តំណាងក្រុមហ៊ុន ដេនសូ ខេមបូឌា បានមានប្រសាសន៏បន្តថា បច្ចុប្បន្នក្រុមហ៊ុន ដេនសូ មានទីតាំងនៅតំបន់សេដ្ឋកិច្ចពិសេសរាជធានីភ្នំពេញ ហើយក្រុមហ៊ុននេះភាគច្រើនពាក់ព័ន្ធនឹងគ្រឿងបង្គំរថយន្តធន់ធ្ងន់ ដែលបច្ចុប្បន្នមានបុគ្គលិកខ្មែរចំនួនជាង២០០នាក់ ហើយនៅឆ្នាំ២០១៨ខាងមុខក្រុមហ៊ុន នឹងបង្កើនផលិតផលរបស់ខ្លួនបន្ថែមទៀត ជាពិសេសជួយពង្រឹងផលិតសមត្ថិភាពបុគ្គលិកខ្មែរយើងដែលពាក់ព័ន្ធនឹងបច្ចេកវិទ្យា។ ជាមួយគ្នានេះតំណាងក្រុមហ៊ុនដេនសូក៏បានជំរាបលោកនាយករដ្ឋមន្រ្តីថា នៅឆ្នាំ២០១៨ក្រុមហ៊ុនរបស់លោកនឹងបង្កើតទីតាំងថ្មី១ទៀត។ ក្នុងឱកាសនេះខាងក្រុមហ៊ុនក៏បានស្នើសុំលោកនាយករដ្ឋមន្រ្តីចំនួន៣ចំនុច ទី១ ការបណ្តុះបណ្តាលជំនាញបច្ចេកវិទ្យានេះគឺខាងក្រុមហ៊ុនរបស់លោកនឹងជួយប៉ុន្តែស្នើសុំការជួយពីស្ថាប័នរដ្ឋ ជាពិសេសក្រសួងការងារ និងបណ្តុះបណ្តាលវិជ្ជាជីវៈ ទី២ ប្រព័ន្ធដឹកជញ្ជូនស្នើសុំអោយរៀបចំអោយបានល្អ និងទី៣ ប្រព័ន្ធពន្ធគយ។
ជាការឆ្លើយតប លោកនាយករដ្ឋមន្រ្តី ហ៊ុន សែន បានមានប្រសាសន៏ថ្លែងអំណរគុណដល់ខាងក្រុមហ៊ុនជប៉ុនដែលបានរាយការជូនលោកនាយករដ្ឋមន្រ្តី និងបានខិតខំជួយបណ្តុះបណ្តាលធនធានមនុស្សកម្ពុជា។
លោកនាយករដ្ឋមន្រ្តី ហ៊ុន សែន បានមានប្រសាសន៏ថា ការជួយរបស់ក្រុមហ៊ុននេះគឺស្របទៅតាមការងាររបស់រាជរដ្ឋាភិបាល ក្នុងការយកចិត្តទុកដាក់ចំពោះការអភិវឌ្ឍធនធានមនុស្ស។
លោកនាយករដ្ឋមន្រ្តីបានបន្តទៀតថា យើងអាចធ្វើការរួមគ្នាក្នុងការអភិវឌ្ឍធនធានមនុស្ស ជាពិសេសអនុញ្ញាតអោយក្រសួងការងារ និងបណ្តុះបណ្តាលវិជ្ជាជីវៈចេញវិញ្ញាបនប័ត្រអោយសិស្សដែលបានទទួលការបណ្តុះបណ្តាលជំនាញបច្ចេកទេស។
ចុងក្រោយនៃជំនូបនេះ ខាងតំណាងក្រុមហ៊ុនដេសូខេមបូឌា បានគោរពសុំអញ្ជើញលោកនាយករដ្ឋមន្រ្តីទៅសម្ពោធសាខាក្រុមហ៊ុនថ្មីមួយទៀត ដែលគ្រោងនឹងសម្ពោធនៅឆ្នាំ២០១៨ខាងមុខនេះក្នុងប្រទេសកម្ពុជា។
