ការផ្គត់ផ្គង់ពូជស្រូវ គឺជាការចូលរួមចំណែកធ្វើឱ្យបរិមាណផល និងគុណភាពផលិតផលស្រូវ ពូជសុទ្ធទទួលបានទិន្នផលកាន់តែខ្ពស់

លោក ឈួរ ច័ន្ទឌឿន អភិបាលខេត្តកំពង់ឆ្នាំង បានថ្លែងថាការផ្គត់ផ្គង់ពូជស្រូវ គឺជាការចូលរួមចំណែកធ្វើឱ្យបរិមាណផលស្រូវ និងគុណភាពផលិតផលស្រូវ ពូជសុទ្ធទទួលបានទិន្នផលខ្ពស់ ដើម្បីឆ្លើយតបនឹងតម្រូវការទីផ្សារ។ លោកបានថ្លែងដូចនេះ នៅថៃ្ងទី២២ ខែមិថុនា ឆ្នាំ២០១៧ នៅក្នុងឃុំតាំងក្រសាំង ស្រុកទឹកផុស ក្នុងពិធីចែកពូជស្រូវផ្ការំដួល ជូនប្រជាកសិករចំនួន៣០០នាក់ មកពីស្រុកចំនួន៦ក្នុងខេត្តកំពង់ឆ្នាំង។ក្នុងពិធីនោះមានការចូលរួម ពីលោកលោកស្រីប្រធានអង្គភាពជុំវិញខេត្តអាជ្ញាធរដែនដីផងដែរ។

លោកអភិបាលខេត្តកំពង់ឆ្នាំង បានបញ្ជាក់ថា កន្លងមកប្រមុខរាជរដ្ឋាភិបាលកម្ពុជា តែងតែយកចិត្តទុកដាក់ក្រើនរំលឹក ដល់ប្រជាកសិករធ្វើយ៉ាងណា បង្កបង្កើតផលឱ្យបានទាន់ពេលវេលា និងជ្រើសរើសពូជប្រកបដោយគុណភាព និងបរិមាណដើម្បីងាយស្រួលរកទីផ្សារ។

លោក ឈួរ ច័ន្ទឌឿន ក៏បានជំរុញឱ្យមន្ទីរកសិកម្ម សហការជាមួយអាជ្ញាធរដែនដី គ្រប់លំដាប់ថ្នាក់ និងដៃគូរអភិវឌ្ឍន៍នានា និងសូមឱ្យមានការចូលរួមពីប្រជាកសិករ អនុវត្តឱ្យបានមតាមលក្ខណៈបច្ចេកទេស របស់កសិកម្មដើម្បីឱ្យទិន្នផលស្រូវ និងដំណាំរួមផ្សំផ្សេងៗទៀត ទទួលបានទិន្នផលខ្ពស់ និងមានទីផ្សារទទួលទិញ៕