បទអត្ថាធិប្បាយ​ ដោយ៖ សួន​ចំរើន​, ការចោទ​ប្រកាន់​​អំពី​​បញ្ហា​​សិទ្ធិ​មនុស្ស​​ធ្ងន់​ធ្ងរ​ របស់​​ក្រុម​​សង្គម​​ស៊ីវិល​ ជារឿង​​មិន​ពិត​

Tuesday, March 24, 2015

បទអត្ថាធិប្បាយ ដោយ៖ សួនចំរើន, ការចោទប្រកាន់អំពីបញ្ហាសិទ្ធិមនុស្សធ្ងន់ធ្ងរ របស់ក្រុមសង្គមស៊ីវិល ជារឿងមិនពិត

ជាទូទៅ គេមិនអាចនិយាយ ឬចោទប្រកាន់ថា ប្រទេសមួយមានការបំបិទសិទ្ធិសេរីភាពបញ្ចេញមតិ និងបំបិទសិទ្ទិប្រមូលផ្តុំ ឬបញ្ហាសិទ្ធិមនុស្សនៅតែជាចំណោទដ៏ធ្ងន់ធ្ងរ នៅពេលដែលសង្គមស៊ីវិលក្នុងស្រុកអាចប្រមូលផ្តុំគ្នាធ្វើការ រិះគន់ ធ្វើសកម្មភាពប្រឆាំងគ្រប់រឿង និងធ្វើរបាយការណ៍ទៅគណៈកម្មាធិការសិទ្ទិមនុស្សរបស់អង្គការ សហប្រជាជាតិ មានកំរាស់រហូតដល់ទៅ៨៦ទំព័រនោះបានឡើយ។ របាយការណ៍នេះគឺវាហាក់ដូចជាមិនស៊ីគ្នាទៅនឹងចរន្តពិតដែលកើត មានឡើង និងសកម្មភាពដែលក្រុមអង្គការទាំងនោះកំពុងប្រព្រឹត្តិនៅក្នុងប្រទេស កម្ពុជា ទាល់តែសោះ។

តើការដែលក្រុមសង្គមស៊ីវិលទាំងនោះអាចចងក្រងគ្នាជាក្រុមនៅគ្រប់ កម្រិតមូលដ្ឋានសហគមន៍ អាចប្រមូលផ្តុំគ្នាជាសម្ព័ន្ធ និងអាចធ្វើសកម្មភាពដោយសេរី បែរជាត្រូវបានចាត់ទុកថាជាការប្រឈមនឹងបញ្ហាសិទ្ធិមនុស្សឬយ៉ាង ណា? ចំណុចនេះ យើងសង្ឃឹមថា គណៈកម្មាធិការសិទ្ធិមនុស្សរបស់អង្គការសហប្រជាជាតិ ប្រាកដជាចេះថ្លឹងថ្លែង និងធ្វើការវាយតម្លៃដោយយុត្តិធម៌ ជាមិនខាន។

តាម ការពិតក្រុមសង្គមស៊ីវិលទាំងនោះ បានសរសេររបាយការណ៍របស់ខ្លួន ដោយច្បិចយកតែចំណុចអវិជ្ជមានបន្តិចបន្តួចនៅក្នុងសង្គម ដែលបញ្ហាទាំងនោះក៏បានកើតមាននៅប្រទេសនានា និងបណ្តាប្រទេសដែលអួតខ្លួនថាគោរពសិទ្ធិមនុស្សបានល្អបំផុត នោះក៏មានផងដែរ។ ជាក់ស្តែង សូម្បីតែប្រទេសអាមេរិក ដែលអួតអាងខ្លួនឯងថាជាបិតាសិទ្ធិមនុស្ស និងប្រជាធិបតេយ្យ ក៏គង់អនុវត្តការចាប់សមាជិកសភា ៨នាក់របស់គណបក្សប្រជាធិបតេយ្យនៅក្នុងប្រទេសរបស់ខ្លួន ដែលកំពុងស្ថិតក្នុងតំណែងយកទៅឃុំឃាំងយ៉ាងកម្រោល ដោយគ្រាន់តែពួកគេធ្វើបាតុកម្មអោយមានការកែទម្រង់ច្បាប់អន្តោប្រវេសន៍កាលពីថ្ងៃទី០៨ ខែតុលា ឆ្នាំ២០១៣ គឺប្រមាណជា២ខែក្រោយកម្ពុជាធ្វើការបោះឆ្នោតរួចប៉ុណ្ណោះ។

ក្រុមអង្គការសង្គមស៊ីវិលនៅក្នុ្ងងប្រទេសកម្ពុជា ដែលមានជំនាញតែខាងរិះគន់ទាំងនោះ បានលើកឡើងថា សិទ្ធិប្រមូលផ្តុំ សេរីភាពបញ្ចេញមតិ ប្រព័ន្ធតុលាការមិនឯករាជ្យ និងវិសមភាពផ្នែកជេនឌឺ (Gender) នៅតែជាបញ្ហាប្រឈម។ ប៉ុន្ដែពួកគេមិនបានលើកឡើងនោះទេ អំពីការដែលអនុញ្ញាតអោយជនអន្ធពាលមួយក្រុមតូចប្រើសិទ្ធិប្រមូល ផ្តុំរបស់ខ្លួនហួសហេតុធ្វើកុប្បកម្មបិទផ្លូវ វាយបំផ្លាញទ្រព្យសម្បត្តិសារធារណៈ និងឯកជន និងការបណ្ដែតបណ្ដោយអោយអ្នកនយោបាយមួយក្ដាប់តូច ញុះញង់ប្រជាជនអោយប្រព្រឹត្តអំពើហិង្សា បង្កចលាចលក្នុងសង្គម តើនោះអាចចាត់ទុកថា ជាការបញ្ចេញសិទ្ធិសេរីភាពរបស់ពួកគេឬទេ?

បរិបទនៃសិទ្ធិ មនុស្ស និងប្រជាធិបតេយ្យក្នុងប្រទេសនីមួយៗគឺវាផ្សេងៗគ្នា។ ការអនុវត្តសិទ្ធិមនុស្ស និងប្រជាធិបតេយ្យវាមានអត្ថន័យទូលំទូលាយ ប៉ុន្ដែវាក៏ងាយក្លាយទៅជាអនាធិបតេយ្យប្រសិនបើគេមិនកំណត់ ឲ្យបានច្បាស់លាស់អំពីអត្ថន័យ និងព្រំដែនសកម្មភាពរបស់វានោះទេ។

ការលើកឡើងរបស់អង្គការសង្គមស៊ីវិល ដែលមាននិន្នាការប្រឆាំងទាំងនោះ គឺគ្រាន់តែជាការលើកឡើងដើម្បីបង្ខូចមុខមាត់រាជរដ្ឋាភិបាល និងដើម្បីជារបាយការណ៍សកម្មភាពការងាររបស់ខ្លួនប្រចាំឆ្នាំ តែប៉ុណ្ណោះ។ របាយការណ៍នេះគឺមិនបានឆ្លុះបញ្ចាំងអំពីបញ្ហាសិទ្ធិមនុស្សជាទូទៅនោះទេ តែវាឆ្លុះបញ្ចាំងតែផ្នែកអវិជ្ជមានតូចមួយនៃបញ្ហាសិទ្ធិមនុស្សនៅកម្ពុជាតែប៉ុណ្ណោះ។ ការស្រែកបំពុលបរិយាកាស របស់ក្រុមសង្គមស៊ីវិលទាំងនោះ តែងតែធ្វើឡើងស្របពេលទៅនឹងព្រឹត្តិការណ៍ដែលមានកិច្ចប្រជុំអន្តរជាតិនានា ដែលទាក់ទងទៅនិងព្រឹត្តិការណ៍នេះ ក្នុងន័យដើម្បីទទួលបាននូវ ផលប្រយោជន៍ថវិកាចិញ្ចឹមឆ្នាំងបាយរបស់ក្រុមគេតែប៉ុណ្ណោះ។ អាចនិយាយបានម្យ៉ាងទៀតថា បើពួកគេចង់និយាយអំពីបញ្ហាសិទ្ធិមនុស្ស គឺសូមនិយាយអំពីសិទ្ធិមនុស្សដើម្បីយើងទាំងអស់គ្នា សូមកុំធ្វើការងារសិទ្ធិមនុស្ស ដើម្បីតែផលប្រយោជន៍ធ្វើមានធ្វើបាន សម្រាប់ក្រុមរបស់ខ្លួន និងដើម្បី ផលប្រយោជន៍នយោបាយនៅពីក្រោយខ្នង។

ជារួម មកដល់បច្ចុប្បន្ននេះ រាជរដ្ឋាភិបាលបានលើកស្ទួយសិទ្ធិពលរដ្ឋលើគ្រប់វិស័យ ជាពិសេសក្រៅពីសិទ្ធិរស់រានមានជីវិត គឺសិទ្ធិនៃការលើកស្ទួយសេរីភាពសារព័ត៌មាន និងការបញ្ចេញមតិដូចមានចែងក្នុងរដ្ឋធម្មនុញ្ញ និងច្បាប់ស្តីពីរបបសារព័ត៌មាន។ រាជរដ្ឋាភិបាល បានពង្រឹង និងពង្រីកកាន់តែទូលាយនូវការគោរពសិទ្ធិមនុស្ស និងលទ្ធិប្រជាធិបតេយ្យ ដែលធ្វើឲ្យអន្តរជាតិទទួលស្គាល់កាន់តែច្រើនទាំងនៅក្នុងតំបន់ និងលើពិភពលោក។ តាមការវាយតម្លៃលើផ្នែកសិទ្ធិមនុស្សកន្លងមក ព្រះរាជាណាចក្រកម្ពុជា គឺមានភាពប្រសើរជាងបណ្តាប្រទេសជិតខាងមួយចំនួនក្នុងតំបន់។ ដូច្នេះ ការលើកឡើងនៅក្នុងរបាយការណ៍ របស់ក្រុមអង្គការសង្គមស៊ីវិលមួយចំនួនតូចអំពីភាពអវិជ្ជមាននៃសិទ្ធិមនុស្សនោះ គឺពិតជាមិនអាចយកជាការនោះទេ សំខាន់គឺរាជរដ្ឋាភិបាលនៅតែមានឆន្ទៈបន្តលើកស្ទួយបញ្ហាសិទ្ធិមនុស្សដែលនៅមានការខ្វះខាតខ្លះៗ ឲ្យបានកាន់តែប្រសើរឡើងនោះទើបប្រទេសកាន់តែមានការអភិវឌ្ឍ៕

Pages

Tuesday, March 24, 2015

No comments:

Post a Comment