វិធានការក្តៅៗ ក្នុងការទប់ស្កាត់ និងបង្ក្រាបបទល្មើសចរាចរគ្រឿងញៀនខុសច្បាប់

ព្រះវិហារ៖ នៅថ្ងៃទី១៥ខែកក្កដា ឆ្នាំ២០១៩ រដ្ឋបាលខេត្តព្រះវិហារបានរៀបចំពិធីអបអសាទរខួបលើកទី៣២ទិវាអន្តរជាតិប្រយុទ្ធប្រឆាំងគ្រឿងញៀន២៦ មិថុនា ក្រោមប្រធានបទសុខភាពដើម្បីយុត្តិធម៌ យុត្តិធម៌ ដើម្បីសុខភាព ក្រោមអធិបតីភាព លោក ប្រាក់ សុវណ្ណ អភិបាលនៃគណៈអភិបាលខេត្ត ឧត្តមសេនីយ៍ឯក ថោង សុគន្ធា អគ្គលេខាធិការរងនៃអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន និងមានការចូលរួមពីមេបញ្ជាការកងកម្លាំងទាំងបីខេត្ត ប្រធានមន្ទីរអង្គភាពជុំវិញខេត្ត អភិបាលក្រុង ស្រុក លោកគ្រូអ្នកគ្រូ សិស្សានុសិស្ស យុវជនកាយរិទ្ធ យុវជនកាកបាទក្រហម យុវជនសសយកខេត្តជាច្រើនរូប។

នាឱកាសនោះ ឧត្តមសេនីយ៍ឯក ថោង សុគន្ធា បានអានសារលិខិតរបស់លោកនាយករដ្ឋមន្ត្រី ហ៊ុន សែន និងសាររបស់លោកប្រាក់ សុវណ្ណ ប្រធានគណៈកម្មាធិការត្រួតពិនិត្យ គ្រឿងញៀនខេត្តបានដាក់ចេញបន្តវិធានការបង្ការទប់ស្កាត់ និងបង្រ្កាបបទល្មើសគ្រឿងញៀនឱ្យកាន់តែមានប្រសិទ្ធភាព ហេីយមន្រ្តីសមត្ថកិច្ចគ្រប់ប្រភេទ និងគ្រប់លំដាប់ថ្នាក់ត្រូវ តែចៀសវាងឱ្យបានជាដាច់ខាតនូវ កុំ៤ គឺ កុំពាក់ព័ន្ធ កុំនៅពីក្រោយធ្វើជាបង្អែក កុំបន្ធូរបន្ថយ និងកុំអន្តរាគមន៍ ក្នុងករណីបទល្មើសគ្រឿងញៀន ហេីយធានាថាគ្មានបញ្ហាគ្រឿងញៀននៅក្នុងគ្រប់អង្គភាព វត្តអារាម សាលារៀន ទីតាំងអាជីវកម្ម ក្លឹបកំសាន្ត មូលដ្ឋាន ភូមិឃុំសង្កាត់។

លោក ប្រាក់ សុវណ្ណ កោតសសើរដល់គណៈកម្មាធិការត្រួតពិនិត្យគ្រឿងញៀនខេត្ត ក្រុង ស្រុក មន្ទីរជុំវិញខេត្ត សហការយ៉ាងជិតស្និតទប់ស្កាត់ និងបង្ក្រាបបានជាបន្តបន្ទាប់នូវបទល្មើសគ្រឿងញៀនក្នុងខេត្តបានយ៉ាងជោគជ័យ។ទន្ទឹមនឹងលោកអភិបាលខេត្តស្នើសុំបន្តខិតខំបន្ថែមទៀតនិងបានដាក់ចេញនូវវិធានការបង្កាទប់ស្កាត់គ្រឿងញៀនឲ្យបានម៉ឹងមាត់បំផុតចំនួន៨ចំណុចរួមមាន គ្រប់សមត្ថកិច្ច អាជ្ញាធរក្រុង ស្រុក ត្រូវសហការបន្តស្រាវជ្រាវត្រួតពិនិត្យនិងបំផ្លញ់ចោលគ្រឿងញៀនដែលកំពុងចរាចរ ក្នុងមូលដ្ឋានរបស់ខ្លួន ជាពិសេសការពង្រឹងត្រួតពិនិត្យតាមបណ្តាច្រកទ្វាព្រំដែនលើសបទល្មើសគ្រឿងញៀននេះឲ្យបានខ្លាំងខ្លាបំផុត ។

លោកអភិបាល ក៏បានស្នើសុំឲ្យលោកគ្រូ អ្នកគ្រូ មាតា បិតាសិស្ស ព្រះសង្ឃ ចូលរួមផ្សព្វផ្សាយណែនាំដល់គ្រោះថ្នាក់បណ្តាលមកពីគ្រឿងញៀន បំផ្លាញជិវិត អនាគតយុវជនយើងថែមទៀតផង ៕