រដ្ឋបាលខេត្តពោធិ៍សាត់ រៀបចំពិធីប្រកាសផ្សព្វផ្សាយនិងដាក់ឱ្យដំណើរការមន្ទីរសុខាភិបាល

ពោធិ៍សាត់៖ នៅព្រឹកថ្ងៃទី១៦ ខែមិថុនា ឆ្នាំ២០២០ រដ្ឋបាលខេត្តពោធិ៍សាត់ បានរៀបចំកម្មវិធីផ្សព្វផ្សាយ និងដាក់ឱ្យដំណើរការមន្ទីរសុខាភិបាល នៃរដ្ឋបាលខេត្តពោធិ៍សាត់ ដោយមានការអញ្ជើញជាគណ:អធិបតីពីលោក ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និងលោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់ នៅវេទិកាក្នុងសាលាខេត្តពោធិ៍សាត់។

ក្នុងពិធីនេះដែរ ក៏មានការអញ្ជើញចូលរួមពីសមាជិកក្រុមប្រឹក្សាខេត្ត អភិបាលរងខេត្ត លោក លោកស្រី តំណាងសាលាដំបូងខេត្ត នាយក នាយករងរដ្ឋបាលសាលាខេត្ត កងកម្លាំងប្រដាប់អាវុធទាំងបី ប្រធាន អនុប្រធាន មន្ទីរ អង្គភាពនានាជុំវិញខេត្ត ក្រុមប្រឹក្សា និងគណៈអភិបាលក្រុងស្រុក ព្រមទាំងថ្នាក់ដឹកនាំ មន្រ្តីរាជការ និងបុគ្គលិកសុខាភិបាលខេត្តពោធិ៍សាត់ជាច្រើនទៀត។

ពិធីប្រកាសនេះមានគោលបំណងនៃការដាក់ឱ្យដំណើរការមន្ទីរសុខាភិបាលនៃរដ្ឋបាលរាជធានី-ខេត្ត បានន័យថាមន្ទីរសុខាភិបាល នៃរដ្ឋបាលរាជធានី-ខេត្ត ត្រូវបានផ្ទេរទៅឱ្យរដ្ឋបាលរាជធានីខេត្ត ជាអ្នកគ្រប់គ្រងដោយផ្ទាល់ តាមរចនាសម្ពន្ធគ្រប់គ្រងរដ្ឋបាលថ្មី៕