មាត្រា២៤ នៃច្បាប់ស្តីពីសមាគម និងអង្គការមិនមែនរដ្ឋាភិបាលបានចែងថា អង្គការមិនមែនរដ្ឋាភិបាលក្នុងស្រុក អង្គការមិនមែនរដ្ឋាភិបាលបរទេស ឬសមាគមបរទេស ត្រូវប្រកាន់ជំហរអព្យាក្រឹតចំពោះគ្រប់គណបក្សនយោបាយនៅព្រះរាជាណាចក្រកម្ពុជា។
ប៉ុន្តែ បើតាមការផ្សព្វផ្សាយក្នុងបណ្តាញសង្គម Facebook មួយឈ្មោះ «កូនខ្មែរ» ដែលបានបង្ហោះកាលពីថ្ងៃអាទិត្យ បានបង្ហាញនូវឯកសារសំខាន់ៗមួយចំនួន ពាក់ព័ន្ធនិងផែនការធ្វើបដិវត្តពណ៌របស់អង្គការ CANVAS ជ្រកក្រោមស្លាកអង្គការ IRI ដើម្បីផ្តួលរំលំរដ្ឋាភិបាលស្របច្បាប់របស់លោកនាយករដ្ឋមន្ត្រី ហ៊ុន សែន បច្ចុប្បន្នទៅវិញ។ ទាក់ទងជាមួយរឿងនេះ ប្រភពទំព័រ Facebook ដដែលនេះ បានបង្ហាញអំពីផែនការ និងសកម្មភាពរបស់អង្គការ CANVAS អំពីទំនាក់ទំនងយ៉ាងជិតស្និទ្ធរវាងអតីតប្រធានអង្គការបរទេសមួយនេះឈ្មោះ Jackson Cox ជាមួយមេដឹកនាំបក្សប្រឆាំង គឺលោក កឹម សុខា និងមន្ត្រីជាន់ខ្ពស់គណបក្សសង្គ្រោះជាតិមួយចំនួនទៀតផង។ គេឃើញមានឯកសារជាភស្តុតាង និងរូបថតជាច្រើនសន្លឹកនៃកិច្ចប្រជុំសម្ងាត់ទាំងនៅទីស្នាក់ការគណបក្សសង្គ្រោះជាតិ និងនៅឯក្រៅប្រទេស។
ប្រភពដដែលនេះ ក៏បានបញ្ជាក់ដែរថា មន្ត្រីស្ថានទូតអាមេរិកទទួលបន្ទុកកិច្ចការនយោបាយប្រចាំកម្ពុជាឈ្មោះ Sam Downings គឺជាភ្នាក់ងារចារកម្ម CIA ដែលតែងតែជួបគ្នាជាញឹកញាប់ជាមួយមន្ត្រីគណបក្សសង្គ្រោះជាតិគឺ កឹម មនោវិទ្យា ក្នុងន័យរៀបចំបណ្តាញ ឃុបឃិតគ្នាឱ្យកាន់តែស៊ីជម្រៅ ដើម្បីឈានទៅសម្រេចផែនការធ្វើបដិវត្តន៍ពណ៌ផ្តួលរំលំលោកនាយករដ្ឋមន្រ្តី ហ៊ុន សែន ឱ្យបាននៅក្នុងពេលបោះឆ្នោត ឆ្នាំ២០១៨ ខាងមុខ?
