លោក សម រង្ស៊ី ជាមនុស្ស «ឈ្លើយតពូជ» មិនអាចធ្វើការជាមួយគ្នាបានទេ

លោកនាយករដ្ឋមន្រ្តី ហ៊ុន សែន បានរិះគន់លោក សម រង្ស៊ី អតីតប្រធានគណបក្សសង្រ្គោះជាតិថា ជាមនុស្ស «ឈ្លើយតពូជ» ដែលមិនអាចឱ្យលោកបន្តធ្វើការជាដៃគូជាមួយគ្នាបាន។ លោក បានថ្លែងដូចនេះ ក្នុងឱកាសអញ្ជើញជាអធិបតីក្នុងវេទិកាជាតិលើកទី២ ស្តីពី «ការការពារ និងអភិរក្សធនធានធម្មជាតិ» នៅ វិមានសន្តិភាព រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានអះអាងថា អំឡុងពេលមានវប្បធម៌សន្ទនានោះ លោក សម រង្ស៊ី បានប្រមាថដល់កិត្តិយសលោកយ៉ាងធ្ងន់ធ្ងរនៅពីក្រោយខ្នង ក្នុងនោះរាប់ទាំងពេលជួបជុំទទួលទានអាហាររួមគ្នារវាងគ្រួសារលោក និងគ្រួសាររបស់ លោក សម រង្ស៊ី កាលពីខែកក្កដា ឆ្នាំ២០១៥ផងដែរ។ លោក បានបន្ថែមថា លោក សម រង្ស៊ី ធ្លាប់បានប្រមាថដោយប្រើពាក្យថា លោក ដឹងខ្លួនថាចាញ់ឆ្នោតហើយបានជាឱ្យកូនរបស់លោកជួបស្គាល់គ្នាជាមួយកូនរបស់លោកសម រង្ស៊ីទៅវិញ។

ប្រមុខរាជរដ្ឋាភិបាលកម្ពុជា ក៏បានចាត់ទុកថា លោក សម រង្ស៊ី គឺជាមនុស្សដែលមិនអាចទុកចិត្តបាន ដែលតែងតែលួចវាយប្រហារពេលចេញទៅក្រៅប្រទេស អំឡុងពេលភាគីទាំងពីរកំពុងមានវប្បធម៌សន្ទនា ហើយលោក បានបញ្ជាក់ថា ធ្លាប់បានស្នើលើកលែងទោសឱ្យលោក សម រង្ស៊ីចំនួន២ដងរួចទៅហើយ៕