Tuesday, March 24, 2015

សម្តេច​តេជោ ហ៊ុន សែន អនុញ្ញាត​ឱ្យ​ឯកឧត្តម សម កែវ​ស៊ី​ឡា​វង្ស ចូល​ជួប​សំដែងការគួរសម

សម្តេចតេជោប្រមុខរាជរដ្ឋាភិបាលកម្ពុជា ជំរុញឱ្យភាគីឡាវបន្តសហការលើវិស័យសន្តិសុខ​នៅតាមព្រំដែន រួមទាំងការសាងសង់ស្ពាន ដើម្បីសម្រួល ដល់ប្រជាជន​នៅតាម​ព្រំដែន នៃ​ប្រទេសទាំងពីរ។​
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា  បានលើក​ឡើងនូវប្រសាសន៍​បែបនេះក្នុងឱកាសអនុញ្ញាត​ឱ្យឯកឧត្តម សមកែវ ស៊ីឡាវង្ស រដ្ឋមន្ត្រីស្តីទីក្រសួងសន្តិសុខសាធារណៈឡាវ ​ចូលជួប​សំដែង​ការគួរសម​នៅវិមាន​សន្តិ​ភាព រសៀលថ្ងៃទី២៣ខែមីនា ឆ្នាំ​២០១៥​ នេះ ។
​ឯកឧត្តមបណ្ឌិត កៅ កឹមហួន រដ្ឋមន្រ្តីប្រតិភូអមនាយករ​ដ្ឋមន្រ្តីបានមាន​ប្រសាសន៏​ក្រោយ​ជំនួបថា៖ ឯកឧត្តម សម កែវស៊ីឡាវង្ស បានជំរាបជូនសម្តេចតេជោនាយករដ្ឋមន្ត្រី ពី​លទ្ធ​ផល​នៃកិច្ចប្រជុំទ្វេភាគីរវាងប្រតិភូឡាវជាមួយក្រសួងមហាផ្ទៃកម្ពុជា ដែល​បានបញ្ចប់​ថ្មីៗ​នេះ  ហើយ​ប្រតិភូក៏នឹងអញ្ជើញទៅទៅទស្សនកិច្ចនៅខេត្តកែប និងខេត្ត​កំពត ។ ឯកឧត្តម​បន្ត​ថា ក្នុងនាមរដ្ឋាភិបាល និងប្រជាជនឡាវ នឹងខិតខំ​ជំរុញ​ផ្លាស់ប្តូរ​បទពិសោធន៍​ពីគ្នា​ទៅវិញ​ទៅមក ជាពិសេសរវាងក្រសួងសន្តិសុខឡាវ និងក្រសួង​មហាផ្ទៃ​កម្ពុជា ។ មួយវិញទៀត ក្រសួង​ទាំងពីរ នឹងខិតខំ​ធ្វើយ៉ាងណាជំរុញ​ដោះស្រាយ​នូវបញ្ហាដែល​នៅសេស​សល់​ជាមួយ​គ្នាជាបន្ត ​ទៀត។ក្រៅពីនេះភាគីទាំងពីរ ក៏បាន​ចុះហត្ថ​លេខា​​លើកំណត់​ហេតុ​នៃកិច្ច​ប្រជុំ​នៅ​ពេលនេះ ផងដែរ​ដើម្បីផ្លាស់ប្តូរនិស្សិតបានទៅសិក្សានៅប្រទេសទាំងពីរ មានន័យថា និស្សិត​កម្ពុជា​បាន​ទៅ សិ​ក្សា​នៅឡាវ និង​និស្សិតឡាវ បានមកសិក្សា នៅប្រទេសកម្ពុជា។
ទន្ទឹមនេះដែរ ឯកឧត្តម សម កែវស៊ីឡាវង្ស ក៏បានសុំអនុសាសន៍​ពីសម្តេច​តេជោ​នាយក​រដ្ឋមន្ត្រី ដើម្បីធ្វើ​យ៉ាងណា​ឱ្យ​ប្រទេសទាំងពីរ បានបន្តកិច្ចការជាមួយគ្នា។
ឆ្លើយតបនឹងបញ្ហានេះ សម្តេចតេជោ  បានមានប្រសាសន៍ថា បញ្ហាសន្តិសុខ ជាបញ្ហា​សំខាន់ សម្រាប់ ប្រជាជន នៃប្រទេសទាំងពីរ ហើយដោយ​យើងមាន​ភូមិផង​របង​ជាប់​គ្នានោះ គឺធ្វើ យ៉ាងណាខិត​ខំបន្តកិច្ចសហប្រតិ​បត្តិការ​លើវិស័យ​សន្តិសុខ​នៅតាម​ព្រំដែន​ ឱ្យបាន​គ្រប់​ជ្រុង ជ្រោយ រួមទាំង​ការងារ​ជាច្រើន​ទៀតដែល​ត្រូវបន្ត​ធ្វើរួមគ្នា​ដូចជា​ការទប់​ស្កាត់​ បទ​ល្មើស​ការ កាប់ឈើខុសច្បាប់នៅតាមព្រំដែន និងសម្រួល​ធ្វើយ៉ាង​ណាឱ្យប្រជា​ពល​រដ្ឋ​នៅតាម​ព្រំដែន មានការទៅមករកគ្នា ជាពិសេស​ការប្រើ​ប្រាស់​ទឹកបានដោយងាយស្រួល ។
ជាង​នេះទៀត សម្តេចតេជោ បានជំរុញឱ្យការសាងសង់ស្ពានបានឆាប់ ដើម្បីឱ្យ​ប្រជា​ពល​រដ្ឋ​នៃ​ប្រទេសទាំង ពីរមានភាពងាយស្រួល​ក្នុងការ​ចេញចូល​ប្រកបមុខ​របរ​រកស៊ី​ជាមួយគ្នា៕

No comments:

Post a Comment