កូនស្រីលោក កឹម សុខា ម្នាក់ទៀតឈ្មោះ កឹម សាម៉ាធីតា ក៏មានទំនាក់ទំនងយ៉ាងជិតស្និទ្ធជាមួយឈ្មោះ Geoffrey Cain ដែលជាភ្នាក់ងារចារកម្មរបស់អាមេរិកម្នាក់ទៀតបង្កប់ខ្លួន ធ្វើជាអ្នកកាសែតឯករាជ្យ ហើយធ្វើសកម្មភាពជាសំងាត់នៅក្នុងប្រទេសកម្ពុជា។ Geoffrey Cain ត្រូវបានប្រភពបញ្ជាក់ថាធ្លាប់ធ្វើសកម្មភាពដោយជោគជ័យក្នុងការផ្តួលរំលំលោកស្រី ប៉ាក់ ហ្គន់ហេ(Park Geun Hye) អតីតប្រធានាធិបតីប្រទេសកូរ៉េខាងត្បូង រួចមកហើយ។ ក្រៅពីមានទំនាក់ទំនងជាមួយភ្នាក់ងារចារកម្មអាមេរិកដោយផ្ទាល់ ក៏នៅមានភ្នាក់ងារចារកម្ម និងអង្គការ NGO របស់អាមេរិកជាច្រើនទៀតដូចជា ប្រព័ន្ធផ្សព្វផ្សាយវិទ្យុអាស៊ីសេរី(RFA) វិទ្យុសម្លេងសហរដ្ឋអាមេរិក(VOA) វិទ្យុសម្លេងប្រជាធិបតេយ្យ(VOD) ជាដើមដែលត្រូវបានប្រើប្រាស់ក្នុងផែនការផ្តួលរំលំដ៏ធំមួយនេះ។
ភស្តុតាងជាក់ស្តែងមួយទៀតគឺជនជាតិអូស្ត្រាលីឈ្មោះ James Ricketson ដែលក្លែងខ្លួនជាអ្នកនិពន្ធ និងផលិតខ្សែភាពយន្តបានធ្វើចារកម្មនៅកម្ពុជា ជាយូរឆ្នាំហើយនោះ ក៏បានជ្រៀតជ្រែកចូលកិច្ចការផ្ទៃក្នុងកម្ពុជាយ៉ាងគឃ្លើន ជាពិសេសក្នុងពេលដំណើរការឃោសនាបោះឆ្នោតឃុំសង្កាត់ឆ្នាំ២០១៧ ដោយជនជាតិអូស្ត្រាលីរូបនេះបានឃុបឃិតជាមួយទណ្ឌិត សម រង្ស៊ី ថតយករូបភាព សកម្មភាពឃោសនារបស់គណបក្សសង្រ្គោះជាតិ ដើម្បីបំភ័ន្តសាធារណ:មតិ។
យោងតាមប្រភពបណ្តាញស្រាវជ្រាវនៅក្រៅប្រទេសដែលម្ចាស់ទំព័រ Facebook នេះបានបង្ហើប បានបញ្ជាក់យ៉ាងច្បាស់ថា មកដល់ពេលនេះអតីតប្រធានអង្គការ Jackson Cox (ប្រធាន IRI ប្រចាំកម្ពុជា ពីឆ្នាំ២០០៤-២០០៦) និង Lazar Antonic (ប្រធាន IRI ប្រចាំកម្ពុជា ពីឆ្នាំ២០០៦-២០០៧) គឺនៅតែបន្តអនុវត្តផែនការផ្តួលរំលំរដ្ឋាភិបាលលោកនាយករដ្ឋមន្រ្តី ហ៊ុន សែន ដដែល។ ជាក់ស្តែង កាលពីចុងខែសីហា ឆ្នាំ២០១៣ អង្គការ CANVAS ដែលជ្រកក្រោមស្លាកអង្គការ IRI បានទៅបង្រៀនថ្នាក់ដឹកនាំ និងសកម្មជនគណបក្សសង្គ្រោះជាតិ ដល់ទីស្នាក់ការបក្សប្រឆាំងតែម្តង អំពីយុទ្ធសាស្រ្ត និងយុទ្ធវិធីធ្វើបាតុកម្ម និងកុប្បកម្ម ប្រឆាំងនឹងលទ្ធផលបោះឆ្នោត ប្រសិនបើគណបក្សប្រឆាំងចាញ់ការបោះឆ្នោតនៅលើកក្រោយៗទៀត។
