បទវិភាគ៖ តើអ្វីទៅជាចេតនាពិតប្រាកដនៃសេចក្តីថ្លែងការណ៍ របស់គណបក្សសង្គ្រោះជាតិ?

វាគឺជារឿងដែលគួរឱ្យឆ្ងល់មួយ ដែលនៅសុខៗគណបក្សសង្គ្រោះជាតិ ស្រាប់តែចេញសេចក្តីថ្លែងការណ៍មួយ ដោយប្រកាសថ្កោលទោសយ៉ាងធ្ងន់ធ្ងរ ចំពោះទង្វើជនទាំងឡាយណាដែលប្រឌិតព័ត៌មានលាបពណ៌ ប៉ះពាល់ដល់កិត្តិយសក្រុមគ្រួសាររបស់ លោកនាយករដ្ឋមន្ត្រី ហ៊ុន សែន ដែលធ្លាប់បានចោទថា ភរិយា និងកូន របស់លោក ហ៊ុន សែន ជាភរិយា និងកូនរបស់មេដឹកនាំវៀតណាម។

តើការចេញសេចក្តីថ្លែងការណ៍ ថ្កោលទោសជនអសីលធម៌ ដែលបំភ្លៃព័ត៌មាន លាបពណ៌ និងប្រមាថ ចោទប្រកាន់លើគ្រួសារលោក ហ៊ុន សែន នៅពេលនេះ គណបក្សប្រឆាំងមានចេតនាអ្វីឱ្យពិតប្រាកដ? ព្រោះរឿងនេះវាបានកន្លងទៅប្រមាណជាកន្លះឆ្នាំមកហើយ។

បក្សប្រឆាំងបានសរសេរនៅក្នុងសេចក្តីថ្លែងការណ៍ថា គណបក្សសង្រ្គោះជាតិ ប្រកាន់ខ្ជាប់នូវសីលធម៌ ដោយគោរពនូវសេចក្តីថ្លៃថ្នូរ និងកិត្តិយសរបស់មនុស្សគ្រប់រូប។ គណបក្សសង្គ្រោះជាតិ ក៏បានអំពាវនាវដល់ខ្មែរគ្រប់រូប សូមបញ្ឈប់នូវការប្រឌិតព័ត៌មានមិនពិត ការលាបពណ៌ដែលធ្វើឲ្យសីលធម៌សង្គមធ្លាក់ចុះ និងនាំឲ្យខ្មែរបែកបាក់។

ការចេញសេចក្តីថ្លែងការណ៍របស់បក្សប្រឆាំង ថ្កោលទោសជនលាបពណ៌អសីលធម៌ដូចនេះ បើមើលពីសំបកក្រៅទៅ ដូចជាមានចេតនាល្អណាស់ ប៉ុន្តែកន្លងមកព័ត៌មានសម្អុយ លាបពណ៌ និងប្រមាថ លើគ្រួសារ លោក ហ៊ុន សែន ច្រើនតែចេញពីប្រភពរបស់បក្សប្រឆាំងនេះឯង។ ជាក់ស្តែងអ្នកដែលបង្ហោះព័ត៌មានលាបពណ៌ និងប្រមាថខាងលើនេះ គឺជាសកម្មជនរបស់គណបបក្សប្រឆាំង នៅសហរដ្ឋអាមេរិកយ៉ាងពិតប្រាកដ ដែលមានឈ្មោះថា យ៉ង់ ណុយ ហៅ Brady Young ដែលបុគ្គលនេះធ្វើតាមបញ្ជាពីមេបក្សប្រឆាំង។ ដូច្នេះថ្នាក់ដឹកគណបក្សសង្គ្រោះជាតិ ត្រូវតែទទួលខុសត្រូវ ចំពោះការនិយាយលាបពណ៌គ្រួសារលោកនាយករដ្ឋមន្ត្រី ហ៊ុន សែន ជាប់ពាក់ព័ន្ធនឹងគណបក្សរបស់ខ្លួន។

