លោកនាយករដ្ឋមន្រ្តី ហ៊ុន សែន៖ វិស័យទេសចរណ៍គឺជាវិស័យសេដ្ឋកិច្ច និងសង្គមដែលអាច ជួយទ្រទ្រង់កំណើនសេដ្ឋកិច្ច

នៅព្រឹកថ្ងៃទី១២ ខែមិថុនា ឆ្នាំ២០១៧ នេះ លោកនាយករដ្ឋមន្ត្រី ហ៊ុន សែន បានថ្លែងថា វិស័យទេសចរណ៍គឺជាវិស័យសេដ្ឋកិច្ច និងសង្គមដែលអាចជួយទ្រទ្រង់កំណើនសេដ្ឋកិច្ច។ លោក បានថ្លែងដូចនេះ ក្នុងឱកាសអញ្ជើញជាអធិបតីក្នុងពិធីបើកសន្និសីទអន្តរជាតិស្តីពីទេស​ចរណ៍ប្រកបដោយនិរន្តរភាព និងទីក្រុងបេតិកភណ្ឌលើកទី១ ក្រោមប្រធានបទ «ការអភិរក្ស និងការការពារទីក្រុងបេតិ​ក​ភ័ណ្ឌ»។

ប្រមុខរាជរដ្ឋាភិបាលកម្ពុជា បានបញ្ជាក់ថា វិស័យទេសចរណ៍គឺជាវិស័យសេដ្ឋកិច្ច និងសង្គមដែលអាចជួយទ្រទ្រង់កំណើនសេដ្ឋកិច្ច បង្កើតការងារ កាត់បន្ថយភាពក្រីក្រ រួមចំណែកកាត់បន្ថយការកើនឡើងនៃកំដៅផែនដី ប្រកបដោយប្រសិទ្ធភាព និងត្រូវបានចាត់ទុកថាជាវិស័យ ដែលដើរតួនាទីយ៉ាងសំខាន់ក្នុងការទ្រទ្រង់នូវការធ្វើសមាហរណកម្មតំបន់ផងដែរ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា បច្ចុប្បន្នកម្ពុជា បានយកចិត្តទុកដាក់ខ្ពស់លើវិស័យទេសចរណ៍ ទន្ទឹមនឹងកត្តាសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ដែលកម្ពុជាមាន។ ការព្យាករណ៍សម្រាប់ឆ្នាំ២០១៧ កម្ពុជា នឹងទទួលបានភ្ញៀវទេស​ចរណ៍អន្តរជាតិប្រមាណ ៥លាន៥សែននាក់ និងនៅឆ្នាំ២០២០ កម្ពុជា រំពឹងទុកថា នឹងមានកើនឡើងនូវភ្ញៀវទេសចរណ៍ដល់៧លាននាក់ដែលនឹងផ្តល់ប្រាក់ចំណូលសរុបប្រមាណ៥ពាន់លានដុល្លារ និងអាចបង្កើតឱកាសការងារប្រមាណ៨០ម៉ឺនកន្លែង៕