទៀត អង្គរសង្ក្រាន្តក៏នាំមកនូវចរន្តថវិការ ៣០លានដុល្លារ បានហូរចូលដោយផ្ទាល់ក្នុងហោប៉ៅរបស់ប្រជាជនមូលដ្ឋានផ្ទាល់។

ឯកឧត្តមបានបន្តថា នេះជាវិញ្ញាសារសាកល្បង សម្រាប់ក្រុមការងារយើងទាំងអស់ដែលចូលរួម និងនៅតែបន្តក្នុងការបំពេញបេសកម្មដ៏ថ្លៃថ្លា នៃការពង្រឹកពង្រីកភាពជោគជ័យបន្ថែមទៀតនៃព្រឹត្តិការណ៍អង្គរសង្ក្រាន្ត។ អង្គរសង្ក្រាន្តមិនមែនដើម្បីបុគ្គលណាម្នាក់នោះទេ តែអង្គរសង្ក្រាន្តដើម្បីយើងទាំងអស់គ្នា ដើម្បីលើកតម្កើងកិត្យានុភាពប្រជាជាតិខ្មែយើង ទាំងអស់នេះជាគោលដៅដែលយើងសម្រេចបាន នាព្រឹត្តិការណ៍អង្គរសង្ក្រាន្តកន្លងមក ជាពិសេសរយៈពេល ៨ខែចុងនៃការរៀបចំព្រឹត្តិការណ៍អង្គរសង្ក្រាន្ត ព.ស.២៥៥៨-ព.ស.២៥៥៩ គ.ស.២០១៥ ទោះបីក្នុងកាលៈទេសៈដ៏លំបាកយ៉ាងណាក៏ដោយ យើងកាន់តែជិតស្និទ្ធ រឹងមាំ និងឆន្ទៈកាន់តែមោះមុតសម្រេចគោលដៅឲ្យបាន ។

យើងរួមគ្នាដើម្បីប្រទេសជាតិរបស់យើង ប្រទេសជាតិត្រូវការយើងគ្រប់រូប “យើងជឿជាក់ថា យើងធ្វើបាន” ព្រឹត្តិការណ៍អង្គរសង្ក្រាន្តទទួលបានជោគជ័យ ជោគជ័យដែលមិនត្រឹមតែកើតពីការខិតខំប្រឹងប្រែងរបស់យើងទាំងអស់គ្នានោះទេ តែការខិតខំប្រឹងប្រែងរបស់យើងគឺបង្កើតអនុស្សាវរីយ៍ដែលមិនអាចបំភ្លេចបាន ផ្តល់ជូនអ្នកចូលរួមនូវក្តីសោមនស្សរីករាយ និងមោទនភាពវប្បធម៌ អរិយធម៌ជាតិខ្មែរ៕

អត្ថបទ៖ ច័ន្ទ ទេវី

Pages

Wednesday, April 08, 2015