គេបានដឹងទៀតថា ទឹកប្រាក់ប្រមាណជា ៣៩ម៉ឺនដុល្លារអាមេរិក ត្រូវបានអង្គការ CANVAS ជួយ CNRP ក្នុងការរៀបចំផែនការ និងចាត់តាំងអនុវត្តយុទ្ធសាស្រ្ត ចងក្រងបណ្តាញជាមួយអង្គការសង្គមស៊ីវិល និងយុវជន ដើម្បីសម្រេចផែនការបោះឆ្នោតឃុំសង្កាត់ កាលពីថ្ងៃទី៤ ខែមិថុនា ឆ្នាំ២០១៧ ប៉ុន្តែ ជាអកុសល ដោយសារតែអំពើពុករលួយ និងអំពើពាលាអាវ៉ាសែ ល្បែង ស្រីស្នេហ៌ របស់មេដឹកនាំគណបក្សនេះ ទើបធ្វើឱ្យបក្សប្រឆាំងនៅតែចាញ់ឆ្នោតយ៉ាងអាម៉ាស់ដដែល។
ផ្អែកតាមឯកសារ រូបថត និងភស្តុតាងជាច្រើនចំណុចខាងលើនេះ បង្ហាញថាអង្គការ CANVAS បានធ្វើសកម្មភាពក្រោមស្លាកអង្គការ IRI ផ្ទុយទាំងស្រុងពីច្បាប់ស្តីពីសមាគម និងអង្គការមិនមែនរដ្ឋាភិបាល នៃព្រះរាជាណាចក្រកម្ពុជា។ ដូច្នេះក្នុងគោលបំណងធានាការអនុវត្តយ៉ាងត្រឹមត្រូវ និងប្រសិទ្ធភាពនូវច្បាប់នានា និងដើម្បីពង្រឹងនីតិរដ្ឋ និងការគោរពអធិបតេយ្យនៃប្រទេសមួយ អាជ្ញាធរមានសមត្ថកិច្ច ត្រូវតែបញ្ឈប់ជាបន្ទាន់នូវសកម្មភាពរបស់អង្គការមិនមែនរដ្ឋាភិបាលមួយនេះ ដើម្បីជៀសវាងនូវរងើកភ្លើងនៃការធ្វើបដិវត្តន៍ពណ៌នៅកម្ពុជា ដូចពាក្យចាស់ពោលថា «ការពារប្រសើរជាងព្យាបាល»។
មាត្រា៣៥ នៃច្បាប់ស្តីពីសមាគម និងអង្គការមិនមែនរដ្ឋាភិបាលចែងថា “ក្រសួងការបរទេស និងសហប្រតិបត្តិការអន្តរជាតិ អាចបញ្ចប់សុពលភាពអនុស្សរណៈ ក្នុងករណីដែលសមាគម ឬអង្គការមិនមែនរដ្ឋាភិបាលបរទេស អនុវត្តមិនបានត្រឹមត្រូវតាមអនុស្សរណៈដែលចុះជាមួយក្រសួងការបរទេស និងសហប្រតិបត្តិការអន្តរជាតិ ឬក្នុងករណីដែលសមាគម ឬអង្គការមិនមែនរដ្ឋាភិបាលបរទេសធ្វើសកម្មភាពប៉ះពាល់ដល់សន្តិសុខ ស្ថិរភាព និងសណ្តាប់ធ្នាប់សាធារណៈ ឬបង្កនូវភាពអន្តរាយដល់សន្តិសុខជាតិ ឯកភាពជាតិ វប្បធម៌ ប្រពៃណីទំនៀមទំលាប់របស់សង្គមជាតិកម្ពុជា។”
នៅពេលដែលរាជរដ្ឋាភិបាលអនុវត្តនូវវិធានការច្បាប់ចំពោះអង្គការមួយចំនួនតូច ដែលប្រើប្រាស់មូលនិធិរបស់សហរដ្ឋអាមេរិក ហើយធ្វើសកម្មភាពផ្ទុយពីច្បាប់កម្ពុជា គឺមិនមែនមានន័យថារដ្ឋាភិបាល និងប្រជាជននៃប្រទេសទាំងពីរបញ្ឈប់កិច្ចសហប្រតិបត្តិការគ្នានោះទេ តែជាការបញ្ឈប់នូវសកម្មភាពអត់ច្បាប់ និងអាណាធិបតេយ្យរបស់អង្គការមិនមែនរដ្ឋាភិបាលមិនគោរពច្បាប់តែប៉ុណ្ណោះ។
យើងទាំងអស់គ្នាត្រូវរក្សាឱ្យបាននូវសុខសន្តិភាព និងការអភិវឌ្ឍ។ គ្មានសន្តិភាព គឺគ្មានការអភិវឌ្ឍ និងគ្មានអ្វីៗផ្សេងទៀត ដែលបច្ចឹមប្រទេសហៅថាប្រជាធិបតេយ្យ ឬសិទ្ធិមនុស្សនោះទេ៕
ដោយ សួន ចំរើន
No comments:
Post a Comment