លោក ឡាយ វណ្ណៈ ចុះពិនិត្យមើលផ្លូវលំដែលខូចខាតដោយ​សារ គ្រោះជំនន់​ទឹកភ្លៀងដើម្បីស្នើសុំថវិកាសម្រាប់ជួសជុល

លោក ឡាយ វណ្ណៈ អភិបាលនៃគណៈអភិបាលខេត្តតាកែវ បានដឹកនាំមន្ត្រីជំនាញពាក់ព័ន្ធចុះពិនិត្យផ្លូវលំដែលខូចខាត ដោយសារ គ្រោះទឹកជំនន់ទឹកភ្លៀងកន្លងមក នៅស្រុកបាទី ស្រុកសំរោង និងស្រុកព្រៃកប្បាស ដើម្បីធ្វើរបាយការណ៍ និងសំណើសុំថវិកាសម្រាប់ជួសជុលផ្លូវទាំងនោះ សម្រួលដល់ការធ្វើដំណើររបស់ប្រជាពលរដ្ឋកាលពីថ្ងៃទី២៨ ខែវិច្ឆិកា ឆ្នាំ២០១៦ ។

ក្នុងឱកាសនោះ លោកអភិបាលខេត្ត មានប្រសាសន៍ថា ទោះបីផ្លូវនេះរាជរដ្ឋាភិបាលជាអ្នកធ្វើក៏ពិតមែនតែវាក៏ជាកម្មសិទ្ធិរបស់បងប្អូនប្រជាពលរដ្ឋផងដែរ ហើយបងប្អូនទាំងអស់គ្នានេះហើយដែលជាអ្នកប្រើប្រាស់ផ្លូវនេះប្រចាំថ្ងៃ។ លោកអភិបាលខេត្ត ក៏បានផ្តាំផ្ញើដល់បងប្អូនប្រជាពលរដ្ឋ ចូលរួមថែរក្សាផ្លូវទាំងអស់គ្នាដើម្បីជាប្រយោជន៍រួមរបស់បងប្អូន។

សូមបញ្ជាក់ផងថា កន្លងមកទឹកភ្លៀងបានធ្លាក់ជាបន្តបន្ទាប់បណ្តាលឱ្យខូចខាតផ្លូវលំមួយចំនួននៅតាមបណ្តាស្រុកនានាក្នុងខេត្តតាកែវដែលបង្កការលំបាកដល់ប្រជាពលរដ្ឋក្នុងការធ្វើដំណើរ៕