លោកនាយករដ្ឋមន្រ្តី ហ៊ុន សែន បានបន្តអនុញ្ញាតអោយក្រុមហ៊ុនទី២ដែលមាឈ្មោះថា ក្រុមហ៊ុនតូយ៉ូតាថ្សឺស្សូ ចូលជួបសម្តែងការគួរសម និងពិភាក្សាការងារផងដែរ។នៅក្នុងជំនួបនេះខាងក្រុមហ៊ុនតូយ៉ូតាថ្សឺស្សូ បានគោរពជំរាបលោកនាយករដ្ឋមន្រ្តីអំពីសកកម្មភាពការងាររបស់ខ្លួននាពេលបច្ចុច្បន្នផងដែរ។ ខាងក្រុមហ៊ុនបានមានប្រសាសន៏ថា ក្រុមហ៊ុនតូយ៉ូតាថ្សឺស្សូ ជំហានទី១ បានយកជនជាតិខ្មែរចំនួនប្រមាណជាង៣រយនាក់សំរាប់បំពេញការងារ បន្ទាប់មកបានយកជនជាតិខ្មែរបំរើការងាររហូតដល់ជាង១ពាន់នាក់ ហើយជំហានទី២នឹងបង្កើនរហូតដល់ជាង២ពាន់នាក់។
តំណាងក្រុមហ៊ុនតូយ៉ូតាថ្សឺស្សូបានមានប្រសាសន៏ថា ដោយសារក្រុមហ៊ុនរបស់លោកមានរោងចក្ររថយន្តនៅប្រទេសជិតខាងកម្ពុជា ដូចជាប្រទេសថៃផងនោះ គឺមានការដឹកឆ្លងកាត់តំបន់ព្រំដែន ដូច្នេះក៏បានស្នើសុំលោកនាយករដ្ឋមន្រ្តី ហ៊ុន សែន ដើម្បីបន្តពង្រឹងការងារ ជាមួយគ្នានេះលោកនាយករដ្ឋមន្រ្តី ហ៊ុន សែន ក៏បានមានប្រសាសន៏គាំទ្រ ប៉ុន្តែសុំអោយមានការសហការជាមួយប្រទេសជិតខាង ក្នុងន័យនេះនាពេលប្រជុំរួមដែលមានភាគីពាក់ព័ន្ធចូលរួមដូច្នេះនឹងលើកយកបញ្ហានេះមកជជែកពិភាក្សា។
លោកនាយករដ្ឋមន្រ្តី ហ៊ុន សែន បានមានប្រសាសន៏ថា បច្ចុប្បន្ននេះយើងមានច្រកព្រំដែនអន្តរជាតិប៉ោយប៉ែត ហើយថ្មីៗខាងមុខនេះយើងនឹងបើកច្រកអូរនាង ដើម្បីសំរួមពាណិជ្ជកម្ម កម្ពុជា‑ថៃ។ នៅក្នុងជំនូបនេះ ខាងក្រុមហ៊ុនតូយ៉ូតាថ្សឺស្សូ បានមានប្រសាសន៏ជំរាបលោកនាយករដ្ឋមន្រ្តី ហ៊ុន សែន ក្រុមហ៊ុនតូយ៉ូតាថ្សឺស្សូ ក៏បានចូលរួមការងារសង្គម ដូចជាការផ្តល់អាហារូបករណ៏ ការបណ្តុះបណ្តាលវិស័យកីឡា ការប្រគំតន្រ្តីជាដើម ដើម្បីគាំទ្រមិត្តភាពកម្ពុជាជប៉ុន។
