រដ្ឋាភិបាលទីក្រុងប៉េកាំងបានរិះគន់របាយការណ៍មួយ ដែលចេញផ្សាយដោយមន្ទីរបញ្ចកោណនៅសប្តាហ៍នេះ ដែលវាយតម្លៃពីសមត្ថភាពយោធារបស់ចិន ដោយចោទប្រកាន់ថា អាមេរិកបានបំភ្លៃការពិត។ អ្នកនាំពាក្យក្រសួងការបរទេសចិនលោកស្រី Hua Chunying បានថ្លែងកាលពីថ្ងៃព្រហស្បតិ៍នេះ អំពីរបាយការណ៍អំណាចយោធាចិនឆ្នាំ ២០១៧ របស់ក្រសួងការពារចិនប៉ុន្មានថ្ងៃមុនចេញផ្សាយប៉ុណ្ណោះ។ នៅក្នុងរបាយការណ៍ មន្ទីរបញ្ចកោណបានវិភាគអំពីកំណែទម្រង់រចនាសម្ព័ន្ធយ៉ាងធំនៃយោធាចិន ដែលធ្វើឡើងក្រោមការដឹកនាំរបស់លោក Xi Jinping ហើយបានចោទប្រកាន់ចិនថា បានពង្រីកឥទ្ធិពលកងទ័ពរបស់ខ្លួននៅក្នុងតំបន់ដែនទឹកមានជម្លោះ ព្រំដែនទឹក និងព្រំដែនដីគោករបស់ខ្លួន។ អាមេរិកក៏បានរិះគន់ចិនដែរថា បានលួចយកបច្ចេកវិទ្យាបរទេស និងគាំទ្រដល់ការវាយប្រហារតាមប្រព័ន្ធអ៊ីនធឺណិតមួយចំនួនផងដែរ។ លោកស្រី Hua បានចាត់ទុករបាយការណ៍របស់អាមេរិកនេះថា “ពោរពេញដោយបញ្ហា លំអៀង និងបង្កប់ដោយគំនិតបែបសង្រ្គាមត្រជាក់” ដែលផ្ទុយពីការពិត។ លោកស្រីក៏បានអំពាវនាវឱ្យអាមេរិក បញ្ឈប់ការចេញនូវការវាយតម្លៃដូច្នោះទៀតទៅ។
យោងតាមសុន្ទរកថារបស់លោកស្រី Hua បានឱ្យដឹងថា “យើងសង្ឃឹមថា អ្នកដែលចេញពីយោធាអាមេរិកគួរបោះបង់គំនិតបែបសង្រ្គាមត្រជាក់នេះចេញ ហើយសម្លឹងមើលការអភិវឌ្ឍរបស់ចិនវិញ។ លោកស្រី Hua បានអះអាងថា ប្រទេសលោកស្រីពុំមានកំហុសក្នុងការអភិវឌ្ឍសមត្ថភាពយោធារបស់ខ្លួននៅសមុទ្រចិនខាងត្បូង និងខាងកើតនោះទេ ពីព្រោះ វាគឺជាទឹកដីរបស់ចិន។ ការទាមទារទឹកដីដ៏ធំរបស់ចិននេះមានជម្លោះជាមួយនឹងប្រទេសក្នុងតំបន់មួយចំនួន ហើយរបាយការណ៍របស់មន្ទីរបញ្ចកោណបានលើកឡើងថា ចិនបានដាក់ពង្រាយឆ្មាំការពារសមុទ្រ កងទ័ពជើងទឹក និងទូកនេសាទជាច្រើនជាទៀតទាត់ដើម្បីទាមទារតំបន់ទាំងនោះ។ លោកស្រី Hua ក៏បានលើកឡើងអំពីការបង្កើនសមត្ថភាពយោធារបស់អាមេរិកនៅតំបន់ អាស៊ី-ប៉ាស៊ីហ្វិកផងដែរ រួមមានយន្តហោះចម្បាំងចំនួនពីរគ្រឿង ព្រមទាំងពង្រីកតួនាទីកងទ័ពជើងទឹកនៅក្នុងតំបន់នេះផងដែរ។ សហរដ្ឋអាមេរិក នាពេលថ្មីៗនេះ បានពង្រីកវត្តមានយោធារបស់ខ្លួន ដើម្បីឆ្លើយតបទៅនឹងការលើកឡើងរបស់កូរ៉េខាងជើង ដែលថានឹងសាកល្បងអាវុធនុយក្លេអ៊ែរលើកទី៦។ លោក Trump បានអំពាវនាវឱ្យចិនធ្វើការគ្រប់គ្រងស្ថានការណ៍នេះ លើកូរ៉េខាងជើង ដែលជាសម្ព័ន្ធមិត្តជាយូរមកហើយរបស់ខ្លួនផងដែរ។
ដើម្បីទប់ទល់ទៅនឹងការសន្និដ្ឋានរបស់អាមេរិក ដែលថា ចិនបាន និងកំពុងពង្រីកអំណាចយោធារបស់ខ្លួន ដោយការបង្កើតមូលដ្ឋានបរទេសទីមួយនៅក្នុងប្រទេស Djibouti ជិតឈូងសមុទ្រយុទ្ធសាស្រ្ត Aden ហើយកំពុងរៀបចំផែនការបង្កើតមូលដ្ឋានទីពីរនៅប្រទេស Pakistan ដែរ។ ពាក់ព័ន្ធនឹងបញ្ហានេះ លោកស្រី Hua បានលើកឡើងអំពីមូលដ្ឋានយោធាអាមេរិកទូទាំងពិភពលោក។ នៅឆ្នាំ ២០១៥ អាមេរិកត្រូវបានគេប៉ាន់ស្មានថា មានមូលដ្ឋានយោធានៅបរទេសប្រមាណជា ៨០០ កន្លែងទូទាំងពិភពលោក។
លោកស្រី Hua បានរិះគន់អំពី “ការមិនទទួលខុសត្រូវ” នៃរបាយការណ៍របស់មន្ទីរបញ្ចកោណ នៅពេលដែលសួរអំពីបញ្ហានេះ។ លោកស្រីបានការពារថា ចិនមានការតាំងចិត្តដើម្បីរក្សាសន្តិភាព និងច្រានចោលរបាយការណ៍របស់យោធាអាមេរិក ដែលបានលើកឡើងនេះ។ លោកស្រីបន្តថា “ចិនបានដើរតាមផ្លូវសន្តិភាព ប្រកាន់ភ្ជាប់គោលនយោបាយការពារជាតិមួយ ដែលនៅតែមានគោលដៅរក្សាសន្តិភាព និងស្ថិរភាពនៅ អាស៊ី-ប៉ាស៊ីហ្វិក និងតំបន់ផ្សេងទៀត”។ ការការពារជាតិរបស់ចិន គឺមានគោលបំណងប្រកាន់ភ្ជាប់នូវឯករាជ្យភាព អធិបតេយ្យភាព និងបូរណភាពទឹកដី ដែលជាសិទ្ធិស្របច្បាប់របស់ចិន៕
(ប្រភព : Newsweek ចុះថ្ងៃទី១២ ខែមិថុនា ឆ្នាំ២០១៧)
No comments:
Post a Comment