ទោះបីជាព្យាយាមបង្ហាញនូវពាក្យពេចន៍ល្អមើលយ៉ាងណា ក៏សេចក្តីថ្លែងការណ៍នោះហាក់បង្កប់នូវចេតនាទុច្ចរិតអ្វីម៉្យាងនៅក្នុងនោះ! ជាពិសេសគឺលោក សម រង្ស៊ី តែម្តង ព្រោះកន្លងមកលោកត្រូវបានគេសង្ស័យថា ជាអ្នកនៅពីក្រោយខ្នងរឿងអសីលធម៌ ការប្រមាថ និងប្រឌិតព័ត៌មានមួលបង្កាច់នេះ ដោយបញ្ជាផ្ទាល់ទៅសកម្មជនជំនិតរបស់ខ្លួនឱ្យធ្វើ។ មួយវិញទៀត សេចក្តីថ្លែងការណ៍នេះ បានចេញមកចំពេលដែល លោក កឹម សុខា ត្រូវលើកលែងទោស និងត្រូវបានមើលឃើញថា បានបន្ទន់ឥរិយាបថរបស់ខ្លួនចំពោះលោក ហ៊ុន សែន ខណៈដែលលោក សម រង្ស៊ី ត្រូវបានគេឈប់រំលឹកតទៅទៀត។ លោក កឹម សុខា កំពុងច្បាមយកឱកាសកសាងខ្លួន និងប្រជាប្រិយភាពខណៈលោក សម រង្ស៊ី កំពុងនៅទ្រឹង និងហាក់ដូចជា អស់ផ្លូវដើរទៅហើយ ព្រោះតែជាប់ងារជាទណ្ឌិត និងមិនអាចវិលចូលស្រុកវិញបាន ដោយខ្លាចតុលាការអនុវត្តនីតិវិធីច្បាប់ចំពោះខ្លួន។ សេចក្តីថ្លែងការណ៍ដែលមានហត្ថលេខារបស់លោក សម រង្ស៊ី នៅពេលនេះ ហាក់ចង់បង្ហាញថាខ្លួននៅតែមានវត្តមាននៅឡើយក្នុងឆាកនយោបាយ ទោះបីជាអ្នកគាំទ្រ និងសកម្មជនមួយចំនួន មើលឃើញថា លោកបានអស់អំណាច និងធ្វើអ្វីលែងកើតទៅហើយ ព្រោះតែតំណែងសំខាន់ៗរបស់ខ្លួនបានធ្លាក់ទៅលើដៃលោក កឹម សុខា ខណៈដែលការបោះឆ្នោតក៏ខិតជិតមកដល់ ហើយខ្លួនមិនទាំងបានចុះឈ្មោះបោះឆ្នោតទៅទៀត។ ដោយមើលមិនឃើញពីឱកាសអាចត្រឡប់មកវិញបានសោះ ការចេញសេចក្តីថ្លែងការណ៍នេះ អាចជាការរៀបចំឡើងដោយលោក សម រង្ស៊ី ក្នុងចេតនាពញ្ញាក់ស្មារតីដៃគូររបស់ខ្លួនគឺលោក កឹម សុខា កុំឱ្យភ្លេចរូបលោក និងហាក់ចង់បង្ហាញអំពីអំណាចរបស់ខ្លួន ដែលទោះបីជាមនុស្សទូទៅមើលឃើញថា គាត់គ្រាន់តែជាខ្លាក្រដាសប៉ុណ្ណោះនៅពេលនេះ។ ជាមួយគ្នានេះសេចក្តីថ្លែងការណ៍នេះ គឺបានបង្គប់នូវល្បិចទុច្ចរិតរបស់មេបក្សប្រឆាំង ដោយព្យាយាមផ្សារភ្ជាប់ខ្លួនជាមួយលោក កឹម សុខា ដែលទើបតែបានឆក់យកតំណែងរបស់ខ្លួនជាប្រធានសម្លេងភាគតិចក្នុងរដ្ឋសភា។

គួររំលឹកថា លោក ហ៊ុន សែន កាលពីខែឧសភាកន្លងទៅ ធ្លាប់បានប្រតិកម្មយ៉ាងខ្លាំង ចំពោះព័ត៌មានសម្អុយខាងលើ នឹងបានចាត់ទុកការប្រឌិតរឿងនេះរៀបចំឡើង ដោយបក្សប្រឆាំង និងជាការប្រមាថ ធ្ងន់ធ្ងរបំផុតលើកូនប្រុស និងភរិយារបស់លោក ដែលទាមទារឲ្យបក្សប្រឆាំងបកស្រាយឲ្យបានច្បាស់លើរឿងនេះ៕

ប្រភពពី GNN