ជាការឆ្លើយតបលោកនាយករដ្ឋមន្រ្តី ហ៊ុន សែន ក៏បានថ្លែងអំណរគុណចំពោះក្រុមហ៊ុនតូយ៉ូតាថ្សឺស្សូដែលបានរាយការជូនលោកនាយករដ្ឋមន្រ្តី។ លោកនាយករដ្ឋមន្រ្តី ហ៊ុន សែន ក៏បានស្នើអោយក្រុមហ៊ុនតូយ៉ូតាថ្សឺស្សូចូលរួមបន្តអភិវឌ្ឍន៏ធនធានមនុស្សនៅកម្ពុជា ធ្វើយ៉ាងណាជួយអ្នកដែលបានទទួលការបណ្តុះបណ្តាលរួចហើយនេះអោយទទួលបានការងារធ្វើ។
នៅថ្ងៃទី ០៧ ខែសីហា ឆ្នាំ ២០១៧នេះដែរ លោកនាយករដ្ឋមន្រ្តី ហ៊ុន សែនក៏បានអនុញ្ញាតអោយធនាគារមីហ្សឺណូចូលជួបពិភាក្សាការងារ។ នៅក្នុងជំនូបនេះ ភាគីខាងជប៉ុនបានថ្លែងអំណរគុណដល់លោកនាយករដ្ឋមន្រ្តី ហ៊ុន សែន ដែលបានចំណាយពេលវេលាដ៏មានតម្លៃទទួលជួបខាងធនាគាររបស់លោក និងថ្លែងអំណរគុណដល់រាជរដ្ឋាភិបាលកម្ពុជាដែលចាប់តាំងពីឆ្នាំ២០០៣មក បានផ្តល់ឱកាសអោយខាងធនាគារមីហ្សឺណូបើកការិយាល័យធនាគារនៅកម្ពុជា ធនាគារក៏បានបញ្ជាក់ថា កម្ពុជា គឺជាប្រទេសដែលមានសក្កានុពលវិនិយោគ។ ជាការឆ្លើយតបលោកនាយករដ្ឋមន្រ្តី ហ៊ុន សែន បានមានប្រសាសន៏ថ្លែងអំណរគុណដល់ធនាគារមីហ្សឺណូដែលបាន បង្កើតសាខានៅប្រទេសកម្ពុជា ដែលការបើកសាខានេះគឺបង្ហាញពីជំនឿនយោបាយ និងសេដ្ឋកិច្ចចំពោះប្រទេសកម្ពុជា។ការដែលមានធនាគារជប៉ុននៅកម្ពុជាបែបនេះ ក៏ជាចំណុចមួយជួយសំរួលដល់អ្នកវិនិយោគនានានៅកម្ពុជារបស់ភាគីជប៉ុនផងដែរ ព្រមទាំងបង្ករភាពងាយស្រួលចំពោះភ្ញៀវទេសចរណ៏ជប៉ុនដែលធ្វើដំណើរកំសាន្តនៅកម្ពុជាផងដែរក្នុងការប្រើប្រាស់លុយជប៉ុន។
លោកនាយករដ្ឋមន្រ្តី ហ៊ុន សែន ក៏បានស្នើដល់ធនាគារមីហ្សឺណូរបស់ជប៉ុនចូលរួមចំណែក បណ្តុះបណ្តាលធនធានមនុស្សនៅកម្ពុជា និងប្រើប្រាស់ពលរដ្ឋដែលទទួលបានការសិក្សាបណ្តុះបណ្តាលចូលធ្វើការងារនៅធនាគារនេះផង។
បន្ទាប់មកទៀតលោកនាយករដ្ឋមន្រ្តី ហ៊ុន សែនបានអនុញ្ញាតអោយក្រុមហ៊ុនទី៤គឺក្រុមហ៊ុន មីនៃប៊ែ មីតស៊ូមី។ នៅក្នុងជំនួបនេះខាងក្រុមហ៊ុន មីនៃប៊ែ មីតស៊ូមីបានគោរពលោកនាយករដ្ឋមន្រ្តី ហ៊ុន សែនថា ក្រុមហ៊ុនរបស់លោកមានភាពសប្បាយរីករាយដែលបានសម្តេចអនុញ្ញាតជួបពិភាក្សាការងារ ហើយបានគោរពរាយការណ៏ជូនលោកថា កន្លងមកក្រុមហ៊ុនរបស់លោកបានបង្កើតរោងចក្រចំនួន៣នៅកម្ពុជា។ លោកនាយករដ្ឋមន្រ្តី ហ៊ុន សែនបានឆ្លើយតបថា មិនថាក្រុមហ៊ុនតូចរឺធំទេគឺកម្ពុជាទាក់ទាញយកទៅវិនិយោគទាំងអស់ ជាក់ស្តែងដូចជាប្រវត្តិលោកនាយករដ្ឋមន្រ្តី ហ៊ុន សែនផ្ទាល់គឺចាប់ផ្តើមតាំងពីជីវិតក្មេងវត្តខិតខំប្រឹងរហូតដល់បច្ចុប្បន្ន។ តំណាងក្រុមហ៊ុន មីនៃប៊ែ មីតស៊ូមីបានមានប្រសាសន៏គាំទ្រប្រសាសន៏លោកនាយករដ្ឋមន្រ្តី ហ៊ុន សែន យ៉ាងណាមិញ ដូចជាក្រុមហ៊ុនរបស់លោកក៏ចាប់ផ្តើមពីតូចមកធំ។ តំណាងក្រុមហ៊ុន មីនៃប៊ែ មីតស៊ូមីបានជំរាបលោកនាយករដ្ឋមន្រ្តី ហ៊ុន សែនក្រុមហ៊ុន មីនៃប៊ែ មីតស៊ូមីមានរោងចក្រ៣នៅកម្ពុជា និងបានចូលរួមបណ្តុះបណ្តាលបុគ្គលិកកម្ពុជាផងដែរ ជាមួយគ្នានេះក្រុមហ៊ុន មីនៃប៊ែ មីតស៊ូមីក៏បានថ្លែងអំណរគុណលោកនាយករដ្ឋមន្រ្តី ហ៊ុន សែនពាក់ព័ន្ធវិស័យអគ្គិសនី ដែលបានចុះកិច្ចព្រមព្រៀងជាមួយEDC ក្នុងការផ្តល់អគ្គីសនីគ្រប់គ្រាន់និងតម្លៃថោក។
ក្នុងជំនួបនេះលោកនាយករដ្ឋមន្រ្តី ហ៊ុន សែនក៏បានស្នើអោយក្រុមហ៊ុន មីនៃប៊ែ មីតស៊ូមីជួយបន្តបណ្តុះបណ្តាលធនធានមនុស្សនៅកម្ពុជាផងដែរ ។
សូមជំរាបថា កម្ពុជា ‑ ជប៉ុន បានចុះហត្ថលេខាលើកិច្ចព្រមព្រៀងស្តីពីសេរីភាវូបនីយកម្ម ការជំរុញ និងការការពារវិនិយោគនៃប្រទេសទាំងពីរ ដែលបានចុះហត្ថលេខារវាងលោកនាយករដ្ឋមន្រ្តី ហ៊ុន សែន ជាមួយនិងលោក ស៊ិនហ្សូ អាបេ នាយករដ្ឋមន្រ្តីជប៉ុន កាលពីថ្ងៃទី១៤ ខែមិថុនាឆ្នាំ២០០៧ និងបានចូលជាធរមានកាលពីថ្ងៃទី៣១ ខែកក្កដាឆ្នាំ២០០៨។
ចាប់តាំងពីមានកិច្ចព្រមព្រៀងជាមួយគ្នារួចមក មានក្រុមហ៊ុនជប៉ុនចំនួន១២៨ក្រុមហ៊ុន បានមកបណ្តាក់ទុនវិនិយោគក្នុងប្រទេសកម្ពុជា ដែលមានទុនសរុបចំនួនជា ២៧២៨លានដុល្លារ ជាប់ចំណាត់ថ្នាក់ទី៩៕
No comments:
Post a Comment