លោកនាយករដ្ឋមន្រ្តី ហ៊ុន សែន បានថ្លែងថា កន្លងមកមានទាំងខ្មែរ និងបរទេសបានប្រមាថធ្ងន់ធ្ងរដល់អាយុជីវិតរបស់លោក និងក្រុមគ្រួសាររបស់លោក ដោយការមួលបង្កាច់ភ្ជាប់ទៅនឹងបញ្ហាផ្សេងៗ។ លោក ហ៊ុន សែន បានដាក់ជាសំនួរថា តើពួកនេះកើតមកពីអ្វី ប្រែតចាប់ជាតិឬអ្វី បានជាពួកគេធ្វើម្តងហើយម្តងទៀតដូចនេះ?
នៅក្នុងវេទិកាជាតិលើកទី២ ស្តីពី «ការការពារ និងអភិរក្សធនធានធម្មជាតិ» នៅ វិមានសន្តិភាព ក្នុងរាជធានីភ្នំពេញ ថ្ងៃទី២២ ខែសីហា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានបញ្ជាក់ថា ក្នុងចំណោមអ្នកដែលវាយប្រហារលើប្រទេសរបស់លោក រូបលោក និងគ្រួសារលោកនោះ គឺ អង្គការ Global Witness ដែលអង្គការអន្តរជាតិមួយនេះ បានចាប់ផ្តើមវាយប្រហារ និងប្រមាថដោយសរសេរថា ប្រទេសកម្ពុជាជាប្រទេសសម្រាប់លក់ និងព្រៃឈើនៅប្រទេសកម្ពុជាគឺអស់រលីងទៅហើយ។ ឆ្លើយតបនឹងការចោទប្រកាន់នេះ លោក ហ៊ុន សែនបានពន្យល់ថា តាមការពិត កម្ពុជា មានគម្របព្រៃឈើច្រើនណាស់ រួមផ្សំជាមួយតំបន់អភិរក្សផ្សេងទៀត និងតំបន់ចំការកៅស៊ូផងនោះរឹតតែច្រើន។ លោកថា ការប្រមាថបែបនេះ កើតចេញពីការសងសឹកគំនុំផ្ទាល់ខ្លួនដែលថ្នាក់ដឹកនាំអង្គការ Global witness មានរឿងអាស្រូវស្នេហាខ្លួនឯងដោះស្រាយមិនបាន ក៏ចាប់ផ្តើមវាយប្រហារប្រមាថ គឺមិនត្រឹមតែមកលើរូបលោកប៉ុណ្ណោះទេ ថែមទាំងប៉ះពាល់ដល់កិត្តិយសរបស់ប្រជាជាតិកម្ពុជាផងដែរ។ លោក ហ៊ុន សែន ថា «ប៉ុន្តែបើយោងទៅលើអ្វីដែលគេនិយាយ វាជាការប្រមាថប្រទេសមួយ ស្ទើរក្លាយជាតំបន់សាហារ៉ាខាងលិចទៅហើយ នេះហើយជាអំពើពិសពុលរបស់ពួកគេដែលមិនអាចទទួលយកបាន»។
ប្រមុខរាជរដ្ឋាភិបាលកម្ពុជា ក៏បានបញ្ជាក់ថា លោក មិនអាចទទួលយកការប្រមាថមកលើរូបលោក និងក្រុមគ្រួសារចំពោះពាក្យសម្តីថា សម្លាប់សូម្បីតែកូនក្នុងអង្រឹងក៏មិនទុកឱ្យរស់ដែរនោះទេ។ ត្រង់ចំណុចនេះហើយដែលធ្វើឱ្យលោកត្រូវប្រកាសសង្រ្គាមទុកមុនតែម្តង មិនឱ្យនរណាធ្វើផ្តេសផ្តាស់ទេ ហើយត្រកូលហ៊ុន មិនមែនសម្រាប់នរណាសម្លាប់ទេ មនុស្សទូទៅក៏ដោយ មិនមែនជាមនុស្សសម្រាប់ឱ្យគេសម្លាប់នោះដែរ៕
No comments:
Post a Comment