វេទិកាថ្នាក់ជាតិលើកទី២ ស្តីពី «ការការពារ និងអភិរក្សធនធានធម្មជាតិ» កំពុងប្រព្រឹត្ត​ទៅ​នៅ​វិមាន​សន្តិភាព

វេទិកាថ្នាក់ជាតិលើកទី២ ស្តីពី «ការការពារ  និងអភិរក្សធនធានធម្មជាតិ» កំពុងប្រព្រឹត្ត​ទៅ​នៅ​វិមាន​សន្តិភាព រាជធានីភ្នំពេញ នៅព្រឹកថ្ងៃទី២២ ខែសីហា ឆ្នាំ២០១៧ ក្រោមអធិបតី​ភាព​លោក​នាយករដ្ឋមន្ត្រី​ ហ៊ុន សែន ។ ព្រឹត្តិការណ៍នេះ មានការចូលរួមពី​បណ្តាថ្នាក់ដឹក​នាំក្រសួង​បរិស្ថាន  រួមជាមួយភាគីពាក់ព័ន្ធនានា ដែលធ្វើការងារលើវិស័យបរិស្ថាន និងធនធានធម្មជាតិ​ទាំង​អស់។ នៅក្នុងសន្ទរកថាស្វាគមន៍ បើកវេទិកា លោក សាយ សំអាល់ រដ្ឋមន្រ្តីក្រសួងបរិស្ថាន បានលើកឡើងថា វេទិកាដ៏មានសារៈសំខាន់នេះ រៀបចំឡើងជាលើកទី២ ហើយផ្តល់ឱកាស​ឱ្យតំណាង​ក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការមិនមែន​រដ្ឋាភិ​បាល​ វិស័យឯកជន សហគមន៍មូលដ្ឋាន សកម្មជនបរិស្ថាន និងអ្នកអភិរក្សធនធានធម្មជាតិ​ទាំងអស់​​បានមក​ជួបជុំ​គ្នា​នៅវិមាន​សន្តិភាពជាលើកទី២  និងទទួលបានឱកាសស្វែង​យល់អំពី​បំណង​ជាយុទ្ធសាស្រ្ត ចក្ខុវិស័យ និងបេសកកម្មរបស់រាជរដ្ឋាភិបាល ក្នុងកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព៕